໒. ມຸທຸຕຣວຄ຺ໂຄ

໑. ປຏິລາຠສຸຕ຺ຕວຓ຺ຓນາ

໔໘໑. ທຸຕິຍວຄ຺ຄສ຺ສ ປຐເມ ສມ຺ມປ຺ປຘາເນ ອາຣພ຺ຠາຕິ ສມ຺ມປ຺ປຘາເນ ປຏິຈ຺ຈ, ສມ຺ມປ຺ປຘາເນ ຠາເວນ຺ໂຕຕິ ອຕ຺ໂຖ. ສຕິນ຺ທ຺ຣິເຍປິ ເອເສວ ນໂຍ.

໒. ປຐມສໍຂິຕ຺ຕສຸຕ຺ຕວຓ຺ຓນາ

໔໘໒. ທຸຕິເຍ ຕໂຕຕິ ວິປສ຺ສນາມຄ຺ຄຜລວເສນ ນິສ຺ສກ຺ກໍ ເວທິຕພ຺ພໍ. ສມຕ຺ຕານິ ຫິ ປຣິປຸຓ຺ຓານິ ປຎ຺ຈິນ຺ທ຺ຣິຍານິ ອຣຫຕ຺ຕມຄ຺ຄສ຺ສ ວິປສ຺ສນິນ຺ທ຺ຣິຍານິ ນາມ ໂຫນ຺ຕິ. ຕໂຕ ມຸທຸຕເຣຫີຕິ ເຕຫິ ອຣຫຕ຺ຕມຄ຺ຄສ຺ສ ວິປສ຺ສນິນ຺ທ຺ຣິເຍຫິ ມຸທຸຕຣານິ ອນາຄາມິມຄ຺ຄສ຺ສ ວິປສ຺ສນິນ຺ທ຺ຣິຍານິ ນາມ ໂຫນ຺ຕິ, ຕໂຕ ມຸທຸຕຣານິ ສກທາຄາມິມຄ຺ຄສ຺ສ, ຕໂຕ ມຸທຸຕຣານິ ໂສຕາປຕ຺ຕິມຄ຺ຄສ຺ສ ວິປສ຺ສນິນ຺ທ຺ຣິຍານິ ນາມ ໂຫນ຺ຕິ, ຕໂຕ ມຸທຸຕຣານິ ຘມ຺ມານຸສາຣິມຄ຺ຄສ຺ສ, ຕໂຕ ມຸທຸຕຣານິ ສທ຺ຘານຸສາຣິມຄ຺ຄສ຺ສ ວິປສ຺ສນິນ຺ທ຺ຣິຍານິ ນາມ ໂຫນ຺ຕິ.

ຕຖາ ສມຕ຺ຕານິ ປຣິປຸຓ຺ຓານິ ປຎ຺ຈິນ຺ທ຺ຣິຍານິ ອຣຫຕ຺ຕມຄ຺ຄິນ຺ທ຺ຣິຍານິ ນາມ ໂຫນ຺ຕິ, ຕໂຕ ມຸທຸຕຣານິ ອນາຄາມິມຄ຺ຄິນ຺ທ຺ຣິຍານິ ນາມ ໂຫນ຺ຕິ, ຕໂຕ ມຸທຸຕຣານິ ສກທາຄາມິມຄ຺ຄິນ຺ທ຺ຣິຍານິ ນາມ ໂຫນ຺ຕິ, ຕໂຕ ມຸທຸຕຣານິ ໂສຕາປຕ຺ຕິມຄ຺ຄິນ຺ທ຺ຣິຍານິ ນາມ ໂຫນ຺ຕິ, ຕໂຕ ມຸທຸຕຣານິ ຘມ຺ມານຸສາຣິມຄ຺ຄິນ຺ທ຺ຣິຍານິ, ຕໂຕ ມຸທຸຕຣານິ ສທ຺ຘານຸສາຣິມຄ຺ຄິນ຺ທ຺ຣິຍານິ ນາມ ໂຫນ຺ຕິ.

