໑. ສຸຕ຺ຕນ຺ຕຠາຊນີຍໍ

໓໕໕. ຈຕ຺ຕາໂຣ ສຕິປຏ຺ຐານາ – ອິຘ ຠິກ຺ຂຸ ອຊ຺ຌຕ຺ຕໍ ກາເຍ ກາຍານຸປສ຺ສີ ວິຫຣຕິ ພຫິທ຺ຘາ ກາເຍ ກາຍານຸປສ຺ສີ ວິຫຣຕິ ອຊ຺ຌຕ຺ຕພຫິທ຺ຘາ ກາເຍ ກາຍານຸປສ຺ສີ ວິຫຣຕິ ອາຕາປີ ສມ຺ປຊາໂນ ສຕິມາ ວິເນຍ຺ຍ ໂລເກ ອຠິຊ຺ຌາໂທມນສ຺ສໍ, ອຊ຺ຌຕ຺ຕໍ ເວທນາສຸ ເວທນານຸປສ຺ສີ ວິຫຣຕິ ພຫິທ຺ຘາ ເວທນາສຸ ເວທນານຸປສ຺ສີ ວິຫຣຕິ ອຊ຺ຌຕ຺ຕພຫິທ຺ຘາ ເວທນາສຸ ເວທນານຸປສ຺ສີ ວິຫຣຕິ ອາຕາປີ ສມ຺ປຊາໂນ ສຕິມາ ວິເນຍ຺ຍ ໂລເກ ອຠິຊ຺ຌາໂທມນສ຺ສໍ, ອຊ຺ຌຕ຺ຕໍ ຈິຕ຺ເຕ ຈິຕ຺ຕານຸປສ຺ສີ ວິຫຣຕິ ພຫິທ຺ຘາ ຈິຕ຺ເຕ ຈິຕ຺ຕານຸປສ຺ສີ ວິຫຣຕິ ອຊ຺ຌຕ຺ຕພຫິທ຺ຘາ ຈິຕ຺ເຕ ຈິຕ຺ຕານຸປສ຺ສີ ວິຫຣຕິ ອາຕາປີ ສມ຺ປຊາໂນ ສຕິມາ ວິເນຍ຺ຍ ໂລເກ ອຠິຊ຺ຌາໂທມນສ຺ສໍ, ອຊ຺ຌຕ຺ຕໍ ຘມ຺ເມສຸ ຘມ຺ມານຸປສ຺ສີ ວິຫຣຕິ ພຫິທ຺ຘາ ຘມ຺ເມສຸ ຘມ຺ມານຸປສ຺ສີ ວິຫຣຕິ ອຊ຺ຌຕ຺ຕພຫິທ຺ຘາ ຘມ຺ເມສຸ ຘມ຺ມານຸປສ຺ສີ ວິຫຣຕິ ອາຕາປີ ສມ຺ປຊາໂນ ສຕິມາ ວິເນຍ຺ຍ ໂລເກ ອຠິຊ຺ຌາໂທມນສ຺ສໍ.

໑. ກາຍານຸປສ຺ສນານິທ຺ເທໂສ

໓໕໖. ກຖຎ຺ຈ ຠິກ຺ຂຸ ອຊ຺ຌຕ຺ຕໍ ກາເຍ ກາຍານຸປສ຺ສີ ວິຫຣຕິ? ອິຘ ຠິກ຺ຂຸ ອຊ຺ຌຕ຺ຕໍ ກາຍໍ ອຸທ຺ຘໍ ປາທຕລາ ອໂຘ ເກສມຕ຺ຖກາ ຕຈປຣິຍນ຺ຕໍ ປູຣໍ ນານປ຺ປກາຣສ຺ສ ອສຸຈິໂນ ປຈ຺ຈເວກ຺ຂຕິ – ‘‘ອຕ຺ຖິ ອິມສ຺ມິໍ ກາເຍ ເກສາ ໂລມາ ນຂາ ທນ຺ຕາ ຕໂຈ ມໍສໍ ນ຺ຫາຣຸ [ນຫາຣຸ (ສີ.)] ອຏ຺ຐິ ອຏ຺ຐິມິຎ຺ຊໍ [ອຏ຺ຐິມິຎ຺ຊາ (ສີ.)] ວກ຺ກໍ ຫທຍໍ ຍກນໍ ກິໂລມກໍ ປິຫກໍ ປປ຺ຜາສໍ ອນ຺ຕໍ ອນ຺ຕຄຸຓໍ ອຸທຣິຍໍ ກຣີສໍ ປິຕ຺ຕໍ ເສມ຺ຫໍ ປຸພ຺ໂພ ໂລຫິຕໍ ເສໂທ ເມໂທ ອສ຺ສຸ ວສາ ເຂໂຬ ສິງ຺ຆາຓິກາ ລສິກາ ມຸຕ຺ຕ’’ນ຺ຕິ. ໂສ ຕໍ ນິມິຕ຺ຕໍ ອາເສວຕິ ຠາເວຕິ ພຫຸລີກໂຣຕິ ສ຺ວາວຕ຺ຖິຕໍ ວວຕ຺ຖເປຕິ. ໂສ ຕໍ ນິມິຕ຺ຕໍ ອາເສວິຕ຺ວາ ຠາເວຕ຺ວາ ພຫຸລີກຣິຕ຺ວາ ສ຺ວາວຕ຺ຖິຕໍ ວວຕ຺ຖເປຕ຺ວາ ພຫິທ຺ຘາ ກາເຍ ຈິຕ຺ຕໍ ອຸປສໍຫຣຕິ.

ກຖຎ຺ຈ ຠິກ຺ຂຸ ພຫິທ຺ຘາ ກາເຍ ກາຍານຸປສ຺ສີ ວິຫຣຕິ? ອິຘ ຠິກ຺ຂຸ ພຫິທ຺ຘາ ກາຍໍ ອຸທ຺ຘໍ ປາທຕລາ ອໂຘ ເກສມຕ຺ຖກາ ຕຈປຣິຍນ຺ຕໍ ປູຣໍ ນານປ຺ປກາຣສ຺ສ ອສຸຈິໂນ ປຈ຺ຈເວກ຺ຂຕິ – ‘‘ອຕ຺ຖິສ຺ສ ກາເຍ ເກສາ ໂລມາ ນຂາ ທນ຺ຕາ ຕໂຈ ມໍສໍ ນ຺ຫາຣຸ ອຏ຺ຐິ ອຏ຺ຐິມິຎ຺ຊໍ ວກ຺ກໍ ຫທຍໍ ຍກນໍ ກິໂລມກໍ ປິຫກໍ ປປ຺ຜາສໍ ອນ຺ຕໍ ອນ຺ຕຄຸຓໍ ອຸທຣິຍໍ ກຣີສໍ ປິຕ຺ຕໍ ເສມ຺ຫໍ ປຸພ຺ໂພ ໂລຫິຕໍ ເສໂທ ເມໂທ ອສ຺ສຸ ວສາ ເຂໂຬ ສິງ຺ຆາຓິກາ ລສິກາ ມຸຕ຺ຕ’’ນ຺ຕິ. ໂສ ຕໍ ນິມິຕ຺ຕໍ ອາເສວຕິ ຠາເວຕິ ພຫຸລີກໂຣຕິ ສ຺ວາວຕ຺ຖິຕໍ ວວຕ຺ຖເປຕິ. ໂສ ຕໍ ນິມິຕ຺ຕໍ ອາເສວິຕ຺ວາ ຠາເວຕ຺ວາ ພຫຸລີກຣິຕ຺ວາ ສ຺ວາວຕ຺ຖິຕໍ ວວຕ຺ຖເປຕ຺ວາ ອຊ຺ຌຕ຺ຕພຫິທ຺ຘາ ກາເຍ ຈິຕ຺ຕໍ ອຸປສໍຫຣຕິ.

ກຖຎ຺ຈ ຠິກ຺ຂຸ ອຊ຺ຌຕ຺ຕພຫິທ຺ຘາ ກາເຍ ກາຍານຸປສ຺ສີ ວິຫຣຕິ? ອິຘ ຠິກ຺ຂຸ ອຊ຺ຌຕ຺ຕພຫິທ຺ຘາ ກາຍໍ ອຸທ຺ຘໍ ປາທຕລາ ອໂຘ ເກສມຕ຺ຖກາ ຕຈປຣິຍນ຺ຕໍ ປູຣໍ ນານປ຺ປກາຣສ຺ສ ອສຸຈິໂນ ປຈ຺ຈເວກ຺ຂຕິ – ‘‘ອຕ຺ຖິ ອິມສ຺ມິໍ ກາເຍ ເກສາ ໂລມາ ນຂາ ທນ຺ຕາ ຕໂຈ ມໍສໍ ນ຺ຫາຣຸ ອຏ຺ຐິ ອຏ຺ຐິມິຎ຺ຊໍ ວກ຺ກໍ ຫທຍໍ ຍກນໍ ກິໂລມກໍ ປິຫກໍ ປປ຺ຜາສໍ ອນ຺ຕໍ ອນ຺ຕຄຸຓໍ ອຸທຣິຍໍ ກຣີສໍ ປິຕ຺ຕໍ ເສມ຺ຫໍ ປຸພ຺ໂພ ໂລຫິຕໍ ເສໂທ ເມໂທ ອສ຺ສຸ ວສາ ເຂໂຬ ສິງ຺ຆາຓິກາ ລສິກາ ມຸຕ຺ຕ’’ນ຺ຕິ. ເອວໍ ຠິກ຺ຂຸ ອຊ຺ຌຕ຺ຕພຫິທ຺ຘາ ກາເຍ ກາຍານຸປສ຺ສີ ວິຫຣຕິ ອາຕາປີ ສມ຺ປຊາໂນ ສຕິມາ ວິເນຍ຺ຍ ໂລເກ ອຠິຊ຺ຌາໂທມນສ຺ສໍ.

