໒໕. ຠິກ຺ຂຸວຄ຺ໂຄ

໓໖໐. ຈກ຺ຂຸນາ ສໍວໂຣ ສາຘຸ, ສາຘຸ ໂສເຕນ ສໍວໂຣ;

ຆາເນນ ສໍວໂຣ ສາຘຸ, ສາຘຸ ຊິວ຺ຫາຍ ສໍວໂຣ.

໓໖໑. ກາເຍນ ສໍວໂຣ ສາຘຸ, ສາຘຸ ວາຈາຍ ສໍວໂຣ;

ມນສາ ສໍວໂຣ ສາຘຸ, ສາຘຸ ສພ຺ພຕ຺ຖ ສໍວໂຣ;

ສພ຺ພຕ຺ຖ ສໍວຸໂຕ ຠິກ຺ຂຸ, ສພ຺ພທຸກ຺ຂາ ປມຸຈ຺ຈຕິ.

໓໖໒. ຫຕ຺ຖສໍຍໂຕ ປາທສໍຍໂຕ, ວາຈາສໍຍໂຕ ສໍຍຕຸຕ຺ຕໂມ;

ອຊ຺ຌຕ຺ຕຣໂຕ ສມາຫິໂຕ, ເອໂກ ສນ຺ຕຸສິໂຕ ຕມາຫຸ ຠິກ຺ຂຸໍ.

໓໖໓. ໂຍ ມຸຂສໍຍໂຕ ຠິກ຺ຂຸ, ມນ຺ຕຠາຓີ ອນຸທ຺ຘໂຕ;

ອຕ຺ຖໍ ຘມ຺ມຎ຺ຈ ທີເປຕິ, ມຘຸຣໍ ຕສ຺ສ ຠາສິຕໍ.

໓໖໔. ຘມ຺ມາຣາໂມ ຘມ຺ມຣໂຕ, ຘມ຺ມໍ ອນຸວິຈິນ຺ຕຍໍ;

ຘມ຺ມໍ ອນຸສ຺ສຣໍ ຠິກ຺ຂຸ, ສທ຺ຘມ຺ມາ ນ ປຣິຫາຍຕິ.

໓໖໕. ສລາຠໍ ນາຕິມຎ຺ເຎຍ຺ຍ, ນາຎ຺ເຎສໍ ປິຫຍໍ ຈເຣ;

ອຎ຺ເຎສໍ ປິຫຍໍ ຠິກ຺ຂຸ, ສມາຘິໍ ນາຘິຄຈ຺ຉຕິ.

໓໖໖. ອປ຺ປລາໂຠປິ ເຈ ຠິກ຺ຂຸ, ສລາຠໍ ນາຕິມຎ຺ຎຕິ;

ຕໍ ເວ ເທວາ ປສໍສນ຺ຕິ, ສຸທ຺ຘາຊີວິໍ ອຕນ຺ທິຕໍ.

໓໖໗. ສພ຺ພໂສ ນາມຣູປສ຺ມິໍ, ຍສ຺ສ ນຕ຺ຖິ ມມາຍິຕໍ;

ອສຕາ ຈ ນ ໂສຈຕິ, ສ ເວ ‘‘ຠິກ຺ຂູ’’ຕິ ວຸຈ຺ຈຕິ.

໓໖໘. ເມຕ຺ຕາວິຫາຣີ ໂຍ ຠິກ຺ຂຸ, ປສນ຺ໂນ ພຸທ຺ຘສາສເນ;

ອຘິຄຈ຺ເຉ ປທໍ ສນ຺ຕໍ, ສງ຺ຂາຣູປສມໍ ສຸຂໍ.

໓໖໙. ສິຎ຺ຈ ຠິກ຺ຂຸ ອິມໍ ນາວໍ, ສິຕ຺ຕາ ເຕ ລຫຸເມສ຺ສຕິ;

ເຉຕ຺ວາ ຣາຄຎ຺ຈ ໂທສຎ຺ຈ, ຕໂຕ ນິພ຺ພານເມຫິສິ.

໓໗໐. ປຎ຺ຈ ຉິນ຺ເທ ປຎ຺ຈ ຊເຫ, ປຎ຺ຈ ຈຸຕ຺ຕຣິ ຠາວເຍ;

ປຎ຺ຈ ສງ຺ຄາຕິໂຄ ຠິກ຺ຂຸ, ‘‘ໂອຆຕິຓ຺ໂຓ’’ຕິ ວຸຈ຺ຈຕິ.

໓໗໑. ຌາຍ ຠິກ຺ຂຸ [ຌາຍ ຕຸວໍ ຠິກ຺ຂຸ (?)] ມາ ປມາໂທ [ມາ ຈ ປມາໂທ (ສີ. ສ຺ຍາ. ປີ.)], ມາ ເຕ ກາມຄຸເຓ ຣເມສ຺ສຸ [ຠມສ຺ສຸ (ສີ. ປີ.), ຠວສ຺ສຸ (ສ຺ຍາ.), ຣມສ຺ສຸ (ກ.)] ຈິຕ຺ຕໍ;

ມາ ໂລຫຄຸຬໍ ຄິລີ ປມຕ຺ໂຕ, ມາ ກນ຺ທິ ‘‘ທຸກ຺ຂມິທ’’ນ຺ຕິ ຑຍ຺ຫມາໂນ.

