໑໙. ຘມ຺ມຏ຺ຐວຄ຺ໂຄ

໒໕໖. ນ ເຕນ ໂຫຕິ ຘມ຺ມຏ຺ໂຐ, ເຍນຕ຺ຖໍ ສາຫສາ [ສຫສາ (ສີ. ສ຺ຍາ. ກ.)] ນເຍ;

ໂຍ ຈ ອຕ຺ຖໍ ອນຕ຺ຖຎ຺ຈ, ອຸໂຠ ນິຈ຺ເຉຍ຺ຍ ປຓ຺ຑິໂຕ.

໒໕໗. ອສາຫເສນ ຘມ຺ເມນ, ສເມນ ນຍຕີ ປເຣ;

ຘມ຺ມສ຺ສ ຄຸຕ຺ໂຕ ເມຘາວີ, ‘‘ຘມ຺ມຏ຺ໂຐ’’ຕິ ປວຸຈ຺ຈຕິ.

໒໕໘. ນ ເຕນ ປຓ຺ຑິໂຕ ໂຫຕິ, ຍາວຕາ ພຫຸ ຠາສຕິ;

ເຂມີ ອເວຣີ ອຠໂຍ, ‘‘ປຓ຺ຑິໂຕ’’ຕິ ປວຸຈ຺ຈຕິ.

໒໕໙. ນ ຕາວຕາ ຘມ຺ມຘໂຣ, ຍາວຕາ ພຫຸ ຠາສຕິ;

ໂຍ ຈ ອປ຺ປມ຺ປິ ສຸຕ຺ວານ, ຘມ຺ມໍ ກາເຍນ ປສ຺ສຕິ;

ສ ເວ ຘມ຺ມຘໂຣ ໂຫຕິ, ໂຍ ຘມ຺ມໍ ນປ຺ປມຊ຺ຊຕິ.

໒໖໐. ນ ເຕນ ເຖໂຣ ໂສ ໂຫຕິ [ເຖໂຣ ໂຫຕິ (ສີ. ສ຺ຍາ.)], ເຍນສ຺ສ ປລິຕໍ ສິໂຣ;

ປຣິປກ຺ໂກ ວໂຍ ຕສ຺ສ, ‘‘ໂມຆຊິຓ຺ໂຓ’’ຕິ ວຸຈ຺ຈຕິ.

໒໖໑. ຍມ຺ຫິ ສຈ຺ຈຎ຺ຈ ຘມ຺ໂມ ຈ, ອຫິໍສາ ສໍຍໂມ ທໂມ;

ສ ເວ ວນ຺ຕມໂລ ຘີໂຣ, ‘‘ເຖໂຣ’’ ອິຕິ [ໂສ ເຖໂຣຕິ (ສ຺ຍາ. ກ.)] ປວຸຈ຺ຈຕິ.

໒໖໒. ນ ວາກ຺ກຣຓມຕ຺ເຕນ, ວຓ຺ຓໂປກ຺ຂຣຕາຍ ວາ;

ສາຘຸຣູໂປ ນໂຣ ໂຫຕິ, ອິສ຺ສຸກີ ມຈ຺ຉຣີ ສໂຐ.

໒໖໓. ຍສ຺ສ ເຈຕໍ ສມຸຈ຺ຉິນ຺ນໍ, ມູລຆຈ຺ຈໍ ສມູຫຕໍ;

ສ ວນ຺ຕໂທໂສ ເມຘາວີ, ‘‘ສາຘຸຣູໂປ’’ຕິ ວຸຈ຺ຈຕິ.

໒໖໔. ນ ມຸຓ຺ຑເກນ ສມໂຓ, ອພ຺ພໂຕ ອລິກໍ ຠຓໍ;

ອິຈ຺ຉາໂລຠສມາປນ຺ໂນ, ສມໂຓ ກິໍ ຠວິສ຺ສຕິ.

໒໖໕. ໂຍ ຈ ສເມຕິ ປາປານິ, ອຓຸໍ ຖູລານິ ສພ຺ພໂສ;

ສມິຕຕ຺ຕາ ຫິ ປາປານໍ, ‘‘ສມໂຓ’’ຕິ ປວຸຈ຺ຈຕິ.

໒໖໖. ນ ເຕນ ຠິກ຺ຂຸ ໂສ ໂຫຕິ, ຍາວຕາ ຠິກ຺ຂເຕ ປເຣ;

ວິສ຺ສໍ ຘມ຺ມໍ ສມາທາຍ, ຠິກ຺ຂຸ ໂຫຕິ ນ ຕາວຕາ.

໒໖໗. ໂຍຘ ປຸຎ຺ຎຎ຺ຈ ປາປຎ຺ຈ, ພາເຫຕ຺ວາ ພ຺ຣຫ຺ມຈຣິຍວາ [ພ຺ຣຫ຺ມຈຣິຍໍ (ກ.)];

ສງ຺ຂາຍ ໂລເກ ຈຣຕິ, ສ ເວ ‘‘ຠິກ຺ຂູ’’ຕິ ວຸຈ຺ຈຕິ.

໒໖໘. ນ ໂມເນນ ມຸນີ ໂຫຕິ, ມູຬ຺ຫຣູໂປ ອວິທ຺ທສຸ;

ໂຍ ຈ ຕຸລໍວ ປຄ຺ຄຍ຺ຫ, ວຣມາທາຍ ປຓ຺ຑິໂຕ.

໒໖໙. ປາປານິ ປຣິວຊ຺ເຊຕິ, ສ ມຸນີ ເຕນ ໂສ ມຸນິ;

ໂຍ ມຸນາຕິ ອຸໂຠ ໂລເກ, ‘‘ມຸນິ’’ ເຕນ ປວຸຈ຺ຈຕິ.

໒໗໐. ນ ເຕນ ອຣິໂຍ ໂຫຕິ, ເຍນ ປາຓານິ ຫິໍສຕິ;

ອຫິໍສາ ສພ຺ພປາຓານໍ, ‘‘ອຣິໂຍ’’ຕິ ປວຸຈ຺ຈຕິ.

໒໗໑. ນ ສີລພ຺ພຕມຕ຺ເຕນ, ພາຫຸສຈ຺ເຈນ ວາ ປນ;

ອຖ ວາ ສມາຘິລາເຠນ, ວິວິຕ຺ຕສຍເນນ ວາ.

໒໗໒. ຜຸສາມິ ເນກ຺ຂມ຺ມສຸຂໍ, ອປຸຖຸຊ຺ຊນເສວິຕໍ;

ຠິກ຺ຂຸ ວິສ຺ສາສມາປາທິ, ອປ຺ປຕ຺ໂຕ ອາສວກ຺ຂຍໍ.

ຘມ຺ມຏ຺ຐວຄ຺ໂຄ ເອກູນວີສຕິໂມ ນິຏ຺ຐິໂຕ.