໓໕໗. ອນຸປສ຺ສີຕິ. ຕຕ຺ຖ ກຕມາ ອນຸປສ຺ສນາ? ຍາ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ‘‘ອນຸປສ຺ສນາ’’. ອິມາຍ ອນຸປສ຺ສນາຍ ອຸເປໂຕ ໂຫຕິ ສມຸເປໂຕ ອຸປາຄໂຕ ສມຸປາຄໂຕ ອຸປປນ຺ໂນ ສມ຺ປນ຺ໂນ ສມນ຺ນາຄໂຕ. ເຕນ ວຸຈ຺ຈຕິ ‘‘ອນຸປສ຺ສີ’’ຕິ.

໓໕໘. ວິຫຣຕີຕິ. ອິຣິຍຕິ ວຕ຺ຕຕິ ປາເລຕິ ຍເປຕິ ຍາເປຕິ ຈຣຕິ ວິຫຣຕິ. ເຕນ ວຸຈ຺ຈຕິ ‘‘ວິຫຣຕີ’’ຕິ.

໓໕໙. ອາຕາປີຕິ. ຕຕ຺ຖ ກຕໂມ ອາຕາໂປ [ກຕມໍ ອາຕາປໍ (ສພ຺ພຕ຺ຖ)]? ໂຍ ເຈຕສິໂກ ວີຣິຍາຣມ຺ໂຠ…ເປ… ສມ຺ມາວາຍາໂມ – ອຍໍ ວຸຈ຺ຈຕິ ‘‘ອາຕາໂປ’’. ອິມິນາ ອາຕາເປນ ອຸເປໂຕ ໂຫຕິ ສມຸເປໂຕ ອຸປາຄໂຕ ສມຸປາຄໂຕ ອຸປປນ຺ໂນ ສມ຺ປນ຺ໂນ ສມນ຺ນາຄໂຕ. ເຕນ ວຸຈ຺ຈຕິ ‘‘ອາຕາປີ’’ຕິ.

໓໖໐. ສມ຺ປຊາໂນຕິ. ຕຕ຺ຖ ກຕມໍ ສມ຺ປຊຎ຺ຎໍ? ຍາ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອິທໍ ວຸຈ຺ຈຕິ ‘‘ສມ຺ປຊຎ຺ຎໍ’’. ອິມິນາ ສມ຺ປຊຎ຺ເຎນ ອຸເປໂຕ ໂຫຕິ ສມຸເປໂຕ ອຸປາຄໂຕ ສມຸປາຄໂຕ ອຸປປນ຺ໂນ ສມ຺ປນ຺ໂນ ສມນ຺ນາຄໂຕ. ເຕນ ວຸຈ຺ຈຕິ ‘‘ສມ຺ປຊາໂນ’’ຕິ.

໓໖໑. ສຕິມາຕິ. ຕຕ຺ຖ ກຕມາ ສຕິ? ຍາ ສຕິ ອນຸສ຺ສຕິ…ເປ… ສມ຺ມາສຕິ – ອຍໍ ວຸຈ຺ຈຕິ ‘‘ສຕິ’’. ອິມາຍ ສຕິຍາ ອຸເປໂຕ ໂຫຕິ ສມຸເປໂຕ ອຸປາຄໂຕ ສມຸປາຄໂຕ ອຸປປນ຺ໂນ ສມ຺ປນ຺ໂນ ສມນ຺ນາຄໂຕ. ເຕນ ວຸຈ຺ຈຕິ ‘‘ສຕິມາ’’ຕິ.

໓໖໒. ວິເນຍ຺ຍ ໂລເກ ອຠິຊ຺ຌາໂທມນສ຺ສນ຺ຕິ. ຕຕ຺ຖ ກຕໂມ ໂລໂກ? ສ຺ເວວ ກາໂຍ ໂລໂກ. ປຎ຺ຈປິ ອຸປາທານກ຺ຂນ຺ຘາ ໂລໂກ. ອຍໍ ວຸຈ຺ຈຕິ ‘‘ໂລໂກ’’. ຕຕ຺ຖ ກຕມາ ອຠິຊ຺ຌາ? ໂຍ ຣາໂຄ ສາຣາໂຄ…ເປ… ຈິຕ຺ຕສ຺ສ ສາຣາໂຄ – ອຍໍ ວຸຈ຺ຈຕິ ‘‘ອຠິຊ຺ຌາ’’. ຕຕ຺ຖ ກຕມໍ ໂທມນສ຺ສໍ? ຍໍ ເຈຕສິກໍ ອສາຕໍ ເຈຕສິກໍ ທຸກ຺ຂໍ ເຈໂຕສມ຺ຜສ຺ສຊໍ ອສາຕໍ ທຸກ຺ຂໍ ເວທຍິຕໍ ເຈໂຕສມ຺ຜສ຺ສຊາ ອສາຕາ ທຸກ຺ຂາ ເວທນາ – ອິທໍ ວຸຈ຺ຈຕິ ‘‘ໂທມນສ຺ສໍ’’. ອິຕິ ອຍຎ຺ຈ ອຠິຊ຺ຌາ ອິທຎ຺ຈ ໂທມນສ຺ສໍ ອິມມ຺ຫິ ໂລເກ ວິນີຕາ ໂຫນ຺ຕິ ປຏິວິນີຕາ ສນ຺ຕາ ສມິຕາ ວູປສນ຺ຕາ ອຕ຺ຖງ຺ຄຕາ ອພ຺ຠຕ຺ຖງ຺ຄຕາ ອປ຺ປິຕາ ພ຺ຍປ຺ປິຕາ ໂສສິຕາ ວິໂສສິຕາ ພ຺ຍນ຺ຕີກຕາ. ເຕນ ວຸຈ຺ຈຕິ ‘‘ວິເນຍ຺ຍ ໂລເກ ອຠິຊ຺ຌາໂທມນສ຺ສ’’ນ຺ຕິ.

ກາຍານຸປສ຺ສນານິທ຺ເທໂສ.

໒. ເວທນານຸປສ຺ສນານິທ຺ເທໂສ

໓໖໓. ກຖຎ຺ຈ ຠິກ຺ຂຸ ອຊ຺ຌຕ຺ຕໍ ເວທນາສຸ ເວທນານຸປສ຺ສີ ວິຫຣຕິ? ອິຘ ຠິກ຺ຂຸ ສຸຂໍ ເວທນໍ ເວທຍມາໂນ ‘‘ສຸຂໍ ເວທນໍ ເວທຍາມີ’’ຕິ ປຊານາຕິ, ທຸກ຺ຂໍ ເວທນໍ ເວທຍມາໂນ ‘‘ທຸກ຺ຂໍ ເວທນໍ ເວທຍາມີ’’ຕິ ປຊານາຕິ, ອທຸກ຺ຂມສຸຂໍ ເວທນໍ ເວທຍມາໂນ ‘‘ອທຸກ຺ຂມສຸຂໍ ເວທນໍ ເວທຍາມີ’’ຕິ ປຊານາຕິ, ສາມິສໍ ວາ ສຸຂໍ ເວທນໍ ເວທຍມາໂນ ‘‘ສາມິສໍ ສຸຂໍ ເວທນໍ ເວທຍາມີ’’ຕິ ປຊານາຕິ, ນິຣາມິສໍ ວາ ສຸຂໍ ເວທນໍ ເວທຍມາໂນ ‘‘ນິຣາມິສໍ ສຸຂໍ ເວທນໍ ເວທຍາມີ’’ຕິ ປຊານາຕິ, ສາມິສໍ ວາ ທຸກ຺ຂໍ ເວທນໍ ເວທຍມາໂນ ‘‘ສາມິສໍ ທຸກ຺ຂໍ ເວທນໍ ເວທຍາມີ’’ຕິ ປຊານາຕິ, ນິຣາມິສໍ ວາ ທຸກ຺ຂໍ ເວທນໍ ເວທຍມາໂນ ‘‘ນິຣາມິສໍ ທຸກ຺ຂໍ ເວທນໍ ເວທຍາມີ’’ຕິ ປຊານາຕິ, ສາມິສໍ ວາ ອທຸກ຺ຂມສຸຂໍ ເວທນໍ ເວທຍມາໂນ ‘‘ສາມິສໍ ອທຸກ຺ຂມສຸຂໍ ເວທນໍ ເວທຍາມີ’’ຕິ ປຊານາຕິ, ນິຣາມິສໍ ວາ ອທຸກ຺ຂມສຸຂໍ ເວທນໍ ເວທຍມາໂນ ‘‘ນິຣາມິສໍ ອທຸກ຺ຂມສຸຂໍ ເວທນໍ ເວທຍາມີ’’ຕິ ປຊານາຕິ. ໂສ ຕໍ ນິມິຕ຺ຕໍ ອາເສວຕິ ຠາເວຕິ ພຫຸລີກໂຣຕິ ສ຺ວາວຕ຺ຖິຕໍ ວວຕ຺ຖເປຕິ. ໂສ ຕໍ ນິມິຕ຺ຕໍ ອາເສວິຕ຺ວາ ຠາເວຕ຺ວາ ພຫຸລີກຣິຕ຺ວາ ສ຺ວາວຕ຺ຖິຕໍ ວວຕ຺ຖເປຕ຺ວາ ພຫິທ຺ຘາ ເວທນາສຸ ຈິຕ຺ຕໍ ອຸປສໍຫຣຕິ.

