໕. ປຎ຺ຈກນິທ຺ເທສວຓ຺ຓນາ

໑໙໑. ປຎ຺ຈເກ – ຕຕ຺ຣາຕິ ເຕສຸ ‘‘ອາຣຠຕິ ຈ ວິປ຺ປຏິສາຣີ ຈ ໂຫຕີ’’ຕິອາທິນາ ນເຍນ ເຫຏ຺ຐາ ອຸທ຺ທິຏ຺ຐປຸຄ຺ຄເລສຸ. ຍ຺ວາຍນ຺ຕິ ໂຍ ອຍໍ. ອາຣຠຕີຕິ ເອຕ຺ຖ ອາຣມ຺ຠສທ຺ໂທ ກມ຺ມກິຣິຍາຫິໍສນວີຣິຍວິໂກປນາປຕ຺ຕິວີຕິກ຺ກເມສຸ ວຕ຺ຕຕິ. ຕຖາ ເຫສ ‘‘ຍໍກິຎ຺ຈິ ທຸກ຺ຂໍ ສມ຺ໂຠຕິ, ສພ຺ພໍ ອາຣມ຺ຠປຈ຺ຈຍາ’’ຕິ (ສຸ. ນິ. ໗໔໘) ກມ຺ເມ ອາຄໂຕ. ‘‘ມຫາຍຎ຺ຎາ ມຫາຣມ຺ຠາ, ນ ເຕ ໂຫນ຺ຕິ ມຫປ຺ຜລາ’’ຕິ (ອ. ນິ. ໔.໓໙) ກິຣິຍາຍໍ. ‘‘ສມຓໍ ໂຄຕມໍ ອຸທ຺ທິສ຺ສ ປາຓໍ ອາຣຠນ຺ຕີ’’ຕິ (ມ. ນິ. ໒.໕໑-໕໒) ຫິໍສເນ. ‘‘ອາຣຠຖ, ນິກ຺ຂມຖ, ຍຸຎ຺ຊຖ ພຸທ຺ຘສາສເນ’’ຕິ (ສໍ. ນິ. ໑.໑໘໕) ວີຣິເຍ. ‘‘ພີຊຄາມຠູຕຄາມສມາຣມ຺ຠາ ປຏິວິຣໂຕ ໂຫຕີ’’ຕິ (ທີ. ນິ. ໑.໑໐, ໑໙໔; ມ. ນິ. ໑.໒໙໓) ວິໂກປເນ. ‘‘ອາຣຠຕິ ຈ ວິປ຺ປຏິສາຣີ ຈ ໂຫຕີ’’ຕິ (ອ. ນິ. ໕.໑໔໒) ອຍໍ ປນ ອາປຕ຺ຕິວີຕິກ຺ກເມ ອາຄໂຕ. ຕສ຺ມາ ອາປຕ຺ຕິວີຕິກ຺ກມວເສນ ອາຣຠຕິ ເຈວ ຕປ຺ປຈ຺ຈຍາ ວິປ຺ປຏິສາຣີ ຈ ໂຫຕີຕິ ອຍເມຕ຺ຖ ອຕ຺ໂຖ.

