໓. ສີລຏ຺ຐິຕິວຄ຺ໂຄ

໑-໒. ສີລສຸຕ຺ຕາທິວຓ຺ຓນາ

໓໘໗-໓໘໘. ຕຕິຍວຄ຺ຄສ຺ສ ປຐເມ ສີລານີຕິ ຈຕຸປາຣິສຸທ຺ຘິສີລານິ. ທຸຕິເຍ ອຸມ຺ມງ຺ໂຄຕິ ປຎ຺ຫມຄ຺ໂຄ ປຎ຺ຫຄເວສນໍ.

໓-໕. ປຣິຫານສຸຕ຺ຕາທິວຓ຺ຓນາ

໓໘໙-໓໙໑. ຕຕິເຍ ປຣິຫານໍ ໂຫຕີຕິ ປຸຄ຺ຄລວເສນ ປຣິຫານໍ ໂຫຕິ. ໂຍ ຫິ ພຸທ຺ເຘສຸ ຘຣນ຺ເຕສຸປິ ຈຕ຺ຕາໂຣ ສຕິປຏ຺ຐາເນ ນ ຠາເວຕິ, ຕສ຺ສ ສທ຺ຘມ຺ໂມ ອນ຺ຕຣຫິໂຕ ນາມ ໂຫຕິ ເທວທຕ຺ຕາທີນໍ ວິຍ. ອິຕິ ອິມສ຺ມິໍ ສຸຕ຺ເຕ ຕສ຺ສ ປຸຄ຺ຄລສ຺ເສວ ຘມ຺ມນ຺ຕຣຘານໍ ກຖິຕໍ. ຈຕຸຕ຺ຖປຎ຺ຈເມສຸ ສພ຺ພໍ ອຸຕ຺ຕານເມວ.

໖. ປເທສສຸຕ຺ຕວຓ຺ຓນາ

໓໙໒. ຉຏ຺ເຐ ປເທສໍ ຠາວິຕຕ຺ຕາຕິ ປເທສໂຕ ຠາວິຕຕ຺ຕາ. ຈຕ຺ຕາໂຣ ຫິ ມຄ຺ເຄ ຕີຓິ ຈ ຜລານິ ນິພ຺ພຕ຺ເຕນ຺ເຕນ ສຕິປຏ຺ຐານາ ປເທສໍ ຠາວິຕາ ນາມ ໂຫນ຺ຕິ.

໗. ສມຕ຺ຕສຸຕ຺ຕວຓ຺ຓນາ

໓໙໓. ສຕ຺ຕເມ ສມຕ຺ຕໍ ຠາວິຕຕ຺ຕາຕິ ສມຕ຺ຕາ ຠາວິຕຕ຺ຕາ. ອຣຫຕ຺ຕຜລໍ ອຸປ຺ປາເທນ຺ເຕນ ຫິ ສຕິປຏ຺ຐານາ ສມຕ຺ຕໍ ຠາວິຕາ ນາມ ໂຫນ຺ຕິ.

໘-໑໐. ໂລກສຸຕ຺ຕາທິວຓ຺ຓນາ

໓໙໔-໓໙໖. ອຏ຺ຐເມ ມຫາຠິຎ຺ຎຕນ຺ຕິ ຉນ຺ນໍ ອຠິຎ຺ຎານໍ ວເສນ ວຸຕ຺ຕໍ. ສຫສ຺ສໍ ໂລກໍ ອຠິຊານາມີຕິ ສຕຕວິຫາຣວເສເນວ ວຸຕ຺ຕໍ. ເຖໂຣ ກິຣ ປາໂຕວ ອຸຏ຺ຐາຍ ມຸຂໍ ໂຘວິຕ຺ວາ ເສນາສເນ ນິສິນ຺ໂນ ອຕີເຕ ກປ຺ປສຫສ຺ສໍ, ອນາຄເຕ ກປ຺ປສຫສ຺ສໍ ອນຸສ຺ສຣຕິ, ປຈ຺ຈຸປ຺ປນ຺ເນປິ ສຫສ຺ສໍ ຈກ຺ກວາຬານໍ ຕສ຺ສາວຊ຺ຊນສ຺ສ ຄຕິໍ ອນຸພນ຺ຘຕິ. ອິຕິ ໂສ ທິພ຺ເພນ ຈກ຺ຂຸນາ ສຫສ຺ສໍ ໂລກໍ ອຠິຊານາຕິ, ອຍມສ຺ສ ສຕຕວິຫາໂຣ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ສີລຏ຺ຐິຕິວຄ຺ໂຄ ຕຕິໂຍ.