໓. ປຎ຺ຫາປຸຈ຺ຉກໍ

໑໕໐. ປຎ຺ຈກ຺ຂນ຺ຘາ – ຣູປກ຺ຂນ຺ໂຘ, ເວທນາກ຺ຂນ຺ໂຘ, ສຎ຺ຎາກ຺ຂນ຺ໂຘ, ສງ຺ຂາຣກ຺ຂນ຺ໂຘ, ວິຎ຺ຎາຓກ຺ຂນ຺ໂຘ.

໑໕໑. ປຎ຺ຈນ຺ນໍ ຂນ຺ຘານໍ ກຕິ ກຸສລາ, ກຕິ ອກຸສລາ, ກຕິ ອພ຺ຍາກຕາ…ເປ… ກຕິ ສຣຓາ, ກຕິ ອຣຓາ?

໑. ຕິກໍ

໑໕໒. ຣູປກ຺ຂນ຺ໂຘ ອພ຺ຍາກໂຕ. ຈຕ຺ຕາໂຣ ຂນ຺ຘາ ສິຍາ ກຸສລາ, ສິຍາ ອກຸສລາ, ສິຍາ ອພ຺ຍາກຕາ. ທ຺ເວ ຂນ຺ຘາ ນ ວຕ຺ຕພ຺ພາ – ‘‘ສຸຂາຍ ເວທນາຍ ສມ຺ປຍຸຕ຺ຕາ’’ຕິປິ, ‘‘ທຸກ຺ຂາຍ ເວທນາຍ ສມ຺ປຍຸຕ຺ຕາ’’ຕິປິ, ‘‘ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕາ’’ຕິປິ. ຕໂຍ ຂນ຺ຘາ ສິຍາ ສຸຂາຍ ເວທນາຍ ສມ຺ປຍຸຕ຺ຕາ, ສິຍາ ທຸກ຺ຂາຍ ເວທນາຍ ສມ຺ປຍຸຕ຺ຕາ, ສິຍາ ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕາ. ຣູປກ຺ຂນ຺ໂຘ ເນວວິປາກນວິປາກຘມ຺ມຘມ຺ໂມ. ຈຕ຺ຕາໂຣ ຂນ຺ຘາ ສິຍາ ວິປາກາ, ສິຍາ ວິປາກຘມ຺ມຘມ຺ມາ, ສິຍາ ເນວວິປາກນວິປາກຘມ຺ມຘມ຺ມາ. ຣູປກ຺ຂນ຺ໂຘ ສິຍາ ອຸປາທິນ຺ນຸປາທານິໂຍ, ສິຍາ ອນຸປາທິນ຺ນຸປາທານິໂຍ. ຈຕ຺ຕາໂຣ ຂນ຺ຘາ ສິຍາ ອຸປາທິນ຺ນຸປາທານິຍາ, ສິຍາ ອນຸປາທິນ຺ນຸປາທານິຍາ, ສິຍາ ອນຸປາທິນ຺ນອນຸປາທານິຍາ.

ຣູປກ຺ຂນ຺ໂຘ ອສໍກິລິຏ຺ຐສໍກິເລສິໂກ. ຈຕ຺ຕາໂຣ ຂນ຺ຘາ ສິຍາ ສໍກິລິຏ຺ຐສໍກິເລສິກາ, ສິຍາ ອສໍກິລິຏ຺ຐສໍກິເລສິກາ, ສິຍາ ອສໍກິລິຏ຺ຐອສໍກິເລສິກາ. ຣູປກ຺ຂນ຺ໂຘ ອວິຕກ຺ກອວິຈາໂຣ. ຕໂຍ ຂນ຺ຘາ ສິຍາ ສວິຕກ຺ກສວິຈາຣາ, ສິຍາ ອວິຕກ຺ກວິຈາຣມຕ຺ຕາ, ສິຍາ ອວິຕກ຺ກອວິຈາຣາ. ສງ຺ຂາຣກ຺ຂນ຺ໂຘ ສິຍາ ສວິຕກ຺ກສວິຈາໂຣ, ສິຍາ ອວິຕກ຺ກວິຈາຣມຕ຺ໂຕ, ສິຍາ ອວິຕກ຺ກອວິຈາໂຣ, ສິຍາ ນ ວຕ຺ຕພ຺ໂພ – ‘‘ສວິຕກ຺ກສວິຈາໂຣ’’ຕິປິ, ‘‘ອວິຕກ຺ກວິຈາຣມຕ຺ໂຕ’’ຕິປິ, ‘‘ອວິຕກ຺ກອວິຈາໂຣ’’ຕິປິ. ຣູປກ຺ຂນ຺ໂຘ ນ ວຕ຺ຕພ຺ໂພ – ‘‘ປີຕິສຫຄໂຕ’’ຕິປິ, ‘‘ສຸຂສຫຄໂຕ’’ຕິປິ, ‘‘ອຸເປກ຺ຂາສຫຄໂຕ’’ຕິປິ. ເວທນາກ຺ຂນ຺ໂຘ ສິຍາ ປີຕິສຫຄໂຕ ນ ສຸຂສຫຄໂຕ ນ ອຸເປກ຺ຂາສຫຄໂຕ, ສິຍາ ນ ວຕ຺ຕພ຺ໂພ – ‘‘ປີຕິສຫຄໂຕ’’ຕິ. ຕໂຍ ຂນ຺ຘາ ສິຍາ ປີຕິສຫຄຕາ, ສິຍາ ສຸຂສຫຄຕາ, ສິຍາ ອຸເປກ຺ຂາສຫຄຕາ, ສິຍາ ນ ວຕ຺ຕພ຺ພາ – ‘‘ປີຕິສຫຄຕາ’’ຕິປິ, ‘‘ສຸຂສຫຄຕາ’’ຕິປິ, ‘‘ອຸເປກ຺ຂາສຫຄຕາ’’ຕິປິ.

ຣູປກ຺ຂນ຺ໂຘ ເນວ ທສ຺ສເນນ ນ ຠາວນາຍ ປຫາຕພ຺ໂພ. ຈຕ຺ຕາໂຣ ຂນ຺ຘາ ສິຍາ ທສ຺ສເນນ ປຫາຕພ຺ພາ, ສິຍາ ຠາວນາຍ ປຫາຕພ຺ພາ, ສິຍາ ເນວ ທສ຺ສເນນ ນ ຠາວນາຍ ປຫາຕພ຺ພາ. ຣູປກ຺ຂນ຺ໂຘ ເນວ ທສ຺ສເນນ ນ ຠາວນາຍ ປຫາຕພ຺ພເຫຕຸໂກ. ຈຕ຺ຕາໂຣ ຂນ຺ຘາ ສິຍາ ທສ຺ສເນນ ປຫາຕພ຺ພເຫຕຸກາ, ສິຍາ ຠາວນາຍ ປຫາຕພ຺ພເຫຕຸກາ, ສິຍາ ເນວ ທສ຺ສເນນ ນ ຠາວນາຍ ປຫາຕພ຺ພເຫຕຸກາ. ຣູປກ຺ຂນ຺ໂຘ ເນວາຈຍຄາມິນາປຈຍຄາມີ. ຈຕ຺ຕາໂຣ ຂນ຺ຘາ ສິຍາ ອາຈຍຄາມິໂນ, ສິຍາ ອປຈຍຄາມິໂນ, ສິຍາ ເນວາຈຍຄາມິນາປຈຍຄາມິໂນ. ຣູປກ຺ຂນ຺ໂຘ ເນວເສກ຺ຂນາເສກ຺ໂຂ. ຈຕ຺ຕາໂຣ ຂນ຺ຘາ ສິຍາ ເສກ຺ຂາ, ສິຍາ ອເສກ຺ຂາ, ສິຍາ ເນວເສກ຺ຂນາເສກ຺ຂາ. ຣູປກ຺ຂນ຺ໂຘ ປຣິຕ຺ໂຕ. ຈຕ຺ຕາໂຣ ຂນ຺ຘາ ສິຍາ ປຣິຕ຺ຕາ, ສິຍາ ມຫຄ຺ຄຕາ, ສິຍາ ອປ຺ປມາຓາ. ຣູປກ຺ຂນ຺ໂຘ ອນາຣມ຺ມໂຓ. ຈຕ຺ຕາໂຣ ຂນ຺ຘາ ສິຍາ ປຣິຕ຺ຕາຣມ຺ມຓາ, ສິຍາ ມຫຄ຺ຄຕາຣມ຺ມຓາ, ສິຍາ ອປ຺ປມາຓາຣມ຺ມຓາ, ສິຍາ ນ ວຕ຺ຕພ຺ພາ – ‘‘ປຣິຕ຺ຕາຣມ຺ມຓາ’’ຕິປິ, ‘‘ມຫຄ຺ຄຕາຣມ຺ມຓາ’’ຕິປິ, ‘‘ອປ຺ປມາຓາຣມ຺ມຓາ’’ຕິປິ. ຣູປກ຺ຂນ຺ໂຘ ມຊ຺ຌິໂມ. ຈຕ຺ຕາໂຣ ຂນ຺ຘາ ສິຍາ ຫີນາ, ສິຍາ ມຊ຺ຌິມາ, ສິຍາ ປຓີຕາ. ຣູປກ຺ຂນ຺ໂຘ ອນິຍໂຕ. ຈຕ຺ຕາໂຣ ຂນ຺ຘາ ສິຍາ ມິຈ຺ຉຕ຺ຕນິຍຕາ, ສິຍາ ສມ຺ມຕ຺ຕນິຍຕາ, ສິຍາ ອນິຍຕາ.