໓໗໒. ນຕ຺ຖິ ຌານໍ ອປຎ຺ຎສ຺ສ, ປຎ຺ຎາ ນຕ຺ຖິ ອຌາຍໂຕ [ອຊ຺ຌາຍິໂນ (ກ.)];

ຍມ຺ຫິ ຌານຎ຺ຈ ປຎ຺ຎາ ຈ, ສ ເວ ນິພ຺ພານສນ຺ຕິເກ.

໓໗໓. ສຸຎ຺ຎາຄາຣໍ ປວິຏ຺ຐສ຺ສ, ສນ຺ຕຈິຕ຺ຕສ຺ສ ຠິກ຺ຂຸໂນ;

ອມານຸສີ ຣຕິ ໂຫຕິ, ສມ຺ມາ ຘມ຺ມໍ ວິປສ຺ສໂຕ.

໓໗໔. ຍໂຕ ຍໂຕ ສມ຺ມສຕິ, ຂນ຺ຘານໍ ອຸທຍພ຺ພຍໍ;

ລຠຕີ [ລຠຕິ (ປີ.), ລຠເຕ (ກ.)] ປີຕິປາໂມຊ຺ຊໍ, ອມຕໍ ຕໍ ວິຊານຕໍ.

໓໗໕. ຕຕ຺ຣາຍມາທິ ຠວຕິ, ອິຘ ປຎ຺ຎສ຺ສ ຠິກ຺ຂຸໂນ;

ອິນ຺ທ຺ຣິຍຄຸຕ຺ຕິ ສນ຺ຕຸຏ຺ຐິ, ປາຕິໂມກ຺ເຂ ຈ ສໍວໂຣ.

໓໗໖. ມິຕ຺ເຕ ຠຊສ຺ສຸ ກລ຺ຍາເຓ, ສຸທ຺ຘາຊີເວ ອຕນ຺ທິເຕ;

ປຏິສນ຺ຖາຣວຸຕ຺ຍສ຺ສ [ປຏິສນ຺ຘາຣວຸຕ຺ຍສ຺ສ (ກ.)], ອາຈາຣກຸສໂລ ສິຍາ;

ຕໂຕ ປາໂມຊ຺ຊພຫຸໂລ, ທຸກ຺ຂສ຺ສນ຺ຕໍ ກຣິສ຺ສຕິ.

໓໗໗. ວສ຺ສິກາ ວິຍ ປຸປ຺ຜານິ, ມທ຺ທວານິ [ມຊ຺ຊວານິ (ກ. ຏີກາ) ປຈ຺ຈວານິ (ກ. ອຏ຺ຐ.)] ປມຸຎ຺ຈຕິ;

ເອວໍ ຣາຄຎ຺ຈ ໂທສຎ຺ຈ, ວິປ຺ປມຸຎ຺ເຈຖ ຠິກ຺ຂໂວ.

໓໗໘. ສນ຺ຕກາໂຍ ສນ຺ຕວາໂຈ, ສນ຺ຕວາ ສຸສມາຫິໂຕ [ສນ຺ຕມໂນ ສຸສມາຫິໂຕ (ສ຺ຍາ. ປີ.), ສນ຺ຕມໂນ ສມາຫິໂຕ (ກ.)];

ວນ຺ຕໂລກາມິໂສ ຠິກ຺ຂຸ, ‘‘ອຸປສນ຺ໂຕ’’ຕິ ວຸຈ຺ຈຕິ.

໓໗໙. ອຕ຺ຕນາ ໂຈທຍຕ຺ຕານໍ, ປຏິມໍເສຖ ອຕ຺ຕນາ [ປຏິມາເສ ອຕ຺ຕມຕ຺ຕນາ (ສີ. ປີ.), ປຏິມໍເສ ຕມຕ຺ຕນາ (ສ຺ຍາ.)];

ໂສ ອຕ຺ຕຄຸຕ຺ໂຕ ສຕິມາ, ສຸຂໍ ຠິກ຺ຂຸ ວິຫາຫິສິ.

໓໘໐. ອຕ຺ຕາ ຫິ ອຕ຺ຕໂນ ນາໂຖ, (ໂກ ຫິ ນາໂຖ ປໂຣ ສິຍາ) [( ) ວິເທສໂປຕ຺ຖເກສຸ ນຕ຺ຖິ]

ອຕ຺ຕາ ຫິ ອຕ຺ຕໂນ ຄຕິ;

ຕສ຺ມາ ສໍຍມມຕ຺ຕານໍ [ສໍຍມຍ’ຕ຺ຕານໍ (ສີ. ປີ.)], ອສ຺ສໍ ຠທ຺ຣໍວ ວາຓິໂຊ.

໓໘໑. ປາໂມຊ຺ຊພຫຸໂລ ຠິກ຺ຂຸ, ປສນ຺ໂນ ພຸທ຺ຘສາສເນ;

ອຘິຄຈ຺ເຉ ປທໍ ສນ຺ຕໍ, ສງ຺ຂາຣູປສມໍ ສຸຂໍ.

໓໘໒. ໂຍ ຫເວ ທຫໂຣ ຠິກ຺ຂຸ, ຍຸຎ຺ຊຕິ ພຸທ຺ຘສາສເນ;

ໂສມໍ [ໂສ ອິມໍ (ສີ. ສ຺ຍາ. ກໍ. ປີ.)] ໂລກໍ ປຠາເສຕິ, ອພ຺ຠາ ມຸຕ຺ໂຕວ ຈນ຺ທິມາ.

ຠິກ຺ຂຸວຄ຺ໂຄ ປຎ຺ຈວີສຕິໂມ ນິຏ຺ຐິໂຕ.