໑. ນິສ຺ສຍວຄ຺ໂຄ

໑-໖. ກິມຕ຺ຖິຍສຸຕ຺ຕາທິວຓ຺ຓນາ

໑-໖. ເອກາທສກນິປາຕສ຺ສ ປຐມາທີນິ ເຫຏ຺ຐາ ວຸຕ຺ຕນຍາເນວ. ເກວລຎ຺ເຈຕ຺ຖ ອາທິໂຕ ປຎ຺ຈສຸ ນິພ຺ພິທາວິຣາຄໍ ທ຺ວິຘາ ຠິນ຺ທິຕ຺ວາ ເອກາທສງ຺ຄານິ ກຕານິ. ຉຏ຺ເຐ ສິກ຺ຂາປຈ຺ຈກ຺ຂານໍ ອຘິກໍ.

໗-໘. ປຐມສຎ຺ຎາສຸຕ຺ຕາທິວຓ຺ຓນາ

໗-໘. ສຕ຺ຕເມ ອຕ຺ເຖນ ອຕ຺ໂຖຕິ ອຕ຺ເຖນ ສທ຺ຘິມຕ຺ໂຖ. ພ຺ຍຎ຺ຊເນນ ພ຺ຍຎ຺ຊນນ຺ຕິ ພ຺ຍຎ຺ຊເນນ ສທ຺ຘິໍ ພ຺ຍຎ຺ຊນໍ. ສໍສນ຺ທິສ຺ສຕີຕິ ສມ຺ປວຕ຺ຕິສ຺ສຕິ. ສເມສ຺ສຕີຕິ ສມານໍ ຠວິສ຺ສຕິ. ນ ວິຄ຺ຄຍ຺ຫິສ຺ສຕີຕິ ນ ວິຣຊ຺ຌິສ຺ສຕິ. ອຄ຺ຄປທສ຺ມິນ຺ຕິ ນິພ຺ພາເນ. ອຏ຺ຐເມ ປຈ຺ຈເວກ຺ຂຓາ ກຖິຕາ.

໙. ສທ຺ຘສຸຕ຺ຕວຓ຺ຓນາ

໙. ນວເມ ໂທຓິຍາ ພທ຺ໂຘຕິ ຍວສສ຺ສໂທຓິຍາ ສມີເປ ພທ຺ໂຘ. ອນ຺ຕຣໍ ກຣິຕ຺ວາຕິ ອພ຺ຠນ຺ຕເຣ ກຕ຺ວາ. ຌາຍຕີຕິ ຈິນ຺ເຕຕິ. ປຊ຺ຌາຍຕີຕິ ອິໂຕ ຈິໂຕ ຈ ນານປ຺ປກາຣກໍ ຌາຍຕິ. ນິຊ຺ຌາຍຕີຕິ ນິຣນ຺ຕຣວເສນ ນິພທ຺ຘໍ ຌາຍຕິ. ປຖວິມ຺ປິ ນິສ຺ສາຍ ຌາຍຕີຕິ ສມາປຕ຺ຕິຍໍ ສນິກນ຺ຕິກວເສເນຕໍ ວຸຕ຺ຕໍ. ສມາປຕ຺ຕິຍຎ຺ຫິ ສນິກນ຺ຕິກຕ຺ຕາ ເອສ ຂຬຸງ຺ໂກ ນາມ ກໂຕ. ອາປາທີສຸປິ ເອເສວ ນໂຍ.

ກຖຎ຺ຈ ສທ຺ຘ ອາຊານີຍຌາຍິຕໍ ໂຫຕີຕິ ກຖໍ ກາຣຓາກາຣຓໍ ຊານນ຺ຕສ຺ສ ສິນ຺ຘວສ຺ສ ຌາຍິຕໍ ໂຫຕິ. ຍຖາ ອິຓນ຺ຕິອາທີສຸ ອິຓສທິສໍ ພນ຺ຘນສທິສໍ ຘນຊານິສທິສໍ ກລິສງ຺ຂາຕມຫາປຣາຘສທິສຎ຺ຈ ກຕ຺ວາ ອຕ຺ຕໂນ ອຠິມຸຂສ຺ສ ປໂຕທສ຺ສ ອຊ຺ໂຌຫຣຓສງ຺ຂາຕໍ ປຕນໍ ວິປສ຺ສຕີຕິ ອຕ຺ໂຖ. ເນວ ປຖວິໍ ນິສ຺ສາຍ ຌາຍຕີຕິ ສມາປຕ຺ຕິສຸຂນິກນ຺ຕິຍາ ອຠາເວນ ປຖວິອາຣມ຺ມຓາຍ ຈຕຸກ຺ກປຎ຺ຈກຊ຺ຌານສຎ຺ຎາຍ ນ ຌາຍຕິ, ນິຍນ຺ຕິຍາ ອຠາເວເນວ ໂສ ອາຊານີໂຍ ນາມ ໂຫຕີຕິ. ຌາຍຕິ ຈ ປນາຕິ ນິພ຺ພານາຣມ຺ມຓາຍ ຜລສມາປຕ຺ຕິຍາ ຌາຍຕິ. ປຖວິຍໍ ປຖວິສຎ຺ຎາ ວິຠູຕາ ໂຫຕີຕິ ປຖວາຣມ຺ມເຓ ອຸປ຺ປນ຺ນາ ຈຕຸກ຺ກປຎ຺ຈກຊ຺ຌານສຎ຺ຎາ ວິຠູຕາ ປາກຏາ ໂຫຕິ. ‘‘ວິຠູຕາ, ຠນ຺ເຕ, ຣູປສຎ຺ຎາ ອວິຠູຕາ ອຏ຺ຐິກສຎ຺ຎາ’’ຕິ ອິມສ຺ມິຎ຺ຫິ ສຸຕ຺ເຕ ສມຕິກ຺ກມສ຺ສ ອຕ຺ຖິຕາຍ ວິຠູຕຕາ ວຸຕ຺ຕາ, ອິຘ ປນ ວິປສ຺ສນາວເສນ ອນິຈ຺ຈທຸກ຺ຂານຕ຺ຕໂຕ ທິຏ຺ຐຕ຺ຕາ ວິຠູຕາ ນາມ ຊາຕາ. ອາໂປສຎ຺ຎາທີສຸປິ ເອເສວ ນໂຍ. ເອວເມຕ຺ຖ ເຫຏ຺ຐາ ວິຍ ສມາປຕ຺ຕິວເສນ ສມຕິກ຺ກມໍ ອວຕ຺ວາ ວິປສ຺ສນາຈາຣວເສນ ສມຕິກ຺ກໂມ ວຸຕ຺ໂຕ. ເອວໍ ຌາຍີຕິ ເອວໍ ວິປສ຺ສນາປຏິປາຏິຍາ ອາຄນ຺ຕ຺ວາ ອຸປ຺ປາທິຕາຍ ຜລສມາປຕ຺ຕິຍາ ຌາຍນ຺ໂຕ.

໑໐. ໂມຣນິວາປສຸຕ຺ຕວຓ຺ຓນາ

໑໐. ທສເມ ອຈ຺ຈນ຺ຕນິຏ຺ໂຐຕິ ອນ຺ຕໍ ອຕີຕຕ຺ຕາ ອຈ຺ຈນ຺ຕສງ຺ຂາຕໍ ອວິນາສຘມ຺ມໍ ນິພ຺ພານໍ ນິຏ຺ຐາ ອສ຺ສາຕິ ອຈ຺ຈນ຺ຕນິຏ຺ໂຐ. ອິມິນາ ນເຍນ ເສສປທານິ ເວທິຕພ຺ພານິ. ຊເນຕສ຺ມິນ຺ຕິ ຊນິຕສ຺ມິໍ, ປຊາຍາຕິ ອຕ຺ໂຖ. ເຍ ໂຄຕ຺ຕປຏິສາຣິໂນຕິ ເຍ ຊນາ ຕສ຺ມິໍ ໂຄຕ຺ເຕ ປຏິສຣນ຺ຕິ ‘‘ອຫໍ ໂຄຕໂມ, ອຫໍ ກສ຺ສໂປ’’ຕິ, ເຕສຸ ໂລເກ ໂຄຕ຺ຕປຏິສາຣີສຸ ຂຕ຺ຕິໂຍ ເສຏ຺ໂຐ. ອນຸມຕາ ມຍາຕິ ມມ ສພ຺ພຎ຺ຎຸຕຎ຺ຎາເຓນ ສທ຺ຘິໍ ສໍສນ຺ເທຕ຺ວາ ເທສິຕາ ມຍາ ອນຸຎ຺ຎາຕາ. ເສສໍ ສພ຺ພຕ຺ຖ ອຸຕ຺ຕານຕ຺ຖເມວາຕິ.

ນິສ຺ສຍວຄ຺ໂຄ ປຐໂມ.

໒. ອນຸສ຺ສຕິວຄ຺ໂຄ

໑-໒. ມຫານາມສຸຕ຺ຕທ຺ວຍວຓ຺ຓນາ

໑໑-໑໒. ທຸຕິຍສ຺ສ ປຐເມ ນານາວິຫາເຣຫິ ວິຫຣຕນ຺ຕິ ຄິຫີນໍ ນິພທ຺ໂຘ ເອໂກ ວິຫາໂຣ ນາມ ນຕ຺ຖິ, ຕສ຺ມາ ອມ຺ຫາກໍ ອນິພທ຺ຘວິຫາເຣນ ວິຫຣນ຺ຕານໍ ເກນ ວິຫາເຣນ ກຕເຣນ ນິພທ຺ຘວິຫາເຣນ ວິຫາຕພ຺ພນ຺ຕິ ປຸຈ຺ຉຕິ. ອາຣາຘໂກຕິ ສມ຺ປາທໂກ ປຣິປູຣໂກ. ຘມ຺ມໂສຕສມາປນ຺ໂນ ພຸທ຺ຘານຸສ຺ສຕິໍ ຠາເວຕີຕິ ຘມ຺ມໂສຕສມາປນ຺ໂນ ຫຸຕ຺ວາ ພຸທ຺ຘານຸສ຺ສຕິໍ ຠາເວຕິ. ທຸຕິເຍ ຄິລານາ ວຸຏ຺ຐິໂຕຕິ ຄິລາໂນ ຫຸຕ຺ວາ ວຸຏ຺ຐິໂຕ.

໓. ນນ຺ທິຍສຸຕ຺ຕວຓ຺ຓນາ

໑໓. ຕຕິເຍ ກລ຺ຍາຓມິຕ຺ເຕຕິ ສຸມິຕ຺ເຕ. ເອວເມຕ຺ຖ ກລ຺ຍາຓມິຕ຺ຕວເສນ ສງ຺ຆານຸສ຺ສຕິ ກຖິຕາ. ກພຬີກາຣາຫາຣຠກ຺ຂານນ຺ຕິ ກາມາວຈຣເທວານໍ. ອສມຍວິມຸຕ຺ໂຕຕິ ອສມຍວິມຸຕ຺ຕິຍາ ວິມຸຕ຺ໂຕ ຂີຓາສໂວ.