ຣູປກ຺ຂນ຺ໂຘ ອນາຣມ຺ມໂຓ. ຈຕ຺ຕາໂຣ ຂນ຺ຘາ ສິຍາ ມຄ຺ຄາຣມ຺ມຓາ, ສິຍາ ມຄ຺ຄເຫຕຸກາ, ສິຍາ ມຄ຺ຄາຘິປຕິໂນ, ສິຍາ ນ ວຕ຺ຕພ຺ພາ – ‘‘ມຄ຺ຄາຣມ຺ມຓາ’’ຕິປິ, ‘‘ມຄ຺ຄເຫຕຸກາ’’ຕິປິ, ‘‘ມຄ຺ຄາຘິປຕິໂນ’’ຕິປິ; ສິຍາ ອຸປ຺ປນ຺ນາ, ສິຍາ ອນຸປ຺ປນ຺ນາ, ສິຍາ ອຸປ຺ປາທິໂນ; ສິຍາ ອຕີຕາ, ສິຍາ ອນາຄຕາ, ສິຍາ ປຈ຺ຈຸປ຺ປນ຺ນາ. ຣູປກ຺ຂນ຺ໂຘ ອນາຣມ຺ມໂຓ. ຈຕ຺ຕາໂຣ ຂນ຺ຘາ ສິຍາ ອຕີຕາຣມ຺ມຓາ, ສິຍາ ອນາຄຕາຣມ຺ມຓາ, ສິຍາ ປຈ຺ຈຸປ຺ປນ຺ນາຣມ຺ມຓາ, ສິຍາ ນ ວຕ຺ຕພ຺ພາ – ‘‘ອຕີຕາຣມ຺ມຓາ’’ຕິປິ, ‘‘ອນາຄຕາຣມ຺ມຓາ’’ຕິປິ, ‘‘ປຈ຺ຈຸປ຺ປນ຺ນາຣມ຺ມຓາ’’ຕິປິ; ສິຍາ ອຊ຺ຌຕ຺ຕາ, ສິຍາ ພຫິທ຺ຘາ, ສິຍາ ອຊ຺ຌຕ຺ຕພຫິທ຺ຘາ. ຣູປກ຺ຂນ຺ໂຘ ອນາຣມ຺ມໂຓ. ຈຕ຺ຕາໂຣ ຂນ຺ຘາ ສິຍາ ອຊ຺ຌຕ຺ຕາຣມ຺ມຓາ, ສິຍາ ພຫິທ຺ຘາຣມ຺ມຓາ, ສິຍາ ອຊ຺ຌຕ຺ຕພຫິທ຺ຘາຣມ຺ມຓາ, ສິຍາ ນ ວຕ຺ຕພ຺ພາ – ‘‘ອຊ຺ຌຕ຺ຕາຣມ຺ມຓາ’’ຕິປິ, ‘‘ພຫິທ຺ຘາຣມ຺ມຓາ’’ຕິປິ, ‘‘ອຊ຺ຌຕ຺ຕພຫິທ຺ຘາຣມ຺ມຓາ’’ຕິປິ. ຈຕ຺ຕາໂຣ ຂນ຺ຘາ ອນິທສ຺ສນອປ຺ປຏິຆາ. ຣູປກ຺ຂນ຺ໂຘ ສິຍາ ສນິທສ຺ສນສປ຺ປຏິໂຆ, ສິຍາ ອນິທສ຺ສນສປ຺ປຏິໂຆ, ສິຍາ ອນິທສ຺ສນອປ຺ປຏິໂຆ.

໒. ທຸກໍ

໑໕໓. ຈຕ຺ຕາໂຣ ຂນ຺ຘາ ນ ເຫຕູ. ສງ຺ຂາຣກ຺ຂນ຺ໂຘ ສິຍາ ເຫຕຸ, ສິຍາ ນ ເຫຕຸ. ຣູປກ຺ຂນ຺ໂຘ ອເຫຕຸໂກ. ຈຕ຺ຕາໂຣ ຂນ຺ຘາ ສິຍາ ສເຫຕຸກາ, ສິຍາ ອເຫຕຸກາ. ຣູປກ຺ຂນ຺ໂຘ ເຫຕຸວິປ຺ປຍຸຕ຺ໂຕ. ຈຕ຺ຕາໂຣ ຂນ຺ຘາ ສິຍາ ເຫຕຸສມ຺ປຍຸຕ຺ຕາ, ສິຍາ ເຫຕຸວິປ຺ປຍຸຕ຺ຕາ. ຣູປກ຺ຂນ຺ໂຘ ນ ວຕ຺ຕພ຺ໂພ – ‘‘ເຫຕຸ ເຈວ ສເຫຕຸໂກ ຈາ’’ຕິປິ, ‘‘ສເຫຕຸໂກ ເຈວ ນ ຈ ເຫຕູ’’ຕິປິ. ຕໂຍ ຂນ຺ຘາ ນ ວຕ຺ຕພ຺ພາ – ‘‘ເຫຕູ ເຈວ ສເຫຕຸກາ ຈາ’’ຕິ, ສິຍາ ສເຫຕຸກາ ເຈວ ນ ຈ ເຫຕູ, ສິຍາ ນ ວຕ຺ຕພ຺ພາ – ‘‘ສເຫຕຸກາ ເຈວ ນ ຈ ເຫຕູ’’ຕິ. ສງ຺ຂາຣກ຺ຂນ຺ໂຘ ສິຍາ ເຫຕຸ ເຈວ ສເຫຕຸໂກ ຈ, ສິຍາ ສເຫຕຸໂກ ເຈວ ນ ຈ ເຫຕຸ, ສິຍາ ນ ວຕ຺ຕພ຺ໂພ – ‘‘ເຫຕຸ ເຈວ ສເຫຕຸໂກ ຈາ’’ຕິປິ, ‘‘ສເຫຕຸໂກ ເຈວ ນ ຈ ເຫຕູ’’ຕິປິ. ຣູປກ຺ຂນ຺ໂຘ ນ ວຕ຺ຕພ຺ໂພ – ‘‘ເຫຕຸ ເຈວ ເຫຕຸສມ຺ປຍຸຕ຺ໂຕ ຈາ’’ຕິປິ, ‘‘ເຫຕຸສມ຺ປຍຸຕ຺ໂຕ ເຈວ ນ ຈ ເຫຕູ’’ຕິປິ. ຕໂຍ ຂນ຺ຘາ ນ ວຕ຺ຕພ຺ພາ – ‘‘ເຫຕູ ເຈວ ເຫຕຸສມ຺ປຍຸຕ຺ຕາ ຈາ’’ຕິ, ສິຍາ ເຫຕຸສມ຺ປຍຸຕ຺ຕາ ເຈວ ນ ຈ ເຫຕູ, ສິຍາ ນ ວຕ຺ຕພ຺ພາ – ‘‘ເຫຕຸສມ຺ປຍຸຕ຺ຕາ ເຈວ ນ ຈ ເຫຕູ’’ຕິ. ສງ຺ຂາຣກ຺ຂນ຺ໂຘ ສິຍາ ເຫຕຸ ເຈວ ເຫຕຸສມ຺ປຍຸຕ຺ໂຕ ຈ, ສິຍາ ເຫຕຸສມ຺ປຍຸຕ຺ໂຕ ເຈວ ນ ຈ ເຫຕຸ, ສິຍາ ນ ວຕ຺ຕພ຺ໂພ – ‘‘ເຫຕຸ ເຈວ ເຫຕຸສມ຺ປຍຸຕ຺ໂຕ ຈາ’’ຕິປິ, ‘‘ເຫຕຸສມ຺ປຍຸຕ຺ໂຕ ເຈວ ນ ຈ ເຫຕູ’’ຕິປິ. ຣູປກ຺ຂນ຺ໂຘ ນ ເຫຕຸ ອເຫຕຸໂກ. ຕໂຍ ຂນ຺ຘາ ສິຍາ ນ ເຫຕູ ສເຫຕຸກາ, ສິຍາ ນ ເຫຕູ ອເຫຕຸກາ. ສງ຺ຂາຣກ຺ຂນ຺ໂຘ ສິຍາ ນ ເຫຕຸ ສເຫຕຸໂກ, ສິຍາ ນ ເຫຕຸ ອເຫຕຸໂກ, ສິຍາ ນ ວຕ຺ຕພ຺ໂພ – ‘‘ນ ເຫຕຸ ສເຫຕຸໂກ’’ຕິປິ, ‘‘ນ ເຫຕຸ ອເຫຕຸໂກ’’ຕິປິ.

