໙. ຕຕິຍອາມກຘຎ຺ຎເປຍ຺ຍາລວຄ຺ໂຄ

໑. ນຈ຺ຈຄີຕສຸຕ຺ຕວຓ຺ຓນາ

໑໑໕໑. ສາສນສ຺ສ ອນນຸໂລມຕ຺ຕາ ວິສູກໍ ປຏາຓີຠູຕໍ ທສ຺ສນນ຺ຕິ ວິສູກທສ຺ສນໍ. ອຕ຺ຕນາ ນຈ຺ຈນນຈ຺ຈາປນາທິວເສນ ນຈ຺ຈາ ຈ ຄີຕາ ຈ ວາທິຕາ ຈ ອນ຺ຕມໂສ ມຍູຣນຈ຺ຈາທິວເສນາປິ ປວຕ຺ຕານໍ ນຈ຺ຈາທີນໍ ວິສູກຠູຕາ ທສ຺ສນາ ຈາຕິ ນຈ຺ຈຄີຕວາທິຕວິສູກທສ຺ສນາ. ນຈ຺ຈາທີນິ ຫິ ອຕ຺ຕນາ ປໂຍເຊຕຸໍ ວາ ປເຣຫິ ປໂຍຊາເປຕຸໍ ວາ ປຍຸຕ຺ຕານິ ປສ຺ສິຕຸໍ ວາ ເນວ ຠິກ຺ຂູນໍ, ນ ຠິກ຺ຂຸນີນໍ ວຏ຺ຏນ຺ຕິ.

໒. ອຸຈ຺ຈາສຍນສຸຕ຺ຕວຓ຺ຓນາ

໑໑໕໒. ອຸຈ຺ຈາສຍນໍ ວຸຈ຺ຈຕິ ປມາຓາຕິກ຺ກນ຺ຕໍ. ມຫາສຍນໍ ອກປ຺ປິຍຕ຺ຖຣຓໍ, ຕໂຕ ປຏິວິຣຕາຕິ ອຕ຺ໂຖ.

໓. ຊາຕຣູປສຸຕ຺ຕວຓ຺ຓນາ

໑໑໕໓. ຊາຕຣູປນ຺ຕິ ສຸວຓ຺ຓໍ. ຣຊຕນ຺ຕິ ກຫາປໂຓ – ໂລຫມາສໂກ, ຊຕຸມາສໂກ, ທາຣຸມາສໂກຕິ ເຍ ໂວຫາຣໍ ຄຈ຺ຉນ຺ຕິ, ຕສ຺ສ ອຸຠຍສ຺ສາປິ ປຏິຄ຺ຄຫຓາ ປຏິວິຣຕາ. ເນວ ນໍ ອຸຄ຺ຄຓ຺ຫນ຺ຕິ ນ ອຸຄ຺ຄຓ຺ຫາເປນ຺ຕິ, ນ ອຸປນິກ຺ຂິຕ຺ຕໍ ສາທິຍນ຺ຕີຕິ ອຕ຺ໂຖ.

໔. ອາມກຘຎ຺ຎສຸຕ຺ຕວຓ຺ຓນາ

໑໑໕໔. ອາມກຘຎ຺ຎປຏິຄ຺ຄຫຓາຕິ ສາລິ-ວີຫິ-ຍວ-ໂຄຘຸມ-ກງ຺ຄຸ-ວຣກ-ກຸທ຺ຣູສກສງ຺ຂາຕສ຺ສ ສຕ຺ຕວິຘສ຺ສາປິ ອາມກຘຎ຺ຎສ຺ສ ປຏິຄ຺ຄຫຓາ. ນ ເກວລຎ຺ຈ ເອເຕສໍ ປຏິຄ຺ຄຫຓເມວ, ອາມສນມ຺ປິ ຠິກ຺ຂູນໍ ນ ວຏ຺ຏຕິເຍວ.

໕. ອາມກມໍສສຸຕ຺ຕວຓ຺ຓນາ

໑໑໕໕. ອາມກມໍສປຏິຄ຺ຄຫຓາຕິ ເອຕ຺ຖ ອຎ຺ຎຕ຺ຣ ອຸທ຺ທິສ຺ສ ອນຸຎ຺ຎາຕາ ອາມກມໍສມຈ຺ຉານໍ ປຏິຄ຺ຄຫຓເມວ ຠິກ຺ຂູນໍ ນ ວຏ຺ຏຕິ, ໂນ ອາມສນໍ.

໖. ກຸມາຣິກສຸຕ຺ຕວຓ຺ຓນາ

໑໑໕໖. ອິຕ຺ຖິກຸມາຣິກປຏິຄ຺ຄຫຓາຕິ ເອຕ຺ຖ ອິຕ຺ຖີຕິ ປຸຣິສນ຺ຕຣຄຕາ, ອິຕຣາ ກຸມາຣິກາ ນາມ. ຕາສໍ ປຏິຄ຺ຄຫຓມ຺ປິ ອາມສນມ຺ປິ ອກປ຺ປິຍເມວ.

໗. ທາສິທາສສຸຕ຺ຕວຓ຺ຓນາ

໑໑໕໗. ທາສິທາສປຏິຄ຺ຄຫຓາຕິ ເອຕ຺ຖ ທາສິທາສວເສເນວ ເຕສໍ ປຏິຄ຺ຄຫຓໍ ນ ວຏ຺ຏຕິ, ‘‘ກປ຺ປິຍກາຣກໍ ທມ຺ມິ, ອາຣາມິກໍ ທມ຺ມີ’’ຕິ ເອວໍ ວຸຕ຺ເຕ ປນ ວຏ຺ຏຕິ.