ກຖຎ຺ຈ ຠິກ຺ຂຸ ພຫິທ຺ຘາ ເວທນາສຸ ເວທນານຸປສ຺ສີ ວິຫຣຕິ? ອິຘ ຠິກ຺ຂຸ ສຸຂໍ ເວທນໍ ເວທຍມານໍ ‘‘ສຸຂໍ ເວທນໍ ເວທຍຕີ’’ຕິ ປຊານາຕິ, ທຸກ຺ຂໍ ເວທນໍ ເວທຍມານໍ ‘‘ທຸກ຺ຂໍ ເວທນໍ ເວທຍຕີ’’ຕິ ປຊານາຕິ, ອທຸກ຺ຂມສຸຂໍ ເວທນໍ ເວທຍມານໍ ‘‘ອທຸກ຺ຂມສຸຂໍ ເວທນໍ ເວທຍຕີ’’ຕິ ປຊານາຕິ, ສາມິສໍ ວາ ສຸຂໍ ເວທນໍ ເວທຍມານໍ ‘‘ສາມິສໍ ສຸຂໍ ເວທນໍ ເວທຍຕີ’’ຕິ ປຊານາຕິ, ນິຣາມິສໍ ວາ ສຸຂໍ ເວທນໍ ເວທຍມານໍ ‘‘ນິຣາມິສໍ ສຸຂໍ ເວທນໍ ເວທຍຕີ’’ຕິ ປຊານາຕິ, ສາມິສໍ ວາ ທຸກ຺ຂໍ ເວທນໍ ເວທຍມານໍ ‘‘ສາມິສໍ ທຸກ຺ຂໍ ເວທນໍ ເວທຍຕີ’’ຕິ ປຊານາຕິ, ນິຣາມິສໍ ວາ ທຸກ຺ຂໍ ເວທນໍ ເວທຍມານໍ ‘‘ນິຣາມິສໍ ທຸກ຺ຂໍ ເວທນໍ ເວທຍຕີ’’ຕິ ປຊານາຕິ, ສາມິສໍ ວາ ອທຸກ຺ຂມສຸຂໍ ເວທນໍ ເວທຍມານໍ ‘‘ສາມິສໍ ອທຸກ຺ຂມສຸຂໍ ເວທນໍ ເວທຍຕີ’’ຕິ ປຊານາຕິ, ນິຣາມິສໍ ວາ ອທຸກ຺ຂມສຸຂໍ ເວທນໍ ເວທຍມານໍ ‘‘ນິຣາມິສໍ ອທຸກ຺ຂມສຸຂໍ ເວທນໍ ເວທຍຕີ’’ຕິ ປຊານາຕິ. ໂສ ຕໍ ນິມິຕ຺ຕໍ ອາເສວຕິ ຠາເວຕິ ພຫຸລີກໂຣຕິ ສ຺ວາວຕ຺ຖິຕໍ ວວຕ຺ຖເປຕິ. ໂສ ຕໍ ນິມິຕ຺ຕໍ ອາເສວິຕ຺ວາ ຠາເວຕ຺ວາ ພຫຸລີກຣິຕ຺ວາ ສ຺ວາວຕ຺ຖິຕໍ ວວຕ຺ຖເປຕ຺ວາ ອຊ຺ຌຕ຺ຕພຫິທ຺ຘາ ເວທນາສຸ ຈິຕ຺ຕໍ ອຸປສໍຫຣຕິ.

ກຖຎ຺ຈ ຠິກ຺ຂຸ ອຊ຺ຌຕ຺ຕພຫິທ຺ຘາ ເວທນາສຸ ເວທນານຸປສ຺ສີ ວິຫຣຕິ? ອິຘ ຠິກ຺ຂຸ ສຸຂໍ ເວທນໍ ‘‘ສຸຂາ ເວທນາ’’ຕິ ປຊານາຕິ, ທຸກ຺ຂໍ ເວທນໍ ‘‘ທຸກ຺ຂາ ເວທນາ’’ຕິ ປຊານາຕິ, ອທຸກ຺ຂມສຸຂໍ ເວທນໍ ‘‘ອທຸກ຺ຂມສຸຂາ ເວທນາ’’ຕິ ປຊານາຕິ, ສາມິສໍ ວາ ສຸຂໍ ເວທນໍ ‘‘ສາມິສາ ສຸຂາ ເວທນາ’’ຕິ ປຊານາຕິ, ນິຣາມິສໍ ວາ ສຸຂໍ ເວທນໍ ‘‘ນິຣາມິສາ ສຸຂາ ເວທນາ’’ຕິ ປຊານາຕິ, ສາມິສໍ ວາ ທຸກ຺ຂໍ ເວທນໍ ‘‘ສາມິສາ ທຸກ຺ຂາ ເວທນາ’’ຕິ ປຊານາຕິ, ນິຣາມິສໍ ວາ ທຸກ຺ຂໍ ເວທນໍ ‘‘ນິຣາມິສາ ທຸກ຺ຂາ ເວທນາ’’ຕິ ປຊານາຕິ, ສາມິສໍ ວາ ອທຸກ຺ຂມສຸຂໍ ເວທນໍ ‘‘ສາມິສາ ອທຸກ຺ຂມສຸຂາ ເວທນາ’’ຕິ ປຊານາຕິ, ນິຣາມິສໍ ວາ ອທຸກ຺ຂມສຸຂໍ ເວທນໍ ‘‘ນິຣາມິສາ ອທຸກ຺ຂມສຸຂາ ເວທນາ’’ຕິ ປຊານາຕິ. ເອວໍ ຠິກ຺ຂຸ ອຊ຺ຌຕ຺ຕພຫິທ຺ຘາ ເວທນາສຸ ເວທນານຸປສ຺ສີ ວິຫຣຕິ ອາຕາປີ ສມ຺ປຊາໂນ ສຕິມາ ວິເນຍ຺ຍ ໂລເກ ອຠິຊ຺ຌາໂທມນສ຺ສໍ.

໓໖໔. ອນຸປສ຺ສີຕິ …ເປ… ວິຫຣຕີຕິ…ເປ… ອາຕາປີຕິ…ເປ… ສມ຺ປຊາໂນຕິ…ເປ… ສຕິມາຕິ…ເປ… ວິເນຍ຺ຍ ໂລເກ ອຠິຊ຺ຌາໂທມນສ຺ສນ຺ຕິ. ຕຕ຺ຖ ກຕໂມ ໂລໂກ? ສາເຍວ ເວທນາ ໂລໂກ. ປຎ຺ຈປິ ອຸປາທານກ຺ຂນ຺ຘາ ໂລໂກ. ອຍໍ ວຸຈ຺ຈຕິ ‘‘ໂລໂກ’’. ຕຕ຺ຖ ກຕມາ ອຠິຊ຺ຌາ? ໂຍ ຣາໂຄ ສາຣາໂຄ…ເປ… ຈິຕ຺ຕສ຺ສ ສາຣາໂຄ – ອຍໍ ວຸຈ຺ຈຕິ ‘‘ອຠິຊ຺ຌາ’’. ຕຕ຺ຖ ກຕມໍ ໂທມນສ຺ສໍ? ຍໍ ເຈຕສິກໍ ອສາຕໍ ເຈຕສິກໍ ທຸກ຺ຂໍ ເຈໂຕສມ຺ຜສ຺ສຊໍ ອສາຕໍ ທຸກ຺ຂໍ ເວທຍິຕໍ ເຈໂຕສມ຺ຜສ຺ສຊາ ອສາຕາ ທຸກ຺ຂາ ເວທນາ – ອິທໍ ວຸຈ຺ຈຕິ ‘‘ໂທມນສ຺ສໍ’’. ອິຕິ ອຍຎ຺ຈ ອຠິຊ຺ຌາ ອິທຎ຺ຈ ໂທມນສ຺ສໍ ອິມມ຺ຫິ ໂລເກ ວິນີຕາ ໂຫນ຺ຕິ ປຏິວິນີຕາ ສນ຺ຕາ ສມິຕາ ວູປສນ຺ຕາ ອຕ຺ຖງ຺ຄຕາ ອພ຺ຠຕ຺ຖງ຺ຄຕາ ອປ຺ປິຕາ ພ຺ຍປ຺ປິຕາ ໂສສິຕາ ວິໂສສິຕາ ພ຺ຍນ຺ຕີກຕາ. ເຕນ ວຸຈ຺ຈຕິ ‘‘ວິເນຍ຺ຍ ໂລເກ ອຠິຊ຺ຌາໂທມນສ຺ສ’’ນ຺ຕິ.

