໒. ອຠິຘມ຺ມຠາຊນີຍໍ

໔໐໘. ຈຕ຺ຕາໂຣ ສມ຺ມປ຺ປຘານາ – ອິຘ ຠິກ຺ຂຸ ອນຸປ຺ປນ຺ນານໍ ປາປການໍ ອກຸສລານໍ ຘມ຺ມານໍ ອນຸປ຺ປາທາຍ ຉນ຺ທໍ ຊເນຕິ ວາຍມຕິ ວີຣິຍໍ ອາຣຠຕິ ຈິຕ຺ຕໍ ປຄ຺ຄຓ຺ຫາຕິ ປທຫຕິ, ອຸປ຺ປນ຺ນານໍ ປາປການໍ ອກຸສລານໍ ຘມ຺ມານໍ ປຫານາຍ ຉນ຺ທໍ ຊເນຕິ ວາຍມຕິ ວີຣິຍໍ ອາຣຠຕິ ຈິຕ຺ຕໍ ປຄ຺ຄຓ຺ຫາຕິ ປທຫຕິ, ອນຸປ຺ປນ຺ນານໍ ກຸສລານໍ ຘມ຺ມານໍ ອຸປ຺ປາທາຍ ຉນ຺ທໍ ຊເນຕິ ວາຍມຕິ ວີຣິຍໍ ອາຣຠຕິ ຈິຕ຺ຕໍ ປຄ຺ຄຓ຺ຫາຕິ ປທຫຕິ, ອຸປ຺ປນ຺ນານໍ ກຸສລານໍ ຘມ຺ມານໍ ຐິຕິຍາ ອສມ຺ໂມສາຍ ຠິຍ຺ໂຍຠາວາຍ ເວປຸລ຺ລາຍ ຠາວນາຍ ປາຣິປູຣິຍາ ຉນ຺ທໍ ຊເນຕິ ວາຍມຕິ ວີຣິຍໍ ອາຣຠຕິ ຈິຕ຺ຕໍ ປຄ຺ຄຓ຺ຫາຕິ ປທຫຕິ.

໔໐໙. ກຖຎ຺ຈ ຠິກ຺ຂຸ ອນຸປ຺ປນ຺ນານໍ ປາປການໍ ອກຸສລານໍ ຘມ຺ມານໍ ອນຸປ຺ປາທາຍ ຉນ຺ທໍ ຊເນຕິ ວາຍມຕິ ວີຣິຍໍ ອາຣຠຕິ ຈິຕ຺ຕໍ ປຄ຺ຄຓ຺ຫາຕິ ປທຫຕິ? ອິຘ ຠິກ຺ຂຸ ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ຕສ຺ມິໍ ສມເຍ ອນຸປ຺ປນ຺ນານໍ ປາປການໍ ອກຸສລານໍ ຘມ຺ມານໍ ອນຸປ຺ປາທາຍ ຉນ຺ທໍ ຊເນຕິ ວາຍມຕິ ວີຣິຍໍ ອາຣຠຕິ ຈິຕ຺ຕໍ ປຄ຺ຄຓ຺ຫາຕິ ປທຫຕິ.

໔໑໐. ຉນ຺ທໍ ຊເນຕີຕິ. ຕຕ຺ຖ ກຕໂມ ຉນ຺ໂທ? ໂຍ ຉນ຺ໂທ ຉນ຺ທິກຕາ ກຕ຺ຕຸກມ຺ຍຕາ ກຸສໂລ ຘມ຺ມຈ຺ຉນ຺ໂທ – ອຍໍ ວຸຈ຺ຈຕິ ‘‘ຉນ຺ໂທ’’. ອິມໍ ຉນ຺ທໍ ຊເນຕິ ສຎ຺ຊເນຕິ ອຸຏ຺ຐເປຕິ ສມຸຏ຺ຐເປຕິ ນິພ຺ພຕ຺ເຕຕິ ອຠິນິພ຺ພຕ຺ເຕຕິ. ເຕນ ວຸຈ຺ຈຕິ ‘‘ຉນ຺ທໍ ຊເນຕີ’’ຕິ.

໔໑໑. ວາຍມຕີຕິ. ຕຕ຺ຖ ກຕໂມ ວາຍາໂມ? ໂຍ ເຈຕສິໂກ ວີຣິຍາຣມ຺ໂຠ…ເປ… ສມ຺ມາວາຍາໂມ ວີຣິຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ວາຍາໂມ’’. ອິມິນາ ວາຍາເມນ ອຸເປໂຕ ໂຫຕິ ສມຸເປໂຕ ອຸປາຄໂຕ ສມຸປາຄໂຕ ອຸປປນ຺ໂນ ສມ຺ປນ຺ໂນ ສມນ຺ນາຄໂຕ. ເຕນ ວຸຈ຺ຈຕິ ‘‘ວາຍມຕີ’’ຕິ.

