໓. ມຫາທຸກ຺ຂກ຺ຂນ຺ຘສຸຕ຺ຕວຓ຺ຓນາ

໑໖໓. ເອວໍ ເມ ສຸຕນ຺ຕິ ມຫາທຸກ຺ຂກ຺ຂນ຺ຘສຸຕ຺ຕໍ. ຕຕ຺ຖ ວິນຍປຣິຍາເຍນ ຕໂຍ ຊນາ ສມ຺ພຫຸລາຕິ ວຸຈ຺ຈນ຺ຕິ, ຕໂຕ ປຣໍ ສງ຺ໂຆ. ສຸຕ຺ຕນ຺ຕປຣິຍາເຍນ ຕໂຍ ຕໂຍ ເອວ, ຕໂຕ ອຸທ຺ຘໍ ສມ຺ພຫຸລາຕິ ວຸຈ຺ຈນ຺ຕິ. ອິຘ ສຸຕ຺ຕນ຺ຕປຣິຍາເຍນ ສມ຺ພຫຸລາຕິ ເວທິຕພ຺ພາ. ປິຓ຺ຑາຍ ປາວິສິໍສູຕິ ປວິຏ຺ຐາ, ເຕ ປນ ນ ຕາວ ປວິຏ຺ຐາ, ປວິສິສ຺ສາມາຕິ ນິກ຺ຂນ຺ຕຕ຺ຕາ ປນ ປວິສິໍສູຕິ ວຸຕ຺ຕາ. ຍຖາ ຄາມໍ ຄມິສ຺ສາມີຕິ ນິກ຺ຂນ຺ຕປຸຣິໂສ ຕໍ ຄາມໍ ອປ຺ປຕ຺ໂຕປິ ‘‘ກຸຫິໍ ອິຕ຺ຖນ຺ນາໂມ’’ຕິ ວຸຕ຺ເຕ ‘‘ຄາມໍ ຄໂຕ’’ຕິ ວຸຈ຺ຈຕິ, ເອວໍ. ປຣິພ຺ພາຊການໍ ອາຣາໂມຕິ ເຊຕວນໂຕ ອວິທູເຣ ອຎ຺ຎຕິຕ຺ຖິຍານໍ ປຣິພ຺ພາຊການໍ ອາຣາໂມ ອຕ຺ຖິ, ຕໍ ສນ຺ຘາຍ ເອວມາຫໍສຸ. ສມໂຓ, ອາວຸໂສຕິ, ອາວຸໂສ, ຕຸມ຺ຫາກໍ ສຕ຺ຖາ ສມໂຓ ໂຄຕໂມ. ກາມານໍ ປຣິຎ຺ຎນ຺ຕິ ກາມານໍ ປຫານໍ ສມຕິກ຺ກມໍ ປຎ຺ຎເປຕິ. ຣູປເວທນາສຸປິ ເອເສວ ນໂຍ.

ຕຕ຺ຖ ຕິຕ຺ຖິຍາ ສກສມຍໍ ຊານນ຺ຕາ ກາມານໍ ປຣິຎ຺ຎໍ ປຎ຺ຎເປຍ຺ຍຸໍ ປຐມຊ຺ຌານໍ ວທມານາ, ຣູປານໍ ປຣິຎ຺ຎໍ ປຎ຺ຎເປຍ຺ຍຸໍ ອຣູປຠວໍ ວທມານາ, ເວທນານໍ ປຣິຎ຺ຎໍ ປຎ຺ຎເປຍ຺ຍຸໍ ອສຎ຺ຎຠວໍ ວທມານາ. ເຕ ປນ ‘‘ອິທໍ ນາມ ປຐມຊ຺ຌານໍ ອຍໍ ຣູປຠໂວ ອຍໍ ອຣູປຠໂວ’’ຕິປິ ນ ຊານນ຺ຕິ. ເຕ ປຎ຺ຎເປຕຸໍ ອສກ຺ໂກນ຺ຕາປິ ເກວລໍ ‘‘ປຎ຺ຎເປມ ປຎ຺ຎເປມາ’’ຕິ ວທນ຺ຕິ. ຕຖາຄໂຕ ກາມານໍ ປຣິຎ຺ຎໍ ອນາຄາມິມຄ຺ເຄນ ປຎ຺ຎເປຕິ, ຣູປເວທນານໍ ອຣຫຕ຺ຕມຄ຺ເຄນ. ເຕ ເອວໍ ມຫນ຺ເຕ ວິເສເສ ວິຊ຺ຊມາເນປິ ອິຘ ໂນ, ອາວຸໂສ, ໂກ ວິເວໂສຕິອາທິມາຫໍສຸ.

