ອມ຺ພປາລີຄຓິກາ
໑໖໑. ອສ຺ໂສສິ ໂຂ ອມ຺ພປາລີ ຄຓິກາ – ‘‘ຠຄວາ ກິຣ ເວສາລິໍ ອນຸປ຺ປຕ຺ໂຕ ເວສາລິຍໍ ວິຫຣຕິ ມຍ຺ຫໍ ອມ຺ພວເນ’’ຕິ. ອຖ ໂຂ ອມ຺ພປາລີ ຄຓິກາ ຠທ຺ທານິ ຠທ຺ທານິ ຍານານິ ໂຍຊາເປຕ຺ວາ ຠທ຺ທໍ ຠທ຺ທໍ ຍານໍ ອຠິຣຸຫິຕ຺ວາ ຠທ຺ເທຫິ ຠທ຺ເທຫິ ຍາເນຫິ ເວສາລິຍາ ນິຍ຺ຍາສິ. ເຍນ ສໂກ ອາຣາໂມ ເຕນ ປາຍາສິ. ຍາວຕິກາ ຍານສ຺ສ ຠູມິ, ຍາເນນ ຄນ຺ຕ຺ວາ, ຍານາ ປຈ຺ໂຈໂຣຫິຕ຺ວາ ປຕ຺ຕິກາວ ເຍນ ຠຄວາ ເຕນຸປສງ຺ກມິ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ນໍ ໂຂ ອມ຺ພປາລິໍ ຄຓິກໍ ຠຄວາ ຘມ຺ມິຍາ ກຖາຍ ສນ຺ທສ຺ເສສິ ສມາທເປສິ ສມຸຕ຺ເຕເຊສິ ສມ຺ປຫໍເສສິ. ອຖ ໂຂ ອມ຺ພປາລີ ຄຓິກາ ຠຄວຕາ ຘມ຺ມິຍາ ກຖາຍ ສນ຺ທສ຺ສິຕາ ສມາທປິຕາ ສມຸຕ຺ເຕຊິຕາ ສມ຺ປຫໍສິຕາ ຠຄວນ຺ຕໍ ເອຕທໂວຈ – ‘‘ອຘິວາເສຕຸ ເມ, ຠນ຺ເຕ, ຠຄວາ ສ຺ວາຕນາຍ ຠຕ຺ຕໍ ສທ຺ຘິໍ ຠິກ຺ຂຸສງ຺ເຆນາ’’ຕິ. ອຘິວາເສສິ ຠຄວາ ຕຸຓ຺ຫີຠາເວນ. ອຖ ໂຂ ອມ຺ພປາລີ ຄຓິກາ ຠຄວໂຕ ອຘິວາສນໍ ວິທິຕ຺ວາ ອຸຏ຺ຐາຍາສນາ ຠຄວນ຺ຕໍ ອຠິວາເທຕ຺ວາ ປທກ຺ຂິຓໍ ກຕ຺ວາ ປກ຺ກາມິ.