໔໑໒. ວີຣິຍໍ ອາຣຠຕີຕິ. ຕຕ຺ຖ ກຕມໍ ວີຣິຍໍ? ໂຍ ເຈຕສິໂກ ວີຣິຍາຣມ຺ໂຠ…ເປ… ສມ຺ມາວາຍາໂມ ວີຣິຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອິທໍ ວຸຈ຺ຈຕິ ‘‘ວີຣິຍໍ’’. ອິມໍ ວີຣິຍໍ ອາຣຠຕິ ສມາຣຠຕິ ອາເສວຕິ ຠາເວຕິ ພຫຸລີກໂຣຕິ. ເຕນ ວຸຈ຺ຈຕິ ‘‘ວີຣິຍໍ ອາຣຠຕີ’’ຕິ.

໔໑໓. ຈິຕ຺ຕໍ ປຄ຺ຄຓ຺ຫາຕີຕິ. ຕຕ຺ຖ ກຕມໍ ຈິຕ຺ຕໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ຈິຕ຺ຕໍ’’. ອິມໍ ຈິຕ຺ຕໍ ປຄ຺ຄຓ຺ຫາຕິ ສມ຺ປຄ຺ຄຓ຺ຫາຕິ ອຸປຕ຺ຖມ຺ເຠຕິ ປຈ຺ຈຸປຕ຺ຖມ຺ເຠຕິ. ເຕນ ວຸຈ຺ຈຕິ ‘‘ຈິຕ຺ຕໍ ປຄ຺ຄຓ຺ຫາຕີ’’ຕິ.

໔໑໔. ປທຫຕີຕິ. ຕຕ຺ຖ ກຕມໍ ສມ຺ມປ຺ປຘານໍ? ໂຍ ເຈຕສິໂກ ວີຣິຍາຣມ຺ໂຠ…ເປ… ສມ຺ມາວາຍາໂມ ວີຣິຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອິທໍ ວຸຈ຺ຈຕິ ‘‘ສມ຺ມປ຺ປຘານໍ’’. ອວເສສາ ຘມ຺ມາ ສມ຺ມປ຺ປຘານສມ຺ປຍຸຕ຺ຕາ.

໔໑໕. ກຖຎ຺ຈ ຠິກ຺ຂຸ ອຸປ຺ປນ຺ນານໍ ປາປການໍ ອກຸສລານໍ ຘມ຺ມານໍ ປຫານາຍ ຉນ຺ທໍ ຊເນຕິ ວາຍມຕິ ວີຣິຍໍ ອາຣຠຕິ ຈິຕ຺ຕໍ ປຄ຺ຄຓ຺ຫາຕິ ປທຫຕິ? ອິຘ ຠິກ຺ຂຸ ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ຕສ຺ມິໍ ສມເຍ ອຸປ຺ປນ຺ນານໍ ປາປການໍ ອກຸສລານໍ ຘມ຺ມານໍ ປຫານາຍ ຉນ຺ທໍ ຊເນຕິ ວາຍມຕິ ວີຣິຍໍ ອາຣຠຕິ ຈິຕ຺ຕໍ ປຄ຺ຄຓ຺ຫາຕິ ປທຫຕິ.

໔໑໖. ຉນ຺ທໍ ຊເນຕີຕິ…ເປ… ວາຍມຕີຕິ…ເປ… ວີຣິຍໍ ອາຣຠຕີຕິ…ເປ… ຈິຕ຺ຕໍ ປຄ຺ຄຓ຺ຫາຕີຕິ…ເປ… ປທຫຕີຕິ. ຕຕ຺ຖ ກຕມໍ ສມ຺ມປ຺ປຘານໍ? ໂຍ ເຈຕສິໂກ ວີຣິຍາຣມ຺ໂຠ…ເປ… ສມ຺ມາວາຍາໂມ ວີຣິຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອິທໍ ວຸຈ຺ຈຕິ ‘‘ສມ຺ມປ຺ປຘານໍ’’. ອວເສສາ ຘມ຺ມາ ສມ຺ມປ຺ປຘານສມ຺ປຍຸຕ຺ຕາ.