ສປ຺ປຈ຺ຈຍາ, ສງ຺ຂຕາ.

ຈຕ຺ຕາໂຣ ຂນ຺ຘາ ອນິທສ຺ສນາ. ຣູປກ຺ຂນ຺ໂຘ ສິຍາ ສນິທສ຺ສໂນ, ສິຍາ ອນິທສ຺ສໂນ. ຈຕ຺ຕາໂຣ ຂນ຺ຘາ ອປ຺ປຏິຆາ. ຣູປກ຺ຂນ຺ໂຘ ສິຍາ ສປ຺ປຏິໂຆ, ສິຍາ ອປ຺ປຏິໂຆ. ຣູປກ຺ຂນ຺ໂຘ ຣູປໍ. ຈຕ຺ຕາໂຣ ຂນ຺ຘາ ອຣູປາ. ຣູປກ຺ຂນ຺ໂຘ ໂລກິໂຍ. ຈຕ຺ຕາໂຣ ຂນ຺ຘາ ສິຍາ ໂລກິຍາ, ສິຍາ ໂລກຸຕ຺ຕຣາ; ເກນຈິ ວິຎ຺ເຎຍ຺ຍາ, ເກນຈິ ນ ວິຎ຺ເຎຍ຺ຍາ.

ຈຕ຺ຕາໂຣ ຂນ຺ຘາ ໂນ ອາສວາ. ສງ຺ຂາຣກ຺ຂນ຺ໂຘ ສິຍາ ອາສໂວ, ສິຍາ ໂນ ອາສໂວ. ຣູປກ຺ຂນ຺ໂຘ ສາສໂວ. ຈຕ຺ຕາໂຣ ຂນ຺ຘາ ສິຍາ ສາສວາ, ສິຍາ ອນາສວາ. ຣູປກ຺ຂນ຺ໂຘ ອາສວວິປ຺ປຍຸຕ຺ໂຕ. ຈຕ຺ຕາໂຣ ຂນ຺ຘາ ສິຍາ ອາສວສມ຺ປຍຸຕ຺ຕາ, ສິຍາ ອາສວວິປ຺ປຍຸຕ຺ຕາ. ຣູປກ຺ຂນ຺ໂຘ ນ ວຕ຺ຕພ຺ໂພ – ‘‘ອາສໂວ ເຈວ ສາສໂວ ຈາ’’ຕິ, ສາສໂວ ເຈວ ໂນ ຈ ອາສໂວ. ຕໂຍ ຂນ຺ຘາ ນ ວຕ຺ຕພ຺ພາ – ‘‘ອາສວາ ເຈວ ສາສວາ ຈາ’’ຕິ, ສິຍາ ສາສວາ ເຈວ ໂນ ຈ ອາສວາ, ສິຍາ ນ ວຕ຺ຕພ຺ພາ – ‘‘ສາສວາ ເຈວ ໂນ ຈ ອາສວາ’’ຕິ. ສງ຺ຂາຣກ຺ຂນ຺ໂຘ ສິຍາ ອາສໂວ ເຈວ ສາສໂວ ຈ, ສິຍາ ສາສໂວ ເຈວ ໂນ ຈ ອາສໂວ, ສິຍາ ນ ວຕ຺ຕພ຺ໂພ – ‘‘ອາສໂວ ເຈວ ສາສໂວ ຈາ’’ຕິປິ, ‘‘ສາສໂວ ເຈວ ໂນ ຈ ອາສໂວ’’ຕິປິ. ຣູປກ຺ຂນ຺ໂຘ ນ ວຕ຺ຕພ຺ໂພ – ‘‘ອາສໂວ ເຈວ ອາສວສມ຺ປຍຸຕ຺ໂຕ ຈາ’’ຕິປິ, ‘‘ອາສວສມ຺ປຍຸຕ຺ໂຕ ເຈວ ໂນ ຈ ອາສໂວ’’ຕິປິ. ຕໂຍ ຂນ຺ຘາ ນ ວຕ຺ຕພ຺ພາ – ‘‘ອາສວາ ເຈວ ອາສວສມ຺ປຍຸຕ຺ຕາ ຈາ’’ຕິ, ສິຍາ ອາສວສມ຺ປຍຸຕ຺ຕາ ເຈວ ໂນ ຈ ອາສວາ, ສິຍາ ນ ວຕ຺ຕພ຺ພາ – ‘‘ອາສວສມ຺ປຍຸຕ຺ຕາ ເຈວ ໂນ ຈ ອາສວາ’’ຕິ. ສງ຺ຂາຣກ຺ຂນ຺ໂຘ ສິຍາ ອາສໂວ ເຈວ ອາສວສມ຺ປຍຸຕ຺ໂຕ ຈ, ສິຍາ ອາສວສມ຺ປຍຸຕ຺ໂຕ ເຈວ ໂນ ຈ ອາສໂວ, ສິຍາ ນ ວຕ຺ຕພ຺ໂພ – ‘‘ອາສໂວ ເຈວ ອາສວສມ຺ປຍຸຕ຺ໂຕ ຈາ’’ຕິປິ, ‘‘ອາສວສມ຺ປຍຸຕ຺ໂຕ ເຈວ ໂນ ຈ ອາສໂວ’’ຕິປິ. ຣູປກ຺ຂນ຺ໂຘ ອາສວວິປ຺ປຍຸຕ຺ຕສາສໂວ. ຈຕ຺ຕາໂຣ ຂນ຺ຘາ ສິຍາ ອາສວວິປ຺ປຍຸຕ຺ຕສາສວາ, ສິຍາ ອາສວວິປ຺ປຍຸຕ຺ຕອນາສວາ, ສິຍາ ນ ວຕ຺ຕພ຺ພາ – ‘‘ອາສວວິປ຺ປຍຸຕ຺ຕສາສວາ’’ຕິປິ, ‘‘ອາສວວິປ຺ປຍຸຕ຺ຕອນາສວາ’’ຕິປິ.

