໑໐. ທຓ຺ຑວຄ຺ໂຄ

໑໒໙. ສພ຺ເພ ຕສນ຺ຕິ ທຓ຺ຑສ຺ສ, ສພ຺ເພ ຠາຍນ຺ຕິ ມຈ຺ຈຸໂນ;

ອຕ຺ຕານໍ ອຸປມໍ ກຕ຺ວາ, ນ ຫເນຍ຺ຍ ນ ຆາຕເຍ.

໑໓໐. ສພ຺ເພ ຕສນ຺ຕິ ທຓ຺ຑສ຺ສ, ສພ຺ເພສໍ ຊີວິຕໍ ປິຍໍ;

ອຕ຺ຕານໍ ອຸປມໍ ກຕ຺ວາ, ນ ຫເນຍ຺ຍ ນ ຆາຕເຍ.

໑໓໑. ສຸຂກາມານິ ຠູຕານິ, ໂຍ ທຓ຺ເຑນ ວິຫິໍສຕິ;

ອຕ຺ຕໂນ ສຸຂເມສາໂນ, ເປຈ຺ຈ ໂສ ນ ລຠເຕ ສຸຂໍ.

໑໓໒. ສຸຂກາມານິ ຠູຕານິ, ໂຍ ທຓ຺ເຑນ ນ ຫິໍສຕິ;

ອຕ຺ຕໂນ ສຸຂເມສາໂນ, ເປຈ຺ຈ ໂສ ລຠເຕ ສຸຂໍ.

໑໓໓. ມາໂວຈ ຜຣຸສໍ ກຎ຺ຈິ, ວຸຕ຺ຕາ ປຏິວເທຍ຺ຍຸ ຕໍ [ປຏິວເທຍ຺ຍຸໍ ຕໍ (ກ.)];

ທຸກ຺ຂາ ຫິ ສາຣມ຺ຠກຖາ, ປຏິທຓ຺ຑາ ຜຸເສຍ຺ຍຸ ຕໍ [ຜຸເສຍ຺ຍຸໍ ຕໍ (ກ.)].

໑໓໔. ສເຈ ເນເຣສິ ອຕ຺ຕານໍ, ກໍໂສ ອຸປຫໂຕ ຍຖາ;

ເອສ ປຕ຺ໂຕສິ ນິພ຺ພານໍ, ສາຣມ຺ໂຠ ເຕ ນ ວິຊ຺ຊຕິ.

໑໓໕. ຍຖາ ທຓ຺ເຑນ ໂຄປາໂລ, ຄາໂວ ປາເຊຕິ ໂຄຈຣໍ;

ເອວໍ ຊຣາ ຈ ມຈ຺ຈຸ ຈ, ອາຍຸໍ ປາເຊນ຺ຕິ ປາຓິນໍ.

໑໓໖. ອຖ ປາປານິ ກມ຺ມານິ, ກຣໍ ພາໂລ ນ ພຸຊ຺ຌຕິ;

ເສຫິ ກມ຺ເມຫິ ທຸມ຺ເມໂຘ, ອຄ຺ຄິທຑ຺ໂຒວ ຕປ຺ປຕິ.

໑໓໗. ໂຍ ທຓ຺ເຑນ ອທຓ຺ເຑສຸ, ອປ຺ປທຸຏ຺ເຐສຸ ທຸສ຺ສຕິ;

ທສນ຺ນມຎ຺ຎຕຣໍ ຐານໍ, ຂິປ຺ປເມວ ນິຄຈ຺ຉຕິ.

໑໓໘. ເວທນໍ ຜຣຸສໍ ຊານິໍ, ສຣີຣສ຺ສ ຈ ເຠທນໍ [ສຣີຣສ຺ສ ປເຠທນໍ (ສ຺ຍາ.)];

ຄຣຸກໍ ວາປິ ອາພາຘໍ, ຈິຕ຺ຕກ຺ເຂປຎ຺ຈ [ຈິຕ຺ຕກ຺ເຂປໍ ວ (ສີ. ສ຺ຍາ. ປີ.)] ປາປຸເຓ.

