໕. ຄຫປຕິວຄ຺ໂຄ

໑. ປຎ຺ຈເວຣຠຍສຸຕ຺ຕວຓ຺ຓນາ

໔໑. ຄຫປຕິວຄ຺ຄສ຺ສ ປຐເມ ຍໂຕຕິ ຍທາ. ຠຍານິ ເວຣານີຕິ ຠຍເວຣເຈຕນາໂຍ. ໂສຕາປຕ຺ຕິຍງ຺ເຄຫີຕິ ທຸວິຘໍ ໂສຕາປຕ຺ຕິຍາ ອງ຺ຄໍ, (ໂສຕາປຕ຺ຕິຍາ ຈ ອງ຺ຄໍ,) ຍໍ ປຸພ຺ພຠາເຄ ໂສຕາປຕ຺ຕິປຏິລາຠາຍ ສໍວຕ຺ຕຕິ, ‘‘ສປ຺ປຸຣິສສໍເສໂວ ສທ຺ຘມ຺ມສ຺ສວນໍ ໂຍນິໂສມນສິກາໂຣ ຘມ຺ມານຸຘມ຺ມປ຺ປຏິປຕ຺ຕີ’’ຕິ (ທີ. ນິ. ໓.໓໑໑) ເອວໍ ອາຄຕໍ, ປຏິລທ຺ຘຄຸຓສ຺ສ ຈ ໂສຕາປຕ຺ຕິໍ ປຕ຺ວາ ຐິຕສ຺ສ ອງ຺ຄໍ, ຍໍ ໂສຕາປນ຺ນສ຺ສ ອງ຺ຄນ຺ຕິປິ ວຸຈ຺ຈຕິ, ພຸທ຺ເຘ ອເວຈ຺ຈປ຺ປສາທາທີນໍ ເອຕໍ ອຘິວຈນໍ. ອິທມິຘ ອຘິປ຺ເປຕໍ. ອຣິໂຍຕິ ນິທ຺ໂທໂສ ນິຣຸປາຣມ຺ໂຠ. ຎາໂຍຕິ ປຏິຈ຺ຈສມຸປ຺ປນ຺ນໍ ຎຕ຺ວາ ຐິຕຎາຓມ຺ປິ ປຏິຈ຺ຈສມຸປ຺ປາໂທປິ. ຍຖາຫ – ‘‘ຎາໂຍ ວຸຈ຺ຈຕິ ປຏິຈ຺ຈສມຸປ຺ປາໂທ, ອຣິໂຍປິ ອຏ຺ຐງ຺ຄິໂກ ມຄ຺ໂຄ ຎາໂຍ’’ຕິ. ປຎ຺ຎາຍາຕິ ອປຣາປຣໍ ອຸປ຺ປນ຺ນາຍ ວິປສ຺ສນາປຎ຺ຎາຍ. ສຸທິຏ຺ໂຐ ໂຫຕີຕິ ອປຣາປຣໍ ອຸປ຺ປຊ຺ຊິຕ຺ວາ ທສ຺ສນວເສນ ສຸຏ຺ຐຸ ທິຏ຺ໂຐ.

ຂີຓນິຣໂຍຕິອາທີສຸ ອາຍຕິໍ ຕຕ຺ຖ ອນຸປ຺ປຊ຺ຊນຕາຍ ຂີໂຓ ນິຣໂຍ ມຍ຺ຫນ຺ຕິ ໂສ ອຫໍ ຂີຓນິຣໂຍ. ເອສ ນໂຍ ສພ຺ພຕ຺ຖ. ໂສຕາປນ຺ໂນຕິ ມຄ຺ຄໂສຕໍ ອາປນ຺ໂນ. ອວິນິປາຕຘມ຺ໂມຕິ ນ ວິນິປາຕສຠາໂວ. ນິຍໂຕຕິ ປຐມມຄ຺ຄສງ຺ຂາເຕນ ສມ຺ມຕ຺ຕນິຍາເມນ ນິຍໂຕ. ສມ຺ໂພຘິປຣາຍໂນຕິ ອຸຕ຺ຕຣິມຄ຺ຄຕ຺ຕຍສງ຺ຂາໂຕ ສມ຺ໂພຘິ ປຣໍ ອຍນໍ ມຍ຺ຫນ຺ຕິ ໂສຫໍ ສມ຺ໂພຘິປຣາຍໂນ, ຕໍ ສມ຺ໂພຘິໍ ອວສ຺ສໍ ອຠິສມ຺ພຸຊ຺ຌນໂກຕິ ອຕ຺ໂຖ.

