໕. ນນ຺ທຸຕ຺ຕຣາເຖຣີຄາຖາວຓ຺ຓນາ

ອຄ຺ຄິໍ ຈນ຺ທຎ຺ຈາຕິອາທິກາ ນນ຺ທຸຕ຺ຕຣາຍ ເຖຣິຍາ ຄາຖາ. ອຍມ຺ປິ ປຸຣິມພຸທ຺ເຘສຸ ກຕາຘິກາຣາ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ກຸສລໍ ອຸປຈິນິຕ຺ວາ ອິມສ຺ມິໍ ພຸທ຺ຘຸປ຺ປາເທ ກຸຣຸຣຏ຺ເຐ ກມ຺ມາສຘມ຺ມນິຄເມ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ, ເອກຈ຺ຈານິ ວິຊ຺ຊາຏ຺ຐານານິ ສິປ຺ປາຍຕນານິ ຈ ອຸຄ຺ຄເຫຕ຺ວາ ນິຄຓ຺ຐປພ຺ພຊ຺ຊໍ ອຸປຄນ຺ຕ຺ວາ, ວາທປ຺ປສຸຕາ ຊມ຺ພຸສາຂໍ ຄເຫຕ຺ວາ ຠທ຺ທາກຸຓ຺ຑລເກສາ ວິຍ ຊມ຺ພຸທີປຕເລ ວິຈຣນ຺ຕີ ມຫາໂມຄ຺ຄລ຺ລານຕ຺ເຖຣໍ ອຸປສງ຺ກມິຕ຺ວາ ປຎ຺ຫໍ ປຸຈ຺ຉິຕ຺ວາ ປຣາຊຍໍ ປຕ຺ຕາ ເຖຣສ຺ສ ໂອວາເທ ຐຕ຺ວາ ສາສເນ ປພ຺ພຊິຕ຺ວາ ສມຓຘມ຺ມໍ ກໂຣນ຺ຕີ ນ ຈິຣສ຺ເສວ ສຫ ປຏິສມ຺ຠິທາຫິ ອຣຫຕ຺ຕໍ ປຕ຺ວາ ອຕ຺ຕໂນ ປຏິປຕ຺ຕິໍ ປຈ຺ຈເວກ຺ຂິຕ຺ວາ ອຸທານວເສນ –

໘໗. ‘‘ອຄ຺ຄິໍ ຈນ຺ທຎ຺ຈ ສູຣິຍຎ຺ຈ, ເທວຕາ ຈ ນມສ຺ສິຫໍ;

ນທີຕິຕ຺ຖານິ ຄນ຺ຕ຺ວານ, ອຸທກໍ ໂອຣຸຫາມິຫໍ.

໘໘. ‘‘ພຫູວຕສມາທານາ, ອຑ຺ຒໍ ສີສສ຺ສ ໂອລິຂິໍ;

ຉມາຍ ເສຍ຺ຍໍ ກປ຺ເປມິ, ຣຕ຺ຕິໍ ຠຕ຺ຕໍ ນ ຠຸຎ຺ຊຫໍ.

໘໙. ‘‘ວິຠູສາມຓ຺ຑນຣຕາ, ນ຺ຫາປນຸຈ຺ຉາທເນຫິ ຈ;

ອຸປກາສິໍ ອິມໍ ກາຍໍ, ກາມຣາເຄນ ອຏ຺ຏິຕາ.

໙໐. ‘‘ຕໂຕ ສທ຺ຘໍ ລຠິຕ຺ວານ, ປພ຺ພຊິໍ ອນຄາຣິຍໍ;

ທິສ຺ວາ ກາຍໍ ຍຖາຠູຕໍ, ກາມຣາໂຄ ສມູຫໂຕ.

໙໑. ‘‘ສພ຺ເພ ຠວາ ສມຸຈ຺ຉິນ຺ນາ, ອິຈ຺ຉາ ຈ ປຕ຺ຖນາປິ ຈ;

ສພ຺ພໂຍຄວິສໍຍຸຕ຺ຕາ, ສນ຺ຕິໍ ປາປຸຓິ ເຈຕໂສ’’ຕິ. –

ອິມາ ປຎ຺ຈ ຄາຖາ ອຠາສິ.