໔໑໗. ກຖຎ຺ຈ ຠິກ຺ຂຸ ອນຸປ຺ປນ຺ນານໍ ກຸສລານໍ ຘມ຺ມານໍ ອຸປ຺ປາທາຍ ຉນ຺ທໍ ຊເນຕິ ວາຍມຕິ ວີຣິຍໍ ອາຣຠຕິ ຈິຕ຺ຕໍ ປຄ຺ຄຓ຺ຫາຕິ ປທຫຕິ? ອິຘ ຠິກ຺ຂຸ ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ຕສ຺ມິໍ ສມເຍ ອນຸປ຺ປນ຺ນານໍ ກຸສລານໍ ຘມ຺ມານໍ ອຸປ຺ປາທາຍ ຉນ຺ທໍ ຊເນຕິ ວາຍມຕິ ວີຣິຍໍ ອາຣຠຕິ ຈິຕ຺ຕໍ ປຄ຺ຄຓ຺ຫາຕິ ປທຫຕິ.

໔໑໘. ຉນ຺ທໍ ຊເນຕີຕິ…ເປ… ວາຍມຕີຕິ…ເປ… ວີຣິຍໍ ອາຣຠຕີຕິ…ເປ… ຈິຕ຺ຕໍ ປຄ຺ຄຓ຺ຫາຕີຕິ…ເປ… ປທຫຕີຕິ. ຕຕ຺ຖ ກຕມໍ ສມ຺ມປ຺ປຘານໍ? ໂຍ ເຈຕສິໂກ ວີຣິຍາຣມ຺ໂຠ …ເປ… ສມ຺ມາວາຍາໂມ ວີຣິຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອິທໍ ວຸຈ຺ຈຕິ ‘‘ສມ຺ມປ຺ປຘານໍ’’. ອວເສສາ ຘມ຺ມາ ສມ຺ມປ຺ປຘານສມ຺ປຍຸຕ຺ຕາ.

໔໑໙. ກຖຎ຺ຈ ຠິກ຺ຂຸ ອຸປ຺ປນ຺ນານໍ ກຸສລານໍ ຘມ຺ມານໍ ຐິຕິຍາ ອສມ຺ໂມສາຍ ຠິຍ຺ໂຍຠາວາຍ ເວປຸລ຺ລາຍ ຠາວນາຍ ປາຣິປູຣິຍາ ຉນ຺ທໍ ຊເນຕິ ວາຍມຕິ ວີຣິຍໍ ອາຣຠຕິ ຈິຕ຺ຕໍ ປຄ຺ຄຓ຺ຫາຕິ ປທຫຕິ? ອິຘ ຠິກ຺ຂຸ ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ຕສ຺ມິໍ ສມເຍ ອຸປ຺ປນ຺ນານໍ ກຸສລານໍ ຘມ຺ມານໍ ຐິຕິຍາ ອສມ຺ໂມສາຍ ຠິຍ຺ໂຍຠາວາຍ ເວປຸລ຺ລາຍ ຠາວນາຍ ປາຣິປູຣິຍາ ຉນ຺ທໍ ຊເນຕິ ວາຍມຕິ ວີຣິຍໍ ອາຣຠຕິ ຈິຕ຺ຕໍ ປຄ຺ຄຓ຺ຫາຕິ ປທຫຕິ.

໔໒໐. ຐິຕິຍາຕິ. ຍາ ຐິຕິ ໂສ ອສມ຺ໂມໂສ, ໂຍ ອສມ຺ໂມໂສ ໂສ ຠິຍ຺ໂຍຠາໂວ, ໂຍ ຠິຍ຺ໂຍຠາໂວ ຕໍ ເວປຸລ຺ລໍ, ຍໍ ເວປຸລ຺ລໍ ສາ ຠາວນາ, ຍາ ຠາວນາ ສາ ປາຣິປູຣີ.

໔໒໑. ຉນ຺ທໍ ຊເນຕີຕິ. ຕຕ຺ຖ ກຕໂມ ຉນ຺ໂທ? ໂຍ ຉນ຺ໂທ ຉນ຺ທິກຕາ ກຕ຺ຕຸກມ຺ຍຕາ ກຸສໂລ ຘມ຺ມຈ຺ຉນ຺ໂທ – ອຍໍ ວຸຈ຺ຈຕິ ‘‘ຉນ຺ໂທ’’. ອິມໍ ຉນ຺ທໍ ຊເນຕິ ສຎ຺ຊເນຕິ ອຸຏ຺ຐເປຕິ ສມຸຏ຺ຐເປຕິ ນິພ຺ພຕ຺ເຕຕິ ອຠິນິພ຺ພຕ຺ເຕຕິ. ເຕນ ວຸຈ຺ຈຕິ ‘‘ຉນ຺ທໍ ຊເນຕີ’’ຕິ.