ຈຕ຺ຕາໂຣ ຂນ຺ຘາ ໂນ ສໍໂຍຊນາ. ສງ຺ຂາຣກ຺ຂນ຺ໂຘ ສິຍາ ສໍໂຍຊນໍ, ສິຍາ ໂນ ສໍໂຍຊນໍ. ຣູປກ຺ຂນ຺ໂຘ ສໍໂຍຊນິໂຍ. ຈຕ຺ຕາໂຣ ຂນ຺ຘາ ສິຍາ ສໍໂຍຊນິຍາ, ສິຍາ ອສໍໂຍຊນິຍາ. ຣູປກ຺ຂນ຺ໂຘ ສໍໂຍຊນວິປ຺ປຍຸຕ຺ໂຕ. ຈຕ຺ຕາໂຣ ຂນ຺ຘາ ສິຍາ ສໍໂຍຊນສມ຺ປຍຸຕ຺ຕາ, ສິຍາ ສໍໂຍຊນວິປ຺ປຍຸຕ຺ຕາ. ຣູປກ຺ຂນ຺ໂຘ ນ ວຕ຺ຕພ຺ໂພ – ‘‘ສໍໂຍຊນຎ຺ເຈວ ສໍໂຍຊນິໂຍ ຈາ’’ຕິ, ‘‘ສໍໂຍຊນິໂຍ ເຈວ ໂນ ຈ ສໍໂຍຊນໍ’’. ຕໂຍ ຂນ຺ຘາ ນ ວຕ຺ຕພ຺ພາ – ‘‘ສໍໂຍຊນາ ເຈວ ສໍໂຍຊນິຍາ ຈາ’’ຕິ, ສິຍາ ສໍໂຍຊນິຍາ ເຈວ ໂນ ຈ ສໍໂຍຊນາ, ສິຍາ ນ ວຕ຺ຕພ຺ພາ – ‘‘ສໍໂຍຊນິຍາ ເຈວ ໂນ ຈ ສໍໂຍຊນາ’’ຕິ. ສງ຺ຂາຣກ຺ຂນ຺ໂຘ ສິຍາ ສໍໂຍຊນຎ຺ເຈວ ສໍໂຍຊນິໂຍ ຈ, ສິຍາ ສໍໂຍຊນິໂຍ ເຈວ ໂນ ຈ ສໍໂຍຊນໍ, ສິຍາ ນ ວຕ຺ຕພ຺ໂພ – ‘‘ສໍໂຍຊນຎ຺ເຈວ ສໍໂຍຊນິໂຍ ຈາ’’ຕິປິ, ‘‘ສໍໂຍຊນິໂຍ ເຈວ ໂນ ຈ ສໍໂຍຊນ’’ນ຺ຕິປິ. ຣູປກ຺ຂນ຺ໂຘ ນ ວຕ຺ຕພ຺ໂພ – ‘‘ສໍໂຍຊນຎ຺ເຈວ ສໍໂຍຊນສມ຺ປຍຸຕ຺ໂຕ ຈາ’’ຕິປິ, ‘‘ສໍໂຍຊນສມ຺ປຍຸຕ຺ໂຕ ເຈວ ໂນ ຈ ສໍໂຍຊນ’’ນ຺ຕິປິ. ຕໂຍ ຂນ຺ຘາ ນ ວຕ຺ຕພ຺ພາ – ‘‘ສໍໂຍຊນາ ເຈວ ສໍໂຍຊນສມ຺ປຍຸຕ຺ຕາ ຈາ’’ຕິ, ສິຍາ ສໍໂຍຊນສມ຺ປຍຸຕ຺ຕາ ເຈວ ໂນ ຈ ສໍໂຍຊນາ, ສິຍາ ນ ວຕ຺ຕພ຺ພາ – ‘‘ສໍໂຍຊນສມ຺ປຍຸຕ຺ຕາ ເຈວ ໂນ ຈ ສໍໂຍຊນາ’’ຕິ. ສງ຺ຂາຣກ຺ຂນ຺ໂຘ ສິຍາ ສໍໂຍຊນຎ຺ເຈວ ສໍໂຍຊນສມ຺ປຍຸຕ຺ໂຕ ຈ, ສິຍາ ສໍໂຍຊນສມ຺ປຍຸຕ຺ໂຕ ເຈວ ໂນ ຈ ສໍໂຍຊນໍ, ສິຍາ ນ ວຕ຺ຕພ຺ໂພ – ‘‘ສໍໂຍຊນຎ຺ເຈວ ສໍໂຍຊນສມ຺ປຍຸຕ຺ໂຕ ຈາ’’ຕິປິ, ‘‘ສໍໂຍຊນສມ຺ປຍຸຕ຺ໂຕ ເຈວ ໂນ ຈ ສໍໂຍຊນ’’ນ຺ຕິປິ. ຣູປກ຺ຂນ຺ໂຘ ສໍໂຍຊນວິປ຺ປຍຸຕ຺ຕສໍໂຍຊນິໂຍ. ຈຕ຺ຕາໂຣ ຂນ຺ຘາ ສິຍາ ສໍໂຍຊນວິປ຺ປຍຸຕ຺ຕສໍໂຍຊນິຍາ, ສິຍາ ສໍໂຍຊນວິປ຺ປຍຸຕ຺ຕອສໍໂຍຊນິຍາ, ສິຍາ ນ ວຕ຺ຕພ຺ພາ – ‘‘ສໍໂຍຊນວິປ຺ປຍຸຕ຺ຕສໍໂຍຊນິຍາ’’ຕິປິ, ‘‘ສໍໂຍຊນວິປ຺ປຍຸຕ຺ຕອສໍໂຍຊນິຍາ’’ຕິປິ.

ຈຕ຺ຕາໂຣ ຂນ຺ຘາ ໂນ ຄນ຺ຖາ. ສງ຺ຂາຣກ຺ຂນ຺ໂຘ ສິຍາ ຄນ຺ໂຖ, ສິຍາ ໂນ ຄນ຺ໂຖ. ຣູປກ຺ຂນ຺ໂຘ ຄນ຺ຖນິໂຍ. ຈຕ຺ຕາໂຣ ຂນ຺ຘາ ສິຍາ ຄນ຺ຖນິຍາ, ສິຍາ ອຄນ຺ຖນິຍາ. ຣູປກ຺ຂນ຺ໂຘ ຄນ຺ຖວິປ຺ປຍຸຕ຺ໂຕ. ຈຕ຺ຕາໂຣ ຂນ຺ຘາ ສິຍາ ຄນ຺ຖສມ຺ປຍຸຕ຺ຕາ, ສິຍາ ຄນ຺ຖວິປ຺ປຍຸຕ຺ຕາ. ຣູປກ຺ຂນ຺ໂຘ ນ ວຕ຺ຕພ຺ໂພ – ‘‘ຄນ຺ໂຖ ເຈວ ຄນ຺ຖນິໂຍ ຈາ’’ຕິ, ‘‘ຄນ຺ຖນິໂຍ ເຈວ ໂນ ຈ ຄນ຺ໂຖ’’. ຕໂຍ ຂນ຺ຘາ ນ ວຕ຺ຕພ຺ພາ – ‘‘ຄນ຺ຖາ ເຈວ ຄນ຺ຖນິຍາ ຈາ’’ຕິ, ສິຍາ ຄນ຺ຖນິຍາ ເຈວ ໂນ ຈ ຄນ຺ຖາ, ສິຍາ ນ ວຕ຺ຕພ຺ພາ – ‘‘ຄນ຺ຖນິຍາ ເຈວ ໂນ ຈ ຄນ຺ຖາ’’ຕິ. ສງ຺ຂາຣກ຺ຂນ຺ໂຘ ສິຍາ ຄນ຺ໂຖ ເຈວ ຄນ຺ຖນິໂຍ ຈ, ສິຍາ ຄນ຺ຖນິໂຍ ເຈວ ໂນ ຈ ຄນ຺ໂຖ, ສິຍາ ນ ວຕ຺ຕພ຺ໂພ – ‘‘ຄນ຺ໂຖ ເຈວ ຄນ຺ຖນິໂຍ ຈາ’’ຕິປິ, ‘‘ຄນ຺ຖນິໂຍ ເຈວ ໂນ ຈ ຄນ຺ໂຖ’’ຕິປິ. ຣູປກ຺ຂນ຺ໂຘ ນ ວຕ຺ຕພ຺ໂພ – ‘‘ຄນ຺ໂຖ ເຈວ ຄນ຺ຖສມ຺ປຍຸຕ຺ໂຕ ຈາ’’ຕິປິ, ‘‘ຄນ຺ຖສມ຺ປຍຸຕ຺ໂຕ ເຈວ ໂນ ຈ ຄນ຺ໂຖ’’ຕິປິ. ຕໂຍ ຂນ຺ຘາ ນ ວຕ຺ຕພ຺ພາ – ‘‘ຄນ຺ຖາ ເຈວ ຄນ຺ຖສມ຺ປຍຸຕ຺ຕາ ຈາ’’ຕິ, ສິຍາ ຄນ຺ຖສມ຺ປຍຸຕ຺ຕາ ເຈວ ໂນ ຈ ຄນ຺ຖາ, ສິຍາ ນ ວຕ຺ຕພ຺ພາ – ‘‘ຄນ຺ຖສມ຺ປຍຸຕ຺ຕາ ເຈວ ໂນ ຈ ຄນ຺ຖາ’’ຕິ. ສງ຺ຂາຣກ຺ຂນ຺ໂຘ ສິຍາ ຄນ຺ໂຖ ເຈວ ຄນ຺ຖສມ຺ປຍຸຕ຺ໂຕ ຈ, ສິຍາ ຄນ຺ຖສມ຺ປຍຸຕ຺ໂຕ ເຈວ ໂນ ຈ ຄນ຺ໂຖ, ສິຍາ ນ ວຕ຺ຕພ຺ໂພ – ‘‘ຄນ຺ໂຖ ເຈວ ຄນ຺ຖສມ຺ປຍຸຕ຺ໂຕ ຈາ’’ຕິປິ, ‘‘ຄນ຺ຖສມ຺ປຍຸຕ຺ໂຕ ເຈວ ໂນ ຈ ຄນ຺ໂຖ’’ຕິ ປິ. ຣູປກ຺ຂນ຺ໂຘ ຄນ຺ຖວິປ຺ປຍຸຕ຺ຕຄນ຺ຖນິໂຍ. ຈຕ຺ຕາໂຣ ຂນ຺ຘາ ສິຍາ ຄນ຺ຖວິປ຺ປຍຸຕ຺ຕຄນ຺ຖນິຍາ, ສິຍາ ຄນ຺ຖວິປ຺ປຍຸຕ຺ຕອຄນ຺ຖນິຍາ, ສິຍາ ນ ວຕ຺ຕພ຺ພາ – ‘‘ຄນ຺ຖວິປ຺ປຍຸຕ຺ຕຄນ຺ຖນິຍາ’’ຕິປິ, ‘‘ຄນ຺ຖວິປ຺ປຍຸຕ຺ຕອຄນ຺ຖນິຍາ’’ຕິປິ.

