໓. ປຎ຺ຈງ຺ຄິກວຄ຺ໂຄ

໑. ປຐມອຄາຣວສຸຕ຺ຕວຓ຺ຓນາ

໒໑. ຕຕິຍສ຺ສ ປຐເມ ອສຠາຄວຸຕ຺ຕິໂກຕິ ອສຠາຄາຍ ວິສທິສາຍ ຊີວິຕວຸຕ຺ຕິຍາ ສມນ຺ນາຄໂຕ. ອາຠິສມາຈາຣິກໍ ຘມ຺ມນ຺ຕິ ອຸຕ຺ຕມສມາຈາຣຠູຕໍ ວຕ຺ຕວເສນ ປຎ຺ຎຕ຺ຕສີລໍ. ເສຂໍ ຘມ຺ມນ຺ຕິ ເສຂປຓ຺ຓຕ຺ຕິສີລໍ. ສີລານີຕິ ຈຕ຺ຕາຣິ ມຫາສີລານິ. ສມ຺ມາທິຏ຺ຐິນ຺ຕິ ວິປສ຺ສນາສມ຺ມາທິຏ຺ຐິໍ. ສມ຺ມາສມາຘິນ຺ຕິ ມຄ຺ຄສມາຘິຎ຺ເຈວ ຜລສມາຘິຎ຺ຈ. ອິມສ຺ມິໍ ສຸຕ຺ເຕ ສີລາທີນິ ມິສ຺ສການິ ກຖິຕານິ.

໒. ທຸຕິຍອຄາຣວສຸຕ຺ຕວຓ຺ຓນາ

໒໒. ທຸຕິເຍ ສີລກ຺ຂນ຺ຘນ຺ຕິ ສີລຣາສິໍ. ເສສທ຺ວເຍປິ ເອເສວ ນໂຍ. ອິເມ ປນ ຕໂຍປິ ຂນ຺ຘາ ມິສ຺ສກາວ ກຖິຕາຕິ.

໓. ອຸປກ຺ກິເລສສຸຕ຺ຕວຓ຺ຓນາ

໒໓. ຕຕິເຍ ນ ຈ ປຠສ຺ສຣນ຺ຕິ ນ ຈ ປຠາວນ຺ຕໍ. ປຠງ຺ຄຸ ຈາຕິ ປຠິຊ຺ຊນສຠາວໍ. ອໂຍຕິ ກາຬໂລຫໍ. ໂລຫນ຺ຕິ ຐເປຕ຺ວາ ອິຘ ວຸຕ຺ຕານິ ຈຕ຺ຕາຣິ ອວເສສໍ ໂລຫໍ. ສຊ຺ຌນ຺ຕິ ຣຊຕໍ. ຈິຕ຺ຕສ຺ສາຕິ ຈາຕຸຠູມກກຸສລຈິຕ຺ຕສ຺ສ. ເຕຠູມກສ຺ສ ຕາວ ອຸປກ຺ກິເລສາ ໂຫນ຺ຕຸ, ໂລກຸຕ຺ຕຣສ຺ສ ກຖໍ ໂຫນ຺ຕີຕິ? ອຸປ຺ປຊ຺ຊິຕຸໍ ອປ຺ປທາເນນ. ຍທຄ຺ເຄນ ຫິ ອຸປ຺ປຊ຺ຊິຕຸໍ ນ ເທນ຺ຕິ, ຕທຄ຺ເຄເນວ ເຕ ໂລກິຍສ຺ສປິ ໂລກຸຕ຺ຕຣສ຺ສປິ ອຸປກ຺ກິເລສາ ນາມ ໂຫນ຺ຕິ. ປຠງ຺ຄຸ ຈາຕິ ອາຣມ຺ມເຓ ຈຸຓ຺ຓວິຈຸຓ຺ຓຠາວູປຄມເນນ ຠິຊ຺ຊນສຠາວໍ. ສມ຺ມາ ສມາຘິຍຕິ ອາສວານໍ ຂຍາຍາຕິ ອາສວານໍ ຂຍສງ຺ຂາຕສ຺ສ ອຣຫຕ຺ຕສ຺ສ ອຕ຺ຖາຍ ເຫຕຸນາ ກາຣເຓນ ສມາຘິຍຕິ. ເອຕ຺ຕາວຕາ ຈິຕ຺ຕໍ ວິໂສເຘຕ຺ວາ ອຣຫຕ຺ເຕ ປຕິຏ຺ຐິຕໍ ຂີຓາສວໍ ທສ຺ເສຕິ. ອິທານິສ຺ສ ອຠິຎ຺ຎາປຏິເວຘໍ ທສ຺ເສນ຺ໂຕ ຍສ຺ສ ຍສ຺ສ ຈາຕິອາທິມາຫ. ຕໍ ອຸຕ຺ຕານຕ຺ຖເມວາຕິ.

໔. ທຸສ຺ສີລສຸຕ຺ຕວຓ຺ຓນາ

໒໔. ຈຕຸຕ຺ເຖ ຫຕູປນິໂສຕິ ຫຕອຸປນິສ຺ສໂຍ ຫຕກາຣໂຓ. ຍຖາຠູຕຎາຓທສ຺ສນນ຺ຕິ ນາມຣູປປຣິຈ຺ເຉທຎາຓໍ ອາທິໍ ກຕ຺ວາ ຕຣຸຓວິປສ຺ສນາ. ນິພ຺ພິທາວິຣາໂຄຕິ ນິພ຺ພິທາ ຈ ວິຣາໂຄ ຈ. ຕຕ຺ຖ ນິພ຺ພິທາ ພລວວິປສ຺ສນາ, ວິຣາໂຄ ມຄ຺ໂຄ. ວິມຸຕ຺ຕິຎາຓທສ຺ສນນ຺ຕິ ຜລວິມຸຕ຺ຕິ ຈ ປຈ຺ຈເວກ຺ຂຓຎາຓຎ຺ຈ.

