໒. ອຠິຘມ຺ມຠາຊນີຍໍ

໔໔໔. ຈຕ຺ຕາໂຣ ອິທ຺ຘິປາທາ – ອິຘ ຠິກ຺ຂຸ ຉນ຺ທສມາຘິປຘານສງ຺ຂາຣສມນ຺ນາຄຕໍ ອິທ຺ຘິປາທໍ ຠາເວຕິ, ວີຣິຍສມາຘິປຘານສງ຺ຂາຣສມນ຺ນາຄຕໍ ອິທ຺ຘິປາທໍ ຠາເວຕິ, ຈິຕ຺ຕສມາຘິປຘານສງ຺ຂາຣສມນ຺ນາຄຕໍ ອິທ຺ຘິປາທໍ ຠາເວຕິ, ວີມໍສາສມາຘິປຘານສງ຺ຂາຣສມນ຺ນາຄຕໍ ອິທ຺ຘິປາທໍ ຠາເວຕິ.

໑. ຉນ຺ທິທ຺ຘິປາໂທ

໔໔໕. ກຖຎ຺ຈ ຠິກ຺ຂຸ ຉນ຺ທສມາຘິປຘານສງ຺ຂາຣສມນ຺ນາຄຕໍ ອິທ຺ຘິປາທໍ ຠາເວຕິ? ອິຘ ຠິກ຺ຂຸ ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ຕສ຺ມິໍ ສມເຍ ຉນ຺ທສມາຘິປຘານສງ຺ຂາຣສມນ຺ນາຄຕໍ ອິທ຺ຘິປາທໍ ຠາເວຕິ.

໔໔໖. ຕຕ຺ຖ ກຕໂມ ຉນ຺ໂທ? ໂຍ ຉນ຺ໂທ ຉນ຺ທິກຕາ ກຕ຺ຕຸກມ຺ຍຕາ ກຸສໂລ ຘມ຺ມຈ຺ຉນ຺ໂທ – ອຍໍ ວຸຈ຺ຈຕິ ‘‘ຉນ຺ໂທ’’.

ຕຕ຺ຖ ກຕໂມ ສມາຘິ? ຍາ ຈິຕ຺ຕສ຺ສ ຐິຕິ ສຓ຺ຐິຕິ…ເປ… ສມ຺ມາສມາຘິ ສມາຘິສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ສມາຘິ’’.

ຕຕ຺ຖ ກຕໂມ ປຘານສງ຺ຂາໂຣ? ໂຍ ເຈຕສິໂກ ວີຣິຍາຣມ຺ໂຠ…ເປ… ສມ຺ມາວາຍາໂມ ວີຣິຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ປຘານສງ຺ຂາໂຣ’’. ອິຕິ ອິມິນາ ຈ ຉນ຺ເທນ, ອິມິນາ ຈ ສມາຘິນາ, ອິມິນາ ຈ ປຘານສງ຺ຂາເຣນ ອຸເປໂຕ ໂຫຕິ…ເປ… ສມນ຺ນາຄໂຕ. ເຕນ ວຸຈ຺ຈຕິ ‘‘ຉນ຺ທສມາຘິປຘານສງ຺ຂາຣສມນ຺ນາຄໂຕ’’ຕິ.

໔໔໗. ອິທ຺ຘີຕິ. ຍາ ເຕສໍ ຘມ຺ມານໍ ອິທ຺ຘິ ສມິທ຺ຘິ ອິຊ຺ຌນາ ສມິຊ຺ຌນາ ລາໂຠ ປຏິລາໂຠ ປຕ຺ຕິ ສມ຺ປຕ຺ຕິ ຜຸສນາ ສຈ຺ຉິກິຣິຍາ ອຸປສມ຺ປທາ.

ອິທ຺ຘິປາໂທຕິ. ຕຖາຠູຕສ຺ສ ຜສ຺ໂສ…ເປ… ປຄ຺ຄາໂຫ ອວິກ຺ເຂໂປ.

ອິທ຺ຘິປາທໍ ຠາເວຕີຕິ. ເຕ ຘມ຺ເມ ອາເສວຕິ ຠາເວຕິ ພຫຸລີກໂຣຕິ. ເຕນ ວຸຈ຺ຈຕິ ‘‘ອິທ຺ຘິປາທໍ ຠາເວຕີ’’ຕິ.