໔. ສຸຠູຕິສຸຕ຺ຕວຓ຺ຓນາ

໑໔. ຈຕຸຕ຺ເຖ ໂກ ນາມາຍໍ ສຸຠູຕີ ຠິກ຺ຂູຕິ ຊານນ຺ໂຕປິ ສຕ຺ຖາ ກຖາສມຸຏ຺ຐາປນຕ຺ຖໍ ປຸຈ຺ຉຕິ. ສຸທຕ຺ຕສ຺ສ ອຸປາສກສ຺ສ ປຸຕ຺ໂຕຕິ ອນາຖປິຓ຺ຑິກໍ ສນ຺ຘາຍາຫ. ອນາຖປິຓ຺ຑິກສ຺ສ ຫິ ປຸຕ຺ໂຕ ອຕ຺ຕໂນ ຈູຬປິຕຸ ສນ຺ຕິເກ ປພ຺ພຊິໂຕ, ອຖ ນໍ ສຸຠູຕິຕ຺ເຖໂຣ ອາທາຍ ສຕ຺ຖຸ ສນ຺ຕິກໍ ອຄມາສິ. ສທ຺ຘາປທາເນສູຕິ ສທ຺ຘານໍ ປຸຄ຺ຄລານໍ ອປທາເນສຸ ລກ຺ຂເຓສຸ.

໕. ເມຕ຺ຕສຸຕ຺ຕວຓ຺ຓນາ

໑໕. ປຎ຺ຈເມ ສຸຂໍ ສຸປຕີຕິ ຍຖາ ເສສຊນາ ສມ຺ປຣິວຕ຺ຕມານາ ກາກຈ຺ຉມານາ ທຸກ຺ຂໍ ສຸປນ຺ຕິ, ເອວໍ ອສຸປິຕ຺ວາ ສຸຂໍ ສຸປຕິ. ນິທ຺ທໍ ໂອກ຺ກມນ຺ໂຕປິ ສມາປຕ຺ຕິໍ ສມາປນ຺ໂນ ວິຍ ໂຫຕິ. ສຸຂໍ ປຏິພຸຊ຺ຌຕີຕິ ຍຖາ ອຎ຺ເຎ ນິຕ຺ຖຸນນ຺ຕາ ວິຊມ຺ຠມານາ ສມ຺ປຣິວຕ຺ຕນ຺ຕາ ທຸກ຺ຂໍ ປຏິພຸຊ຺ຌນ຺ຕິ, ເອວໍ ອປ຺ປຏິພຸຊ຺ຌິຕ຺ວາ ວິກສມານໍ ວິຍ ປທຸມໍ ສຸຂໍ ນິພ຺ພິກາໂຣ ປຏິພຸຊ຺ຌຕິ. ນ ປາປກໍ ສຸປິນໍ ປສ຺ສຕີຕິ ສຸປິນໍ ປສ຺ສນ຺ໂຕປິ ຠທ຺ທກເມວ ສຸປິນໍ ປສ຺ສຕິ, ເຈຕິຍໍ ວນ຺ທນ຺ໂຕ ວິຍ ປູຊໍ ກໂຣນ຺ໂຕ ວິຍ ຈ ຘມ຺ມໍ ສຸຓນ຺ໂຕ ວິຍ ຈ ໂຫຕິ. ຍຖາ ປນຎ຺ເຎ ອຕ຺ຕານໍ ໂຈເຣຫິ ສມ຺ປຣິວາຣິຕໍ ວິຍ ວາເຬຫິ ອຸປທ຺ທຸຕໍ ວິຍ ປປາເຕ ປຕນ຺ຕໍ ວິຍ ຈ ປສ຺ສນ຺ຕິ, ນ ເອວໍ ປາປກໍ ສຸປິນໍ ປສ຺ສຕິ.

ມນຸສ຺ສານໍ ປິໂຍ ໂຫຕີຕິ ອຸເຣ ອາມຸກ຺ກມຸຕ຺ຕາຫາໂຣ ວິຍ ສີເສ ປິຬນ຺ຘິຕມາລາ ວິຍ ຈ ມນຸສ຺ສານໍ ປິໂຍ ໂຫຕິ ມນາໂປ. ອມນຸສ຺ສານໍ ປິໂຍ ໂຫຕີຕິ ຍເຖວ ມນຸສ຺ສານໍ, ອມນຸສ຺ສານມ຺ປິ ປິໂຍ ໂຫຕິ ວິສາຂຕ຺ເຖໂຣ ວິຍ. ວຕ຺ຖຸ ວິສຸທ຺ຘິມຄ຺ເຄ (ວິສຸທ຺ຘິ. ໑.໒໕໘) ເມຕ຺ຕາກມ຺ມຏ຺ຐານນິທ຺ເທເສ ວິຕ຺ຖາຣິຕເມວ. ເທວຕາ ຣກ຺ຂນ຺ຕີຕິ ປຸຕ຺ຕມິວ ມາຕາປິຕໂຣ ເທວຕາ ຣກ຺ຂນ຺ຕິ. ນາສ຺ສ ອຄ຺ຄິ ວາ ວິສໍ ວາ ສຕ຺ຖໍ ວາ ກມຕີຕິ ເມຕ຺ຕາວິຫາຣິສ຺ສ ກາເຍ ອຸຕ຺ຕຣາຍ ອຸປາສິກາຍ ວິຍ ອຄ຺ຄິ ວາ, ສໍຍຸຕ຺ຕຠາຓກຈູຬສີວຕ຺ເຖຣສ຺ເສວ ວິສໍ ວາ, ສໍກິຈ຺ຈສາມເຓຣສ຺ເສວ ສຕ຺ຖໍ ວາ ນ ກມຕິ ນປ຺ປວິສຕິ, ນາສ຺ສ ກາຍໍ ວິໂກເປຕີຕິ ວຸຕ຺ຕໍ ໂຫຕິ. ເຘນຸວຕ຺ຖຸມ຺ປິ ເຈຕ຺ຖ ກຖຍນ຺ຕິ. ເອກາ ກິຣ ເຘນຸ ວຈ຺ຉກສ຺ສ ຂີຣຘາຣໍ ມຸຎ຺ຈມານາ ອຏ຺ຐາສິ. ເອໂກ ລຸທ຺ທໂກ ‘‘ຕໍ ວິຊ຺ຌິສ຺ສາມີ’’ຕິ ຫຕ຺ເຖນ ສມ຺ປຣິວຕ຺ເຕຕ຺ວາ ທີຆທຓ຺ຑໍ ສຕ຺ຕິໍ ມຸຎ຺ຈິ. ສາ ຕສ຺ສາ ສຣີຣໍ ອາຫຈ຺ຈ ຕາລປຓ຺ຓໍ ວິຍ ວຏ຺ຏມານາ ຄຕາ, ເນວ ອຸປຈາຣພເລນ ນ ອປ຺ປນາພເລນ, ເກວລໍ ວຈ຺ຉເກ ພລວຫິຕຈິຕ຺ຕຕາຍ. ເອວໍ ມຫານຸຠາວາ ເມຕ຺ຕາ.

ຕຸວຏໍ ຈິຕ຺ຕໍ ສມາຘິຍຕີຕິ ເມຕ຺ຕາວິຫາຣິໂນ ຂິປ຺ປເມວ ຈິຕ຺ຕໍ ສມາຘິຍຕິ, ນຕ຺ຖິ ຕສ຺ສ ທນ຺ຘາຍິຕຕ຺ຕໍ. ມຸຂວຓ຺ໂຓ ວິປ຺ປສີທຕີຕິ ພນ຺ຘນາ ປວຸຕ຺ຕຕາລປກ຺ກໍ ວິຍ ຈສ຺ສ ວິປ຺ປສນ຺ນວຓ຺ຓໍ ມຸຂໍ ໂຫຕິ. ອສມ຺ມູຬ຺ໂຫ ກາລໍ ກໂຣຕີຕິ ເມຕ຺ຕາວິຫາຣິໂນ ສມ຺ໂມຫມຣຓໍ ນາມ ນຕ຺ຖິ, ອສມ຺ມູຬ຺ໂຫ ປນ ນິທ຺ທໍ ໂອກ຺ກມນ຺ໂຕ ວິຍ ກາລໍ ກໂຣຕິ. ອຸຕ຺ຕຣິ ອປ຺ປຏິວິຊ຺ຌນ຺ໂຕຕິ ເມຕ຺ຕາສມາປຕ຺ຕິໂຕ ອຸຕ຺ຕຣິ ອຣຫຕ຺ຕໍ ອຘິຄນ຺ຕຸໍ ອສກ຺ໂກນ຺ໂຕ ອິໂຕ ຈວິຕ຺ວາ ສຸຕ຺ຕປ຺ປພຸທ຺ໂຘ ວິຍ ພ຺ຣຫ຺ມໂລກໍ ອຸປປຊ຺ຊຕີຕິ.

໖. ອຏ຺ຐກນາຄຣສຸຕ຺ຕວຓ຺ຓນາ

໑໖. ຉຏ຺ເຐ ທສໂມຕິ ຊາຕິໂຄຕ຺ຕວເສນ ເຈວ ສາຣປຕ຺ຕກຸລຄຓນາຍ ຈ ທສເມ ຐາເນ ຄຓີຍຕິ, ເຕນສ຺ສ ທສໂມຕ຺ເວວ ນາມໍ ຊາຕໍ. ອຏ຺ຐກນາຄໂຣຕິ ອຏ຺ຐກນຄຣວາສີ. ກຸກ຺ກຸຏາຣາເມຕິ ກຸກ຺ກຸຏເສຏ຺ຐິນາ ກາຣິເຕ ອາຣາເມ.

ເຕນ ຠຄວຕາ…ເປ… ສມ຺ມທກ຺ຂາໂຕຕິ ເອຕ຺ຖ ອຍໍ ສງ຺ເຂປຕ຺ໂຖ – ໂຍ ໂສ ຠຄວາ ສມຕິໍສ ປາຣມິໂຍ ປູເຣຕ຺ວາ ສພ຺ພກິເລເສ ຠຎ຺ຊິຕ຺ວາ ອນຸຕ຺ຕຣໍ ສມ຺ມາສມ຺ໂພຘິໍ ອຠິສມ຺ພຸທ຺ໂຘ, ເຕນ ຠຄວຕາ ເຕສໍ ເຕສໍ ສຕ຺ຕານໍ ອາສຍານຸສຍໍ ຊານຕາ, ຫຕ຺ຖຕເລ ຐປິຕໍ ອາມລກໍ ວິຍ ສພ຺ພເຎຍ຺ຍຘມ຺ເມ ປສ຺ສຕາ, ອປິຈ ປຸພ຺ເພນິວາສາທີຫິ ຊານຕາ, ທິພ຺ເພນ ຈກ຺ຂຸນາ ປສ຺ສຕາ, ຕີຫິ ວາ ວິຊ຺ຊາຫິ ຉຫິ ວາ ປນ ອຠິຎ຺ຎາຫິ ຊານຕາ, ສພ຺ພຕ຺ຖ ອປ຺ປຏິຫເຕນ ສມນ຺ຕຈກ຺ຂຸນາ ປສ຺ສຕາ, ສພ຺ພຘມ຺ມຊານນສມຕ຺ຖາຍ ປຎ຺ຎາຍ ຊານຕາ, ສພ຺ພສຕ຺ຕານໍ ຈກ຺ຂຸວິສຍາຕີຕານິ ຕິໂຣກຸຏ຺ຏາທິຄຕານິ ຈາປິ ຣູປານິ ອຕິວິສຸທ຺ເຘນ ມໍສຈກ຺ຂຸນາ ວາ ປສ຺ສຕາ, ອຕ຺ຕຫິຕສາຘິກາຍ ສມາຘິປທຏ຺ຐານາຍ ປຏິເວຘປຎ຺ຎາຍ ຊານຕາ, ປຣຫິຕສາຘິກາຍ ກຣຸຓາປທຏ຺ຐານາຍ ເທສນາປຎ຺ຎາຍ ປສ຺ສຕາ, ອນ຺ຕຣາຍິກຘມ຺ເມ ວາ ຊານຕາ, ນິຍ຺ຍານິກຘມ຺ເມ ປສ຺ສຕາ, ອຣີນໍ ຫຕຕ຺ຕາ ອຣຫຕາ, ສມ຺ມາ ສາມໍ ສພ຺ພຘມ຺ມານໍ ພຸທ຺ຘຕ຺ຕາ ສມ຺ມາສມ຺ພຸທ຺ເຘນາຕິ ເອວໍ ຈຕຸເວສາຣຊ຺ຊວເສນ ຈຕູຫິ ກາຣເຓຫິ ໂຖມິເຕນ ອຕ຺ຖິ ນຸ ໂຂ ເອໂກ ຘມ຺ໂມ ອກ຺ຂາໂຕຕິ.