ອສ຺ໂສສຸໍ ໂຂ ເວສາລິກາ ລິຈ຺ຉວີ – ‘‘ຠຄວາ ກິຣ ເວສາລິໍ ອນຸປ຺ປຕ຺ໂຕ ເວສາລິຍໍ ວິຫຣຕິ ອມ຺ພປາລິວເນ’’ຕິ. ອຖ ໂຂ ເຕ ລິຈ຺ຉວີ ຠທ຺ທານິ ຠທ຺ທານິ ຍານານິ ໂຍຊາເປຕ຺ວາ ຠທ຺ທໍ ຠທ຺ທໍ ຍານໍ ອຠິຣຸຫິຕ຺ວາ ຠທ຺ເທຫິ ຠທ຺ເທຫິ ຍາເນຫິ ເວສາລິຍາ ນິຍ຺ຍິໍສຸ. ຕຕ຺ຣ ເອກຈ຺ເຈ ລິຈ຺ຉວີ ນີລາ ໂຫນ຺ຕິ ນີລວຓ຺ຓາ ນີລວຕ຺ຖາ ນີລາລງ຺ກາຣາ, ເອກຈ຺ເຈ ລິຈ຺ຉວີ ປີຕາ ໂຫນ຺ຕິ ປີຕວຓ຺ຓາ ປີຕວຕ຺ຖາ ປີຕາລງ຺ກາຣາ, ເອກຈ຺ເຈ ລິຈ຺ຉວີ ໂລຫິຕາ ໂຫນ຺ຕິ ໂລຫິຕວຓ຺ຓາ ໂລຫິຕວຕ຺ຖາ ໂລຫິຕາລງ຺ກາຣາ, ເອກຈ຺ເຈ ລິຈ຺ຉວີ ໂອທາຕາ ໂຫນ຺ຕິ ໂອທາຕວຓ຺ຓາ ໂອທາຕວຕ຺ຖາ ໂອທາຕາລງ຺ກາຣາ. ອຖ ໂຂ ອມ຺ພປາລີ ຄຓິກາ ທຫຣານໍ ທຫຣານໍ ລິຈ຺ຉວີນໍ ອກ຺ເຂນ ອກ຺ຂໍ ຈກ຺ເກນ ຈກ຺ກໍ ຍຸເຄນ ຍຸຄໍ ປຏິວຏ຺ເຏສິ [ປຣິວຕ຺ເຕສິ (ວິ. ມຫາວຄ຺ຄ)]. ອຖ ໂຂ ເຕ ລິຈ຺ຉວີ ອມ຺ພປາລິໍ ຄຓິກໍ ເອຕທໂວຈຸໍ – ‘‘ກິໍ, ເຊ ອມ຺ພປາລິ, ທຫຣານໍ ທຫຣານໍ ລິຈ຺ຉວີນໍ ອກ຺ເຂນ ອກ຺ຂໍ ຈກ຺ເກນ ຈກ຺ກໍ ຍຸເຄນ ຍຸຄໍ ປຏິວຏ຺ເຏສີ’’ຕິ? ‘‘ຕຖາ ຫິ ປນ ເມ, ອຍ຺ຍປຸຕ຺ຕາ, ຠຄວາ ນິມນ຺ຕິໂຕ ສ຺ວາຕນາຍ ຠຕ຺ຕໍ ສທ຺ຘິໍ ຠິກ຺ຂຸສງ຺ເຆນາ’’ຕິ. ‘‘ເທຫິ, ເຊ ອມ຺ພປາລິ, ເອຕໍ [ເອກໍ (ກ.)] ຠຕ຺ຕໍ ສຕສຫສ຺ເສນາ’’ຕິ. ‘‘ສເຈປິ ເມ, ອຍ຺ຍປຸຕ຺ຕາ, ເວສາລິໍ ສາຫາຣໍ ທສ຺ສຖ [ທຊ຺ເຊຍ຺ຍາຖ (ວິ. ມຫາວຄ຺ຄ)], ເອວມຫໍ ຕໍ [ເອວມ຺ປິ ມຫນ຺ຕໍ (ສ຺ຍາ.), ເອວໍ ມຫນ຺ຕໍ (ສີ. ປີ.)] ຠຕ຺ຕໍ ນ ທສ຺ສາມີ’’ຕິ [ເນວ ທຊ຺ຊາຫໍ ຕໍ ຠຕ຺ຕນ຺ຕິ (ວິ. ມຫາວຄ຺ຄ)]. ອຖ ໂຂ ເຕ ລິຈ຺ຉວີ ອງ຺ຄຸລິໍ ໂຜເຏສຸໍ – ‘‘ຊິຕມ຺ຫ [ຊິຕມ຺ຫາ (ພຫູສຸ)] ວຕ ໂຠ ອມ຺ພກາຍ, ຊິຕມ຺ຫ ວຕ ໂຠ ອມ຺ພກາຍາ’’ຕິ [‘‘ຊິຕມ຺ຫາ ວຕ ໂຠ ອມ຺ພປາລິກາຍ ວຎ຺ຈິຕມ຺ຫາ ວຕ ໂຠ ອມ຺ພປາລິກາຍາ’’ຕິ (ສ຺ຍາ.)].
