໓. ສີຫາເຖຣີຄາຖາວຓ຺ຓນາ

ອໂຍນິໂສ ມນສິກາຣາຕິອາທິກາ ສີຫາຍ ເຖຣິຍາ ຄາຖາ. ອຍມ຺ປິ ປຸຣິມພຸທ຺ເຘສຸ ກຕາຘິກາຣາ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ກຸສລໍ ອຸປຈິນິຕ຺ວາ ອິມສ຺ມິໍ ພຸທ຺ຘຸປ຺ປາເທ ເວສາລິຍໍ ສີຫເສນາປຕິໂນ ຠຄິນິຍາ ຘີຕາ ຫຸຕ຺ວາ ນິພ຺ພຕ຺ຕິ. ຕສ຺ສາ ‘‘ມາຕຸລສ຺ສ ນາມໍ ກໂຣມາ’’ຕິ ສີຫາຕິ ນາມໍ ອກໍສຸ. ສາ ວິຎ຺ຎຸຕໍ ປຕ຺ວາ ເອກທິວສໍ ສຕ຺ຖາຣາ ສີຫສ຺ສ ເສນາປຕິໂນ ຘມ຺ເມ ເທສິຍມາເນ ຕໍ ຘມ຺ມໍ ສຸຕ຺ວາ ປຏິລທ຺ຘສທ຺ຘາ ມາຕາປິຕໂຣ ອນຸຊານາເປຕ຺ວາ ປພ຺ພຊິ. ປພ຺ພຊິຕ຺ວາ ຈ ວິປສ຺ສນໍ ອາຣຠິຕ຺ວາປິ ພຫິທ຺ຘາ ປຸຖຸຕ຺ຕາຣມ຺ມເຓ ວິຘາວນ຺ຕໍ ຈິຕ຺ຕໍ ນິວຕ຺ເຕຕຸໍ ອສກ຺ໂກນ຺ຕີ ສຕ຺ຕ ສໍວຈ຺ຉຣານິ ມິຈ຺ຉາວິຕກ຺ເກຫິ ພາຘີຍມານາ ຈິຕ຺ຕສ຺ສາທໍ ອລຠນ຺ຕີ ‘‘ກິໍ ເມ ອິມິນາ ປາປຊີວິເຕນ, ອຸພ຺ພນ຺ຘິຕ຺ວາ ມຣິສ຺ສາມີ’’ຕິ ປາສໍ ຄເຫຕ຺ວາ ຣຸກ຺ຂສາຂາຍໍ ລຄ຺ຄິຕ຺ວາ ຕໍ ອຕ຺ຕໂນ ກຓ຺ເຐ ປຏິມຸຎ຺ຈນ຺ຕີ ປຸພ຺ພາຈິຓ຺ຓວເສນ ວິປສ຺ສນາຍ ຈິຕ຺ຕໍ ອຠິນີຫຣິ, ອນ຺ຕິມຠວິກຕາຍ ປາສສ຺ສ ພນ຺ຘນໍ ຄີວຏ຺ຐາເນ ອໂຫສິ, ຎາຓສ຺ສ ປຣິປາກໍ ຄຕຕ຺ຕາ ສາ ຕາວເທວ ວິປສ຺ສນໍ ວຑ຺ເຒຕ຺ວາ ສຫ ປຏິສມ຺ຠິທາຫິ ອຣຫຕ຺ຕໍ ປາປຸຓິ. ອຣຫຕ຺ຕໍ ປຕ຺ຕສມກາລເມວ ຈ ປາສພນ຺ໂຘ ຄີວໂຕ ມຸຈ຺ຈິຕ຺ວາ ວິນິວຕ຺ຕິ. ສາ ອຣຫຕ຺ເຕ ປຕິຏ຺ຐິຕາ ອຸທານວເສນ –

໗໗. ‘‘ອໂຍນິໂສ ມນສິກາຣາ, ກາມຣາເຄນ ອຏ຺ຏິຕາ;

ອໂຫສິໍ ອຸທ຺ຘຕາ ປຸພ຺ເພ, ຈິຕ຺ເຕ ອວສວຕ຺ຕິນີ.

