໕. ພາລວຄ຺ໂຄ

໖໐. ທີຆາ ຊາຄຣໂຕ ຣຕ຺ຕິ, ທີຆໍ ສນ຺ຕສ຺ສ ໂຍຊນໍ;

ທີໂຆ ພາລານໍ ສໍສາໂຣ, ສທ຺ຘມ຺ມໍ ອວິຊານຕໍ.

໖໑. ຈຣຎ຺ເຈ ນາຘິຄຈ຺ເຉຍ຺ຍ, ເສຍ຺ຍໍ ສທິສມຕ຺ຕໂນ;

ເອກຈຣິຍໍ [ເອກຈຣິຍໍ (ກ.)] ທຬ຺ຫໍ ກຍິຣາ, ນຕ຺ຖິ ພາເລ ສຫາຍຕາ.

໖໒. ປຸຕ຺ຕາ ມຕ຺ຖິ ຘນມ຺ມຕ຺ຖິ [ປຸຕ຺ຕມຕ຺ຖິ ຘນມຕ຺ຖິ (ກ.)], ອິຕິ ພາໂລ ວິຫຎ຺ຎຕິ;

ອຕ຺ຕາ ຫິ [ອຕ຺ຕາປິ (?)] ອຕ຺ຕໂນ ນຕ຺ຖິ, ກຸໂຕ ປຸຕ຺ຕາ ກຸໂຕ ຘນໍ.

໖໓. ໂຍ ພາໂລ ມຎ຺ຎຕິ ພາລ຺ຍໍ, ປຓ຺ຑິໂຕ ວາປິ ເຕນ ໂສ;

ພາໂລ ຈ ປຓ຺ຑິຕມານີ, ສ ເວ ‘‘ພາໂລ’’ຕິ ວຸຈ຺ຈຕິ.

໖໔. ຍາວຊີວມ຺ປິ ເຈ ພາໂລ, ປຓ຺ຑິຕໍ ປຍິຣຸປາສຕິ;

ນ ໂສ ຘມ຺ມໍ ວິຊານາຕິ, ທພ຺ພີ ສູປຣສໍ ຍຖາ.

໖໕. ມຸຫຸຕ຺ຕມປິ ເຈ ວິຎ຺ຎູ, ປຓ຺ຑິຕໍ ປຍິຣຸປາສຕິ;

ຂິປ຺ປໍ ຘມ຺ມໍ ວິຊານາຕິ, ຊິວ຺ຫາ ສູປຣສໍ ຍຖາ.

໖໖. ຈຣນ຺ຕິ ພາລາ ທຸມ຺ເມຘາ, ອມິຕ຺ເຕເນວ ອຕ຺ຕນາ;

ກໂຣນ຺ຕາ ປາປກໍ ກມ຺ມໍ, ຍໍ ໂຫຕິ ກຏຸກປ຺ຜລໍ.

໖໗. ນ ຕໍ ກມ຺ມໍ ກຕໍ ສາຘຸ, ຍໍ ກຕ຺ວາ ອນຸຕປ຺ປຕິ;

ຍສ຺ສ ອສ຺ສຸມຸໂຂ ໂຣທໍ, ວິປາກໍ ປຏິເສວຕິ.

໖໘. ຕຎ຺ຈ ກມ຺ມໍ ກຕໍ ສາຘຸ, ຍໍ ກຕ຺ວາ ນານຸຕປ຺ປຕິ;

ຍສ຺ສ ປຕີໂຕ ສຸມໂນ, ວິປາກໍ ປຏິເສວຕິ.

໖໙. ມຘຸວາ [ມຘຸໍ ວາ (ທີ. ນິ. ຏີກາ ໑)] ມຎ຺ຎຕິ ພາໂລ, ຍາວ ປາປໍ ນ ປຈ຺ຈຕິ;

ຍທາ ຈ ປຈ຺ຈຕິ ປາປໍ, ພາໂລ [ອຖ ພາໂລ (ສີ. ສ຺ຍາ.) ອຖ (?)] ທຸກ຺ຂໍ ນິຄຈ຺ຉຕິ.

໗໐. ມາເສ ມາເສ ກຸສຄ຺ເຄນ, ພາໂລ ຠຸຎ຺ເຊຍ຺ຍ ໂຠຊນໍ;

ນ ໂສ ສງ຺ຂາຕຘມ຺ມານໍ [ສງ຺ຂຕຘມ຺ມານໍ (ສີ. ປີ. ກ.)], ກລໍ ອຄ຺ຆຕິ ໂສຬສິໍ.

໗໑. ນ ຫິ ປາປໍ ກຕໍ ກມ຺ມໍ, ສຊ຺ຊຸ ຂີຣໍວ ມຸຈ຺ຈຕິ;

ຑຫນ຺ຕໍ ພາລມນ຺ເວຕິ, ຠສ຺ມຈ຺ຉນ຺ໂນວ [ຠສ຺ມາຉນ຺ໂນວ (ສີ. ປີ. ກ.)] ປາວໂກ.

໗໒. ຍາວເທວ ອນຕ຺ຖາຍ, ຎຕ຺ຕໍ [ຎາຕໍ (?)] ພາລສ຺ສ ຊາຍຕິ;

ຫນ຺ຕິ ພາລສ຺ສ ສຸກ຺ກໍສໍ, ມຸທ຺ຘມສ຺ສ ວິປາຕຍໍ.

໗໓. ອສນ຺ຕໍ ຠາວນມິຈ຺ເຉຍ຺ຍ [ອສນ຺ຕໍ ຠາວມິຈ຺ເຉຍ຺ຍ (ສ຺ຍາ.), ອສນ຺ຕຠາວນມິຈ຺ເຉຍ຺ຍ (ກ.)], ປຸເຣກ຺ຂາຣຎ຺ຈ ຠິກ຺ຂຸສຸ;

ອາວາເສສຸ ຈ ອິສ຺ສຣິຍໍ, ປູຊາ ປຣກຸເລສຸ ຈ.

໗໔. ມເມວ ກຕ ມຎ຺ຎນ຺ຕຸ, ຄິຫີປພ຺ພຊິຕາ ອຸໂຠ;

ມເມວາຕິວສາ ອສ຺ສຸ, ກິຈ຺ຈາກິຈ຺ເຈສຸ ກິສ຺ມິຈິ;

ອິຕິ ພາລສ຺ສ ສງ຺ກປ຺ໂປ, ອິຈ຺ຉາ ມາໂນ ຈ ວຑ຺ຒຕິ.

໗໕. ອຎ຺ຎາ ຫິ ລາຠູປນິສາ, ອຎ຺ຎາ ນິພ຺ພານຄາມິນີ;

ເອວເມຕໍ ອຠິຎ຺ຎາຍ, ຠິກ຺ຂຸ ພຸທ຺ຘສ຺ສ ສາວໂກ;

ສກ຺ກາຣໍ ນາຠິນນ຺ເທຍ຺ຍ, ວິເວກມນຸພ຺ຣູຫເຍ.

ພາລວຄ຺ໂຄ ປຎ຺ຈໂມ ນິຏ຺ຐິໂຕ.