ຈຕຸສໍເວຊນີຍຏ຺ຐານານິ
໒໐໒. ‘‘ປຸພ຺ເພ, ຠນ຺ເຕ, ທິສາສຸ ວສ຺ສໍ ວຸຏ຺ຐາ [ວສ຺ສໍວຸຕ຺ຖາ (ສີ. ສ຺ຍາ. ກໍ. ປີ.)] ຠິກ຺ຂູ ອາຄຈ຺ຉນ຺ຕິ ຕຖາຄຕໍ ທສ຺ສນາຍ. ເຕ ມຍໍ ລຠາມ ມໂນຠາວນີເຍ ຠິກ຺ຂູ ທສ຺ສນາຍ, ລຠາມ ປຍິຣຸປາສນາຍ. ຠຄວໂຕ ປນ ມຍໍ, ຠນ຺ເຕ, ອຈ຺ຈເຍນ ນ ລຠິສ຺ສາມ ມໂນຠາວນີເຍ ຠິກ຺ຂູ ທສ຺ສນາຍ, ນ ລຠິສ຺ສາມ ປຍິຣຸປາສນາຍາ’’ຕິ.
‘‘ຈຕ຺ຕາຣິມານິ, ອານນ຺ທ, ສທ຺ຘສ຺ສ ກຸລປຸຕ຺ຕສ຺ສ ທສ຺ສນີຍານິ ສໍເວຊນີຍານິ ຐານານິ. ກຕມານິ ຈຕ຺ຕາຣິ? ‘ອິຘ ຕຖາຄໂຕ ຊາໂຕ’ຕິ, ອານນ຺ທ, ສທ຺ຘສ຺ສ ກຸລປຸຕ຺ຕສ຺ສ ທສ຺ສນີຍໍ ສໍເວຊນີຍໍ ຐານໍ. ‘ອິຘ ຕຖາຄໂຕ ອນຸຕ຺ຕຣໍ ສມ຺ມາສມ຺ໂພຘິໍ ອຠິສມ຺ພຸທ຺ໂຘ’ຕິ, ອານນ຺ທ, ສທ຺ຘສ຺ສ ກຸລປຸຕ຺ຕສ຺ສ ທສ຺ສນີຍໍ ສໍເວຊນີຍໍ ຐານໍ. ‘ອິຘ ຕຖາຄເຕນ ອນຸຕ຺ຕຣໍ ຘມ຺ມຈກ຺ກໍ ປວຕ຺ຕິຕ’ນ຺ຕິ, ອານນ຺ທ, ສທ຺ຘສ຺ສ ກຸລປຸຕ຺ຕສ຺ສ ທສ຺ສນີຍໍ ສໍເວຊນີຍໍ ຐານໍ. ‘ອິຘ ຕຖາຄໂຕ ອນຸປາທິເສສາຍ ນິພ຺ພານຘາຕຸຍາ ປຣິນິພ຺ພຸໂຕ’ຕິ, ອານນ຺ທ, ສທ຺ຘສ຺ສ ກຸລປຸຕ຺ຕສ຺ສ ທສ຺ສນີຍໍ ສໍເວຊນີຍໍ ຐານໍ. ອິມານິ ໂຂ, ອານນ຺ທ, ຈຕ຺ຕາຣິ ສທ຺ຘສ຺ສ ກຸລປຸຕ຺ຕສ຺ສ ທສ຺ສນີຍານິ ສໍເວຊນີຍານິ ຐານານິ.
‘‘ອາຄມິສ຺ສນ຺ຕິ ໂຂ, ອານນ຺ທ, ສທ຺ຘາ ຠິກ຺ຂູ ຠິກ຺ຂຸນິໂຍ ອຸປາສກາ ອຸປາສິກາໂຍ – ‘ອິຘ ຕຖາຄໂຕ ຊາໂຕ’ຕິປິ, ‘ອິຘ ຕຖາຄໂຕ ອນຸຕ຺ຕຣໍ ສມ຺ມາສມ຺ໂພຘິໍ ອຠິສມ຺ພຸທ຺ໂຘ’ຕິປິ, ‘ອິຘ ຕຖາຄເຕນ ອນຸຕ຺ຕຣໍ ຘມ຺ມຈກ຺ກໍ ປວຕ຺ຕິຕ’ນ຺ຕິປິ, ‘ອິຘ ຕຖາຄໂຕ ອນຸປາທິເສສາຍ ນິພ຺ພານຘາຕຸຍາ ປຣິນິພ຺ພຸໂຕ’ຕິປິ. ເຍ ຫິ ເກຈິ, ອານນ຺ທ, ເຈຕິຍຈາຣິກໍ ອາຫິຓ຺ຑນ຺ຕາ ປສນ຺ນຈິຕ຺ຕາ ກາລງ຺ກຣິສ຺ສນ຺ຕິ, ສພ຺ເພ ເຕ ກາຍສ຺ສ ເຠທາ ປຣໍ ມຣຓາ ສຸຄຕິໍ ສຄ຺ຄໍ ໂລກໍ ອຸປປຊ຺ຊິສ຺ສນ຺ຕີ’’ຕິ.