ຍຖາຠູຕໍ ນປ຺ປຊານາຕີຕິ ອນຘິຄຕຕ຺ຕາ ຍຖາສຠາວໂຕ ນ ຊານາຕິ. ຍຕ຺ຖສ຺ສາຕິ ຍສ຺ມິໍ ອສ຺ສ, ຍໍ ຐານໍ ປຕ຺ວາ ເອຕສ຺ສ ປຸຄ຺ຄລສ຺ສ ອຸປ຺ປນ຺ນາ ປາປກາ ອກຸສລາ ຘມ຺ມາ ອປຣິເສສາ ນິຣຸຊ຺ຌນ຺ຕີຕິ ອຕ຺ໂຖ. ກິໍ ປນ ປຕ຺ວາ ເຕ ນິຣຸຊ຺ຌນ຺ຕີຕິ? ອຣຫຕ຺ຕມຄ຺ຄໍ. ຜລປ຺ປຕ຺ຕສ຺ສ ປນ ນິຣຸທ຺ຘາ ນາມ ໂຫນ຺ຕິ. ເອວໍ ສນ຺ເຕປິ ອິຘ ມຄ຺ຄກິຈ຺ຈວເສນ ຜລເມວ ວຸຕ຺ຕນ຺ຕິ ເວທິຕພ຺ພໍ. ອາຣມ຺ຠຊາຕິ ອາປຕ຺ຕິວີຕິກ຺ກມສມ຺ຠວາ. ວິປ຺ປຏິສາຣຊາຕິ ວິປ຺ປຏິສາຣໂຕ ຊາຕາ. ປວຑ຺ຒນ຺ຕີຕິ ປຸນປ຺ປຸນໍ ອຸປ຺ປຊ຺ຊເນນ ວຑ຺ຒນ຺ຕິ. ສາຘູຕິ ອາຍາຈນສາຘຸ. ອິທໍ ວຸຕ຺ຕໍ ໂຫຕິ – ຍາວ ອປຣທ຺ຘຎ຺ຈ ວຕ ອາຍສ຺ມຕາ, ເອວໍ ສນ຺ເຕປິ ມຍໍ ອາຍສ຺ມນ຺ຕໍ ຍາຈາມ – ‘‘ເທເສຕພ຺ພຍຸຕ຺ຕກສ຺ສ ເທສນາຍ, ວຸຏ຺ຐາຕພ຺ພຍຸຕ຺ຕກສ຺ສ ວຸຏ຺ຐາເນນ, ອາວິກາຕພ຺ພຍຸຕ຺ຕກສ຺ສ ອາວິກິຣິຍາຍ, ອາຣມ຺ຠເຊ ອາສເວ ປຫາຍ, ສຸທ຺ຘນ຺ເຕ ຐິຕຠາວປຈ຺ຈເວກ຺ຂເຓນ ວິປ຺ປຏິສາຣເຊ ອາສເວ ປຏິວິໂນເທຕ຺ວາ ນີຫຣິຕ຺ວາ ວິປສ຺ສນາຈິຕ຺ຕຎ຺ເຈວ ວິປສ຺ສນາປຎ຺ຎຎ຺ຈ ຠາເວຕູ’’ຕິ. ອມຸນາ ປຎ຺ຈເມນ ປຸຄ຺ຄເລນາຕິ ເອເຕນ ປຎ຺ຈເມນ ຂີຓາສວປຸຄ຺ຄເລນ. ສມສໂມ ຠວິສ຺ສຕີຕິ ໂລກຸຕ຺ຕຣຄຸເຓຫິ ສມຠາເວເນວ ສໂມ ຠວິສ຺ສຕີຕິ ເອວໍ ຂີຓາສເວນ ໂອວທິຕພ຺ໂພຕິ ອຕ຺ໂຖ.

