ພຸທ຺ຘສຣີຣປູຊາ
໒໒໗. ອຖ ໂຂ ໂກສິນາຣກາ ມລ຺ລາ ປຸຣິເສ ອາຓາເປສຸໍ – ‘‘ເຕນ ຫິ, ຠເຓ, ກຸສິນາຣາຍໍ ຄນ຺ຘມາລຎ຺ຈ ສພ຺ພຎ຺ຈ ຕາຬາວຈຣໍ ສນ຺ນິປາເຕຖາ’’ຕິ. ອຖ ໂຂ ໂກສິນາຣກາ ມລ຺ລາ ຄນ຺ຘມາລຎ຺ຈ ສພ຺ພຎ຺ຈ ຕາຬາວຈຣໍ ປຎ຺ຈ ຈ ທຸສ຺ສຍຸຄສຕານິ ອາທາຍ ເຍນ ອຸປວຕ຺ຕນໍ ມລ຺ລານໍ ສາລວນໍ, ເຍນ ຠຄວໂຕ ສຣີຣໍ ເຕນຸປສງ຺ກມິໍສຸ; ອຸປສງ຺ກມິຕ຺ວາ ຠຄວໂຕ ສຣີຣໍ ນຈ຺ເຈຫິ ຄີເຕຫິ ວາທິເຕຫິ ມາເລຫິ ຄນ຺ເຘຫິ ສກ຺ກໂຣນ຺ຕາ ຄຣຸໍ ກໂຣນ຺ຕາ ມາເນນ຺ຕາ ປູເຊນ຺ຕາ ເຈລວິຕານານິ ກໂຣນ຺ຕາ ມຓ຺ຑລມາເຬ ປຏິຍາເທນ຺ຕາ ເອກທິວສໍ ວີຕິນາເມສຸໍ.
ອຖ ໂຂ ໂກສິນາຣການໍ ມລ຺ລານໍ ເອຕທໂຫສິ – ‘‘ອຕິວິກາໂລ ໂຂ ອຊ຺ຊ ຠຄວໂຕ ສຣີຣໍ ຌາເປຕຸໍ, ສ຺ເວ ທານິ ມຍໍ ຠຄວໂຕ ສຣີຣໍ ຌາເປສ຺ສາມາ’’ຕິ. ອຖ ໂຂ ໂກສິນາຣກາ ມລ຺ລາ ຠຄວໂຕ ສຣີຣໍ ນຈ຺ເຈຫິ ຄີເຕຫິ ວາທິເຕຫິ ມາເລຫິ ຄນ຺ເຘຫິ ສກ຺ກໂຣນ຺ຕາ ຄຣຸໍ ກໂຣນ຺ຕາ ມາເນນ຺ຕາ ປູເຊນ຺ຕາ ເຈລວິຕານານິ ກໂຣນ຺ຕາ ມຓ຺ຑລມາເຬ ປຏິຍາເທນ຺ຕາ ທຸຕິຍມ຺ປິ ທິວສໍ ວີຕິນາເມສຸໍ, ຕຕິຍມ຺ປິ ທິວສໍ ວີຕິນາເມສຸໍ, ຈຕຸຕ຺ຖມ຺ປິ ທິວສໍ ວີຕິນາເມສຸໍ, ປຎ຺ຈມມ຺ປິ ທິວສໍ ວີຕິນາເມສຸໍ, ຉຏ຺ຐມ຺ປິ ທິວສໍ ວີຕິນາເມສຸໍ.
ອຖ ໂຂ ສຕ຺ຕມໍ ທິວສໍ ໂກສິນາຣການໍ ມລ຺ລານໍ ເອຕທໂຫສິ – ‘‘ມຍໍ ຠຄວໂຕ ສຣີຣໍ ນຈ຺ເຈຫິ ຄີເຕຫິ ວາທິເຕຫິ ມາເລຫິ ຄນ຺ເຘຫິ ສກ຺ກໂຣນ຺ຕາ ຄຣຸໍ ກໂຣນ຺ຕາ ມາເນນ຺ຕາ ປູເຊນ຺ຕາ ທກ຺ຂິເຓນ ທກ຺ຂິຓໍ ນຄຣສ຺ສ ຫຣິຕ຺ວາ ພາຫິເຣນ ພາຫິຣໍ ທກ຺ຂິຓໂຕ ນຄຣສ຺ສ ຠຄວໂຕ ສຣີຣໍ ຌາເປສ຺ສາມາ’’ຕິ.