ປາຓາຕິປາຕປຈ຺ຈຍາຕິ ປາຓາຕິປາຕກມ຺ມກາຣຓາ. ຠຍໍ ເວຣນ຺ຕິ ອຕ຺ຖໂຕ ເອກໍ. ເວຣຎ຺ຈ ນາເມຕໍ ທຸວິຘໍ ໂຫຕິ ພາຫິຣໍ ອຊ຺ຌຕ຺ຕິກນ຺ຕິ. ເອເກນ ຫິ ເອກສ຺ສ ປິຕາ ມາຣິໂຕ ໂຫຕິ, ໂສ ຈິນ຺ເຕສິ ‘‘ເອເຕນ ກິຣ ເມ ປິຕາ ມາຣິໂຕ, ອຫມ຺ປິ ຕໍເຍວ ມາເຣສ຺ສາມີ’’ຕິ ນິສິຕໍ ສຕ຺ຖໍ ອາທາຍ ຈຣຕິ. ຍາ ຕສ຺ສ ອພ຺ຠນ຺ຕເຣ ອຸປ຺ປນ຺ນເວຣເຈຕນາ, ອິທໍ ພາຫິຣໍ ເວຣໍ ນາມ. ຍາ ປນ ອິຕຣສ຺ສ ‘‘ອຍໍ ກິຣ ມໍ ມາເຣສ຺ສາມີຕິ ຈຣຕິ, ອຫເມວ ນໍ ປຐມຕຣໍ ມາເຣສ຺ສາມີ’’ຕິ ເຈຕນາ ອຸປ຺ປຊ຺ຊຕິ, ອິທໍ ອຊ຺ຌຕ຺ຕິກໍ ເວຣໍ ນາມ. ອິທໍ ຕາວ ອຸຠຍມ຺ປິ ທິຏ຺ຐຘມ຺ມິກເມວ. ຍາ ປນ ຕໍ ນິຣເຍ ອຸປ຺ປນ຺ນໍ ທິສ຺ວາ ‘‘ເອຕໍ ປຫຣິສ຺ສາມີ’’ຕິ ຊລິຕໍ ອຍມຸຄ຺ຄຣໍ ຄຓ຺ຫໂຕ ນິຣຍປາລສ຺ສ ເຈຕນາ ອຸປ຺ປຊ຺ຊຕິ, ອິທມສ຺ສ ສມ຺ປຣາຍິກໍ ພາຫິຣເວຣໍ. ຍາ ຈສ຺ສ ‘‘ອຍໍ ນິທ຺ໂທສໍ ມໍ ປຫຣິສ຺ສາມີຕິ ອາຄຈ຺ຉຕິ, ອຫເມວ ນໍ ປຐມຕຣໍ ປຫຣິສ຺ສາມີ’’ຕິ ເຈຕນາ ອຸປ຺ປຊ຺ຊຕິ, ອິທມສ຺ສ ສມ຺ປຣາຍິກໍ ອຊ຺ຌຕ຺ຕເວຣໍ. ຍໍ ປເນຕໍ ພາຫິຣເວຣໍ, ຕໍ ອຏ຺ຐກຖາຍໍ ‘‘ປຸຄ຺ຄລເວຣ’’ນ຺ຕິ ວຸຕ຺ຕໍ. ທຸກ຺ຂໍ ໂທມນສ຺ສນ຺ຕິ ອຕ຺ຖໂຕ ເອກເມວ. ຍຖາ ເຈຕ຺ຖ, ເອວໍ ເສສປເທສຸປິ ‘‘ອິມິນາ ມມ ຠຓ຺ຑໍ ຫຏໍ, ມຍ຺ຫໍ ທາເຣສຸ ຈາຣິຕ຺ຕໍ ອາປນ຺ນໍ, ມຸສາ ວຕ຺ວາ ອຕ຺ໂຖ ຠຄ຺ໂຄ, ສຸຣາມທມຕ຺ເຕນ ອິທໍ ນາມ ກຕ’’ນ຺ຕິອາທິນາ ນເຍນ ເວຣຸປ຺ປຕ຺ຕິ ເວທິຕພ຺ພາ. ອເວຈ຺ຈປ຺ປສາເທນາຕິ ອຘິຄເຕນ ອຈລປ຺ປສາເທນ. ອຣິຍກນ຺ເຕຫີຕິ ປຎ຺ຈຫິ ສີເລຫິ. ຕານິ ຫິ ອຣິຍານໍ ກນ຺ຕານິ ປິຍານິ. ຠວນ຺ຕຣຄຕາປິ ອຣິຍາ ຕານິ ນ ວິຊຫນ຺ຕິ, ຕສ຺ມາ ‘‘ອຣິຍກນ຺ຕານີ’’ຕິ ວຸຈ຺ຈນ຺ຕິ. ເສສເມຕ຺ຖ ຍໍ ວຕ຺ຕພ຺ພໍ ສິຍາ, ຕໍ ສພ຺ພໍ ວິສຸທ຺ຘິມຄ຺ເຄ ອນຸສ຺ສຕິນິທ຺ເທເສ ວຸຕ຺ຕເມວ. ປຐມໍ.