ອຠິສງ຺ຂຕນ຺ຕິ ກຕໍ ອຸປ຺ປາທິຕໍ. ອຠິສຎ຺ເຈຕຍິຕນ຺ຕິ ເຈຕຍິຕໍ ກປ຺ປຍິຕໍ. ໂສ ຕຕ຺ຖ ຐິໂຕຕິ ໂສ ຕສ຺ມິໍ ສມຖວິປສ຺ສນາຘມ຺ເມ ຐິໂຕ. ຘມ຺ມຣາເຄນ ຘມ຺ມນນ຺ທິຍາຕິ ປທທ຺ວເຍນປິ ສມຖວິປສ຺ສນາສຸ ຉນ຺ທຣາໂຄ ວຸຕ຺ໂຕ. ສມຖວິປສ຺ສນາສຸ ຫິ ສພ຺ເພນ ສພ຺ພໍ ຉນ຺ທຣາຄໍ ປຣິຍາທິຍິຕຸໍ ສກ຺ໂກນ຺ໂຕ ອຣຫາ ໂຫຕິ, ອສກ຺ໂກນ຺ໂຕ ອນາຄາມີ ໂຫຕິ. ໂສ ສມຖວິປສ຺ສນາສຸ ຉນ຺ທຣາຄສ຺ສ ອປ຺ປຫີນຕ຺ຕາ ຈຕຸຕ຺ຖຊ຺ຌານເຈຕນາຍ ສຸທ຺ຘາວາເສ ນິພ຺ພຕ຺ຕຕິ. ອຍໍ ອາຈຣິຍານໍ ສມານຕ຺ຖກຖາ.

ວິຕຓ຺ຑວາທີ ປນາຫ – ‘‘ເຕເນວ ຘມ຺ມຣາເຄນາຕິ ວຈນໂຕ ອກຸສເລນ ສຸທ຺ຘາວາເສ ນິພ຺ພຕ຺ຕຕີ’’ຕິ. ໂສ ‘‘ສຸຕ຺ຕໍ ອາຫຣາຫີ’’ຕິ ວຕ຺ຕພ຺ໂພ. ອທ຺ຘາ ອຎ຺ຎໍ ອປສ຺ສນ຺ໂຕ ອິທເມວ ອາຫຣິສ຺ສຕິ. ຕໂຕ ວຕ຺ຕພ຺ໂພ ‘‘ກິມ຺ປນິທໍ ສຸຕ຺ຕໍ ນີຕຕ຺ຖໍ, ອຸທາຫຸ ເນຍ຺ຍຕ຺ຖ’’ນ຺ຕິ. ອທ຺ຘາ ‘‘ນີຕຕ຺ຖ’’ນ຺ຕິ ວກ຺ຂຕິ. ຕໂຕ ວຕ຺ຕພ຺ໂພ – ເອວໍ ສນ຺ເຕ ອນາຄາມິຜລຕ຺ຖິເກນ ສມຖວິປສ຺ສນາສຸ ຉນ຺ທຣາໂຄ ກຕ຺ຕພ຺ໂພ ຠວິສ຺ສຕິ, ຉນ຺ທຣາເຄ ອຸປ຺ປາທິເຕ ອນາຄາມິຜລໍ ປຏິລທ຺ຘໍ ຠວິສ຺ສຕິ, ມາ ‘‘ສຸຕ຺ຕໍ ເມ ລທ຺ຘ’’ນ຺ຕິ ຍໍ ວາ ຕໍ ວາ ທີເປຫິ. ປຎ຺ຫໍ ກເຖນ຺ເຕນ ຫິ ອາຈຣິຍສ຺ສ ສນ຺ຕິເກ ອຸຄ຺ຄເຫຕ຺ວາ ອຕ຺ຖຣສໍ ປຏິວິຊ຺ຌິຕ຺ວາ ກເຖຕຸໍ ວຏ຺ຏຕິ. ອກຸສເລນ ຫິ ສຄ຺ເຄ, ກຸສເລນ ຈ ອປາເຍ ປຏິສນ຺ຘິ ນາມ ນຕ຺ຖິ. ວຸຕ຺ຕຎ຺ເຈຕໍ ຠຄວຕາ –

‘‘ນ, ຠິກ຺ຂເວ, ໂລຠເຊນ ກມ຺ເມນ, ໂທສເຊນ ກມ຺ເມນ, ໂມຫເຊນ ກມ຺ເມນ ເທວາ ປຎ຺ຎາຍນ຺ຕິ, ມນຸສ຺ສາ ປຎ຺ຎາຍນ຺ຕິ, ຍາ ວາ ປນຎ຺ຎາປິ ກາຈິ ສຸຄຕິໂຍ. ອຖ ໂຂ, ຠິກ຺ຂເວ, ໂລຠເຊນ ກມ຺ເມນ, ໂທສເຊນ ກມ຺ເມນ, ໂມຫເຊນ ກມ຺ເມນ ນິຣໂຍ ປຎ຺ຎາຍຕິ, ຕິຣຈ຺ຉານໂຍນິ ປຎ຺ຎາຍຕິ, ເປຕ຺ຕິວິສໂຍ ປຎ຺ຎາຍຕິ, ຍາ ວາ ປນຎ຺ຎາປິ ກາຈິ ທຸຄ຺ຄຕິໂຍ’’ຕິ (ອ. ນິ. ໖.໓໙) –

ເອວໍ ສຎ຺ຎາເປຕພ຺ໂພ. ສເຈ ສຎ຺ຊານາຕິ, ສຎ຺ຊານາຕຸ. ໂນ ເຈ ສຎ຺ຊານາຕິ, ‘‘ຄຈ຺ຉ ປາໂຕວ ວິຫາຣໍ ປວິສິຕ຺ວາ ຍາຄຸໍ ປິວາ’’ຕິ ອຸຍ຺ໂຍເຊຕພ຺ໂພ.

ອຍໍ ໂຂ, ຄຫປຕິ, ເອກຘມ຺ໂມ ອກ຺ຂາໂຕຕິ ເອກໍ ຘມ຺ມໍ ປຸຈ຺ຉິເຕນ ‘‘ອຍມ຺ປິ ເອກຘມ຺ໂມ ອກ຺ຂາໂຕ, ອຍມ຺ປິ ເອກຘມ຺ໂມ ອກ຺ຂາໂຕ’’ຕິ ເອວໍ ປຸຈ຺ຉາວເສນ ກຖິຕຕ຺ຕາ ເອກາທສປິ ຘມ຺ມາ ເອກຘມ຺ໂມ ນາມ ກໂຕ. ອມຕຸປ຺ປຕ຺ຕິອຕ຺ເຖນ ວາ ສພ຺ເພປິ ເອກຘມ຺ໂມຕິ ວຕ຺ຕຸໍ ວຏ຺ຏຕິ.

ນິຘິມຸຂໍ ຄເວສນ຺ໂຕຕິ ນິຘິໍ ປຣິເຍສນ຺ໂຕ. ສກິເທວາຕິ ເອກປ຺ປໂຍເຄເນວ. ກຖໍ ປນ ເອກປ຺ປໂຍເຄເນວ ເອກາທສນ຺ນໍ ນິຘີນໍ ອຘິຄໂມ ໂຫຕີຕິ? ອິເຘກຈ຺ໂຈ ອຣຎ຺ເຎ ຊີວິຕວຸຕ຺ຕິໍ ຄເວສມາໂນ ຈຣຕິ. ຕເມນໍ ອຎ຺ຎຕໂຣ ອຕ຺ຖຈຣໂກ ທິສ຺ວາ ‘‘ກິໍ, ໂຠ, ຈຣສີ’’ຕິ ປຸຈ຺ຉຕິ. ໂສ ‘‘ຊີວິຕວຸຕ຺ຕິໍ ປຣິເຍສາມີ’’ຕິ ອາຫ. ອິຕໂຣ ‘‘ເຕນ ຫິ ສມ຺ມ ອາຄຈ຺ຉ, ເອຕໍ ປາສາຓໍ ປວຏ຺ເຏຫີ’’ຕິ ອາຫ. ໂສ ຕໍ ປວຏ຺ເຏຕ຺ວາ ອຸປຣູປຣິຏ຺ຐິຕາ ວາ ກຸຈ຺ຉິຍາ ກຸຈ຺ຉິໍ ອາຫຈ຺ຈ ຐິຕາ ວາ ເອກາທສ ກຸມ຺ຠິໂຍ ປສ຺ສຕິ. ເອວໍ ເອກປ຺ປໂຍເຄນ ເອກາທສນ຺ນໍ ອຘິຄໂມ ໂຫຕິ.

ອາຈຣິຍຘນໍ ປຣິເຍສິສ຺ສນ຺ຕີຕິ ອຎ຺ຎຕິຕ຺ຖິຍາ ຫິ ຍສ຺ສ ສນ຺ຕິເກ ສິປ຺ປໍ ອຸຄ຺ຄຓ຺ຫນ຺ຕິ, ຕສ຺ສ ສິປ຺ປຸຄ຺ຄຫຓໂຕ ປຸເຣ ວາ ປຈ຺ຉາ ວາ ອນ຺ຕຣນ຺ຕຣາ ວາ ເຄຫໂຕ ນີຫຣິຕ຺ວາ ຘນໍ ເທນ຺ຕິ. ເຍສໍ ເຄເຫ ນຕ຺ຖິ, ເຕ ຎາຕິສຠາຄໂຕ ປຣິເຍສນ຺ຕິ. ເຍສໍ ຕມ຺ປິ ນຕ຺ຖິ, ເຕ ສຠາຄໂຕ ປຣິເຍສນ຺ຕິ. ຕຖາ ອລຠມານາ ຠິກ຺ຂມ຺ປິ ຈຣິຕ຺ວາ ເທນ຺ຕິເຍວ. ຕໍ ສນ຺ຘາເຍຕໍ ວຸຕ຺ຕໍ.