໑໓໙. ຣາຊໂຕ ວາ ອຸປສຄ຺ຄໍ [ອຸປສ຺ສຄ຺ຄໍ (ສີ. ປີ.)], ອພ຺ຠກ຺ຂານຎ຺ຈ [ອພ຺ຠກ຺ຂານໍ ວ (ສີ. ປີ.)] ທາຣຸຓໍ;

ປຣິກ຺ຂຍຎ຺ຈ [ປຣິກ຺ຂຍໍ ວ (ສີ. ສ຺ຍາ. ປີ.)] ຎາຕີນໍ, ໂຠຄານຎ຺ຈ [ໂຠຄານໍ ວ (ສີ. ສ຺ຍາ. ປີ.)] ປຠງ຺ຄຸຣໍ [ປຠງ຺ຄຸນໍ (ກ.)].

໑໔໐. ອຖ ວາສ຺ສ ອຄາຣານິ, ອຄ຺ຄິ ຑຫຕິ [ຑຍ຺ຫຕິ (ກ.)] ປາວໂກ;

ກາຍສ຺ສ ເຠທາ ທຸປ຺ປຎ຺ໂຎ, ນິຣຍໍ ໂສປປຊ຺ຊຕິ [ໂສ ອຸປປຊ຺ຊຕິ (ສີ. ສ຺ຍາ.)].

໑໔໑. ນ ນຄ຺ຄຈຣິຍາ ນ ຊຏາ ນ ປງ຺ກາ, ນານາສກາ ຖຓ຺ຑິລສາຍິກາ ວາ;

ຣໂຊຊລ຺ລໍ ອຸກ຺ກຸຏິກປ຺ປຘານໍ, ໂສເຘນ຺ຕິ ມຈ຺ຈໍ ອວິຕິຓ຺ຓກງ຺ຂໍ.

໑໔໒. ອລງ຺ກໂຕ ເຈປິ ສມໍ ຈເຣຍ຺ຍ, ສນ຺ໂຕ ທນ຺ໂຕ ນິຍໂຕ ພ຺ຣຫ຺ມຈາຣີ;

ສພ຺ເພສຸ ຠູເຕສຸ ນິຘາຍ ທຓ຺ຑໍ, ໂສ ພ຺ຣາຫ຺ມໂຓ ໂສ ສມໂຓ ສ ຠິກ຺ຂຸ.

໑໔໓. ຫິຣີນິເສໂຘ ປຸຣິໂສ, ໂກຈິ ໂລກສ຺ມິ ວິຊ຺ຊຕິ;

ໂຍ ນິທ຺ທໍ [ນິນ຺ທໍ (ສີ. ປີ.) ສໍ. ນິ. ໑.໑໘] ອປໂພເຘຕິ [ອປໂພຘຕິ (ສີ. ສ຺ຍາ. ປີ.)], ອສ຺ໂສ ຠທ຺ໂຣ ກສາມິວ.

໑໔໔. ອສ຺ໂສ ຍຖາ ຠທ຺ໂຣ ກສານິວິຏ຺ໂຐ, ອາຕາປິໂນ ສໍເວຄິໂນ ຠວາຖ;

ສທ຺ຘາຍ ສີເລນ ຈ ວີຣິເຍນ ຈ, ສມາຘິນາ ຘມ຺ມວິນິຈ຺ຉເຍນ ຈ;

ສມ຺ປນ຺ນວິຊ຺ຊາຈຣຓາ ປຕິສ຺ສຕາ, ຊຫິສ຺ສຖ [ປຫສ຺ສຖ (ສີ. ສ຺ຍາ. ປີ.)] ທຸກ຺ຂມິທໍ ອນປ຺ປກໍ.

໑໔໕. ອຸທກຎ຺ຫິ ນຍນ຺ຕິ ເນຕ຺ຕິກາ, ອຸສຸກາຣາ ນມຍນ຺ຕິ ເຕຊນໍ;

ທາຣຸໍ ນມຍນ຺ຕິ ຕຈ຺ຉກາ, ອຕ຺ຕານໍ ທມຍນ຺ຕິ ສຸພ຺ພຕາ.

ທຓ຺ຑວຄ຺ໂຄ ທສໂມ ນິຏ຺ຐິໂຕ.