໑. ຕິກໍ

໕໐໖. ສິຍາ ກຸສລາ, ສິຍາ ອພ຺ຍາກຕາ. ສມ຺ມາສງ຺ກປ຺ໂປ ສຸຂາຍ ເວທນາຍ ສມ຺ປຍຸຕ຺ໂຕ; ສຕ຺ຕ ມຄ຺ຄງ຺ຄາ ສິຍາ ສຸຂາຍ ເວທນາຍ ສມ຺ປຍຸຕ຺ຕາ, ສິຍາ ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕາ. ສິຍາ ວິປາກາ, ສິຍາ ວິປາກຘມ຺ມຘມ຺ມາ. ອນຸປາທິນ຺ນອນຸປາທານິຍາ. ອສໍກິລິຏ຺ຐອສໍກິເລສິກາ. ສມ຺ມາສງ຺ກປ຺ໂປ ອວິຕກ຺ກວິຈາຣມຕ຺ໂຕ; ສຕ຺ຕ ມຄ຺ຄງ຺ຄາ ສິຍາ ສວິຕກ຺ກສວິຈາຣາ, ສິຍາ ອວິຕກ຺ກວິຈາຣມຕ຺ຕາ, ສິຍາ ອວິຕກ຺ກອວິຈາຣາ. ສມ຺ມາສງ຺ກປ຺ໂປ ປີຕິສຫຄໂຕ, ສຸຂສຫຄໂຕ, ນ ອຸເປກ຺ຂາສຫຄໂຕ; ສຕ຺ຕ ມຄ຺ຄງ຺ຄາ ສິຍາ ປີຕິສຫຄຕາ, ສິຍາ ສຸຂສຫຄຕາ, ສິຍາ ອຸເປກ຺ຂາສຫຄຕາ. ເນວ ທສ຺ສເນນ ນ ຠາວນາຍ ປຫາຕພ຺ພາ. ເນວ ທສ຺ສເນນ ນ ຠາວນາຍ ປຫາຕພ຺ພເຫຕຸກາ. ສິຍາ ອປຈຍຄາມິໂນ, ສິຍາ ເນວາຈຍຄາມິນາປຈຍຄາມິໂນ. ສິຍາ ເສກ຺ຂາ, ສິຍາ ອເສກ຺ຂາ. ອປ຺ປມາຓາ. ອປ຺ປມາຓາຣມ຺ມຓາ. ປຓີຕາ. ສິຍາ ສມ຺ມຕ຺ຕນິຍຕາ, ສິຍາ ອນິຍຕາ. ນ ມຄ຺ຄາຣມ຺ມຓາ, ສິຍາ ມຄ຺ຄເຫຕຸກາ, ສິຍາ ມຄ຺ຄາຘິປຕິໂນ; ສິຍາ ນ ວຕ຺ຕພ຺ພາ ມຄ຺ຄເຫຕຸກາຕິປິ, ມຄ຺ຄາຘິປຕິໂນຕິປິ. ສິຍາ ອຸປ຺ປນ຺ນາ, ສິຍາ ອນຸປ຺ປນ຺ນາ, ສິຍາ ອຸປ຺ປາທິໂນ. ສິຍາ ອຕີຕາ, ສິຍາ ອນາຄຕາ, ສິຍາ ປຈ຺ຈຸປ຺ປນ຺ນາ. ນ ວຕ຺ຕພ຺ພາ ອຕີຕາຣມ຺ມຓາຕິປິ, ອນາຄຕາຣມ຺ມຓາຕິປິ, ປຈ຺ຈຸປ຺ປນ຺ນາຣມ຺ມຓາຕິປິ. ສິຍາ ອຊ຺ຌຕ຺ຕາ, ສິຍາ ພຫິທ຺ຘາ, ສິຍາ ອຊ຺ຌຕ຺ຕພຫິທ຺ຘາ. ພຫິທ຺ຘາຣມ຺ມຓາ. ອນິທສ຺ສນອປ຺ປຏິຆາ.