ກິໍ ປນາຫນ຺ຕິ ພາຫິຣກາ ຕາວ ອນິຍ຺ຍານິເກປິ ສາສເນ ສິປ຺ປມຕ຺ຕທາຍກສ຺ສ ຘນໍ ປຣິເຍສນ຺ຕິ, ອຫໍ ປນ ເອວໍວິເຘ ນິຍ຺ຍານິກສາສເນ ເອກາທສວິຘໍ ອມຕຸປ຺ປຕ຺ຕິປຏິປທໍ ເທເສນ຺ຕສ຺ສ ອາຈຣິຍສ຺ສ ປູຊໍ ກິໍ ນ ກຣິສ຺ສາມິ, ກຣິສ຺ສາມິເຍວາຕິ ວທຕິ. ປຈ຺ເຈກໍ ທຸສ຺ສຍຸເຄນ ອຈ຺ຉາເທສີຕິ ເອກເມກສ຺ສ ຠິກ຺ຂຸໂນ ເອເກກໍ ທຸສ຺ສຍຸຄໍ ອທາສີຕິ ອຕ຺ໂຖ. ສມຸທາຈາຣວຈນໍ ປເນຕ຺ຖ ເອວຣູປໍ ໂຫຕິ, ຕສ຺ມາ ອຈ຺ຉາເທສີຕິ ວຸຕ຺ຕໍ. ປຎ຺ຈສຕໍ ວິຫາຣນ຺ຕິ ປຎ຺ຈສຕຄ຺ຆນິກໍ ປຓ຺ຓສາລໍ ກາເຣສີຕິ ອຕ຺ໂຖ.

໗. ໂຄປາລສຸຕ຺ຕວຓ຺ຓນາ

໑໗. ສຕ຺ຕເມ ຕິສ຺ໂສ ກຖາ ເອກນາຬິກາ ຈຕຸຣສ຺ສາ ນິສິນ຺ນວຕ຺ຕິກາຕິ. ຕຕ຺ຖ ປາຬິໍ ວຕ຺ວາ ເອເກກສ຺ສ ປທສ຺ສ ອຕ຺ຖກຖນໍ ເອກນາຬິກາ ນາມ. ອປຓ຺ຑິຕໂຄປາລກໍ ທສ຺ເສຕ຺ວາ, ອປຓ຺ຑິຕຠິກ຺ຂຸໍ ທສ຺ເສຕ຺ວາ, ປຓ຺ຑິຕໂຄປາລກໍ ທສ຺ເສຕ຺ວາ, ປຓ຺ຑິຕຠິກ຺ຂຸໍ ທສ຺ເສຕ຺ວາຕິ ຈຕຸກ຺ກໍ ພນ຺ຘິຕ຺ວາ ກຖນໍ ຈຕຸຣສ຺ສາ ນາມ. ອປຓ຺ຑິຕໂຄປາລກໍ ທສ຺ເສຕ຺ວາ ປຣິໂຍສານຄມນໍ, ອປຓ຺ຑິຕຠິກ຺ຂຸໍ ທສ຺ເສຕ຺ວາ ປຣິໂຍສານຄມນໍ, ປຓ຺ຑິຕໂຄປາລກໍ ທສ຺ເສຕ຺ວາ ປຣິໂຍສານຄມນໍ, ປຓ຺ຑິຕຠິກ຺ຂຸໍ ທສ຺ເສຕ຺ວາ ປຣິໂຍສານຄມນນ຺ຕິ ອຍໍ ນິສິນ຺ນວຕ຺ຕິກາ ນາມ. ອຍໍ ອິຘ ສພ຺ພາຈຣິຍານໍ ອາຈິຓ຺ຓາ.

ເອກາທສຫິ, ຠິກ຺ຂເວ, ອງ຺ເຄຫີຕິ ເອກາທສຫິ ອຄຸຓໂກຏ຺ຐາເສຫິ. ໂຄຄຓນ຺ຕິ ໂຄມຓ຺ຑລໍ. ປຣິຫຣິຕຸນ຺ຕິ ປຣິຄ຺ຄເຫຕ຺ວາ ວິຈຣິຕຸໍ. ຜາຕິໍ ກາຕຸນ຺ຕິ ວຑ຺ຒິໍ ອາປາເທຕຸໍ. ອິຘາຕິ ອິມສ຺ມິໍ ໂລເກ. ນ ຣູປຎ຺ຎູ ໂຫຕີຕິ ຄຓນໂຕ ວາ ວຓ຺ຓໂຕ ວາ ຣູປໍ ນ ຊານາຕິ. ຄຓນໂຕ ນ ຊານາຕິ ນາມ ອຕ຺ຕໂນ ຄຸນ຺ນໍ ສຕໍ ວາ ສຫສ຺ສໍ ວາຕິ ສງ຺ຂ຺ຍໍ ນ ຊານາຕິ, ໂສ ຄາວີສຸ ຫຏາສຸ ວາ ປລາຕາສຸ ວາ ໂຄຄຓໍ ຄເຓຕ຺ວາ ‘‘ອຊ຺ຊ ເອຕ຺ຕກາ ນ ທິສ຺ສນ຺ຕີ’’ຕິ ທ຺ເວ ຕີຓິ ຄາມນ຺ຕຣານິ ວາ ອຏວິໍ ວາ ວິຈຣນ຺ໂຕ ນ ປຣິເຍສຕິ. ອຎ຺ເຎສໍ ຄາວີສຸ ອຕ຺ຕໂນ ໂຄຄຓໍ ປວິຏ຺ຐາສຸປິ ໂຄຄຓໍ ຄເຓຕ຺ວາ ‘‘ອິມາ ເອຕ຺ຕິກາ ຄາໂວ ນ ອມ຺ຫາກ’’ນ຺ຕິ ຍຏ຺ຐິຍາ ໂປເຖຕ຺ວາ ນ ນີຫຣຕິ. ຕສ຺ສ ນຏ຺ຐາ ຄາວິໂຍ ນຏ຺ຐາວ ໂຫນ຺ຕິ. ປຣຄາວິໂຍ ຄເຫຕ຺ວາ ຈຣຕິ. ໂຄສາມິກາ ທິສ຺ວາ ‘‘ອຍໍ ເອຕ຺ຕກໍ ກາລໍ ອມ຺ຫາກໍ ເຘນູ ທຸຫີ’’ຕິ ຕຊ຺ເຊຕ຺ວາ ອຕ຺ຕໂນ ຄາວິໂຍ ຄເຫຕ຺ວາ ຄຈ຺ຉນ຺ຕິ. ຕສ຺ສ ໂຄຄໂຓປິ ປຣິຫາຍຕິ, ປຎ຺ຈ ໂຄຣສປຣິໂຠຄໂຕປິ ປຣິພາຫິໂຣ ໂຫຕິ. ວຓ຺ຓໂຕ ນ ຊານາຕິ ນາມ ‘‘ເອຕ຺ຕິກາ ຄາວີ ເສຕາ, ເອຕ຺ຕິກາ ຣຕ຺ຕາ, ເອຕ຺ຕິກາ ກາຬາ, ເອຕ຺ຕິກາ ໂອທາຕາ, ເອຕ຺ຕິກາ ກພຣາ, ເອຕ຺ຕິກາ ນີລາ’’ຕິ ນ ຊານາຕິ. ໂສ ຄາວີສຸ ຫຏາສຸ ວາ ປລາຕາສຸ ວາ…ເປ… ປຎ຺ຈໂຄຣສປຣິໂຠຄໂຕປິ ປຣິພາຫິໂຣ ໂຫຕິ.

ນ ລກ຺ຂຓກຸສໂລຕິ ຄາວີນໍ ສຣີເຣ ກຕໍ ຘນຸສຕ຺ຕິສູລາທິເຠທໍ ລກ຺ຂຓໍ ນ ຊານາຕິ. ໂສ ຄາວີສຸ ຫຏາສຸ ວາ ປລາຕາສຸ ວາ ‘‘ອຊ຺ຊ ອສຸກລກ຺ຂຓາ ອສຸກລກ຺ຂຓາ ຈ ຄາໂວ ນ ທິສ຺ສນ຺ຕີ’’ຕິ…ເປ… ປຎ຺ຈໂຄຣສປຣິໂຠຄໂຕປິ ປຣິພາຫິໂຣ ໂຫຕິ.

ນ ອາສາຏິກໍ ຫາເຣຕາຕິ ຄຸນ຺ນໍ ຂາຓຸກຓ຺ຏກາທີຫິ ປຫຏຏ຺ຐາເນສຸ ວໂຓ ໂຫຕິ. ຕຕ຺ຖ ນີລມກ຺ຂິກາ ອຓ຺ຑການິ ຐເປນ຺ຕິ, ເຕສໍ ອາສາຏິກາຕິ ນາມໍ. ຕານິ ທຓ຺ຑເກນ ອປເນຕ຺ວາ ເຠສຊ຺ຊໍ ທາຕພ຺ພໍ ໂຫຕິ, ພາໂລ ໂຄປາລໂກ ຕຖາ ນ ກໂຣຕິ. ເຕນ ວຸຕ຺ຕໍ – ‘‘ນ ອາສາຏິກໍ ຫາເຣຕາ ໂຫຕີ’’ຕິ. ຕສ຺ສ ຄຸນ຺ນໍ ວຓາ ວຑ຺ຒນ຺ຕິ, ຄມ຺ຠີຣາ ໂຫນ຺ຕິ, ປາຓກາ ກຸຈ຺ຉິໍ ປວິສນ຺ຕິ, ຄາໂວ ເຄລຎ຺ຎາຠິຠູຕາ ເນວ ຍາວທຕ຺ຖໍ ຕິຓໍ ຂາທິຕຸໍ ນ ປານີຍໍ ປາຕຸໍ ສກ຺ໂກນ຺ຕິ. ຕຕ຺ຖ ຄຸນ຺ນໍ ຂີຣໍ ຉິຊ຺ຊຕິ, ໂຄຓານໍ ຊໂວ ຫາຍຕິ, ອຸຠເຍສມ຺ປິ ຊີວິຕນ຺ຕຣາໂຍ ໂຫຕິ. ເອວມສ຺ສ ໂຄຄໂຓປິ ປຣິຫາຍຕິ…ເປ… ປຎ຺ຈໂຄຣສໂຕປິ ປຣິພາຫິໂຣ ໂຫຕິ.

