໙. ພລກຣຓີຍວຄ຺ໂຄ

໑. ພລສຸຕ຺ຕວຓ຺ຓນາ

໑໔໙. ພລກຣຓີຍວຄ຺ເຄ ພລກຣຓີຍາຕິ ອູຣຸພລພາຫຸພເລນ ກຕ຺ຕພ຺ພາ ຘາວນລງ຺ຆນຕາປນວຫນາທໂຍ ກມ຺ມນ຺ຕາ. ສີເລ ປຕິຏ຺ຐາຍາຕິ ຈຕຸປາຣິສຸທ຺ຘິສີເລ ຐຕ຺ວາ. ອຏ຺ຐງ຺ຄິກໍ ມຄ຺ຄນ຺ຕິ ສຫວິປສ຺ສນໍ ອຣິຍມຄ຺ຄໍ.

໒. ພີຊສຸຕ຺ຕວຓ຺ຓນາ

໑໕໐. ພີຊຄາມຠູຕຄາມາຕິ ເອຕ຺ຖ ປຎ຺ຈວິຘມ຺ປິ ພີຊໍ ພີຊຄາໂມ ນາມ, ຕເທວ ປຓ຺ຓສມ຺ປນ຺ນໍ ນີລຠາວໂຕ ປຏ຺ຐາຍ ຠູຕຄາໂມຕິ ເວທິຕພ຺ພໍ.

໓. ນາຄສຸຕ຺ຕວຓ຺ຓນາ

໑໕໑. ພລໍ ຄາເຫນ຺ຕີຕິ ພລໍ ຄຓ຺ຫນ຺ຕິ, ຄຫິຕພລາ ຖິຣສຣີຣາ ໂຫນ຺ຕິ. ກຸໂສພ຺ເຠ ໂອຕຣນ຺ຕີຕິອາທີສຸ ອຍມນຸປຸພ຺ພິກຖາ – ນາຄິນິໂຍ ກິຣ ອຸຕຸສມເຍ ປຕິຏ຺ຐິຕຄພ຺ຠາ ຈິນ຺ເຕນ຺ຕິ – ‘‘ສເຈ ມຍໍ ອິຘ ວິຊາຍິສ຺ສາມ, ເອວໍ ໂນ ທາຣກາ ອູມິເວຄຎ຺ຈ ສຸປຓ຺ຓສ຺ສ ຈ ປກ຺ຂນ຺ທິຕ຺ວາ ອາຄຕສ຺ສ ເວຄໍ ສຫິຕຸໍ ນ ສກ຺ຂິສ຺ສນ຺ຕີ’’ຕິ ຕາ ມຫາສມຸທ຺ເທ ນິມຸຊ຺ຊິຕ຺ວາ ສມ຺ຠຊ຺ຊມຸຂທ຺ວາຣໍ ປຕ຺ວາ ປຎ຺ຈ ມຫານທິໂຍ ປວິສິຕ຺ວາ ຫິມວນ຺ຕໍ ຄຈ຺ຉນ຺ຕິ. ຕຕ຺ຖ ສຸປຓ຺ເຓຫິ ອປກ຺ຂນ຺ທນີຍາສຸ ສຸວຓ຺ຓຣຊຕມຓິຄຸຫາສຸ ວສມານາ ວິຊາຍິຕ຺ວາ ນາຄໂປຕເກ ໂຄປ຺ຜກາທິປມາເຓສຸ ອຸທເກສຸ ໂອຕາເຣຕ຺ວາ ອຸທກຕຣຓໍ ສິກ຺ຂາເປນ຺ຕິ.

