໘. ກລ຺ຍາຓມິຕ຺ຕຕາທິວຄ຺ຄວຓ຺ຓນາ

໗໑. ອຏ຺ຐມສ຺ສ ປຐເມ ກລ຺ຍາຓມິຕ຺ຕຕາຕິ ກລ຺ຍາຓາ ມິຕ຺ຕາ ອສ຺ສາຕິ ກລ຺ຍາຓມິຕ຺ໂຕ, ຕສ຺ສ ຠາໂວ ກລ຺ຍາຓມິຕ຺ຕຕາ. ເສສໍ ວຸຕ຺ຕປຏິປກ຺ຂນເຍນ ເວທິຕພ຺ພໍ.

໗໒-໗໓. ທຸຕິເຍ ອນຸໂຍໂຄຕິ ໂຍໂຄ ປໂຍໂຄ. ອນນຸໂຍໂຄຕິ ອໂຍໂຄ ອປ຺ປໂຍໂຄ. ອນຸໂຍຄາຕິ ອນຸໂຍເຄນ. ອນນຸໂຍຄາຕິ ອນນຸໂຍເຄນ. ກຸສລານໍ ຘມ຺ມານນ຺ຕິ ຈຕຸຠູມກກຸສລຘມ຺ມານໍ. ຕຕິຍໍ ອຸຕ຺ຕານຕ຺ຖເມວ.

໗໔. ຈຕຸຕ຺ເຖ ໂພຊ຺ຌງ຺ຄາຕິ ພຸຊ຺ຌນກສຕ຺ຕສ຺ສ ອງ຺ຄຠູຕາ ສຕ຺ຕ ຘມ຺ມາ. ຍາຍ ວາ ຘມ຺ມສາມຄ຺ຄິຍາ ໂສ ພຸຊ຺ຌຕິ, ສມ຺ໂມຫນິທ຺ທາໂຕ ວາ ວຸຏ຺ຐາຕິ, ຈຕຸສຈ຺ຈຘມ຺ມໍ ວາ ສຈ຺ຉິກໂຣຕິ. ຕສ຺ສາ ໂພຘິຍາ ອງ຺ຄຠູຕາຕິປິ ໂພຊ຺ຌງ຺ຄາ. ‘‘ໂພຊ຺ຌງ຺ຄາຕິ ເກນຏ຺ເຐນ ໂພຊ຺ຌງ຺ຄາ? ພຸຊ຺ຌນ຺ຕີຕິ ໂພຊ຺ຌງ຺ຄາ, ອນຸພຸຊ຺ຌນ຺ຕີຕິ ໂພຊ຺ຌງ຺ຄາ, ປຏິພຸຊ຺ຌນ຺ຕີຕິ ໂພຊ຺ຌງ຺ຄາ, ສມ຺ພຸຊ຺ຌນ຺ຕີຕິ ໂພຊ຺ຌງ຺ຄາ, ໂພຘາຍ ສໍວຕ຺ຕນ຺ຕີຕິ ໂພຊ຺ຌງ຺ຄາ’’ຕິ (ປຏິ. ມ. ໒.໑໗). ເອວໍ ປເນຕໍ ປທໍ ວິຠຕ຺ຕເມວ.

໗໕. ປຎ຺ຈເມ ຠາວນາປາຣິປູຣິໍ ຄຈ຺ຉນ຺ຕີຕິ ອິມິນາ ປເທນ ໂພຊ຺ຌງ຺ຄານໍ ຍາຖາວສຣສຠູມິ ນາມ ກຖິຕາ. ສາ ປເນສາ ຈຕຸພ຺ພິຘາ ໂຫຕິ – ວິປສ຺ສນາ, ວິປສ຺ສນາປາທກຊ຺ຌານໍ, ມຄ຺ໂຄ, ຜລນ຺ຕິ. ຕຕ຺ຖ ວິປສ຺ສນາຍ ອຸປ຺ປຊ຺ຊນກາເລ ໂພຊ຺ຌງ຺ຄາ ກາມາວຈຣາ ໂຫນ຺ຕິ, ວິປສ຺ສນາປາທກຊ຺ຌານມ຺ຫິ ອຸປ຺ປຊ຺ຊນກາເລ ຣູປາວຈຣອຣູປາວຈຣາ, ມຄ຺ຄຜເລສຸ ອຸປ຺ປຊ຺ຊນກາເລ ໂລກຸຕ຺ຕຣາ. ອິຕິ ອິມສ຺ມິໍ ສຸຕ຺ເຕ ໂພຊ຺ຌງ຺ຄາ ຈຕຸຠູມກາ ກຖິຕາ.