໗໘. ‘‘ປຣິຍຸຏ຺ຐິຕາ ກ຺ເລເສຫິ, ສຸຠສຎ຺ຎານຸວຕ຺ຕິນີ;

ສມໍ ຈິຕ຺ຕສ຺ສ ນ ລຠິໍ, ຣາຄຈິຕ຺ຕວສານຸຄາ.

໗໙. ‘‘ກິສາ ປຓ຺ຑຸ ວິວຓ຺ຓາ ຈ, ສຕ຺ຕ ວສ຺ສານິ ຈາຣິຫໍ;

ນາຫໍ ທິວາ ວາ ຣຕ຺ຕິໍ ວາ, ສຸຂໍ ວິນ຺ທິໍ ສຸທຸກ຺ຂິຕາ.

໘໐. ‘‘ຕໂຕ ຣຊ຺ຊຸໍ ຄເຫຕ຺ວານ, ປາວິສິໍ ວນມນ຺ຕຣໍ;

ວຣໍ ເມ ອິຘ ອຸພ຺ພນ຺ຘໍ, ຍຎ຺ຈ ຫີນໍ ປຸນາຈເຣ.

໘໑. ‘‘ທຬ຺ຫປາສໍ ກຣິຕ຺ວານ, ຣຸກ຺ຂສາຂາຍ ພນ຺ຘິຍ;

ປກ຺ຂິປິໍ ປາສໍ ຄີວາຍໍ, ອຖ ຈິຕ຺ຕໍ ວິມຸຈ຺ຈິ ເມ’’ຕິ. –

ອິມາ ຄາຖາ ອຠາສິ.

ຕຕ຺ຖ ອໂຍນິໂສ ມນສິກາຣາຕິ ອນຸປາຍມນສິກາເຣນ, ອສຸເຠ ສຸຠນ຺ຕິ ວິປລ຺ລາສຄ຺ຄາເຫນ. ກາມຣາເຄນ ອຏ຺ຏິຕາຕິ ກາມຄຸເຓສຸ ຉນ຺ທຣາເຄນ ປີຬິຕາ. ອໂຫສິໍ ອຸທ຺ຘຕາ ປຸພ຺ເພ, ຈິຕ຺ເຕ ອວສວຕ຺ຕິນີຕິ ປຸພ຺ເພ ມມ ຈິຕ຺ເຕ ມຍ຺ຫໍ ວເສ ອວຕ຺ຕມາເນ ອຸທ຺ຘຕາ ນານາຣມ຺ມເຓ ວິກ຺ຂິຕ຺ຕຈິຕ຺ຕາ ອສມາຫິຕາ ອໂຫສິໍ.

ປຣິຍຸຏ຺ຐິຕາ ກ຺ເລເສຫິ, ສຸຠສຎ຺ຎານຸວຕ຺ຕິນີຕິ ປຣິຍຸຏ຺ຐານປຕ຺ເຕຫິ ກາມຣາຄາທິກິເລເສຫິ ອຠິຠູຕາ ຣູປາທີສຸ ສຸຠນ຺ຕິ ປວຕ຺ຕາຍ ກາມສຎ຺ຎາຍ ອນຸວຕ຺ຕນສີລາ. ສມໍ ຈິຕ຺ຕສ຺ສ ນ ລຠິໍ, ຣາຄຈິຕ຺ຕວສານຸຄາຕິ ກາມຣາຄສມ຺ປຍຸຕ຺ຕຈິຕ຺ຕສ຺ສ ວສໍ ອນຸຄຈ຺ຉນ຺ຕີ ອີສກມ຺ປິ ຈິຕ຺ຕສ຺ສ ສມໍ ເຈໂຕສມຖໍ ຈິຕ຺ເຕກຄ຺ຄຕໍ ນ ລຠິໍ.