໒. ວີຣິຍິທ຺ຘິປາໂທ

໔໔໘. ກຖຎ຺ຈ ຠິກ຺ຂຸ ວີຣິຍສມາຘິປຘານສງ຺ຂາຣສມນ຺ນາຄຕໍ ອິທ຺ຘິປາທໍ ຠາເວຕິ? ອິຘ ຠິກ຺ຂຸ ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ຕສ຺ມິໍ ສມເຍ ວີຣິຍສມາຘິປຘານສງ຺ຂາຣສມນ຺ນາຄຕໍ ອິທ຺ຘິປາທໍ ຠາເວຕິ.

໔໔໙. ຕຕ຺ຖ ກຕມໍ ວີຣິຍໍ? ໂຍ ເຈຕສິໂກ ວີຣິຍາຣມ຺ໂຠ…ເປ… ສມ຺ມາວາຍາໂມ ວີຣິຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອິທໍ ວຸຈ຺ຈຕິ ‘‘ວີຣິຍໍ’’.

ຕຕ຺ຖ ກຕໂມ ສມາຘິ? ຍາ ຈິຕ຺ຕສ຺ສ ຐິຕິ ສຓ຺ຐິຕິ…ເປ… ສມ຺ມາສມາຘິ ສມາຘິສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ສມາຘິ’’.

ຕຕ຺ຖ ກຕໂມ ປຘານສງ຺ຂາໂຣ? ໂຍ ເຈຕສິໂກ ວີຣິຍາຣມ຺ໂຠ…ເປ… ສມ຺ມາວາຍາໂມ ວີຣິຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ປຘານສງ຺ຂາໂຣ’’. ອິຕິ ອິມິນາ ຈ ວີຣິເຍນ, ອິມິນາ ຈ ສມາຘິນາ, ອິມິນາ ຈ ປຘານສງ຺ຂາເຣນ ອຸເປໂຕ ໂຫຕິ…ເປ… ສມນ຺ນາຄໂຕ. ເຕນ ວຸຈ຺ຈຕິ ‘‘ວີຣິຍສມາຘິປຘານສງ຺ຂາຣສມນ຺ນາຄໂຕ’’ຕິ.

໔໕໐. ອິທ຺ຘີຕິ. ຍາ ເຕສໍ ຘມ຺ມານໍ ອິທ຺ຘິ ສມິທ຺ຘິ ອິຊ຺ຌນາ ສມິຊ຺ຌນາ ລາໂຠ ປຏິລາໂຠ ປຕ຺ຕິ ສມ຺ປຕ຺ຕິ ຜຸສນາ ສຈ຺ຉິກິຣິຍາ ອຸປສມ຺ປທາ.

ອິທ຺ຘິປາໂທຕິ. ຕຖາຠູຕສ ຜສ຺ໂສ…ເປ… ປຄ຺ຄາໂຫ ອວິກ຺ເຂໂປ.

ອິທ຺ຘິປາທໍ ຠາເວຕີຕິ. ເຕ ຘມ຺ເມ ອາເສວຕິ ຠາເວຕິ ພຫຸລີກໂຣຕິ. ເຕນ ວຸຈ຺ຈຕິ ‘‘ອິທ຺ຘິປາທໍ ຠາເວຕີ’’ຕິ.

໓. ຈິຕ຺ຕິທ຺ຘິປາໂທ

໔໕໑. ກຖຎ຺ຈ ຠິກ຺ຂຸ ຈິຕ຺ຕສມາຘິປຘານສງ຺ຂາຣສມນ຺ນາຄຕໍ ອິທ຺ຘິປາທໍ ຠາເວຕິ? ອິຘ ຠິກ຺ຂຸ ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ຕສ຺ມິໍ ສມເຍ ຈິຕ຺ຕສມາຘິປຘານສງ຺ຂາຣສມນ຺ນາຄຕໍ ອິທ຺ຘິປາທໍ ຠາເວຕິ.

໔໕໒. ຕຕ຺ຖ ກຕມໍ ຈິຕ຺ຕໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ຈິຕ຺ຕໍ’’.