໗໖. ຉຏ຺ຐສ຺ສ ອຏ຺ຐຸປ຺ປຕ຺ຕິໂກ ນິກ຺ເຂໂປ. ອຏ຺ຐຸປ຺ປຕ຺ຕິຍໍ ເຫຕໍ ນິກ຺ຂິຕ຺ຕໍ, ສມ຺ພຫຸລາ ກິຣ ຠິກ຺ຂູ ຘມ຺ມສຠາຍໍ ສນ຺ນິສິນ຺ນາ. ເຕສໍ ອນ຺ຕເຣ ພນ຺ຘຸລມລ຺ລເສນາປຕິໍ ອາຣພ຺ຠ ອຍໍ ກຖາ ອຸທປາທິ, ‘‘ອາວຸໂສ, ອສຸກໍ ນາມ ກຸລໍ ປຸພ຺ເພ ພຫຸຎາຕິກໍ ອໂຫສິ ພຫຸປກ຺ຂໍ, ອິທານິ ອປ຺ປຎາຕິກໍ ອປ຺ປປກ຺ຂໍ ຊາຕ’’ນ຺ຕິ. ອຖ ຠຄວາ ເຕສໍ ຈິຕ຺ຕາຈາຣໍ ຎຕ຺ວາ ‘‘ມຍິ ຄເຕ ມຫຕີ ເທສນາ ຠວິສ຺ສຕີ’’ຕິ ຎຕ຺ວາ ຄນ຺ຘກຸຏິໂຕ ນິກ຺ຂມ຺ມ ຘມ຺ມສຠາຍໍ ປຎ຺ຎຕ຺ຕວຣພຸທ຺ຘາສເນ ນິສີທິຕ຺ວາ ‘‘ກາຍ ນຸຕ຺ຖ, ຠິກ຺ຂເວ, ເອຕຣຫິ ກຖາຍ ສນ຺ນິສິນ຺ນາ’’ຕິ ອາຫ. ຠຄວາ ອຎ຺ຎາ ຄາມນິຄມາທິກຖາ ນຕ຺ຖິ, ອສຸກໍ ນາມ ກຸລໍ ປຸພ຺ເພ ພຫຸຎາຕິກໍ ອໂຫສິ ພຫຸປກ຺ຂໍ, ອິທານິ ອປ຺ປຎາຕິກໍ ອປ຺ປປກ຺ຂໍ ຊາຕນ຺ຕິ ວທນ຺ຕາ ນິສິນ຺ນມ຺ຫາຕິ. ສຕ຺ຖາ ອິມິສ຺ສາ ອຏ຺ຐຸປ຺ປຕ຺ຕິຍາ ອປ຺ປມຕ຺ຕິກາ ເອສາ, ຠິກ຺ຂເວ, ປຣິຫານີຕິ ອິທໍ ສຸຕ຺ຕໍ ອາຣຠິ.