໕. ອນຸຄ຺ຄຫິຕສຸຕ຺ຕວຓ຺ຓນາ

໒໕. ປຎ຺ຈເມ ສມ຺ມາທິຏ຺ຐີຕິ ວິປສ຺ສນາສມ຺ມາທິຏ຺ຐິ. ເຈໂຕວິມຸຕ຺ຕິຜລາຕິອາທີສຸ ເຈໂຕວິມຸຕ຺ຕີຕິ ມຄ຺ຄຜລສມາຘິ. ປຎ຺ຎາວິມຸຕ຺ຕີຕິ ຜລຎາຓໍ. ສີລານຸຄ຺ຄຫິຕາຕິ ສີເລນ ອນຸຄ຺ຄຫິຕາ ອນຸຣກ຺ຂິຕາ. ສຸຕານຸຄ຺ຄຫິຕາຕິ ພາຫຸສຈ຺ເຈນ ອນຸຄ຺ຄຫິຕາ. ສາກຈ຺ຉານຸຄ຺ຄຫິຕາຕິ ຘມ຺ມສາກຈ຺ຉາຍ ອນຸຄ຺ຄຫິຕາ. ສມຖານຸຄ຺ຄຫິຕາຕິ ຈິຕ຺ເຕກຄ຺ຄຕາຍ ອນຸຄ຺ຄຫິຕາ.

ອິມສ຺ສ ປນຕ຺ຖສ຺ສ ອາວິຠາວຕ຺ຖໍ ມຘຸຣມ຺ພພີຊໍ ໂຣເປຕ຺ວາ ສມນ຺ຕາ ມຣິຍາທໍ ພນ຺ຘິຕ຺ວາ ກາລານຸກາລໍ ອຸທກໍ ອາສິຎ຺ຈິຕ຺ວາ ກາລານຸກາລໍ ມູລານິ ໂສເຘຕ຺ວາ ກາລານຸກາລໍ ປຕິຕປາຓເກ ຫາເຣຕ຺ວາ ກາລານຸກາລໍ ມກ຺ກຏຊາລໍ ລຸຎ຺ຈິຕ຺ວາ ອມ຺ພໍ ປຏິຊຄ຺ຄນ຺ໂຕ ປຸຣິໂສ ທສ຺ເສຕພ຺ໂພ. ຕສ຺ສ ຫິ ປຸຣິສສ຺ສ ມຘຸຣມ຺ພພີຊໂຣປນໍ ວິຍ ວິປສ຺ສນາສມ຺ມາທິຏ຺ຐິ ທຏ຺ຐພ຺ພາ, ມຣິຍາທພນ຺ຘນໍ ວິຍ ສີເລນ ອນຸຄ຺ຄຓ຺ຫນໍ, ອຸທກາເສຈນໍ ວິຍ ສຸເຕນ ອນຸຄ຺ຄຓ຺ຫນໍ, ມູລປຣິໂສຘນໍ ວິຍ ສາກຈ຺ຉາຍ ອນຸຄ຺ຄຓ຺ຫນໍ, ປາຓກຫຣຓໍ ວິຍ ຌານວິປສ຺ສນາປາຣິປນ຺ຖິກໂສຘນວເສນ ສມຖານຸຄ຺ຄຓ຺ຫນໍ, ມກ຺ກຏຊາລລຸຎ຺ຈນໍ ວິຍ ພລວວິປສ຺ສນານຸຄ຺ຄຓ຺ຫນໍ, ເອວໍ ອນຸຄ຺ຄຫິຕສ຺ສ ຣຸກ຺ຂສ຺ສ ຂິປ຺ປເມວ ວຑ຺ຒິຕ຺ວາ ຜລປ຺ປທານໍ ວິຍ ອິເມຫິ ສີລາທີຫິ ອນຸຄ຺ຄຫິຕາຍ ມູລສມ຺ມາທິຏ຺ຐິຍາ ຂິປ຺ປເມວ ມຄ຺ຄວເສນ ວຑ຺ຒິຕ຺ວາ ເຈໂຕວິມຸຕ຺ຕິປຎ຺ຎາວິມຸຕ຺ຕິຜລປ຺ປທານໍ ເວທິຕພ຺ພໍ.