ກິສາ ປຓ຺ຑຸ ວິວຓ຺ຓາ ຈາຕິ ເອວໍ ອຸກ຺ກຓ຺ຐິຕຠາເວນ ກິສາ ຘມນິສນ຺ຖຕຄຕ຺ຕາ ອຸປ຺ປຓ຺ຑຸປ຺ປຓ຺ຑຸກຊາຕາ ຕໂຕ ເອວ ວິວຓ຺ຓາ ວິຄຕຉວິວຓ຺ຓາ ຈ ຫຸຕ຺ວາ. ສຕ຺ຕ ວສ຺ສານີຕິ ສຕ຺ຕ ສໍວຈ຺ຉຣານິ. ຈາຣິຫນ຺ຕິ ຈຣິໍ ອຫໍ. ນາຫໍ ທິວາ ວາ ຣຕ຺ຕິໍ ວາ, ສຸຂໍ ວິນ຺ທິໍ ສຸທຸກ຺ຂິຕາຕິ ເອວມຫໍ ສຕ຺ຕສຸ ສໍວຈ຺ຉເຣສຸ ກິເລສທຸກ຺ເຂນ ທຸກ຺ຂິຕາ ເອກທາປິ ທິວາ ວາ ຣຕ຺ຕິໍ ວາ ສມຓສຸຂໍ ນ ປຏິລຠິໍ.

ຕໂຕຕິ ກິເລສປຣິຍຸຏ຺ຐາເນນ ສມຓສຸຂາລາຠຠາວໂຕ. ຣຊ຺ຊຸໍ ຄເຫຕ຺ວານ ປາວິສິໍ, ວນມນ຺ຕຣນ຺ຕິ ປາສຣຊ຺ຊຸໍ ອາທາຍ ວນນ຺ຕຣໍ ປາວິສິໍ. ກິມຕ຺ຖໍ ປາວິສີຕິ ເຈ ອາຫ – ‘‘ວຣໍ ເມ ອິຘ ອຸພ຺ພນ຺ຘໍ, ຍຎ຺ຈ ຫີນໍ ປຸນາຈເຣ’’ຕິ ຍທຫໍ ສມຓຘມ຺ມໍ ກາຕຸໍ ອສກ຺ໂກນ຺ຕີ ຫີນໍ ຄິຫິຠາວໍ ປຸນ ອາຈເຣ ອາຈເຣຍ຺ຍໍ ອນຸຕິຏ຺ເຐຍ຺ຍໍ, ຕໂຕ ສຕຄຸເຓນ ສຫສ຺ສຄຸເຓນ ອິມສ຺ມິໍ ວນນ຺ຕເຣ ອຸພ຺ພນ຺ຘໍ ພນ຺ຘິຕ຺ວາ ມຣຓໍ ເມ ວຣໍ ເສຏ຺ຐນ຺ຕິ ອຕ຺ໂຖ. ອຖ ຈິຕ຺ຕໍ ວິມຸຈ຺ຈິ ເມຕິ ຍທາ ຣຸກ຺ຂສາຂາຍ ພນ຺ຘປາສໍ ຄີວາຍໍ ປກ຺ຂິປິ, ອຖ ຕທນນ຺ຕຣເມວ ວຸຏ຺ຐານຄາມິນິວິປສ຺ສນາມຄ຺ເຄນ ຆຏິຕຕ຺ຕາ ມຄ຺ຄປຏິປາຏິຍາ ສພ຺ພາສເວຫິ ມມ ຈິຕ຺ຕໍ ວິມຸຈ຺ຈິ ວິມຸຕ຺ຕໍ ອໂຫສີຕິ.

ສີຫາເຖຣີຄາຖາວຓ຺ຓນາ ນິຏ຺ຐິຕາ.