ຕຕ຺ຖ ອິຘາຕິ ອິມສ຺ມິໍ ປຎ຺ຎາປເນ. ຘມ຺ມເທສນາຍ ວາ ຘມ຺ມເທສນນ຺ຕິ ຍທິທໍ ສມຓສ຺ສ ວາ ໂຄຕມສ຺ສ ຘມ຺ມເທສນາຍ ສທ຺ຘິໍ ອມ຺ຫາກໍ ຘມ຺ມເທສນໍ, ອມ຺ຫາກໍ ວາ ຘມ຺ມເທສນາຍ ສທ຺ຘິໍ ສມຓສ຺ສ ໂຄຕມສ຺ສ ຘມ຺ມເທສນໍ ອາຣພ຺ຠ ນານາກຣຓໍ ວຸຈ຺ເຈຖ, ຕໍ ກິນ຺ນາມາຕິ ວທນ຺ຕິ. ທຸຕິຍປເທປິ ເອເສວ ນໂຍ. ອິຕິ ເວມຊ຺ເຌ ຠິນ຺ນສຸວຓ຺ຓໍ ວິຍ ສາສເນນ ສທ຺ຘິໍ ອຕ຺ຕໂນ ລທ຺ຘິວຈນມຕ຺ເຕນ ສມຘຸຣໍ ຐປຍິໍສຸ. ເນວ ອຠິນນ຺ທິໍສູຕິ ເອວເມຕນ຺ຕິ ນ ສມ຺ປຏິຈ຺ຉິໍສຸ. ນປ຺ປຏິກ຺ໂກສິໍສູຕິ ນຍິທໍ ເອວນ຺ຕິ ນປ຺ປຏິເສເຘສຸໍ. ກສ຺ມາ? ເຕ ກິຣ ຕິຕ຺ຖິຍາ ນາມ ອນ຺ຘສທິສາ, ຊານິຕ຺ວາ ວາ ອຊານິຕ຺ວາ ວາ ກເຖຍ຺ຍຸນ຺ຕິ ນາຠິນນ຺ທິໍສຸ, ປຣິຎ຺ຎນ຺ຕິ ວຈເນນ ອີສກໍ ສາສນຄນ຺ໂຘ ອຕ຺ຖີຕິ ນປ຺ປຏິກ຺ໂກສິໍສຸ. ຊນປທວາສິໂນ ວາ ເຕ ສກສມຍປຣສມເຍສຸ ນ ສຸຏ຺ຐຸ ກຸສລາຕິປິ ອຸຠຍໍ ນາກໍສຸ.

໑໖໕. ນ ເຈວ ສມ຺ປາຍິສ຺ສນ຺ຕີຕິ ສມ຺ປາເທຕ຺ວາ ກເຖຕຸໍ ນ ສກ຺ຂິສ຺ສນ຺ຕິ. ອຸຕ຺ຕຣິຎ຺ຈ ວິຆາຕນ຺ຕິ ອສມ຺ປາຍນໂຕ ອຸຕ຺ຕຣິມ຺ປິ ທຸກ຺ຂໍ ອາປຊ຺ຊິສ຺ສນ຺ຕິ. ສມ຺ປາເທຕ຺ວາ ກເຖຕຸໍ ອສກ຺ໂກນ຺ຕານໍ ນາມ ຫິ ທຸກ຺ຂໍ ອຸປ຺ປຊ຺ຊຕິ. ຍຖາ ຕໍ, ຠິກ຺ຂເວ, ອວິສຍສ຺ມິນ຺ຕິ ເອຕ຺ຖ ຍຖາຕິ ກາຣຓວຈນໍ, ຕນ຺ຕິ ນິປາຕມຕ຺ຕໍ. ຍສ຺ມາ ອວິສເຍ ປຎ຺ໂຫ ປຸຈ຺ຉິໂຕ ໂຫຕີຕິ ອຕ຺ໂຖ. ສເທວເກຕິ ສຫ ເທເວຫິ ສເທວເກ. ສມາຣກາທີສຸປິ ເອເສວ ນໂຍ. ເອວໍ ຕີຓິ ຐານານິ ໂລເກ ປກ຺ຂິປິຕ຺ວາ ທ຺ເວ ປຊາຍາຕິ ປຎ຺ຈຫິປິ ສຕ຺ຕໂລກເມວ ປຣິຍາທິຍິຕ຺ວາ ເອຕສ຺ມິໍ ສເທວກາທິເຠເທ ໂລເກ ຕໍ ເທວໍ ວາ ມນຸສ຺ສໍ ວາ ນ ປສ຺ສາມີຕິ ທີເປຕິ. ອິໂຕ ວາ ປນ ສຸຕ຺ວາຕິ ອິໂຕ ວາ ປນ ມມ ສາສນໂຕ ສຸຕ຺ວາ ອຕຖາຄໂຕປິ ອຕຖາຄຕສາວໂກປິ ອາຣາເຘຍ຺ຍ ປຣິໂຕເສຍ຺ຍ. ອຎ຺ຎຖາ ອາຣາຘນໍ ນາມ ນຕ຺ຖີຕິ ທສ຺ເສຕິ.

