໒. ທຸຕິຍວິຫາຣສຸຕ຺ຕວຓ຺ຓນາ

໑໒. ທຸຕິເຍ ປຏິສລ຺ລານກາຣຓໍ ວຸຕ຺ຕນເຍເນວ ເວທິຕພ຺ພໍ. ມິຈ຺ຉາທິຏ຺ຐິວູປສມປຈ຺ຈຍາຕິ ມິຈ຺ຉາທິຏ຺ຐິວູປສໂມ ນາມ ສມ຺ມາທິຏ຺ຐິ. ຕສ຺ມາ ຍໍ ສມ຺ມາທິຏ຺ຐິປຈ຺ຈຍາ ເວທຍິຕໍ ວຸຕ຺ຕໍ, ຕເທວ ມິຈ຺ຉາທິຏ຺ຐິວູປສມປຈ຺ຈຍາ ເວທິຕພ຺ພໍ. ອິມສ຺ມິໍ ປນ ສຸຕ຺ເຕ ວິປາກເວທນໍ ອຕິທູເຣຕິ ມຎ຺ຎມານາ ນ ຄຓ຺ຫນ຺ຕີຕິ ວຸຕ຺ຕໍ. ອິມິນາ ນເຍນ ສພ຺ພຕ຺ຖ ອຕ຺ໂຖ ເວທິຕພ຺ໂພ. ຍສ຺ສ ຍສ຺ສ ຫິ ວູປສມປຈ຺ຈຍາຕິ ວຸຈ຺ຈຕິ, ຕສ຺ສ ຕສ຺ສ ປຏິປກ຺ຂຘມ຺ມປຈ຺ຈຍາວ ຕໍ ຕໍ ເວທຍິຕໍ ອຘິປ຺ເປຕໍ. ຉນ຺ທວູປສມປຈ຺ຈຍາຕິອາທີສຸ ປນ ຉນ຺ທວູປສມປຈ຺ຈຍາ ຕາວ ປຐມຊ຺ຌານເວທນາ ເວທິຕພ຺ພາ. ວິຕກ຺ກວູປສມປຈ຺ຈຍາ ທຸຕິຍຊ຺ຌານເວທນາ. ສຎ຺ຎາປຈ຺ຈຍາ ຉສມາປຕ຺ຕິເວທນາ. ສຎ຺ຎາວູປສມປຈ຺ຈຍາ ເນວສຎ຺ຎານາສຎ຺ຎາຍຕນເວທນາ. ຉນ຺ໂທ ຈ ວູປສນ຺ໂຕຕິອາທີນິ ວຸຕ຺ຕຕ຺ຖາເນວ.