ນ ວຓໍ ປຏິຈ຺ຉາເທຕາ ໂຫຕີຕິ ຄຸນ຺ນໍ ວຸຕ຺ຕນເຍເນວ ສຎ຺ຊາໂຕ ວໂຓ ເຠສຊ຺ຊໍ ທຕ຺ວາ ວາເກນ ວາ ຈີຣເກນ ວາ ພນ຺ຘິຕ຺ວາ ປຏິຈ຺ຉາເທຕພ຺ໂພ ໂຫຕິ. ພາລໂຄປາລໂກ ຕໍ ນ ກໂຣຕິ. ອຖສ຺ສ ຄຸນ຺ນໍ ວເຓຫິ ຍູສາ ປຄ຺ຆຣນ຺ຕິ, ຕາ ອຎ຺ຎມຎ຺ຎໍ ນິຆໍສນ຺ຕິ. ເຕນ ອຎ຺ເຎສມ຺ປິ ວຓາ ຊາຍນ຺ຕິ. ເອວໍ ຄາໂວ ເຄລຎ຺ຎາຠິຠູຕາ ເນວ ຍາວທຕ຺ຖໍ ຕິຓານິ ຂາທິຕຸໍ…ເປ… ປຣິພາຫິໂຣ ໂຫຕິ.

ນ ຘູມໍ ກຕ຺ຕາ ໂຫຕີຕິ ອນ຺ໂຕວສ຺ເສ ຑໍສມກສາທີນໍ ອຸສ຺ສນ຺ນກາເລ ໂຄຄເຓ ວຊໍ ປວິຏ຺ເຐ ຕຕ຺ຖ ຕຕ຺ຖ ຘູໂມ ກາຕພ຺ໂພ ໂຫຕິ. ອປຓ຺ຑິຕໂຄປາລໂກ ຕໍ ນ ກໂຣຕິ, ໂຄຄໂຓ ສພ຺ພຣຕ຺ຕິໍ ຑໍສາທີຫິ ອຸປທ຺ທຸໂຕ ນິທ຺ທໍ ອລຠິຕ຺ວາ ປຸນທິວເສ ອຣຎ຺ເຎ ຕຕ຺ຖ ຕຕ຺ຖ ຣຸກ຺ຂມູລາທີສຸ ນິປຊ຺ຊິຕ຺ວາ ນິທ຺ທາຍຕິ. ເນວ ຍາວທຕ຺ຖໍ ຕິຓານິ ຂາທິຕຸໍ…ເປ… ປຣິພາຫິໂຣ ໂຫຕິ.

ນ ຕິຕ຺ຖໍ ຊານາຕີຕິ ຕິຕ຺ຖມ຺ປິ ສມນ຺ຕິ ວາ ວິສມນ຺ຕິ ວາ ສຄາຫນ຺ຕິ ວາ ນິຄ຺ຄາຫນ຺ຕິ ວາ ນ ຊານາຕິ. ໂສ ອຕິຕ຺ເຖນ ຄາວິໂຍ ໂອຕາເຣຕິ. ຕາສໍ ວິສມຕິຕ຺ເຖ ປາສາຓາທີນິ ອກ຺ກມນ຺ຕີນໍ ປາທາ ຠິຊ຺ຊນ຺ຕິ. ສຄາຫໍ ຄມ຺ຠີຣໍ ຕິຕ຺ຖໍ ໂອຕິຓ຺ເຓ ກຸມ຺ຠີລາທໂຍ ຄາໂວ ຄຓ຺ຫນ຺ຕິ, ‘‘ອຊ຺ຊ ເອຕ຺ຕິກາ ຄາໂວ ນຏ຺ຐາ, ອຊ຺ຊ ເອຕ຺ຕິກາ’’ຕິ ວຕ຺ຕພ຺ພຕໍ ອາປຊ຺ຊນ຺ຕິ. ເອວມສ຺ສ ໂຄ ຄໂຓປິ ປຣິຫາຍຕິ…ເປ… ປຎ຺ຈໂຄຣສໂຕປິ ປຣິພາຫິໂຣ ໂຫຕິ.

ນ ປີຕໍ ຊານາຕີຕິ ປີຕມ຺ປິ ອປີຕມ຺ປິ ນ ຊານາຕິ. ໂຄປາລເກນ ຫິ ‘‘ອິມາຍ ຄາວິຍາ ປີຕໍ, ອິມາຍ ນ ປີຕໍ, ອິມາຍ ປານີຍຕິຕ຺ເຖ ໂອກາໂສ ລທ຺ໂຘ, ອິມາຍ ນ ລທ຺ໂຘ’’ຕິ ເອວໍ ປີຕາປີຕໍ ຊານິຕພ຺ພໍ ໂຫຕິ. ອຍໍ ປນ ທິວສຠາເຄ ອຣຎ຺ເຎ ໂຄຄຓໍ ຣກ຺ຂິຕ຺ວາ ‘‘ປານີຍໍ ປາເຍສ຺ສາມີ’’ຕິ ນທິໍ ວາ ຕຬາກໍ ວາ ໂອຄາເຫຕ຺ວາ ຄຈ຺ຉຕິ. ຕຕ຺ຖ ມຫາອຸສຠາ ຈ ອນຸສຠາ ຈ ພລວຄາວິໂຍ ຈ ທຸພ຺ພລານິ ເຈວ ມຫລ຺ລການິ ຈ ໂຄຣູປານິ ສິງ຺ເຄຫິ ວາ ຜາສຸກາຫິ ວາ ປຫຣິຕ຺ວາ ອຕ຺ຕໂນ ໂອກາສໍ ກຕ຺ວາ ອູຣຸປ຺ປມາຓໍ ອຸທກໍ ປວິສິຕ຺ວາ ຍຖາກາມໍ ປິວນ຺ຕິ. ອວເສສາ ໂອກາສໍ ອລຠມານາ ຕີເຣ ຐຕ຺ວາ ກລລມິສ຺ສກໍ ອຸທກໍ ປິວນ຺ຕິ ວາ ອປີຕາ ເອວ ວາ ໂຫນ຺ຕິ. ອຖ ໂສ ໂຄປາລໂກ ປິຏ຺ຐິຍໍ ປຫຣິຕ຺ວາ ປຸນ ອຣຎ຺ຎໍ ປເວເສຕິ. ຕຕ຺ຖ ອປີຕາ ຄາວິໂຍ ປິປາສາຍ ສຸສ຺ສມານາ ຍາວທຕ຺ຖໍ ຕິຓານິ ຂາທິຕຸໍ ນ ສກ຺ໂກນ຺ຕິ. ຕຕ຺ຖ ຄຸນ຺ນໍ ຂີຣໍ ຉິຊ຺ຊຕິ. ໂຄຓານໍ ຊໂວ ຫາຍຕິ…ເປ… ປຣິພາຫິໂຣ ໂຫຕິ.

ນ ວີຖິໍ ຊານາຕີຕິ ‘‘ອຍໍ ມຄ຺ໂຄ ສໂມ ເຂໂມ, ອຍໍ ວິສໂມ ສາສງ຺ໂກ ສປ຺ປຏິຠໂຍ’’ຕິ ນ ຊານາຕິ. ໂສ ສມໍ ເຂມໍ ມຄ຺ຄໍ ວຊ຺ເຊຕ຺ວາ ໂຄຄຓໍ ອິຕຣມຄ຺ຄໍ ປຏິປາເທຕິ. ຕຕ຺ຖ ຄາໂວ ສີຫພ຺ຍຄ຺ຆາທີນໍ ຄນ຺ເຘນ ໂຈຣປຣິສ຺ສເຍນ ຈ ອຠິຠູຕາ ຠນ຺ຕມິຄສປ຺ປຏິຠາຄາ ຄີວໍ ອຸກ຺ຂິປິຕ຺ວາ ຕິຏ຺ຐນ຺ຕິ, ເນວ ຍາວທຕ຺ຖໍ ຕິຓານິ ຂາທນ຺ຕິ, ນ ປານີຍໍ ປິວນ຺ຕິ. ຕຕ຺ຖ ຄຸນ຺ນໍ ຂີຣໍ ຉິຊ຺ຊຕິ…ເປ… ປຣິພາຫິໂຣ ໂຫຕິ.

ນ ໂຄຈຣກຸສໂລ ໂຫຕີຕິ ໂຄປາລເກນ ຫິ ໂຄຈຣກຸສເລນ ຠວິຕພ຺ພໍ, ປຎ຺ຈາຫິກຈາໂຣ ວາ ສຕ຺ຕາຫິກຈາໂຣ ວາ ຊານິຕພ຺ໂພ. ເອກທິສາຍ ໂຄຄຓໍ ຈາເຣຕ຺ວາ ປຸນທິວເສ ຕຕ຺ຖ ນ ຈາເຣຕພ຺ໂພ. ມຫຕາ ຫິ ໂຄຄເຓນ ຈິຓ຺ຓຏ຺ຐານໍ ເຠຣິຕລໍ ວິຍ ສຸທ຺ຘໍ ໂຫຕິ ນິຕ຺ຕິຓໍ, ອຸທກມ຺ປິ ອາລຸລີຍຕິ. ຕສ຺ມາ ປຎ຺ຈເມ ວາ ສຕ຺ຕເມ ວາ ທິວເສ ປຸນ ຕຕ຺ຖ ຈາເຣຕຸໍ ວຏ຺ຏຕິ. ເອຕ຺ຕເກນ ຫິ ຕິຓມ຺ປິ ປຏິວິຣຸຫຕິ, ອຸທກມ຺ປິ ປສີທຕິ, ອຍໍ ປນ ອິມໍ ປຎ຺ຈາຫິກຈາຣໍ ວາ ສຕ຺ຕາຫິກຈາຣໍ ວາ ນ ຊານາຕິ, ທິວເສ ທິວເສ ຣກ຺ຂິຕຏ຺ຐາເນເຍວ ຣກ຺ຂຕິ. ອຖສ຺ສ ໂຄຄໂຓ ຫຣິຕຕິຓໍ ນ ລຠຕິ, ສຸກ຺ຂຕິຓໍ ຂາທນ຺ໂຕ ກລລມິສ຺ສກໍ ອຸທກໍ ປິວຕິ. ຕຕ຺ຖ ຄຸນ຺ນໍ ຂີຣໍ ຉິຊ຺ຊຕິ…ເປ… ປຣິພາຫິໂຣ ໂຫຕິ.

ອນວເສສໂທຫີ ຈ ໂຫຕີຕິ ປຓ຺ຑິຕໂຄປາລເກນ ຫິ ຍາວ ວຈ຺ຉກສ຺ສ ມໍສໂລຫິຕໍ ສຓ຺ຐາຕິ, ຕາວ ເອກໍ ທ຺ເວ ຖເນ ຐເປຕ຺ວາ ສາວເສສໂທຫິນາ ຠວິຕພ຺ພໍ. ອຍໍ ວຈ຺ຉກສ຺ສ ກິຎ຺ຈິ ອນວເສເສຕ຺ວາ ທຸຫຕິ. ຂີຣປໂກ ວຈ຺ໂຉ ຂີຣປິປາສາຍ ສຸສ຺ສຕິ, ສຓ຺ຐາຕຸໍ ອສກ຺ໂກນ຺ໂຕ ກມ຺ປມາໂນ ມາຕຸ ປຸຣໂຕ ປຕິຕ຺ວາ ກາລໍ ກໂຣນ຺ຕິ. ມາຕາ ປຸຕ຺ຕກໍ ທິສ຺ວາ, ‘‘ມຍ຺ຫໍ ປຸຕ຺ຕໂກ ອຕ຺ຕໂນ ມາຕຸຂີຣໍ ປາຕຸໍ ນ ລຠຕີ’’ຕິ ປຸຕ຺ຕໂສເກນ ເນວ ຍາວທຕ຺ຖໍ ຕິຓານິ ຂາທິຕຸໍ ນ ປານີຍໍ ປາຕຸໍ ສກ຺ໂກຕິ, ຖເນສຸ ຂີຣໍ ຉິຊ຺ຊຕິ. ເອວມສ຺ສ ໂຄຄໂຓປິ ປຣິຫາຍຕິ…ເປ… ປຎ຺ຈໂຄຣສໂຕປິ ປຣິພາຫິໂຣ ໂຫຕິ.