ຕຕ຺ຖ ອຄ຺ຄິໍ ຈນ຺ທຎ຺ຈ ສູຣິຍຎ຺ຈ, ເທວຕາ ຈ ນມສ຺ສິຫນ຺ຕິ ອຄ຺ຄິປ຺ປມຸຂາ ເທວາຕິ ອິນ຺ທານໍ ເທວານໍ ອາຣາຘນຕ຺ຖໍ ອາຫຸຕິໍ ປຄ຺ຄເຫຕ຺ວາ ອຄ຺ຄິຎ຺ຈ, ມາເສ ມາເສ ສຸກ຺ກປກ຺ຂສ຺ສ ທຸຕິຍາຍ ຈນ຺ທຎ຺ຈ, ທິວເສ ທິວເສ ສາຍໍ ປາຕໍ ສູຣິຍຎ຺ຈ, ອຎ຺ຎາ ຈ ພາຫິຣາ ຫິຣຎ຺ຎຄພ຺ຠາທໂຍ ເທວຕາ ຈ, ວິສຸທ຺ຘິມຄ຺ຄໍ ຄເວສນ຺ຕີ ນມສ຺ສິຫໍ ນມກ຺ກາຣໍ ອຫໍ ອກາສິໍ. ນທີຕິຕ຺ຖານິ ຄນ຺ຕ຺ວານ, ອຸທກໍ ໂອຣຸຫາມິຫນ຺ຕິ ຄງ຺ຄາທີນໍ ນທີນໍ ປູຊາຕິຕ຺ຖານິ ອຸປຄນ຺ຕ຺ວາ ສາຍໍ ປາຕໍ ອຸທກໍ ໂອຕຣາມິ ອຸທເກ ນິມຸຊ຺ຊິຕ຺ວາ ອງ຺ຄສິຎ຺ຈນໍ ກໂຣມິ.

ພຫູວຕສມາທານາຕິ ປຎ຺ຈາຕປຕປ຺ປນາທິ ພຫຸວິຘວຕສມາທານາ. ຄາຖາສຸຂຕ຺ຖໍ ພຫູຕິ ທີຆກຣຓໍ. ອຑ຺ຒໍ ສີສສ຺ສ ໂອລິຂິນ຺ຕິ ມຍ຺ຫໍ ສີສສ຺ສ ອຑ຺ຒເມວ ມຸຓ຺ເຑມິ. ເກຈິ ‘‘ອຑ຺ຒໍ ສີສສ຺ສ ໂອລິຂິນ຺ຕິ ເກສກລາປສ຺ສ ອຑ຺ຒໍ ຊຏາພນ຺ຘນວເສນ ພນ຺ຘິຕ຺ວາ ອຑ຺ຒໍ ວິສ຺ສຊ຺ເຊສິ’’ນ຺ຕິ ອຕ຺ຖໍ ວທນ຺ຕິ. ຉມາຍ ເສຍ຺ຍໍ ກປ຺ເປມີຕິ ຖຓ຺ຑິລສາຍິນີ ຫຸຕ຺ວາ ອນນ຺ຕຣຫິຕາຍ ຠູມິຍາ ສຍາມິ. ຣຕ຺ຕິໍ ຠຕ຺ຕໍ ນ ຠຸຎ຺ຊຫນ຺ຕິ ຣຕ຺ຕູປຣຕາ ຫຸຕ຺ວາ ຣຕ຺ຕິຍໍ ໂຠຊນໍ ນ ຠຸຎ຺ຊິໍ.