ອຖ ຍທາ ອນຸກ຺ກເມນ ເຕ ນາຄາ ຄງ຺ຄາທີນໍ ນທີນໍ ໂອຣິມຕີຣໂຕ ປຣຕີຣໍ, ປຣຕີຣໂຕ ໂອຣິມຕີຣນ຺ຕິ ຕຣຓປຏິຕຣຓໍ ກາຕຸໍ ສກ຺ໂກນ຺ຕິ, ຕທາ ‘‘ອິທານິ ໂນ ທາຣກາ ອູມິເວຄຎ຺ຈ ຄຣຸຬເວຄຎ຺ຈ ສຫິຕຸໍ ສກ຺ຂິສ຺ສນ຺ຕີ’’ຕິ ຎຕ຺ວາ ອຕ຺ຕໂນ ອານຸຠາເວນ ມຫາເມຆໍ ສມຸຏ຺ຐາເປຕ຺ວາ ສກລຫິມວນ຺ຕໍ ເອໂກທກໍ ວິຍ ກຸຣຸມານາ ເທວໍ ວສ຺ສາເປຕ຺ວາ ສຸວຓ຺ຓຣຊຕາທິມຍາ ນາວາ ມາເປຕ຺ວາ ອຸປຣິ ສຸວຓ຺ຓຕາຣກວິຈິຕ຺ຕໍ ສໂມສຣິຕຄນ຺ຘປຸປ຺ຜທາມໍ ເຈລວິຕານໍ ພນ຺ຘິຕ຺ວາ ສຸຣຠິຈນ຺ທນຄນ຺ຘປຸປ຺ຜາທີນິ ອາທາຍ ຕາຫິ ນາວາຫິ ປຎ຺ຈ ມຫານທິໂຍ ໂອຄາຫິຕ຺ວາ ອນຸກ຺ກເມນ ມຫາສມຸທ຺ທໍ ປາປຸຓນ຺ຕິ. ຕຕ຺ຖ ຈ ວສນ຺ຕາ ທສພ຺ຍາມ-ສຕພ຺ຍາມ-ສຫສ຺ສພ຺ຍາມ-ສຕສຫສ຺ສພ຺ຍາມ-ປມາຓຕໍ ອາປຊ຺ຊນ຺ຕາ ມຫນ຺ຕຕ຺ຕໍ ເວປຸລ຺ລຕ຺ຕໍ ອາປຊ຺ຊນ຺ຕິ ນາມ.

ເອວເມວ ໂຂຕິ ເອຕ຺ຖ ຫິມວນ຺ຕປພ຺ພໂຕ ວິຍ ຈຕຸປາຣິສຸທ຺ຘິສີລໍ ທຏ຺ຐພ຺ພໍ, ນາຄໂປຕກາ ວິຍ ໂຍຄາວຈຣາ, ກຸໂສພ຺ຠາທໂຍ ວິຍ ອຣິຍມຄ຺ໂຄ, ມຫາສມຸທ຺ໂທ ວິຍ ນິພ຺ພານໍ. ຍຖາ ນາຄໂປຕກາ ຫິມວນ຺ເຕ ປຕິຏ຺ຐາຍ ກຸໂສພ຺ຠາທີຫິ ມຫາສມຸທ຺ທໍ ປຕ຺ວາ ກາຍມຫນ຺ຕຕ຺ຕໍ ອາປຊ຺ຊນ຺ຕິ, ເອວໍ ໂຍຄິໂນ ສີລໍ ນິສ຺ສາຍ ສີເລ ປຕິຏ຺ຐາຍ ອຣິຍມຄ຺ເຄນ ນິພ຺ພານໍ ປຕ຺ວາ ອຣຫຕ຺ຕມຄ຺ເຄເນວ ອາຄເຕສຸ ຉສຸ ອຠິຎ຺ຎາຘມ຺ເມສຸ ຄຸຓສຣີຣມຫນ຺ຕຕ຺ຕໍ ປາປຸຓນ຺ຕີຕິ.

໕. ກຸມ຺ຠສຸຕ຺ຕວຓ຺ຓນາ

໑໕໓. ກຸມ຺ໂຠຕິ ອຸທກຆໂຏ. ໂນ ປຈ຺ຈາວມຕີຕິ ນ ປຕິອາວມຕິ, ນ ອນ຺ໂຕ ປເວເສຕີຕິ ອຕ຺ໂຖ.