ຈຕ຺ຕາໂຣ ຂນ຺ຘາ ໂນ ໂອຆາ…ເປ… ໂນ ໂຍຄາ…ເປ… ໂນ ນີວຣຓາ. ສງ຺ຂາຣກ຺ຂນ຺ໂຘ ສິຍາ ນີວຣຓໍ, ສິຍາ ໂນ ນີວຣຓໍ. ຣູປກ຺ຂນ຺ໂຘ ນີວຣຓິໂຍ. ຈຕ຺ຕາໂຣ ຂນ຺ຘາ ສິຍາ ນີວຣຓິຍາ, ສິຍາ ອນີວຣຓິຍາ. ຣູປກ຺ຂນ຺ໂຘ ນີວຣຓວິປ຺ປຍຸຕ຺ໂຕ. ຈຕ຺ຕາໂຣ ຂນ຺ຘາ ສິຍາ ນີວຣຓສມ຺ປຍຸຕ຺ຕາ, ສິຍາ ນີວຣຓວິປ຺ປຍຸຕ຺ຕາ. ຣູປກ຺ຂນ຺ໂຘ ນ ວຕ຺ຕພ຺ໂພ – ‘‘ນີວຣຓຎ຺ເຈວ ນີວຣຓິໂຍ ຈາ’’ຕິ, ‘‘ນີວຣຓິໂຍ ເຈວ ໂນ ຈ ນີວຣຓໍ’’. ຕໂຍ ຂນ຺ຘາ ນ ວຕ຺ຕພ຺ພາ – ‘‘ນີວຣຓາ ເຈວ ນີວຣຓິຍາ ຈາ’’ຕິ, ສິຍາ ນີວຣຓິຍາ ເຈວ ໂນ ຈ ນີວຣຓາ, ສິຍາ ນ ວຕ຺ຕພ຺ພາ – ‘‘ນີວຣຓິຍາ ເຈວ ໂນ ຈ ນີວຣຓາ’’ຕິ. ສງ຺ຂາຣກ຺ຂນ຺ໂຘ ສິຍາ ນີວຣຓຎ຺ເຈວ ນີວຣຓິໂຍ ຈ, ສິຍາ ນີວຣຓິໂຍ ເຈວ ໂນ ຈ ນີວຣຓໍ, ສິຍາ ນ ວຕ຺ຕພ຺ໂພ – ‘‘ນີວຣຓຎ຺ເຈວ ນີວຣຓິໂຍ ຈາ’’ຕິປິ, ‘‘ນີວຣຓິໂຍ ເຈວ ໂນ ຈ ນີວຣຓ’’ນ຺ຕິປິ. ຣູປກ຺ຂນ຺ໂຘ ນ ວຕ຺ຕພ຺ໂພ – ‘‘ນີວຣຓຎ຺ເຈວ ນີວຣຓສມ຺ປຍຸຕ຺ໂຕ ຈາ’’ຕິປິ, ‘‘ນີວຣຓສມ຺ປຍຸຕ຺ໂຕ ເຈວ ໂນ ຈ ນີວຣຓ’’ນ຺ຕິປິ. ຕໂຍ ຂນ຺ຘາ ນ ວຕ຺ຕພ຺ພາ – ‘‘ນີວຣຓາ ເຈວ ນີວຣຓສມ຺ປຍຸຕ຺ຕາ ຈາ’’ຕິ, ສິຍາ ນີວຣຓສມ຺ປຍຸຕ຺ຕາ ເຈວ ໂນ ຈ ນີວຣຓາ, ສິຍາ ນ ວຕ຺ຕພ຺ພາ – ‘‘ນີວຣຓສມ຺ປຍຸຕ຺ຕາ ເຈວ ໂນ ຈ ນີວຣຓາ’’ຕິ. ສງ຺ຂາຣກ຺ຂນ຺ໂຘ ສິຍາ ນີວຣຓຎ຺ເຈວ ນີວຣຓສມ຺ປຍຸຕ຺ໂຕ ຈ, ສິຍາ ນີວຣຓສມ຺ປຍຸຕ຺ໂຕ ເຈວ ໂນ ຈ ນີວຣຓໍ, ສິຍາ ນ ວຕ຺ຕພ຺ໂພ – ‘‘ນີວຣຓຎ຺ເຈວ ນີວຣຓສມ຺ປຍຸຕ຺ໂຕ ຈາ’’ຕິປິ, ‘‘ນີວຣຓສມ຺ປຍຸຕ຺ໂຕ ເຈວ ໂນ ຈ ນີວຣຓ’’ນ຺ຕິປິ. ຣູປກ຺ຂນ຺ໂຘ ນີວຣຓວິປ຺ປຍຸຕ຺ຕນີວຣຓິໂຍ. ຈຕ຺ຕາໂຣ ຂນ຺ຘາ ສິຍາ ນີວຣຓວິປ຺ປຍຸຕ຺ຕນີວຣຓິຍາ, ສິຍາ ນີວຣຓວິປ຺ປຍຸຕ຺ຕອນີວຣຓິຍາ, ສິຍາ ນ ວຕ຺ຕພ຺ພາ – ‘‘ນີວຣຓວິປ຺ປຍຸຕ຺ຕນີວຣຓິຍາ’’ຕິປິ, ‘‘ນີວຣຓວິປ຺ປຍຸຕ຺ຕອນີວຣຓິຍາ’’ຕິປິ.