ອາຣຠຕິ ນ ວິປ຺ປຏິສາຣີ ໂຫຕີຕິ ອາປຕ຺ຕິໍ ອາປຊ຺ຊຕິ. ຕໍ ປນ ເທເສຕຸໍ ສຠາຄປຸຄ຺ຄລໍ ປຣິເຍສຕິ. ຕສ຺ມາ ນ ວິປ຺ປຏິສາຣີ ໂຫຕິ. ອງ຺ຄຸຕ຺ຕຣຏ຺ຐກຖາຍໍ ປນ ‘‘ວຸຏ຺ຐິຕຕ຺ຕາ ນ ວິປ຺ປຏິສາຣີ ໂຫຕີ’’ຕິ ວຸຕ຺ຕໍ. ນ ອາຣຠຕິ ວິປ຺ປຏິສາຣີ ໂຫຕີຕິ ອາປຕ຺ຕິໍ ນາປຊ຺ຊຕິ, ວິນຍປຎ຺ຎຕ຺ຕິຍໍ ປນ ອໂກວິທຕ຺ຕາ ອນາປຕ຺ຕິຍໍ ອາປຕ຺ຕິສຎ຺ຎີ ຫຸຕ຺ວາ ວິປ຺ປຏິສາຣີ ໂຫຕິ. ອງ຺ຄຸຕ຺ຕຣຏ຺ຐກຖາຍໍ ປນ ‘‘ສກິໍ ອາປຕ຺ຕິໍ ອາປຊ຺ຊິຕ຺ວາ ຕໂຕ ວຸຏ຺ຐາຍ ປຈ຺ຉາ ກິຎ຺ຈາປິ ນາປຊ຺ຊຕິ, ວິປ຺ປຏິສາຣໍ ປນ ວິໂນເທຕຸໍ ນ ສກ຺ໂກຕີ’’ຕິ ວຸຕ຺ຕໍ. ນ ອາຣຠຕິ ນ ວິປ຺ປຏິສາຣີ ໂຫຕີຕິ ເນວ ອາປຕ຺ຕິໍ ອາປຊ຺ຊຕິ, ນ ວິປ຺ປຏິສາຣີ ໂຫຕິ. ກຕໂມ ປເນສ ປຸຄ຺ຄໂລຕິ? ໂອສ຺ສຏ຺ຐວີຣິຍປຸຄ຺ຄໂລ. ໂສ ຫິ ‘‘ກິໍ ເມ ອິມສ຺ມິໍ ພຸທ຺ຘກາເລ ປຣິນິພ຺ພາເນນ, ອນາຄເຕ ເມຕ຺ເຕຍ຺ຍສມ຺ມາສມ຺ພຸທ຺ຘກາເລ ປຣິນິພ຺ພາຍິສ຺ສາມີ’’ຕິ ວິສຸທ຺ຘສີໂລປິ ປຏິປຕ຺ຕິໍ ນ ປູເຣຕິ. ໂສປິ ‘‘ກິມຕ຺ຖໍ ອາຍສ຺ມາ ປມຕ຺ໂຕ ວິຫຣຕິ ປຸຖຸຊ຺ຊນສ຺ສ ນາມ ຄຕິ ອນິພທ຺ຘາ. ອາຍສ຺ມາ ຫິ ເມຕ຺ເຕຍ຺ຍສມ຺ມາສມ຺ພຸທ຺ຘສ຺ສ ສມ຺ມຸຂຠາວໍ ລເຠຍ຺ຍປິ ນ ລເຠຍ຺ຍາປີຕິ ອຣຫຕ຺ຕຕ຺ຖາຍ ວິປສ຺ສນໍ ຠາເວຫີ’’ຕິ ໂອວທິຕພ຺ໂພວ. ເສສໍ ສພ຺ພຕ຺ຖ ວຸຕ຺ຕນເຍເນວ ເວທິຕພ຺ພໍ.