໖. ວິມຸຕ຺ຕາຍຕນສຸຕ຺ຕວຓ຺ຓນາ

໒໖. ຉຏ຺ເຐ ວິມຸຕ຺ຕາຍຕນານີຕິ ວິມຸຈ຺ຈນກາຣຓານິ. ຍຕ຺ຖາຕິ ເຍສຸ ວິມຸຕ຺ຕາຍຕເນສຸ. ສຕ຺ຖາ ຘມ຺ມໍ ເທເສຕີຕິ ຈຕຸສຈ຺ຈຘມ຺ມໍ ເທເສຕິ. ອຕ຺ຖປຏິສໍເວທິໂນຕິ ປາຬິອຕ຺ຖໍ ຊານນ຺ຕສ຺ສ. ຘມ຺ມປຏິສໍເວທິໂນຕິ ປາຬິໍ ຊານນ຺ຕສ຺ສ. ປາໂມຊ຺ຊນ຺ຕິ ຕຣຸຓປີຕິ. ປີຕີຕິ ຕຸຏ຺ຐາກາຣຠູຕາ ພລວປີຕິ. ກາໂຍຕິ ນາມກາໂຍ. ປສ຺ສມ຺ຠຕີຕິ ປຏິປ຺ປສ຺ສມ຺ຠຕິ. ສຸຂໍ ເວເທຕີຕິ ສຸຂໍ ປຏິລຠຕິ. ຈິຕ຺ຕໍ ສມາຘິຍຕີຕິ ອຣຫຕ຺ຕຜລສມາຘິນາ ສມາຘິຍຕິ. ອຍຎ຺ຫິ ຕໍ ຘມ຺ມໍ ສຸຓນ຺ໂຕ ອາຄຕາຄຕຏ຺ຐາເນ ຌານວິປສ຺ສນາມຄ຺ຄຜລານິ ຊານາຕິ, ຕສ຺ສ ເອວໍ ຊານໂຕ ປີຕິ ອຸປ຺ປຊ຺ຊຕິ. ໂສ ຕສ຺ສາ ປີຕິຍາ ອນ຺ຕຣາ ໂອສກ຺ກິຕຸໍ ນ ເທນ຺ໂຕ ອຸປຈາຣກມ຺ມຏ຺ຐານິໂກ ຫຸຕ຺ວາ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ປາປຸຓາຕິ. ຕໍ ສນ຺ຘາຍ ວຸຕ຺ຕໍ – ‘‘ຈິຕ຺ຕໍ ສມາຘິຍຕີ’’ຕິ. ເສເສສຸປິ ເອເສວ ນໂຍ. ອຍໍ ປນ ວິເສໂສ – ສມາຘິນິມິຕ຺ຕນ຺ຕິ ອຏ຺ຐຕິໍສາຍ ອາຣມ຺ມເຓສຸ ອຎ຺ຎຕໂຣ ສມາຘິເຍວ ສມາຘິນິມິຕ຺ຕໍ. ສຸຄ຺ຄຫິຕໍ ໂຫຕີຕິອາທິສຸ ອາຈຣິຍສ຺ສ ສນ຺ຕິເກ ກມ຺ມຏ຺ຐານໍ ອຸຄ຺ຄຓ຺ຫນ຺ເຕນ ສຸຏ຺ຐຸ ຄຫິຕໍ ໂຫຕິ ສຸຏ຺ຐຸ ມນສິກຕໍ ສຸຏ຺ຐຸ ອຸປຘາຣິຕໍ. ສຸປ຺ປຏິວິທ຺ຘໍ ປຎ຺ຎາຍາຕິ ປຎ຺ຎາຍ ສຸຏ຺ຐຸ ປຈ຺ຈກ຺ຂໍ ກຕໍ. ຕສ຺ມິໍ ຘມ຺ເມຕິ ຕສ຺ມິໍ ກມ຺ມຏ຺ຐານປາຬິຘມ຺ເມ. ອິຕິ ອິມສ຺ມິໍ ສຸຕ຺ເຕ ປຎ຺ຈປິ ວິມຸຕ຺ຕາຍຕນານິ ອຣຫຕ຺ຕໍ ປາເປຕ຺ວາ ກຖິຕານີຕິ.