ຈຕ຺ຕາໂຣ ຂນ຺ຘາ ໂນ ປຣາມາສາ. ສງ຺ຂາຣກ຺ຂນ຺ໂຘ ສິຍາ ປຣາມາໂສ, ສິຍາ ໂນ ປຣາມາໂສ. ຣູປກ຺ຂນ຺ໂຘ ປຣາມຏ຺ໂຐ. ຈຕ຺ຕາໂຣ ຂນ຺ຘາ ສິຍາ ປຣາມຏ຺ຐາ, ສິຍາ ອປຣາມຏ຺ຐາ. ຣູປກ຺ຂນ຺ໂຘ ປຣາມາສວິປ຺ປຍຸຕ຺ໂຕ. ຕໂຍ ຂນ຺ຘາ ສິຍາ ປຣາມາສສມ຺ປຍຸຕ຺ຕາ, ສິຍາ ປຣາມາສວິປ຺ປຍຸຕ຺ຕາ. ສງ຺ຂາຣກ຺ຂນ຺ໂຘ ສິຍາ ປຣາມາສສມ຺ປຍຸຕ຺ໂຕ, ສິຍາ ປຣາມາສວິປ຺ປຍຸຕ຺ໂຕ, ສິຍາ ນ ວຕ຺ຕພ຺ໂພ – ‘‘ປຣາມາສສມ຺ປຍຸຕ຺ໂຕ’’ຕິປິ, ‘‘ປຣາມາສວິປ຺ປຍຸຕ຺ໂຕ’’ຕິປິ. ຣູປກ຺ຂນ຺ໂຘ ນ ວຕ຺ຕພ຺ໂພ – ‘‘ປຣາມາໂສ ເຈວ ປຣາມຏ຺ໂຐ ຈາ’’ຕິ, ‘‘ປຣາມຏ຺ໂຐ ເຈວ ໂນ ຈ ປຣາມາໂສ’’. ຕໂຍ ຂນ຺ຘາ ນ ວຕ຺ຕພ຺ພາ – ‘‘ປຣາມາສາ ເຈວ ປຣາມຏ຺ຐາ ຈາ’’ຕິ, ສິຍາ ປຣາມຏ຺ຐາ ເຈວ ໂນ ຈ ປຣາມາສາ, ສິຍາ ນ ວຕ຺ຕພ຺ພາ – ‘‘ປຣາມຏ຺ຐາ ເຈວ ໂນ ຈ ປຣາມາສາ’’ຕິ. ສງ຺ຂາຣກ຺ຂນ຺ໂຘ ສິຍາ ປຣາມາໂສ ເຈວ ປຣາມຏ຺ໂຐ ຈ, ສິຍາ ປຣາມຏ຺ໂຐ ເຈວ ໂນ ຈ ປຣາມາໂສ, ສິຍາ ນ ວຕ຺ຕພ຺ໂພ – ‘‘ປຣາມາໂສ ເຈວ ປຣາມຏ຺ໂຐ ຈາ’’ຕິປິ, ‘‘ປຣາມຏ຺ໂຐ ເຈວ ໂນ ຈ ປຣາມາໂສ’’ຕິປິ. ຣູປກ຺ຂນ຺ໂຘ ປຣາມາສວິປ຺ປຍຸຕ຺ຕປຣາມຏ຺ໂຐ. ຈຕ຺ຕາໂຣ ຂນ຺ຘາ ສິຍາ ປຣາມາສວິປ຺ປຍຸຕ຺ຕປຣາມຏ຺ຐາ, ສິຍາ ປຣາມາສວິປ຺ປຍຸຕ຺ຕອປຣາມຏ຺ຐາ, ສິຍາ ນ ວຕ຺ຕພ຺ພາ – ‘‘ປຣາມາສວິປ຺ປຍຸຕ຺ຕປຣາມຏ຺ຐາ’’ຕິປິ, ‘‘ປຣາມາສວິປ຺ປຍຸຕ຺ຕອປຣາມຏ຺ຐາ’’ຕິປິ.

ຣູປກ຺ຂນ຺ໂຘ ອນາຣມ຺ມໂຓ. ຈຕ຺ຕາໂຣ ຂນ຺ຘາ ສາຣມ຺ມຓາ. ວິຎ຺ຎາຓກ຺ຂນ຺ໂຘ ຈິຕ຺ຕໍ. ຈຕ຺ຕາໂຣ ຂນ຺ຘາ ໂນ ຈິຕ຺ຕາ. ຕໂຍ ຂນ຺ຘາ ເຈຕສິກາ. ທ຺ເວ ຂນ຺ຘາ ອເຈຕສິກາ. ຕໂຍ ຂນ຺ຘາ ຈິຕ຺ຕສມ຺ປຍຸຕ຺ຕາ. ຣູປກ຺ຂນ຺ໂຘ ຈິຕ຺ຕວິປ຺ປຍຸຕ຺ໂຕ. ວິຎ຺ຎາຓກ຺ຂນ຺ໂຘ ນ ວຕ຺ຕພ຺ໂພ – ‘‘ຈິຕ຺ເຕນ ສມ຺ປຍຸຕ຺ໂຕ’’ຕິປິ, ‘‘ຈິຕ຺ເຕນ ວິປ຺ປຍຸຕ຺ໂຕ’’ຕິປິ. ຕໂຍ ຂນ຺ຘາ ຈິຕ຺ຕສໍສຏ຺ຐາ. ຣູປກ຺ຂນ຺ໂຘ ຈິຕ຺ຕວິສໍສຏ຺ໂຐ. ວິຎ຺ຎາຓກ຺ຂນ຺ໂຘ ນ ວຕ຺ຕພ຺ໂພ – ‘‘ຈິຕ຺ເຕນ ສໍສຏ຺ໂຐ’’ຕິປິ, ‘‘ຈິຕ຺ເຕນ ວິສໍສຏ຺ໂຐ’’ຕິປິ. ຕໂຍ ຂນ຺ຘາ ຈິຕ຺ຕສມຸຏ຺ຐານາ. ວິຎ຺ຎາຓກ຺ຂນ຺ໂຘ ໂນ ຈິຕ຺ຕສມຸຏ຺ຐາໂນ. ຣູປກ຺ຂນ຺ໂຘ ສິຍາ ຈິຕ຺ຕສມຸຏ຺ຐາໂນ, ສິຍາ ໂນ ຈິຕ຺ຕສມຸຏ຺ຐາໂນ. ຕໂຍ ຂນ຺ຘາ ຈິຕ຺ຕສຫຠຸໂນ. ວິຎ຺ຎາຓກ຺ຂນ຺ໂຘ ໂນ ຈິຕ຺ຕສຫຠູ. ຣູປກ຺ຂນ຺ໂຘ ສິຍາ ຈິຕ຺ຕສຫຠູ, ສິຍາ ໂນ ຈິຕ຺ຕສຫຠູ. ຕໂຍ ຂນ຺ຘາ ຈິຕ຺ຕານຸປຣິວຕ຺ຕິໂນ. ວິຎ຺ຎາຓກ຺ຂນ຺ໂຘ ໂນ ຈິຕ຺ຕານຸປຣິວຕ຺ຕິ. ຣູປກ຺ຂນ຺ໂຘ ສິຍາ ຈິຕ຺ຕານຸປຣິວຕ຺ຕິ, ສິຍາ ໂນ ຈິຕ຺ຕານຸປຣິວຕ຺ຕິ. ຕໂຍ ຂນ຺ຘາ ຈິຕ຺ຕສໍສຏ຺ຐສມຸຏ຺ຐານາ. ທ຺ເວ ຂນ຺ຘາ ໂນ ຈິຕ຺ຕສໍສຏ຺ຐສມຸຏ຺ຐານາ. ຕໂຍ ຂນ຺ຘາ ຈິຕ຺ຕສໍສຏ຺ຐສມຸຏ຺ຐານສຫຠຸໂນ. ທ຺ເວ ຂນ຺ຘາ ໂນ ຈິຕ຺ຕສໍສຏ຺ຐສມຸຏ຺ຐານສຫຠຸໂນ. ຕໂຍ ຂນ຺ຘາ ຈິຕ຺ຕສໍສຏ຺ຐສມຸຏ຺ຐານານຸປຣິວຕ຺ຕິໂນ. ທ຺ເວ ຂນ຺ຘາ ໂນ ຈິຕ຺ຕສໍສຏ຺ຐສມຸຏ຺ຐານານຸປຣິວຕ຺ຕິໂນ.

