໕. ປປາຕວຄ຺ໂຄ

໑. ໂລກຈິນ຺ຕາສຸຕ຺ຕວຓ຺ຓນາ

໑໑໑໑. ປຎ຺ຈມສ຺ສ ປຐເມ ສຸມາຄຘາຍ ໂປກ຺ຂຣຓິຍາຕິ ເອວໍນາມິກາຍ ໂປກ຺ຂຣຓິຍາ. ໂລກຈິນ຺ຕໍ ຈິນ຺ເຕນ຺ໂຕຕິ, ‘‘ເກນ ນຸ ໂຂ ຈນ຺ທິມສູຣິຍາ ກຕາ, ເກນ ມຫາປຖວີ, ເກນ ມຫາສມຸທ຺ໂທ, ເກນ ສຕ຺ຕາ ອຸປ຺ປາທິຕາ, ເກນ ປພ຺ພຕາ, ເກນ ອມ຺ພຕາລນາຬິເກຣາທໂຍ’’ຕິ ເອວຣູປໍ ໂລກຈິນ຺ຕໍ ຈິນ຺ເຕນ຺ໂຕ ນິສີທິ.

ວິເຈໂຕຕິ ວິຄຕຈິຕ຺ໂຕ ວິກ຺ຂິຕ຺ຕຈິຕ຺ໂຕ ວາ. ຠູຕໍເຍວ ອທ຺ທສາຕິ ເຕ ກິຣ ອສຸຣາ ສມ຺ພຣິມາຍໍ ສມ຺ປຣິວຕ຺ເຕຕ຺ວາ ຍຖາ ເນ ໂສ ປຸຣິໂສ ຫຕ຺ຖິອສ຺ສາທີສຸ ອາຣຸຫນ຺ເຕ ອຸກ຺ຂິປິຕ຺ວາ, ຠິສມຸຬາລຈ຺ຉິທ຺ເທຫິ ປວິສນ຺ເຕ ປສ຺ສຕິ, ເອວໍ ອຘິຏ຺ຐຫິໍສຸ. ຕໍ ສນ຺ຘາຍ ສຕ຺ຖາ ‘‘ຠູຕໍເຍວ ອທ຺ທສາ’’ຕິ ອາຫ. ເທວານໍເຍວ ໂມຫຍມານາຕິ ເທວານໍ ຈິຕ຺ຕໍ ໂມຫຍນ຺ຕາ. ຕສ຺ມາຕິ ຍສ຺ມາ ໂລກຈິນ຺ຕໍ ຈິນ຺ເຕນ຺ໂຕ ອຸມ຺ມຕ຺ຕໂກປິ ໂຫຕິ, ຕສ຺ມາ.

໒-໓. ປປາຕສຸຕ຺ຕາທິວຓ຺ຓນາ

໑໑໑໒-໑໓. ທຸຕິເຍ ປຏິຠານກູໂຏຕິ ເອໂກ ມຫນ຺ໂຕ ປພ຺ພຕສທິໂສ ມຣິຍາທປາສາໂຓ. ຕຕິເຍ ອນິຏ຺ຐຣູປນ຺ຕິ ອນິຏ຺ຐສຠາວໍ.

໔. ກູຏາຄາຣສຸຕ຺ຕວຓ຺ຓນາ

໑໑໑໔. ຈຕຸຕ຺ເຖ ເຫຏ຺ຐິມໍ ຆຣໍ ອກຣິຕ຺ວາຕິ ຖມ຺ຠຠິຕ຺ຕິປາທຸສ຺ສາປນາທິນາ ຆຣສ຺ສ ເຫຏ຺ຐິມຠາຄໍ ອກຕ຺ວາ.