ຄຸນ຺ນໍ ປິຕິຏ຺ຐານໍ ກໂຣນ຺ຕີຕິ ໂຄປິຕໂຣ. ຄາໂວ ປຣິຓາຍນ຺ຕິ ຍຖາຣຸຈິໍ ຄເຫຕ຺ວາ ຄຈ຺ຉນ຺ຕີຕິ ໂຄປຣິຓາຍກາ. ເຕ ນ ອຕິເຣກປູຊາຍາຕິ ປຓ຺ຑິໂຕ ຫິ ໂຄປາລໂກ ເອວຣູເປ ອຸສເຠ ອຕິເຣກປູຊາຍ ປູເຊຕິ, ປຓີຕໍ ໂຄຠຕ຺ຕໍ ເທຕິ, ຄນ຺ຘປຎ຺ຈງ຺ຄຸລິເກຫິ ມຓ຺ເຑຕິ, ມາລໍ ປິຬນ຺ເຘຕິ, ສິງ຺ເຄສຸ ສຸວຓ຺ຓຣຊຕໂກສເກ ຈ ຘາເຣຕິ, ຣຕ຺ຕິໍ ທີປໍ ຊາເລຕ຺ວາ ເຈລວິຕານສ຺ສ ເຫຏ຺ຐາ ສຍາເປຕິ. ອຍໍ ປນ ຕໂຕ ເອກສກ຺ກາຣມ຺ປິ ນ ກໂຣຕິ. ອຸສຠາ ອຕິເຣກປູຊໍ ອລຠມານາ ໂຄຄຓໍ ນ ຣກ຺ຂນ຺ຕິ, ປຣິສ຺ສຍໍ ນ ວາເຣນ຺ຕິ. ເອວມສ຺ສ ໂຄຄໂຓປິ ປຣິຫາຍຕິ…ເປ… ປຎ຺ຈໂຄຣສໂຕປິ ປຣິພາຫິໂຣ ໂຫຕິ.

ອິຘາຕິ ອິມສ຺ມິໍ ສາສເນ. ນ ຣູປຎ຺ຎູ ໂຫຕີຕິ ‘‘ຈຕ຺ຕາຣິ ມຫາຠູຕານິ ຈຕຸນ຺ນຎ຺ຈ ມຫາຠູຕານໍ ອຸປາທາຍຣູປ’’ນ຺ຕິ ເອວໍ ວຸຕ຺ຕໍ ຣູປໍ ທ຺ວີຫາກາເຣຫິ ນ ຊານາຕິ ຄຓນໂຕ ວາ ສມຸຏ຺ຐານໂຕ ວາ. ຄຓນໂຕ ນ ຊານາຕິ ນາມ – ‘‘ຈກ຺ຂາຍຕນໍ ໂສຕາຍຕນໍ ຆານາຍຕນໍ ຊິວ຺ຫາກາຍຣູປສທ຺ທຄນ຺ຘຣສໂຜຏ຺ຐພ຺ພາຍຕນໍ, ອິຕ຺ຖິນ຺ທ຺ຣິຍໍ ປຸຣິສິນ຺ທ຺ຣິຍໍ ຊີວິຕິນ຺ທ຺ຣິຍໍ ກາຍວິຎ຺ຎຕ຺ຕິ ວຈີວິຎ຺ຎຕ຺ຕິ ອາກາສຘາຕຸ ອາໂປຘາຕຸ ຣູປສ຺ສ ລຫຸຕາ, ມຸທຸຕາ, ກມ຺ມຎ຺ຎຕາ, ອຸປຈໂຍ, ສນ຺ຕຕິ, ຊຣຕາ, ຣູປສ຺ສ ອນິຈ຺ຈຕາ, ກພຬີກາໂຣ ອາຫາໂຣ’’ຕິ (ຘ. ສ. ໖໕໗-໖໖໕) ເອວໍ ປາຬິຍາ ອາຄຕາ ປຎ຺ຈວີສຕິ ຣູປໂກຏ຺ຐາສາຕິ ນ ຊານາຕິ. ເສຍ຺ຍຖາປິ ໂສ ໂຄປາລໂກ ຄຓນໂຕ ຄຸນ຺ນໍ ຣູປໍ ນ ຊານາຕິ, ຕຖູປໂມ ອຍໍ ຠິກ຺ຂຸ. ໂສ ຄຓນໂຕ ຣູປໍ ອຊານນ຺ໂຕ ຣູປໍ ປຣິຄ຺ຄເຫຕ຺ວາ ອຣູປໍ ວວຕ຺ຖເປຕ຺ວາ ຣູປາຣູປໍ ປຣິຄ຺ຄເຫຕ຺ວາ ປຈ຺ຈຍໍ ສລ຺ລກ຺ເຂຕ຺ວາ ລກ຺ຂຓໍ ອາໂຣເປຕ຺ວາ ກມ຺ມຏ຺ຐານໍ ມຕ຺ຖກໍ ປາເປຕຸໍ ນ ສກ຺ໂກຕິ. ໂສ ຍຖາ ຕສ຺ສ ໂຄປາລກສ຺ສ ໂຄຄໂຓ ນ ວຑ຺ຒຕິ, ເອວໍ ອິມສ຺ມິໍ ສາສເນ ສີລສມາຘິວິປສ຺ສນາມຄ຺ຄຜລນິພ຺ພາເນຫິ ນ ວຑ຺ຒຕິ. ຍຖາ ຈ ໂສ ໂຄປາລໂກ ປຎ຺ຈຫິ ໂຄຣເສຫິ ປຣິພາຫິໂຣ ໂຫຕິ, ເອວເມວາຍໍ ອເສເຂນ ສີລກ຺ຂນ຺ເຘນ ອເສເຂນ ສມາຘິປຎ຺ຎາວິມຸຕ຺ຕິ ວິມຸຕ຺ຕິຎາຓທສ຺ສນກ຺ຂນ຺ເຘນາຕິ ປຎ຺ຈຫິ ຘມ຺ມກ຺ຂນ຺ເຘຫິ ປຣິພາຫິໂຣ ໂຫຕິ.

ສມຸຏ຺ຐານໂຕ ນ ຊານາຕິ ນາມ – ‘‘ເອຕ຺ຕກໍ ຣູປໍ ເອກສມຸຏ຺ຐານໍ, ເອຕ຺ຕກໍ ທ຺ວິສມຸຏ຺ຐານໍ, ເອຕ຺ຕກໍ ຕິສມຸຏ຺ຐານໍ, ເອຕ຺ຕກໍ ຈຕຸສມຸຏ຺ຐານໍ, ເອຕ຺ຕກໍ ນກຸໂຕຈິ ສມຸຏ຺ຐາຕີ’’ຕິ ນ ຊານາຕິ. ເສຍ຺ຍຖາປິ ໂສ ໂຄປາລໂກ ວຓ຺ຓໂຕ ຄຸນ຺ນໍ ຣູປໍ ນ ຊານາຕິ, ຕຖູປໂມ ອຍໍ ຠິກ຺ຂຸ. ໂສ ສມຸຏ຺ຐານໂຕ ຣູປໍ ອຊານນ຺ໂຕ ຣູປໍ ປຣິຄ຺ຄເຫຕ຺ວາ…ເປ… ປຣິພາຫິໂຣ ໂຫຕິ.

ນ ລກ຺ຂຓກຸສໂລ ໂຫຕີຕິ ‘‘ກມ຺ມລກ຺ຂໂຓ ພາໂລ, ກມ຺ມລກ຺ຂໂຓ ປຓ຺ຑິໂຕ’’ຕິ ເອວໍ ວຸຕ຺ຕໍ ກຸສລາກຸສລກມ຺ມໍ ປຓ຺ຑິຕພາລລກ຺ຂຓນ຺ຕິ ນ ຊານາຕິ. ໂສ ເອວໍ ອຊານນ຺ໂຕ ພາເລ ວຊ຺ເຊຕ຺ວາ ປຓ຺ຑິເຕ ນ ເສວຕິ. ພາເລ ວຊ຺ເຊຕ຺ວາ ປຓ຺ຑິເຕ ອເສວນ຺ໂຕ ກປ຺ປິຍາກປ຺ປິຍໍ ກຸສລາກຸສລໍ ສາວຊ຺ຊານວຊ຺ຊໍ ຄຣຸກລຫຸກໍ ສເຕກິຈ຺ຉາເຕກິຈ຺ຉໍ ກາຣຓາກາຣຓໍ ນ ຊານາຕິ. ຕໍ ອຊານນ຺ໂຕ ກມ຺ມຏ຺ຐານໍ ຄເຫຕ຺ວາ ວຑ຺ເຒຕຸໍ ນ ສກ຺ໂກຕິ. ໂສ ຍຖາ ຕສ຺ສ ໂຄປາລກສ຺ສ ໂຄຄໂຓ ນ ວຑ຺ຒຕິ, ເອວໍ ອິມສ຺ມິໍ ສາສເນ ຍຖາວຸຕ຺ເຕຫິ ສີລາທີຫິ ນ ວຑ຺ຒຕິ. ໂສ ໂຄປາລໂກ ວິຍ ຈ ປຎ຺ຈຫິ ໂຄຣເສຫິ, ປຎ຺ຈຫິ ຘມ຺ມກ຺ຂນ຺ເຘຫິ ປຣິພາຫິໂຣ ໂຫຕິ.

ນ ອາສາຏິກໍ ຫາເຣຕາ ໂຫຕີຕິ ‘‘ອຸປ຺ປນ຺ນໍ ກາມວິຕກ຺ກ’’ນ຺ຕິ ເອວໍ ວຸຕ຺ເຕ ກາມວິຕກ຺ກາທໂຍ ນ ວິໂນເທຕິ. ໂສ ອິມໍ ອກຸສລວິຕກ຺ກໍ ອາສາຏິກໍ ອຫາເຣຕ຺ວາ ວິຕກ຺ກວສິໂກ ຫຸຕ຺ວາ ວິຈຣນ຺ໂຕ ກມ຺ມຏ຺ຐານໍ ຄເຫຕ຺ວາ ວຑ຺ເຒຕຸໍ ນ ສກ຺ໂກຕິ. ໂສ ຍຖາ ຕສ຺ສ ໂຄປາລກສ຺ສ…ເປ… ປຣິພາຫິໂຣ ໂຫຕິ.