໗. ສມາຘິສຸຕ຺ຕວຓ຺ຓນາ

໒໗. ສຕ຺ຕເມ ອປ຺ປມາຓນ຺ຕິ ປມາຓກຣຘມ຺ມຣຫິຕໍ ໂລກຸຕ຺ຕຣໍ. ນິປກາ ປຕິສ຺ສຕາຕິ ເນປກ຺ເກນ ຈ ສຕິຍາ ຈ ສມນ຺ນາຄຕາ ຫຸຕ຺ວາ. ປຎ຺ຈ ຎາຓານີຕິ ປຎ຺ຈ ປຈ຺ຈເວກ຺ຂຓຎາຓານິ. ປຈ຺ຈຕ຺ຕຎ຺ເຎວ ອຸປ຺ປຊ຺ຊນ຺ຕີຕິ ອຕ຺ຕນິເຍວ ອຸປ຺ປຊ຺ຊນ຺ຕິ. ອຍໍ ສມາຘິ ປຈ຺ຈຸປ຺ປນ຺ນສຸໂຂ ເຈວາຕິອາທີສຸ ອຣຫຕ຺ຕຜລສມາຘິ ອຘິປ຺ເປໂຕ. ມຄ຺ຄສມາຘີຕິປິ ວທນ຺ຕິເຍວ. ໂສ ຫິ ອປ຺ປິຕປ຺ປິຕກ຺ຂເຓ ສຸຂຕ຺ຕາ ປຈ຺ຈຸປ຺ປນ຺ນສຸໂຂ, ປຸຣິໂມ ປຸຣິໂມ ປຈ຺ຉິມສ຺ສ ປຈ຺ຉິມສ຺ສ ສມາຘິສຸຂສ຺ສ ປຈ຺ຈຍຕ຺ຕາ ອາຍຕິໍ ສຸຂວິປາໂກ, ກິເລເສຫິ ອາຣກຕ຺ຕາ ອຣິໂຍ, ກາມາມິສວຏ຺ຏາມິສໂລກາມິສານໍ ອຠາວາ ນິຣາມິໂສ. ພຸທ຺ຘາທີຫິ ມຫາປຸຣິເສຫິ ເສວິຕຕ຺ຕາ ອກາປຸຣິສເສວິໂຕ. ອງ຺ຄສນ຺ຕຕາຍ ອາຣມ຺ມຓສນ຺ຕຕາຍ ສພ຺ພກິເລສທຣຖສນ຺ຕຕາຍ ຈ ສນ຺ໂຕ, ອຕປ຺ປນິຍຏ຺ເຐນ ປຓີໂຕ. ກິເລສປ຺ປຏິປ຺ປສ຺ສທ຺ຘິຍາ ລທ຺ຘຕ຺ຕາ ກິເລສປ຺ປຏິປ຺ປສ຺ສທ຺ຘິຠາວໍ ວາ ລທ຺ຘຕ຺ຕາ ປຏິປ຺ປສ຺ສທ຺ຘລທ຺ໂຘ. ປຏິປ຺ປສ຺ສທ຺ຘໍ ປຏິປ຺ປສ຺ສທ຺ຘີຕິ ຫິ ອິທໍ ອຕ຺ຖໂຕ ເອກໍ. ປຏິປ຺ປສ຺ສທ຺ຘກິເລເສນ ວາ ອຣຫຕາ ລທ຺ຘຕ຺ຕາປິ ປຏິປ຺ປສ຺ສທ຺ຘລທ຺ໂຘ, ເອໂກທິຠາເວນ ອຘິຄຕຕ຺ຕາ ເອໂກທິຠາວເມວ ວາ ອຘິຄຕຕ຺ຕາ ເອໂກທິຠາວາຘິຄໂຕ. ອປ຺ປຄຸຓສາສວສມາຘິ ວິຍ ສສງ຺ຂາເຣນ ສປ຺ປໂຍເຄນ ຈິຕ຺ເຕນ ປຈ຺ຈນີກຘມ຺ເມ ນິຄ຺ຄຍ຺ຫ ກິເລເສ ວາເຣຕ຺ວາ ອນຘິຄຕຕ຺ຕາ ນ ສສງ຺ຂາຣນິຄ຺ຄຍ຺ຫວາຣິຕຄໂຕ. ຕໍ ສມາຘິໍ ສມາປຊ຺ຊນ຺ໂຕ ຕໂຕ ວາ ວຸຏ຺ຐຫນ຺ໂຕ ສຕິເວປຸລ຺ລປ຺ປຕ຺ຕຕ຺ຕາ ສໂຕວ ສມາປຊ຺ຊຕິ, ສໂຕວ ວຸຏ຺ຐຫຕິ. ຍຖາປຣິຈ຺ຉິນ຺ນກາລວເສນ ວາ ສໂຕ ສມາປຊ຺ຊຕິ, ສໂຕ ວຸຏ຺ຐຫຕິ. ຕສ຺ມາ ຍເທຕ຺ຖ ‘‘ອຍໍ ສມາຘິ ປຈ຺ຈຸປ຺ປນ຺ນສຸໂຂ ເຈວ ອາຍຕິຎ຺ຈ ສຸຂວິປາໂກ ຈາ’’ຕິ ເອວໍ ປຈ຺ຈເວກ຺ຂມານສ຺ສ ປຈ຺ຈຕ຺ຕໍເຍວ ອປຣປ຺ປຈ຺ຈຍຎາຓໍ ອຸປ຺ປຊ຺ຊຕິ, ຕໍ ເອກໍ ຎາຓໍ. ເອເສວ ນໂຍ ເສເສສຸ. ເອວໍ ອິມານິ ປຎ຺ຈ ຎາຓານິ ປຈ຺ຈຕ຺ຕຎ຺ເຎວ ອຸປ຺ປຊ຺ຊນ຺ຕີຕິ.

໘. ປຎ຺ຈງ຺ຄິກສຸຕ຺ຕວຓ຺ຓນາ

໒໘. ອຏ຺ຐເມ ອຣິຍສ຺ສາຕິ ວິກ຺ຂມ຺ຠນວເສນ ປຫີນກິເລເສຫິ ອາຣກາ ຐິຕສ຺ສ. ຠາວນໍ ເທເສສ຺ສາມີຕິ ພ຺ຣູຫນໍ ວຑ຺ຒນໍ ປກາສຍິສ຺ສາມິ. ອິມເມວ ກາຍນ຺ຕິ ອິມໍ ກຣຊກາຍໍ. ອຠິສນ຺ເທຕີຕິ ເຕເມຕິ ສ຺ເນເຫຕິ, ສພ຺ພຕ຺ຖ ປວຕ຺ຕປີຕິສຸຂໍ ກໂຣຕິ. ປຣິສນ຺ເທຕີຕິ ສມນ຺ຕໂຕ ສນ຺ເທຕິ. ປຣິປູເຣຕີຕິ ວາຍຸນາ ຠສ຺ຕໍ ວິຍ ປູເຣຕິ. ປຣິປ຺ຜຣຕີຕິ ສມນ຺ຕໂຕ ຜຸສຕິ. ສພ຺ພາວໂຕ ກາຍສ຺ສາຕິ ອສ຺ສ ຠິກ຺ຂຸໂນ ສພ຺ພໂກຏ຺ຐາສວໂຕ ກາຍສ຺ສ ກິຎ຺ຈິ ອຸປາທິນ຺ນກສນ຺ຕຕິປວຕ຺ຕິຏ຺ຐາເນ ຉວິມໍສໂລຫິຕານຸຄຕໍ ອຓຸມຕ຺ຕມ຺ປິ ຐານໍ ປຐມຊ຺ຌານສຸເຂນ ອຜຸຏໍ ນາມ ນ ໂຫຕິ.

