໑. ເສຂພລວຄ຺ໂຄ

໑. ສໍຂິຕ຺ຕສຸຕ຺ຕວຓ຺ຓນາ

໑. ປຎ຺ຈກນິປາຕສ຺ສ ປຐເມ ສຕ຺ຕນ຺ນໍ ເສຂານໍ ພລານີຕິ ເສຂພລານິ. ສທ຺ຘາພລາທີສຸ ອສ຺ສທ຺ຘິເຍ ນ ກມ຺ປຕີຕິ ສທ຺ຘາພລໍ. ອຫິຣິເກ ນ ກມ຺ປຕີຕິ ຫິຣີພລໍ. ອໂນຕ຺ຕປ຺ເປ ນ ກມ຺ປຕີຕິ ໂອຕ຺ຕປ຺ປພລໍ. ໂກສຊ຺ເຊ ນ ກມ຺ປຕີຕິ ວີຣິຍພລໍ. ອວິຊ຺ຊາຍ ນ ກມ຺ປຕີຕິ ປຎ຺ຎາພລໍ. ຕສ຺ມາຕິ ຍສ຺ມາ ອິມານິ ສຕ຺ຕນ຺ນໍ ເສຂານໍ ພລານິ, ຕສ຺ມາ.

໒. ວິຕ຺ຖຕສຸຕ຺ຕວຓ຺ຓນາ

໒. ທຸຕິເຍ ກາຍທຸຈ຺ຈຣິເຕນາຕິອາທີສຸ ອຸປໂຍຄຕ຺ເຖ ກຣຓວຈນໍ, ຫິຣີຍິຕພ຺ພານິ ກາຍທຸຈ຺ຈຣິຕາທີນິ ຫິຣີຍຕິ ຊິຄຸຈ຺ຉຕີຕິ ອຕ຺ໂຖ. ໂອຕ຺ຕປ຺ປນິທ຺ເທເສ ເຫຕ຺ວຕ຺ເຖ ກຣຓວຈນໍ, ກາຍທຸຈ຺ຈຣິຕາທີຫິ ໂອຕ຺ຕປ຺ປສ຺ສ ເຫຕຸຠູເຕຫິ ໂອຕ຺ຕປ຺ປຕິ ຠາຍຕີຕິ ອຕ຺ໂຖ.

ອາຣທ຺ຘວີຣິໂຍຕິ ປຄ຺ຄຫິຕວີຣິໂຍ ອໂນສກ຺ກິຕມານໂສ. ປຫານາຍາຕິ ປຫານຕ຺ຖາຍ. ອຸປສມ຺ປທາຍາຕິ ປຏິລາຠຕ຺ຖາຍ. ຖາມວາຕິ ວີຣິຍຖາເມນ ສມນ຺ນາຄໂຕ. ທຬ຺ຫປຣກ຺ກໂມຕິ ຖິຣປຣກ຺ກໂມ. ອນິກ຺ຂິຕ຺ຕຘຸໂຣ ກຸສເລສຸ ຘມ຺ເມສູຕິ ກຸສເລສຸ ຘມ຺ເມສຸ ອໂນໂຣປິຕຘຸໂຣ ອໂນສກ຺ກິຕວີຣິໂຍ.