ເວທນານຸປສ຺ສນານິທ຺ເທໂສ.

໓. ຈິຕ຺ຕານຸປສ຺ສນານິທ຺ເທໂສ

໓໖໕. ກຖຎ຺ຈ ຠິກ຺ຂຸ ອຊ຺ຌຕ຺ຕໍ ຈິຕ຺ເຕ ຈິຕ຺ຕານຸປສ຺ສີ ວິຫຣຕິ? ອິຘ ຠິກ຺ຂຸ ສຣາຄໍ ວາ ຈິຕ຺ຕໍ ‘‘ສຣາຄໍ ເມ ຈິຕ຺ຕ’’ນ຺ຕິ ປຊານາຕິ, ວີຕຣາຄໍ ວາ ຈິຕ຺ຕໍ ‘‘ວີຕຣາຄໍ ເມ ຈິຕ຺ຕ’’ນ຺ຕິ ປຊານາຕິ, ສໂທສໍ ວາ ຈິຕ຺ຕໍ ‘‘ສໂທສໍ ເມ ຈິຕ຺ຕ’’ນ຺ຕິ ປຊານາຕິ, ວີຕໂທສໍ ວາ ຈິຕ຺ຕໍ ‘‘ວີຕໂທສໍ ເມ ຈິຕ຺ຕ’’ນ຺ຕິ ປຊານາຕິ, ສໂມຫໍ ວາ ຈິຕ຺ຕໍ ‘‘ສໂມຫໍ ເມ ຈິຕ຺ຕ’’ນ຺ຕິ ປຊານາຕິ, ວີຕໂມຫໍ ວາ ຈິຕ຺ຕໍ ‘‘ວີຕໂມຫໍ ເມ ຈິຕ຺ຕ’’ນ຺ຕິ ປຊານາຕິ, ສໍຂິຕ຺ຕໍ ວາ ຈິຕ຺ຕໍ ‘‘ສໍຂິຕ຺ຕໍ ເມ ຈິຕ຺ຕ’’ນ຺ຕິ ປຊານາຕິ, ວິກ຺ຂິຕ຺ຕໍ ວາ ຈິຕ຺ຕໍ ‘‘ວິກ຺ຂິຕ຺ຕໍ ເມ ຈິຕ຺ຕ’’ນ຺ຕິ ປຊານາຕິ, ມຫຄ຺ຄຕໍ ວາ ຈິຕ຺ຕໍ ‘‘ມຫຄ຺ຄຕໍ ເມ ຈິຕ຺ຕ’’ນ຺ຕິ ປຊານາຕິ, ອມຫຄ຺ຄຕໍ ວາ ຈິຕ຺ຕໍ ‘‘ອມຫຄ຺ຄຕໍ ເມ ຈິຕ຺ຕ’’ນ຺ຕິ ປຊານາຕິ, ສອຸຕ຺ຕຣໍ ວາ ຈິຕ຺ຕໍ ‘‘ສອຸຕ຺ຕຣໍ ເມ ຈິຕ຺ຕ’’ນ຺ຕິ ປຊານາຕິ, ອນຸຕ຺ຕຣໍ ວາ ຈິຕ຺ຕໍ ‘‘ອນຸຕ຺ຕຣໍ ເມ ຈິຕ຺ຕ’’ນ຺ຕິ ປຊານາຕິ, ສມາຫິຕໍ ວາ ຈິຕ຺ຕໍ ‘‘ສມາຫິຕໍ ເມ ຈິຕ຺ຕ’’ນ຺ຕິ ປຊານາຕິ, ອສມາຫິຕໍ ວາ ຈິຕ຺ຕໍ ‘‘ອສມາຫິຕໍ ເມ ຈິຕ຺ຕ’’ນ຺ຕິ ປຊານາຕິ, ວິມຸຕ຺ຕໍ ວາ ຈິຕ຺ຕໍ ‘‘ວິມຸຕ຺ຕໍ ເມ ຈິຕ຺ຕ’’ນ຺ຕິ ປຊານາຕິ, ອວິມຸຕ຺ຕໍ ວາ ຈິຕ຺ຕໍ ‘‘ອວິມຸຕ຺ຕໍ ເມ ຈິຕ຺ຕ’’ນ຺ຕິ ປຊານາຕິ. ໂສ ຕໍ ນິມິຕ຺ຕໍ ອາເສວຕິ ຠາເວຕິ ພຫຸລີກໂຣຕິ ສ຺ວາວຕ຺ຖິຕໍ ວວຕ຺ຖເປຕິ. ໂສ ຕໍ ນິມິຕ຺ຕໍ ອາເສວິຕ຺ວາ ຠາເວຕ຺ວາ ພຫຸລີກຣິຕ຺ວາ ສ຺ວາວຕ຺ຖິຕໍ ວວຕ຺ຖເປຕ຺ວາ ພຫິທ຺ຘາ ຈິຕ຺ເຕ ຈິຕ຺ຕໍ ອຸປສໍຫຣຕິ.

ກຖຎ຺ຈ ຠິກ຺ຂຸ ພຫິທ຺ຘາ ຈິຕ຺ເຕ ຈິຕ຺ຕານຸປສ຺ສີ ວິຫຣຕິ? ອິຘ ຠິກ຺ຂຸ ສຣາຄໍ ວາສ຺ສ ຈິຕ຺ຕໍ ‘‘ສຣາຄມສ຺ສ ຈິຕ຺ຕ’’ນ຺ຕິ ປຊານາຕິ, ວີຕຣາຄໍ ວາສ຺ສ ຈິຕ຺ຕໍ ‘‘ວີຕຣາຄມສ຺ສ ຈິຕ຺ຕ’’ນ຺ຕິ ປຊານາຕິ, ສໂທສໍ ວາສ຺ສ ຈິຕ຺ຕໍ ‘‘ສໂທສມສ຺ສ ຈິຕ຺ຕ’’ນ຺ຕິ ປຊານາຕິ, ວີຕໂທສໍ ວາສ຺ສ ຈິຕ຺ຕໍ ‘‘ວີຕໂທສມສ຺ສ ຈິຕ຺ຕ’’ນ຺ຕິ ປຊານາຕິ, ສໂມຫໍ ວາສ຺ສ ຈິຕ຺ຕໍ ‘‘ສໂມຫມສ຺ສ ຈິຕ຺ຕ’’ນ຺ຕິ ປຊານາຕິ, ວີຕໂມຫໍ ວາສ຺ສ ຈິຕ຺ຕໍ ‘‘ວີຕໂມຫມສ຺ສ ຈິຕ຺ຕ’’ນ຺ຕິ ປຊານາຕິ, ສໍຂິຕ຺ຕໍ ວາສ຺ສ ຈິຕ຺ຕໍ ‘‘ສໍຂິຕ຺ຕມສ຺ສ ຈິຕ຺ຕ’’ນ຺ຕິ ປຊານາຕິ, ວິກ຺ຂິຕ຺ຕໍ ວາສ຺ສ ຈິຕ຺ຕໍ ‘‘ວິກ຺ຂິຕ຺ຕມສ຺ສ ຈິຕ຺ຕ’’ນ຺ຕິ ປຊານາຕິ, ມຫຄ຺ຄຕໍ ວາສ຺ສ ຈິຕ຺ຕໍ ‘‘ມຫຄ຺ຄຕມສ຺ສ ຈິຕ຺ຕ’’ນ຺ຕິ ປຊານາຕິ, ອມຫຄ຺ຄຕໍ ວາສ຺ສ ຈິຕ຺ຕໍ ‘‘ອມຫຄ຺ຄຕມສ຺ສ ຈິຕ຺ຕ’’ນ຺ຕິ ປຊານາຕິ, ສອຸຕ຺ຕຣໍ ວາສ຺ສ ຈິຕ຺ຕໍ ‘‘ສອຸຕ຺ຕຣມສ຺ສ ຈິຕ຺ຕ’’ນ຺ຕິ ປຊານາຕິ, ອນຸຕ຺ຕຣໍ ວາສ຺ສ ຈິຕ຺ຕໍ ‘‘ອນຸຕ຺ຕຣມສ຺ສ ຈິຕ຺ຕ’’ນ຺ຕິ ປຊານາຕິ, ສມາຫິຕໍ ວາສ຺ສ ຈິຕ຺ຕໍ ‘‘ສມາຫິຕມສ຺ສ ຈິຕ຺ຕ’’ນ຺ຕິ ປຊານາຕິ, ອສມາຫິຕໍ ວາສ຺ສ ຈິຕ຺ຕໍ ‘‘ອສມາຫິຕມສ຺ສ ຈິຕ຺ຕ’’ນ຺ຕິ ປຊານາຕິ, ວິມຸຕ຺ຕໍ ວາສ຺ສ ຈິຕ຺ຕໍ ‘‘ວິມຸຕ຺ຕມສ຺ສ ຈິຕ຺ຕ’’ນ຺ຕິ ປຊານາຕິ, ອວິມຸຕ຺ຕໍ ວາສ຺ສ ຈິຕ຺ຕໍ ‘‘ອວິມຸຕ຺ຕມສ຺ສ ຈິຕ຺ຕ’’ນ຺ຕິ ປຊານາຕິ. ໂສ ຕໍ ນິມິຕ຺ຕໍ ອາເສວຕິ ຠາເວຕິ ພຫຸລີກໂຣຕິ ສ຺ວາວຕ຺ຖິຕໍ ວວຕ຺ຖເປຕິ. ໂສ ຕໍ ນິມິຕ຺ຕໍ ອາເສວິຕ຺ວາ ຠາເວຕ຺ວາ ພຫຸລີກຣິຕ຺ວາ ສ຺ວາວຕ຺ຖິຕໍ ວວຕ຺ຖເປຕ຺ວາ ອຊ຺ຌຕ຺ຕພຫິທ຺ຘາ ຈິຕ຺ເຕ ຈິຕ຺ຕໍ ອຸປສໍຫຣຕິ.

