໓. ສປ຺ປຸຣິສຘມ຺ມສຸຕ຺ຕວຓ຺ຓນາ

໑໐໕. ເອວໍ ເມ ສຸຕນ຺ຕິ ສປ຺ປຸຣິສຘມ຺ມສຸຕ຺ຕໍ. ຕຕ຺ຖ ສປ຺ປຸຣິສຘມ຺ມນ຺ຕິ ສປ຺ປຸຣິສານໍ ຘມ຺ມໍ. ອສປ຺ປຸຣິສຘມ຺ມນ຺ຕິ ປາປປຸຣິສານໍ ຘມ຺ມໍ. ເອວໍ ມາຕິກໍ ຐເປຕ຺ວາປິ ປຸນ ຍຖາ ນາມ ມຄ຺ຄກຸສໂລ ປຸຣິໂສ ວາມໍ ມຸຎ຺ຈິຕ຺ວາ ທກ຺ຂິຓໍ ຄຓ຺ຫາຕິ. ປຐມໍ ມຸຎ຺ຈິຕພ຺ພໍ ກເຖຕິ, ເອວໍ ປຫາຕພ຺ພໍ ຘມ຺ມໍ ປຐມໍ ເທເສນ຺ໂຕ ກຕໂມ ຈ, ຠິກ຺ຂເວ, ອສປ຺ປຸຣິສຘມ຺ໂມຕິອາທິມາຫ. ຕຕ຺ຖ ອຸຈ຺ຈາກຸລາຕິ ຂຕ຺ຕິຍກຸລາ ວາ ພ຺ຣາຫ຺ມຓກຸລາ ວາ. ເອຕເທວ ຫິ ກຸລທ຺ວຍໍ ‘‘ອຸຈ຺ຈາກຸລ’’ນ຺ຕິ ວຸຈ຺ຈຕິ. ໂສ ຕຕ຺ຖ ປຸຊ຺ໂຊຕິ ໂສ ຠິກ຺ຂຸ ເຕສຸ ຠິກ຺ຂູສຸ ປູຊາຣໂຫ. ອນ຺ຕຣໍ ກຣິຕ຺ວາຕິ ອພ຺ຠນ຺ຕຣໍ ກຕ຺ວາ.

ມຫາກຸລາຕິ ຂຕ຺ຕິຍກຸລາ ວາ ພ຺ຣາຫ຺ມຓກຸລາ ວາ ເວສ຺ສກຸລາ ວາ. ອິທເມວ ຫິ ກຸລຕ຺ຕຍໍ ‘‘ມຫາກຸລ’’ນ຺ຕິ ວຸຈ຺ຈຕິ. ມຫາໂຠຄກຸລາຕິ ມຫນ຺ເຕຫິ ໂຠເຄຫິ ສມນ຺ນາຄຕາ ກຸລາ. ອຸຬາຣໂຠຄກຸລາຕິ ອຸຬາເຣຫິ ປຓີເຕຫິ ໂຠເຄຫິ ສມ຺ປນ຺ນກຸລາ. ອິມສ຺ມິໍ ປທທ຺ວເຍ ຈຕ຺ຕາຣິປິ ກຸລານິ ລພ຺ຠນ຺ຕິ. ຍຕ຺ຖ ກຕ຺ຖຈິ ກຸເລ ຊາໂຕ ຫິ ປຸຎ຺ຎພເລຫິ ມຫາໂຠໂຄປິ ອຸຬາຣໂຠໂຄປິ ໂຫຕິເຍວ.

໑໐໖. ຍສສ຺ສີຕິ ປຣິວາຣສມ຺ປນ຺ໂນ. ອປ຺ປຎ຺ຎາຕາຕິ ຣຕ຺ຕິໍ ຂິຕ຺ຕສຣາ ວິຍ ສງ຺ຆມຊ຺ຌາທີສຸ ນ ປຎ຺ຎາຍນ຺ຕິ. ອປ຺ເປສກ຺ຂາຕິ ອປ຺ປປຣິວາຣາ.

໑໐໗. ອາຣຎ຺ຎິໂກຕິ ສມາທິນ຺ນອາຣຎ຺ຎິກຘຸຕງ຺ໂຄ. ເສສຘຸຕງ຺ເຄສຸປິ ເອເສວ ນໂຍ. ອິມສ຺ມິຎ຺ຈ ສຸຕ຺ເຕ ປາຬິຍໍ ນເວວ ຘຸຕງ຺ຄານິ ອາຄຕານິ, ວິຕ຺ຖາເຣນ ປເນຕານິ ເຕຣສ ໂຫນ຺ຕິ. ເຕສຸ ຍໍ ວຕ຺ຕພ຺ພໍ, ຕໍ ສພ຺ພໍ ສພ຺ພາກາເຣນ ວິສຸທ຺ຘິມຄ຺ເຄ ຘຸຕງ຺ຄນິທ຺ເທເສ ວຸຕ຺ຕເມວ.

໑໐໘. ອຕມ຺ມຍຕາຕິ ຕມ຺ມຍຕາ ວຸຈ຺ຈຕິ ຕຓ຺ຫາ, ນິຕ຺ຕຓ຺ຫາຕິ ອຕ຺ໂຖ. ອຕມ຺ມຍຕຎ຺ເຎວ ອນ຺ຕຣໍ ກຣິຕ຺ວາຕິ ນິຕ຺ຕຓ຺ຫຕໍເຍວ ກາຣຓໍ ກຕ຺ວາ ອພ຺ຠນ຺ຕຣໍ ວາ ກຕ຺ວາ, ຈິຕ຺ເຕ ອຸປ຺ປາເທຕ຺ວາຕິ ອຕ຺ໂຖ.

ນິໂຣຘວາເຣ ຍສ຺ມາ ອນາຄາມິຂີຓາສວາວ ຕໍ ສມາປຕ຺ຕິໍ ສມາປຊ຺ຊນ຺ຕິ, ປຸຖຸຊ຺ຊນສ຺ສ ສາ ນຕ຺ຖິ, ຕສ຺ມາ ອສປ຺ປຸຣິສວາໂຣ ປຣິຫີໂນ. ນ ກຎ຺ຈິ ມຎ຺ຎຕີຕິ ກຎ຺ຈິ ປຸຄ຺ຄລໍ ຕີຫິ ມຎ຺ຎນາຫິ ນ ມຎ຺ຎຕິ. ນ ກຸຫິຎ຺ຈິ ມຎ຺ຎຕີຕິ ກິສ຺ມິຎ຺ຈິ ໂອກາເສ ນ ມຎ຺ຎຕິ. ນ ເກນຈິ ມຎ຺ຎຕີຕິ ເກນຈິ ວຕ຺ຖຸນາປິ ຕໍ ປຸຄ຺ຄລໍ ນ ມຎ຺ຎຕິ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ສປ຺ປຸຣິສຘມ຺ມສຸຕ຺ຕວຓ຺ຓນາ ນິຏ຺ຐິຕາ.