(໑໐) ອຸປ຺ປນ຺ນຸປ຺ປາທວາໂຣ

໗໘. (ກ) ຍສ຺ສ ຈິຕ຺ຕໍ ອຸປ຺ປນ຺ນໍ ຕສ຺ສ ຈິຕ຺ຕໍ ອຸປ຺ປຊ຺ຊິຕ຺ຖາຕິ? ອາມນ຺ຕາ.

(ຂ) ຍສ຺ສ ວາ ປນ ຈິຕ຺ຕໍ ອຸປ຺ປຊ຺ຊິຕ຺ຖ ຕສ຺ສ ຈິຕ຺ຕໍ ອຸປ຺ປນ຺ນນ຺ຕິ?

ນິໂຣຘສມາປນ຺ນານໍ ອສຎ຺ຎສຕ຺ຕານໍ ເຕສໍ ຈິຕ຺ຕໍ ອຸປ຺ປຊ຺ຊິຕ຺ຖ, ໂນ ຈ ເຕສໍ ຈິຕ຺ຕໍ ອຸປ຺ປນ຺ນໍ. ຈິຕ຺ຕສມງ຺ຄີນໍ ເຕສໍ ຈິຕ຺ຕໍ ອຸປ຺ປຊ຺ຊິຕ຺ຖ ເຈວ ອຸປ຺ປນ຺ນຎ຺ຈ.

(ກ) ຍສ຺ສ ຈິຕ຺ຕໍ ນ ອຸປ຺ປນ຺ນໍ ຕສ຺ສ ຈິຕ຺ຕໍ ນ ອຸປ຺ປຊ຺ຊິຕ຺ຖາຕິ? ອຸປ຺ປຊ຺ຊິຕ຺ຖ.

(ຂ) ຍສ຺ສ ວາ ປນ ຈິຕ຺ຕໍ ນ ອຸປ຺ປຊ຺ຊິຕ຺ຖ ຕສ຺ສ ຈິຕ຺ຕໍ ນ ອຸປ຺ປນ຺ນນ຺ຕິ? ນຕ຺ຖິ.

໗໙. (ກ) ຍສ຺ສ ຈິຕ຺ຕໍ ອຸປ຺ປນ຺ນໍ ຕສ຺ສ ຈິຕ຺ຕໍ ອຸປ຺ປຊ຺ຊິສ຺ສຕີຕິ?

ປຈ຺ຉິມຈິຕ຺ຕສມງ຺ຄີນໍ ເຕສໍ ຈິຕ຺ຕໍ ອຸປ຺ປນ຺ນໍ, ໂນ ຈ ເຕສໍ ຈິຕ຺ຕໍ ອຸປ຺ປຊ຺ຊິສ຺ສຕິ. ອິຕເຣສໍ ຈິຕ຺ຕສມງ຺ຄີນໍ ເຕສໍ ຈິຕ຺ຕໍ ອຸປ຺ປນ຺ນຎ຺ເຈວ ອຸປ຺ປຊ຺ຊິສ຺ສຕິ ຈ.

(ຂ) ຍສ຺ສ ວາ ປນ ຈິຕ຺ຕໍ ອຸປ຺ປຊ຺ຊິສ຺ສຕິ ຕສ຺ສ ຈິຕ຺ຕໍ ອຸປ຺ປນ຺ນນ຺ຕິ?

ນິໂຣຘສມາປນ຺ນານໍ ອສຎ຺ຎສຕ຺ຕານໍ ເຕສໍ ຈິຕ຺ຕໍ ອຸປ຺ປຊ຺ຊິສ຺ສຕິ, ໂນ ຈ ເຕສໍ ຈິຕ຺ຕໍ ອຸປ຺ປນ຺ນໍ. ຈິຕ຺ຕສມງ຺ຄີນໍ ເຕສໍ ຈິຕ຺ຕໍ ອຸປ຺ປຊ຺ຊິສ຺ສຕິ ເຈວ ອຸປ຺ປນ຺ນຎ຺ຈ.

(ກ) ຍສ຺ສ ຈິຕ຺ຕໍ ນ ອຸປ຺ປນ຺ນໍ ຕສ຺ສ ຈິຕ຺ຕໍ ນ ອຸປ຺ປຊ຺ຊິສ຺ສຕີຕິ? ອຸປ຺ປຊ຺ຊິສ຺ສຕິ.

(ຂ) ຍສ຺ສ ວາ ປນ ຈິຕ຺ຕໍ ນ ອຸປ຺ປຊ຺ຊິສ຺ສຕິ ຕສ຺ສ ຈິຕ຺ຕໍ ນ ອຸປ຺ປນ຺ນນ຺ຕິ? ອຸປ຺ປນ຺ນໍ.