໕. ມຸຓ຺ຑຣາຊວຄ຺ໂຄ

໑. ອາທິຍສຸຕ຺ຕວຓ຺ຓນາ

໔໑. ປຎ຺ຈມສ຺ສ ປຐເມ ໂຠຄານໍ ອາທິຍາຕິ ໂຠຄານໍ ອາທາຕພ຺ພກາຣຓານິ. ອຸຏ຺ຐານວີຣິຍາຘິຄເຕຫີຕິ ອຸຏ຺ຐານສງ຺ຂາເຕນ ວີຣິເຍນ ອຘິຄເຕຫິ. ພາຫາພລປຣິຈິເຕຫີຕິ ພາຫຸພເລນ ສຎ຺ຈິເຕຫິ. ເສທາວກ຺ຂິຕ຺ເຕຫີຕິ ເສທໍ ອວກ຺ຂິເປຕ຺ວາ ອຸປ຺ປາທິເຕຫິ. ຘມ຺ມິເກຫີຕິ ຘມ຺ມຍຸຕ຺ເຕຫິ. ຘມ຺ມລທ຺ເຘຫີຕິ ທສກຸສລກມ຺ມໍ ອໂກເປຕ຺ວາ ລທ຺ເຘຫິ. ປີເຓຕີຕິ ປີຓິຕໍ ຖູລໍ ກໂຣຕິ. ເສສເມຕ຺ຖ ຈຕຸກ຺ກນິປາເຕ ວຸຕ຺ຕນເຍເນວ ເວທິຕພ຺ພໍ. ທຸຕິຍໍ ອຸຕ຺ຕານຕ຺ຖເມວ.

໓. ອິຏ຺ຐສຸຕ຺ຕວຓ຺ຓນາ

໔໓. ຕຕິເຍ ອາຍຸສໍວຕ຺ຕນິກາ ປຏິປທາຕິ ທານສີລາທິກາ ປຸຎ຺ຎປຏິປທາ. ເສເສສຸປິ ເອເສວ ນໂຍ. ອຕ຺ຖາຠິສມຍາຕິ ອຕ຺ຖສ຺ສ ອຠິສມາຄເມນ, ອຕ຺ຖປ຺ປຏິລາເຠນາຕິ ວຸຕ຺ຕໍ ໂຫຕິ.

