ສຣີຣຘາຕຸວິຠາຊນໍ

໒໓໖. ອສ຺ໂສສິ ໂຂ ຣາຊາ ມາຄໂຘ ອຊາຕສຕ຺ຕຸ ເວເທຫິປຸຕ຺ໂຕ – ‘‘ຠຄວາ ກິຣ ກຸສິນາຣາຍໍ ປຣິນິພ຺ພຸໂຕ’’ຕິ. ອຖ ໂຂ ຣາຊາ ມາຄໂຘ ອຊາຕສຕ຺ຕຸ ເວເທຫິປຸຕ຺ໂຕ ໂກສິນາຣການໍ ມລ຺ລານໍ ທູຕໍ ປາເຫສິ – ‘‘ຠຄວາປິ ຂຕ຺ຕິໂຍ ອຫມ຺ປິ ຂຕ຺ຕິໂຍ, ອຫມ຺ປິ ອຣຫາມິ ຠຄວໂຕ ສຣີຣານໍ ຠາຄໍ, ອຫມ຺ປິ ຠຄວໂຕ ສຣີຣານໍ ຖູປຎ຺ຈ ມຫຎ຺ຈ ກຣິສ຺ສາມີ’’ຕິ.

ອສ຺ໂສສຸໍ ໂຂ ເວສາລິກາ ລິຈ຺ຉວີ – ‘‘ຠຄວາ ກິຣ ກຸສິນາຣາຍໍ ປຣິນິພ຺ພຸໂຕ’’ຕິ. ອຖ ໂຂ ເວສາລິກາ ລິຈ຺ຉວີ ໂກສິນາຣການໍ ມລ຺ລານໍ ທູຕໍ ປາເຫສຸໍ – ‘‘ຠຄວາປິ ຂຕ຺ຕິໂຍ ມຍມ຺ປິ ຂຕ຺ຕິຍາ, ມຍມ຺ປິ ອຣຫາມ ຠຄວໂຕ ສຣີຣານໍ ຠາຄໍ, ມຍມ຺ປິ ຠຄວໂຕ ສຣີຣານໍ ຖູປຎ຺ຈ ມຫຎ຺ຈ ກຣິສ຺ສາມາ’’ຕິ.

ອສ຺ໂສສຸໍ ໂຂ ກປິລວຕ຺ຖຸວາສີ ສກ຺ຍາ – ‘‘ຠຄວາ ກິຣ ກຸສິນາຣາຍໍ ປຣິນິພ຺ພຸໂຕ’’ຕິ. ອຖ ໂຂ ກປິລວຕ຺ຖຸວາສີ ສກ຺ຍາ ໂກສິນາຣການໍ ມລ຺ລານໍ ທູຕໍ ປາເຫສຸໍ – ‘‘ຠຄວາ ອມ຺ຫາກໍ ຎາຕິເສຏ຺ໂຐ, ມຍມ຺ປິ ອຣຫາມ ຠຄວໂຕ ສຣີຣານໍ ຠາຄໍ, ມຍມ຺ປິ ຠຄວໂຕ ສຣີຣານໍ ຖູປຎ຺ຈ ມຫຎ຺ຈ ກຣິສ຺ສາມາ’’ຕິ.

ອສ຺ໂສສຸໍ ໂຂ ອລ຺ລກປ຺ປກາ ພຸລໂຍ [ຖູລໂຍ (ສ຺ຍາ.)] – ‘‘ຠຄວາ ກິຣ ກຸສິນາຣາຍໍ ປຣິນິພ຺ພຸໂຕ’’ຕິ. ອຖ ໂຂ ອລ຺ລກປ຺ປກາ ພຸລໂຍ ໂກສິນາຣການໍ ມລ຺ລານໍ ທູຕໍ ປາເຫສຸໍ – ‘‘ຠຄວາປິ ຂຕ຺ຕິໂຍ ມຍມ຺ປິ ຂຕ຺ຕິຍາ, ມຍມ຺ປິ ອຣຫາມ ຠຄວໂຕ ສຣີຣານໍ ຠາຄໍ, ມຍມ຺ປິ ຠຄວໂຕ ສຣີຣານໍ ຖູປຎ຺ຈ ມຫຎ຺ຈ ກຣິສ຺ສາມາ’’ຕິ.

