໗. ສາຣິປຸຕ຺ຕສໍຍຸຕ຺ຕໍ

໑-໙. ວິເວກຊສຸຕ຺ຕາທິວຓ຺ຓນາ

໓໓໒-໓໔໐. ສາຣິປຸຕ຺ຕສໍຍຸຕ຺ຕສ຺ສ ປຐເມ ນ ເອວໍ ໂຫຕີຕິ ອຫງ຺ກາຣມມງ຺ກາຣານໍ ປຫີນຕ຺ຕາ ເອວໍ ນ ໂຫຕິ. ທຸຕິຍາທີສຸປິ ເອເສວ ນໂຍ. ປຐມາທີນິ.

໑໐. ສຸຈິມຸຂີສຸຕ຺ຕວຓ຺ຓນາ

໓໔໑. ທສເມ ສຸຈິມຸຂີຕິ ເອວໍນາມິກາ. ອຸປສງ຺ກມີຕິ ເຖຣໍ ອຠິຣູປໍ ທສ຺ສນີຍໍ ສຸວຓ຺ຓວຓ຺ຓໍ ສມນ຺ຕປາສາທິກໍ ທິສ຺ວາ ‘‘ອິມິນາ ສທ຺ຘິໍ ປຣິຫາສໍ ກຣິສ຺ສາມີ’’ຕິ ອຸປສງ຺ກມິ. ອຖ ເຖເຣນ ຕສ຺ມິໍ ວຈເນ ປຏິກ຺ຂິຕ຺ເຕ ‘‘ອິທານິສ຺ສ ວາທໍ ອາໂຣເປສ຺ສາມີ’’ຕິ ມຎ຺ຎມານາ ເຕນ ຫິ, ສມຓ, ອຸພ຺ຠມຸໂຂ ຠຸຎ຺ຊສີຕິ ອາຫ. ທິສາມຸໂຂຕິ ຈຕຸທ຺ທິສາມຸໂຂ, ຈຕສ຺ໂສ ທິສາ ໂອໂລເກນ຺ໂຕຕິ ອຕ຺ໂຖ. ວິທິສາມຸໂຂຕິ ຈຕສ຺ໂສ ວິທິສາ ໂອໂລເກນ຺ໂຕ.

ວຕ຺ຖຸວິຊ຺ຊາຕິຣຈ຺ຉານວິຊ຺ຊາຍາຕິ ວຕ຺ຖຸວິຊ຺ຊາສງ຺ຂາຕາຍ ຕິຣຈ຺ຉານວິຊ຺ຊາຍ. ວຕ຺ຖຸວິຊ຺ຊາ ນາມ ລາພຸວຕ຺ຖຸ-ກຸມ຺ຠຓ຺ຑວຕ຺ຖຸ-ມູລກວຕ຺ຖຸ-ອາທີນໍ ວຕ຺ຖູນໍ ຜລສມ຺ປຕ຺ຕິກາຣຓກາລຊານນຸປາໂຍ. ມິຈ຺ຉາຊີເວນ ຊີວິກໍ ກປ຺ເປນ຺ຕີຕິ ເຕເນວ ວຕ຺ຖຸວິຊ຺ຊາຕິຣຈ຺ຉານວິຊ຺ຊາສງ຺ຂາເຕນ ມິຈ຺ຉາຊີເວນ ຊີວິກໍ ກປ຺ເປນ຺ຕິ, ເຕສໍ ວຕ຺ຖູນໍ ສມ຺ປາທເນນ ປສນ຺ເນຫິ ມນຸສ຺ເສຫິ ທິນ຺ເນ ປຈ຺ຈເຍ ປຣິຠຸຎ຺ຊນ຺ຕາ ຊີວນ຺ຕີຕິ ອຕ຺ໂຖ. ອໂຘມຸຂາຕິ ວຕ຺ຖຸໍ ໂອໂລເກຕ຺ວາ ຠຸຎ຺ຊມານວເສນ ອໂຘມຸຂາ ຠຸຎ຺ຊນ຺ຕິ ນາມ. ເອວໍ ສພ຺ພຕ຺ຖ ໂຍຊນາ ກາຕພ຺ພາ. ອປິ ເຈຕ຺ຖ ນກ຺ຂຕ຺ຕວິຊ຺ຊາຕິ ‘‘ອຊ຺ຊ ອິມໍ ນກ຺ຂຕ຺ຕໍ ອິມິນາ ນກ຺ຂຕ຺ເຕນ ຄນ຺ຕພ຺ພໍ, ອິມິນາ ອິທຎ຺ຈິທຎ຺ຈ ກາຕພ຺ພ’’ນ຺ຕິ ເອວໍ ຊານນວິຊ຺ຊາ. ທູເຕຍ຺ຍນ຺ຕິ ທູຕກມ຺ມໍ, ເຕສໍ ເຕສໍ ສາສນໍ ຄເຫຕ຺ວາ ຕຕ຺ຖ ຕຕ຺ຖ ຄມນໍ. ປຫິຓຄມນນ຺ຕິ ເອກຄາມສ຺ມິໍເຍວ ເອກກຸລສ຺ສ ສາສເນນ ອຎ຺ຎກຸລໍ ອຸປສງ຺ກມນໍ. ອງ຺ຄວິຊ຺ຊາຕິ ອິຕ຺ຖິລກ຺ຂຓປຸຣິສລກ຺ຂຓວເສນ ອງ຺ຄສມ຺ປຕ຺ຕິໍ ຎຕ຺ວາ ‘‘ຕາຍ ອງ຺ຄສມ຺ປຕ຺ຕິຍາ ອິທໍ ນາມ ລພ຺ຠຕີ’’ຕິ ເອວໍ ຊານນວິຊ຺ຊາ. ວິທິສາມຸຂາຕິ ອງ຺ຄວິຊ຺ຊາ ຫິ ຕໍ ຕໍ ສຣີຣໂກຏ຺ຐາສໍ ອາຣພ຺ຠ ປວຕ຺ຕຕ຺ຕາ ວິທິສາຍ ປວຕ຺ຕາ ນາມ, ຕສ຺ມາ ຕາຍ ວິຊ຺ຊາຍ ຊີວິກໍ ກປ຺ເປຕ຺ວາ ຠຸຎ຺ຊນ຺ຕາ ວິທິສາມຸຂາ ຠຸຎ຺ຊນ຺ຕິ ນາມ. ເອວມາໂຣເຈສີຕິ ‘‘ຘມ຺ມິກໍ ສມຓາ’’ຕິອາທີນິ ວທມານາ ສາສນສ຺ສ ນິຍ຺ຍານິກໍ ຄຸຓໍ ກເຖສິ. ຕຎ຺ຈ ປຣິພ຺ພາຊິກາຍ ກຖໍ ສຸຕ຺ວາ ປຎ຺ຈມຕ຺ຕານິ ກຸລສຕານິ ສາສເນ ໂອຕຣິໍສູຕິ.

ສາຣິປຸຕ຺ຕສໍຍຸຕ຺ຕວຓ຺ຓນາ ນິຏ຺ຐິຕາ.