ອຸທຍຕ຺ຖຄາມິນິຍາຕິ ປຎ຺ຈນ຺ນໍ ຂນ຺ຘານໍ ອຸທຍວຍຄາມິນິຍາ ອຸທຍຎ຺ຈ ວຍຎ຺ຈ ປຏິວິຊ຺ຌິຕຸໍ ສມຕ຺ຖາຍ. ປຎ຺ຎາຍ ສມນ຺ນາຄໂຕຕິ ວິປສ຺ສນາປຎ຺ຎາຍ ເຈວ ມຄ຺ຄປຎ຺ຎາຍ ຈ ສມງ຺ຄິຠູໂຕ. ອຣິຍາຍາຕິ ວິກ຺ຂມ຺ຠນວເສນ ຈ ສມຸຈ຺ເຉທວເສນ ຈ ກິເລເສຫິ ອາຣກາ ຐິຕາຍ ປຣິສຸທ຺ຘາຍ. ນິພ຺ເພຘິກາຍາຕິ ສາ ຈ ອຠິນິວິຊ຺ຌນໂຕ ນິພ຺ເພຘິກາຕິ ວຸຈ຺ຈຕິ, ຕາຍ ສມນ຺ນາຄໂຕຕິ ອຕ຺ໂຖ. ຕຕ຺ຖ ມຄ຺ຄປຎ຺ຎາ ສມຸຈ຺ເຉທວເສນ ອນິພ຺ພິທ຺ຘປຸພ຺ພໍ ອປ຺ປທາລິຕປຸພ຺ພໍ ໂລຠກ຺ຂນ຺ຘໍ ໂທສກ຺ຂນ຺ຘໍ ໂມຫກ຺ຂນ຺ຘໍ ນິພ຺ພິຊ຺ຌຕິ ປທາເລຕີຕິ ນິພ຺ເພຘິກາ, ວິປສ຺ສນາປຎ຺ຎາ ຕທງ຺ຄວເສນ ນິພ຺ເພຘິກາ, ມຄ຺ຄປຎ຺ຎາຍ ປຏິລາຠສໍວຕ຺ຕນໂຕ ຕພ຺ພິປສ຺ສນາ ນິພ຺ເພຘິກາຕິ ວຕ຺ຕຸໍ ວຏ຺ຏຕິ. ສມ຺ມາ ທຸກ຺ຂກ຺ຂຍຄາມິນິຍາຕິ ອິຘາປິ ມຄ຺ຄປຎ຺ຎາ ສມ຺ມາ ເຫຕຸນາ ນເຍນ ວຏ຺ຏທຸກ຺ຂຎ຺ຈ ກິເລສທຸກ຺ຂຎ຺ຈ ເຂປຍມານາ ຄຈ຺ຉຕີຕິ ສມ຺ມາ ທຸກ຺ຂກ຺ຂຍຄາມິນີ ນາມ, ວິປສ຺ສນາປຎ຺ຎາ ຕທງ຺ຄວເສນ ວຏ຺ຏທຸກ຺ຂຎ຺ຈ ກິເລສທຸກ຺ຂຎ຺ຈ ເຂປຍມານາ ຄຈ຺ຉຕີຕິ ທຸກ຺ຂກ຺ຂຍຄາມິນີ. ທຸກ຺ຂກ຺ຂຍຄາມິນິຍາ ວາ ມຄ຺ຄປຎ຺ຎາຍ ປຏິລາຠາຍ ສໍວຕ຺ຕນໂຕເປສາ ທຸກ຺ຂກ຺ຂຍຄາມິນີຕິ ເວທິຕພ຺ພາ. ອິຕິ ອິມສ຺ມິໍ ສຸຕ຺ເຕ ປຎ຺ຈ ພລານິ ມິສ຺ສກາເນວ ກຖິຕານິ, ຕຖາ ປຎ຺ຈເມ.

໖. ສມາປຕ຺ຕິສຸຕ຺ຕວຓ຺ຓນາ

໖. ຉຏ຺ເຐ ອກຸສລສ຺ສ ສມາປຕ຺ຕີຕິ ອກຸສລຘມ຺ມສ຺ສ ສມາປຊ຺ຊນາ, ເຕນ ສທ຺ຘິໍ ສມງ຺ຄິຠາໂວຕິ ອຕ຺ໂຖ. ປຣິຍຸຏ຺ຐາຍ ຕິຏ຺ຐຕີຕິ ປຣິໂຍນນ຺ຘິຕ຺ວາ ຕິຏ຺ຐຕິ.

