໑. ຉນ຺ທິທ຺ຘິປາໂທ

໔໓໒. ກຖຎ຺ຈ ຠິກ຺ຂຸ ຉນ຺ທສມາຘິປຘານສງ຺ຂາຣສມນ຺ນາຄຕໍ ອິທ຺ຘິປາທໍ ຠາເວຕິ? ຉນ຺ທໍ ເຈ ຠິກ຺ຂຸ ອຘິປຕິໍ ກຣິຕ຺ວາ ລຠຕິ ສມາຘິໍ, ລຠຕິ ຈິຕ຺ຕສ຺ເສກຄ຺ຄຕໍ [ຈິຕ຺ຕສ຺ສ ເອກຄ຺ຄຕໍ (ສີ. ສ຺ຍາ.)] – ອຍໍ ວຸຈ຺ຈຕິ ‘‘ຉນ຺ທສມາຘິ’’. ໂສ ອນຸປ຺ປນ຺ນານໍ ປາປການໍ ອກຸສລານໍ ຘມ຺ມານໍ ອນຸປ຺ປາທາຍ ຉນ຺ທໍ ຊເນຕິ ວາຍມຕິ ວີຣິຍໍ ອາຣຠຕິ ຈິຕ຺ຕໍ ປຄ຺ຄຓ຺ຫາຕິ ປທຫຕິ, ອຸປ຺ປນ຺ນານໍ ປາປການໍ ອກຸສລານໍ ຘມ຺ມານໍ ປຫານາຍ ຉນ຺ທໍ ຊເນຕິ ວາຍມຕິ ວີຣິຍໍ ອາຣຠຕິ ຈິຕ຺ຕໍ ປຄ຺ຄຓ຺ຫາຕິ ປທຫຕິ, ອນຸປ຺ປນ຺ນານໍ ກຸສລານໍ ຘມ຺ມານໍ ອຸປ຺ປາທາຍ ຉນ຺ທໍ ຊເນຕິ ວາຍມຕິ ວີຣິຍໍ ອາຣຠຕິ ຈິຕ຺ຕໍ ປຄ຺ຄຓ຺ຫາຕິ ປທຫຕິ, ອຸປ຺ປນ຺ນານໍ ກຸສລານໍ ຘມ຺ມານໍ ຐິຕິຍາ ອສມ຺ໂມສາຍ ຠິຍ຺ໂຍຠາວາຍ ເວປຸລ຺ລາຍ ຠາວນາຍ ປາຣິປູຣິຍາ ຉນ຺ທໍ ຊເນຕິ ວາຍມຕິ ວີຣິຍໍ ອາຣຠຕິ ຈິຕ຺ຕໍ ປຄ຺ຄຓ຺ຫາຕິ ປທຫຕິ. ອິເມ ວຸຈ຺ຈນ຺ຕິ ‘‘ປຘານສງ຺ຂາຣາ’’. ອິຕິ ອຍຎ຺ຈ ຉນ຺ທສມາຘິ, ອິເມ ຈ ປຘານສງ຺ຂາຣາ. ຕເທກຊ຺ຌໍ ອຠິສຎ຺ຎຫິຕ຺ວາ ອຠິສງ຺ຂິປິຕ຺ວາ ຉນ຺ທສມາຘິປຘານສງ຺ຂາໂຣຕ຺ເວວ ສງ຺ຂ຺ຍໍ [ສງ຺ຂໍ (ສີ.)] ຄຈ຺ຉຕິ.

໔໓໓. ຕຕ຺ຖ ກຕໂມ ຉນ຺ໂທ? ໂຍ ຉນ຺ໂທ ຉນ຺ທິກຕາ ກຕ຺ຕຸກມ຺ຍຕາ ກຸສໂລ ຘມ຺ມຈ຺ຉນ຺ໂທ – ອຍໍ ວຸຈ຺ຈຕິ ‘‘ຉນ຺ໂທ’’.

ຕຕ຺ຖ ກຕໂມ ສມາຘິ? ຍາ ຈິຕ຺ຕສ຺ສ ຐິຕິ ສຓ຺ຐິຕິ ອວຏ຺ຐິຕິ ອວິສາຫາໂຣ ອວິກ຺ເຂໂປ ອວິສາຫຏມານສຕາ ສມໂຖ ສມາຘິນ຺ທ຺ຣິຍໍ ສມາຘິພລໍ ສມ຺ມາສມາຘິ – ອຍໍ ວຸຈ຺ຈຕິ ‘‘ສມາຘິ’’.

ຕຕ຺ຖ ກຕໂມ ປຘານສງ຺ຂາໂຣ? ໂຍ ເຈຕສິໂກ ວີຣິຍາຣມ຺ໂຠ ນິກ຺ກໂມ ປຣກ຺ກໂມ ອຸຍ຺ຍາໂມ ວາຍາໂມ ອຸສ຺ສາໂຫ ອຸສ຺ໂສຬ຺ຫີ ຖາໂມ ຐິຕິ ອສິຖິລປຣກ຺ກມຕາ ອນິກ຺ຂິຕ຺ຕຉນ຺ທຕາ ອນິກ຺ຂິຕ຺ຕຘຸຣຕາ ຘຸຣສມ຺ປຄ຺ຄາໂຫ ວີຣິຍໍ ວີຣິຍິນ຺ທ຺ຣິຍໍ ວີຣິຍພລໍ ສມ຺ມາວາຍາໂມ – ອຍໍ ວຸຈ຺ຈຕິ ‘‘ປຘານສງ຺ຂາໂຣ’’. ອິຕິ ອິມິນາ ຈ ຉນ຺ເທນ, ອິມິນາ ຈ ສມາຘິນາ, ອິມິນາ ຈ ປຘານສງ຺ຂາເຣນ ອຸເປໂຕ ໂຫຕິ ສມຸເປໂຕ ອຸປາຄໂຕ ສມຸປາຄໂຕ ອຸປປນ຺ໂນ ສມ຺ປນ຺ໂນ ສມນ຺ນາຄໂຕ. ເຕນ ວຸຈ຺ຈຕິ ‘‘ຉນ຺ທສມາຘິປຘານສງ຺ຂາຣສມນ຺ນາຄໂຕ’’ຕິ.

໔໓໔. ອິທ຺ຘີຕິ. ຍາ ເຕສໍ ຘມ຺ມານໍ ອິທ຺ຘິ ສມິທ຺ຘິ ອິຊ຺ຌນາ ສມິຊ຺ຌນາ ລາໂຠ ປຏິລາໂຠ ປຕ຺ຕິ ສມ຺ປຕ຺ຕິ ຜຸສນາ ສຈ຺ຉິກິຣິຍາ ອຸປສມ຺ປທາ.

‘‘ອິທ຺ຘິປາໂທ’’ຕິ. ຕຖາຠູຕສ຺ສ ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ, ວິຎ຺ຎາຓກ຺ຂນ຺ໂຘ.

‘‘ອິທ຺ຘິປາທໍ ຠາເວຕີ’’ຕິ. ເຕ ຘມ຺ເມ ອາເສວຕິ ຠາເວຕິ ພຫຸລີກໂຣຕິ. ເຕນ ວຸຈ຺ຈຕິ ‘‘ອິທ຺ຘິປາທໍ ຠາເວຕີ’’ຕິ.