໔. ມນາປທາຍີສຸຕ຺ຕວຓ຺ຓນາ

໔໔. ຈຕຸຕ຺ເຖ ອຸຄ຺ໂຄຕິ ຄຸເຓຫິ ອຸຄ຺ຄຕຕ຺ຕາ ເອວໍລທ຺ຘນາໂມ. ສາລປຸປ຺ຜກໍ ຂາທນີຍນ຺ຕິ ຈຕຸມຘຸຣໂຍຊິເຕນ ສາລິປິຏ຺ເຐນ ກຕໍ ສາລປຸປ຺ຜສທິສໍ ຂາທນີຍໍ. ຕຎ຺ຫິ ປຎ຺ຎາຍມານວຓ຺ຏປຕ຺ຕເກສຣໍ ກຕ຺ວາ ຊີຣກາທິສມ຺ຠາຣຍຸຕ຺ເຕ ສປ຺ປິມ຺ຫິ ປຈິຕ຺ວາ ສປ຺ປິໍ ວິນິວຕ຺ເຕຕ຺ວາ ໂກລຸມ຺ເພ ປູເຣຕ຺ວາ ຄນ຺ຘວາສໍ ຄາຫາເປຕ຺ວາ ປິທຫິຕ຺ວາ ລຎ຺ເຉຕ຺ວາ ຐປິຕໍ ໂຫຕິ. ຕໍ ໂສ ຍາຄຸໍ ປິວິຕ຺ວາ ນິສິນ຺ນສ຺ສ ຠຄວໂຕ ອນ຺ຕຣຠຕ຺ເຕ ທາຕຸກາໂມ ເອວມາຫ. ປຏິຄ຺ຄເຫສິ ຠຄວາຕິ ເທສນາມຕ຺ຕເມຕໍ, ອຸປາສໂກ ປນ ຕໍ ຠຄວໂຕ ຈ ປຎ຺ຈນ຺ນຎ຺ຈ ຠິກ຺ຂຸສຕານໍ ອທາສິ. ຍຖາ ຈ ຕໍ, ເອວໍ ສູກຣມໍສາທີນິປິ. ຕຕ຺ຖ ສມ຺ປນ຺ນໂກລກນ຺ຕິ ສມ຺ປນ຺ນພທຣໍ. ສູກຣມໍສນ຺ຕິ ມຘຸຣຣເສຫິ ພທເຣຫິ ສທ຺ຘິໍ ຊີຣກາທິສມ຺ຠາເຣຫິ ໂຍເຊຕ຺ວາ ປກ຺ກໍ ເອກສໍວຈ຺ຉຣິກສູກຣມໍສໍ. ນິພ຺ພຕ຺ຕເຕລກນ຺ຕິ ວິນິວຕ຺ຕິຕເຕລໍ. ນາລິຍສາກນ຺ຕິ ສາລິປິຏ຺ເຐນ ສທ຺ຘິໍ ມທ຺ທິຕ຺ວາ ຊີຣກາທິສໍຍຸຕ຺ເຕ ສປ຺ປິມ຺ຫິ ປຈິຕ຺ວາ ຈຕຸມຘຸເຣນ ໂຍເຊຕ຺ວາ ວາສໍ ຄາຫາເປຕ຺ວາ ຐປິຕໍ ນາລິຍສາກໍ. ເນຕໍ ຠຄວໂຕ ກປ຺ປຕີຕິ ເອຕ຺ຖ ອກປ຺ປິຍໍ ອຸປາທາຍ ກປ຺ປິຍມ຺ປິ ນ ກປ຺ປຕີຕິ ວຸຕ຺ຕໍ, ເສຏ຺ຐິ ປນ ສພ຺ພມ຺ປິ ຕໍ ອາຫຣາເປຕ຺ວາ ຣາສິໍ ກຕ຺ວາ ຍໍ ຍໍ ອກປ຺ປິຍໍ, ຕໍ ຕໍ ອນ຺ຕຣາປຓໍ ປຫິຓິຕ຺ວາ ກປ຺ປິຍໍ ອຸປໂຠຄປຣິໂຠຄຠຓ຺ຑໍ ອທາສິ. ຈນ຺ທນຜລກໍ ນາຕິມຫນ຺ຕໍ ທີຆໂຕ ອຑ຺ຒເຕຍ຺ຍຣຕນໍ, ຕິຣິຍໍ ທິຍຑ຺ຒຣຕນໍ, ສາຣວຣຠຓ຺ຑຕ຺ຕາ ປນ ມຫຄ຺ຆໍ ອໂຫສິ. ຠຄວາ ຕໍ ປຏິຄ຺ຄເຫຕ຺ວາ ຂຓ຺ຑາຂຓ຺ຑິກໍ ເຉທາເປຕ຺ວາ ຠິກ຺ຂູນໍ ອຎ຺ຊນປິສນຕ຺ຖາຍ ທາເປສິ.

ອຸຊ຺ຊຸຠູເຕສູຕິ ກາຍວາຈາຈິຕ຺ເຕຫິ ອຸຊຸເກສຸ. ຉນ຺ທສາຕິ ເປເມນ. ຈຕ຺ຕນ຺ຕິອາທີສຸ ປຣິຈ຺ຈາຄວເສນ ຈຕ຺ຕໍ. ມຸຕ຺ຕຈາຄຕາຍ ມຸຕ຺ຕໍ. ອນເປກ຺ຂຈິຕ຺ຕຕາຍ ຈິຕ຺ເຕນ ນ ອຸຄ຺ຄຫິຕນ຺ຕິ ອນຸຄ຺ຄຫີຕໍ. ເຂຕ຺ຕູປເມຕິ ວິຣຸຫນຏ຺ເຐນ ເຂຕ຺ຕສທິເສ.