ນ ວຓໍ ປຏິຈ຺ຉາເທຕາ ໂຫຕີຕິ ‘‘ຈກ຺ຂຸນາ ຣູປໍ ທິສ຺ວາ ນິມິຕ຺ຕຄ຺ຄາຫີ ໂຫຕີ’’ຕິອາທິນາ ນເຍນ ສພ຺ພາຣມ຺ມເຓສຸ ນິມິຕ຺ຕໍ ຄຓ຺ຫນ຺ໂຕ ຍຖາ ໂສ ໂຄປາລໂກ ວຓໍ ນ ປຏິຈ຺ຉາເທຕິ, ເອວໍ ສໍວຣໍ ນ ສມ຺ປາເທຕິ. ໂສ ວິວຏທ຺ວາໂຣ ວິຈຣນ຺ໂຕ ກມ຺ມຏ຺ຐານໍ ຄເຫຕ຺ວາ ວຑ຺ເຒຕຸໍ ນ ສກ຺ໂກຕິ…ເປ… ປຣິພາຫິໂຣ ໂຫຕິ.

ນ ຘູມໍ ກຕ຺ຕາ ໂຫຕີຕິ ໂສ ໂຄປາລໂກ ຘູມໍ ວິຍ ຘມ຺ມເທສນາຘູມໍ ນ ກໂຣຕິ, ຘມ຺ມກຖໍ ວາ ສຣຠຎ຺ຎໍ ວາ ອຸປນິສິນ຺ນກກຖໍ ວາ ອນຸໂມທນໍ ວາ ນ ກໂຣຕິ, ຕໂຕ ນໍ ມນຸສ຺ສາ ‘‘ພຫຸສ຺ສຸໂຕ ຄຸຓວາ’’ຕິ ນ ຊານນ຺ຕິ. ເຕ ຄຸຓາຄຸຓໍ ອຊານນ຺ໂຕ ຈຕູຫິ ປຈ຺ຈເຍຫິ ສງ຺ຄຫໍ ນ ກໂຣນ຺ຕິ. ໂສ ປຈ຺ຈເຍຫິ ກິລມມາໂນ ພຸທ຺ຘວຈນໍ ສຊ຺ຌາຍໍ ກາຕຸໍ ວຕ຺ຕປຏິວຕ຺ຕໍ ປູເຣຕຸໍ ກມ຺ມຏ຺ຐານໍ ຄເຫຕ຺ວາ ວຑ຺ເຒຕຸໍ ນ ສກ຺ໂກຕິ…ເປ… ປຣິພາຫິໂຣ ໂຫຕິ.

ນ ຕິຕ຺ຖໍ ຊານາຕີຕິ ຕິຕ຺ຖຠູເຕ ພຫຸສ຺ສຸຕຠິກ຺ຂູ ນ ອຸປສງ຺ກມຕິ. ອນຸປສງ຺ກມນ຺ໂຕ ‘‘ອິທໍ, ຠນ຺ເຕ, ພ຺ຍຎ຺ຊນໍ ກຖໍ ໂຣເປຕພ຺ພໍ? ອິມສ຺ສ ຠາສິຕສ຺ສ ໂກ ອຕ຺ໂຖ? ອິມສ຺ມິໍ ຐາເນ ປາຬິ ກິໍ ວທຕິ? ອິມສ຺ມິໍ ຐາເນ ອຕ຺ໂຖ ກິໍ ທີເປຕີ’’ຕິ ເອວໍ ນ ປຣິປຸຈ຺ຉຕິ ນ ປຣິປຎ຺ຫຕິ, ນ ຊານາເປຕີຕິ ອຕ຺ໂຖ. ຕສ຺ສ ເຕ ເອວໍ ອປຣິປຸຈ຺ຉິຕາ ອວິວຏຎ຺ເຈວ ນ ວິວຣນ຺ຕິ, ຠາເຊຕ຺ວາ ນ ທສ຺ເສນ຺ຕິ, ອນຸຕ຺ຕານີກຕຎ຺ຈ ນ ອຸຕ຺ຕານິໍ ກໂຣນ຺ຕິ, ອປາກຏໍ ນ ປາກຏໍ ກໂຣນ຺ຕິ. ອເນກວິຫິເຕສຸ ຈ ກງ຺ຂາຐານິເຍສຸ ຘມ຺ເມສູຕິ ອເນກວິຘາສຸ ກງ຺ຂາສຸ ເອກກງ຺ຂມ຺ປິ ນ ປຏິວິໂນເທນ຺ຕິ. ກງ຺ຂາເຍວ ຫິ ກງ຺ຂາຐານິຍາ ຘມ຺ມາ ນາມ. ຕຕ຺ຖ ເອກໍ ກງ຺ຂມ຺ປິ ນ ນີຫຣນ຺ຕີຕິ ອຕ຺ໂຖ. ໂສ ເອວໍ ພຫຸສ຺ສຸຕຕິຕ຺ຖໍ ອນຸປສງ຺ກມິຕ຺ວາ ສກງ຺ໂຂ ກມ຺ມຏ຺ຐານໍ ຄເຫຕ຺ວາ ວຑ຺ເຒຕຸໍ ນ ສກ຺ໂກຕິ. ຍຖາ ວາ ໂສ ໂຄປາລໂກ ຕິຕ຺ຖໍ ນ ຊານາຕິ, ເອວໍ ອຍມ຺ປິ ຠິກ຺ຂຸ ຘມ຺ມຕິຕ຺ຖໍ ນ ຊານາຕິ. ອຊານນ຺ໂຕ ອວິສເຍ ປຎ຺ຫໍ ປຸຈ຺ຉຕິ, ອາຠິຘມ຺ມິກໍ ອຸປສງ຺ກມິຕ຺ວາ ກປ຺ປິຍາກປ຺ປິຍໍ ປຸຈ຺ຉຕິ, ວິນຍຘຣໍ ອຸປສງ຺ກມິຕ຺ວາ ຣູປາຣູປປຣິຈ຺ເຉທໍ ປຸຈ຺ຉຕິ. ເຕ ອວິສເຍ ປຸຏ຺ຐາ ກເຖຕຸໍ ນ ສກ຺ໂກນ຺ຕິ. ໂສ ອຕ຺ຕນາ ສກງ຺ໂຂ ກມ຺ມຏ຺ຐານໍ ຄເຫຕ຺ວາ ວຑ຺ເຒຕຸໍ ນ ສກ຺ໂກຕິ…ເປ… ປຣິພາຫິໂຣ ໂຫຕິ.

ນ ປີຕໍ ຊານາຕີຕິ ຍຖາ ໂສ ໂຄປາລໂກ ປີຕາປີຕໍ ນ ຊານາຕິ, ເອວໍ ຘມ຺ມູປສຎ຺ຫິຕໍ ປາໂມຊ຺ຊໍ ນ ຊານາຕິ ນ ລຠຕິ. ສວນມຍໍ ປຸຎ຺ຎກິຣິຍວຕ຺ຖຸໍ ນິສ຺ສາຍ ອານິສໍສໍ ນ ວິນ຺ທຕິ, ຘມ຺ມສ຺ສວນຄ຺ຄໍ ຄນ຺ຕ຺ວາ ສກ຺ກຈ຺ຈໍ ນ ສຸຓາຕິ, ນິສິນ຺ໂນ ນິທ຺ທາຍຕິ, ກຖໍ ກເຖຕິ, ອຎ຺ຎວິຫິຕໂກ ໂຫຕິ. ໂສ ສກ຺ກຈ຺ຈໍ ຘມ຺ມໍ ອສ຺ສຸຓນ຺ໂຕ ກມ຺ມຏ຺ຐານໍ ຄເຫຕ຺ວາ ວຑ຺ເຒຕຸໍ ນ ສກ຺ໂກຕິ…ເປ… ປຣິພາຫິໂຣ ໂຫຕິ.

ນ ວີຖິໍ ຊານາຕີຕິ ໂສ ໂຄປາລໂກ ມຄ຺ຄາມຄ຺ຄໍ ວິຍ ‘‘ອຍໍ ໂລກິໂຍ, ອຍໍ ໂລກຸຕ຺ຕໂຣ’’ຕິ ອຣິຍໍ ອຏ຺ຐງ຺ຄິກໍ ມຄ຺ຄໍ ຍຖາຠູຕໍ ນປ຺ປຊານາຕິ. ອຊານນ຺ໂຕ ໂລກິຍມຄ຺ເຄ ອຠິນິວິສິຕ຺ວາ ໂລກຸຕ຺ຕຣໍ ນິພ຺ພຕ຺ເຕຕຸໍ ນ ສກ຺ໂກຕິ…ເປ… ປຣິພາຫິໂຣ ໂຫຕິ.

ນ ໂຄຈຣກຸສໂລ ໂຫຕີຕິ ໂສ ໂຄປາລໂກ ປຎ຺ຈາຫິກສຕ຺ຕາຫິກຈາເຣ ວິຍ ຈຕ຺ຕາໂຣ ສຕິປຏ຺ຐາເນ ‘‘ອິເມ ໂລກິຍາ, ອິເມ ໂລກຸຕ຺ຕຣາ’’ຕິ ຍຖາຠູຕໍ ນປ຺ປຊານາຕິ. ອຊານນ຺ໂຕ ສຸຂຸມຏ຺ຐາເນສຸ ອຕ຺ຕໂນ ຎາຓໍ ຈຣາເປຕ຺ວາ ໂລກິຍສຕິປຏ຺ຐາເນ ອຠິນິວິສິຕ຺ວາ ໂລກຸຕ຺ຕຣໍ ນິພ຺ພຕ຺ເຕຕຸໍ ນ ສກ຺ໂກຕິ…ເປ… ປຣິພາຫິໂຣ ໂຫຕິ.

ອນວເສສໂທຫີ ໂຫຕີຕິ ປຏິຄ຺ຄຫເຓ ມຕ຺ຕໍ ອຊານນ຺ໂຕ ອນວເສສໍ ທຸຫຕິ. ນິທ຺ເທສວາເຣ ປນສ຺ສ ອຠິຫຏ຺ຐຸໍ ປວາເຣນ຺ຕີຕິ ອຠິຫຣິຕ຺ວາ ປວາເຣນ຺ຕິ. ເອຕ຺ຖ ທ຺ເວ ອຠິຫາຣາ ວາຈາຠິຫາໂຣ ຈ, ປຈ຺ຈຍາຠິຫາໂຣ ຈ. ວາຈາຠິຫາໂຣ ນາມ ມນຸສ຺ສາ ຠິກ຺ຂຸສ຺ສ ສນ຺ຕິກໍ ຄນ຺ຕ຺ວາ ‘‘ວເທຍ຺ຍາຖ, ຠນ຺ເຕ, ເຍນຕ຺ໂຖ’’ຕິ ປວາເຣນ຺ຕິ. ປຈ຺ຈຍາຠິຫາໂຣ ນາມ ວຕ຺ຖາທີນິ ວາ ສປ຺ປິນວນີຕຜາຓິຕາທີນິ ວາ ຄເຫຕ຺ວາ ຠິກ຺ຂຸສ຺ສ ສນ຺ຕິກໍ ຄນ຺ຕ຺ວາ ‘‘ຄຓ຺ຫຖ, ຠນ຺ເຕ, ຍາວຕເກນ ອຕ຺ໂຖ’’ຕິ ວທນ຺ຕິ. ຕຕ຺ຣ ຠິກ຺ຂຸ ມຕ຺ຕໍ ນ ຊານາຕີຕິ ຠິກ຺ຂຸ ເຕສຸ ປຈ຺ຈເຍສຸ ປມາຓໍ ນ ຊານາຕິ. ‘‘ທາຍກສ຺ສ ວໂສ ເວທິຕພ຺ໂພ, ເທຍ຺ຍຘມ຺ມສ຺ສ ວໂສ ເວທິຕພ຺ໂພ, ອຕ຺ຕໂນ ຖາໂມ ເວທິຕພ຺ໂພ’’ຕິ ອິມິນາ ນເຍນ ປມາຓຍຸຕ຺ຕກໍ ອຄ຺ຄເຫຕ຺ວາ ຍໍ ອາຫຣນ຺ຕິ, ຕໍ ສພ຺ພໍ ຄຓ຺ຫາຕີຕິ ອຕ຺ໂຖ. ມນຸສ຺ສາ ວິປ຺ປຏິສາຣິໂນ ນ ປຸນ ອຠິຫຣິຕ຺ວາ ປວາເຣນ຺ຕິ. ໂສ ປຈ຺ຈເຍຫິ ກິລມນ຺ໂຕ ກມ຺ມຏ຺ຐານໍ ຄເຫຕ຺ວາ ວຑ຺ເຒຕຸໍ ນ ສກ຺ໂກຕິ…ເປ… ປຣິພາຫິໂຣ ໂຫຕິ.

