໕. ອນຸມານສຸຕ຺ຕວຓ຺ຓນາ

໑໘໑. ເອວໍ ເມ ສຸຕນ຺ຕິ ອນຸມານສຸຕ຺ຕໍ. ຕຕ຺ຖ ຠຄ຺ເຄສູຕິ ເອວໍນາມເກ ຊນປເທ, ວຈນຕ຺ໂຖ ປເນຕ຺ຖ ວຸຕ຺ຕານຸສາເຣເນວ ເວທິຕພ຺ໂພ. ສຸສຸມາຣຄິເຣຕິ ເອວໍນາມເກ ນຄເຣ. ຕສ຺ສ ກິຣ ນຄຣສ຺ສ ວຕ຺ຖຸປຣິຄ຺ຄຫທິວເສ ອວິທູເຣ ອຸທກຣຫເທ ສຸໍສຸມາໂຣ ສທ຺ທມກາສິ, ຄິຣໍ ນິຈ຺ຉາເຣສິ. ອຖ ນຄເຣ ນິຏ຺ຐິເຕ ສຸໍສຸມາຣຄິຣໍ ຕ຺ເວວສ຺ສ ນາມໍ ອກໍສຸ. ເຠສກຬາວເນຕິ ເຠສກຬານາມເກ ວເນ. ‘‘ເຠສຄຬາວເນ’’ຕິປິ ປາໂຐ. ມິຄທາເຍຕິ ຕໍ ວນໍ ມິຄປກ຺ຂີນໍ ອຠຍທິນ຺ນຏ຺ຐາເນ ຊາຕໍ, ຕສ຺ມາ ມິຄທາໂຍຕິ ວຸຈ຺ຈຕິ.

ປວາເຣຕີຕິ ອິຈ຺ຉາເປຕິ. ວທນ຺ຕູຕິ ໂອວາທານຸສາສນິວເສນ ວທນ຺ຕຸ, ອນຸສາສນ຺ຕູຕິ ອຕ຺ໂຖ. ວຈນີໂຍມ຺ຫີຕິ ອຫໍ ຕຸມ຺ເຫຫິ ວຕ຺ຕພ຺ໂພ, ອນຸສາສິຕພ຺ໂພ ໂອວທິຕພ຺ໂພຕິ ອຕ຺ໂຖ. ໂສ ຈ ໂຫຕິ ທຸພ຺ພໂຈຕິ ໂສ ຈ ທຸກ຺ເຂນ ວຕ຺ຕພ຺ໂພ ໂຫຕິ, ວຸຕ຺ໂຕ ນ ສຫຕິ. ໂທວຈສ຺ສກຣເຓຫີຕິ ທຸພ຺ພຈຠາວກາຣເກຫິ ອຸປຣິ ອາຄເຕຫິ ໂສຬສຫິ ຘມ຺ເມຫິ. ອປ຺ປທກ຺ຂິຓຄ຺ຄາຫີ ອນຸສາສນິນ຺ຕິ ໂຍ ຫິ ວຸຈ຺ຈມາໂນ ຕຸມ຺ເຫ ມໍ ກສ຺ມາ ວທຖ, ອຫໍ ອຕ຺ຕໂນ ກປ຺ປິຍາກປ຺ປິຍໍ ສາວຊ຺ຊານວຊ຺ຊໍ ອຕ຺ຖານຕ຺ຖໍ ຊານາມີຕິ ວທຕິ. ອຍໍ ອນຸສາສນິໍ ປທກ຺ຂິຓໂຕ ນ ຄຓ຺ຫາຕິ, ວາມໂຕ ຄຓ຺ຫາຕິ, ຕສ຺ມາ ອປ຺ປທກ຺ຂິຓຄ຺ຄາຫີຕິ ວຸຈ຺ຈຕິ.

ປາປິການໍ ອິຈ຺ຉານນ຺ຕິ ລາມການໍ ອສນ຺ຕສມ຺ຠວນປຕ຺ຖນານໍ. ປຏິປ຺ຜຣຕີຕິ ປຏິວິຣຸທ຺ໂຘ, ປຈ຺ຈນີໂກ ຫຸຕ຺ວາ ຕິຏ຺ຐຕິ, ອປສາເທຕີຕິ ກິໍ ນຸ ໂຂ ຕຸຍ຺ຫໍ ພາລສ຺ສ ອພ຺ຍຕ຺ຕສ຺ສ ຠຓິເຕນ, ຕ຺ວມ຺ປິ ນາມ ຠຓິຕພ຺ພໍ ມຎ຺ຎິສ຺ສສີຕິ ເອວໍ ຆຏ຺ເຏຕິ. ປຈ຺ຈາໂຣເປຕີຕິ, ຕ຺ວມ຺ປິ ໂຂສິ ອິຕ຺ຖນ຺ນາມໍ ອາປຕ຺ຕິໍ ອາປນ຺ໂນ, ຕໍ ຕາວ ປຏິກໂຣຫີຕິ ເອວໍ ປຏິອາໂຣເປຕິ.

