໕. ວິຎ຺ຎາຓກ຺ຂນ຺ໂຘ

໒໖. ຕຕ຺ຖ ກຕໂມ ວິຎ຺ຎາຓກ຺ຂນ຺ໂຘ? ຍໍ ກິຎ຺ຈິ ວິຎ຺ຎາຓໍ ອຕີຕານາຄຕປຈ຺ຈຸປ຺ປນ຺ນໍ ອຊ຺ຌຕ຺ຕໍ ວາ ພຫິທ຺ຘາ ວາ ໂອຬາຣິກໍ ວາ ສຸຂຸມໍ ວາ ຫີນໍ ວາ ປຓີຕໍ ວາ ຍໍ ທູເຣ ສນ຺ຕິເກ ວາ, ຕເທກຊ຺ຌໍ ອຠິສຎ຺ຎູຫິຕ຺ວາ ອຠິສງ຺ຂິປິຕ຺ວາ – ອຍໍ ວຸຈ຺ຈຕິ ວິຎ຺ຎາຓກ຺ຂນ຺ໂຘ.

໒໗. ຕຕ຺ຖ ກຕມໍ ວິຎ຺ຎາຓໍ ອຕີຕໍ? ຍໍ ວິຎ຺ຎາຓໍ ອຕີຕໍ ນິຣຸທ຺ຘໍ ວິຄຕໍ ວິປຣິຓຕໍ ອຕ຺ຖງ຺ຄຕໍ ອພ຺ຠຕ຺ຖງ຺ຄຕໍ ອຸປ຺ປຊ຺ຊິຕ຺ວາ ວິຄຕໍ ອຕີຕໍ ອຕີຕໍເສນ ສງ຺ຄຫິຕໍ, ຈກ຺ຂຸວິຎ຺ຎາຓໍ ໂສຕວິຎ຺ຎາຓໍ ຆານວິຎ຺ຎາຓໍ ຊິວ຺ຫາວິຎ຺ຎາຓໍ ກາຍວິຎ຺ຎາຓໍ ມໂນວິຎ຺ຎາຓໍ – ອິທໍ ວຸຈ຺ຈຕິ ວິຎ຺ຎາຓໍ ອຕີຕໍ.

ຕຕ຺ຖ ກຕມໍ ວິຎ຺ຎາຓໍ ອນາຄຕໍ? ຍໍ ວິຎ຺ຎາຓໍ ອຊາຕໍ ອຠູຕໍ ອສຎ຺ຊາຕໍ ອນິພ຺ພຕ຺ຕໍ ອນຠິນິພ຺ພຕ຺ຕໍ ອປາຕຸຠູຕໍ ອນຸປ຺ປນ຺ນໍ ອສມຸປ຺ປນ຺ນໍ ອນຸຏ຺ຐິຕໍ ອສມຸຏ຺ຐິຕໍ ອນາຄຕໍ ອນາຄຕໍເສນ ສງ຺ຄຫິຕໍ, ຈກ຺ຂຸວິຎ຺ຎາຓໍ ໂສຕວິຎ຺ຎາຓໍ ຆານວິຎ຺ຎາຓໍ ຊິວ຺ຫາວິຎ຺ຎາຓໍ ກາຍວິຎ຺ຎາຓໍ ມໂນວິຎ຺ຎາຓໍ – ອິທໍ ວຸຈ຺ຈຕິ ວິຎ຺ຎາຓໍ ອນາຄຕໍ.

ຕຕ຺ຖ ກຕມໍ ວິຎ຺ຎາຓໍ ປຈ຺ຈຸປ຺ປນ຺ນໍ? ຍໍ ວິຎ຺ຎາຓໍ ຊາຕໍ ຠູຕໍ ສຎ຺ຊາຕໍ ນິພ຺ພຕ຺ຕໍ ອຠິນິພ຺ພຕ຺ຕໍ ປາຕຸຠູຕໍ ອຸປ຺ປນ຺ນໍ ສມຸປ຺ປນ຺ນໍ ອຸຏ຺ຐິຕໍ ສມຸຏ຺ຐິຕໍ ປຈ຺ຈຸປ຺ປນ຺ນໍ ປຈ຺ຈຸປ຺ປນ຺ນໍເສນ ສງ຺ຄຫິຕໍ, ຈກ຺ຂຸວິຎ຺ຎາຓໍ ໂສຕວິຎ຺ຎາຓໍ ຆານວິຎ຺ຎາຓໍ ຊິວ຺ຫາວິຎ຺ຎາຓໍ ກາຍວິຎ຺ຎາຓໍ ມໂນວິຎ຺ຎາຓໍ – ອິທໍ ວຸຈ຺ຈຕິ ວິຎ຺ຎາຓໍ ປຈ຺ຈຸປ຺ປນ຺ນໍ.