ສມຕ຺ຕານິ ປຣິປຸຓ຺ຓານິ ປຎ຺ຈິນ຺ທ຺ຣິຍານິ ອຣຫຕ຺ຕຜລິນ຺ທ຺ຣິຍານິ ນາມ ໂຫນ຺ຕິ, ຕໂຕ ມຸທຸຕຣານິ ອນາຄາມິຜລິນ຺ທ຺ຣິຍານິ, ຕໂຕ ມຸທຸຕຣານິ ສກທາຄາມິຜລິນ຺ທ຺ຣິຍານິ, ຕໂຕ ມຸທຸຕຣານິ ໂສຕາປຕ຺ຕິຜລິນ຺ທ຺ຣິຍານິ ນາມ ໂຫນ຺ຕິ. ຘມ຺ມານຸສາຣິສທ຺ຘານຸສາຣິໂນ ປນ ທ຺ເວປິ ໂສຕາປຕ຺ຕິມຄ຺ຄຏ຺ຐປຸຄ຺ຄລາ, ມຄ຺ຄຏ຺ຐປຸຄ຺ຄລວເສນ ເນສໍ ນານຕ຺ຕໍ ຊາຕນ຺ຕິ ອາຄມເນນປິ ມຄ຺ເຄນປິ. ສທ຺ຘານຸສາຣີ ປຸຄ຺ຄໂລ ຫິ ອຸທ຺ທິສາເປນ຺ໂຕ ປຣິປຸຈ຺ຉນ຺ໂຕ ອນຸປຸພ຺ເພນ ມຄ຺ຄໍ ປາປຸຓາຕິ, ຘມ຺ມານຸສາຣີ ເອເກນ ວາ ທ຺ວີຫິ ວາ ສວເນຫິ. ເອວໍ ຕາວ ເນສໍ ອາຄມເນນ ນານຕ຺ຕໍ ເວທິຕພ຺ພໍ.

ຘມ຺ມານຸສາຣິສ຺ສ ປນ ມຄ຺ໂຄ ຕິກ຺ໂຂ ໂຫຕິ, ສູຣໍ ຎາຓໍ ວຫຕິ, ອສງ຺ຂາເຣນ ອປ຺ປໂຍເຄນ ກິເລເສ ຉິນ຺ທຕິ ກທລິກ຺ຂນ຺ຘໍ ວິຍ ຕິຂິຓາ ອສິຘາຣາ. ສທ຺ຘານຸສາຣິສ຺ສ ນ ຕສ຺ສ ວິຍ ມຄ຺ໂຄ ຕິກ຺ໂຂ ໂຫຕິ, ນ ສູຣໍ ຎາຓໍ ວຫຕິ, ສສງ຺ຂາເຣນ ສປ຺ປໂຍເຄນ ກິເລເສ ຉິນ຺ທຕິ ກທລິກ຺ຂນ຺ຘໍ ວິຍ ອຕິຂິຓາ ອສິຘາຣາ. ກິເລສກ຺ຂເຍ ປນ ເຕສໍ ນານຕ຺ຕໍ ນຕ຺ຖິ. ອວເສສາ ຈ ກິເລສາ ຂີຍນ຺ຕິ.