໑໖໖. ອິທານິ ອຕ຺ຕໂນ ເຕສໍ ປຎ຺ຫານໍ ເວຍ຺ຍາກຣເຓນ ຈິຕ຺ຕາຣາຘນໍ ທສ຺ເສນ຺ໂຕ ໂກ ຈ, ຠິກ຺ຂເວຕິອາທິມາຫ. ກາມຄຸຓາຕິ ກາມຍິຕພ຺ພຏ຺ເຐນ ກາມາ. ພນ຺ຘນຏ຺ເຐນ ຄຸຓາ. ‘‘ອນຸຊານາມິ, ຠິກ຺ຂເວ, ອຫຕານໍ ວຕ຺ຖານໍ ທ຺ວິຄຸຓໍ ສງ຺ຆາຏິ’’ນ຺ຕິ (ມຫາວ. ໓໔໘) ເອຕ຺ຖ ຫິ ປຏລຏ຺ໂຐ ຄຸຓຏ຺ໂຐ. ‘‘ອຈ຺ເຈນ຺ຕິ ກາລາ ຕຣຍນ຺ຕິ ຣຕ຺ຕິໂຍ, ວໂຍຄຸຓາ ອນຸປຸພ຺ພໍ ຊຫນ຺ຕີ’’ຕິ (ສໍ. ນິ. ໑.໔) ເອຕ຺ຖ ຣາສຏ຺ໂຐ ຄຸຓຏ຺ໂຐ. ‘‘ສຕຄຸຓາ ທກ຺ຂິຓາ ປາຏິກງ຺ຂິຕພ຺ພາ’’ຕິ (ມ. ນິ. ໓.໓໗໙) ເອຕ຺ຖ ອານິສໍສຏ຺ໂຐ ຄຸຓຏ຺ໂຐ. ‘‘ອນ຺ຕໍ ອນ຺ຕຄຸຓໍ (ຂຸ. ປາ. ໓ ທ຺ວຕ຺ຕິໍສາກາເຣ; ທີ. ນິ. ໒.໓໗໗) ກຍິຣາ ມາລາຄຸເຓ ພຫູ’’ຕິ (ຘ. ປ. ໕໓) ເອຕ຺ຖ ພນ຺ຘນຏ຺ໂຐ ຄຸຓຏ຺ໂຐ. ອິຘາປິ ເອເສວ ອຘິປ຺ເປໂຕ, ເຕນ ວຸຕ຺ຕໍ ‘‘ພນ຺ຘນຏ຺ເຐນ ຄຸຓາ’’ຕິ. ຈກ຺ຂຸວິຎ຺ເຎຍ຺ຍາຕິ ຈກ຺ຂຸວິຎ຺ຎາເຓນ ປສ຺ສິຕພ຺ພາ. ເອເຕນຸປາເຍນ ໂສຕວິຎ຺ເຎຍ຺ຍາທີສຸປິ ອຕ຺ໂຖ ເວທິຕພ຺ໂພ. ອິຏ຺ຐາຕິ ປຣິຍິຏ຺ຐາ ວາ ໂຫນ຺ຕຸ ມາ ວາ, ອິຏ຺ຐາຣມ຺ມຓຠູຕາຕິ ອຕ຺ໂຖ. ກນ຺ຕາຕິ ກມນີຍາ. ມນາປາຕິ ມນວຑ຺ຒນກາ. ປິຍຣູປາຕິ ປິຍຊາຕິກາ. ກາມູປສໍຫິຕາຕິ ອາຣມ຺ມຓໍ ກຕ຺ວາ ອຸປ຺ປຊ຺ຊມາເນນ ກາເມນ ອຸປສໍຫິຕາ. ຣຊນີຍາຕິ ຣຊ຺ຊນິຍາ, ຣາຄຸປ຺ປຕ຺ຕິກາຣຓຠູຕາຕິ ອຕ຺ໂຖ.

໑໖໗. ຍທິ ມຸທ຺ທາຍາຕິອາທີສຸ ມຸທ຺ທາຕິ ອງ຺ຄຸລິປພ຺ເພສຸ ສຎ຺ຎໍ ຐເປຕ຺ວາ ຫຕ຺ຖມຸທ຺ທາ. ຄຓນາຕິ ອຈ຺ຉິທ຺ທຄຓນາ. ສງ຺ຂານນ຺ຕິ ປິຓ຺ຑຄຓນາ. ຍາຍ ເຂຕ຺ຕໍ ໂອໂລເກຕ຺ວາ ອິຘ ເອຕ຺ຕກາ ວີຫີ ຠວິສ຺ສນ຺ຕິ, ຣຸກ຺ຂໍ ໂອໂລເກຕ຺ວາ ອິຘ ເອຕ຺ຕການິ ຜລານິ ຠວິສ຺ສນ຺ຕິ, ອາກາສໍ ໂອໂລເກຕ຺ວາ ອິເມ ອາກາເສ ສກຸຓາ ເອຕ຺ຕກາ ນາມ ຠວິສ຺ສນ຺ຕີຕິ ຊານນ຺ຕິ.

