(໑໑) ໑. ຜາສຸວິຫາຣວຄ຺ໂຄ

໑. ສາຣຊ຺ຊສຸຕ຺ຕວຓ຺ຓນາ

໑໐໑. ຕຕິຍສ຺ສ ປຐເມ ເວສາຣຊ຺ຊກຣຓາຕິ ວິສາຣທຠາວາວຫາ. ສາຣຊ຺ຊໍ ໂຫຕີຕິ ໂທມນສ຺ສໍ ໂຫຕິ.

໒. ອຸສ຺ສງ຺ກິຕສຸຕ຺ຕວຓ຺ຓນາ

໑໐໒. ທຸຕິເຍ ອຸສ຺ສງ຺ກິຕປຣິສງ຺ກິໂຕຕິ ອຸສ຺ສງ຺ກິໂຕ ຈ ປຣິສງ຺ກິໂຕ ຈ. ອປິ ອກຸປ຺ປຘມ຺ໂມປີຕິ ອປິ ອກຸປ຺ປຘມ຺ໂມ ຂີຓາສໂວ ສມາໂນປິ ປເຣຫິ ປາປຠິກ຺ຂູຫິ ອຸສ຺ສງ຺ກິຕປຣິສງ຺ກິໂຕ ໂຫຕີຕິ ອຕ຺ໂຖ. ເວສິຍາໂຄຈໂຣຕິອາທີສຸ ເວສິຍາ ວຸຈ຺ຈນ຺ຕິ ຣູປູປຊີວິນິໂຍ, ຕາ ໂຄຈໂຣ ອສ຺ສາຕິ ເວສິຍາໂຄຈໂຣ, ຕາສໍ ເຄຫໍ ອຠິຓ຺ຫຄມໂນຕິ ອຕ຺ໂຖ. ເສສປເທສຸປິ ເອເສວ ນໂຍ. ຕຕ຺ຖ ປນ ວິຘວາຕິ ມຕປຕິກາ. ຖຸລ຺ລກຸມາຣິກາຕິ ມຫລ຺ລິກກຸມາຣິກາໂຍ.

໓. ມຫາໂຈຣສຸຕ຺ຕວຓ຺ຓນາ

໑໐໓. ຕຕິເຍ ອິໂຕ ໂຠເຄນ ປຏິສນ຺ຖຣິສ຺ສາມີຕິ ອິໂຕ ມມ ສາປເຕຍ຺ຍໂຕ ໂຠຄໍ ຄເຫຕ຺ວາ ເຕນ ປຏິສນ຺ຖາຣໍ ກຣິສ຺ສາມິ, ຕສ຺ສ ຈ ມມ ຈ ອນ຺ຕຣໍ ປິທຫິສ຺ສາມີຕິ ອຕ຺ໂຖ. ຄຫຓານີຕິ ປຣສນ຺ຕການໍ ຠຓ຺ຑານໍ ຄຫຓານິ. ຄຸຍ຺ຫມນ຺ຕາຕິ ຄຸຫິຕພ຺ພມນ຺ຕາ. ອນ຺ຕຄ຺ຄາຫິກາຍາຕິ ສສ຺ສຕໍ ວາ ອຸຈ຺ເຉທໍ ວາ ຄເຫຕ຺ວາ ຐິຕາຍ. ເສສເມຕ຺ຖ ອຸຕ຺ຕານຕ຺ຖເມວ. ຈຕຸຕ຺ເຖ ສພ຺ພໍ ເຫຏ຺ຐາ ວຸຕ຺ຕນຍເມວ.