໕. ວາລສຸຕ຺ຕວຓ຺ຓນາ

໑໑໑໕. ປຎ຺ຈເມ ສນ຺ຖາຄາເຣຕິ ສິປ຺ປຸຄ຺ຄຓ຺ຫນສາລາຍໍ. ອຸປາສນໍ ກໂຣນ຺ເຕຕິ ກຓ຺ຑຂິປນສິປ຺ປໍ ກໂຣນ຺ເຕ. ອສນໍ ອຕິປາເຕນ຺ເຕຕິ ກຓ຺ຑໍ ອຕິກ຺ກເມນ຺ເຕ. ໂປງ຺ຂານຸໂປງ຺ຂນ຺ຕິ ເອກໍ ກຓ຺ຑໍ ຂິປິຕ຺ວາ ຍຖາ ອສ຺ສ ສຣສ຺ສ ໂປງ຺ຂໍ ວິຊ຺ຌຕິ, ອປຣໍ ອນຸໂປງ຺ຂໍ ນາມ ທຸຕິຍສ຺ສ ໂປງ຺ຂໍ, ປຸນ ອປຣໍ ຕສ຺ສ ໂປງ຺ຂນ຺ຕິ ເອວໍ ອຕິປາເຕນ຺ເຕ ອທ຺ທສ. ຍຕ຺ຣ ຫິ ນາມາຕິ ເຍ ນາມ. ທຸຣຠິສມ຺ຠວຕຣນ຺ຕິ ທຸກ຺ກຣຕຣໍ. ສຕ຺ຕຘາ ຠິນ຺ນສ຺ສ ວາລສ຺ສ ໂກຏິຍາ ໂກຏິໍ ປຏິວິຊ຺ເຌຍ຺ຍາຕິ ເອກໍ ວາລໍ ສຕ຺ຕຘາ ຠິນ຺ທິຕ຺ວາ, ຕສ຺ສ ເອກໍ ເຠທໍ ຄເຫຕ຺ວາ, ວາຕິງ຺ຄຓມຊ຺ເຌ ພນ຺ຘິຕ຺ວາ, ອປຣໍ ເຠທໍ ກຓ຺ຑສ຺ສ ອຄ຺ຄໂກຏິຍໍ ພນ຺ຘິຕ຺ວາ, ອຸສຠມຕ຺ເຕ ຐິໂຕ ກຓ຺ຑພທ຺ຘາຍ ໂກຏິຍາ ຕໍ ວາຕິງ຺ຄຓພທ຺ຘໂກຏິໍ ປຏິວິຊ຺ເຌຍ຺ຍາຕິ ອຕ຺ໂຖ. ຕສ຺ມາຕິ ຍສ຺ມາ ເອວໍ ທຸປ຺ປຏິວິຊ຺ຌານິ ຈຕ຺ຕາຣິ ສຈ຺ຈານິ, ຕສ຺ມາ.

໗. ປຐມຉິຄ຺ຄຬຍຸຄສຸຕ຺ຕວຓ຺ຓນາ

໑໑໑໗. ສຕ຺ຕເມ ອຎ຺ຎມຎ຺ຎຂາທິກາຕິ ອຎ຺ຎມຎ຺ຎໍ ຂາທນໍ. ທຸພ຺ພລຂາທິກາຕິ ພລວນ຺ເຕຫິ ມຈ຺ຉາທີຫິ ທຸພ຺ພລານໍ ມຈ຺ຉາທີນໍ ຂາທນໍ.

໘. ທຸຕິຍຉິຄ຺ຄຬຍຸຄສຸຕ຺ຕວຓ຺ຓນາ

໑໑໑໘. ອຏ຺ຐເມ ມຫາປຖວີຕິ ຈກ຺ກວາຬຄພ຺ຠນ຺ຕຣາ ມຫາປຖວີ. ອຘິຈ຺ຈມິທໍ, ຠນ຺ເຕຕິ ອິທໍ ອຘິຈ຺ຈຸປ຺ປຕ຺ຕິກໍ ສເຈ ຕໍ ຍຸຄໍ ນ ປູຕິ ຠເວຍ຺ຍ, ສມຸທ຺ເທ ອຸທກໍ ນ ສຸສ຺ເສຍ຺ຍ, ໂສ ຈ ກຈ຺ຉໂປ ນ ມເຣຍ຺ຍ, ອປິ ນາມ ຍທິຈ຺ຉາວເສນ ສິຍາຕິ ອຕ຺ໂຖ.