໒. ທຸຕິຍປຎ຺ຈເວຣຠຍສຸຕ຺ຕວຓ຺ຓນາ

໔໒. ທຸຕິເຍ ຠິກ຺ຂູນໍ ກຖິຕຠາວມຕ຺ຕເມວ ວິເສໂສ. ທຸຕິຍໍ.

໓. ທຸກ຺ຂສຸຕ຺ຕວຓ຺ຓນາ

໔໓. ຕຕິເຍ ທຸກ຺ຂສ຺ສາຕິ ວຏ຺ຏທຸກ຺ຂສ຺ສ. ສມຸທຍນ຺ຕິ ທ຺ເວ ສມຸທຍາ ຂຓິກສມຸທໂຍ ຈ ປຈ຺ຈຍສມຸທໂຍ ຈ. ປຈ຺ຈຍສມຸທຍໍ ປສ຺ສນ຺ໂຕປິ ຠິກ຺ຂຸ ຂຓິກສມຸທຍໍ ປສ຺ສຕິ, ຂຓິກສມຸທຍໍ ປສ຺ສນ຺ໂຕປິ ປຈ຺ຈຍສມຸທຍໍ ປສ຺ສຕິ. ອຕ຺ຖງ຺ຄໂມປິ ອຈ຺ຈນ຺ຕຕ຺ຖງ຺ຄໂມ ເຠທຕ຺ຖງ຺ຄໂມຕິ ທຸວິໂຘ. ອຈ຺ຈນ຺ຕຕ຺ຖງ຺ຄມໍ ປສ຺ສນ຺ໂຕປິ ເຠທຕ຺ຖງ຺ຄມໍ ປສ຺ສຕິ, ເຠທຕ຺ຖງ຺ຄມໍ ປສ຺ສນ຺ໂຕປິ ອຈ຺ຈນ຺ຕຕ຺ຖງ຺ຄມໍ ປສ຺ສຕິ. ເທເສສ຺ສາມີຕິ ອິທໍ ວຏ຺ຏທຸກ຺ຂສ຺ສ ສມຸທຍອຕ຺ຖງ຺ຄມໍ ນິພ຺ພຕ຺ຕິເຠທໍ ນາມ ເທເສສ຺ສາມິ, ຕໍ ສຸຓາຖາຕິ ອຕ຺ໂຖ. ປຏິຈ຺ຈາຕິ ນິສ຺ສຍວເສນ ເຈວ ອາຣມ຺ມຓວເສນ ຈ ປຈ຺ຈຍໍ ກຕ຺ວາ. ຕິຓ຺ຓໍ ສງ຺ຄຕິ ຜສ຺ໂສຕິ ຕິຓ຺ຓໍ ສງ຺ຄຕິຍາ ຜສ຺ໂສ. ອຍໍ ໂຂ, ຠິກ຺ຂເວ, ທຸກ຺ຂສ຺ສ ສມຸທໂຍຕິ ອຍໍ ວຏ຺ຏທຸກ຺ຂສ຺ສ ນິພ຺ພຕ຺ຕິ ນາມ. ອຕ຺ຖງ຺ຄໂມຕິ ເຠໂທ. ເອວຎ຺ຫິ ວຏ຺ຏທຸກ຺ຂໍ ຠິນ຺ນໍ ໂຫຕິ ອປ຺ປຏິສນ຺ຘິຍໍ. ຕຕິຍໍ.