ຕຕ຺ຖ ກຕໂມ ສມາຘິ? ຍາ ຈິຕ຺ຕສ຺ສ ຐິຕິ ສຓ຺ຐິຕິ…ເປ… ສມ຺ມາສມາຘິ ສມາຘິສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ສມາຘິ’’.

ຕຕ຺ຖ ກຕໂມ ປຘານສງ຺ຂາໂຣ? ໂຍ ເຈຕສິໂກ ວີຣິຍາຣມ຺ໂຠ…ເປ… ສມ຺ມາວາຍາໂມ ວີຣິຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ປຘານສງ຺ຂາໂຣ’’. ອິຕິ ອິມິນາ ຈ ຈິຕ຺ເຕນ, ອິມິນາ ຈ ສມາຘິນາ, ອິມິນາ ຈ ປຘານສງ຺ຂາເຣນ ອຸເປໂຕ ໂຫຕິ…ເປ… ສມນ຺ນາຄໂຕ. ເຕນ ວຸຈ຺ຈຕິ ‘‘ຈິຕ຺ຕສມາຘິປຘານສງ຺ຂາຣສມນ຺ນາຄໂຕ’’ຕິ.

໔໕໓. ອິທ຺ຘີຕິ. ຍາ ເຕສໍ ຘມ຺ມານໍ ອິທ຺ຘິ ສມິທ຺ຘິ ອິຊ຺ຌນາ ສມິຊ຺ຌນາ ລາໂຠ ປຏິລາໂຠ ປຕ຺ຕິ ສມ຺ປຕ຺ຕິ ຜຸສນາ ສຈ຺ຉິກິຣິຍາ ອຸປສມ຺ປທາ.

ອິທ຺ຘິປາໂທຕິ. ຕຖາຠູຕສ຺ສ ຜສ຺ໂສ…ເປ… ປຄ຺ຄາໂຫ ອວິກ຺ເຂໂປ.

ອິທ຺ຘິປາທໍ ຠາເວຕີຕິ. ເຕ ຘມ຺ເມ ອາເສວຕິ ຠາເວຕິ ພຫຸລີກໂຣຕິ. ເຕນ ວຸຈ຺ຈຕິ ‘‘ອິທ຺ຘິປາທໍ ຠາເວຕີ’’ຕິ.

໔. ວີມໍສິທ຺ຘິປາໂທ

໔໕໔. ກຖຎ຺ຈ ຠິກ຺ຂຸ ວີມໍສາສມາຘິປຘານສງ຺ຂາຣສມນ຺ນາຄຕໍ ອິທ຺ຘິປາທໍ ຠາເວຕິ? ອິຘ ຠິກ຺ຂຸ ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ຕສ຺ມິໍ ສມເຍ ວີມໍສາສມາຘິປຘານສງ຺ຂາຣສມນ຺ນາຄຕໍ ອິທ຺ຘິປາທໍ ຠາເວຕິ.

໔໕໕. ຕຕ຺ຖ ກຕມາ ວີມໍສາ? ຍາ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ ຘມ຺ມວິຈຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ວີມໍສາ’’.

ຕຕ຺ຖ ກຕໂມ ສມາຘິ? ຍາ ຈິຕ຺ຕສ຺ສ ຐິຕິ ສຓ຺ຐິຕິ…ເປ… ສມ຺ມາສມາຘິ ສມາຘິສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ສມາຘິ’’.

ຕຕ຺ຖ ກຕໂມ ປຘານສງ຺ຂາໂຣ? ໂຍ ເຈຕສິໂກ ວີຣິຍາຣມ຺ໂຠ…ເປ… ສມ຺ມາວາຍາໂມ ວີຣິຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ປຘານສງ຺ຂາໂຣ’’. ອິຕິ ອິມາຍ ຈ ວີມໍສາຍ, ອິມິນາ ຈ ສມາຘິນາ, ອິມິນາ ຈ ປຘານສງ຺ຂາເຣນ ອຸເປໂຕ ໂຫຕິ ສມຸເປໂຕ ອຸປາຄໂຕ ສມຸປາຄໂຕ ອຸປປນ຺ໂນ ສມ຺ປນ຺ໂນ ສມນ຺ນາຄໂຕ. ເຕນ ວຸຈ຺ຈຕິ ‘‘ວີມໍສາສມາຘິປຘານສງ຺ຂາຣສມນ຺ນາຄໂຕ’’ຕິ

໔໕໖. ອິທ຺ຘີຕິ. ຍາ ເຕສໍ ຘມ຺ມານໍ ອິທ຺ຘິ ສມິທ຺ຘິ ອິຊ຺ຌນາ ສມິຊ຺ຌນາ ລາໂຠ ປຏິລາໂຠ ປຕ຺ຕິ ສມ຺ປຕ຺ຕິ ຜຸສນາ ສຈ຺ຉິກິຣິຍາ ອຸປສມ຺ປທາ.