໑໙໒. ທຕ຺ວາ ອວຊານາຕີຕິອາທີສຸ – ເອໂກ ຠິກ຺ຂຸ ມຫາປຸຎ຺ໂຎ ຈຕຸປຈ຺ຈຍລາຠີ ໂຫຕິ. ໂສ ຈີວຣາທີນິ ລຠິຕ຺ວາ ອຎ຺ຎໍ ອປ຺ປປຸຎ຺ຎໍ ອາປຸຈ຺ຉຕິ. ໂສປິ ຕສ຺ມິໍ ປຸນປ຺ປຸນໍ ອາປຸຈ຺ຉນ຺ເຕປິ ຄຓ຺ຫາຕິເຍວ. ອຖສ຺ສ ອິຕໂຣ ໂຖກໍ ກຸປິໂຕ ຫຸຕ຺ວາ ມງ຺ກຸຠາວໍ ອຸປ຺ປາເທຕຸກາໂມ ວທຕິ – ‘‘ອຍໍ ອຕ຺ຕໂນ ຘມ຺ມຕາຍ ຈີວຣາທີນິ ນ ລຠຕິ, ອມ຺ເຫ ນິສ຺ສາຍ ລຠຕີ’’ຕິ. ເອວໍ ປຸຄ຺ຄໂລ ທຕ຺ວາ ອວຊານາຕິ ນາມ. ເອໂກ ປນ ເອເກນ ສທ຺ຘິໍ ທ຺ເວ ຕີຓິ ວສ຺ສານິ ວສນ຺ໂຕ ປຸພ຺ເພ ຕໍ ປຸຄ຺ຄລໍ ຄຣຸໍ ກຕ຺ວາ ປຈ຺ຉາ ຄຈ຺ຉນ຺ເຕ ຄຈ຺ຉນ຺ເຕ ກາເລ ຈິຕ຺ຕີກາຣໍ ນ ກໂຣຕິ, ອາສນາປິ ນ ວຸຏ຺ຐາຕິ, ອຸປຏ຺ຐານມ຺ປິ ນ ຄຈ຺ຉຕິ. ເອວໍ ປຸຄ຺ຄໂລ ສໍວາເສນ ອວຊານາຕິ ນາມ.

ອາເຘຍ຺ຍມຸໂຂຕິ ອາທິໂຕ ເຘຍ຺ຍມຸໂຂ. ປຐມວຈນສ຺ມິໍເຍວ ຐປິຕມຸໂຂຕິ ອຕ຺ໂຖ. ອຘິມຸຈ຺ຈິຕາ ໂຫຕີຕິ ສທ຺ຘາຕາ ໂຫຕິ. ຕຕ຺ຣາຍໍ ນໂຍ – ເອໂກ ປຸຄ຺ຄໂລ ສາຣຸປ຺ປໍເຍວ ຠິກ຺ຂຸໍ ‘ອສາຣຸປ຺ໂປ ເອໂສ’ຕິ ກເຖຕິ, ຕໍ ສຸຕ຺ວາ ເອສ ນິຏ຺ຐໍ ຄຈ຺ຉຕິ. ປຸນ ອຎ຺ເຎນ ສຠາເຄນ ຠິກ຺ຂຸນາ ‘ສາຣຸປ຺ໂປ ອຍ’ນ຺ຕິ ວຸຕ຺ເຕປິ ຕສ຺ສ ວຈນໍ ນ ຄຓ຺ຫາຕິ ‘‘ອສຸເກນ ນາມ ‘ອສາຣຸປ຺ໂປ ອຍ’ນ຺ຕິ ອມ຺ຫາກໍ ກຖິຕ’’ນ຺ຕິ ປຸຣິມຠິກ຺ຂຸໂນວ ກຖໍ ຄຓ຺ຫາຕິ. ອປໂຣປິສ຺ສ ທຸສ຺ສີລໍ ‘ສີລວາ’ຕິ ກເຖຕິ. ຕສ຺ສ ວຈນໍ ສທ຺ທຫິຕ຺ວາ ປຸນ ອຎ຺ເຎນ ‘‘ອສາຣຸປ຺ໂປ ເອສ ຠິກ຺ຂຸ, ນາຍໍ ຕຸມ຺ຫາກໍ ສນ຺ຕິກໍ ອຸປສງ຺ກມິຕຸໍ ຍຸຕ຺ໂຕ’’ຕິ ວຸຕ຺ໂຕປິ ຕສ຺ສ ວຈນໍ ອຄ຺ຄເຫຕ຺ວາ ປຸຣິມສ຺ເສວ ກຖໍ ຄຓ຺ຫາຕິ. ອປໂຣ ວຓ຺ຓມ຺ປິ ກຖິຕໍ ຄຓ຺ຫາຕິ, ອວຓ຺ຓມ຺ປິ ກຖິຕໍ ຄຓ຺ຫາຕິເຍວ. ອຍມ຺ປິ ອາເຘຍ຺ຍມຸໂຂເຍວ ນາມ. ອາຘາຕພ຺ພມຸໂຂ ຍໍ ຍໍ ສຸຓາຕິ, ຕຕ຺ຖ ຕຕ຺ຖ ຐປິຕມຸໂຂຕິ ອຕ຺ໂຖ.

