໖. ສູກຣຂຕວຄ຺ໂຄ

໑. ສາລສຸຕ຺ຕວຓ຺ຓນາ

໕໒໑. ຉຏ຺ຐວຄ຺ຄສ຺ສ ປຐເມ ສູເຣນາຕິ ສູຣຠາເວນ. ໂພຘາຍາຕິ ພຸຊ຺ຌນຕ຺ຖາຍ.

໒. ມລ຺ລິກສຸຕ຺ຕວຓ຺ຓນາ

໕໒໒. ທຸຕິເຍ ມລ຺ເລສູຕິ ເອວໍນາມເກ ຊນປເທ. ອິມສ຺ມິໍ ສຸຕ຺ເຕ ຈຕ຺ຕາຣິ ອິນ຺ທ຺ຣິຍານິ ມິສ຺ສການິ, ອຣິຍຎາຓໍ ໂລກຸຕ຺ຕຣໍ. ຕມ຺ປິ ປນ ຈຕຸກ຺ກິນ຺ທ຺ຣິຍນິສ຺ສິຕໍ ກຕ຺ວາ ມິສ຺ສກນ຺ຕິ ຠາເຊຕຸໍ ວຏ຺ຏຕິ.

໓. ເສຂສຸຕ຺ຕວຓ຺ຓນາ

໕໒໓. ຕຕິເຍ ນ ເຫວ ໂຂ ກາເຍນ ຜຸສິຕ຺ວາ ວິຫຣຕີຕິ ນ ນາມກາເຍນ ຜຸສິຕ຺ວາ ປຏິລຠິຕ຺ວາ ວິຫຣຕິ, ຜຸສິຕຸໍ ປຏິລຠິຕຸໍ ນ ສກ຺ໂກຕິ. ປຎ຺ຎາຍ ຈ ອຕິວິຊ຺ຌ ປສ຺ສຕີຕິ ປຈ຺ຈເວກ຺ຂຓປຎ຺ຎາຍ ປນ ‘‘ອຸປຣິ ອຣຫຕ຺ຕຜລິນ຺ທ຺ຣິຍໍ ນາມ ອຕ຺ຖີ’’ຕິ ປຊານາຕິ. ອເສຂຠູມິຍໍ ຜຸສິຕ຺ວາ ວິຫຣຕີຕິ ປຏິລຠິຕ຺ວາ ວິຫຣຕິ. ປຎ຺ຎາຍາຕິ ປຈ຺ຈເວກ຺ຂຓປຎ຺ຎາຍ ‘‘ອຣຫຕ຺ຕຜລິນ຺ທ຺ຣິຍໍ ນາມ ອຕ຺ຖີ’’ຕິ ປຊານາຕິ. ນ ກຸຫິຎ຺ຈິ ກິສ຺ມິຎ຺ຈີຕິ ທ຺ເວປິ ອຎ຺ຎມຎ຺ຎເວວຈນາເນວ, ກິສ຺ມິຎ຺ຈິ ຠເວ ນ ອຸປ຺ປຊ຺ຊິສ຺ສນ຺ຕີຕິ ອຕ຺ໂຖ. ອິມສ຺ມິໍ ສຸຕ຺ເຕ ປຎ຺ຈິນ຺ທ຺ຣິຍານິ ໂລກຸຕ຺ຕຣານິ, ຉ ໂລກິການິ ວຏ຺ຏນິສ຺ສິຕາເນວ ກຖິຕານິ.

໔-໕. ປທສຸຕ຺ຕາທິວຓ຺ຓນາ

໕໒໔-໕໒໕. ຈຕຸຕ຺ເຖ ຍານິ ການິຈິ ປທານິ ໂພຘາຍ ສໍວຕ຺ຕນ຺ຕີຕິ ຍານິ ການິຈິ ຘມ຺ມປທານິ, ເຍ ເກຈິ ຘມ຺ມໂກຏ຺ຐາສາ, ພຸຊ຺ຌນຕ຺ຖາຍ ສໍວຕ຺ຕນ຺ຕິ. ປຎ຺ຈມໍ ອຸຕ຺ຕານເມວ.

໖-໗. ປຕິຏ຺ຐິຕສຸຕ຺ຕາທິວຓ຺ຓນາ

໕໒໖-໕໒໗. ຉຏ຺ເຐ ຈິຕ຺ຕໍ ຣກ຺ຂຕິ ອາສເວສຸ ຈ ສາສເວສຸ ຈ ຘມ຺ເມສູຕິ ເຕຠູມກຘມ຺ເມ ອາຣພ຺ຠ ອາສວຸປ຺ປຕ຺ຕິໍ ວາເຣນ຺ໂຕ ອາສເວສຸ ຈ ສາສເວສຸ ຈ ຘມ຺ເມສຸ ຈິຕ຺ຕໍ ຣກ຺ຂຕິ ນາມ. ສຕ຺ຕມໍ ອຸຕ຺ຕານເມວ.

໘. ສູກຣຂຕສຸຕ຺ຕວຓ຺ຓນາ

໕໒໘. ອຏ຺ຐເມ ສູກຣຂຕາຍນ຺ຕິ ສູກຣຂຕເລເຓ. ກສ຺ສປພຸທ຺ຘກາເລ ກິຣ ຕໍ ເລຓໍ ເອກສ຺ມິໍ ພຸທ຺ຘນ຺ຕເຣ ປຖວິຍາ ວຑ຺ຒມານາຍ ອນ຺ໂຕຠູມິຄຕໍ ຊາຕໍ. ອເຖກທິວສໍ ເອໂກ ສູກໂຣ ຕສ຺ສ ຉທນປຣິຍນ຺ຕສມີເປ ປໍສຸໍ ຂຓິ. ເທເວ ວຸຏ຺ເຐ ປໍສຸ ໂຘຕາ, ຉທນປຣິຍນ຺ໂຕ ປາກໂຏ ອໂຫສິ. ເອໂກ ວນຈຣໂກ ທິສ຺ວາ ‘‘ປຸພ຺ເພ ສີລວນ຺ເຕຫິ ປຣິຠຸຕ຺ຕຏ຺ຐາເນນ ຠວິຕພ຺ພໍ, ປຏິຊຄ຺ຄິສ຺ສາມິ ນ’’ນ຺ຕິ ສມນ຺ຕໂຕ ປໍສຸໍ ອປເນຕ຺ວາ ເລຓໍ ໂສເຘຕ຺ວາ ກຸຏິປຣິກ຺ເຂປໍ ກຕ຺ວາ ທ຺ວາຣວາຕປານໍ ໂຍເຊຕ຺ວາ ສຸປຣິນິຏ຺ຐິຕສຸຘາກມ຺ມຈິຕ຺ຕກມ຺ມໍ ຣຊຕປຏ຺ຏສທິສາຍ ວາລິກາຍ ສນ຺ຖຣິຕໍ ປຣິເວຓໍ ກຕ຺ວາ ມຎ຺ຈປີຐໍ ປຎ຺ຎາເປຕ຺ວາ ຠຄວໂຕ ວສນຕ຺ຖາຍ ອທາສິ, ເລຓໍ ຄມ຺ຠີຣໍ ອໂຫສິ ໂອຕຣິຕ຺ວາ ອາຣຸຫິຕພ຺ພໍ. ຕໍ ສນ຺ຘາເຍຕໍ ວຸຕ຺ຕໍ. ປຣມນິປຈ຺ຈກາຣນ຺ຕິ ຠາວນປຸໍສກໍ, ປຣມນິປຈ຺ຈກາຣີ ຫຸຕ຺ວາ ປວຕ຺ຕມາໂນ ປວຕ຺ຕຕີຕິ ວຸຕ຺ຕໍ ໂຫຕິ. ອນຸຕ຺ຕຣໍ ໂຍຄກ຺ເຂມນ຺ຕິ ອຣຫຕ຺ຕໍ. ສປ຺ປຕິສ຺ໂສຕິ ສເຊຏ຺ຐໂກ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ສູກຣຂຕວຄ຺ໂຄ ຉຏ຺ໂຐ.