ອິທ຺ຘິປາໂທຕິ. ຕຖາຠູຕສ຺ສ ຜສ຺ໂສ…ເປ… ປຄ຺ຄາໂຫ ອວິກ຺ເຂໂປ.

ອິທ຺ຘິປາທໍ ຠາເວຕີຕິ. ເຕ ຘມ຺ເມ ອາເສວຕິ ຠາເວຕິ ພຫຸລີກໂຣຕິ. ເຕນ ວຸຈ຺ຈຕິ ‘‘ອິທ຺ຘິປາທໍ ຠາເວຕີ’’ຕິ.

໔໕໗. ຈຕ຺ຕາໂຣ ອິທ຺ຘິປາທາ – ຉນ຺ທິທ຺ຘິປາໂທ, ວີຣິຍິທ຺ຘິປາໂທ, ຈິຕ຺ຕິທ຺ຘິປາໂທ, ວີມໍສິທ຺ຘິປາໂທ.

໔໕໘. ຕຕ຺ຖ ກຕໂມ ຉນ຺ທິທ຺ຘິປາໂທ? ອິຘ ຠິກ຺ຂຸ ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ໂຍ ຕສ຺ມິໍ ສມເຍ ຉນ຺ໂທ ຉນ຺ທິກຕາ ກຕ຺ຕຸກມ຺ຍຕາ ກຸສໂລ ຘມ຺ມຈ຺ຉນ຺ໂທ – ອຍໍ ວຸຈ຺ຈຕິ ‘‘ຉນ຺ທິທ຺ຘິປາໂທ’’. ອວເສສາ ຘມ຺ມາ ຉນ຺ທິທ຺ຘິປາທສມ຺ປຍຸຕ຺ຕາ.

໔໕໙. ຕຕ຺ຖ ກຕໂມ ວີຣິຍິທ຺ຘິປາໂທ? ອິຘ ຠິກ຺ຂຸ ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ໂຍ ຕສ຺ມິໍ ສມເຍ ເຈຕສິໂກ ວີຣິຍາຣມ຺ໂຠ…ເປ… ສມ຺ມາວາຍາໂມ ວີຣິຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄຣິຍາປນ຺ນໍ – ອຍໍ ວຸຈ຺ຈຕິ ‘‘ວີຣິຍິທ຺ຘິປາໂທ’’. ອວເສສາ ຘມ຺ມາ ວີຣິຍິທ຺ຘິປາທສມ຺ປຍຸຕ຺ຕາ.

໔໖໐. ຕຕ຺ຖ ກຕໂມ ຈິຕ຺ຕິທ຺ຘິປາໂທ? ອິຘ ຠິກ຺ຂຸ ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ …ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ຍໍ ຕສ຺ມິໍ ສມເຍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອຍໍ ວຸຈ຺ຈຕິ ‘‘ຈິຕ຺ຕິທ຺ຘິປາໂທ’’. ອວເສສາ ຘມ຺ມາ ຈິຕ຺ຕິທ຺ຘິປາທສມ຺ປຍຸຕ຺ຕາ.

໔໖໑. ຕຕ຺ຖ ກຕໂມ ວີມໍສິທ຺ຘິປາໂທ? ອິຘ ຠິກ຺ຂຸ ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ຍາ ຕສ຺ມິໍ ສມເຍ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ ຘມ຺ມວິຈຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ວີມໍສິທ຺ຘິປາໂທ’’. ອວເສສາ ຘມ຺ມາ ວີມໍສິທ຺ຘິປາທສມ຺ປຍຸຕ຺ຕາ.

ອຠິຘມ຺ມຠາຊນີຍໍ.