ໂລໂລຕິ ສທ຺ຘາທີນໍ ອິຕ຺ຕຣກາລຏ຺ຐິຕິກຕ຺ຕາ ອສ຺ສທ຺ຘິຍາທີຫິ ລຸລິຕຠາເວນ ໂລໂລ. ອິຕ຺ຕຣສທ຺ໂຘຕິ ປຣິຕ຺ຕສທ຺ໂຘ, ອປຣິປຸຓ຺ຓສທ຺ໂຘ. ເສເສສຸປິ ເອເສວ ນໂຍ. ເອຕ຺ຖ ປນ ປຸນປ຺ປຸນໍ ຠຊນວເສນ ສທ຺ຘາວ ຠຕ຺ຕິ. ເປມໍ ສທ຺ຘາເປມໍ ເຄຫສິຕເປມມ຺ປິ ວຏ຺ຏຕິ. ປສາໂທ ສທ຺ຘາປສາໂທວ. ເອວໍ ປຸຄ຺ຄໂລ ໂລໂລ ໂຫຕີຕິ ເອວໍ ອິຕ຺ຕຣສທ຺ຘາທິຕາຍ ປຸຄ຺ຄໂລ ໂລໂລ ນາມ ໂຫຕິ. ຫລິທ຺ທິຣາໂຄ ວິຍ, ຖຸສຣາສິມ຺ຫິ ໂກຏ຺ຏິຕຂາຓຸໂກ ວິຍ, ອສ຺ສປິຏ຺ຐິຍໍ ຐປິຕກຸມ຺ຠຓ຺ຑໍ ວິຍ ຈ ອນິພທ຺ຘຏ຺ຐາໂນ ມຸຫຸຕ຺ເຕນ ປສີທຕິ, ມຸຫຸຕ຺ເຕນ ກຸປ຺ປຕິ.

ມນ຺ໂທ ໂມມູໂຫຕິ ອຎ຺ຎາຓຠາເວນ ມນ຺ໂທ ອວິສທຕາຍ ໂມມູໂຫ. ມຫາມູຬ຺ໂຫຕິ ອຕ຺ໂຖ.