໔. ໂລກສຸຕ຺ຕວຓ຺ຓນາ

໔໔. ຈຕຸຕ຺ເຖ ໂລກສ຺ສາຕິ ສງ຺ຂາຣໂລກສ຺ສ. ອຍເມຕ຺ຖ ວິເສໂສ. ຈຕຸຕ຺ຖໍ.

໕. ຎາຕິກສຸຕ຺ຕວຓ຺ຓນາ

໔໕. ປຎ຺ຈເມ ຎາຕິເກຕິ ທ຺ວິນ຺ນໍ ຎາຕການໍ ຄາເມ. ຄິຎ຺ຊກາວສເຖຕິ ອິຏ຺ຐກາຫິ ກເຕ ມຫາປາສາເທ. ຘມ຺ມປຣິຍາຍນ຺ຕິ ຘມ຺ມກາຣຓໍ. ອຸປສ຺ສຸຕີຕິ ອຸປສ຺ສຸຕິຏ຺ຐານໍ, ຍໍ ຐານໍ ອຸປຄເຕນ ສກ຺ກາ ໂຫຕິ ຠຄວໂຕ ສທ຺ທໍ ໂສຕຸໍ, ຕຕ຺ຖ ຐິໂຕຕິ ອຕ຺ໂຖ. ໂສ ກິຣ ຄນ຺ຘກຸຏິປຣິເວຓສມ຺ມຊ຺ຊນຕ຺ຖໍ ອາຄໂຕ ອຕ຺ຕໂນ ກມ຺ມໍ ປຫາຍ ຠຄວໂຕ ຘມ຺ມໂຆສໍ ສຸຓນ຺ໂຕ ອຏ຺ຐາສິ. ອທ຺ທສາຕິ ຕທາ ກິຣ ຠຄວໂຕ ອາທິໂຕວ ປຈ຺ຈຍາກາຣໍ ມນສິກໂຣນ຺ຕສ຺ສ ‘‘ອິທໍ ອິມິນາ ປຈ຺ຈເຍນ ໂຫຕິ, ອິທໍ ອິມິນາ’’ຕິ ອາວຊ຺ຊໂຕ ຍາວ ຠວຄ຺ຄາ ເອກງ຺ຄຓໍ ອໂຫສິ, ສຕ຺ຖາ ມນສິກາຣໍ ປຫາຍ ວຈສາ ສຊ຺ຌາຍໍ ກໂຣນ຺ໂຕ ຍຖານຸສນ຺ຘິນາ ເທສນໍ ນິຏ຺ຐເປຕ຺ວາ, ‘‘ອປິ ນຸ ໂຂ ອິມໍ ຘມ຺ມປຣິຍາຍໍ ໂກຈິ ອສ຺ໂສສີ’’ຕິ ອາວຊ຺ເຊນ຺ໂຕ ຕໍ ຠິກ຺ຂຸມທ຺ທສ. ເຕນ ວຸຕ຺ຕໍ ‘‘ອທ຺ທສາ ໂຂ ຠຄວາ’’ຕິ.

ອສ຺ໂສສິ ໂນຕິ ອສ຺ໂສສິ ນຸ. ອຖ ວາ ອສ຺ໂສສິ ໂນຕິ ອມ຺ຫາກໍ ຠາສນ຺ຕານໍ ອສ຺ໂສສີຕິ. ອຸຄ຺ຄຓ຺ຫາຫີຕິອາທີສຸ ສຸຕ຺ວາ ຕຸຓ຺ຫີຠູໂຕວ ປຄຸຓໍ ກໂຣນ຺ໂຕ ອຸຄ຺ຄຓ຺ຫາຕິ ນາມ. ປທານຸປທໍ ຆເຏຕ຺ວາ ວາຈາຍ ປຣິຈິຕໍ ກໂຣນ຺ໂຕ ປຣິຍາປຸຓາຕິ ນາມ. ອຸຠຍຖາປິ ປຄຸຓໍ ອາຘາຣປ຺ປຕ຺ຕໍ ກໂຣນ຺ໂຕ ຘາເຣຕິ ນາມ. ອຕ຺ຖສໍຫິໂຕຕິ ກາຣຓນິສ຺ສິໂຕ. ອາທິພ຺ຣຫ຺ມຈຣິຍໂກຕິ ມຄ຺ຄພ຺ຣຫ຺ມຈຣິຍສ຺ສ ອາທິ ປຕິຏ຺ຐານຠູໂຕ. ອິຕິ ຕີສຸປິ ອິເມສຸ ສຸຕ຺ເຕສຸ ວຏ຺ຏວິວຏ຺ຏເມວ ກຖິຕໍ. ປຎ຺ຈມໍ.