ທກ຺ໂຂຕິ ເຉໂກ ປຏິພໂລ ນ຺ຫານີຍຈຸຓ຺ຓານິ ກາຕຸຎ຺ເຈວ ໂຍເຊຕຸຎ຺ຈ ສນ຺ເນຕຸຎ຺ຈ. ກໍສຖາເລຕິ ເຍນ ເກນຈິ ໂລເຫນ ກຕຠາຊເນ. ມຕ຺ຕິກາຠາຊນໍ ປນ ຖິຣໍ ນ ໂຫຕິ, ສນ຺ເນນ຺ຕສ຺ສ ຠິຊ຺ຊຕິ. ຕສ຺ມາ ຕໍ ນ ທສ຺ເສສິ. ປຣິປ຺ໂຜສກໍ ປຣິປ຺ໂຜສກນ຺ຕິ ສິຎ຺ຈິຕ຺ວາ ສິຎ຺ຈິຕ຺ວາ. ສນ຺ເນຍ຺ຍາຕິ ວາມຫຕ຺ເຖນ ກໍສຖາລໍ ຄເຫຕ຺ວາ ທກ຺ຂິຓຫຕ຺ເຖນ ປມາຓຍຸຕ຺ຕໍ ອຸທກໍ ສິຎ຺ຈິຕ຺ວາ ສິຎ຺ຈິຕ຺ວາ ປຣິມທ຺ທນ຺ໂຕ ປິຓ຺ຑໍ ກເຣຍ຺ຍ. ສ຺ເນຫານຸຄຕາຕິ ອຸທກສິເນເຫນ ອນຸຄຕາ. ສ຺ເນຫປເຣຕາຕິ ອຸທກສິເນເຫນ ປຣິຄ຺ຄຫິຕາ. ສນ຺ຕຣພາຫິຣາຕິ ສທ຺ຘິໍ ອນ຺ໂຕປເທເສນ ເຈວ ພຫິປເທເສນ ຈ, ສພ຺ພຕ຺ຖກເມວ ອຸທກສິເນເຫນ ຜຸຏາຕິ ອຕ຺ໂຖ. ນ ຈ ປຄ຺ຆຣິຓີຕິ ນ ພິນ຺ທຸ ພິນ຺ທຸ ອຸທກໍ ປຄ຺ຆຣຕິ, ສກ຺ກາ ໂຫຕິ ຫຕ຺ເຖນປິ ທ຺ວີຫິປິ ອງ຺ຄຸລີຫິ ຄເຫຕຸໍ ໂອວຏ຺ຏິກາຍປິ ກາຕຸນ຺ຕິ ອຕ຺ໂຖ.

ທຸຕິຍຊ຺ຌານສຸຂອຸປມາຍໍ ອຸພ຺ຠິໂທທໂກຕິ ອຸພ຺ຠິນ຺ນອຸທໂກ, ນ ເຫຏ຺ຐາ ອຸພ຺ຠິຊ຺ຊິຕ຺ວາ ອຸຄ຺ຄຈ຺ຉນອຸທໂກ, ອນ຺ໂຕເຍວ ປນ ອຸປ຺ປຊ຺ຊນອຸທໂກຕິ ອຕ຺ໂຖ. ອາຍມຸຂນ຺ຕິ ອາຄມນມຄ຺ໂຄ. ເທໂວຕິ ເມໂຆ. ກາເລນ ກາລນ຺ຕິ ກາເລ ກາເລ, ອນ຺ວຑ຺ຒມາສໍ ວາ ອນຸທສາຫໍ ວາຕິ ອຕ຺ໂຖ. ຘາຣນ຺ຕິ ວຸຏ຺ຐິໍ. ນານຸປ຺ປເວຈ຺ເຉຍ຺ຍາຕິ ນປ຺ປເວເສຍ຺ຍ, ນ ວສ຺ເສຍ຺ຍາຕິ ອຕ຺ໂຖ. ສີຕາ ວາຣິຘາຣາ ອຸພ຺ຠິຊ຺ຊິຕ຺ວາຕິ ສີຕາ ວາຣິຘາຣາ ຕໍ ຣຫທໍ ປູຣຍມານາ ອຸພ຺ຠິຊ຺ຊິຕ຺ວາ. ເຫຏ຺ຐາ ອຸຄ຺ຄຈ຺ຉນອຸທກຎ຺ຫິ ອຸຄ຺ຄນ຺ຕ຺ວາ ຠິຊ຺ຊນ຺ຕໍ ອຸທກໍ ໂຂເຠຕິ, ຈຕູຫິ ທິສາຫິ ປວິສນອຸທກໍ ປຸຣາຓປຓ຺ຓຕິຓກຏ຺ຐທຓ຺ຑກາທີຫິ ອຸທກໍ ໂຂເຠຕິ. ວຸຏ຺ຐິອຸທກໍ ຘາຣານິປາຕພຸພ຺ພຸຬເກຫິ ອຸທກໍ ໂຂເຠຕິ, ສນ຺ນິສິນ຺ນເມວ ປນ ຫຸຕ຺ວາ ອິທ຺ຘິນິມ຺ມິຕມິວ ອຸປ຺ປຊ຺ຊມານໍ ອຸທກໍ ອິມໍ ປເທສໍ ຜຣຕິ, ອິມໍ ນ ຜຣຕີຕິ ນຕ຺ຖິ. ເຕນ ອຜຸໂຏກາໂສ ນາມ ນ ໂຫຕິ. ຕຕ຺ຖ ຣຫໂທ ວິຍ ກຣຊກາໂຍ, ອຸທກໍ ວິຍ ທຸຕິຍຊ຺ຌານສຸຂໍ, ເສສໍ ປຸຣິມນເຍເນວ ເວທິຕພ຺ພໍ.