໑໙໓. ໂຍຘາຊີວູປເມສຸ – ໂຍຘາຊີວາຕິ ຍຸທ຺ຘູປຊີວິໂນ. ຣຊຄ຺ຄນ຺ຕິ ຫຕ຺ຖິອສ຺ສາທີນໍ ປາທປ຺ປຫາຣຠິນ຺ນາຍ ຠູມິຍາ ອຸຄ຺ຄຕໍ ຣຊກ຺ຂນ຺ຘໍ. ນ ສນ຺ຖມ຺ຠຕີຕິ ສນ຺ຖມ຺ຠິຕ຺ວາ ຐາຕຸໍ ນ ສກ຺ໂກຕິ. ສຫຕິ ຣຊຄ຺ຄນ຺ຕິ ຣຊກ຺ຂນ຺ຘໍ ທິສ຺ວາປິ ອຘິວາເສຕິ. ຘຊຄ຺ຄນ຺ຕິ ຫຕ຺ຖິອສ຺ສາທິປິຏ຺ເຐສຸ ວາ ຣເຖສຸ ວາ ອຸສ຺ສາປິຕານໍ ຘຊານໍ ອຄ຺ຄໍ. ອຸສ຺ສາຣຓນ຺ຕິ ຫຕ຺ຖິອສ຺ສຣຖາທີນຎ຺ເຈວ ພລກາຍສ຺ສ ຈ ອຸຈ຺ຈາສທ຺ທມຫາສທ຺ທໍ. ສມ຺ປຫາເຣຕິ ສມາຄເຕ ອປ຺ປມຕ຺ຕເກປິ ປຫາເຣ. ຫຎ຺ຎຕີຕິ ວິຫຎ຺ຎຕິ, ວິຆາຕໍ ອາປຊ຺ຊຕິ. ພ຺ຍາປຊ຺ຊຕີຕິ ວິປຕ຺ຕິໍ ອາປຊ຺ຊຕິ, ປກຕິຠາວໍ ຊຫຕິ. ສຫຕິ ສມ຺ປຫາຣນ຺ຕິ ທ຺ເວ ຕໂຍ ປຫາເຣ ປຕ຺ວາປິ ສຫຕິ, ອຘິວາເສຕິ. ຕເມວ ສງ຺ຄາມສີສນ຺ຕິ ຕເມວ ຊຍຂນ຺ຘາວາຣຏ຺ຐານໍ. ອຊ຺ຌາວສຕີຕິ ສຕ຺ຕາຫມຕ຺ຕໍ ອຠິຠວິຕ຺ວາ ອາວສຕິ. ກິໍ ກາຣຓາ? ລທ຺ຘປ຺ປຫາຣານໍ ປຫາຣຊຄ຺ຄນຕ຺ຖຎ຺ເຈວ ກຕກມ຺ມານໍ ວິເສສໍ ຎຕ຺ວາ ຐານນ຺ຕຣທານຕ຺ຖຎ຺ຈ ອິສ຺ສຣິຍສຸຂານຸຠວນຕ຺ຖຎ຺ຈ.

໑໙໔. ອິທານິ ຍສ຺ມາ ສຕ຺ຖຸ ໂຍຘາຊີເວຫິ ກິຈ຺ຈໍ ນຕ຺ຖິ, ອິມສ຺ມິໍ ປນ ສາສເນ ຕຖາຣູເປ ປຎ຺ຈ ປຸຄ຺ຄເລ ທສ຺ເສຕຸໍ ອິທໍ ໂອປມ຺ມໍ ອາຠຕໍ, ຕສ຺ມາ ເຕ ປຸຄ຺ຄເລ ທສ຺ເສນ຺ໂຕ ເອວເມວນ຺ຕິອາທິມາຫ.

ຕຕ຺ຖ ສໍສີທຕີຕິ ມິຈ຺ຉາວິຕກ຺ກສ຺ມິໍ ວິສີທຕິ, ອນຸປວິສຕິ. ນ ສກ຺ໂກຕິ ພ຺ຣຫ຺ມຈຣິຍໍ ສນ຺ຘາເຣຕຸນ຺ຕິ ພ຺ຣຫ຺ມຈຣິຍວາສໍ ອນຸປຈ຺ຉິຊ຺ຊມານໍ ໂຄເປຕຸໍ ນ ສກ຺ໂກຕິ. ສິກ຺ຂາທຸພ຺ພລ຺ຍໍ ອາວິກຕ຺ວາຕິ ສິກ຺ຂາຍ ທຸພ຺ພລຠາວໍ ປກາເສຕ຺ວາ. ກິມສ຺ສ ຣຊຄ຺ຄສ຺ມິນ຺ຕິ ກິໍ ຕສ຺ສ ປຸຄ຺ຄລສ຺ສ ຣຊຄ຺ຄໍ ນາມາຕິ ວທຕິ. ອຠິຣູປາຕິ ອຠິຣູປວຕີ. ທສ຺ສນີຍາຕິ ທສ຺ສນໂຍຄ຺ຄາ. ປາສາທິກາຕິ ທສ຺ສເນເນວ ຈິຕ຺ຕປ຺ປສາທາວຫາ. ປຣມາຍາຕິ ອຸຕ຺ຕມາຍ. ວຓ຺ຓໂປກ຺ຂຣຕາຍາຕິ ສຣີຣວຓ຺ເຓນ ເຈວ ອງ຺ຄສຓ຺ຐາເນນ ຈ.