ອສ຺ໂສສຸໍ ໂຂ ຣາມຄາມກາ ໂກຬິຍາ – ‘‘ຠຄວາ ກິຣ ກຸສິນາຣາຍໍ ປຣິນິພ຺ພຸໂຕ’’ຕິ. ອຖ ໂຂ ຣາມຄາມກາ ໂກຬິຍາ ໂກສິນາຣການໍ ມລ຺ລານໍ ທູຕໍ ປາເຫສຸໍ – ‘‘ຠຄວາປິ ຂຕ຺ຕິໂຍ ມຍມ຺ປິ ຂຕ຺ຕິຍາ, ມຍມ຺ປິ ອຣຫາມ ຠຄວໂຕ ສຣີຣານໍ ຠາຄໍ, ມຍມ຺ປິ ຠຄວໂຕ ສຣີຣານໍ ຖູປຎ຺ຈ ມຫຎ຺ຈ ກຣິສ຺ສາມາ’’ຕິ.

ອສ຺ໂສສິ ໂຂ ເວຏ຺ຐທີປໂກ ພ຺ຣາຫ຺ມໂຓ – ‘‘ຠຄວາ ກິຣ ກຸສິນາຣາຍໍ ປຣິນິພ຺ພຸໂຕ’’ຕິ. ອຖ ໂຂ ເວຏ຺ຐທີປໂກ ພ຺ຣາຫ຺ມໂຓ ໂກສິນາຣການໍ ມລ຺ລານໍ ທູຕໍ ປາເຫສິ – ‘‘ຠຄວາປິ ຂຕ຺ຕິໂຍ ອຫໍ ປິສ຺ມິ ພ຺ຣາຫ຺ມໂຓ, ອຫມ຺ປິ ອຣຫາມິ ຠຄວໂຕ ສຣີຣານໍ ຠາຄໍ, ອຫມ຺ປິ ຠຄວໂຕ ສຣີຣານໍ ຖູປຎ຺ຈ ມຫຎ຺ຈ ກຣິສ຺ສາມີ’’ຕິ.

ອສ຺ໂສສຸໍ ໂຂ ປາເວຍ຺ຍກາ ມລ຺ລາ – ‘‘ຠຄວາ ກິຣ ກຸສິນາຣາຍໍ ປຣິນິພ຺ພຸໂຕ’’ຕິ. ອຖ ໂຂ ປາເວຍ຺ຍກາ ມລ຺ລາ ໂກສິນາຣການໍ ມລ຺ລານໍ ທູຕໍ ປາເຫສຸໍ – ‘‘ຠຄວາປິ ຂຕ຺ຕິໂຍ ມຍມ຺ປິ ຂຕ຺ຕິຍາ, ມຍມ຺ປິ ອຣຫາມ ຠຄວໂຕ ສຣີຣານໍ ຠາຄໍ, ມຍມ຺ປິ ຠຄວໂຕ ສຣີຣານໍ ຖູປຎ຺ຈ ມຫຎ຺ຈ ກຣິສ຺ສາມາ’’ຕິ.

ເອວໍ ວຸຕ຺ເຕ ໂກສິນາຣກາ ມລ຺ລາ ເຕ ສງ຺ເຆ ຄເຓ ເອຕທໂວຈຸໍ – ‘‘ຠຄວາ ອມ຺ຫາກໍ ຄາມກ຺ເຂຕ຺ເຕ ປຣິນິພ຺ພຸໂຕ, ນ ມຍໍ ທສ຺ສາມ ຠຄວໂຕ ສຣີຣານໍ ຠາຄ’’ນ຺ຕິ.