ຕຕິຍຊ຺ຌານສຸຂອຸປມາຍໍ ອຸປ຺ປລານິ ເອຕ຺ຖ ສນ຺ຕີຕິ ອຸປ຺ປລິນີ. ເສສປທທ຺ວເຍປິ ເອເສວ ນໂຍ. ເອຕ຺ຖ ຈ ເສຕຣຕ຺ຕນີເລສຸ ຍໍກິຎ຺ຈິ ອຸປ຺ປລເມວ, ອູນກສຕປຕ຺ຕໍ ປຸຓ຺ຑຣີກໍ, ສຕປຕ຺ຕໍ ປທຸມໍ. ປຕ຺ຕນິຍມໍ ວາ ວິນາປິ ເສຕໍ ປທຸມໍ, ຣຕ຺ຕໍ ປຸຓ຺ຑຣີກນ຺ຕິ ອຍເມຕ຺ຖ ວິນິຈ຺ຉໂຍ. ອຸທການຸຄ຺ຄຕານີຕິ ອຸທກໂຕ ນ ອຸຄ຺ຄຕານິ. ອນ຺ໂຕນິມຸຄ຺ຄໂປສີນີຕິ ອຸທກຕລສ຺ສ ອນ຺ໂຕ ນິມຸຄ຺ຄານິເຍວ ຫຸຕ຺ວາ ໂປສນ຺ຕິ ວຑ຺ຒນ຺ຕີຕິ ອຕ຺ໂຖ. ເສສໍ ປຸຣິມນເຍເນວ ເວທິຕພ຺ພໍ.

ຈຕຸຕ຺ຖຊ຺ຌານອຸປມາຍໍ ປຣິສຸທ຺ເຘນ ເຈຕສາ ປຣິໂຍທາເຕນາຕິ ເອຕ຺ຖ ນິຣຸປກ຺ກິເລສຏ຺ເຐນ ປຣິສຸທ຺ຘໍ, ປຠສ຺ສຣຏ຺ເຐນ ປຣິໂຍທາຕໍ ເວທິຕພ຺ພໍ. ໂອທາເຕນ ວຕ຺ເຖນາຕິ ອິທໍ ອຸຕຸຜຣຓຕ຺ຖໍ ວຸຕ຺ຕໍ. ກິລິຏ຺ຐວຕ຺ເຖນ ຫິ ອຸຕຸຜຣຓໍ ນ ໂຫຕິ, ຕງ຺ຂຓໂຘຕປຣິສຸທ຺ເຘນ ອຸຕຸຜຣຓໍ ພລວໍ ໂຫຕິ. ອິມິສ຺ສາ ຫິ ອຸປມາຍ ວຕ຺ຖໍ ວິຍ ກຣຊກາໂຍ, ອຸຕຸຜຣຓໍ ວິຍ ຈຕຸຕ຺ຖຊ຺ຌານສຸຂໍ. ຕສ຺ມາ ຍຖາ ສຸນ຺ຫາຕສ຺ສ ປຸຣິສສ຺ສ ປຣິສຸທ຺ຘໍ ວຕ຺ຖໍ ສສີສໍ ປາຣຸປິຕ຺ວາ ນິສິນ຺ນສ຺ສ ສຣີຣໂຕ ອຸຕຸ ສພ຺ພເມວ ວຕ຺ຖໍ ຜຣຕິ, ນ ໂກຈິ ວຕ຺ຖສ຺ສ ອຜຸໂຏກາໂສ ໂຫຕິ, ເອວໍ ຈຕຸຕ຺ຖຊ຺ຌານສຸເຂນ ຠິກ຺ຂຸໂນ ກຣຊກາຍສ຺ສ ນ ໂກຈິ ໂອກາໂສ ອຜຸໂຏ ໂຫຕີຕິ ເອວເມຕ຺ຖ ອຕ຺ໂຖ ທຏ຺ຐພ຺ໂພ. ຈຕຸຕ຺ຖຊ຺ຌານຈິຕ຺ຕເມວ ວາ ວຕ຺ຖໍ ວິຍ, ຕໍສມຸຏ຺ຐານຣູປໍ ອຸຕຸຜຣຓໍ ວິຍ. ຍຖາ ຫິ ກຕ຺ຖຈິ ກຕ຺ຖຈິ ໂອທາຕວຕ຺ເຖ ກາຍໍ ອຜຸສນ຺ເຕປິ ຕໍສມຸຏ຺ຐາເນນ ອຸຕຸນາ ສພ຺ພຕ຺ຖກເມວ ກາໂຍ ຜຸໂຏ ໂຫຕິ, ເອວໍ ຈຕຸຕ຺ຖຊ຺ຌານສມຸຏ຺ຐາປິເຕນ ສຸຂຸມຣູເປນ ສພ຺ພຕ຺ຖກເມວ ຠິກ຺ຂຸໂນ ກາໂຍ ຜຸໂຏ ໂຫຕີຕິ ເອວເມຕ຺ຖ ອຕ຺ໂຖ ທຏ຺ຐພ຺ໂພ.