໒໒໘. ເຕນ ໂຂ ປນ ສມເຍນ ອຏ຺ຐ ມລ຺ລປາໂມກ຺ຂາ ສີສໍນ຺ຫາຕາ ອຫຕານິ ວຕ຺ຖານິ ນິວຕ຺ຖາ ‘‘ມຍໍ ຠຄວໂຕ ສຣີຣໍ ອຸຈ຺ຈາເຣສ຺ສາມາ’’ຕິ ນ ສກ຺ໂກນ຺ຕິ ອຸຈ຺ຈາເຣຕຸໍ. ອຖ ໂຂ ໂກສິນາຣກາ ມລ຺ລາ ອາຍສ຺ມນ຺ຕໍ ອນຸຣຸທ຺ຘໍ ເອຕທໂວຈຸໍ – ‘‘ໂກ ນຸ ໂຂ, ຠນ຺ເຕ ອນຸຣຸທ຺ຘ, ເຫຕຸ ໂກ ປຈ຺ຈໂຍ, ເຍນິເມ ອຏ຺ຐ ມລ຺ລປາໂມກ຺ຂາ ສີສໍນ຺ຫາຕາ ອຫຕານິ ວຕ຺ຖານິ ນິວຕ຺ຖາ ‘ມຍໍ ຠຄວໂຕ ສຣີຣໍ ອຸຈ຺ຈາເຣສ຺ສາມາ’ຕິ ນ ສກ຺ໂກນ຺ຕິ ອຸຈ຺ຈາເຣຕຸ’’ນ຺ຕິ? ‘‘ອຎ຺ຎຖາ ໂຂ, ວາເສຏ຺ຐາ, ຕຸມ຺ຫາກໍ ອຘິປ຺ປາໂຍ, ອຎ຺ຎຖາ ເທວຕານໍ ອຘິປ຺ປາໂຍ’’ຕິ. ‘‘ກຖໍ ປນ, ຠນ຺ເຕ, ເທວຕານໍ ອຘິປ຺ປາໂຍ’’ຕິ? ‘‘ຕຸມ຺ຫາກໍ ໂຂ, ວາເສຏ຺ຐາ, ອຘິປ຺ປາໂຍ – ‘ມຍໍ ຠຄວໂຕ ສຣີຣໍ ນຈ຺ເຈຫິ ຄີເຕຫິ ວາທິເຕຫິ ມາເລຫິ ຄນ຺ເຘຫິ ສກ຺ກໂຣນ຺ຕາ ຄຣຸໍ ກໂຣນ຺ຕາ ມາເນນ຺ຕາ ປູເຊນ຺ຕາ ທກ຺ຂິເຓນ ທກ຺ຂິຓໍ ນຄຣສ຺ສ ຫຣິຕ຺ວາ ພາຫິເຣນ ພາຫິຣໍ ທກ຺ຂິຓໂຕ ນຄຣສ຺ສ ຠຄວໂຕ ສຣີຣໍ ຌາເປສ຺ສາມາ’ຕິ; ເທວຕານໍ ໂຂ, ວາເສຏ຺ຐາ, ອຘິປ຺ປາໂຍ – ‘ມຍໍ ຠຄວໂຕ ສຣີຣໍ ທິພ຺ເພຫິ ນຈ຺ເຈຫິ ຄີເຕຫິ ວາທິເຕຫິ ຄນ຺ເຘຫິ ສກ຺ກໂຣນ຺ຕາ ຄຣຸໍ ກໂຣນ຺ຕາ ມາເນນ຺ຕາ ປູເຊນ຺ຕາ ອຸຕ຺ຕເຣນ ອຸຕ຺ຕຣໍ ນຄຣສ຺ສ ຫຣິຕ຺ວາ ອຸຕ຺ຕເຣນ ທ຺ວາເຣນ ນຄຣໍ ປເວເສຕ຺ວາ ມຊ຺ເຌນ ມຊ຺ຌໍ ນຄຣສ຺ສ ຫຣິຕ຺ວາ ປຸຣຕ຺ຖິເມນ ທ຺ວາເຣນ ນິກ຺ຂມິຕ຺ວາ ປຸຣຕ຺ຖິມໂຕ ນຄຣສ຺ສ ມກຸຏພນ຺ຘນໍ ນາມ ມລ຺ລານໍ ເຈຕິຍໍ ເອຕ຺ຖ ຠຄວໂຕ ສຣີຣໍ ຌາເປສ຺ສາມາ’ຕິ. ‘‘ຍຖາ, ຠນ຺ເຕ, ເທວຕານໍ ອຘິປ຺ປາໂຍ, ຕຖາ ໂຫຕູ’’ຕິ.