ເອວໍ ອຘິຈ຺ຈມິທໍ, ຠິກ຺ຂເວຕິ ເອຕ຺ຖ ມຫາສີວຕ຺ເຖໂຣ ຈຕ຺ຕາຣິ ຍຸຄານິ ທສ຺ເສຕິ – ປຸຣຕ຺ຖິມຈກ຺ກວາຬມຸຂວຏ຺ຏິຍໍ ຐິເຕນ ປຸຣິເສນ ປກ຺ຂິຕ຺ຕຍຸຄສ຺ສ ຫິ ຉິຄ຺ຄເຬນ ຕສ຺ສ ອນ຺ຘກຈ຺ຉປສ຺ສ ຄີວາຍ ປເວສນໍ ວິຍ ມນຸສ຺ສປຏິລາໂຠ ອຘິຈ຺ຈປຏິລາຠີ. ທກ຺ຂິຓຈກ຺ກວາຬມຸຂວຏ຺ຏິຍໍ ຐິເຕນ ປກ຺ຂິຕ຺ຕສ຺ສ ປນ ປຣິພ຺ຠມນ຺ຕສ຺ສ ປຸຣິມຍຸຄໍ ປຕ຺ວາ ຉິຄ຺ຄເຬນ ຉິຄ຺ຄຬຸປຣິ ອາຣຸຬ຺ຫສ຺ສ ຉິຄ຺ຄເຬນ ຄີວປ຺ປເວສນໍ ວິຍ ຕຖາຄຕຸປ຺ປາໂທ ອຘິຈ຺ຈຕຣສມ຺ຠໂວ. ປຈ຺ຉິມຈກ຺ກວາຬມຸຂວຏ຺ຏິຍໍ ຐິເຕນ ປກ຺ຂິຕ຺ຕສ຺ສ ປນ ປຣິພ຺ຠມນ຺ຕສ຺ສ ປຸຣິມຍຸຄທ຺ວຍໍ ປຕ຺ວາ ຉິຄ຺ຄເຬນ ຉິຄ຺ຄຬຸປຣິ ອາຣຸຬ຺ຫສ຺ສ ຉິຄ຺ຄເຬນ ຄີວປ຺ປເວສນໍ ວິຍ ຕຖາຄຕປ຺ປເວທິຕສ຺ສ ຘມ຺ມວິນຍສ຺ສ ທີປນໍ ອຘິຈ຺ຈຕຣສມ຺ຠວໍ. ອຸຕ຺ຕຣຈກ຺ກວາຬມຸຂວຏ຺ຏິຍໍ ຐິເຕນ ປກ຺ຂິຕ຺ຕສ຺ສ ປນ ປຣິພ຺ຠມນ຺ຕສ຺ສ ປຸຣິມຍຸຄຕ຺ຕຍໍ ປຕ຺ວາ ຉິຄ຺ຄເຬນ ຉິຄ຺ຄຬຸປຣິ ອາຣຸຬ຺ຫສ຺ສ ຉິຄ຺ຄເຬນ ຄີວປ຺ປເວສນໍ ວິຍ ຈຕຸສຈ຺ຈປຏິເວໂຘ ອຕິວິຍ ອຘິຈ຺ຈຕຣສມ຺ຠໂວ ເວທິຕພ຺ໂພ. ນວມາທີນິ ອຠິສມຍສໍຍຸຕ຺ເຕ ວຸຕ຺ຕນຍາເນວາຕິ.

ປປາຕວຄ຺ໂຄ ປຎ຺ຈໂມ.