ວິຎ຺ຎາຓກ຺ຂນ຺ໂຘ ອຊ຺ຌຕ຺ຕິໂກ. ຕໂຍ ຂນ຺ຘາ ພາຫິຣາ. ຣູປກ຺ຂນ຺ໂຘ ສິຍາ ອຊ຺ຌຕ຺ຕິໂກ, ສິຍາ ພາຫິໂຣ. ຈຕ຺ຕາໂຣ ຂນ຺ຘາ ໂນ ອຸປາທາ. ຣູປກ຺ຂນ຺ໂຘ ສິຍາ ອຸປາທາ, ສິຍາ ໂນ ອຸປາທາ, ສິຍາ ອຸປາທິນ຺ນາ, ສິຍາ ອນຸປາທິນ຺ນາ. ຈຕ຺ຕາໂຣ ຂນ຺ຘາ ໂນ ອຸປາທານາ. ສງ຺ຂາຣກ຺ຂນ຺ໂຘ ສິຍາ ອຸປາທານໍ, ສິຍາ ໂນ ອຸປາທານໍ. ຣູປກ຺ຂນ຺ໂຘ ອຸປາທານິໂຍ. ຈຕ຺ຕາໂຣ ຂນ຺ຘາ ສິຍາ ອຸປາທານິຍາ, ສິຍາ ອນຸປາທານິຍາ. ຣູປກ຺ຂນ຺ໂຘ ອຸປາທານວິປ຺ປຍຸຕ຺ໂຕ. ຈຕ຺ຕາໂຣ ຂນ຺ຘາ ສິຍາ ອຸປາທານສມ຺ປຍຸຕ຺ຕາ, ສິຍາ ອຸປາທານວິປ຺ປຍຸຕ຺ຕາ. ຣູປກ຺ຂນ຺ໂຘ ນ ວຕ຺ຕພ຺ໂພ – ‘‘ອຸປາທານຎ຺ເຈວ ອຸປາທານິໂຍ ຈາ’’ຕິ, ‘‘ອຸປາທານິໂຍ ເຈວ ໂນ ຈ ອຸປາທານໍ’’. ຕໂຍ ຂນ຺ຘາ ນ ວຕ຺ຕພ຺ພາ – ‘‘ອຸປາທານຎ຺ເຈວ ອຸປາທານິຍາ ຈາ’’ຕິ, ສິຍາ ອຸປາທານິຍາ ເຈວ ໂນ ຈ ອຸປາທານາ, ສິຍາ ນ ວຕ຺ຕພ຺ພາ – ‘‘ອຸປາທານິຍາ ເຈວ ໂນ ຈ ອຸປາທານາ’’ຕິ. ສງ຺ຂາຣກ຺ຂນ຺ໂຘ ສິຍາ ອຸປາທານຎ຺ເຈວ ອຸປາທານິໂຍ ຈ, ສິຍາ ອຸປາທານິໂຍ ເຈວ ໂນ ຈ ອຸປາທານໍ, ສິຍາ ນ ວຕ຺ຕພ຺ໂພ – ‘‘ອຸປາທານຎ຺ເຈວ ອຸປາທານິໂຍ ຈາ’’ຕິປິ, ‘‘ອຸປາທານິໂຍ ເຈວ ໂນ ຈ ອຸປາທານ’’ນ຺ຕິປິ. ຣູປກ຺ຂນ຺ໂຘ ນ ວຕ຺ຕພ຺ໂພ – ‘‘ອຸປາທານຎ຺ເຈວ ອຸປາທານສມ຺ປຍຸຕ຺ໂຕ ຈາ’’ຕິປິ, ‘‘ອຸປາທານສມ຺ປຍຸຕ຺ໂຕ ເຈວ ໂນ ຈ ອຸປາທານ’’ນ຺ຕິປິ. ຕໂຍ ຂນ຺ຘາ ນ ວຕ຺ຕພ຺ພາ – ‘‘ອຸປາທານາ ເຈວ ອຸປາທານສມ຺ປຍຸຕ຺ຕາ ຈາ’’ຕິ, ສິຍາ ອຸປາທານສມ຺ປຍຸຕ຺ຕາ ເຈວ ໂນ ຈ ອຸປາທານາ, ສິຍາ ນ ວຕ຺ຕພ຺ພາ – ‘‘ອຸປາທານສມ຺ປຍຸຕ຺ຕາ ເຈວ ໂນ ຈ ອຸປາທານາ’’ຕິ. ສງ຺ຂາຣກ຺ຂນ຺ໂຘ ສິຍາ ອຸປາທານຎ຺ເຈວ ອຸປາທານສມ຺ປຍຸຕ຺ໂຕ ຈ, ສິຍາ ອຸປາທານສມ຺ປຍຸຕ຺ໂຕ ເຈວ ໂນ ຈ ອຸປາທານໍ, ສິຍາ ນ ວຕ຺ຕພ຺ໂພ – ‘‘ອຸປາທານຎ຺ເຈວ ອຸປາທານສມ຺ປຍຸຕ຺ໂຕ ຈາ’’ຕິປິ, ‘‘ອຸປາທານສມ຺ປຍຸຕ຺ໂຕ ເຈວ ໂນ ຈ ອຸປາທານ’’ນ຺ຕິປິ. ຣູປກ຺ຂນ຺ໂຘ ອຸປາທານວິປ຺ປຍຸຕ຺ຕອຸປາທານິໂຍ. ຈຕ຺ຕາໂຣ ຂນ຺ຘາ ສິຍາ ອຸປາທານວິປ຺ປຍຸຕ຺ຕອຸປາທານິຍາ, ສິຍາ ອຸປາທານວິປ຺ປຍຸຕ຺ຕອນຸປາທານິຍາ, ສິຍາ ນ ວຕ຺ຕພ຺ພາ – ‘‘ອຸປາທານວິປ຺ປຍຸຕ຺ຕອຸປາທານິຍາ’’ຕິປິ, ‘‘ອຸປາທານວິປ຺ປຍຸຕ຺ຕອນຸປາທານິຍາ’’ຕິປິ.

ຈຕ຺ຕາໂຣ ຂນ຺ຘາ ໂນ ກິເລສາ. ສງ຺ຂາຣກ຺ຂນ຺ໂຘ ສິຍາ ກິເລໂສ, ສິຍາ ໂນ ກິເລໂສ. ຣູປກ຺ຂນ຺ໂຘ ສໍກິເລສິໂກ. ຈຕ຺ຕາໂຣ ຂນ຺ຘາ ສິຍາ ສໍກິເລສິກາ, ສິຍາ ອສໍກິເລສິກາ. ຣູປກ຺ຂນ຺ໂຘ ອສໍກິລິຏ຺ໂຐ. ຈຕ຺ຕາໂຣ ຂນ຺ຘາ ສິຍາ ສໍກິລິຏ຺ຐາ, ສິຍາ ອສໍກິລິຏ຺ຐາ. ຣູປກ຺ຂນ຺ໂຘ ກິເລສວິປ຺ປຍຸຕ຺ໂຕ. ຈຕ຺ຕາໂຣ ຂນ຺ຘາ ສິຍາ ກິເລສສມ຺ປຍຸຕ຺ຕາ, ສິຍາ ກິເລສວິປ຺ປຍຸຕ຺ຕາ. ຣູປກ຺ຂນ຺ໂຘ ນ ວຕ຺ຕພ຺ໂພ – ‘‘ກິເລໂສ ເຈວ ສໍກິເລສິໂກ ຈາ’’ຕິ, ‘‘ສໍກິເລສິໂກ ເຈວ ໂນ ຈ ກິເລໂສ’’. ຕໂຍ ຂນ຺ຘາ ນ ວຕ຺ຕພ຺ພາ – ‘‘ກິເລສາ ເຈວ ສໍກິເລສິກາ ຈາ’’ຕິ, ສິຍາ ສໍກິເລສິກາ ເຈວ ໂນ ຈ ກິເລສາ, ສິຍາ ນ ວຕ຺ຕພ຺ພາ – ‘‘ສໍກິເລສິກາ ເຈວ ໂນ ຈ ກິເລສາ’’ຕິ. ສງ຺ຂາຣກ຺ຂນ຺ໂຘ ສິຍາ ກິເລໂສ ເຈວ ສໍກິເລສິໂກ ຈ, ສິຍາ ສໍກິເລສິໂກ ເຈວ ໂນ ຈ ກິເລໂສ, ສິຍາ ນ ວຕ຺ຕພ຺ໂພ – ‘‘ກິເລໂສ ເຈວ ສໍກິເລສິໂກ ຈາ’’ຕິປິ, ‘‘ສໍກິເລສິໂກ ເຈວ ໂນ ຈ ກິເລໂສ’’ຕິປິ. ຣູປກ຺ຂນ຺ໂຘ ນ ວຕ຺ຕພ຺ໂພ – ‘‘ກິເລໂສ ເຈວ ສໍກິລິຏ຺ໂຐ ຈາ’’ຕິປິ, ‘‘ສໍກິລິຏ຺ໂຐ ເຈວ ໂນ ຈ ກິເລໂສ’’ຕິປິ. ຕໂຍ ຂນ຺ຘາ ນ ວຕ຺ຕພ຺ພາ – ‘‘ກິເລໂສ ເຈວ ສໍກິລິຏ຺ຐາ ຈາ’’ຕິ, ສິຍາ ສໍກິລິຏ຺ຐາ ເຈວ ໂນ ຈ ກິເລສາ, ສິຍາ ນ ວຕ຺ຕພ຺ພາ – ‘‘ສໍກິລິຏ຺ຐາ ເຈວ ໂນ ຈ ກິເລສາ’’ຕິ. ສງ຺ຂາຣກ຺ຂນ຺ໂຘ ສິຍາ ກິເລໂສ ເຈວ ສໍກິລິຏ຺ໂຐ ຈ, ສິຍາ ສໍກິລິຏ຺ໂຐ ເຈວ ໂນ ຈ ກິເລໂສ, ສິຍາ ນ ວຕ຺ຕພ຺ໂພ – ‘‘ກິເລໂສ ເຈວ ສໍກິລິຏ຺ໂຐ ຈາ’’ຕິປິ, ‘‘ສໍກິລິຏ຺ໂຐ ເຈວ ໂນ ຈ ກິເລໂສ’’ຕິປິ.