ວິຠູສາມຓ຺ຑນຣຕາຕິ ຈິຣກາລໍ ອຕ຺ຕກິລມຖານຸໂຍເຄນ ກິລນ຺ຕກາຍາ ‘‘ເອວໍ ສຣີຣສ຺ສ ກິລມເນນ ນຕ຺ຖິ ປຎ຺ຎາສຸທ຺ຘິ. ສເຈ ປນ ອິນ຺ທ຺ຣິຍານໍ ໂຕສນວເສນ ສຣີຣສ຺ສ ຕປ຺ປເນນ ສຸທ຺ຘິ ສິຍາ’’ຕິ ມນ຺ຕ຺ວາ ອິມໍ ກາຍໍ ອນຸຄ຺ຄຓ຺ຫນ຺ຕີ ວິຠູສາຍໍ ມຓ຺ຑເນ ຈ ຣຕາ ວຕ຺ຖາລງ຺ກາເຣຫິ ອລງ຺ກຣເຓ ຄນ຺ຘມາລາທີຫິ ມຓ຺ຑເນ ຈ ອຠິຣຕາ. ນ຺ຫາປນຸຈ຺ຉາທເນຫິ ຈາຕິ ສມ຺ພາຫນາທີນິ ກາເຣຕ຺ວາ ນ຺ຫາປເນນ ອຸຈ຺ຉາທເນນ ຈ. ອຸປກາສິໍ ອິມໍ ກາຍນ຺ຕິ ອິມໍ ມມ ກາຍໍ ອນຸຄ຺ຄຓ຺ຫິໍ ສນ຺ຕປ຺ເປສິໍ. ກາມຣາເຄນ ອຏ຺ຏິຕາຕິ ເອວໍ ກາຍທຬ຺ຫີພຫຸລາ ຫຸຕ຺ວາ ອໂຍນິໂສມນສິກາຣປຈ຺ຈຍາ ປຣິຍຸຏ຺ຐິເຕນ ກາມຣາເຄນ ອຏ຺ຏິຕາ ອຠິຓ຺ຫໍ ອຸປທ຺ທຸຕາ ອໂຫສິໍ.

ຕໂຕ ສທ຺ຘໍ ລຠິຕ຺ວານາຕິ ເອວໍ ສມາທິນ຺ນວຕານິ ຠິນ຺ທິຕ຺ວາ ກາຍທຬ຺ຫີພຫຸລາ ວາທປ຺ປສຸຕາ ຫຸຕ຺ວາ ຕຕ຺ຖ ຕຕ຺ຖ ວິຈຣນ຺ຕີ ຕໂຕ ປຈ຺ຉາ ອປຣຠາເຄ ມຫາໂມຄ຺ຄລ຺ລານຕ຺ເຖຣສ຺ສ ສນ຺ຕິເກ ລທ຺ໂຘວາທານຸສາສນາ ສທ຺ຘໍ ປຏິລຠິຕ຺ວາ. ທິສ຺ວາ ກາຍໍ ຍຖາຠູຕນ຺ຕິ ສຫ ວິປສ຺ສນາຍ ມຄ຺ຄປຎ຺ຎາຍ ອິມໍ ມມ ກາຍໍ ຍຖາຠູຕໍ ທິສ຺ວາ ອນາຄາມິມຄ຺ເຄນ ສພ຺ພໂສ ກາມຣາໂຄ ສມູຫໂຕ. ຕໂຕ ປຣໍ ອຄ຺ຄມຄ຺ເຄນ ສພ຺ເພ ຠວາ ສມຸຈ຺ຉິນ຺ນາ, ອິຈ຺ຉາ ຈ ປຕ຺ຖນາປິ ຈາຕິ ປຈ຺ຈຸປ຺ປນ຺ນວິສຍາຠິລາສສງ຺ຂາຕາ ອິຈ຺ຉາ ຈ ອາຍຕິຠວາຠິລາສສງ຺ຂາຕາ ປຕ຺ຖນາປິ ສພ຺ເພ ຠວາປິ ສມຸຈ຺ຉິນ຺ນາຕິ ໂຍຊນາ. ສນ຺ຕິໍ ປາປຸຓິ ເຈຕໂສຕິ ອຈ຺ຈນ຺ຕໍ ສນ຺ຕິໍ ອຣຫຕ຺ຕຜລໍ ປາປຸຓິໍ ອຘິຄຈ຺ຉິນ຺ຕິ ອຕ຺ໂຖ.

ນນ຺ທຸຕ຺ຕຣາເຖຣີຄາຖາວຓ຺ຓນາ ນິຏ຺ຐິຕາ.