ອຎ຺ຎຕຣໍ ມໂນມຍນ຺ຕິ ສຸທ຺ຘາວາເສສຸ ເອກໍ ຌານມເນນ ນິພ຺ພຕ຺ຕໍ ເທວກາຍໍ. ຍຖາຘິປ຺ປາໂຍຕິ ຍຖາຊ຺ຌາສໂຍ. ອິມິນາ ກິໍ ປຸຈ຺ຉຕິ? ຕສ຺ສ ກິຣ ມນຸສ຺ສກາເລ ອຣຫຕ຺ຕຕ຺ຖາຍ ອຊ຺ຌາສໂຍ ອໂຫສິ, ຕໍ ປຸຈ຺ຉາມີຕິ ປຸຈ຺ຉຕິ. ເທວປຸຕ຺ໂຕປິ ອຣຫຕ຺ຕໍ ປຕ຺ຕຕາຍ ຕຄ຺ຆ ເມ ຠຄວາ ຍຖາຘິປ຺ປາໂຍຕິ ອາຫ. ຍຕ຺ຖ ຍຕ຺ຖູປປຊ຺ຊຕີຕິ ຕີສຸ ວາ ກຸລສມ຺ປຕ຺ຕີສຸ ຉສຸ ວາ ກາມສຄ຺ເຄສຸ ຍຕ຺ຖ ຍຕ຺ຖ ອຸປ຺ປຊ຺ຊຕິ, ຕຕ຺ຖ ຕຕ຺ຖ ທີຆາຍຸ ຍສວາ ໂຫຕີຕິ. ປຎ຺ຈມໍ ຈຕຸກ຺ກນິປາເຕ ວຸຕ຺ຕນເຍເນວ ເວທິຕພ຺ພໍ. ຉຏ຺ຐສຕ຺ຕມານິ ອຸຕ຺ຕານຕ຺ຖາເນວ.

໘. ອລພ຺ຠນີຍຐານສຸຕ຺ຕວຓ຺ຓນາ

໔໘. ອຏ຺ຐເມ ອລພ຺ຠນີຍານີຕິ ອລທ຺ຘພ຺ພານິ, ນ ສກ຺ກາ ລຠິຕຸໍ. ຐານານີຕິ ກາຣຓານິ. ຊຣາຘມ຺ມໍ ມາ ຊີຣີຕິ ຍໍ ມຍ຺ຫໍ ຊຣາສຠາວໍ, ຕໍ ມາ ຊີຣຕຸ. ເສສປເທສຸປິ ເອເສວ ນໂຍ. ນຈ຺ຉາເທຍ຺ຍາຕິ ນ ຣຸຈ຺ເຈຍ຺ຍ. ອພ຺ພຸຫີຕິ ນີຫຣິ.