ກຖຎ຺ຈ ຠິກ຺ຂຸ ອຊ຺ຌຕ຺ຕພຫິທ຺ຘາ ຈິຕ຺ເຕ ຈິຕ຺ຕານຸປສ຺ສີ ວິຫຣຕິ? ອິຘ ຠິກ຺ຂຸ ສຣາຄໍ ວາ ຈິຕ຺ຕໍ ‘‘ສຣາຄໍ ຈິຕ຺ຕ’’ນ຺ຕິ ປຊານາຕິ, ວີຕຣາຄໍ ວາ ຈິຕ຺ຕໍ ‘‘ວີຕຣາຄໍ ຈິຕ຺ຕ’’ນ຺ຕິ ປຊານາຕິ, ສໂທສໍ ວາ ຈິຕ຺ຕໍ ‘‘ສໂທສໍ ຈິຕ຺ຕ’’ນ຺ຕິ ປຊານາຕິ, ວີຕໂທສໍ ວາ ຈິຕ຺ຕໍ ‘‘ວີຕໂທສໍ ຈິຕ຺ຕ’’ນ຺ຕິ ປຊານາຕິ, ສໂມຫໍ ວາ ຈິຕ຺ຕໍ ‘‘ສໂມຫໍ ຈິຕ຺ຕ’’ນ຺ຕິ ປຊານາຕິ, ວີຕໂມຫໍ ວາ ຈິຕ຺ຕໍ ‘‘ວີຕໂມຫໍ ຈິຕ຺ຕ’’ນ຺ຕິ ປຊານາຕິ, ສໍຂິຕ຺ຕໍ ວາ ຈິຕ຺ຕໍ ‘‘ສໍຂິຕ຺ຕໍ ຈິຕ຺ຕ’’ນ຺ຕິ ປຊານາຕິ, ວິກ຺ຂິຕ຺ຕໍ ວາ ຈິຕ຺ຕໍ ‘‘ວິກ຺ຂິຕ຺ຕໍ ຈິຕ຺ຕ’’ນ຺ຕິ ປຊານາຕິ, ມຫຄ຺ຄຕໍ ວາ ຈິຕ຺ຕໍ ‘‘ມຫຄ຺ຄຕໍ ຈິຕ຺ຕ’’ນ຺ຕິ ປຊານາຕິ, ອມຫຄ຺ຄຕໍ ວາ ຈິຕ຺ຕໍ ‘‘ອມຫຄ຺ຄຕໍ ຈິຕ຺ຕ’’ນ຺ຕິ ປຊານາຕິ, ສອຸຕ຺ຕຣໍ ວາ ຈິຕ຺ຕໍ ‘‘ສອຸຕ຺ຕຣໍ ຈິຕ຺ຕ’’ນ຺ຕິ ປຊານາຕິ, ອນຸຕ຺ຕຣໍ ວາ ຈິຕ຺ຕໍ ‘‘ອນຸຕ຺ຕຣໍ ຈິຕ຺ຕ’’ນ຺ຕິ ປຊານາຕິ, ສມາຫິຕໍ ວາ ຈິຕ຺ຕໍ ‘‘ສມາຫິຕໍ ຈິຕ຺ຕ’’ນ຺ຕິ ປຊານາຕິ, ອສມາຫິຕໍ ວາ ຈິຕ຺ຕໍ ‘‘ອສມາຫິຕໍ ຈິຕ຺ຕ’’ນ຺ຕິ ປຊານາຕິ, ວິມຸຕ຺ຕໍ ວາ ຈິຕ຺ຕໍ ‘‘ວິມຸຕ຺ຕໍ ຈິຕ຺ຕ’’ນ຺ຕິ ປຊານາຕິ, ອວິມຸຕ຺ຕໍ ວາ ຈິຕ຺ຕໍ ‘‘ອວິມຸຕ຺ຕໍ ຈິຕ຺ຕ’’ນ຺ຕິ ປຊານາຕິ. ເອວໍ ຠິກ຺ຂຸ ອຊ຺ຌຕ຺ຕພຫິທ຺ຘາ ຈິຕ຺ເຕ ຈິຕ຺ຕານຸປສ຺ສີ ວິຫຣຕິ ອາຕາປີ ສມ຺ປຊາໂນ ສຕິມາ ວິເນຍ຺ຍ ໂລເກ ອຠິຊ຺ຌາໂທມນສ຺ສໍ.

໓໖໖. ອນຸປສ຺ສີຕິ…ເປ… ວິຫຣຕີຕິ…ເປ… ອາຕາປີຕິ…ເປ… ສມ຺ປຊາໂນຕິ…ເປ… ສຕິມາຕິ…ເປ… ວິເນຍ຺ຍ ໂລເກ ອຠິຊ຺ຌາໂທມນສ຺ສນ຺ຕິ. ຕຕ຺ຖ ກຕໂມ ໂລໂກ? ຕໍເຍວ ຈິຕ຺ຕໍ ໂລໂກ. ປຎ຺ຈປິ ອຸປາທານກ຺ຂນ຺ຘາ ໂລໂກ – ຕຕ຺ຖ ກຕມາ ອຠິຊ຺ຌາ? ໂຍ ຣາໂຄ ສາຣາໂຄ…ເປ… ຈິຕ຺ຕສ຺ສ ສາຣາໂຄ – ອຍໍ ວຸຈ຺ຈຕິ ‘‘ອຠິຊ຺ຌາ’’. ຕຕ຺ຖ ກຕມໍ ໂທມນສ຺ສໍ? ຍໍ ເຈຕສິກໍ ອສາຕໍ ເຈຕສິກໍ ທຸກ຺ຂໍ ເຈໂຕສມ຺ຜສ຺ສຊໍ ອສາຕໍ ທຸກ຺ຂໍ ເວທຍິຕໍ ເຈໂຕສມ຺ຜສ຺ສຊາ ອສາຕາ ທຸກ຺ຂາ ເວທນາ – ອິທໍ ວຸຈ຺ຈຕິ ‘‘ໂທມນສ຺ສໍ’’. ອິຕິ ອຍຎ຺ຈ ອຠິຊ຺ຌາ ອິທຎ຺ຈ ໂທມນສ຺ສໍ ອິມມ຺ຫິ ໂລເກ ວິນີຕາ ໂຫນ຺ຕິ ປຏິວິນີຕາ ສນ຺ຕາ ສມິຕາ ວູປສນ຺ຕາ ອຕ຺ຖງ຺ຄຕາ ອພ຺ຠຕ຺ຖງ຺ຄຕາ ອປ຺ປິຕາ ພ຺ຍປ຺ປິຕາ ໂສສິຕາ ວິໂສສິຕາ ພ຺ຍນ຺ຕີກຕາ. ເຕນ ວຸຈ຺ຈຕິ ‘‘ວິເນຍ຺ຍ ໂລເກ ອຠິຊ຺ຌາໂທມນສ຺ສ’’ນ຺ຕິ.

ຈິຕ຺ຕານຸປສ຺ສນານິທ຺ເທໂສ.