ກສີຕິ ກສິກມ຺ມໍ. ວຓິຊ຺ຊາຕິ ຊງ຺ຆວຓິຊ຺ຊຖລວຓິຊ຺ຊາທິວຓິປ຺ປໂຖ. ໂຄຣກ຺ຂນ຺ຕິ ອຕ຺ຕໂນ ວາ ປເຣສໍ ວາ ຄາໂວ ຣກ຺ຂິຕ຺ວາ ປຎ຺ຈໂຄຣສວິກ຺ກເຍນ ຊີວນກມ຺ມໍ. ອິສ຺ສຕ຺ໂຖ ວຸຈ຺ຈຕິ ອາວຸຘໍ ຄເຫຕ຺ວາ ອຸປຏ຺ຐານກມ຺ມໍ. ຣາຊໂປຣິສນ຺ຕິ ອາວຸເຘນ ຣາຊກມ຺ມໍ ກຕ຺ວາ ອຸປຏ຺ຐານໍ. ສິປ຺ປຎ຺ຎຕຣນ຺ຕິ ຄຫິຕາວເສສໍ ຫຕ຺ຖິອສ຺ສສິປ຺ປາທິ. ສີຕສ຺ສ ປຸຣກ຺ຂໂຕຕິ ລກ຺ຂໍ ວິຍ ສຣສ຺ສ ສີຕສ຺ສ ປຸຣໂຕ, ສີເຕນ ພາຘີຍມາໂນຕິ ອຕ຺ໂຖ. ອຸຓ຺ເຫປິ ເອເສວ ນໂຍ. ຑໍສາທີສຸ ຑໍສາຕິ ປິງ຺ຄລມກ຺ຂິກາ. ມກສາຕິ ສພ຺ພມກ຺ຂິກາ, ສຣີສປາຕິ ເຍ ເກຈິ ສຣິຕ຺ວາ ຄຈ຺ຉນ຺ຕິ. ຣິສ຺ສມາໂນຕິ ຣຸປ຺ປມາໂນ, ຆຏ຺ຏິຍມາໂນ. ມີຍມາໂນຕິ ມຣມາໂນ. ອຍໍ, ຠິກ຺ຂເວຕິ, ຠິກ຺ຂເວ, ອຍໍ ມຸທ຺ທາທີຫິ ຊີວິກກປ຺ປນໍ ອາຄມ຺ມ ສີຕາທິປຈ຺ຈໂຍ ອາພາໂຘ. ກາມານໍ ອາທີນໂວຕິ ກາເມສຸ ອຸປທ຺ທໂວ, ອຸປສ຺ສຄ຺ໂຄຕິ ອຕ຺ໂຖ. ສນ຺ທິຏ຺ຐິໂກຕິ ປຈ຺ຈກ຺ໂຂ ສາມໍ ປສ຺ສິຕພ຺ໂພ. ທຸກ຺ຂກ຺ຂນ຺ໂຘຕິ ທຸກ຺ຂຣາສິ. ກາມເຫຕູຕິອາທີສຸ ປຈ຺ຈຍຏ຺ເຐນ ກາມາ ອສ຺ສ ເຫຕູຕິ ກາມເຫຕຸ. ມູລຏ຺ເຐນ ກາມາ ນິທານມສ຺ສາຕິ ກາມນິທາໂນ. ລິງ຺ຄວິປລ຺ລາເສນ ປນ ກາມນິທານນ຺ຕິ ວຸຕ຺ໂຕ. ກາຣຓຏ຺ເຐນ ກາມາ ອຘິກຣຓໍ ອສ຺ສາຕິ ກາມາຘິກຣໂຓ. ລິງ຺ຄວິປລ຺ລາເສເນວ ປນ ກາມາຘິກຣຓນ຺ຕິ ວຸຕ຺ໂຕ. ກາມານເມວ ເຫຕູຕິ ອິທໍ ນິຍມວຈນໍ, ກາມປຈ຺ຈຍາ ອຸປ຺ປຊ຺ຊຕິເຍວາຕິ ອຕ຺ໂຖ.

ອຸຏ຺ຐຫໂຕຕິ ອາຊີວສມຸຏ຺ຐາປກວີຣິເຍນ ອຸຏ຺ຐຫນ຺ຕສ຺ສ. ຆຏໂຕຕິ ຕໍ ວີຣິຍໍ ປຸພ຺ເພນາປຣໍ ຆເຏນ຺ຕສ຺ສ. ວາຍມໂຕຕິ ວາຍາມໍ ປຣກ຺ກມໍ ປໂຍຄໍ ກໂຣນ຺ຕສ຺ສ. ນາຠິນິປ຺ຜຊ຺ຊນ຺ຕີຕິ ນ ນິປ຺ຜຊ຺ຊນ຺ຕິ, ຫຕ຺ຖໍ ນາຠິຣຸຫນ຺ຕິ. ໂສຈຕີຕິ ຈິຕ຺ເຕ ອຸປ຺ປນ຺ນພລວໂສເກນ ໂສຈຕິ. ກິລມຕີຕິ ກາເຍ ອຸປ຺ປນ຺ນທຸກ຺ເຂນ ກິລມຕິ. ປຣິເທວຕີຕິ ວາຈາຍ ປຣິເທວຕິ. ອຸຣຕ຺ຕາຬິນ຺ຕິ ອຸຣໍ ຕາເຬຕ຺ວາ. ກນ຺ທຕີຕິ ໂຣທຕິ. ສມ຺ໂມຫໍ ອາປຊ຺ຊຕີຕິ ວິສຎ຺ຎີ ວິຍ ສມ຺ມູຬ຺ໂຫ ໂຫຕິ. ໂມຆນ຺ຕິ ຕຸຈ຺ຉໍ. ອຜໂລຕິ ນິປ຺ຜໂລ. ອາຣກ຺ຂາຘິກຣຓນ຺ຕິ ອາຣກ຺ຂກາຣຓາ. ກິນ຺ຕີຕິ ເກນ ນຸ ໂຂ ອຸປາເຍນ. ຍມ຺ປິ ເມຕິ ຍມ຺ປິ ມຍ຺ຫໍ ກສິກມ຺ມາທີນິ ກຕ຺ວາ ອຸປ຺ປາທິຕໍ ຘນໍ ອໂຫສິ. ຕມ຺ປິ ໂນ ນຕ຺ຖີຕິ ຕມ຺ປິ ອມ຺ຫາກໍ ອິທານິ ນຕ຺ຖິ.