ອຖ ໂຂ ເຕ ລິຈ຺ຉວີ ເຍນ ອມ຺ພປາລິວນໍ ເຕນ ປາຍິໍສຸ. ອທ຺ທສາ ໂຂ ຠຄວາ ເຕ ລິຈ຺ຉວີ ທູຣໂຕວ ອາຄຈ຺ຉນ຺ເຕ. ທິສ຺ວານ ຠິກ຺ຂູ ອາມນ຺ເຕສິ – ‘‘ເຍສໍ [ເຍຫິ (ວິ. ມຫາວຄ຺ຄ)], ຠິກ຺ຂເວ, ຠິກ຺ຂູນໍ ເທວາ ຕາວຕິໍສາ ອທິຏ຺ຐປຸພ຺ພາ, ໂອໂລເກຖ, ຠິກ຺ຂເວ, ລິຈ຺ຉວິປຣິສໍ; ອປໂລເກຖ, ຠິກ຺ຂເວ, ລິຈ຺ຉວິປຣິສໍ; ອຸປສໍຫຣຖ, ຠິກ຺ຂເວ, ລິຈ຺ຉວິປຣິສໍ – ຕາວຕິໍສສທິສ’’ນ຺ຕິ. ອຖ ໂຂ ເຕ ລິຈ຺ຉວີ ຍາວຕິກາ ຍານສ຺ສ ຠູມິ, ຍາເນນ ຄນ຺ຕ຺ວາ, ຍານາ ປຈ຺ໂຈໂຣຫິຕ຺ວາ ປຕ຺ຕິກາວ ເຍນ ຠຄວາ ເຕນຸປສງ຺ກມິໍສຸ; ອຸປສງ຺ກມິຕ຺ວາ ຠຄວນ຺ຕໍ ອຠິວາເທຕ຺ວາ ເອກມນ຺ຕໍ ນິສີທິໍສຸ. ເອກມນ຺ຕໍ ນິສິນ຺ເນ ໂຂ ເຕ ລິຈ຺ຉວີ ຠຄວາ ຘມ຺ມິຍາ ກຖາຍ ສນ຺ທສ຺ເສສິ ສມາທເປສິ ສມຸຕ຺ເຕເຊສິ ສມ຺ປຫໍເສສິ. ອຖ ໂຂ ເຕ ລິຈ຺ຉວີ ຠຄວຕາ ຘມ຺ມິຍາ ກຖາຍ ສນ຺ທສ຺ສິຕາ ສມາທປິຕາ ສມຸຕ຺ເຕຊິຕາ ສມ຺ປຫໍສິຕາ ຠຄວນ຺ຕໍ ເອຕທໂວຈຸໍ – ‘‘ອຘິວາເສຕຸ ໂນ, ຠນ຺ເຕ, ຠຄວາ ສ຺ວາຕນາຍ ຠຕ຺ຕໍ ສທ຺ຘິໍ ຠິກ຺ຂຸສງ຺ເຆນາ’’ຕິ. ອຖ ໂຂ ຠຄວາ ເຕ ລິຈ຺ຉວີ ເອຕທໂວຈ – ‘‘ອຘິວຸຕ຺ຖໍ [ອຘິວາສິຕໍ (ສ຺ຍາ.)] ໂຂ ເມ, ລິຈ຺ຉວີ, ສ຺ວາຕນາຍ ອມ຺ພປາລິຍາ ຄຓິກາຍ ຠຕ຺ຕ’’ນ຺ຕິ. ອຖ ໂຂ ເຕ ລິຈ຺ຉວີ ອງ຺ຄຸລິໍ ໂຜເຏສຸໍ – ‘‘ຊິຕມ຺ຫ ວຕ ໂຠ ອມ຺ພກາຍ, ຊິຕມ຺ຫ ວຕ ໂຠ ອມ຺ພກາຍາ’’ຕິ. ອຖ ໂຂ ເຕ ລິຈ຺ຉວີ ຠຄວໂຕ ຠາສິຕໍ ອຠິນນ຺ທິຕ຺ວາ ອນຸໂມທິຕ຺ວາ ອຸຏ຺ຐາຍາສນາ ຠຄວນ຺ຕໍ ອຠິວາເທຕ຺ວາ ປທກ຺ຂິຓໍ ກຕ຺ວາ ປກ຺ກມິໍສຸ.