໒໘. ຕຕ຺ຖ ກຕມໍ ວິຎ຺ຎາຓໍ ອຊ຺ຌຕ຺ຕໍ? ຍໍ ວິຎ຺ຎາຓໍ ເຕສໍ ເຕສໍ ສຕ຺ຕານໍ ອຊ຺ຌຕ຺ຕໍ ປຈ຺ຈຕ຺ຕໍ ນິຍກໍ ປາຏິປຸຄ຺ຄລິກໍ ອຸປາທິນ຺ນໍ, ຈກ຺ຂຸວິຎ຺ຎາຓໍ ໂສຕວິຎ຺ຎາຓໍ ຆານວິຎ຺ຎາຓໍ ຊິວ຺ຫາວິຎ຺ຎາຓໍ ກາຍວິຎ຺ຎາຓໍ ມໂນວິຎ຺ຎາຓໍ – ອິທໍ ວຸຈ຺ຈຕິ ວິຎ຺ຎາຓໍ ອຊ຺ຌຕ຺ຕໍ.

ຕຕ຺ຖ ກຕມໍ ວິຎ຺ຎາຓໍ ພຫິທ຺ຘາ? ຍໍ ວິຎ຺ຎາຓໍ ເຕສໍ ເຕສໍ ປຣສຕ຺ຕານໍ ປຣປຸຄ຺ຄລານໍ ອຊ຺ຌຕ຺ຕໍ ປຈ຺ຈຕ຺ຕໍ ນິຍກໍ ປາຏິປຸຄ຺ຄລິກໍ ອຸປາທິນ຺ນໍ, ຈກ຺ຂຸວິຎ຺ຎາຓໍ ໂສຕວິຎ຺ຎາຓໍ ຆານວິຎ຺ຎາຓໍ ຊິວ຺ຫາວິຎ຺ຎາຓໍ ກາຍວິຎ຺ຎາຓໍ ມໂນວິຎ຺ຎາຓໍ – ອິທໍ ວຸຈ຺ຈຕິ ວິຎ຺ຎາຓໍ ພຫິທ຺ຘາ.

໒໙. ຕຕ຺ຖ ກຕມໍ ວິຎ຺ຎາຓໍ ໂອຬາຣິກໍ ສຸຂຸມໍ? ອກຸສລໍ ວິຎ຺ຎາຓໍ ໂອຬາຣິກໍ, ກຸສລາພ຺ຍາກຕາ ວິຎ຺ຎາຓາ ສຸຂຸມາ. ກຸສລາກຸສລາ ວິຎ຺ຎາຓາ ໂອຬາຣິກາ, ອພ຺ຍາກຕໍ ວິຎ຺ຎາຓໍ ສຸຂຸມໍ. ທຸກ຺ຂາຍ ເວທນາຍ ສມ຺ປຍຸຕ຺ຕໍ ວິຎ຺ຎາຓໍ ໂອຬາຣິກໍ, ສຸຂາຍ ຈ ອທຸກ຺ຂມສຸຂາຍ ຈ ເວທນາຫິ ສມ຺ປຍຸຕ຺ຕາ ວິຎ຺ຎາຓາ ສຸຂຸມາ. ສຸຂທຸກ຺ຂາຫິ ເວທນາຫິ ສມ຺ປຍຸຕ຺ຕາ ວິຎ຺ຎາຓາ ໂອຬາຣິກາ, ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕໍ ວິຎ຺ຎາຓໍ ສຸຂຸມໍ. ອສມາປນ຺ນສ຺ສ ວິຎ຺ຎາຓໍ ໂອຬາຣິກໍ, ສມາປນ຺ນສ຺ສ ວິຎ຺ຎາຓໍ ສຸຂຸມໍ. ສາສວໍ ວິຎ຺ຎາຓໍ ໂອຬາຣິກໍ, ອນາສວໍ ວິຎ຺ຎາຓໍ ສຸຂຸມໍ. ຕໍ ຕໍ ວາ ປນ ວິຎ຺ຎາຓໍ ອຸປາທາຍຸປາທາຍ ວິຎ຺ຎາຓໍ ໂອຬາຣິກໍ ສຸຂຸມໍ ທຏ຺ຐພ຺ພໍ.