໔. ຘມ຺ມານຸປສ຺ສນານິທ຺ເທໂສ

໓໖໗. ກຖຎ຺ຈ ຠິກ຺ຂຸ ອຊ຺ຌຕ຺ຕໍ ຘມ຺ເມສຸ ຘມ຺ມານຸປສ຺ສີ ວິຫຣຕິ? ອິຘ ຠິກ຺ຂຸ ສນ຺ຕໍ ວາ ອຊ຺ຌຕ຺ຕໍ ກາມຈ຺ຉນ຺ທໍ ‘‘ອຕ຺ຖິ ເມ ອຊ຺ຌຕ຺ຕໍ ກາມຈ຺ຉນ຺ໂທ’’ຕິ ປຊານາຕິ, ອສນ຺ຕໍ ວາ ອຊ຺ຌຕ຺ຕໍ ກາມຈ຺ຉນ຺ທໍ ‘‘ນຕ຺ຖິ ເມ ອຊ຺ຌຕ຺ຕໍ ກາມຈ຺ຉນ຺ໂທ’’ຕິ ປຊານາຕິ, ຍຖາ ຈ ອນຸປ຺ປນ຺ນສ຺ສ ກາມຈ຺ຉນ຺ທສ຺ສ ອຸປ຺ປາໂທ ໂຫຕິ ຕຎ຺ຈ ປຊານາຕິ, ຍຖາ ຈ ອຸປ຺ປນ຺ນສ຺ສ ກາມຈ຺ຉນ຺ທສ຺ສ ປຫານໍ ໂຫຕິ ຕຎ຺ຈ ປຊານາຕິ, ຍຖາ ຈ ປຫີນສ຺ສ ກາມຈ຺ຉນ຺ທສ຺ສ ອາຍຕິໍ ອນຸປ຺ປາໂທ ໂຫຕິ ຕຎ຺ຈ ປຊານາຕິ. ສນ຺ຕໍ ວາ ອຊ຺ຌຕ຺ຕໍ ພ຺ຍາປາທໍ…ເປ… ສນ຺ຕໍ ວາ ອຊ຺ຌຕ຺ຕໍ ຖິນມິທ຺ຘໍ [ຖີນມິທ຺ຘໍ (ສີ. ສ຺ຍາ.)] …ເປ… ສນ຺ຕໍ ວາ ອຊ຺ຌຕ຺ຕໍ ອຸທ຺ຘຈ຺ຈກຸກ຺ກຸຈ຺ຈໍ…ເປ… ສນ຺ຕໍ ວາ ອຊ຺ຌຕ຺ຕໍ ວິຈິກິຈ຺ຉໍ ‘‘ອຕ຺ຖິ ເມ ອຊ຺ຌຕ຺ຕໍ ວິຈິກິຈ຺ຉາ’’ຕິ ປຊານາຕິ, ອສນ຺ຕໍ ວາ ອຊ຺ຌຕ຺ຕໍ ວິຈິກິຈ຺ຉໍ ‘‘ນຕ຺ຖິ ເມ ອຊ຺ຌຕ຺ຕໍ ວິຈິກິຈ຺ຉາ’’ຕິ ປຊານາຕິ, ຍຖາ ຈ ອນຸປ຺ປນ຺ນາຍ ວິຈິກິຈ຺ຉາຍ ອຸປ຺ປາໂທ ໂຫຕິ ຕຎ຺ຈ ປຊານາຕິ, ຍຖາ ຈ ອຸປ຺ປນ຺ນາຍ ວິຈິກິຈ຺ຉາຍ ປຫານໍ ໂຫຕິ ຕຎ຺ຈ ປຊານາຕິ, ຍຖາ ຈ ປຫີນາຍ ວິຈິກິຈ຺ຉາຍ ອາຍຕິໍ ອນຸປ຺ປາໂທ ໂຫຕິ ຕຎ຺ຈ ປຊານາຕິ.

ສນ຺ຕໍ ວາ ອຊ຺ຌຕ຺ຕໍ ສຕິສມ຺ໂພຊ຺ຌງ຺ຄໍ ‘‘ອຕ຺ຖິ ເມ ອຊ຺ຌຕ຺ຕໍ ສຕິສມ຺ໂພຊ຺ຌງ຺ໂຄ’’ຕິ ປຊານາຕິ, ອສນ຺ຕໍ ວາ ອຊ຺ຌຕ຺ຕໍ ສຕິສມ຺ໂພຊ຺ຌງ຺ຄໍ ‘‘ນຕ຺ຖິ ເມ ອຊ຺ຌຕ຺ຕໍ ສຕິສມ຺ໂພຊ຺ຌງ຺ໂຄ’’ຕິ ປຊານາຕິ, ຍຖາ ຈ ອນຸປ຺ປນ຺ນສ຺ສ ສຕິສມ຺ໂພຊ຺ຌງ຺ຄສ຺ສ ອຸປ຺ປາໂທ ໂຫຕິ ຕຎ຺ຈ ປຊານາຕິ, ຍຖາ ຈ ອຸປ຺ປນ຺ນສ຺ສ ສຕິສມ຺ໂພຊ຺ຌງ຺ຄສ຺ສ ຠາວນາຍ ປາຣິປູຣີ ໂຫຕິ ຕຎ຺ຈ ປຊານາຕິ, ສນ຺ຕໍ ວາ ອຊ຺ຌຕ຺ຕໍ ຘມ຺ມວິຈຍສມ຺ໂພຊ຺ຌງ຺ຄໍ…ເປ… ສນ຺ຕໍ ວາ ອຊ຺ຌຕ຺ຕໍ ວີຣິຍສມ຺ໂພຊ຺ຌງ຺ຄໍ [ວິຣິຍສມ຺ໂພຊ຺ຌງ຺ຄໍ (ສີ. ສ຺ຍາ.)] …ເປ… ສນ຺ຕໍ ວາ ອຊ຺ຌຕ຺ຕໍ ປີຕິສມ຺ໂພຊ຺ຌງ຺ຄໍ …ເປ… ສນ຺ຕໍ ວາ ອຊ຺ຌຕ຺ຕໍ ປສ຺ສທ຺ຘິສມ຺ໂພຊ຺ຌງ຺ຄໍ…ເປ… ສນ຺ຕໍ ວາ ອຊ຺ຌຕ຺ຕໍ ສມາຘິສມ຺ໂພຊ຺ຌງ຺ຄໍ…ເປ… ສນ຺ຕໍ ວາ ອຊ຺ຌຕ຺ຕໍ ອຸເປກ຺ຂາສມ຺ໂພຊ຺ຌງ຺ຄໍ ‘‘ອຕ຺ຖິ ເມ ອຊ຺ຌຕ຺ຕໍ ອຸເປກ຺ຂາສມ຺ໂພຊ຺ຌງ຺ໂຄ’’ຕິ ປຊານາຕິ, ອສນ຺ຕໍ ວາ ອຊ຺ຌຕ຺ຕໍ ອຸເປກ຺ຂາສມ຺ໂພຊ຺ຌງ຺ຄໍ ‘‘ນຕ຺ຖິ ເມ ອຊ຺ຌຕ຺ຕໍ ອຸເປກ຺ຂາສມ຺ໂພຊ຺ຌງ຺ໂຄ’’ຕິ ປຊານາຕິ, ຍຖາ ຈ ອນຸປ຺ປນ຺ນສ຺ສ ອຸເປກ຺ຂາສມ຺ໂພຊ຺ຌງ຺ຄສ຺ສ ອຸປ຺ປາໂທ ໂຫຕິ ຕຎ຺ຈ ປຊານາຕິ, ຍຖາ ຈ ອຸປ຺ປນ຺ນສ຺ສ ອຸເປກ຺ຂາສມ຺ໂພຊ຺ຌງ຺ຄສ຺ສ ຠາວນາຍ ປາຣິປູຣີ ໂຫຕິ ຕຎ຺ຈ ປຊານາຕິ. ໂສ ຕໍ ນິມິຕ຺ຕໍ ອາເສວຕິ ຠາເວຕິ ພຫຸລີກໂຣຕິ ສ຺ວາວຕ຺ຖິຕໍ ວວຕ຺ຖເປຕິ. ໂສ ຕໍ ນິມິຕ຺ຕໍ ອາເສວິຕ຺ວາ ຠາເວຕ຺ວາ ພຫຸລີກຣິຕ຺ວາ ສ຺ວາວຕ຺ຖິຕໍ ວວຕ຺ຖເປຕ຺ວາ ພຫິທ຺ຘາ ຘມ຺ເມສຸ ຈິຕ຺ຕໍ ອຸປສໍຫຣຕິ.