ປຈ຺ຈເວກ຺ຂຓນິມິຕ຺ຕນ຺ຕິ ປຈ຺ຈເວກ຺ຂຓຎາຓເມວ. ສຸຄ຺ຄຫິຕໍ ໂຫຕີຕິ ຍຖາ ເຕນ ຌານວິປສ຺ສນາມຄ຺ຄາ ສຸຏ຺ຐຸ ຄຫິຕາ ໂຫນ຺ຕິ, ເອວໍ ປຈ຺ຈເວກ຺ຂຓນິມິຕ຺ຕໍ ອປຣາປເຣນ ປຈ຺ຈເວກ຺ຂຓນິມິຕ຺ເຕນ ສຸຏ຺ຐຸ ຄຫິຕໍ ໂຫຕິ. ອຎ຺ໂຎ ວາ ອຎ຺ຎນ຺ຕິ ອຎ຺ໂຎ ເອໂກ ອຎ຺ຎໍ ເອກໍ, ອຕ຺ຕໂນເຍວ ຫິ ອຕ຺ຕາ ນ ປາກໂຏ ໂຫຕິ. ຐິໂຕ ວາ ນິສິນ຺ນນ຺ຕິ ຐິຕກສ຺ສາປິ ນິສິນ຺ໂນ ປາກໂຏ ໂຫຕິ, ເຕເນວໍ ວຸຕ຺ຕໍ. ເສເສສຸປິ ເອເສວ ນໂຍ. ອຸທກມຓິໂກຕິ ສເມຂລາ ອຸທກຈາຏິ. ສມຕິຕ຺ຕິໂກຕິ ສມຠຣິໂຕ. ກາກເປຍ຺ຍາຕິ ມຸຂວຏ຺ຏິຍໍ ນິສີທິຕ຺ວາ ກາເກນ ຄີວໍ ອນາເມຕ຺ວາວ ປາຕພ຺ໂພ.

ສຸຠູມິຍນ຺ຕິ ສມຠູມິຍໍ. ‘‘ສຸຠູເມ ສຸເຂຕ຺ເຕ ວິຫຕຂາຓຸເກ ພີຊານິ ປຕິຏ຺ຐາເປຍ຺ຍາ’’ຕິ (ທີ. ນິ. ໒.໔໓໘) ເອຕ຺ຖ ປນ ມຓ຺ຑຠູມິ ສຸຠູມີຕິ ອາຄຕາ. ຈຕຸມຫາປເຖຕິ ທ຺ວິນ຺ນໍ ມຫາມຄ຺ຄານໍ ວິນິວິຊ຺ຌິຕ຺ວາ ຄຕຏ຺ຐາເນ. ອາຊຎ຺ຎຣໂຖຕິ ວິນີຕອສ຺ສຣໂຖ. ໂອຘສ຺ຕປໂຕໂທຕິ ຍຖາ ຣຖໍ ອຠິຣຸຫິຕ຺ວາ ຐິເຕນ ສກ຺ກາ ໂຫຕິ ຄຓ຺ຫິຕຸໍ, ເອວໍ ອາລມ຺ພນໍ ນິສ຺ສາຍ ຕິຣິຍໂຕ ຐປິຕປໂຕໂທ. ໂຍຄ຺ຄາຈຣິໂຍຕິ ອສ຺ສາຈຣິໂຍ. ສ຺ເວວ ອສ຺ສທມ຺ເມ ສາເຣຕີຕິ ອສ຺ສທມ຺ມສາຣຖິ. ເຍນິຈ຺ຉກນ຺ຕິ ເຍນ ເຍນ ມຄ຺ເຄນ ອິຈ຺ຉຕິ. ຍທິຈ຺ຉກນ຺ຕິ ຍໍ ຍໍ ຄຕິໍ ອິຈ຺ຉຕິ. ສາເຣຍ຺ຍາຕິ ອຸຊຸກໍ ປຸຣໂຕ ເປເສຍ຺ຍ. ປຈ຺ຈາສາເຣຍ຺ຍາຕິ ປຏິນິວຕ຺ເຕຍ຺ຍ.

ເອວໍ ເຫຏ຺ຐາ ປຎ຺ຈຫິ ອງ຺ເຄຫິ ສມາປຕ຺ຕິປຣິກມ຺ມໍ ກເຖຕ຺ວາ ອິມາຫິ ຕີຫິ ອຸປມາຫິ ປຄຸຓສມາປຕ຺ຕິຍາ ອານິສໍສໍ ທສ຺ເສຕ຺ວາ ອິທານິ ຂີຓາສວສ຺ສ ອຠິຎ຺ຎາປຏິປາຏິໍ ທສ຺ເສຕຸໍ ໂສ ສເຈ ອາກງ຺ຂຕີຕິອາທິມາຫ. ຕໍ ອຸຕ຺ຕານຕ຺ຖເມວາຕິ.

໙. ຈງ຺ກມສຸຕ຺ຕວຓ຺ຓນາ

໒໙. ນວເມ ອທ຺ຘານກ຺ຂໂມ ໂຫຕີຕິ ທູຣໍ ອທ຺ຘານມຄ຺ຄໍ ຄຈ຺ຉນ຺ໂຕ ຂມຕິ, ອຘິວາເສຕຸໍ ສກ຺ໂກຕິ. ປຘານກ຺ຂໂມຕິ ວີຣິຍກ຺ຂໂມ. ຈງ຺ກມາຘິຄໂຕ ສມາຘີຕິ ຈງ຺ກມໍ ອຘິຏ຺ຐຫນ຺ເຕນ ອຘິຄໂຕ ອຏ຺ຐນ຺ນໍ ສມາປຕ຺ຕີນໍ ອຎ຺ຎຕຣສມາຘິ. ຈິຣຏ຺ຐິຕິໂກ ໂຫຕີຕິ ຈິຣໍ ຕິຏ຺ຐຕິ. ຐິຕເກນ ຄຫິຕນິມິຕ຺ຕຎ຺ຫິ ນິສິນ຺ນສ຺ສ ນສ຺ສຕິ, ນິສິນ຺ເນນ ຄຫິຕນິມິຕ຺ຕໍ ນິປນ຺ນສ຺ສ. ຈງ຺ກມໍ ອຘິຏ຺ຐຫນ຺ເຕນ ຈລິຕາຣມ຺ມເຓ ຄຫິຕນິມິຕ຺ຕໍ ປນ ຐິຕສ຺ສປິ ນິສິນ຺ນສ຺ສປິ ນິປນ຺ນສ຺ສປິ ນ ນສ຺ສຕີຕິ.