໒໒໙. ເຕນ ໂຂ ປນ ສມເຍນ ກຸສິນາຣາ ຍາວ ສນ຺ຘິສມລສໍກຏີຣາ ຊຓ຺ຓຸມຕ຺ເຕນ ໂອຘິນາ ມນ຺ທາຣວປຸປ຺ເຜຫິ ສນ຺ຖຕາ [ສຓ຺ຐິຕາ (ສ຺ຍາ.)] ໂຫຕິ. ອຖ ໂຂ ເທວຕາ ຈ ໂກສິນາຣກາ ຈ ມລ຺ລາ ຠຄວໂຕ ສຣີຣໍ ທິພ຺ເພຫິ ຈ ມານຸສເກຫິ ຈ ນຈ຺ເຈຫິ ຄີເຕຫິ ວາທິເຕຫິ ມາເລຫິ ຄນ຺ເຘຫິ ສກ຺ກໂຣນ຺ຕາ ຄຣຸໍ ກໂຣນ຺ຕາ ມາເນນ຺ຕາ ປູເຊນ຺ຕາ ອຸຕ຺ຕເຣນ ອຸຕ຺ຕຣໍ ນຄຣສ຺ສ ຫຣິຕ຺ວາ ອຸຕ຺ຕເຣນ ທ຺ວາເຣນ ນຄຣໍ ປເວເສຕ຺ວາ ມຊ຺ເຌນ ມຊ຺ຌໍ ນຄຣສ຺ສ ຫຣິຕ຺ວາ ປຸຣຕ຺ຖິເມນ ທ຺ວາເຣນ ນິກ຺ຂມິຕ຺ວາ ປຸຣຕ຺ຖິມໂຕ ນຄຣສ຺ສ ມກຸຏພນ຺ຘນໍ ນາມ ມລ຺ລານໍ ເຈຕິຍໍ ເອຕ຺ຖ ຈ ຠຄວໂຕ ສຣີຣໍ ນິກ຺ຂິປິໍສຸ.
໒໓໐. ອຖ ໂຂ ໂກສິນາຣກາ ມລ຺ລາ ອາຍສ຺ມນ຺ຕໍ ອານນ຺ທໍ ເອຕທໂວຈຸໍ – ‘‘ກຖໍ ມຍໍ, ຠນ຺ເຕ ອານນ຺ທ, ຕຖາຄຕສ຺ສ ສຣີເຣ ປຏິປຊ຺ຊາມາ’’ຕິ? ‘‘ຍຖາ ໂຂ, ວາເສຏ຺ຐາ, ຣຎ຺ໂຎ ຈກ຺ກວຕ຺ຕິສ຺ສ ສຣີເຣ ປຏິປຊ຺ຊນ຺ຕິ, ເອວໍ ຕຖາຄຕສ຺ສ ສຣີເຣ ປຏິປຊ຺ຊິຕພ຺ພ’’ນ຺ຕິ. ‘‘ກຖໍ ປນ, ຠນ຺ເຕ ອານນ຺ທ, ຣຎ຺ໂຎ ຈກ຺ກວຕ຺ຕິສ຺ສ ສຣີເຣ ປຏິປຊ຺ຊນ຺ຕີ’’ຕິ? ‘‘ຣຎ຺ໂຎ, ວາເສຏ຺ຐາ, ຈກ຺ກວຕ຺ຕິສ຺ສ ສຣີຣໍ ອຫເຕນ ວຕ຺ເຖນ ເວເຐນ຺ຕິ, ອຫເຕນ ວຕ຺ເຖນ ເວເຐຕ຺ວາ ວິຫເຕນ ກປ຺ປາເສນ ເວເຐນ຺ຕິ, ວິຫເຕນ ກປ຺ປາເສນ ເວເຐຕ຺ວາ ອຫເຕນ ວຕ຺ເຖນ ເວເຐນ຺ຕິ. ເອເຕນ ອຸປາເຍນ ປຎ຺ຈຫິ ຍຸຄສເຕຫິ ຣຎ຺ໂຎ ຈກ຺ກວຕ຺ຕິສ຺ສ ສຣີຣໍ ເວເຐຕ຺ວາ ອາຍສາຍ ເຕລໂທຓິຍາ ປກ຺ຂິປິຕ຺ວາ ອຎ຺ຎິສ຺ສາ ອາຍສາຍ ໂທຓິຍາ ປຏິກຸຊ຺ຊິຕ຺ວາ ສພ຺ພຄນ຺ຘານໍ ຈິຕກໍ ກຣິຕ຺ວາ ຣຎ຺ໂຎ ຈກ຺ກວຕ຺ຕິສ຺ສ ສຣີຣໍ ຌາເປນ຺ຕິ. ຈາຕຸມຫາປເຖ ຣຎ຺ໂຎ ຈກ຺ກວຕ຺ຕິສ຺ສ ຖູປໍ ກໂຣນ຺ຕິ. ເອວໍ ໂຂ, ວາເສຏ຺ຐາ, ຣຎ຺ໂຎ ຈກ຺ກວຕ຺ຕິສ຺ສ ສຣີເຣ ປຏິປຊ຺ຊນ຺ຕິ. ຍຖາ ໂຂ, ວາເສຏ຺ຐາ, ຣຎ຺ໂຎ ຈກ຺ກວຕ຺ຕິສ຺ສ ສຣີເຣ ປຏິປຊ຺ຊນ຺ຕິ, ເອວໍ ຕຖາຄຕສ຺ສ ສຣີເຣ ປຏິປຊ຺ຊິຕພ຺ພໍ. ຈາຕຸມຫາປເຖ ຕຖາຄຕສ຺ສ ຖູໂປ ກາຕພ຺ໂພ. ຕຕ຺ຖ ເຍ ມາລໍ ວາ ຄນ຺ຘໍ ວາ ຈຸຓ຺ຓກໍ ວາ ອາໂຣເປສ຺ສນ຺ຕິ ວາ ອຠິວາເທສ຺ສນ຺ຕິ ວາ ຈິຕ຺ຕໍ ວາ ປສາເທສ຺ສນ຺ຕິ, ເຕສໍ ຕໍ ຠວິສ຺ສຕິ ທີຆຣຕ຺ຕໍ ຫິຕາຍ ສຸຂາຍາ’’ຕິ. ອຖ ໂຂ ໂກສິນາຣກາ ມລ຺ລາ ປຸຣິເສ ອາຓາເປສຸໍ – ‘‘ເຕນ ຫິ, ຠເຓ, ມລ຺ລານໍ ວິຫຕໍ ກປ຺ປາສໍ ສນ຺ນິປາເຕຖາ’’ຕິ.
ອຖ ໂຂ ໂກສິນາຣກາ ມລ຺ລາ ຠຄວໂຕ ສຣີຣໍ ອຫເຕນ ວຕ຺ເຖນ ເວເຐຕ຺ວາ ວິຫເຕນ ກປ຺ປາເສນ ເວເຐສຸໍ, ວິຫເຕນ ກປ຺ປາເສນ ເວເຐຕ຺ວາ ອຫເຕນ ວຕ຺ເຖນ ເວເຐສຸໍ. ເອເຕນ ອຸປາເຍນ ປຎ຺ຈຫິ ຍຸຄສເຕຫິ ຠຄວໂຕ ສຣີຣໍ ເວເຐຕ຺ວາ ອາຍສາຍ ເຕລໂທຓິຍາ ປກ຺ຂິປິຕ຺ວາ ອຎ຺ຎິສ຺ສາ ອາຍສາຍ ໂທຓິຍາ ປຏິກຸຊ຺ຊິຕ຺ວາ ສພ຺ພຄນ຺ຘານໍ ຈິຕກໍ ກຣິຕ຺ວາ ຠຄວໂຕ ສຣີຣໍ ຈິຕກໍ ອາໂຣເປສຸໍ.