໓. ທຸຕິຍສໍຂິຕ຺ຕສຸຕ຺ຕວຓ຺ຓນາ

໔໘໓. ຕຕິເຍ ຕໂຕຕິ ຜລວເສນ ນິສ຺ສກ຺ກໍ ເວທິຕພ຺ພໍ. ສມຕ຺ຕານິ ຫິ ປຣິປຸຓ຺ຓານິ ປຎ຺ຈິນ຺ທ຺ຣິຍານິ ອຣຫຕ຺ຕຜລິນ຺ທ຺ຣິຍານິ ນາມ ໂຫນ຺ຕິ, ອຣຫຕ຺ຕຜເລນ ສມນ຺ນາຄໂຕ ປຸຄ຺ຄໂລ ອຣຫາ ນາມ ໂຫຕິ. ອຣຫຕ຺ຕຜລໂຕ ມຸທຸຕຣານິ ອນາຄາມິຜລິນ຺ທ຺ຣິຍານິ ນາມ ໂຫນ຺ຕິ, ຕໂຕ ມຸທຸຕຣານິ ສກທາຄາມິຜລິນ຺ທ຺ຣິຍານິ, ຕໂຕ ມຸທຸຕຣານິ ໂສຕາປຕ຺ຕິຜລິນ຺ທ຺ຣິຍານິ, ໂສຕາປຕ຺ຕິຜເລນ ສມນ຺ນາຄໂຕ ປຸຄ຺ຄໂລ ໂສຕາປນ຺ໂນ ນາມ ໂຫຕິ. ອິນ຺ທ຺ຣິຍເວມຕ຺ຕຕາ ຜລເວມຕ຺ຕຕາ ໂຫຕີຕິ ອິນ຺ທ຺ຣິຍນານຕ຺ເຕນ ຜລນານຕ຺ຕໍ, ຜລນານຕ຺ເຕນ ປຸຄ຺ຄລນານຕ຺ຕນ຺ຕິ.

໔. ຕຕິຍສໍຂິຕ຺ຕສຸຕ຺ຕວຓ຺ຓນາ

໔໘໔. ຈຕຸຕ຺ເຖ ປຣິປູຣໍ ປຣິປູຣກາຣີ ອາຣາເຘຕີຕິ ປຣິປູຣໍ ອຣຫຕ຺ຕມຄ຺ຄໍ ກໂຣນ຺ໂຕ ອຣຫຕ຺ຕຜລໍ ອາຣາເຘຕິ. ປເທສໍ ປເທສກາຣີຕິ ອວເສເສ ຕໂຍ ປເທສມຄ຺ເຄ ກໂຣນ຺ໂຕ ປເທສໍ ຜລຕ຺ຕຍມຕ຺ຕເມວ ອາຣາເຘຕິ. ອິຕິ ອິເມສຸ ຈຕູສຸປິ ສຸຕ຺ເຕສຸ ມິສ຺ສກາເນວ ອິນ຺ທ຺ຣິຍານິ ກຖິຕານິ.

໕-໗. ປຐມວິຕ຺ຖາຣສຸຕ຺ຕາທິວຓ຺ຓນາ

໔໘໕-໔໘໗. ປຎ຺ຈເມ ຕໂຕ ມຸທຸຕເຣຫີຕິ ວິປສ຺ສນາວເສນ ນິສ຺ສກ຺ກໍ ເວທິຕພ຺ພໍ. ປຣິປຸຓ຺ຓານິ ຫິ ປຎ຺ຈິນ຺ທ຺ຣິຍານິ ອຣຫຕ຺ຕມຄ຺ຄສ຺ສ ວິປສ຺ສນິນ຺ທ຺ຣິຍານິ ໂຫນ຺ຕິ, ຕໂຕ ມຸທຸຕຣານິ ອນ຺ຕຣາປຣິນິພ຺ພາຍິສ຺ສ ວິປສ຺ສນິນ຺ທ຺ຣິຍານິ, ຕໂຕ ມຸທຸຕຣານິ ອຸປຫຈ຺ຈປຣິນິພ຺ພາຍິສ຺ສ, ຕໂຕ ມຸທຸຕຣານິ ອສງ຺ຂາຣປຣິນິພ຺ພາຍິສ຺ສ, ຕໂຕ ມຸທຸຕຣານິ ສສງ຺ຂາຣປຣິນິພ຺ພາຍິສ຺ສ, ຕໂຕ ມຸທຸຕຣານິ ອຸທ຺ຘໍໂສຕອກນິຏ຺ຐຄາມິສ຺ສ ວິປສ຺ສນິນ຺ທ຺ຣິຍານິ ນາມ ໂຫນ຺ຕິ.