໑໐. ນາຄິຕສຸຕ຺ຕວຓ຺ຓນາ

໓໐. ທສເມ ອຸທ຺ຘໍ ອຸຄ຺ຄຕຕ຺ຕາ ອຸຈ຺ໂຈ, ຣາສິຠາເວນ ຈ ມຫາ ສທ຺ໂທ ເອເຕສນ຺ຕິ ອຸຈ຺ຈາສທ຺ທມຫາສທ຺ທາ. ເຕສຸ ຫິ ອຸຄ຺ຄຕຸຄ຺ຄເຕສຸ ຂຕ຺ຕິຍມຫາສາລ-ພ຺ຣາຫ຺ມຓມຫາສາລາທີສຸ ມຫາສກ຺ກາຣໍ ຄເຫຕ຺ວາ ອາຄເຕສຸ ‘‘ອສຸກສ຺ສ ໂອກາສໍ ເທຖ, ອສຸກສ຺ສ ໂອກາສໍ ເທຖາ’’ຕິ ວຸຕ຺ເຕ ‘‘ມຍໍ ປຐມຕຣໍ ອາຄຕາ, ມຍ຺ຫໍ ປຐມຕຣໍ ອາຄຕາ, ນຕ຺ຖິ ໂອກາໂສ’’ຕິ ເອວໍ ອຎ຺ຎມຎ຺ຎໍ ກເຖນ຺ຕານໍ ສທ຺ໂທ ອຸຈ຺ໂຈ ເຈວ ມຫາ ຈ ອໂຫສິ. ເກວຏ຺ຏາ ມຎ຺ເຎ ມຈ຺ຉວິໂລເປຕິ ເກວຏ຺ຏາ ວິຍ ມຈ຺ຉວິໂລເປ. ເຕສຎ຺ຫິ ມຈ຺ຉປຈ຺ຉິໍ ຄເຫຕ຺ວາ ອາຄຕານໍ ວິກ຺ກິຓນຏ຺ຐາເນ ‘‘ມຍ຺ຫໍ ເທຖ ມຍ຺ຫໍ ເທຖາ’’ຕິ ວທໂຕ ມຫາຊນສ຺ສ ເອວຣູໂປ ສທ຺ໂທ ໂຫຕິ. ມີຬ຺ຫສຸຂນ຺ຕິ ອສຸຈິສຸຂໍ. ມິທ຺ຘສຸຂນ຺ຕິ ນິທ຺ທາສຸຂໍ. ລາຠສກ຺ກາຣສິໂລກສຸຂນ຺ຕິ ລາຠສກ຺ກາຣຎ຺ເຈວ ວຓ຺ຓຠຓນຎ຺ຈ ນິສ຺ສາຍ ອຸປ຺ປນ຺ນສຸຂໍ.

ຕໍນິນ຺ນາວ ຄມິສ຺ສນ຺ຕີຕິ ຕໍ ຕເທວ ຠຄວໂຕ ຄຕຏ຺ຐານໍ ຄມິສ຺ສນ຺ຕິ, ອນຸພນ຺ຘິສ຺ສນ຺ຕິເຍວາຕິ ວຸຕ຺ຕໍ ໂຫຕິ. ຕຖາ ຫິ, ຠນ຺ເຕ, ຠຄວໂຕ ສີລປຎ຺ຎາຓນ຺ຕິ ຍສ຺ມາ ຕຖາວິຘໍ ຕຸມ຺ຫາກໍ ສີລຎ຺ຈ ຎາຓຎ຺ຈາຕິ ອຕ຺ໂຖ. ມາ ຈ ມຍາ ຍໂສຕິ ມຍາ ສທ຺ຘິໍ ຍໂສປິ ມາ ສມາຄຈ຺ຉຕຸ. ປິຍານນ຺ຕິ ປິຍຊນານໍ. ເອໂສ ຕສ຺ສ ນິສ຺ສນ຺ໂທຕິ ເອສາ ປິຍຠາວສ຺ສ ນິປ຺ຜຕ຺ຕິ. ອສຸຠນິມິຕ຺ຕານຸໂຍຄນ຺ຕິ ອສຸຠກມ຺ມຏ຺ຐານານຸໂຍຄໍ. ສຸຠນິມິຕ຺ເຕຕິ ຣາຄຏ຺ຐານິເຍ ອິຏ຺ຐາຣມ຺ມເຓ. ເອໂສ ຕສ຺ສ ນິສ຺ສນ຺ໂທຕິ ເອສາ ຕສ຺ສ ອສຸຠນິມິຕ຺ຕານຸໂຍຄສ຺ສ ນິປ຺ຜຕ຺ຕິ. ເອວມິມສ຺ມິໍ ສຸຕ຺ເຕ ອິເມສຸ ປຎ຺ຈສຸ ຐາເນສຸ ວິປສ຺ສນາວ ກຖິຕາຕິ.

ປຎ຺ຈງ຺ຄິກວຄ຺ໂຄ ຕຕິໂຍ.