ອຎ຺ເຎນຎ຺ຎໍ ປຏິຈຣຕີຕິ ອຎ຺ເຎນ ກາຣເຓນ ວຈເນນ ວາ ອຎ຺ຎໍ ກາຣຓໍ ວຈນໍ ວາ ປຏິຈ຺ຉາເທຕິ. ‘‘ອາປຕ຺ຕິໍ ອາປນ຺ໂນສີ’’ຕິ ວຸຕ຺ເຕ ‘‘ໂກ ອາປນ຺ໂນ, ກິໍ ອາປນ຺ໂນ, ກິສ຺ມິໍ ອາປນ຺ໂນ, ກໍ ຠຓຖ, ກິໍ ຠຓຖາ’’ຕິ ວາ ວທຕິ. ‘‘ເອວຣູປໍ ກິຎ຺ຈິ ຕຍາ ທິຏ຺ຐ’’ນ຺ຕິ ວຸຕ຺ເຕ ‘‘ນ ສຸຓາມີ’’ຕິ ໂສຕໍ ວາ ອຸປເນຕິ. ພຫິທ຺ຘາ ກຖໍ ອປນາເມຕີຕິ ‘‘ອິຕ຺ຖນ຺ນາມໍ ອາປຕ຺ຕິໍ ອາປນ຺ໂນສີ’’ຕິ ປຸຏ຺ໂຐ ‘‘ປາຏລິປຸຕ຺ຕໍ ຄໂຕມ຺ຫີ’’ຕິ ວຕ຺ວາ ປຸນ ‘‘ນ ຕວ ປາຏລິປຸຕ຺ຕຄມນໍ ປຸຈ຺ຉາມ, ອາປຕ຺ຕິໍ ປຸຈ຺ຉາມາ’’ຕິ ວຸຕ຺ເຕ ‘‘ຕໂຕ ຣາຊເຄຫໍ ຄໂຕມ຺ຫີ’’ຕິ, ຣາຊເຄຫໍ ວາ ຍາຫິ ພ຺ຣາຫ຺ມຓເຄຫໍ ວາ, ອາປຕ຺ຕິໍ ອາປນ຺ໂນສີຕິ. ຕຕ຺ຖ ເມ ສູກຣມໍສໍ ລທ຺ຘນ຺ຕິອາທີນິ ວທນ຺ໂຕ ກຖໍ ພຫິທ຺ຘາ ວິກ຺ຂິປຕິ.

ອປທາເນຕິ ອຕ຺ຕໂນ ຈຣິຍາຍ. ນ ສມ຺ປາຍຕີຕິ, ອາວຸໂສ, ຕ຺ວໍ ກຸຫິໍ ວສສິ, ກໍ ນິສ຺ສາຍ ວສສີຕິ ວາ, ຍໍ ຕ຺ວໍ ວເທສິ ‘‘ມຍາ ເອສ ອາປຕ຺ຕິໍ ອາປຊ຺ຊນ຺ໂນ ທິຏ຺ໂຐ’’ຕິ. ຕ຺ວໍ ຕສ຺ມິໍ ສມເຍ ກິໍ ກໂຣສິ, ອຍໍ ກິໍ ກໂຣຕິ, ກຕ຺ຖ ວາ ຕ຺ວໍ ອຈ຺ຉສິ ກຕ຺ຖ ວາ ອຍນ຺ຕິອາທິນາ ນເຍນ ຈຣິຍໍ ປຸຏ຺ໂຐ ສມ຺ປາເທຕ຺ວາ ກເຖຕຸໍ ນ ສກ຺ໂກຕິ.

໑໘໓. ຕຕ຺ຣາວຸໂສຕິ, ອາວຸໂສ, ເຕສຸ ໂສຬສສຸ ຘມ຺ເມສຸ. ອຕ຺ຕນາວ ອຕ຺ຕານໍ ເອວໍ ອນຸມິນິຕພ຺ພນ຺ຕິ ເອວໍ ອຕ຺ຕນາວ ອຕ຺ຕາ ອນຸເມຕພ຺ໂພ ຕຸເລຕພ຺ໂພ ຕີເຣຕພ຺ໂພ.

໑໘໔. ປຈ຺ຈເວກ຺ຂິຕພ຺ພນ຺ຕິ ປຈ຺ຈເວກ຺ຂິຕພ຺ໂພ. ອໂຫຣຕ຺ຕານຸສິກ຺ຂິນາຕິ ທິວາປິ ຣຕ຺ຕິມ຺ປິ ສິກ຺ຂນ຺ເຕນ, ຣຕິຎ຺ຈ ທິວາ ຈ ກຸສເລສຸ ຘມ຺ເມສຸ ສິກ຺ຂນ຺ເຕນ ປີຕິປາໂມຊ຺ຊເມວ ອຸປ຺ປາເທຕພ຺ພນ຺ຕິ ອຕ຺ໂຖ.

