໖. ອຸປ຺ປຊ຺ຊນວາໂຣ

໓໓໐. (ກ) ຍສ຺ສ ກາມຣາຄານຸສໂຍ ອຸປ຺ປຊ຺ຊຕິ ຕສ຺ສ ປຏິຆານຸສໂຍ ອຸປ຺ປຊ຺ຊຕີຕິ? ອາມນ຺ຕາ.

(ຂ) ຍສ຺ສ ວາ ປນ ປຏິຆານຸສໂຍ ອຸປ຺ປຊ຺ຊຕິ ຕສ຺ສ ກາມຣາຄານຸສໂຍ ອຸປ຺ປຊ຺ຊຕີຕິ? ອາມນ຺ຕາ.

(ກ) ຍສ຺ສ ກາມຣາຄານຸສໂຍ ອຸປ຺ປຊ຺ຊຕິ ຕສ຺ສ ມານານຸສໂຍ ອຸປ຺ປຊ຺ຊຕີຕິ? ອາມນ຺ຕາ.

(ຂ) ຍສ຺ສ ວາ ປນ ມານານຸສໂຍ ອຸປ຺ປຊ຺ຊຕິ ຕສ຺ສ ກາມຣາຄານຸສໂຍ ອຸປ຺ປຊ຺ຊຕີຕິ?

ອນາຄາມິສ຺ສ ມານານຸສໂຍ ອຸປ຺ປຊ຺ຊຕິ, ໂນ ຈ ຕສ຺ສ ກາມຣາຄານຸສໂຍ ອຸປ຺ປຊ຺ຊຕິ. ຕິຓ຺ຓໍ ປຸຄ຺ຄລານໍ ມານານຸສໂຍ ຈ ອຸປ຺ປຊ຺ຊຕິ ກາມຣາຄານຸສໂຍ ຈ ອຸປ຺ປຊ຺ຊຕິ (ວິຕ຺ຖາເຣຕພ຺ພໍ).

໓໓໑. (ກ) ຍສ຺ສ ກາມຣາຄານຸສໂຍ ນຸປ຺ປຊ຺ຊຕິ ຕສ຺ສ ປຏິຆານຸສໂຍ ນຸປ຺ປຊ຺ຊຕີຕິ? ອາມນ຺ຕາ.

(ຂ) ຍສ຺ສ ວາ ປນ ປຏິຆານຸສໂຍ ນຸປ຺ປຊ຺ຊຕິ ຕສ຺ສ ກາມຣາຄານຸສໂຍ ນຸປ຺ປຊ຺ຊຕີຕິ? ອາມນ຺ຕາ.

(ກ) ຍສ຺ສ ກາມຣາຄານຸສໂຍ ນຸປ຺ປຊ຺ຊຕິ ຕສ຺ສ ມານານຸສໂຍ ນຸປ຺ປຊ຺ຊຕີຕິ?

ອນາຄາມິສ຺ສ ກາມຣາຄານຸສໂຍ ນຸປ຺ປຊ຺ຊຕິ, ໂນ ຈ ຕສ຺ສ ມານານຸສໂຍ ນຸປ຺ປຊ຺ຊຕິ. ອຣຫໂຕ ກາມຣາຄານຸສໂຍ ຈ ນຸປ຺ປຊ຺ຊຕິ ມານານຸສໂຍ ຈ ນຸປ຺ປຊ຺ຊຕິ.

(ຂ) ຍສ຺ສ ວາ ປນ ມານານຸສໂຍ ນຸປ຺ປຊ຺ຊຕິ ຕສ຺ສ ກາມຣາຄານຸສໂຍ ນຸປ຺ປຊ຺ຊຕີຕິ? ອາມນ຺ຕາ. (ວິຕ຺ຖາເຣຕພ຺ພໍ).

ອຸປ຺ປຊ຺ຊນວາໂຣ.