ຕຕ຺ຖ ອປ຺ປມຕ຺ຕິກາຕິ ປຣິຕ຺ຕາ ປຣິຕ຺ຕປ຺ປມາຓາ. ເອຕາຍ ຫິ ປຣິຫານິຍາ ສຄ຺ຄໂຕ ວາ ມຄ຺ຄໂຕ ວາ ປຣິຫານິ ນາມ ນຕ຺ຖິ, ທິຏ຺ຐຘມ຺ມິກປຣິຫານິມຕ຺ຕເມວ ເອຕນ຺ຕິ ອາຫ. ເອຕໍ ປຕິກິຏ຺ຐນ຺ຕິ ເອຕໍ ປຈ຺ຉິມໍ ເອຕໍ ລາມກໍ. ຍທິທໍ ປຎ຺ຎາປຣິຫານີຕິ ຍາ ເອສາ ມມ ສາສເນ ກມ຺ມສ຺ສກຕປຎ຺ຎາຍ ຌານປຎ຺ຎາຍ ວິປສ຺ສນາປຎ຺ຎາຍ ມຄ຺ຄປຎ຺ຎາຍ ຜລປຎ຺ຎາຍ ຈ ປຣິຫານິ, ເອສາ ປຈ຺ຉິມາ, ເອສາ ລາມກາ, ເອສາ ຉຑ຺ຑນີຍາຕິ ອຕ຺ໂຖ.

໗໗. ສຕ຺ຕມມ຺ປິ ອຏ຺ຐຸປ຺ປຕ຺ຕິຍເມວ ກຖິຕໍ. ຘມ຺ມສຠາຍໍ ກິຣ ນິສິນ຺ເນສຸ ຠິກ຺ຂູສຸ ເອກຈ຺ເຈ ເອວໍ ອາຫໍສຸ – ‘‘ອສຸກໍ ນາມ ກຸລໍ ປຸພ຺ເພ ອປ຺ປຎາຕິກໍ ອປ຺ປປກ຺ຂໍ ອໂຫສິ, ອິທານິ ຕໍ ພຫຸຎາຕິກໍ ພຫຸປກ຺ຂໍ ຊາຕ’’ນ຺ຕິ. ກໍ ສນ຺ຘາຍ ເອວມາຫໍສູຕິ? ວິສາຂໍ ອຸປາສິກໍ ເວສາລິເກ ຈ ລິຈ຺ຉວີ. ສຕ຺ຖາ ເຕສໍ ຈິຕ຺ຕາຈາຣໍ ຎຕ຺ວາ ປຸຣິມນເຍເນວ ອາຄນ຺ຕ຺ວາ ຘມ຺ມາສເນ ນິສິນ຺ໂນ ‘‘ກາຍ ນຸຕ຺ຖ, ຠິກ຺ຂເວ, ເອຕຣຫິ ກຖາຍ ສນ຺ນິສິນ຺ນາ’’ຕິ ປຸຈ຺ຉິ. ເຕ ຍຖາຠູຕໍ ກຖຍິໍສຸ. ສຕ຺ຖາ ອິມິສ຺ສາ ອຏ຺ຐຸປ຺ປຕ຺ຕິຍາ ອິມໍ ສຸຕ຺ຕໍ ອາຣຠິ. ຕຕ຺ຖ ອປ຺ປມຕ຺ຕິກາຕິ ຕໍ ສມ຺ປຕ຺ຕິໍ ນິສ຺ສາຍ ສຄ຺ຄໍ ວາ ມຄ຺ຄໍ ວາ ສມ຺ປຕ຺ຕານໍ ອຠາວໂຕ ປຣິຕ຺ຕາ. ຍທິທໍ ປຎ຺ຎາວຸທ຺ຘີຕິ ກມ຺ມສ຺ສກຕປຎ຺ຎາທີນໍ ວຸທ຺ຘິ. ຕສ຺ມາຕິ ຍສ຺ມາ ຎາຕີນໍ ວຸທ຺ຘິ ນາມ ທິຏ຺ຐຘມ຺ມິກມຕ຺ຕາ ອປ຺ປາ ປຣິຕ຺ຕາ, ສາ ສຄ຺ຄໍ ວາ ມຄ຺ຄໍ ວາ ປາເປຕຸໍ ອສມຕ຺ຖາ, ຕສ຺ມາ. ປຎ຺ຎາວຸທ຺ຘິຍາຕິ ກມ຺ມສ຺ສກຕາທິປຎ຺ຎາຍ ວຸທ຺ຘິຍາ.

