ມລ຺ລານໍ ວນ຺ທນາ
໒໑໑. ເຕນ ໂຂ ປນ ສມເຍນ ໂກສິນາຣກາ ມລ຺ລາ ສນ຺ຘາຄາເຣ [ສນ຺ຖາຄາເຣ (ສີ. ສ຺ຍາ. ປີ.)] ສນ຺ນິປຕິຕາ ໂຫນ຺ຕິ ເກນຈິເທວ ກຣຓີເຍນ. ອຖ ໂຂ ອາຍສ຺ມາ ອານນ຺ໂທ ເຍນ ໂກສິນາຣການໍ ມລ຺ລານໍ ສນ຺ຘາຄາຣໍ ເຕນຸປສງ຺ກມິ; ອຸປສງ຺ກມິຕ຺ວາ ໂກສິນາຣການໍ ມລ຺ລານໍ ອາໂຣເຈສິ – ‘‘ອຊ຺ຊ ໂຂ, ວາເສຏ຺ຐາ, ຣຕ຺ຕິຍາ ປຈ຺ຉິເມ ຍາເມ ຕຖາຄຕສ຺ສ ປຣິນິພ຺ພານໍ ຠວິສ຺ສຕິ. ອຠິກ຺ກມຖ ວາເສຏ຺ຐາ ອຠິກ຺ກມຖ ວາເສຏ຺ຐາ. ມາ ປຈ຺ຉາ ວິປ຺ປຏິສາຣິໂນ ອຫຸວຕ຺ຖ – ‘ອມ຺ຫາກຎ຺ຈ ໂນ ຄາມກ຺ເຂຕ຺ເຕ ຕຖາຄຕສ຺ສ ປຣິນິພ຺ພານໍ ອໂຫສິ, ນ ມຍໍ ລຠິມ຺ຫາ ປຈ຺ຉິເມ ກາເລ ຕຖາຄຕໍ ທສ຺ສນາຍາ’’’ຕິ. ອິທມາຍສ຺ມໂຕ ອານນ຺ທສ຺ສ ວຈນໍ ສຸຕ຺ວາ ມລ຺ລາ ຈ ມລ຺ລປຸຕ຺ຕາ ຈ ມລ຺ລສຸຓິສາ ຈ ມລ຺ລປຊາປຕິໂຍ ຈ ອຆາວິໂນ ທຸມ຺ມນາ ເຈໂຕທຸກ຺ຂສມປ຺ປິຕາ ອປ຺ເປກຈ຺ເຈ ເກເສ ປກິຣິຍ ກນ຺ທນ຺ຕິ, ພາຫາ ປຄ຺ຄຍ຺ຫ ກນ຺ທນ຺ຕິ, ຉິນ຺ນປາຕໍ ປປຕນ຺ຕິ, ອາວຏ຺ຏນ຺ຕິ ວິວຏ຺ຏນ຺ຕິ – ‘ອຕິຂິປ຺ປໍ ຠຄວາ ປຣິນິພ຺ພາຍິສ຺ສຕິ, ອຕິຂິປ຺ປໍ ສຸຄໂຕ ປຣິນິພ຺ພາຍິສ຺ສຕິ, ອຕິຂິປ຺ປໍ ຈກ຺ຂຸໍ ໂລເກ ອນ຺ຕຣຘາຍິສ຺ສຕີ’ຕິ. ອຖ ໂຂ ມລ຺ລາ ຈ ມລ຺ລປຸຕ຺ຕາ ຈ ມລ຺ລສຸຓິສາ ຈ ມລ຺ລປຊາປຕິໂຍ ຈ ອຆາວິໂນ ທຸມ຺ມນາ ເຈໂຕທຸກ຺ຂສມປ຺ປິຕາ ເຍນ ອຸປວຕ຺ຕນໍ ມລ຺ລານໍ ສາລວນໍ ເຍນາຍສ຺ມາ ອານນ຺ໂທ ເຕນຸປສງ຺ກມິໍສຸ. ອຖ ໂຂ ອາຍສ຺ມໂຕ ອານນ຺ທສ຺ສ ເອຕທໂຫສິ – ‘‘ສເຈ ໂຂ ອຫໍ ໂກສິນາຣເກ ມລ຺ເລ ເອກເມກໍ ຠຄວນ຺ຕໍ ວນ຺ທາເປສ຺ສາມິ, ອວນ຺ທິໂຕ ຠຄວາ ໂກສິນາຣເກຫິ ມລ຺ເລຫິ ຠວິສ຺ສຕິ, ອຖາຍໍ ຣຕ຺ຕິ ວິຠາຍິສ຺ສຕິ. ຍໍນູນາຫໍ ໂກສິນາຣເກ ມລ຺ເລ ກຸລປຣິວຕ຺ຕໂສ ກຸລປຣິວຕ຺ຕໂສ ຐເປຕ຺ວາ ຠຄວນ຺ຕໍ ວນ຺ທາເປຍ຺ຍໍ – ‘ອິຕ຺ຖນ຺ນາໂມ, ຠນ຺ເຕ, ມລ຺ໂລ ສປຸຕ຺ໂຕ ສຠຣິໂຍ ສປຣິໂສ ສາມຈ຺ໂຈ ຠຄວໂຕ ປາເທ ສິຣສາ ວນ຺ທຕີ’ຕິ. ອຖ ໂຂ ອາຍສ຺ມາ ອານນ຺ໂທ ໂກສິນາຣເກ ມລ຺ເລ ກຸລປຣິວຕ຺ຕໂສ ກຸລປຣິວຕ຺ຕໂສ ຐເປຕ຺ວາ ຠຄວນ຺ຕໍ ວນ຺ທາເປສິ – ‘ອິຕ຺ຖນ຺ນາໂມ, ຠນ຺ເຕ, ມລ຺ໂລ ສປຸຕ຺ໂຕ ສຠຣິໂຍ ສປຣິໂສ ສາມຈ຺ໂຈ ຠຄວໂຕ ປາເທ ສິຣສາ ວນ຺ທຕີ’’’ຕິ. ອຖ ໂຂ ອາຍສ຺ມາ ອານນ຺ໂທ ເອເຕນ ອຸປາເຍນ ປຐເມເນວ ຍາເມນ ໂກສິນາຣເກ ມລ຺ເລ ຠຄວນ຺ຕໍ ວນ຺ທາເປສິ.