໒໒. ນິຣຍວຄ຺ໂຄ

໓໐໖. ອຠູຕວາທີ ນິຣຍໍ ອຸເປຕິ, ໂຍ ວາປິ [ໂຍ ຈາປິ (ສີ. ປີ. ກ.)] ກຕ຺ວາ ນ ກໂຣມິ ຈາຫ [ນ ກໂຣມີຕິ ຈາຫ (ສ຺ຍາ.)];

ອຸໂຠປິ ເຕ ເປຈ຺ຈ ສມາ ຠວນ຺ຕິ, ນິຫີນກມ຺ມາ ມນຸຊາ ປຣຕ຺ຖ.

໓໐໗. ກາສາວກຓ຺ຐາ ພຫໂວ, ປາປຘມ຺ມາ ອສຎ຺ຎຕາ;

ປາປາ ປາເປຫິ ກມ຺ເມຫິ, ນິຣຍໍ ເຕ ອຸປປຊ຺ຊເຣ.

໓໐໘. ເສຍ຺ໂຍ ອໂຍຄຸໂຬ ຠຸຕ຺ໂຕ, ຕຕ຺ໂຕ ອຄ຺ຄິສິຂູປໂມ;

ຍຎ຺ເຈ ຠຸຎ຺ເຊຍ຺ຍ ທຸສ຺ສີໂລ, ຣຏ຺ຐປິຓ຺ຑມສຎ຺ຎໂຕ.

໓໐໙. ຈຕ຺ຕາຣິ ຐານານິ ນໂຣ ປມຕ຺ໂຕ, ອາປຊ຺ຊຕິ ປຣທາຣູປເສວີ;

ອປຸຎ຺ຎລາຠໍ ນ ນິກາມເສຍ຺ຍໍ, ນິນ຺ທໍ ຕຕີຍໍ ນິຣຍໍ ຈຕຸຕ຺ຖໍ.

໓໑໐. ອປຸຎ຺ຎລາໂຠ ຈ ຄຕີ ຈ ປາປິກາ, ຠີຕສ຺ສ ຠີຕາຍ ຣຕີ ຈ ໂຖກິກາ;

ຣາຊາ ຈ ທຓ຺ຑໍ ຄຣຸກໍ ປເຓຕິ, ຕສ຺ມາ ນໂຣ ປຣທາຣໍ ນ ເສເວ.

໓໑໑. ກຸໂສ ຍຖາ ທຸຄ຺ຄຫິໂຕ, ຫຕ຺ຖເມວານຸກນ຺ຕຕິ;

ສາມຎ຺ຎໍ ທຸປ຺ປຣາມຏ຺ຐໍ, ນິຣຍາຍຸປກຑ຺ຒຕິ.

໓໑໒. ຍໍ ກິຎ຺ຈິ ສິຖິລໍ ກມ຺ມໍ, ສໍກິລິຏ຺ຐຎ຺ຈ ຍໍ ວຕໍ;

ສງ຺ກສ຺ສຣໍ ພ຺ຣຫ຺ມຈຣິຍໍ, ນ ຕໍ ໂຫຕິ ມຫປ຺ຜລໍ.

໓໑໓. ກຍິຣາ ເຈ ກຍິຣາເຖນໍ [ກຍິຣາ ນໍ (ກ.)], ທຬ຺ຫເມນໍ ປຣກ຺ກເມ;

ສິຖິໂລ ຫິ ປຣິພ຺ພາໂຊ, ຠິຍ຺ໂຍ ອາກິຣເຕ ຣຊໍ.

໓໑໔. ອກຕໍ ທຸກ຺ກຏໍ ເສຍ຺ໂຍ, ປຈ຺ຉາ ຕປ຺ປຕິ ທຸກ຺ກຏໍ;

ກຕຎ຺ຈ ສຸກຕໍ ເສຍ຺ໂຍ, ຍໍ ກຕ຺ວາ ນານຸຕປ຺ປຕິ.

໓໑໕. ນຄຣໍ ຍຖາ ປຈ຺ຈນ຺ຕໍ, ຄຸຕ຺ຕໍ ສນ຺ຕຣພາຫິຣໍ;

ເອວໍ ໂຄເປຖ ອຕ຺ຕານໍ, ຂໂຓ ໂວ [ຂໂຓ ເວ (ສີ. ປີ. ກ.)] ມາ ອຸປຈ຺ຈຄາ;

ຂຓາຕີຕາ ຫິ ໂສຈນ຺ຕິ, ນິຣຍມ຺ຫິ ສມປ຺ປິຕາ.

໓໑໖. ອລຊ຺ຊິຕາເຍ ລຊ຺ຊນ຺ຕິ, ລຊ຺ຊິຕາເຍ ນ ລຊ຺ຊເຣ;

ມິຈ຺ຉາທິຏ຺ຐິສມາທານາ, ສຕ຺ຕາ ຄຈ຺ຉນ຺ຕິ ທຸຄ຺ຄຕິໍ.

໓໑໗. ອຠເຍ ຠຍທສ຺ສິໂນ, ຠເຍ ຈາຠຍທສ຺ສິໂນ;

ມິຈ຺ຉາທິຏ຺ຐິສມາທານາ, ສຕ຺ຕາ ຄຈ຺ຉນ຺ຕິ ທຸຄ຺ຄຕິໍ.

໓໑໘. ອວຊ຺ເຊ ວຊ຺ຊມຕິໂນ, ວຊ຺ເຊ ຈາວຊ຺ຊທສ຺ສິໂນ;

ມິຈ຺ຉາທິຏ຺ຐິສມາທານາ, ສຕ຺ຕາ ຄຈ຺ຉນ຺ຕິ ທຸຄ຺ຄຕິໍ.

໓໑໙. ວຊ຺ຊຎ຺ຈ ວຊ຺ຊໂຕ ຎຕ຺ວາ, ອວຊ຺ຊຎ຺ຈ ອວຊ຺ຊໂຕ;

ສມ຺ມາທິຏ຺ຐິສມາທານາ, ສຕ຺ຕາ ຄຈ຺ຉນ຺ຕິ ສຸຄ຺ຄຕິໍ.

ນິຣຍວຄ຺ໂຄ ທ຺ວາວີສຕິໂມ ນິຏ຺ຐິໂຕ.