ກຖຎ຺ຈ ຠິກ຺ຂຸ ພຫິທ຺ຘາ ຘມ຺ເມສຸ ຘມ຺ມານຸປສ຺ສີ ວິຫຣຕິ? ອິຘ ຠິກ຺ຂຸ ສນ຺ຕໍ ວາສ຺ສ ກາມຈ຺ຉນ຺ທໍ ‘‘ອຕ຺ຖິສ຺ສ ກາມຈ຺ຉນ຺ໂທ’’ຕິ ປຊານາຕິ, ອສນ຺ຕໍ ວາສ຺ສ ກາມຈ຺ຉນ຺ທໍ ‘‘ນຕ຺ຖິສ຺ສ ກາມຈ຺ຉນ຺ໂທ’’ຕິ ປຊານາຕິ, ຍຖາ ຈ ອນຸປ຺ປນ຺ນສ຺ສ ກາມຈ຺ຉນ຺ທສ຺ສ ອຸປ຺ປາໂທ ໂຫຕິ ຕຎ຺ຈ ປຊານາຕິ, ຍຖາ ຈ ອຸປ຺ປນ຺ນສ຺ສ ກາມຈ຺ຉນ຺ທສ຺ສ ປຫານໍ ໂຫຕິ ຕຎ຺ຈ ປຊານາຕິ, ຍຖາ ຈ ປຫີນສ຺ສ ກາມຈ຺ຉນ຺ທສ຺ສ ອາຍຕິໍ ອນຸປ຺ປາໂທ ໂຫຕິ ຕຎ຺ຈ ປຊານາຕິ. ສນ຺ຕໍ ວາສ຺ສ ພ຺ຍາປາທໍ…ເປ… ສນ຺ຕໍ ວາສ຺ສ ຖິນມິທ຺ຘໍ…ເປ… ສນ຺ຕໍ ວາສ຺ສ ອຸທ຺ຘຈ຺ຈກຸກ຺ກຸຈ຺ຈໍ…ເປ… ສນ຺ຕໍ ວາສ຺ສ ວິຈິກິຈ຺ຉໍ ‘‘ອຕ຺ຖິສ຺ສ ວິຈິກິຈ຺ຉາ’’ຕິ ປຊານາຕິ, ອສນ຺ຕໍ ວາສ຺ສ ວິຈິກິຈ຺ຉໍ ‘‘ນຕ຺ຖິສ຺ສ ວິຈິກິຈ຺ຉາ’’ຕິ ປຊານາຕິ, ຍຖາ ຈ ອນຸປ຺ປນ຺ນາຍ ວິຈິກິຈ຺ຉາຍ ອຸປ຺ປາໂທ ໂຫຕິ ຕຎ຺ຈ ປຊານາຕິ, ຍຖາ ຈ ອຸປ຺ປນ຺ນາຍ ວິຈິກິຈ຺ຉາຍ ປຫານໍ ໂຫຕິ ຕຎ຺ຈ ປຊານາຕິ, ຍຖາ ຈ ປຫີນາຍ ວິຈິກິຈ຺ຉາຍ ອາຍຕິໍ ອນຸປ຺ປາໂທ ໂຫຕິ ຕຎ຺ຈ ປຊານາຕິ.

ສນ຺ຕໍ ວາສ຺ສ ສຕິສມ຺ໂພຊ຺ຌງ຺ຄໍ ‘‘ອຕ຺ຖິສ຺ສ ສຕິສມ຺ໂພຊ຺ຌງ຺ໂຄ’’ຕິ ປຊານາຕິ, ອສນ຺ຕໍ ວາສ຺ສ ສຕິສມ຺ໂພຊ຺ຌງ຺ຄໍ ‘‘ນຕ຺ຖິສ຺ສ ສຕິສມ຺ໂພຊ຺ຌງ຺ໂຄ’’ຕິ ປຊານາຕິ, ຍຖາ ຈ ອນຸປ຺ປນ຺ນສ຺ສ ສຕິສມ຺ໂພຊ຺ຌງ຺ຄສ຺ສ ອຸປ຺ປາໂທ ໂຫຕິ ຕຎ຺ຈ ປຊານາຕິ, ຍຖາ ຈ ອຸປ຺ປນ຺ນສ຺ສ ສຕິສມ຺ໂພຊ຺ຌງ຺ຄສ຺ສ ຠາວນາຍ ປາຣິປູຣີ ໂຫຕິ ຕຎ຺ຈ ປຊານາຕິ. ສນ຺ຕໍ ວາສ຺ສ ຘມ຺ມວິຈຍສມ຺ໂພຊ຺ຌງ຺ຄໍ…ເປ… ສນ຺ຕໍ ວາສ຺ສ ວີຣິຍສມ຺ໂພຊ຺ຌງ຺ຄໍ…ເປ… ສນ຺ຕໍ ວາສ຺ສ ປີຕິສມ຺ໂພຊ຺ຌງ຺ຄໍ…ເປ… ສນ຺ຕໍ ວາສ຺ສ ປສ຺ສທ຺ຘິສມ຺ໂພຊ຺ຌງ຺ຄໍ…ເປ… ສນ຺ຕໍ ວາສ຺ສ ສມາຘິສມ຺ໂພຊ຺ຌງ຺ຄໍ…ເປ… ສນ຺ຕໍ ວາສ຺ສ ອຸເປກ຺ຂາສມ຺ໂພຊ຺ຌງ຺ຄໍ ‘‘ອຕ຺ຖິສ຺ສ ອຸເປກ຺ຂາສມ຺ໂພຊ຺ຌງ຺ໂຄ’’ຕິ ປຊານາຕິ, ອສນ຺ຕໍ ວາສ຺ສ ອຸເປກ຺ຂາສມ຺ໂພຊ຺ຌງ຺ຄໍ ‘‘ນຕ຺ຖິສ຺ສ ອຸເປກ຺ຂາສມ຺ໂພຊ຺ຌງ຺ໂຄ’’ຕິ ປຊານາຕິ, ຍຖາ ຈ ອນຸປ຺ປນ຺ນສ຺ສ ອຸເປກ຺ຂາສມ຺ໂພຊ຺ຌງ຺ຄສ຺ສ ອຸປ຺ປາໂທ ໂຫຕິ ຕຎ຺ຈ ປຊານາຕິ, ຍຖາ ຈ ອຸປ຺ປນ຺ນສ຺ສ ອຸເປກ຺ຂາສມ຺ໂພຊ຺ຌງ຺ຄສ຺ສ ຠາວນາຍ ປາຣິປູຣີ ໂຫຕິ ຕຎ຺ຈ ປຊານາຕິ. ໂສ ຕໍ ນິມິຕ຺ຕໍ ອາເສວຕິ ຠາເວຕິ ພຫຸລີກໂຣຕິ ສ຺ວາວຕ຺ຖິຕໍ ວວຕ຺ຖເປຕິ. ໂສ ຕໍ ນິມິຕ຺ຕໍ ອາເສວິຕ຺ວາ ຠາເວຕ຺ວາ ພຫຸລີກຣິຕ຺ວາ ສ຺ວາວຕ຺ຖິຕໍ ວວຕ຺ຖເປຕ຺ວາ ອຊ຺ຌຕ຺ຕພຫິທ຺ຘາ ຘມ຺ເມສຸ ຈິຕ຺ຕໍ ອຸປສໍຫຣຕິ.

ກຖຎ຺ຈ ຠິກ຺ຂຸ ອຊ຺ຌຕ຺ຕພຫິທ຺ຘາ ຘມ຺ເມສຸ ຘມ຺ມານຸປສ຺ສີ ວິຫຣຕິ? ອິຘ ຠິກ຺ຂຸ ສນ຺ຕໍ ວາ ກາມຈ຺ຉນ຺ທໍ ‘‘ອຕ຺ຖິ ກາມຈ຺ຉນ຺ໂທ’’ຕິ ປຊານາຕິ, ອສນ຺ຕໍ ວາ ກາມຈ຺ຉນ຺ທໍ ‘‘ນຕ຺ຖິ ກາມຈ຺ຉນ຺ໂທ’’ຕິ ປຊານາຕິ, ຍຖາ ຈ ອນຸປ຺ປນ຺ນສ຺ສ ກາມຈ຺ຉນ຺ທສ຺ສ ອຸປ຺ປາໂທ ໂຫຕິ ຕຎ຺ຈ ປຊານາຕິ, ຍຖາ ຈ ອຸປ຺ປນ຺ນສ຺ສ ກາມຈ຺ຉນ຺ທສ຺ສ ປຫານໍ ໂຫຕິ ຕຎ຺ຈ ປຊານາຕິ, ຍຖາ ຈ ປຫີນສ຺ສ ກາມຈ຺ຉນ຺ທສ຺ສ ອາຍຕິໍ ອນຸປ຺ປາໂທ ໂຫຕິ ຕຎ຺ຈ ປຊານາຕິ. ສນ຺ຕໍ ວາ ພ຺ຍາປາທໍ…ເປ… ສນ຺ຕໍ ວາ ຖິນມິທ຺ຘໍ…ເປ… ສນ຺ຕໍ ວາ ອຸທ຺ຘຈ຺ຈກຸກ຺ກຸຈ຺ຈໍ…ເປ… ສນ຺ຕໍ ວາ ວິຈິກິຈ຺ຉໍ ‘‘ອຕ຺ຖິ ວິຈິກິຈ຺ຉາ’’ຕິ ປຊານາຕິ, ອສນ຺ຕໍ ວາ ວິຈິກິຈ຺ຉໍ ‘‘ນຕ຺ຖິ ວິຈິກິຈ຺ຉາ’’ຕິ ປຊານາຕິ, ຍຖາ ຈ ອນຸປ຺ປນ຺ນາຍ ວິຈິກິຈ຺ຉາຍ ອຸປ຺ປາໂທ ໂຫຕິ ຕຎ຺ຈ ປຊານາຕິ, ຍຖາ ຈ ອຸປ຺ປນ຺ນາຍ ວິຈິກິຈ຺ຉາຍ ປຫານໍ ໂຫຕິ ຕຎ຺ຈ ປຊານາຕິ, ຍຖາ ຈ ປຫີນາຍ ວິຈິກິຈ຺ຉາຍ ອາຍຕິໍ ອນຸປ຺ປາໂທ ໂຫຕິ ຕຎ຺ຈ ປຊານາຕິ.

