໒. ຣາຘສໍຍຸຕ຺ຕໍ

໑. ປຐມວຄ຺ໂຄ

໑. ມາຣສຸຕ຺ຕວຓ຺ຓນາ

໑໖໐. ຣາຘສໍຍຸຕ຺ຕສ຺ສ ປຐເມ ມາໂຣ ວາ ອສ຺ສາຕິ ມຣຓໍ ວາ ຠເວຍ຺ຍ. ມາເຣຕາ ວາຕິ ມາເຣຕພ຺ໂພ ວາ. ໂຍ ວາ ປນ ມີຍຕີຕິ ໂຍ ວາ ປນ ມຣຕິ. ນິພ຺ພິທຕ຺ຖນ຺ຕິ ນິພ຺ພິທາຎາຓຕ຺ຖໍ. ນິພ຺ພານຕ຺ຖາຕິ ຜລວິມຸຕ຺ຕິ ນາເມສາ ອນຸປາທານິພ຺ພານຕ຺ຖາຕິ ອຕ຺ໂຖ. ອຈ຺ຈຍາສີຕິ ອຕິກ຺ກນ຺ໂຕສິ. ນິພ຺ພາໂນຄຘນ຺ຕິ ນິພ຺ພາເນ ປຕິຏ຺ຐິຕໍ. ອິທໍ ມຄ຺ຄພ຺ຣຫ຺ມຈຣິຍໍ ນາມ ນິພ຺ພານພ຺ຠນ຺ຕເຣ ວຸສ຺ສຕິ, ນ ນິພ຺ພານໍ ອຕິກ຺ກມິຕ຺ວາຕິ ອຕ຺ໂຖ. ນິພ຺ພານປຣິໂຍສານນ຺ຕິ ນິພ຺ພານໍ ອສ຺ສ ປຣິໂຍສານໍ, ນິປ຺ຜຕ຺ຕິ ນິຏ຺ຐາຕິ ອຕ຺ໂຖ. ປຐມໍ.

໒-໑໐. ສຕ຺ຕສຸຕ຺ຕາທິວຓ຺ຓນາ

໑໖໑-໑໖໙. ທຸຕິເຍ ສຕ຺ໂຕ ສຕ຺ໂຕຕິ ລຄ຺ຄປຸຈ຺ຉາ. ຕຕ຺ຣ ສຕ຺ໂຕ ຕຕ຺ຣ ວິສຕ຺ໂຕຕິ ຕຕ຺ຣ ລຄ຺ໂຄ ຕຕ຺ຣ ວິລຄ຺ໂຄ. ປໍສ຺ວາຄາຣເກຫີຕິ ປໍສຸຆຣເກຫິ. ເກຬາຍນ຺ຕີຕິ ກີຬນ຺ຕິ. ຘນາຍນ຺ຕີຕິ ຘນໍ ວິຍ ມຎ຺ຎນ຺ຕິ. ມມາຍນ຺ຕີຕິ ‘‘ມມ ອິທໍ, ມມ ອິທ’’ນ຺ຕິ ມມຕ຺ຕໍ ກໂຣນ຺ຕິ, ອຎ຺ຎສ຺ສ ຜຸສິຕຸມ຺ປິ ນ ເທນ຺ຕິ. ວິກີຬນິຍໍ ກໂຣນ຺ຕີຕິ ‘‘ນິຏ຺ຐິຕາ ກີຬາ’’ຕິ ເຕ ຠິນ຺ທມານາ ກີຬາວິຄມໍ ກໂຣນ຺ຕິ. ຕຕິເຍ ຠວເນຕ຺ຕີຕິ ຠວຣຊ຺ຊຸ. ຈຕຸຕ຺ຖໍ ອຸຕ຺ຕານເມວ. ປຎ຺ຈມາທີສຸ ຈຕູສຸ ຈຕ຺ຕາຣິ ສຈ຺ຈານິ ກຖິຕານິ, ທ຺ວີສຸ ກິເລສປ຺ປຫານນ຺ຕິ. ທຸຕິຍາທີນິ.

ປຐໂມ ວຄ຺ໂຄ.

໒. ທຸຕິຍວຄ຺ໂຄ

໑-໑໒. ມາຣສຸຕ຺ຕາທິວຓ຺ຓນາ

໑໗໐-໑໘໑. ທຸຕິຍວຄ຺ຄສ຺ສ ປຐເມ ມາໂຣ, ມາໂຣຕິ ມຣຓໍ ປຸຈ຺ຉຕິ. ຍສ຺ມາ ປນ ຣູປາທິວິນິມຸຕ຺ຕໍ ມຣຓໍ ນາມ ນຕ຺ຖິ, ເຕນສ຺ສ ຠຄວາ ຣູປໍ ໂຂ, ຣາຘ, ມາໂຣຕິອາທິມາຫ. ທຸຕິເຍ ມາຣຘມ຺ໂມຕິ ມຣຓຘມ຺ໂມ. ເອເຕນຸປາເຍນ ສພ຺ພຕ຺ຖ ອຕ຺ໂຖ ເວທິຕພ຺ໂພຕິ.

ທຸຕິໂຍ ວຄ຺ໂຄ.

໓-໔. ອາຍາຈນວຄ຺ຄາທິ

໑-໑໑. ມາຣາທິສຸຕ຺ຕເອກາທສກວຓ຺ຓນາ

໑໘໒-໒໐໕. ຕໂຕ ປຣໍ ອຸຕ຺ຕານຕ຺ຖເມວ. ອຍຎ຺ຫິ ຣາຘຕ຺ເຖໂຣ ປຏິຠານິຍຕ຺ເຖໂຣ ນາມ. ຕຖາຄຕສ຺ສ ອິມໍ ເຖຣໍ ທິສ຺ວາ ສຸຂຸມໍ ກາຣຓໍ ອຸປຏ຺ຐາຕິ. ເຕນສ຺ສ ຠຄວາ ນານານເຍຫິ ຘມ຺ມໍ ເທເສຕິ. ເອວໍ ອິມສ຺ມິໍ ຣາຘສໍຍຸຕ຺ເຕ ອາທິໂຕ ທ຺ເວ ວຄ຺ຄາ ປຸຈ຺ຉາວເສນ ເທສິຕາ, ຕຕິໂຍ ອາຍາຈເນນ, ຈຕຸຕ຺ໂຖ ອຸປນິສິນ຺ນກກຖາວເສນ. ສກລມ຺ປິ ປເນຕໍ ຣາຘສໍຍຸຕ຺ຕໍ ເຖຣສ຺ສ ວິມຸຕ຺ຕິປຣິປາຈນີຍຘມ຺ມວເສເນວ ຄຫິຕນ຺ຕິ ເວທິຕພ຺ພໍ.

ຣາຘສໍຍຸຕ຺ຕວຓ຺ຓນາ ນິຏ຺ຐິຕາ.