ອຈ຺ເຉ ວາ ອຸທກປຕ຺ເຕຕິ ປສນ຺ເນ ວາ ອຸທກຠາຊເນ. ມຸຂນິມິຕ຺ຕນ຺ຕິ ມຸຂປຏິພິມ຺ພໍ. ຣຊນ຺ຕິ ອາຄນ຺ຕຸກຣຊໍ. ອງ຺ຄຓນ຺ຕິ ຕຕ຺ຖ ຊາຕກໍ ຕິລກໍ ວາ ປິຬກໍ ວາ. ສພ຺ເພປິເມ ປາປເກ ອກຸສເລ ຘມ຺ເມ ປຫີເນຕິ ອິມິນາ ສພ຺ພປ຺ປຫານໍ ກເຖສິ. ກຖໍ? ເອຕ຺ຕກາ ອກຸສລາ ຘມ຺ມາ ປພ຺ພຊິຕສ຺ສ ນານຸຈ຺ຉວິກາຕິ ປຏິສງ຺ຂານໍ ອຸປ຺ປາທຍໂຕ ຫິ ປຏິສງ຺ຂານປ຺ປຫານໍກຖິຕໍ ໂຫຕິ. ສີລໍ ປທຏ຺ຐານໍ ກຕ຺ວາ ກສິຓປຣິກມ຺ມໍ ອາຣຠິຕ຺ວາ ອຏ຺ຐ ສມາປຕ຺ຕິໂຍ ນິພ຺ພຕ຺ເຕນ຺ຕສ຺ສ ວິກ຺ຂມ຺ຠນປ຺ປຫານໍ ກຖິຕໍ. ສມາປຕ຺ຕິໍ ປທຏ຺ຐານໍ ກຕ຺ວາ ວິປສ຺ສນໍ ວຑ຺ເຒນ຺ຕສ຺ສ ຕທງ຺ຄປ຺ປຫານໍ ກຖິຕໍ. ວິປສ຺ສນໍ ວຑ຺ເຒຕ຺ວາ ມຄ຺ຄໍ ຠາເວນ຺ຕສ຺ສ ສມຸຈ຺ເຉທປ຺ປຫານໍ ກຖິຕໍ. ຜເລ ອາຄເຕ ປຏິປ຺ປສ຺ສທ຺ຘິປ຺ປຫານໍ, ນິພ຺ພາເນ ອາຄເຕ ນິສ຺ສຣຓປ຺ປຫານນ຺ຕິ ເອວໍ ອິມສ຺ມິໍ ສຸຕ຺ເຕ ສພ຺ພປ຺ປຫານໍ ກຖິຕໍວ ໂຫຕິ.

ອິທຎ຺ຫິ ສຸຕ຺ຕໍ ຠິກ຺ຂຸປາຕິໂມກ຺ຂໍ ນາມາຕິ ໂປຣາຓາ ວທນ຺ຕິ. ອິທໍ ທິວສສ຺ສ ຕິກ຺ຂຕ຺ຕຸໍ ປຈ຺ຈເວກ຺ຂິຕພ຺ພໍ. ປາໂຕ ເອວ ວສນຏ຺ຐານໍ ປວິສິຕ຺ວາ ນິສິນ຺ເນນ ‘‘ອິເມ ເອຕ຺ຕກາ ກິເລສາ ອຕ຺ຖິ ນຸ ໂຂ ມຍ຺ຫໍ ນຕ຺ຖີ’’ຕິ ປຈ຺ຈເວກ຺ຂິຕພ຺ພາ. ສເຈ ອຕ຺ຖີຕິ ປສ຺ສຕິ, ເຕສໍ ປຫານາຍ ວາຍມິຕພ຺ພໍ. ໂນ ເຈ ປສ຺ສຕິ, ສຸປພ຺ພຊິໂຕສ຺ມີຕິ ອຕ຺ຕມເນນ ຠວິຕພ຺ພໍ. ຠຕ຺ຕກິຈ຺ຈໍ ກຕ຺ວາ ຣຕ຺ຕິຏ຺ຐາເນ ວາ ທິວາຏ຺ຐາເນ ວາ ນິສີທິຕ຺ວາປິ ປຈ຺ຈເວກ຺ຂິຕພ຺ພໍ. ສາຍໍ ວສນຏ຺ຐາເນ ນິສີທິຕ຺ວາປິ ປຈ຺ຈເວກ຺ຂິຕພ຺ພໍ. ຕິກ຺ຂຕ຺ຕຸໍ ອສກ຺ໂກນ຺ເຕນ ທ຺ເວ ວາເຣ ປຈ຺ຈເວກ຺ຂິຕພ຺ພໍ. ທ຺ເວ ວາເຣ ອສກ຺ໂກນ຺ເຕນ ປນ ອວສ຺ສໍ ເອກວາຣໍ ປຈ຺ຈເວກ຺ຂິຕພ຺ພໍ, ອປ຺ປຈ຺ຈເວກ຺ຂິຕຸໍ ນ ວຏ຺ຏຕີຕິ ວທນ຺ຕິ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ອນຸມານສຸຕ຺ຕວຓ຺ຓນາ ນິຏ຺ຐິຕາ.