ຍໂຕຕິ ຍສ຺ມິໍ ກາເລ. ອາປທາສູຕິ ອຸປທ຺ທເວສຸ. ນ ເວຘຕີຕິ ນ ກມ຺ປຕິ ນານຸໂສຈຕິ. ອຕ຺ຖວິນິຈ຺ຉຍຎ຺ຎູຕິ ກາຣຓຕ຺ຖວິນິຈ຺ຉເຍ ກຸສໂລ. ປຸຣາຓນ຺ຕິ ນິພ຺ພິກາຣຕາຍ ໂປຣາຓກເມວ. ຊປ຺ເປນາຕິ ວຓ຺ຓຠຓເນນ. ມນ຺ເຕນາຕິ ມຫານຸຠາວມນ຺ຕປຣິວຕ຺ຕເນນ. ສຸຠາສິເຕນາຕິ ສຸຠາສິຕກຖເນນ. ອນຸປ຺ປທາເນນາຕິ ສຕສ຺ສ ວາ ສຫສ຺ສສ຺ສ ວາ ທາເນນ. ປເວຓິຍາ ວາຕິ ກຸລວໍເສນ ວາ, ‘‘ອິທໍ ອມ຺ຫາກໍ ປເວຓິຍາ ອາຈິຓ຺ຓໍ, ອິທໍ ອນາຈິຓ຺ຓ’’ນ຺ຕິ ເອວໍ ປເວຓິກຖເນນາຕິ ອຕ຺ໂຖ. ຍຖາ ຍຖາ ຍຕ຺ຖ ລເຠຖ ອຕ຺ຖນ຺ຕິ ເອເຕສຸ ຊປ຺ປາທີສຸ ເຍນ ເຍນ ຍຕ຺ຖ ຍຕ຺ຖ ຐາເນ ຊຣາຘມ຺ມາທີນໍ ອຊີຣຓຕາທິອຕ຺ຖໍ ລເຠຍ຺ຍ. ຕຖາ ຕຖາ ຕຕ຺ຖ ປຣກ຺ກເມຍ຺ຍາຕິ ເຕນ ເຕນ ຕສ຺ມິໍ ຕສ຺ມິໍ ຐາເນ ປຣກ຺ກມໍ ກເຣຍ຺ຍ. ກມ຺ມໍ ທຬ຺ຫນ຺ຕິ ວຏ຺ຏຄາມິກມ຺ມໍ ມຍາ ຖິຣໍ ກຕ຺ວາ ອາຍູຫິຕໍ, ສ຺ວາຫໍ ອິທານິ ກິນ຺ຕິ ກໂຣມີຕິ ເອວໍ ປຈ຺ຈເວກ຺ຂິຕ຺ວາ ອຘິວາເສຍ຺ຍາຕິ.

໙. ໂກສລສຸຕ຺ຕວຓ຺ຓນາ

໔໙. ນວເມ ອຸປກຓ຺ຓເກຕິ ກຓ຺ຓມູເລ. ທຸມ຺ມໂນຕິ ທຸຏ຺ຐຸມໂນ. ປຕ຺ຕກ຺ຂນ຺ໂຘຕິ ປຕິຕກ຺ຂນ຺ໂຘ. ປຊ຺ຌາຍນ຺ໂຕຕິ ຈິນ຺ຕຍນ຺ໂຕ. ອປ຺ປຏິຠາໂນຕິ ນິປ຺ປຏິຠາໂນ ຫຸຕ຺ວາ. ເສສໍ ເຫຏ຺ຐາ ວຸຕ຺ຕນຍເມວ.

໑໐. ນາຣທສຸຕ຺ຕວຓ຺ຓນາ

໕໐. ທສເມ ອຊ຺ໂຌມຸຈ຺ຉິໂຕຕິ ອຘິໂອມຸຈ຺ຉິໂຕ ຄິລິຕ຺ວາ ປຣິນິຏ຺ຐເປຕ຺ວາ ຄຫຓສຠາວາຍ ອຕິເຣກມຸຈ຺ຉາຍ ຕຓ຺ຫາຍ ສມນ຺ນາຄໂຕ. ມຫຈ຺ຈາ ຣາຊານຸຠາເວນາຕິ ມຫຕາ ຣາຊານຸຠາເວນ, ອຏ຺ຐາຣສຫິ ເສນີຫິ ປຣິວາຣິໂຕ ມຫຕິຍາ ຣາຊິທ຺ຘິຍາ ປາຍາສີຕິ ອຕ຺ໂຖ. ຕຄ຺ຆາຕິ ເອກໍສຕ຺ເຖ ນິປາໂຕ, ເອກໍເສເນວ ໂສກສລ຺ລຫຣໂຓຕິ ອຕ຺ໂຖ. ອິຕິ ຣາຊາ ອິມໍ ໂອວາທໍ ສຸຕ຺ວາ ຕສ຺ມິໍ ຐິໂຕ ຘມ຺ເມນ ສເມນ ຣຊ຺ຊໍ ກາເຣຕ຺ວາ ສຄ຺ຄປຣາຍໂຓ ອໂຫສິ.

ມຸຓ຺ຑຣາຊວຄ຺ໂຄ ປຎ຺ຈໂມ.