໔໒໒. ວາຍມຕີຕິ. ຕຕ຺ຖ ກຕໂມ ວາຍາໂມ? ໂຍ ເຈຕສິໂກ ວີຣິຍາຣມ຺ໂຠ…ເປ… ສມ຺ມາວາຍາໂມ ວີຣິຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອຍໍ ວຸຈ຺ຈຕິ ‘‘ວາຍາໂມ’’. ອິມິນາ ວາຍາເມນ ອຸເປໂຕ ໂຫຕິ…ເປ… ສມນ຺ນາຄໂຕ. ເຕນ ວຸຈ຺ຈຕິ ‘‘ວາຍມຕີ’’ຕິ.

໔໒໓. ວີຣິຍໍ ອາຣຠຕີຕິ. ຕຕ຺ຖ ກຕມໍ ວີຣິຍໍ? ໂຍ ເຈຕສິໂກ ວີຣິຍາຣມ຺ໂຠ…ເປ… ສມ຺ມາວາຍາໂມ ວີຣິຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອິທໍ ວຸຈ຺ຈຕິ ‘‘ວີຣິຍໍ’’. ອິມໍ ວີຣິຍໍ ອາຣຠຕິ ສມາຣຠຕິ ອາເສວຕິ ຠາເວຕິ ພຫຸລີກໂຣຕິ. ເຕນ ວຸຈ຺ຈຕິ ‘‘ວີຣິຍໍ ອາຣຠຕີ’’ຕິ.

໔໒໔. ຈິຕ຺ຕໍ ປຄ຺ຄຓ຺ຫາຕີຕິ. ຕຕ຺ຖ ກຕມໍ ຈິຕ຺ຕໍ? ຍໍ ຈິຕ຺ຕໍ ມໂນ ມານສໍ…ເປ… ຕຊ຺ຊາມໂນວິຎ຺ຎາຓຘາຕຸ – ອິທໍ ວຸຈ຺ຈຕິ ‘‘ຈິຕ຺ຕໍ’’. ອິມໍ ຈິຕ຺ຕໍ ປຄ຺ຄຓ຺ຫາຕິ ສມ຺ປຄ຺ຄຓ຺ຫາຕິ ອຸປຕ຺ຖມ຺ເຠຕິ ປຈ຺ຈຸປຕ຺ຖມ຺ເຠຕິ. ເຕນ ວຸຈ຺ຈຕິ ‘‘ຈິຕ຺ຕໍ ປຄ຺ຄຓ຺ຫາຕີ’’ຕິ.

໔໒໕. ປທຫຕີຕິ. ຕຕ຺ຖ ກຕມໍ ສມ຺ມປ຺ປຘານໍ? ໂຍ ເຈຕສິໂກ ວີຣິຍາຣມ຺ໂຠ…ເປ… ສມ຺ມາວາຍາໂມ ວີຣິຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອິທໍ ວຸຈ຺ຈຕິ ‘‘ສມ຺ມປ຺ປຘານໍ’’. ອວເສສາ ຘມ຺ມາ ສມ຺ມປ຺ປຘານສມ຺ປຍຸຕ຺ຕາ.

໔໒໖. ຕຕ຺ຖ ກຕມໍ ສມ຺ມປ຺ປຘານໍ? ອິຘ ຠິກ຺ຂຸ ຍສ຺ມິໍ ສມເຍ ໂລກຸຕ຺ຕຣໍ ຌານໍ ຠາເວຕິ ນິຍ຺ຍານິກໍ ອປຈຍຄາມິໍ ທິຏ຺ຐິຄຕານໍ ປຫານາຍ ປຐມາຍ ຠູມິຍາ ປຕ຺ຕິຍາ ວິວິຈ຺ເຈວ ກາເມຫິ…ເປ… ປຐມໍ ຌານໍ ອຸປສມ຺ປຊ຺ຊ ວິຫຣຕິ ທຸກ຺ຂປຏິປທໍ ທນ຺ຘາຠິຎ຺ຎໍ, ໂຍ ຕສ຺ມິໍ ສມເຍ ເຈຕສິໂກ ວີຣິຍາຣມ຺ໂຠ…ເປ… ສມ຺ມາວາຍາໂມ ວີຣິຍສມ຺ໂພຊ຺ຌງ຺ໂຄ ມຄ຺ຄງ຺ຄໍ ມຄ຺ຄປຣິຍາປນ຺ນໍ – ອິທໍ ວຸຈ຺ຈຕິ ‘‘ສມ຺ມປ຺ປຘານໍ’’. ອວເສສາ ຘມ຺ມາ ສມ຺ມປ຺ປຘານສມ຺ປຍຸຕ຺ຕາ.

ອຠິຘມ຺ມຠາຊນີຍໍ.