ເວທນານຸປສ຺ສນາ
໓໘໐. ‘‘ກຖຎ຺ຈ ປນ, ຠິກ຺ຂເວ, ຠິກ຺ຂຸ ເວທນາສຸ ເວທນານຸປສ຺ສີ ວິຫຣຕິ? ອິຘ, ຠິກ຺ຂເວ, ຠິກ຺ຂຸ ສຸຂໍ ວາ ເວທນໍ ເວທຍມາໂນ ‘ສຸຂໍ ເວທນໍ ເວທຍາມີ’ຕິ ປຊານາຕິ. ທຸກ຺ຂໍ ວາ ເວທນໍ ເວທຍມາໂນ ‘ທຸກ຺ຂໍ ເວທນໍ ເວທຍາມີ’ຕິ ປຊານາຕິ. ອທຸກ຺ຂມສຸຂໍ ວາ ເວທນໍ ເວທຍມາໂນ ‘ອທຸກ຺ຂມສຸຂໍ ເວທນໍ ເວທຍາມີ’ຕິ ປຊານາຕິ. ສາມິສໍ ວາ ສຸຂໍ ເວທນໍ ເວທຍມາໂນ ‘ສາມິສໍ ສຸຂໍ ເວທນໍ ເວທຍາມີ’ຕິ ປຊານາຕິ, ນິຣາມິສໍ ວາ ສຸຂໍ ເວທນໍ ເວທຍມາໂນ ‘ນິຣາມິສໍ ສຸຂໍ ເວທນໍ ເວທຍາມີ’ຕິ ປຊານາຕິ. ສາມິສໍ ວາ ທຸກ຺ຂໍ ເວທນໍ ເວທຍມາໂນ ‘ສາມິສໍ ທຸກ຺ຂໍ ເວທນໍ ເວທຍາມີ’ຕິ ປຊານາຕິ, ນິຣາມິສໍ ວາ ທຸກ຺ຂໍ ເວທນໍ ເວທຍມາໂນ ‘ນິຣາມິສໍ ທຸກ຺ຂໍ ເວທນໍ ເວທຍາມີ’ຕິ ປຊານາຕິ. ສາມິສໍ ວາ ອທຸກ຺ຂມສຸຂໍ ເວທນໍ ເວທຍມາໂນ ‘ສາມິສໍ ອທຸກ຺ຂມສຸຂໍ ເວທນໍ ເວທຍາມີ’ຕິ ປຊານາຕິ, ນິຣາມິສໍ ວາ ອທຸກ຺ຂມສຸຂໍ ເວທນໍ ເວທຍມາໂນ ‘ນິຣາມິສໍ ອທຸກ຺ຂມສຸຂໍ ເວທນໍ ເວທຍາມີ’ຕິ ປຊານາຕິ. ອິຕິ ອຊ຺ຌຕ຺ຕໍ ວາ ເວທນາສຸ ເວທນານຸປສ຺ສີ ວິຫຣຕິ, ພຫິທ຺ຘາ ວາ ເວທນາສຸ ເວທນານຸປສ຺ສີ ວິຫຣຕິ, ອຊ຺ຌຕ຺ຕພຫິທ຺ຘາ ວາ ເວທນາສຸ ເວທນານຸປສ຺ສີ ວິຫຣຕິ. ສມຸທຍຘມ຺ມານຸປສ຺ສີ ວາ ເວທນາສຸ ວິຫຣຕິ, ວຍຘມ຺ມານຸປສ຺ສີ ວາ ເວທນາສຸ ວິຫຣຕິ, ສມຸທຍວຍຘມ຺ມານຸປສ຺ສີ ວາ ເວທນາສຸ ວິຫຣຕິ. ‘ອຕ຺ຖິ ເວທນາ’ຕິ ວາ ປນສ຺ສ ສຕິ ປຈ຺ຈຸປຏ຺ຐິຕາ ໂຫຕິ ຍາວເທວ ຎາຓມຕ຺ຕາຍ ປຏິສ຺ສຕິມຕ຺ຕາຍ ອນິສ຺ສິໂຕ ຈ ວິຫຣຕິ, ນ ຈ ກິຎ຺ຈິ ໂລເກ ອຸປາທິຍຕິ. ເອວມ຺ປິ ໂຂ, ຠິກ຺ຂເວ, ຠິກ຺ຂຸ ເວທນາສຸ ເວທນານຸປສ຺ສີ ວິຫຣຕິ.
ເວທນານຸປສ຺ສນາ ນິຏ຺ຐິຕາ.