໑໖໘. ປຸນ ຈປຣໍ, ຠິກ຺ຂເວ, ກາມເຫຕູຕິອາທິນາປິ ກາຣຓໍ ທສ຺ເສຕ຺ວາວ ອາທີນວໍ ທີເປຕິ. ຕຕ຺ຖ ກາມເຫຕູຕິ ກາມປຈ຺ຈຍາ ຣາຊາໂນປິ ຣາຊູຫິ ວິວທນ຺ຕິ. ກາມນິທານນ຺ຕິ ຠາວນປຸໍສກໍ, ກາເມ ນິທານໍ ກຕ຺ວາ ວິວທນ຺ຕີຕິ ອຕ຺ໂຖ. ກາມາຘິກຣຓນ຺ຕິປິ ຠາວນປຸໍສກເມວ, ກາເມ ອຘິກຣຓໍ ກຕ຺ວາ ວິວທນ຺ຕີຕິ ອຕ຺ໂຖ. ກາມານເມວ ເຫຕູຕິ ຄາມນິຄມນຄຣເສນາປຕິປຸໂຣຫິຕຏ຺ຐານນ຺ຕຣາທີນໍ ກາມານເມວ ເຫຕຸ ວິວທນ຺ຕີຕິ ອຕ຺ໂຖ. ອຸປກ຺ກມນ຺ຕີຕິ ປຫຣນ຺ຕິ. ອສິຈມ຺ມນ຺ຕິ ອສິຎ຺ເຈວ ເຂຏກຜລກາທີນິ ຈ. ຘນຸກລາປໍ ສນ຺ນຍ຺ຫິຕ຺ວາຕິ ຘນຸໍ ຄເຫຕ຺ວາ ສຣກລາປໍ ສນ຺ນຍ຺ຫິຕ຺ວາ. ອຸຠໂຕພ຺ຍູຬນ຺ຕິ ອຸຠໂຕ ຣາສິຠູຕໍ. ປກ຺ຂນ຺ທນ຺ຕີຕິ ປວິສນ຺ຕິ. ອຸສູສູຕິ ກຓ຺ເຑສຸ. ວິຊ຺ໂຊຕລນ຺ເຕສູຕິ ວິປຣິວຕ຺ຕນ຺ເຕສຸ. ເຕ ຕຕ຺ຖາຕິ ເຕ ຕສ຺ມິໍ ສງ຺ຄາເມ.

ອທ຺ທາວເລປນາ ອຸປກາຣິໂຍຕິ ເຈຕ຺ຖ ມນຸສ຺ສາ ປາກາຣປາທໍ ອສ຺ສຂຸຣສຓ຺ຐາເນນ ອິຏ຺ຐກາຫິ ຈິນິຕ຺ວາ ອຸປຣິ ສຸຘາຍ ລິມ຺ປນ຺ຕິ. ເອວໍ ກຕາ ປາກາຣປາທາ ອຸປກາຣິໂຍຕິ ວຸຈ຺ຈນ຺ຕິ. ຕາ ຕິນ຺ເຕນ ກລເລນ ສິຕ຺ຕາ ອທ຺ທາວເລປນາ ນາມ ໂຫນ຺ຕິ. ປກ຺ຂນ຺ທນ຺ຕີຕິ ຕາສໍ ເຫຏ຺ຐາ ຕິຂິຓອຍສູລາທີຫິ ວິຊ຺ຌີຍມານາປິ ປາກາຣສ຺ສ ປິຈ຺ຉິລຠາເວນ ອາໂຣຫິຕຸໍ ອສກ຺ໂກນ຺ຕາປິ ອຸປຘາວນ຺ຕິເຍວ. ຉກຓກາຍາຕິ ກຸຖິຕໂຄມເຍນ. ອຠິວຄ຺ເຄນາຕິ ສຕທນ຺ເຕນ. ຕໍ ອຏ຺ຐທນ຺ຕາກາເຣນ ກຕ຺ວາ ‘‘ນຄຣທ຺ວາຣໍ ຠິນ຺ທິຕ຺ວາ ປວິສິສ຺ສາມາ’’ຕິ ອາຄເຕ ອຸປຣິທ຺ວາເຣ ຐິຕາ ຕສ຺ສ ພນ຺ຘນໂຍຕ຺ຕານິ ຉິນ຺ທິຕ຺ວາ ເຕນ ອຠິວຄ຺ເຄນ ໂອມທ຺ທນ຺ຕິ.