໑໙໖. ອູຫສຕີຕິ ອວຫສຕິ. ອຸລ຺ລປຕີຕິ ກເຖຕິ. ອຸຊ຺ຊຄ຺ຆຕີຕິ ປາຓິໍ ປຫຣິຕ຺ວາ ມຫາຫສິຕໍ ຫສຕິ. ອຸປ຺ປຓ຺ເຑຕີຕິ ອຸປ຺ປຓ຺ຑນກຖໍ ກເຖຕິ.

໑໙໗. ອຠິນິສີທຕີຕິ ອຠິຠວິຕ຺ວາ ສນ຺ຕິເກ ວາ ເອກາສເນ ວາ ນິສີທຕິ. ທຸຕິຍປເທປິ ເອເສວ ນໂຍ. ອຊ຺ໂຌຕ຺ຖຣຕີຕິ ອວຕ຺ຖຣຕິ.

໑໙໘. ວິນິເວເຐຕ຺ວາ ວິນິໂມເຈຕ຺ວາຕິ ຄຫິຕຏ຺ຐານໂຕ ຕສ຺ສ ຫຕ຺ຖໍ ວິນິເວເຐຕ຺ວາ ເຈວ, ໂມເຈຕ຺ວາ ຈ. ເສສເມຕ຺ຖ ອຸຕ຺ຕານຕ຺ຖເມວ.

໑໙໙. ປິຓ຺ຑປາຕິເກສຸ – ມນ຺ທຕ຺ຕາ ໂມມູຫຕ຺ຕາຕິ ເນວ ສມາທານໍ ຊານາຕິ, ນ ອານິສໍສໍ; ອຕ຺ຕໂນ ປນ ມນ຺ທຕ຺ຕາ ໂມມູຫຕ຺ຕາ ອຎ຺ຎາເຓເນວ ປິຓ຺ຑປາຕິໂກ ໂຫຕິ. ປາປິຈ຺ໂຉ ອິຈ຺ຉາປກໂຕຕິ ປິຓ຺ຑປາຕິກສ຺ສ ເມ ສໂຕ ‘‘ອຍໍ ປິຓ຺ຑປາຕິໂກ’’ຕິ ຈຕຸປຈ຺ຈຍສກ຺ກາຣໍ ກຣິສ຺ສນ຺ຕິ. ລຊ຺ຊີ, ອປ຺ປິຈ຺ໂຉຕິອາທີຫິ ຈ ຄຸເຓຫິ ສມ຺ຠາເວສ຺ສນ຺ຕີຕິ. ເອວໍ ປາປິກາຍ ອິຈ຺ຉາຍ ຐຕ຺ວາ ຕາຍ ປາປິຈ຺ຉາຍ ອຠິຠູໂຕ ຫຸຕ຺ວາ ປິຓ຺ຑປາຕິໂກ ໂຫຕິ. ອຸມ຺ມາທວເສນ ປິຓ຺ຑາຍ ຈຣນ຺ໂຕ ປນ ອຸມ຺ມາທາ ຈິຕ຺ຕວິກ຺ເຂປາ ປິຓ຺ຑປາຕິໂກ ນາມ ໂຫຕິ. ວຓ຺ຓິຕນ຺ຕິ ອິທໍ ປິຓ຺ຑປາຕິກງ຺ຄໍ ນາມ ພຸທ຺ເຘຫິ ຈ ພຸທ຺ຘສາວເກຫິ ຈ ວຓ຺ຓິຕໍ ປສຕ຺ຖນ຺ຕິ ປິຓ຺ຑປາຕິໂກ ໂຫຕິ. ອປ຺ປິຈ຺ຉຕໍເຍວ ນິສ຺ສາຍາຕິອາທີສຸ – ‘‘ອິຕິ ອປ຺ປິຈ຺ໂຉ ຠວິສ຺ສາມິ, ອິທໍ ເມ ປິຓ຺ຑປາຕິກງ຺ຄໍ ອປ຺ປິຈ຺ຉຕາຍ ສໍວຕ຺ຕິສ຺ສຕິ; ‘ອິຕິ ສນ຺ຕຸຏ຺ໂຐ ຠວິສ຺ສາມິ ອິທໍ ເມ ປິຓ຺ຑປາຕິກງ຺ຄໍ ສນ຺ຕຸຏ຺ຐິຍາ ສໍວຕ຺ຕິສ຺ສຕິ’; ‘ອິຕິ ກິເລເສ ສໍລິຂິສ຺ສາມິ’, ອິທໍ ເມ ປິຓ຺ຑປາຕິກງ຺ຄໍ ກິເລສສລ຺ເລຂນຕ຺ຖາຍ ສໍວຕ຺ຕິສ຺ສຕີ’’ຕິ ປິຓ຺ຑປາຕິໂກ ໂຫຕິ. ອິທມຕ຺ຖິຕນ຺ຕິ ອິມາຍ ກລ຺ຍາຓາຍ ປຏິປຕ຺ຕິຍາ ອຕ຺ຖິກຠາວໍ, ອິມິນາ ວາ ປິຓ຺ຑປາຕມຕ຺ເຕນ ອຕ຺ຖິກຠາວໍ. ຍໍ ຍໍ ລທ຺ຘໍ ເຕນ ເຕເນວ ຍາປນຠາວໍ ນິສ຺ສາຍາຕິ ອຕ຺ໂຖ. ອຄ຺ໂຄຕິ ເຊຏ຺ຐໂກ. ເສສານິ ຕສ຺ເສວ ເວວຈນານິ.