໗. ກາມສຸຕ຺ຕວຓ຺ຓນາ

໗. ສຕ຺ຕເມ ກາເມສຸ ລຬິຕາຕິ ວຕ຺ຖຸກາມກິເລສກາເມສຸ ລຬິຕາ ອຠິຣຕາ. ອສິຕພ຺ຍາຠງ຺ຄິນ຺ຕິ ຕິຓລາຍນອສິຕຎ຺ເຈວ ຕິຓວຫນກາຊຎ຺ຈ. ກຸລປຸຕ຺ໂຕຕິ ອາຈາຣກຸລປຸຕ຺ໂຕ. ໂອຫາຍາຕິ ປຫາຍ. ອລໍ ວຈນາຍາຕິ ຍຸຕ຺ຕໍ ວຈນາຍ. ລພ຺ຠາຕິ ສຸລຠາ ສກ຺ກາ ລຠິຕຸໍ. ຫີນາ ກາມາຕິ ປຎ຺ຈນ຺ນໍ ນີຈກຸລານໍ ກາມາ. ມຊ຺ຌິມາ ກາມາຕິ ມຊ຺ຌິມສຕ຺ຕານໍ ກາມາ. ປຓີຕາ ກາມາຕິ ຣາຊຣາຊມຫາມຕ຺ຕານໍ ກາມາ. ກາມາຕ຺ເວວ ສງ຺ຂໍ ຄຈ຺ຉນ຺ຕີຕິ ກາມນວເສນ ກາເມຕພ຺ພວເສນ ຈ ກາມາອິຈ຺ເຈວ ສງ຺ຂໍ ຄຈ຺ຉນ຺ຕິ. ວຸທ຺ໂຘ ໂຫຕີຕິ ມຫລ຺ລໂກ ໂຫຕິ. ອລໍປຎ຺ໂຎຕິ ຍຸຕ຺ຕປຎ຺ໂຎ. ອຕ຺ຕຄຸຕ຺ໂຕຕິ ອຕ຺ຕນາວ ຄຸຕ຺ໂຕ ຣກ຺ຂິໂຕ, ອຕ຺ຕານໍ ວາ ໂຄເປຕຸໍ ຣກ຺ຂິຕຸໍ ສມຕ຺ໂຖ. ນາລໍ ປມາທາຍາຕິ ນ ຍຸຕ຺ໂຕ ປມຊ຺ຊິຕຸໍ. ສທ຺ຘາຍ ອກຕໍ ໂຫຕີຕິ ຍໍ ສທ຺ຘາຍ ກຸສເລສຸ ຘມ຺ເມສຸ ກາຕຸໍ ຍຸຕ຺ຕໍ, ຕໍ ນ ກຕໍ ໂຫຕິ. ເສສປເທສຸປິ ເອເສວ ນໂຍ. ອນເປກ຺ໂຂ ທານາຫໍ, ຠິກ຺ຂເວ, ຕສ຺ມິໍ ຠິກ຺ຂຸສ຺ມິໍ ໂຫມີຕິ ເອວໍ ສທ຺ຘາທີຫິ ກາຕພ຺ພໍ ກຕ຺ວາວ ໂສຕາປຕ຺ຕິຜເລ ປຕິຏ຺ຐິເຕ ຕສ຺ມິໍ ປຸຄ຺ຄເລ ອນເປກ຺ໂຂ ໂຫມີຕິ ທສ຺ເສຕິ. ອິມສ຺ມິໍ ສຸຕ຺ເຕ ໂສຕາປຕ຺ຕິມຄ຺ໂຄ ກຖິໂຕ.

໘. ຈວນສຸຕ຺ຕວຓ຺ຓນາ

໘. ອຏ຺ຐເມ ສທ຺ຘມ຺ເມຕິ ສາສນສທ຺ຘມ຺ເມ. ອສ຺ສທ຺ໂຘຕິ ໂອກປ຺ປນສທ຺ຘາຍ ຈ ປກ຺ຂນ຺ທນສທ຺ຘາຍ ຈາຕິ ທ຺ວີຫິປິ ສທ຺ຘາຫິ ວິຣຫິໂຕ. ຈວຕິ ນປ຺ປຕິຏ຺ຐາຕີຕິ ອິມສ຺ມິໍ ສາສເນ ຄຸເຓຫິ ຈວຕິ, ປຕິຏ຺ຐາຕຸໍ ນ ສກ຺ໂກຕິ. ອິຕິ ອິມສ຺ມິໍ ສຸຕ຺ເຕ ອປ຺ປຕິຏ຺ຐານຎ຺ຈ ປຕິຏ຺ຐານຎ຺ຈ ກຖິຕໍ.

໙. ປຐມອຄາຣວສຸຕ຺ຕວຓ຺ຓນາ

໙. ນວເມ ນາສ຺ສ ຄາຣໂວຕິ ອຄາຣໂວ. ນາສ຺ສ ປຕິສ຺ໂສຕິ ອປ຺ປຕິສ຺ໂສ, ອເຊຏ຺ຐໂກ ອນີຈວຸຕ຺ຕິ. ເສສເມຕ຺ຖ ປຸຣິມສທິສເມວ.

໑໐. ທຸຕິຍອຄາຣວສຸຕ຺ຕວຓ຺ຓນາ

໑໐. ທສເມ ອຠພ຺ໂພຕິ ອຠາຊນໍ. ວຸທ຺ຘິນ຺ຕິ ວຑ຺ຒິໍ. ວິຣູຬ຺ຫິນ຺ຕິ ວິຣູຬ຺ຫມູລຕາຍ ນິຈ຺ຈລຠາວໍ. ເວປຸລ຺ລນ຺ຕິ ມຫນ຺ຕຠາວໍ. ເສສໍ ສພ຺ພຕ຺ຖ ອຸຕ຺ຕານເມວາຕິ.

ເສຂພລວຄ຺ໂຄ ປຐໂມ.