໑໖໙. ສນ຺ຘິມ຺ປິ ຉິນ຺ທນ຺ຕີຕິ ຆຣສນ຺ຘິມ຺ປິ ຉິນ຺ທນ຺ຕິ. ນິລ຺ໂລປນ຺ຕິ ຄາເມ ປຫຣິຕ຺ວາ ມຫາວິໂລປໍ ກໂຣນ຺ຕິ. ເອກາຄາຣິກນ຺ຕິ ປຓ຺ຓາສມຕ຺ຕາປິ ສຏ຺ຐິມຕ຺ຕາປິ ປຣິວາເຣຕ຺ວາ ຊີວຄ຺ຄາຫໍ ຄເຫຕ຺ວາ ອາຫຣາເປນ຺ຕິ. ປຣິປນ຺ເຖປິ ຕິຏ຺ຐນ຺ຕີຕິ ປນ຺ຖທູຫນກມ຺ມໍ ກໂຣນ຺ຕິ. ອຑ຺ຒທຓ຺ຑເກຫີຕິ ມຸຄ຺ຄເຣຫິ ປຫາຣສາຘນຕ຺ຖໍ ວາ ຈຕຸຫຕ຺ຖທຓ຺ຑໍ ທ຺ເວຘາ ເຉຕ຺ວາ ຄຫິຕທຓ຺ຑເກຫິ. ພິລງ຺ຄຖາລິກນ຺ຕິ ກຎ຺ຊິຍອຸກ຺ຂລິກມ຺ມກາຣຓໍ, ຕໍ ກໂຣນ຺ຕາ ສີສກປາລໍ ອຸປ຺ປາເຏຕ຺ວາ ຕຕ຺ຕໍ ອໂຍຄຸຬໍ ສຓ຺ຑາເສນ ຄເຫຕ຺ວາ ຕຕ຺ຖ ປກ຺ຂິປນ຺ຕິ, ເຕນ ມຕ຺ຖລຸງ຺ຄໍ ປກ຺ກຸຖິຕ຺ວາ ອຸປຣິ ອຸຕ຺ຕຣຕິ. ສງ຺ຂມຸຓ຺ຑິກນ຺ຕິ ສງ຺ຂມຸຓ຺ຑກມ຺ມກາຣຓໍ, ຕໍ ກໂຣນ຺ຕາ ອຸຕ຺ຕໂຣຏ຺ຐອຸຠໂຕກຓ຺ຓຈູຬິກຄຬວາຏປຣິຈ຺ເຉເທນ ຈມ຺ມໍ ຉິນ຺ທິຕ຺ວາ ສພ຺ພເກເສ ເອກໂຕ ຄຓ຺ຐິໍ ກຕ຺ວາ ທຓ຺ຑເກນ ວລ຺ລິຕ຺ວາ ອຸປ຺ປາເຏນ຺ຕິ, ສຫ ເກເສຫິ ຈມ຺ມໍ ອຸຏ຺ຐຫຕິ. ຕໂຕ ສີສກຏາຫໍ ຖູລສກ຺ຂຣາຫິ ຆໍສິຕ຺ວາ ໂຘວນ຺ຕາ ສງ຺ຂວຓ຺ຓໍ ກໂຣນ຺ຕິ.

ຣາຫຸມຸຂນ຺ຕິ ຣາຫຸມຸຂກມ຺ມກາຣຓໍ, ຕໍ ກໂຣນ຺ຕາ ສງ຺ກຸນາ ມຸຂໍ ວິວຣິຕ຺ວາ ອນ຺ໂຕມຸເຂ ທີປໍ ຊາເລນ຺ຕິ. ກຓ຺ຓຈູຬິກາຫິ ວາ ປຏ຺ຐາຍ ມຸຂໍ ນິຂາທເນນ ຂຓນ຺ຕິ. ໂລຫິຕໍ ປຄ຺ຆຣິຕ຺ວາ ມຸຂໍ ປູເຣຕິ. ໂຊຕິມາລິກນ຺ຕິ ສກລສຣີຣໍ ເຕລປິໂລຕິກາຍ ເວເຐຕ຺ວາ ອາລິມ຺ປນ຺ຕິ. ຫຕ຺ຖປຊ຺ໂຊຕິກນ຺ຕິ ຫຕ຺ເຖ ເຕລປິໂລຕິກາຍ ເວເຐຕ຺ວາ ທີປໍ ວິຍ ຊາເລນ຺ຕິ. ເອຣກວຕ຺ຕິກນ຺ຕິ ເອຣກວຕ຺ຕກມ຺ມກາຣຓໍ, ຕໍ ກໂຣນ຺ຕາ ຄີວໂຕ ປຏ຺ຐາຍ ຈມ຺ມພທ຺ເຘ ກນ຺ຕິຕ຺ວາ ໂຄປ຺ຜເກ ຐເປນ຺ຕິ. ອຖ ນໍ ໂຍຕ຺ເຕຫິ ພນ຺ຘິຕ຺ວາ ກຑ຺ຒນ຺ຕິ. ໂສ ອຕ຺ຕໂນ ຈມ຺ມພທ຺ເຘ ອກ຺ກມິຕ຺ວາ ອກ຺ກມິຕ຺ວາ ປຕຕິ. ຈີຣກວາສິກນ຺ຕິ ຈີຣກວາສິກກມ຺ມກາຣຓໍ, ຕໍ ກໂຣນ຺ຕາ ຕເຖວ ຈມ຺ມພທ຺ເຘ ກນ຺ຕິຕ຺ວາ ກຏິຍໍ ຐເປນ຺ຕິ. ກຏິໂຕ ປຏ຺ຐາຍ ກນ຺ຕິຕ຺ວາ ໂຄປ຺ຜເກສຸ ຐເປນ຺ຕິ. ອຸປຣິເມຫິ ເຫຏ຺ຐິມສຣີຣໍ ຈີຣກນິວາສນນິວຕ຺ຖໍ ວິຍ ໂຫຕິ. ເອເຓຍ຺ຍກນ຺ຕິ ເອເຓຍ຺ຍກກມ຺ມກາຣຓໍ. ຕໍ ກໂຣນ຺ຕາ ອຸໂຠສຸ ກປ຺ປເຣສຸ ຈ ຊາຓູສຸ ຈ ອຍວລຍານິ ທຕ຺ວາ ອຍສູລານິ ໂກຏ຺ເຏນ຺ຕິ. ໂສ ຈຕູຫິ ອຍສູເລຫິ ຠູມິຍໍ ປຕິຏ຺ຐຫຕິ. ອຖ ນໍ ປຣິວາເຣຕ຺ວາ ອຄ຺ຄິໍ ກໂຣນ຺ຕິ. ‘‘ເອເຓຍ຺ຍໂກ ໂຊຕິປຣິຄ຺ຄໂຫ ຍຖາ’’ຕິ ອາຄຕຏ຺ຐາເນປິ ອິທເມວ ວຸຕ຺ຕໍ. ຕໍ ກາເລນ ກາລໍ ສູລານິ ອປເນຕ຺ວາ ຈຕູຫິ ອຏ຺ຐິໂກຏີຫິເຍວ ຐເປນ຺ຕິ. ເອວຣູປາ ກາຣຓາ ນາມ ນຕ຺ຖິ.

