໑. ອຎ຺ຎຕຣາເຖຣີຄາຖາວຓ຺ຓນາ

ປຎ຺ຈກນິປາເຕ ປຓ຺ຓວີສຕິ ວສ຺ສານີຕິອາທິກາ ອຎ຺ຎຕຣາຍ ເຖຣິຍາ ຄາຖາ. ອຍມ຺ປິ ປຸຣິມພຸທ຺ເຘສຸ ກຕາຘິກາຣາ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ກຸສລໍ ອຸປຈິນນ຺ຕີ ອິມສ຺ມິໍ ພຸທ຺ຘຸປ຺ປາເທ ເທວທຫນຄເຣ ມຫາປຊາປຕິໂຄຕມິຍາ ຘາຕີ ຫຸຕ຺ວາ ວຑ຺ເຒສິ. ນາມໂຄຕ຺ຕໂຕ ປນ ອປຎ຺ຎາຕາ ອໂຫສິ. ສາ ມຫາປຊາປຕິໂຄຕມິຍາ ປພ຺ພຊິຕກາເລ ສຍມ຺ປິ ປພ຺ພຊິຕ຺ວາ ປຎ຺ຈວີສຕິ ສໍວຈ຺ຉຣານິ ກາມຣາເຄນ ອຸປທ຺ທຸຕາ ອຈ຺ຉຣາສງ຺ຆາຕມຕ຺ຕມ຺ປິ ກາລໍ ຈິຕ຺ເຕກຄ຺ຄຕໍ ອລຠນ຺ຕີ ພາຫາ ປຄ຺ຄຍ຺ຫ ກນ຺ທມານາ ຘມ຺ມທິນ຺ນາເຖຣິຍາ ສນ຺ຕິເກ ຘມ຺ມໍ ສຸຕ຺ວາ ກາເມຫິ ວິນິວຕ຺ຕິຕມານສາ ກມ຺ມຏ຺ຐານໍ ຄເຫຕ຺ວາ ຠາວນມນຸຍຎ຺ຊນ຺ຕີ ນ ຈິຣສ຺ເສວ ຉຬຠິຎ຺ຎາ ຫຸຕ຺ວາ ອຕ຺ຕໂນ ປຏິປຕ຺ຕິໍ ປຈ຺ຈເວກ຺ຂິຕ຺ວາ ອຸທານວເສນ –

໖໗. ‘‘ປຓ຺ຓວີສຕິ ວສ຺ສານິ, ຍໂຕ ປພ຺ພຊິຕາ ອຫໍ;

ນາຈ຺ຉຣາສງ຺ຆາຕມຕ຺ຕມ຺ປິ, ຈິຕ຺ຕສ຺ສູປສມຊ຺ຌຄໍ.

໖໘. ‘‘ອລທ຺ຘາ ເຈຕໂສ ສນ຺ຕິໍ, ກາມຣາເຄນວສ຺ສຸຕາ;

ພາຫາ ປຄ຺ຄຍ຺ຫ ກນ຺ທນ຺ຕີ, ວິຫາຣໍ ປາວິສິໍ ອຫໍ.

໖໙. ‘‘ສາ ຠິກ຺ຂຸນິໍ ອຸປາຄຈ຺ຉິໍ, ຍາ ເມ ສທ຺ຘາຍິກາ ອຫຸ;

ສາ ເມ ຘມ຺ມມເທເສສິ, ຂນ຺ຘາຍຕນຘາຕຸໂຍ.

໗໐. ‘‘ຕສ຺ສາ ຘມ຺ມໍ ສຸຓິຕ຺ວານ, ເອກມນ຺ເຕ ອຸປາວິສິໍ;

ປຸພ຺ເພນິວາສໍ ຊານາມິ, ທິພ຺ພຈກ຺ຂຸ ວິໂສຘິຕໍ.

໗໑. ‘‘ເຈໂຕປຣິຈ຺ຈຎາຓຎ຺ຈ, ໂສຕຘາຕຸ ວິໂສຘິຕາ;

ອິທ຺ຘີປິ ເມ ສຈ຺ຉິກຕາ, ປຕ຺ໂຕ ເມ ອາສວກ຺ຂໂຍ;

ຉຬຠິຎ຺ຎາ ສຈ຺ຉິກຕາ, ກຕໍ ພຸທ຺ຘສ຺ສ ສາສນ’’ນ຺ຕິ. –

ອິມາ ຄາຖາ ອຠາສິ.

ຕຕ຺ຖ ນາຈ຺ຉຣາສງ຺ຆາຕມຕ຺ຕມ຺ປີຕິ ອຈ຺ຉຣາຆຏິຕມຕ຺ຕມ຺ປິ ຂຓໍ ອງ຺ຄຸລິໂຜຏນມຕ຺ຕມ຺ປິ ກາລນ຺ຕິ ອຕ຺ໂຖ. ຈິຕ຺ຕສ຺ສູປສມຊ຺ຌຄນ຺ຕິ ຈິຕ຺ຕສ຺ສ ອຸປສມໍ ຈິຕ຺ເຕກຄ຺ຄໍ ນ ອຊ຺ຌຄນ຺ຕິ ໂຍຊນາ, ນ ປຏິລຠິນ຺ຕິ ອຕ຺ໂຖ.

ກາມຣາເຄນວສ຺ສຸຕາຕິ ກາມຄຸຓສງ຺ຂາເຕສຸ ວຕ຺ຖຸກາເມສຸ ທຬ຺ຫຕຣາຠິນິເວສິຕາຍ ພຫເລນ ຉນ຺ທຣາເຄນ ຕິນ຺ຕຈິຕ຺ຕາ.

ຠິກ຺ຂຸນິນ຺ຕິ ຘມ຺ມທິນ຺ນຕ຺ເຖຣິໍ ສນ຺ຘາຍ ວທຕິ.

ເຈໂຕປຣິຈ຺ຈຎາຓຎ຺ຈາຕິ ເຈໂຕປຣິຍຎາຓຎ຺ຈ ວິໂສຘິຕນ຺ຕິ ສມ຺ພນ຺ໂຘ, ອຘິຄຕນ຺ຕິ ອຕ຺ໂຖ. ເສສໍ ວຸຕ຺ຕນຍເມວ.

ອຎ຺ຎຕຣາເຖຣີຄາຖາວຓ຺ຓນາ ນິຏ຺ຐິຕາ.