ເຕ ນ ອຕິເຣກປູຊາຍ ປູເຊຕາ ໂຫຕີຕິ ໂສ ໂຄປາລໂກ ມຫາອຸສເຠ ວິຍ ເຖເຣ ຠິກ຺ຂູ ອິມາຍ ອາວິ ເຈວ ຣໂຫ ຈ ເມຕ຺ຕາກາຍກມ຺ມາທິກາຍ ອຕິເຣກປູຊາຍ ນ ປູເຊຕິ. ຕໂຕ ເຖຣາ ‘‘ອິເມ ອມ຺ເຫສຸ ຄຣຸຈິຕ຺ຕີກາຣໍ ນ ກໂຣນ຺ຕີ’’ຕິ ນວເກ ຠິກ຺ຂູ ທ຺ວີຫິ ສງ຺ຄເຫຫິ ນ ສງ຺ຄຓ຺ຫນ຺ຕິ, ເນວ ຘມ຺ມສງ຺ຄເຫນ ສງ຺ຄຓ຺ຫນ຺ຕິ, ນ ອາມິສສງ຺ຄເຫນ, ຈີວເຣນ ວາ ປຕ຺ເຕນ ວາ ປຕ຺ຕປຣິຍາປນ຺ເນນ ວາ ວສນຏ຺ຐາເນນ ວາ ກິລມນ຺ເຕປິ ນປ຺ປຏິຊຄ຺ຄນ຺ຕິ, ປາຬິໍ ວາ ອຏ຺ຐກຖໍ ວາ ຘມ຺ມກຖາພນ຺ຘໍ ວາ ຄຸຬ຺ຫຄນ຺ຖໍ ວາ ນ ສິກ຺ຂາເປນ຺ຕິ. ນວກາ ເຖຣານໍ ສນ຺ຕິກາ ສພ຺ພໂສ ອິເມ ທ຺ເວ ສງ຺ຄເຫ ອລຠມານາ ອິມສ຺ມິໍ ສາສເນ ປຕິຏ຺ຐາຕຸໍ ນ ສກ຺ໂກນ຺ຕິ. ຍຖາ ຕສ຺ສ ໂຄປາລກສ຺ສ ໂຄຄໂຓ ນ ວຑ຺ຒຕິ, ເອວໍ ສີລາທີຫິ ນ ວຑ຺ຒນ຺ຕິ. ຍຖາ ຈ ໂສ ໂຄປາລໂກ ປຎ຺ຈຫິ ໂຄຣເສຫິ, ເອວໍ ປຎ຺ຈຫິ ຘມ຺ມກ຺ຂນ຺ເຘຫິ ປຣິພາຫິຣາ ໂຫນ຺ຕິ. ສຸກ຺ກປກ຺ໂຂ ກຓ຺ຫປກ຺ເຂ ວຸຕ຺ຕວິປລ຺ລາສວເສນ ໂຍເຊຕ຺ວາ ເວທິຕພ຺ໂພ.

ອນຸສ຺ສຕິວຄ຺ໂຄ ທຸຕິໂຍ.

ມໂນຣຖປູຣຓິຍາ ອງ຺ຄຸຕ຺ຕຣນິກາຍ-ອຏ຺ຐກຖາຍ

ເອກາທສກນິປາຕສ຺ສ ສໍວຓ຺ຓນາ ນິຏ຺ຐິຕາ.

ນິຄມນກຖາ

ເອຕ຺ຕາວຕາ ຈ –

ອາຍາຈິໂຕ ສຸມຕິນາ ເຖເຣນ ຠທນ຺ຕໂຊຕິປາເລນ;

ກຎ຺ຈິປຸຣາທີສຸ ມຍາ ປຸພ຺ເພ ສທ຺ຘິໍ ວສນ຺ເຕນ.

ວຣຕມ຺ພປຓ຺ຓິທີເປ ມຫາວິຫາຣມ຺ຫິ ວສນກາເລປິ;

ປາກໍ ຄເຕ ວິຍ ທຸເມ ວລຎ຺ຊມານມ຺ຫິ ສທ຺ຘມ຺ເມ.

ປາຣໍ ປິຏກຕ຺ຕຍສາຄຣສ຺ສ ຄນ຺ຕ຺ວາ ຐິເຕນ ສຸມຕິນາ;

ປຣິສຸທ຺ຘາຊີເວນາຠິຍາຈິໂຕ ຊີວເກນາປິ.

ຘມ຺ມກຖາຍ ນິປຸຓປຣມນິກາຍສ຺ສຏ຺ຐກຖໍ ອາຣທ຺ໂຘ;

ຍມຫໍ ຈິຣກາລຏ຺ຐິຕິມິຈ຺ຉນ຺ໂຕ ສາສນວຣສ຺ສ.

ສາ ຫິ ມຫາອຏ຺ຐກຖາຍ ສາຣມາທາຍ ນິຏ຺ຐິຕາ ເອສາ;

ຈຕຸນວຸຕິປຣິມາຓາຍ ປາຬິຍາ ຠາຓວາເຣຫິ.

ສພ຺ພາຄມສໍວຓ຺ຓນມໂນຣໂຖ ປູຣິໂຕ ຈ ເມ ຍສ຺ມາ;

ເອຕາຍ ມໂນຣຖປູຣຓີຕິ ນາມໍ ຕໂຕ ອສ຺ສາ.

ເອກູນສຏ຺ຐິມຕ຺ໂຕ ວິສຸທ຺ຘິມຄ຺ໂຄປິ ຠາຓວາເຣຫິ;

ອຕ຺ຖປ຺ປກາສນຕ຺ຖາຍ ອາຄມານໍ ກໂຕ ຍສ຺ມາ.

ຕສ຺ມາ ເຕນ ສຫາຍໍ ຄາຖາຄຓນານເຍນ ອຏ຺ຐກຖາ;

ຕີຫາຘິກທິຍຑ຺ຒສຕໍ ວິຎ຺ເຎຍ຺ຍາ ຠາຓວາຣານໍ.

ຕີຫາຘິກທິຍຑ຺ຒສຕປ຺ປມາຓມິຕິ ຠາຓວາຣໂຕ ເອສາ;

ສມຍໍ ປກາສຍນ຺ຕີ ມຫາວິຫາຣາຘິວາສີນໍ.

ມູລຏ຺ຐກຖາສາຣໍ ອາທາຍ ມຍາ ອິມໍ ກໂຣນ຺ເຕນ;

ຍໍ ປຸຎ຺ຎມຸປຈິຕໍ ເຕນ ໂຫຕຸ ໂລໂກ ສທາ ສຸຂິໂຕຕິ.

ປຣມວິສຸທ຺ຘສທ຺ຘາພຸທ຺ຘິວີຣິຍປ຺ປຏິມຓ຺ຑິເຕນ ສີລາຈາຣຊ຺ຊວມທ຺ທວາທິຄຸຓສມຸທຍສມຸທິເຕນ ສກສມຍສມຍນ຺ຕຣຄຫນຊ຺ໂຌຄາຫນສມຕ຺ເຖນ ປຎ຺ຎາເວຍ຺ຍຕ຺ຕິຍສມນ຺ນາຄເຕນ ຕິປິຏກປຣິຍຕ຺ຕິປ຺ປເຠເທ ສາຏ຺ຐກເຖ ສຕ຺ຖຸ ສາສເນ ອປ຺ປຏິຫຕຎາຓປ຺ປຠາເວນ ມຫາເວຍ຺ຍາກຣເຓນ ກຣຓສມ຺ປຕ຺ຕິຊນິຕສຸຂວິນິຄ຺ຄຕມຘຸໂຣທາຣວຈນລາວຓ຺ຓຍຸຕ຺ເຕນ ຍຸຕ຺ຕມຸຕ຺ຕວາທິນາ ວາທີວເຣນ ມຫາກວິນາ ປຠິນ຺ນປຏິສມ຺ຠິທາປຣິວາເຣ ຉຬຠິຎ຺ຎາທິປ຺ປເຠທຄຸຓປ຺ປຏິມຓ຺ຑິເຕ ອຸຕ຺ຕຣິມນຸສ຺ສຘມ຺ເມ ສຸປ຺ປຕິຏ຺ຐິຕພຸທ຺ຘີນໍ ເຖຣານໍ ເຖຣວໍສປ຺ປທີປານໍ ມຫາວິຫາຣວາສີນໍ ວໍສາລງ຺ກາຣຠູເຕນ ສຸວິປຸລວິສຸທ຺ຘພຸທ຺ຘິນາ ພຸທ຺ຘໂຆໂສຕິ ຄຣູຫິ ຄຫິຕນາມເຘຍ຺ເຍນ ເຖເຣນ ກຕາ ອຍໍ ມໂນຣຖປູຣຓີ ນາມ ອງ຺ຄຸຕ຺ຕຣນິກາຍຏ຺ຐກຖາ –

ຕາວ ຕິຏ຺ຐຕຸ ໂລກສ຺ມິໍ, ໂລກນິຕ຺ຖຣເຓສິນໍ;

ທສ຺ເສນ຺ຕີ ກຸລປຸຕ຺ຕານໍ, ນຍໍ ຈິຕ຺ຕວິສຸທ຺ຘິຍາ.

ຍາວ ພຸທ຺ໂຘຕິ ນາມມ຺ປິ, ສຸທ຺ຘຈິຕ຺ຕສ຺ສ ຕາທິໂນ;

ໂລກມ຺ຫິ ໂລກເຊຏ຺ຐສ຺ສ, ປວຕ຺ຕຕິ ມເຫສິໂນຕິ.

ມໂນຣຖປູຣຓີ ນາມ

ອງ຺ຄຸຕ຺ຕຣນິກາຍ-ອຏ຺ຐກຖາ ສພ຺ພາກາເຣນ ນິຏ຺ຐິຕາ.