ສນ຺ຕໍ ວາ ສຕິສມ຺ໂພຊ຺ຌງ຺ຄໍ ‘‘ອຕ຺ຖິ ສຕິສມ຺ໂພຊ຺ຌງ຺ໂຄ’’ຕິ ປຊານາຕິ, ອສນ຺ຕໍ ວາ ສຕິສມ຺ໂພຊ຺ຌງ຺ຄໍ ‘‘ນຕ຺ຖິ ສຕິສມ຺ໂພຊ຺ຌງ຺ໂຄ’’ຕິ ປຊານາຕິ, ຍຖາ ຈ ອນຸປ຺ປນ຺ນສ຺ສ ສຕິສມ຺ໂພຊ຺ຌງ຺ຄສ຺ສ ອຸປ຺ປາໂທ ໂຫຕິ ຕຎ຺ຈ ປຊານາຕິ, ຍຖາ ຈ ອຸປ຺ປນ຺ນສ຺ສ ສຕິສມ຺ໂພຊ຺ຌງ຺ຄສ຺ສ ຠາວນາຍ ປາຣິປູຣີ ໂຫຕິ ຕຎ຺ຈ ປຊານາຕິ. ສນ຺ຕໍ ວາ ຘມ຺ມວິຈຍສມ຺ໂພຊ຺ຌງ຺ຄໍ…ເປ… ສນ຺ຕໍ ວາ ວີຣິຍສມ຺ໂພຊ຺ຌງ຺ຄໍ…ເປ… ສນ຺ຕໍ ວາ ປີຕິສມ຺ໂພຊ຺ຌງ຺ຄໍ…ເປ… ສນ຺ຕໍ ວາ ປສ຺ສທ຺ຘິສມ຺ໂພຊ຺ຌງ຺ຄໍ…ເປ… ສນ຺ຕໍ ວາ ສມາຘິສມ຺ໂພຊ຺ຌງ຺ຄໍ…ເປ… ສນ຺ຕໍ ວາ ອຸເປກ຺ຂາສມ຺ໂພຊ຺ຌງ຺ຄໍ ‘‘ອຕ຺ຖິ ອຸເປກ຺ຂາສມ຺ໂພຊ຺ຌງ຺ໂຄ’’ຕິ ປຊານາຕິ, ອສນ຺ຕໍ ວາ ອຸເປກ຺ຂາສມ຺ໂພຊ຺ຌງ຺ຄໍ ‘‘ນຕ຺ຖິ ອຸເປກ຺ຂາສມ຺ໂພຊ຺ຌງ຺ໂຄ’’ຕິ ປຊານາຕິ, ຍຖາ ຈ ອນຸປ຺ປນ຺ນສ຺ສ ອຸເປກ຺ຂາສມ຺ໂພຊ຺ຌງ຺ຄສ຺ສ ອຸປ຺ປາໂທ ໂຫຕິ ຕຎ຺ຈ ປຊານາຕິ, ຍຖາ ຈ ອຸປ຺ປນ຺ນສ຺ສ ອຸເປກ຺ຂາສມ຺ໂພຊ຺ຌງ຺ຄສ຺ສ ຠາວນາຍ ປາຣິປູຣີ ໂຫຕິ ຕຎ຺ຈ ປຊານາຕິ. ເອວໍ ຠິກ຺ຂຸ ອຊ຺ຌຕ຺ຕພຫິທ຺ຘາ ຘມ຺ເມສຸ ຘມ຺ມານຸປສ຺ສີ ວິຫຣຕິ ອາຕາປີ ສມ຺ປຊາໂນ ສຕິມາ ວິເນຍ຺ຍ ໂລເກ ອຠິຊ຺ຌາໂທມນສ຺ສໍ.

໓໖໘. ອນຸປສ຺ສີຕິ. ຕຕ຺ຖ ກຕມາ ອນຸປສ຺ສນາ? ຍາ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອຍໍ ວຸຈ຺ຈຕິ ອນຸປສ຺ສນາ. ອິມາຍ ອນຸປສ຺ສນາຍ ອຸເປໂຕ ໂຫຕິ ສມຸເປໂຕ ອຸປາຄໂຕ ສມຸປາຄໂຕ ອຸປປນ຺ໂນ ສມ຺ປນ຺ໂນ ສມນ຺ນາຄໂຕ. ເຕນ ວຸຈ຺ຈຕິ ‘‘ອນຸປສ຺ສີ’’ຕິ.

໓໖໙. ວິຫຣຕີຕິ. ອິຣິຍຕິ ວຕ຺ຕຕິ ປາເລຕິ ຍເປຕິ ຍາເປຕິ ຈຣຕິ ວິຫຣຕິ. ເຕນ ວຸຈ຺ຈຕິ ‘‘ວິຫຣຕີ’’ຕິ.

໓໗໐. ອາຕາປີຕິ. ຕຕ຺ຖ ກຕໂມ ອາຕາໂປ? ໂຍ ເຈຕສິໂກ ວີຣິຍາຣມ຺ໂຠ…ເປ… ສມ຺ມາວາຍາໂມ – ອຍໍ ວຸຈ຺ຈຕິ ‘‘ອາຕາໂປ’’. ອິມິນາ ອາຕາເປນ ອຸເປໂຕ ໂຫຕິ…ເປ… ສມນ຺ນາຄໂຕ. ເຕນ ວຸຈ຺ຈຕິ ‘‘ອາຕາປີ’’ຕິ.

໓໗໑. ສມ຺ປຊາໂນຕິ. ຕຕ຺ຖ ກຕມໍ ສມ຺ປຊຎ຺ຎໍ? ຍາ ປຎ຺ຎາ ປຊານນາ…ເປ… ອໂມໂຫ ຘມ຺ມວິຈໂຍ ສມ຺ມາທິຏ຺ຐິ – ອິທໍ ວຸຈ຺ຈຕິ ‘‘ສມ຺ປຊຎ຺ຎໍ’’. ອິມິນາ ສມ຺ປຊຎ຺ເຎນ ອຸເປໂຕ ໂຫຕິ…ເປ… ສມນ຺ນາຄໂຕ. ເຕນ ວຸຈ຺ຈຕິ ‘‘ສມ຺ປຊາໂນ’’ຕິ.

໓໗໒. ສຕິມາຕິ. ຕຕ຺ຖ ກຕມາ ສຕິ? ຍາ ສຕິ ອນຸສ຺ສຕິ…ເປ… ສມ຺ມາສຕິ – ອຍໍ ວຸຈ຺ຈຕິ ‘‘ສຕິ’’. ອິມາຍ ສຕິຍາ ອຸເປໂຕ ໂຫຕິ…ເປ… ສມນ຺ນາຄໂຕ. ເຕນ ວຸຈ຺ຈຕິ ‘‘ສຕິມາ’’ຕິ.

໓໗໓. ວິເນຍ຺ຍ ໂລເກ ອຠິຊ຺ຌາໂທມນສ຺ສນ຺ຕິ. ຕຕ຺ຖ ກຕໂມ ໂລໂກ? ເຕວ ຘມ຺ມາ ໂລໂກ. ປຎ຺ຈປິ ອຸປາທານກ຺ຂນ຺ຘາ ໂລໂກ. ອຍໍ ວຸຈ຺ຈຕິ ‘‘ໂລໂກ’’. ຕຕ຺ຖ ກຕມາ ອຠິຊ຺ຌາ? ໂຍ ຣາໂຄ ສາຣາໂຄ…ເປ… ຈິຕ຺ຕສ຺ສ ສາຣາໂຄ – ອຍໍ ວຸຈ຺ຈຕິ ‘‘ອຠິຊ຺ຌາ’’. ຕຕ຺ຖ ກຕມໍ ໂທມນສ຺ສໍ? ຍໍ ເຈຕສິກໍ ອສາຕໍ ເຈຕສິກໍ ທຸກ຺ຂໍ ເຈໂຕສມ຺ຜສ຺ສຊໍ ອສາຕໍ ທຸກ຺ຂໍ ເວທຍິຕໍ ເຈໂຕສມ຺ຜສ຺ສຊາ ອສາຕາ ທຸກ຺ຂາ ເວທນາ – ອິທໍ ວຸຈ຺ຈຕິ ‘‘ໂທມນສ຺ສໍ’’. ອິຕິ ອຍຎ຺ຈ ອຠິຊ຺ຌາ ອິທຎ຺ຈ ໂທມນສ຺ສໍ ອິມມ຺ຫິ ໂລເກ ວິນີຕາ ໂຫນ຺ຕິ ປຏິວິນີຕາ ສນ຺ຕາ ສມິຕາ ວູປສນ຺ຕາ ອຕ຺ຖງ຺ຄຕາ ອພ຺ຠຕ຺ຖງ຺ຄຕາ ອປ຺ປິຕາ ພ຺ຍປ຺ປິຕາ ໂສສິຕາ ວິໂສສິຕາ ພ຺ຍນ຺ຕີກຕາ. ເຕນ ວຸຈ຺ຈຕິ ‘‘ວິເນຍ຺ຍ ໂລເກ ອຠິຊ຺ຌາໂທມນສ຺ສ’’ນ຺ຕິ.

ຘມ຺ມານຸປສ຺ສນານິທ຺ເທໂສ.

ສຸຕ຺ຕນ຺ຕຠາຊນີຍໍ.