໕. ຜາສຸວິຫາຣສຸຕ຺ຕວຓ຺ຓນາ

໑໐໕. ປຎ຺ຈເມ ເມຕ຺ຕໍ ກາຍກມ຺ມນ຺ຕິ ເມຕ຺ຕຈິຕ຺ເຕນ ປວຕ຺ຕິຕໍ ກາຍກມ຺ມໍ. ອາວິ ເຈວ ຣໂຫ ຈາຕິ ສມ຺ມຸເຂ ເຈວ ປຣມ຺ມຸເຂ ຈ. ອິຕເຣສຸປິ ເອເສວ ນໂຍ. ຍານິ ຕານິ ສີລານີຕິອາທິ ຈຕຸປາຣິສຸທ຺ຘິສີລວເສນ ວຸຕ຺ຕໍ. ສມາຘິສໍວຕ຺ຕນິການີຕິ ມຄ຺ຄສມາຘິຜລສມາຘິນິພ຺ພຕ຺ຕການິ. ສີລສາມຎ຺ຎຄໂຕຕິ ສມານສີລຕໍ ຄໂຕ, ເອກສທິສສີໂລ ຫຸຕ຺ວາຕິ ອຕ຺ໂຖ. ຕກ຺ກຣສ຺ສາຕິ ໂຍ ນໍ ກໂຣຕິ, ຕສ຺ສ. ອິຕິ ອິມສ຺ມິໍ ສຸຕ຺ເຕ ສີລໍ ມິສ຺ສກໍ ກຖິຕໍ, ທິຏ຺ຐິ ວິປສ຺ສນາສມ຺ມາທິຏ຺ຐີຕິ.

໖. ອານນ຺ທສຸຕ຺ຕວຓ຺ຓນາ

໑໐໖. ຉຏ຺ເຐ ໂນ ຈ ປຣໍ ອຘິສີເລ ສມ຺ປວຕ຺ຕາ ໂຫຕີຕິ ປຣໍ ສີລຠາເວນ ນ ຄຣຫຕິ ນ ອຸປວທຕິ. ອຕ຺ຕານຸເປກ຺ຂີຕິ ອຕ຺ຕໂນວ ກຕາກຕໍ ຊານນວເສນ ອຕ຺ຕານໍ ອນຸເປກ຺ຂິຕາ. ໂນ ປຣານຸເປກ຺ຂີຕິ ປຣສ຺ສ ກຕາກເຕສຸ ອພ຺ຍາວໂຏ. ອປຎ຺ຎາໂຕຕິ ອປາກໂຏ ອປ຺ປປຸຎ຺ໂຎ. ອປຎ຺ຎາຕເກນາຕິ ອປຎ຺ຎາຕຠາເວນ ອປາກຏຕາຍ ມນ຺ທປຸຎ຺ຎຕາຍ. ໂນ ປຣິຕສ຺ສຕີຕິ ປຣິຕາສໍ ນາປຊ຺ຊຕິ. ອິຕິ ອິມສ຺ມິໍ ສຸຕ຺ເຕ ຂີຓາສໂວວ ກຖິໂຕ.

໗-໘. ສີລສຸຕ຺ຕາທິວຓ຺ຓນາ

໑໐໗-໑໐໘. ສຕ຺ຕເມ ສີລສມາຘິປຎ຺ຎາ ມິສ຺ສິກາ ກຖິຕາ, ວິມຸຕ຺ຕິ ອຣຫຕ຺ຕຜລໍ, ວິມຸຕ຺ຕິຎາຓທສ຺ສນໍ ປຈ຺ຈເວກ຺ຂຓຎາຓໍ ໂລກິຍເມວ. ອຏ຺ຐເມປິ ເອເສວ ນໂຍ. ປຈ຺ຈເວກ຺ຂຓຎາຓໍ ປເນຕ຺ຖ ອເສຂສ຺ສ ປວຕ຺ຕຕ຺ຕາ ອເສຂນ຺ຕິ ວຸຕ຺ຕໍ.

໙-໑໐. ຈາຕຸທ຺ທິສສຸຕ຺ຕາທິວຓ຺ຓນາ

໑໐໙-໑໑໐. ນວເມ ຈາຕຸທ຺ທິໂສຕິ ຈຕູສຸ ທິສາສຸ ອປ຺ປຏິຫຕຈາໂຣ. ອິມສ຺ມິມ຺ປິ ສຸຕ຺ເຕ ຂີຓາສໂວວ ກຖິໂຕ. ທສເມ ອລນ຺ຕິ ຍຸຕ຺ໂຕ. ອິຘາປິ ຂີຓາສໂວວ ກຖິໂຕ.

ຜາສຸວິຫາຣວຄ຺ໂຄ ປຐໂມ.