ພຬິສມໍສິກນ຺ຕິ ອຸຠໂຕມຸເຂຫິ ພຬິເສຫິ ປຫຣິຕ຺ວາ ຈມ຺ມມໍສນ຺ຫາຣູນິ ອຸປ຺ປາເຏນ຺ຕິ. ກຫາປຓິກນ຺ຕິ ສກລສຣີຣໍ ຕິຓ຺ຫາຫິ ວາສີຫິ ໂກຏິໂຕ ປຏ຺ຐາຍ ກຫາປຓມຕ຺ຕໍ ກຫາປຓມຕ຺ຕໍ ປາເຕນ຺ຕາ ໂກຏ຺ເຏນ຺ຕິ. ຂາຣາປຕຈ຺ຉິກນ຺ຕິ ສຣີຣໍ ຕຕ຺ຖ ຕຕ຺ຖ ອາວຸເຘຫິ ປຫຣິຕ຺ວາ ໂກຈ຺ເຉຫິ ຂາຣໍ ຆໍສນ຺ຕິ. ຈມ຺ມສໍສນ຺ຫາຣູນິ ປຄ຺ຆຣິຕ຺ວາ ສວນ຺ຕິ. ອຏ຺ຐິກສງ຺ຂລິກາວ ຕິຏ຺ຐຕິ. ປລິຆປຣິວຕ຺ຕິກນ຺ຕິ ເອເກນ ປສ຺ເສນ ນິປຊ຺ຊາເປຕ຺ວາ ກຓ຺ຓຈ຺ຉິທ຺ເທ ອຍສູລໍ ໂກຏ຺ເຏຕ຺ວາ ປຖວິຍາ ເອກາພທ຺ຘໍ ກໂຣນ຺ຕິ. ອຖ ນໍ ປາເທ ຄເຫຕ຺ວາ ອາວິຊ຺ຌນ຺ຕິ. ປລາລປີຐກນ຺ຕິ ເຉໂກ ກາຣຓິໂກ ຉວິຈມ຺ມໍ ອຈ຺ຉິນ຺ທິຕ຺ວາ ນິສທໂປເຕຫິ ອຏ຺ຐີນິ ຠິນ຺ທິຕ຺ວາ ເກເສສຸ ຄເຫຕ຺ວາ ອຸກ຺ຂິປນ຺ຕິ. ມໍສຣາສິເຍວ ໂຫຕິ, ອຖ ນໍ ເກເສເຫວ ປຣິໂຍນນ຺ຘິຕ຺ວາ ຄຓ຺ຫນ຺ຕິ. ປລາລວຏ຺ຏິໍ ວິຍ ກຕ຺ວາ ປນ ເວເຐນ຺ຕິ. ສຸນເຂຫິປີຕິ ກຕິປຍານິ ທິວສານິ ອາຫາຣໍ ອທຕ຺ວາ ຉາຕເກຫິ ສຸນເຂຫິ ຂາທາເປນ຺ຕິ. ເຕ ມຸຫຸຕ຺ເຕນ ອຏ຺ຐິສງ຺ຂລິກເມວ ກໂຣນ຺ຕິ. ສມ຺ປຣາຍິໂກຕິ ສມ຺ປຣາເຍ ທຸຕິຍຕ຺ຕຠາເວ ວິປາໂກຕິ ອຕ຺ໂຖ.

໑໗໐. ຉນ຺ທຣາຄວິນໂຍ ຉນ຺ທຣາຄປ຺ປຫານນ຺ຕິ ນິພ຺ພານໍ. ນິພ຺ພານຎ຺ຫິ ອາຄມ຺ມ ກາເມສຸ ຉນ຺ທຣາໂຄ ວິນີຍຕິ ເຈວ ປຫີຍຕິ ຈ, ຕສ຺ມາ ນິພ຺ພານໍ ຉນ຺ທຣາຄວິນໂຍ ຉນ຺ທຣາຄປ຺ປຫານນ຺ຕິ ຈ ວຸຕ຺ຕໍ. ສາມໍ ວາ ກາເມ ປຣິຊານິສ຺ສນ຺ຕີຕິ ສຍໍ ວາ ເຕ ກາເມ ຕີຫິ ປຣິຎ຺ຎາຫິ ປຣິຊານິສ຺ສນ຺ຕິ. ຕຖຕ຺ຕາຍາຕິ ຕຖຠາວາຍ. ຍຖາປຏິປນ຺ໂນຕິ ຍາຍ ປຏິປທາຍ ປຏິປນ຺ໂນ.