໒໓໗. ເອວໍ ວຸຕ຺ເຕ ໂທໂຓ ພ຺ຣາຫ຺ມໂຓ ເຕ ສງ຺ເຆ ຄເຓ ເອຕທໂວຈ –

‘‘ສຸຓນ຺ຕຸ ໂຠນ຺ໂຕ ມມ ເອກວາຈໍ,

ອມ຺ຫາກ [ຉນ຺ທານຸຣກ຺ຂຓຕ຺ຖໍ ນິຄ຺ຄຫີຕໂລໂປ]; ພຸທ຺ໂຘ ອຫຸ ຂນ຺ຕິວາໂທ;

ນ ຫິ ສາຘຸ ຍໍ ອຸຕ຺ຕມປຸຄ຺ຄລສ຺ສ,

ສຣີຣຠາເຄ ສິຍາ ສມ຺ປຫາໂຣ.

ສພ຺ເພວ ໂຠນ຺ໂຕ ສຫິຕາ ສມຄ຺ຄາ,

ສມ຺ໂມທມານາ ກໂຣມຏ຺ຐຠາເຄ;

ວິຕ຺ຖາຣິກາ ໂຫນ຺ຕຸ ທິສາສຸ ຖູປາ,

ພຫູ ຊນາ ຈກ຺ຂຸມໂຕ ປສນ຺ນາ’’ຕິ.

໒໓໘. ‘‘ເຕນ ຫິ, ພ຺ຣາຫ຺ມຓ, ຕ຺ວຎ຺ເຎວ ຠຄວໂຕ ສຣີຣານິ ອຏ຺ຐຘາ ສມໍ ສວິຠຕ຺ຕໍ ວິຠຊາຫີ’’ຕິ. ‘‘ເອວໍ, ໂຠ’’ຕິ ໂຂ ໂທໂຓ ພ຺ຣາຫ຺ມໂຓ ເຕສໍ ສງ຺ຆານໍ ຄຓານໍ ປຏິສ຺ສຸຕ຺ວາ ຠຄວໂຕ ສຣີຣານິ ອຏ຺ຐຘາ ສມໍ ສຸວິຠຕ຺ຕໍ ວິຠຊິຕ຺ວາ ເຕ ສງ຺ເຆ ຄເຓ ເອຕທໂວຈ – ‘‘ອິມໍ ເມ ໂຠນ຺ໂຕ ຕຸມ຺ພໍ ທທນ຺ຕຸ ອຫມ຺ປິ ຕຸມ຺ພສ຺ສ ຖູປຎ຺ຈ ມຫຎ຺ຈ ກຣິສ຺ສາມີ’’ຕິ. ອທໍສຸ ໂຂ ເຕ ໂທຓສ຺ສ ພ຺ຣາຫ຺ມຓສ຺ສ ຕຸມ຺ພໍ.

ອສ຺ໂສສຸໍ ໂຂ ປິປ຺ປລິວນິຍາ [ປິປ຺ຜລິວນິຍາ (ສ຺ຍາ.)] ໂມຣິຍາ – ‘‘ຠຄວາ ກິຣ ກຸສິນາຣາຍໍ ປຣິນິພ຺ພຸໂຕ’’ຕິ. ອຖ ໂຂ ປິປ຺ປລິວນິຍາ ໂມຣິຍາ ໂກສິນາຣການໍ ມລ຺ລານໍ ທູຕໍ ປາເຫສຸໍ – ‘‘ຠຄວາປິ ຂຕ຺ຕິໂຍ ມຍມ຺ປິ ຂຕ຺ຕິຍາ, ມຍມ຺ປິ ອຣຫາມ ຠຄວໂຕ ສຣີຣານໍ ຠາຄໍ, ມຍມ຺ປິ ຠຄວໂຕ ສຣີຣານໍ ຖູປຎ຺ຈ ມຫຎ຺ຈ ກຣິສ຺ສາມາ’’ຕິ. ‘‘ນຕ຺ຖິ ຠຄວໂຕ ສຣີຣານໍ ຠາໂຄ, ວິຠຕ຺ຕານິ ຠຄວໂຕ ສຣີຣານິ. ອິໂຕ ອງ຺ຄາຣໍ ຫຣຖາ’’ຕິ. ເຕ ຕໂຕ ອງ຺ຄາຣໍ ຫຣິໍສຸ [ອາຫຣິໍສຸ (ສ຺ຍາ. ກ.)].