໗. ອາກາສສຸຕ຺ຕວຓ຺ຓນາ

໑໕໕. ປຸຣຕ຺ຖິມາຕິ ປຸຣຕ຺ຖິມທິສໂຕ ອາຄຕວາຕາ. ປຈ຺ຉິມທິສາທີສຸປິ ເອເສວ ນໂຍ. ຈຕ຺ຕາໂຣປິ ສຕິປຏ຺ຐານາຕິ ຍເຖວ ຫິ ເອເຕສໍ ປຸຣຕ຺ຖິມາທິເຠທານໍ ວາຕານໍ ສນ຺ນິປາໂຕ ອາກາເສ ອິຊ຺ຌຕິ, ເອວໍ ອິຘາປິ ‘‘ຈຕ຺ຕາໂຣ ສຕິປຏ຺ຐານາ’’ຕິອາທິນາ ນເຍນ ວຸຕ຺ຕາ ໂພຘິປກ຺ຂິຍຘມ຺ມາ ສຫວິປສ຺ສນສ຺ສ ອຣິຍມຄ຺ຄສ຺ສ ຠາວນາຍ ອິຊ຺ຌນ຺ຕິ, ເຕເນຕໍ ວຸຕ຺ຕໍ.

໘-໙. ປຐມເມຆສຸຕ຺ຕາທິວຓ຺ຓນາ

໑໕໖-໑໕໗. ຄິມ຺ຫານໍ ປຈ຺ຉິເມ ມາເສຕິ ອາສາຬ຺ຫມາເສ. ອູຫຕນ຺ຕິ ທ຺ວິປທຈຕຸປ຺ປທານໍ ປາທປ຺ປຫາເຣນ ປຖວີຕເລ ອຸຏ຺ຐຫິຕ຺ວາ ອຸທ຺ຘໍ ຄຕໍ ວຏ຺ຏິວຏ຺ຏິ ຫຸຕ຺ວາ ອາກາເສ ປກ຺ຂນ຺ຕໍ. ຣໂຊຊລ຺ລນ຺ຕິ ປໍສຸຣໂຊຊລ຺ລໍ.

໑໐. ນາວາສຸຕ຺ຕວຓ຺ຓນາ

໑໕໘. ສາມຸທ຺ທິກາຍ ນາວາຍາຕິອາທິ ເຫຏ຺ຐາ ວາຓິຊໂກປເມ ວິຕ຺ຖາຣິຕເມວ.

໑໑-໑໒. ອາຄນ຺ຕຸກສຸຕ຺ຕາທິວຓ຺ຓນາ

໑໕໙-໑໖໐. ອາຄນ຺ຕຸກາຄາຣນ຺ຕິ ປຸຎ຺ຎຕ຺ຖິເກຫິ ນຄຣມຊ຺ເຌ ກຕໍ ອາຄນ຺ຕຸກຆຣໍ, ຍຕ຺ຖ ຣາຊຣາຊມຫາມຕ຺ເຕຫິປິ ສກ຺ກາ ໂຫຕິ ນິວາສໍ ອຸປຄນ຺ຕຸໍ. ອຠິຎ຺ຎາ ປຣິຎ຺ເຎຍ຺ຍາຕິ ຍເຖວ ຫິ ເຕສໍ ປຸຣຕ຺ຖິມທິສາທີຫິ ອາຄຕານໍ ຂຕ຺ຕິຍາທີນໍ ວາໂສ ອາຄນ຺ຕຸກາຄາເຣ ອິຊ຺ຌຕິ, ເອວໍ ອິເມສໍ ອຠິຎ຺ຎາປຣິຎ຺ເຎຍ຺ຍາຕິອາທີນໍ ຘມ຺ມານໍ ອຠິຎ຺ຎາປຣິຊານນາທີຫິ ສຫວິປສ຺ສນສ຺ສ ອຣິຍມຄ຺ຄສ຺ສ ຠາວນາຍ ອິຊ຺ຌນ຺ຕິ, ເຕເນຕໍ ວຸຕ຺ຕໍ. ນທີສຸຕ຺ຕໍ ເຫຏ຺ຐາ ວຸຕ຺ຕນຍເມວາຕິ.

ພລກຣຓີຍວຄ຺ໂຄ ນວໂມ.