໗໘. ອຏ຺ຐມມ຺ປິ ອຏ຺ຐຸປ຺ປຕ຺ຕິຍເມວ ກຖິຕໍ. ສມ຺ພຫຸລາ ກິຣ ຠິກ຺ຂູ ຘມ຺ມສຠາຍໍ ສນ຺ນິສິນ຺ນາ ມຫາຘນເສຏ຺ຐິປຸຕ຺ຕໍ ອາຣພ຺ຠ ‘‘ອສຸກໍ ນາມ ກຸລໍ ປຸພ຺ເພ ມຫາໂຠຄໍ ມຫາຫິຣຎ຺ຎສຸວຓ຺ຓໍ ອໂຫສິ, ຕໍ ອິທານິ ອປ຺ປໂຠຄໍ ຊາຕ’’ນ຺ຕິ ກຖຍິໍສຸ. ສຕ຺ຖາ ປຸຣິມນເຍເນວ ອາຄນ຺ຕ຺ວາ ເຕສໍ ວຈນໍ ສຸຕ຺ວາ ອິມໍ ສຸຕ຺ຕໍ ອາຣຠິ.

໗໙. ນວມມ຺ປິ ອຏ຺ຐຸປ຺ປຕ຺ຕິຍເມວ ວຸຕ຺ຕໍ. ຘມ຺ມສຠາຍໍ ກິຣ ສນ຺ນິສິນ຺ນາ ຠິກ຺ຂູ ກາກວລິຍເສຏ຺ຐິຎ຺ຈ ປຸຓ຺ຓເສຏ຺ຐິຎ຺ຈ ອາຣພ຺ຠ ‘‘ອສຸກໍ ນາມ ກຸລໍ ປຸພ຺ເພ ອປ຺ປໂຠຄໍ ອໂຫສິ, ຕໍ ອິທານິ ມຫາໂຠຄໍ ຊາຕ’’ນ຺ຕິ ກຖຍິໍສຸ. ສຕ຺ຖາ ປຸຣິມນເຍເນວ ອາຄນ຺ຕ຺ວາ ເຕສໍ ວຈນໍ ສຸຕ຺ວາ ອິມໍ ສຸຕ຺ຕໍ ອາຣຠິ. ເສສໍ ອິເມສຸ ທ຺ວີສຸປິ ເຫຏ຺ຐາ ວຸຕ຺ຕນເຍເນວ ເວທິຕພ຺ພໍ.

໘໐. ທສມມ຺ປິ ອຏ຺ຐຸປ຺ປຕ຺ຕິຍໍ ວຸຕ຺ຕໍ. ຘມ຺ມສຠາຍໍ ກິຣ ຠິກ຺ຂູ ໂກສລມຫາຣາຊານໍ ອາຣພ຺ຠ ‘‘ອສຸກໍ ນາມ ກຸລໍ ປຸພ຺ເພ ມຫາຍສໍ ມຫາປຣິວາຣໍ ອໂຫສິ, ອິທານິ ອປ຺ປຍສໍ ອປ຺ປປຣິວາຣໍ ຊາຕ’’ນ຺ຕິ ກຖຍິໍສຸ. ຠຄວາ ປຸຣິມນເຍເນວ ອາຄນ຺ຕ຺ວາ ເຕສໍ ວຈນໍ ສຸຕ຺ວາ ອິມໍ ຘມ຺ມເທສນໍ ອາຣຠິ. ເສສໍ ວຸຕ຺ຕນເຍເນວ ເວທິຕພ຺ພນ຺ຕິ.

ກລ຺ຍາຓມິຕ຺ຕຕາທິວຄ຺ຄວຓ຺ຓນາ.