໑໗໑. ຂຕ຺ຕິຍກຎ຺ຎາ ວາຕິອາທິ ອປຣິຕ຺ເຕນ ວິປຸເລນ ກຸສເລນ ຄຫິຕປຏິສນ຺ຘິກໍ ວຕ຺ຖາລງ຺ກາຣາທີນິ ລຠນຏ຺ຐາເນ ນິພ຺ພຕ຺ຕໍ ທສ຺ເສຕຸໍ ວຸຕ຺ຕໍ. ປນ຺ນຣສວສ຺ສຸທ຺ເທສິກາຕິ ປນ຺ນຣສວສ຺ສວຍາ. ທຸຕິຍປເທປິ ເອເສວ ນໂຍ. ວຍປເທສໍ ກສ຺ມາ ຄຓ຺ຫາຕິ? ວຓ຺ຓສມ຺ປຕ຺ຕິທສ຺ສນຕ຺ຖໍ. ມາຕຸຄາມສ຺ສ ຫິ ທຸຄ຺ຄຕກຸເລ ນິພ຺ພຕ຺ຕສ຺ສາປິ ເອຕສ຺ມິໍ ກາເລ ໂຖກໍ ໂຖກໍ ວຓ຺ຓາຍຕນໍ ປສີທຕິ. ປຸຣິສານໍ ປນ ວີສຕິວສ຺ສກາເລ ປຎ຺ຈວີສຕິວສ຺ສກາເລ ປສນ຺ນໍ ໂຫຕິ. ນາຕິທີຆາຕິອາທີຫິ ຉໂທສວິຣຫິຕໍ ສຣີຣສມ຺ປຕ຺ຕິໍ ທີເປຕິ. ວຓ຺ຓນິຠາຕິ ວຓ຺ໂຓເຍວ.

ຊິຓ຺ຓນ຺ຕິ ຊຣາຊິຓ຺ຓໍ. ໂຄປານສິວງ຺ກນ຺ຕິ ໂຄປານສີ ວິຍ ວງ຺ກໍ. ໂຠຄ຺ຄນ຺ຕິ ຠຄ຺ຄໍ, ອິມິນາປິສ຺ສ ວງ຺ກຠາວເມວ ທີເປຕິ. ທຓ຺ຑປຣາຍຓນ຺ຕິ ທຓ຺ຑປຏິສຣຓໍ ທຓ຺ຑທຸຕິຍໍ. ປເວຘມານນ຺ຕິ ກມ຺ປມານໍ. ອາຕຸຣນ຺ຕິ ຊຣາຕຸຣໍ. ຂຓ຺ຑທນ຺ຕນ຺ຕິ ຊິຓ຺ຓຠາເວນ ຂຓ຺ຑິຕທນ຺ຕໍ. ປລິຕເກສນ຺ຕິ ປຓ຺ຑຣເກສໍ. ວິລູນນ຺ຕິ ລຸຎ຺ຈິຕ຺ວາ ຄຫິຕເກສໍ ວິຍ ຂລ຺ລາຏໍ. ຂລິຕສິຣນ຺ຕິ ມຫາຂລ຺ລາຏສີສໍ. ວລິນນ຺ຕິ ສຎ຺ຊາຕວລິໍ. ຕິລກາຫຕຄຕ຺ຕນ຺ຕິ ເສຕກາຬຕິລເກຫິ ວິກິຓ຺ຓສຣີຣໍ. ອາພາຘິກນ຺ຕິ ພ຺ຍາຘິກໍ. ທຸກ຺ຂິຕນ຺ຕິ ທຸກ຺ຂປຕ຺ຕໍ.

ພາຬ຺ຫຄິລານນ຺ຕິ ອຘິມຕ຺ຕຄິລານໍ. ສິວຖິກາຍ ຉຑ຺ຑິຕນ຺ຕິ ອາມກສຸສາເນ ປາຕິຕໍ. ເສສເມຕ຺ຖ ສຕິປຏ຺ຐາເນ ວຸຕ຺ຕເມວ. ອິຘາປິ ນິພ຺ພານໍເຍວ ຉນ຺ທຣາຄວິນໂຍ.

໑໗໓. ເນວ ຕສ຺ມິໍ ສມເຍ ອຕ຺ຕພ຺ຍາພາຘາຍາຕິ ຕສ຺ມິໍ ສມເຍ ອຕ຺ຕໂນປິ ທຸກ຺ຂຕ຺ຖາຍ ນ ເຈເຕຕິ. ອພ຺ຍາພຊ຺ຌໍເຍວາຕິ ນິທ຺ທຸກ຺ຂເມວ.

໑໗໔. ຍໍ, ຠິກ຺ຂເວ, ເວທນາ ອນິຈ຺ຈາຕິ, ຠິກ຺ຂເວ, ຍສ຺ມາ ເວທນາ ອນິຈ຺ຈາ, ຕສ຺ມາ ອຍໍ ອນິຈ຺ຈາທິອາກາໂຣວ ເວທນາຍ ອາທີນໂວຕິ ອຕ຺ໂຖ, ນິສ຺ສຣຓໍ ວຸຕ຺ຕປ຺ປກາຣເມວາຕິ.

ປປຎ຺ຈສູທນິຍາ ມຊ຺ຌິມນິກາຍຏ຺ຐກຖາຍ

ມຫາທຸກ຺ຂກ຺ຂນ຺ຘສຸຕ຺ຕວຓ຺ຓນາ ນິຏ຺ຐິຕາ.