ອິມສ຺ມິໍ ປນ ຐາເນ ອຣຫຕ຺ຕມຄ຺ເຄເຍວ ຐຕ຺ວາ ປຎ຺ຈ ນິສ຺ສກ຺ການິ ນີຫຣິຕພ຺ພານິ. ອຣຫຕ຺ຕມຄ຺ຄສ຺ສ ຫິ ວິປສ຺ສນິນ຺ທ຺ຣິເຍຫິ ມຸທຸຕຣານິ ປຐມອນ຺ຕຣາປຣິນິພ຺ພາຍິສ຺ສ ວິປສ຺ສນິນ຺ທ຺ຣິຍານິ, ຕໂຕ ມຸທຸຕຣານິ ທຸຕິຍອນ຺ຕຣາປຣິນິພ຺ພາຍິສ຺ສ, ຕໂຕ ມຸທຸຕຣານິ ຕຕິຍອນ຺ຕຣາປຣິນິພ຺ພາຍິສ຺ສ, ຕໂຕ ມຸທຸຕຣານິ ອຸປຫຈ຺ຈປຣິນິພ຺ພາຍິສ຺ສ, ຕໂຕ ມຸທຸຕຣານິ ອຸທ຺ຘໍໂສຕອກນິຏ຺ຐຄາມິສ຺ສ ວິປສ຺ສນິນ຺ທ຺ຣິຍານິ. ອສງ຺ຂາຣປຣິນິພ຺ພາຍິສ຺ສ ສສງ຺ຂາຣປຣິນິພ຺ພາຍິໂນປິ ເອເຕວ ປຎ຺ຈ ຊນາ.

ອິທານິ ຕີຓິ ນິສ຺ສກ຺ການິ. ສກທາຄາມິມຄ຺ຄສ຺ສ ຫິ ອິນ຺ທ຺ຣິເຍຫິ ມຸທຸຕຣານິ ໂສຕາປຕ຺ຕິມຄ຺ຄິນ຺ທ຺ຣິຍານິ, ໂສຕາປຕ຺ຕິມຄ຺ເຄເຍວ ອິນ຺ທ຺ຣິເຍຫິ ມຸທຸຕຣານິ ຘມ຺ມານຸສາຣິມຄ຺ຄິນ຺ທ຺ຣິຍານິ. ເຕຫິປິ ມຸທຸຕຣານິ ສທ຺ຘານຸສາຣິມຄ຺ຄິນ຺ທ຺ຣິຍານິ. ຉຏ຺ຐສຕ຺ຕມານິ ວຸຕ຺ຕນຍາເນວ. ອິເມສຸ ປນ ຕີສຸປິ ສຸຕ຺ເຕສຸ ປຸພ຺ພຠາຄວິປສ຺ສນິນ຺ທ຺ຣິຍາເນວ ກຖິຕານິ.

໘. ປຏິປນ຺ນສຸຕ຺ຕວຓ຺ຓນາ

໔໘໘. ອຏ຺ຐເມ ຕໂຕ ມຸທຸຕເຣຫີຕິ ມຄ຺ຄຜລວເສນ ນິສ຺ສກ຺ກໍ ເວທິຕພ຺ພໍ. ຕໍ ປາຬິຍໍ ວຸຕ຺ຕເມວ. ພາຫິໂຣຕິ ອິເມຫິ ອຏ຺ຐຫິ ປຸຄ຺ຄເລຫິ ພຫິຠູໂຕ. ປຸຖຸຊ຺ຊນປກ຺ເຂ ຐິໂຕຕິ ປຸຖຸຊ຺ຊນໂກຏ຺ຐາເສ ຐິໂຕ. ອິມສ຺ມິໍ ສຸຕ຺ເຕ ໂລກຸຕ຺ຕຣາເນວ ອິນ຺ທ຺ຣິຍານິ ກຖິຕານິ.

໙-໑໐. ສມ຺ປນ຺ນສຸຕ຺ຕາທິວຓ຺ຓນາ

໔໘໙-໔໙໐. ນວເມ ອິນ຺ທ຺ຣິຍສມ຺ປນ຺ໂນຕິ ປຣິປຸຓ຺ຓິນ຺ທ຺ຣິໂຍ. ທສມໍ ອຸຕ຺ຕານເມວ. ອິມສ຺ມິໍ ສຸຕ຺ຕທ຺ວເຍ ມິສ຺ສການິ ອິນ຺ທ຺ຣິຍານິ ກຖິຕານີຕິ.

ມຸທຸຕຣວຄ຺ໂຄ ທຸຕິໂຍ.