ຣູປກ຺ຂນ຺ໂຘ ນ ວຕ຺ຕພ຺ໂພ – ‘‘ກິເລໂສ ເຈວ ກິເລສສມ຺ປຍຸຕ຺ໂຕ ຈາ’’ຕິປິ, ‘‘ກິເລສສມ຺ປຍຸຕ຺ໂຕ ເຈວ ໂນ ຈ ກິເລໂສ’’ຕິປິ. ຕໂຍ ຂນ຺ຘາ ນ ວຕ຺ຕພ຺ພາ – ‘‘ກິເລສາ ເຈວ ກິເລສສມ຺ປຍຸຕ຺ຕາ ຈາ’’ຕິ, ສິຍາ ກິເລສສມ຺ປຍຸຕ຺ຕາ ເຈວ ໂນ ຈ ກິເລສາ, ສິຍາ ນ ວຕ຺ຕພ຺ພາ – ກິເລສສມ຺ປຍຸຕ຺ຕາ ເຈວ ໂນ ຈ ກິເລສາ’’ຕິ. ສງ຺ຂາຣກ຺ຂນ຺ໂຘ ສິຍາ ກິເລໂສ ເຈວ ກິເລສສມ຺ປຍຸຕ຺ໂຕ ຈ, ສິຍາ ກິເລສສມ຺ປຍຸຕ຺ໂຕ ເຈວ ໂນ ຈ ກິເລໂສ, ສິຍາ ນ ວຕ຺ຕພ຺ໂພ – ‘‘ກິເລໂສ ເຈວ ກິເລສສມ຺ປຍຸຕ຺ໂຕ ຈາ’’ຕິປິ, ‘‘ກິເລສສມ຺ປຍຸຕ຺ໂຕ ເຈວ ໂນ ຈ ກິເລໂສ’’ຕິປິ. ຣູປກ຺ຂນ຺ໂຘ ກິເລສວິປ຺ປຍຸຕ຺ຕສໍກິເລສິໂກ. ຈຕ຺ຕາໂຣ ຂນ຺ຘາ ສິຍາ ກິເລສວິປ຺ປຍຸຕ຺ຕສໍກິເລສິກາ, ສິຍາ ກິເລສວິປ຺ປຍຸຕ຺ຕອສໍກິເລສິກາ, ສິຍາ ນ ວຕ຺ຕພ຺ພາ – ‘‘ກິເລສວິປ຺ປຍຸຕ຺ຕສໍກິເລສິກາ’’ຕິປິ, ‘‘ກິເລສວິປ຺ປຍຸຕ຺ຕອສໍກິເລສິກາ’’ຕິປິ.

ຣູປກ຺ຂນ຺ໂຘ ນ ທສ຺ສເນນ ປຫາຕພ຺ໂພ. ຈຕ຺ຕາໂຣ ຂນ຺ຘາ ສິຍາ ທສ຺ສເນນ ປຫາຕພ຺ພາ, ສິຍາ ນ ທສ຺ສເນນ ປຫາຕພ຺ພາ. ຣູປກ຺ຂນ຺ໂຘ ນ ຠາວນາຍ ປຫາຕພ຺ໂພ. ຈຕ຺ຕາໂຣ ຂນ຺ຘາ ສິຍາ ຠາວນາຍ ປຫາຕພ຺ພາ, ສິຍາ ນ ຠາວນາຍ ປຫາຕພ຺ພາ. ຣູປກ຺ຂນ຺ໂຘ ນ ທສ຺ສເນນ ປຫາຕພ຺ພເຫຕຸໂກ. ຈຕ຺ຕາໂຣ ຂນ຺ຘາ ສິຍາ ທສ຺ສເນນ ປຫາຕພ຺ພເຫຕຸກາ, ສິຍາ ນ ທສ຺ສເນນ ປຫາຕພ຺ພເຫຕຸກາ. ຣູປກ຺ຂນ຺ໂຘ ນ ຠາວນາຍ ປຫາຕພ຺ພເຫຕຸໂກ. ຈຕ຺ຕາໂຣ ຂນ຺ຘາ ສິຍາ ຠາວນາຍ ປຫາຕພ຺ພເຫຕຸກາ, ສິຍາ ນ ຠາວນາຍ ປຫາຕພ຺ພເຫຕຸກາ. ຣູປກ຺ຂນ຺ໂຘ ອວິຕກ຺ໂກ. ຈຕ຺ຕາໂຣ ຂນ຺ຘາ ສິຍາ ສວິຕກ຺ກາ, ສິຍາ ອວິຕກ຺ກາ. ຣູປກ຺ຂນ຺ໂຘ ອວິຈາໂຣ. ຈຕ຺ຕາໂຣ ຂນ຺ຘາ ສິຍາ ສວິຈາຣາ, ສິຍາ ອວິຈາຣາ. ຣູປກ຺ຂນ຺ໂຘ ອປ຺ປີຕິໂກ, ຈຕ຺ຕາໂຣ ຂນ຺ຘາ ສິຍາ ສປ຺ປີຕິກາ, ສິຍາ ອປ຺ປີຕິກາ. ຣູປກ຺ຂນ຺ໂຘ ນ ປີຕິສຫຄໂຕ. ຈຕ຺ຕາໂຣ ຂນ຺ຘາ ສິຍາ ປີຕິສຫຄຕາ, ສິຍາ ນ ປີຕິສຫຄຕາ. ທ຺ເວ ຂນ຺ຘາ ນ ສຸຂສຫຄຕາ. ຕໂຍ ຂນ຺ຘາ ສິຍາ ສຸຂສຫຄຕາ, ສິຍາ ນ ສຸຂສຫຄຕາ. ທ຺ເວ ຂນ຺ຘາ ນ ອຸເປກ຺ຂາສຫຄຕາ. ຕໂຍ ຂນ຺ຘາ ສິຍາ ອຸເປກ຺ຂາສຫຄຕາ, ສິຍາ ນ ອຸເປກ຺ຂາສຫຄຕາ.

ຣູປກ຺ຂນ຺ໂຘ ກາມາວຈໂຣ. ຈຕ຺ຕາໂຣ ຂນ຺ຘາ ສິຍາ ກາມາວຈຣາ, ສິຍາ ນ ກາມາວຈຣາ. ຣູປກ຺ຂນ຺ໂຘ ນ ຣູປາວຈໂຣ. ຈຕ຺ຕາໂຣ ຂນ຺ຘາ ສິຍາ ຣູປາວຈຣາ, ສິຍາ ນ ຣູປາວຈຣາ. ຣູປກ຺ຂນ຺ໂຘ ນ ອຣູປາວຈໂຣ. ຈຕ຺ຕາໂຣ ຂນ຺ຘາ ສິຍາ ອຣູປາວຈຣາ, ສິຍາ ນ ອຣູປາວຈຣາ. ຣູປກ຺ຂນ຺ໂຘ ປຣິຍາປນ຺ໂນ. ຈຕ຺ຕາໂຣ ຂນ຺ຘາ ສິຍາ ປຣິຍາປນ຺ນາ, ສິຍາ ອປຣິຍາປນ຺ນາ. ຣູປກ຺ຂນ຺ໂຘ ອນິຍ຺ຍານິໂກ. ຈຕ຺ຕາໂຣ ຂນ຺ຘາ ສິຍາ ນິຍ຺ຍານິກາ, ສິຍາ ອນິຍ຺ຍານິກາ. ຣູປກ຺ຂນ຺ໂຘ ອນິຍໂຕ. ຈຕ຺ຕາໂຣ ຂນ຺ຘາ ສິຍາ ນິຍຕາ, ສິຍາ ອນິຍຕາ. ຣູປກ຺ຂນ຺ໂຘ ສອຸຕ຺ຕໂຣ. ຈຕ຺ຕາໂຣ ຂນ຺ຘາ ສິຍາ ສອຸຕ຺ຕຣາ, ສິຍາ ອນຸຕ຺ຕຣາ. ຣູປກ຺ຂນ຺ໂຘ ອຣໂຓ. ຈຕ຺ຕາໂຣ ຂນ຺ຘາ ສິຍາ ສຣຓາ, ສິຍາ ອຣຓາຕິ.

ປຎ຺ຫາປຸຈ຺ຉກໍ.

ຂນ຺ຘວິຠງ຺ໂຄ ນິຏ຺ຐິໂຕ.