໖. ອຎ຺ຎຕຣພ຺ຣາຫ຺ມຓສຸຕ຺ຕວຓ຺ຓນາ

໔໖. ຉຏ຺ເຐ ອຎ຺ຎຕໂຣຕິ ນາມວເສນ ອປາກໂຏ ອຎ຺ຎຕໂຣ ພ຺ຣາຫ຺ມໂຓ. ຉຏ຺ຐໍ.

໗. ຊາຓຸສ຺ໂສຓິສຸຕ຺ຕວຓ຺ຓນາ

໔໗. ສຕ຺ຕເມ ຊາຓຸສ຺ໂສຓີຕິ ຐານນ຺ຕຣວເສນ ເອວໍລທ຺ຘນາໂມ ອສີຕິໂກຏິວິຠໂວ ມຫາປຸໂຣຫິໂຕ. ສຕ຺ຕມໍ.

໘. ໂລກາຍຕິກສຸຕ຺ຕວຓ຺ຓນາ

໔໘. ອຏ຺ຐເມ ໂລກາຍຕິໂກຕິ ວິຕຓ຺ຑສຕ຺ເຖ ໂລກາຍເຕ ກຕປຣິຈໂຍ. ເຊຏ຺ຐເມຕໍ ໂລກາຍຕນ຺ຕິ ປຐມໍ ໂລກາຍຕໍ. ໂລກາຍຕນ຺ຕິ ຈ ໂລກສ຺ເສວ ອາຍຕໍ, ພາລປຸຖຸຊ຺ຊນໂລກສ຺ສ ອາຍຕໍ, ມຫນ຺ຕໍ ຄມ຺ຠີຣນ຺ຕິ ອຸປຘາຣິຕພ຺ພໍ ປຣິຕ຺ຕໍ ຠາວໍ ທິຏ຺ຐິຄຕໍ. ເອກຕ຺ຕນ຺ຕິ ເອກສຠາວໍ, ນິຈ຺ຈສຠາວເມວາຕິ ປຸຈ຺ຉຕິ. ປຸຖຸຕ຺ຕນ຺ຕິ ປຸຣິມສຠາເວນ ນານາສຠາວໍ, ເທວມນຸສ຺ສາທິຠາເວນ ປຐມໍ ຫຸຕ຺ວາ ປຈ຺ຉາ ນ ໂຫຕີຕິ ອຸຈ຺ເຉທໍ ສນ຺ຘາຍ ປຸຈ຺ຉຕິ. ເອວເມຕ຺ຖ ‘‘ສພ຺ພມຕ຺ຖິ, ສພ຺ພເມກຕ຺ຕ’’ນ຺ຕິ ອິມາ ທ຺ເວປິ ສສ຺ສຕທິຏ຺ຐິໂຍ, ‘‘ສພ຺ພໍ ນຕ຺ຖິ, ສພ຺ພໍ ປຸຖຸຕ຺ຕ’’ນ຺ຕິ ອິມາ ທ຺ເວ ອຸຈ຺ເຉທທິຏ຺ຐິໂຍຕິ ເວທິຕພ຺ພາ. ອຏ຺ຐມໍ.

໙. ອຣິຍສາວກສຸຕ຺ຕວຓ຺ຓນາ

໔໙. ນວເມ ກິໍ ນຸ ໂຂຕິ ສໍສຍຸປ຺ປຕ຺ຕິອາກາຣທສ຺ສນໍ. ສມຸທຍຕີຕິ ອຸປ຺ປຊ຺ຊຕິ. ນວມໍ.

໑໐. ທຸຕິຍອຣິຍສາວກສຸຕ຺ຕວຓ຺ຓນາ

໕໐. ທສເມ ທ຺ເວປິ ນຍາ ເອກໂຕ ວຸຕ຺ຕາ. ອິທເມວ ປຸຣິເມນ ນານຕ຺ຕໍ, ເສສໍ ຕາທິສເມວາຕິ. ທສມໍ.

ຄຫປຕິວຄ຺ໂຄ ປຎ຺ຈໂມ.