ຄວາ ຂີຣນ຺ຕິ ຄາວິໂຕ ຂີຣໍ ນາມ ໂຫຕິ, ນ ວິນາ ຄາວິຍາ. ຂີຣມ຺ຫາ ທຘີຕິອາທີສຸປິ ເອເສວ ນໂຍ. ເອວເມວນ຺ຕິ ຍຖາ ເອເຕສຸ ປຎ຺ຈສຸ ໂຄຣເສສຸ ສປ຺ປິມຓ຺ໂຑ ອຄ຺ໂຄ; ເອວເມວໍ ອິເມສຸ ປຎ຺ຈສຸ ປິຓ຺ຑປາຕິເກສຸ ຍ຺ວາຍໍ ອປ຺ປິຈ຺ຉຕາທີນິ ນິສ຺ສາຍ ປິຓ຺ຑປາຕິໂກ ໂຫຕິ. ອຍໍ ອຄ຺ໂຄ ຈ ເສຏ຺ໂຐ ຈ ປາໂມກ຺ໂຂ ຈ ອຸຕ຺ຕໂມ ຈ ປວໂຣ ຈ. ອິເມສຸ ປນ ປຎ຺ຈສຸ ປິຓ຺ຑປາຕິເກສຸ ທ຺ເວວ ຊນາ ປິຓ຺ຑປາຕິກາ, ຕໂຍ ນ ປິຓ຺ຑປາຕິກາ. ນາມມຕ຺ເຕນ ປນ ປິຓ຺ຑປາຕິກາຕິ ເວທິຕພ຺ພາ. ຂລຸປຈ຺ຉາຠຕ຺ຕິກາທີສຸປິ ເອເສວ ນໂຍຕິ.

ປຎ຺ຈກນິທ຺ເທສວຓ຺ຓນາ.