໑໖໒. ອຖ ໂຂ ອມ຺ພປາລີ ຄຓິກາ ຕສ຺ສາ ຣຕ຺ຕິຍາ ອຈ຺ຈເຍນ ສເກ ອາຣາເມ ປຓີຕໍ ຂາທນີຍໍ ໂຠຊນີຍໍ ປຏິຍາທາເປຕ຺ວາ ຠຄວໂຕ ກາລໍ ອາໂຣຈາເປສິ – ‘‘ກາໂລ, ຠນ຺ເຕ, ນິຏ຺ຐິຕໍ ຠຕ຺ຕ’’ນ຺ຕິ. ອຖ ໂຂ ຠຄວາ ປຸພ຺ພຓ຺ຫສມຍໍ ນິວາເສຕ຺ວາ ປຕ຺ຕຈີວຣມາທາຍ ສທ຺ຘິໍ ຠິກ຺ຂຸສງ຺ເຆນ ເຍນ ອມ຺ພປາລິຍາ ຄຓິກາຍ ນິເວສນໍ ເຕນຸປສງ຺ກມິ; ອຸປສງ຺ກມິຕ຺ວາ ປຎ຺ຎຕ຺ເຕ ອາສເນ ນິສີທິ. ອຖ ໂຂ ອມ຺ພປາລີ ຄຓິກາ ພຸທ຺ຘປ຺ປມຸຂໍ ຠິກ຺ຂຸສງ຺ຆໍ ປຓີເຕນ ຂາທນີເຍນ ໂຠຊນີເຍນ ສຫຕ຺ຖາ ສນ຺ຕປ຺ເປສິ ສມ຺ປວາເຣສິ. ອຖ ໂຂ ອມ຺ພປາລີ ຄຓິກາ ຠຄວນ຺ຕໍ ຠຸຕ຺ຕາວິໍ ໂອນີຕປຕ຺ຕປາຓິໍ ອຎ຺ຎຕຣໍ ນີຈໍ ອາສນໍ ຄເຫຕ຺ວາ ເອກມນ຺ຕໍ ນິສີທິ. ເອກມນ຺ຕໍ ນິສິນ຺ນາ ໂຂ ອມ຺ພປາລີ ຄຓິກາ ຠຄວນ຺ຕໍ ເອຕທໂວຈ – ‘‘ອິມາຫໍ, ຠນ຺ເຕ, ອາຣາມໍ ພຸທ຺ຘປ຺ປມຸຂສ຺ສ ຠິກ຺ຂຸສງ຺ຆສ຺ສ ທມ຺ມີ’’ຕິ. ປຏິຄ຺ຄເຫສິ ຠຄວາ ອາຣາມໍ. ອຖ ໂຂ ຠຄວາ ອມ຺ພປາລິໍ ຄຓິກໍ ຘມ຺ມິຍາ ກຖາຍ ສນ຺ທສ຺ເສຕ຺ວາ ສມາທເປຕ຺ວາ ສມຸຕ຺ເຕເຊຕ຺ວາ ສມ຺ປຫໍເສຕ຺ວາ ອຸຏ຺ຐາຍາສນາ ປກ຺ກາມິ. ຕຕ຺ຣປິ ສຸທໍ ຠຄວາ ເວສາລິຍໍ ວິຫຣນ຺ໂຕ ອມ຺ພປາລິວເນ ເອຕເທວ ພຫຸລໍ ຠິກ຺ຂູນໍ ຘມ຺ມິໍ ກຖໍ ກໂຣຕິ – ‘‘ອິຕິ ສີລໍ, ອິຕິ ສມາຘິ, ອິຕິ ປຎ຺ຎາ. ສີລປຣິຠາວິໂຕ ສມາຘິ ມຫປ຺ຜໂລ ໂຫຕິ ມຫານິສໍໂສ. ສມາຘິປຣິຠາວິຕາ ປຎ຺ຎາ ມຫປ຺ຜລາ ໂຫຕິ ມຫານິສໍສາ. ປຎ຺ຎາປຣິຠາວິຕໍ ຈິຕ຺ຕໍ ສມ຺ມເທວ ອາສເວຫິ ວິມຸຈ຺ຈຕິ, ເສຍ຺ຍຖິທໍ – ກາມາສວາ, ຠວາສວາ, ອວິຊ຺ຊາສວາ’’ຕິ.