໖. ອນຸຣຸທ຺ຘສຸຕ຺ຕວຓ຺ຓນາ

໔໖. ຉຏ຺ເຐ ເຍນາຍສ຺ມາ ອນຸຣຸທ຺ໂຘຕິ ຕາ ກິຣ ເທວຕາ ອຕ຺ຕໂນ ສມ຺ປຕ຺ຕິໍ ໂອໂລເກຕ຺ວາ ‘‘ກິໍ ນຸ ໂຂ ນິສ຺ສາຍ ອຍໍ ສມ຺ປຕ຺ຕິ ອມ຺ເຫຫິ ລທ຺ຘາ’’ຕິ ອາວຊ຺ຊມານາ ເຖຣໍ ທິສ຺ວາ ‘‘ມຍໍ ອມ຺ຫາກໍ ອຍ຺ຍສ຺ສ ປຸພ຺ເພ ຈກ຺ກວຕ຺ຕິຣຊ຺ຊໍ ກໂຣນ຺ຕສ຺ສ ປາທປຣິຈາຣິກາ ຫຸຕ຺ວາ ເຕນ ທິນ຺ໂນວາເທ ຐຕ຺ວາ ອິມໍ ສມ຺ປຕ຺ຕິໍ ລຠິມ຺ຫ, ຄຈ຺ຉາມ ເຖຣໍ ອາເນຕ຺ວາ ອິມໍ ສມ຺ປຕ຺ຕິໍ ອນຸຠວິສ຺ສາມາ’’ຕິ ທິວາ ເຍນາຍສ຺ມາ ອນຸຣຸທ຺ໂຘ ເຕນຸປສງ຺ກມິໍສຸ. ຕີສຸ ຐາເນສູຕິ ຕີສຸ ກາຣເຓສຸ. ຐານໂສ ປຏິລຠາມາຕິ ຂເຓເນວ ລຠາມ. ສຣນ຺ຕິ ວຈນສທ຺ທໍ ວາ ຄີຕສທ຺ທໍ ວາ ອາຠຣຓສທ຺ທໍ ວາ. ປີຕາ ອສ຺ສູຕິອາທີນິ ນີລາ ຕາວ ຊາຕາ, ປີຕາ ຠວິຕຸໍ ນ ສກ຺ຂິສ຺ສນ຺ຕີຕິອາທິນາ ນເຍນ ຈິນ຺ເຕຕ຺ວາ ວິຕກ຺ເກຕິ. ຕາປິ ‘‘ອິທານິ ອຍ຺ໂຍ ອມ຺ຫາກໍ ປີຕຠາວໍ ອິຈ຺ຉຕິ, ອິທານິ ໂລຫິຕຠາວ’’ນ຺ຕິ ຕາທິສາວ ອເຫສຸໍ.

ອຈ຺ຉຣໍ ວາເທສີຕິ ປາຓິຕລໍ ວາເທສິ. ປຎ຺ຈງ຺ຄິກສ຺ສາຕິ ອາຕຕໍ, ວິຕຕໍ, ອາຕຕວິຕຕໍ, ຆນໍ, ສຸສິຣນ຺ຕິ ອິເມຫິ ປຎ຺ຈຫິ ອງ຺ເຄຫິ ສມນ຺ນາຄຕສ຺ສ. ຕຕ຺ຖ ອາຕຕໍ ນາມ ຈມ຺ມປຣິໂຍນທ຺ເຘສຸ ເຠຣິອາທີສຸ ເອກຕລຕູຣິຍໍ, ວິຕຕໍ ນາມ ອຸຠຍຕລໍ, ອາຕຕວິຕຕໍ ນາມ ສພ຺ພໂສ ປຣິໂຍນທ຺ຘໍ, ສຸສິຣໍ ວໍສາທິ, ຆນໍ ສມ຺ມາທິ. ສຸວິນີຕສ຺ສາຕິ ອາກຑ຺ຒນສິຖິລກຣຓາທີຫິ ສມຸຈ຺ຉິຕສ຺ສ. ສຸປ຺ປຏິປຕາຬິຕສ຺ສາຕິ ປມາເຓ ຐິຕຠາວຊານນຕ຺ຖໍ ສຸຏ຺ຐຸ ປຏິປຕາຬິຕສ຺ສ. ກຸສເລຫິ ສຸສມນ຺ນາຫຕສ຺ສາຕິ ເຍ ວາເທຕຸໍ ກຸສລາ ເຉກາ, ເຕຫິ ວາທິຕສ຺ສ. ວຄ຺ຄູຕິ ເຉໂກ ສຸນ຺ທໂຣ. ຣຊນີໂຍຕິ ຣຎ຺ເຊຕຸໍ ສມຕ຺ໂຖ. ກມນີໂຍຕິ ກາເມຕພ຺ພຍຸຕ຺ໂຕ. ຂມນີໂຍຕິ ວາ ປາໂຐ, ທິວສມ຺ປິ ສຸຍ຺ຍມາໂນ ຂມເຕວ, ນ ນິພ຺ພິນ຺ທຕີຕິ ອຕ຺ໂຖ. ມທນີໂຍຕິ ມານມທປຸຣິສມທຊນໂນ. ອິນ຺ທ຺ຣິຍານິ ໂອກ຺ຂິປີຕິ ‘‘ອສາຣຸປ຺ປໍ ອິມາ ເທວຕາ ກໂຣນ຺ຕີ’’ຕິ ອິນ຺ທ຺ຣິຍານິ ເຫຏ຺ຐາ ຂິປິ, ນ ອກ຺ຂີນິ ອຸມ຺ມີເລຕ຺ວາ ໂອໂລເກສິ. ນ ຂ຺ວຍ຺ໂຍ ອນຸຣຸທ຺ໂຘ ສາທິຍຕີຕິ ‘‘ມຍໍ ນຈ຺ຈາມ ຄາຍາມ, ອຍ຺ໂຍ ປນ ອນຸຣຸທ຺ໂຘ ນ ໂຂ ສາທິຍຕິ, ອກ຺ຂີນິ ອຸມ຺ມີເລຕ຺ວາ ນ ໂອໂລເກຕິ, ກິໍ ມຍໍ ນຈ຺ຈິຕ຺ວາ ວາ ຄາຍິຕ຺ວາ ວາ ກຣິສ຺ສາມາ’’ຕິ ຕຕ຺ເຖວ ອນ຺ຕຣຘາຍິໍສຸ. ເຍນ ຠຄວາ ເຕນຸປສງ຺ກມີຕິ ຕາສໍ ເທວຕານໍ ອານຸຠາວໍ ທິສ຺ວາ ‘‘ກຕິຫິ ນຸ ໂຂ ຘມ຺ເມຫິ ສມນ຺ນາຄໂຕ ມາຕຸຄາໂມ ມນາປກາຍິເກ ເທວໂລເກ ນິພ຺ພຕ຺ຕຕີ’’ຕິ ອິມມຕ຺ຖໍ ປຸຈ຺ຉິຕຸໍ ອຸປສງ຺ກມິ.