໓໐. ຕຕ຺ຖ ກຕມໍ ວິຎ຺ຎາຓໍ ຫີນໍ ປຓີຕໍ? ອກຸສລໍ ວິຎ຺ຎາຓໍ ຫີນໍ, ກຸສລາພ຺ຍາກຕາ ວິຎ຺ຎາຓາ ປຓີຕາ. ກຸສລາກຸສລາ ວິຎ຺ຎາຓາ ຫີນາ, ອພ຺ຍາກຕໍ ວິຎ຺ຎາຓໍ ປຓີຕໍ. ທຸກ຺ຂາຍ ເວທນາຍ ສມ຺ປຍຸຕ຺ຕໍ ວິຎ຺ຎາຓໍ ຫີນໍ, ສຸຂາຍ ຈ ອທຸກ຺ຂມສຸຂາຍ ຈ ເວທນາຫິ ສມ຺ປຍຸຕ຺ຕາ ວິຎ຺ຎາຓາ ປຓີຕາ. ສຸຂທຸກ຺ຂາຫິ ເວທນາຫິ ສມ຺ປຍຸຕ຺ຕາ ວິຎ຺ຎາຓາ ຫີນາ, ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕໍ ວິຎ຺ຎາຓໍ ປຓີຕໍ. ອສມາປນ຺ນສ຺ສ ວິຎ຺ຎາຓໍ ຫີນໍ, ສມາປນ຺ນສ຺ສ ວິຎ຺ຎາຓໍ ປຓີຕໍ. ສາສວໍ ວິຎ຺ຎາຓໍ ຫີນໍ, ອນາສວໍ ວິຎ຺ຎາຓໍ ປຓີຕໍ. ຕໍ ຕໍ ວາ ປນ ວິຎ຺ຎາຓໍ ອຸປາທາຍຸປາທາຍ ວິຎ຺ຎາຓໍ ຫີນໍ ປຓີຕໍ ທຏ຺ຐພ຺ພໍ.

໓໑. ຕຕ຺ຖ ກຕມໍ ວິຎ຺ຎາຓໍ ທູເຣ? ອກຸສລໍ ວິຎ຺ຎາຓໍ ກຸສລາພ຺ຍາກເຕຫິ ວິຎ຺ຎາເຓຫິ ທູເຣ; ກຸສລາພ຺ຍາກຕາ ວິຎ຺ຎາຓາ ອກຸສລາ ວິຎ຺ຎາຓາ ທູເຣ; ກຸສລໍ ວິຎ຺ຎາຓໍ ອກຸສລາພ຺ຍາກເຕຫິ ວິຎ຺ຎາເຓຫິ ທູເຣ; ອກຸສລາພ຺ຍາກຕາ ວິຎ຺ຎາຓາ ກຸສລາ ວິຎ຺ຎາຓາ ທູເຣ; ອພ຺ຍາກຕໍ ວິຎ຺ຎາຓໍ ກຸສລາກຸສເລຫິ ວິຎ຺ຎາເຓຫິ ທູເຣ; ກຸສລາກຸສລາ ວິຎ຺ຎາຓາ ອພ຺ຍາກຕາ ວິຎ຺ຎາຓາ ທູເຣ. ທຸກ຺ຂາຍ ເວທນາຍ ສມ຺ປຍຸຕ຺ຕໍ ວິຎ຺ຎາຓໍ ສຸຂາຍ ຈ ອທຸກ຺ຂມສຸຂາຍ ຈ ເວທນາຫິ ສມ຺ປຍຸຕ຺ເຕຫິ ວິຎ຺ຎາເຓຫິ ທູເຣ; ສຸຂາຍ ຈ ອທຸກ຺ຂມສຸຂາຍ ຈ ເວທນາຫິ ສມ຺ປຍຸຕ຺ຕາ ວິຎ຺ຎາຓາ ທຸກ຺ຂາຍ ເວທນາຍ ສມ຺ປຍຸຕ຺ຕາ ວິຎ຺ຎາຓາ ທູເຣ; ສຸຂາຍ ເວທນາຍ ສມ຺ປຍຸຕ຺ຕໍ ວິຎ຺ຎາຓໍ ທຸກ຺ຂາຍ ຈ ອທຸກ຺ຂມສຸຂາຍ ຈ ເວທນາຫິ ສມ຺ປຍຸຕ຺ເຕຫິ ວິຎ຺ຎາເຓຫິ ທູເຣ; ທຸກ຺ຂາຍ ຈ ອທຸກ຺ຂມສຸຂາຍ ຈ ເວທນາຫິ ສມ຺ປຍຸຕ຺ຕາ ວິຎ຺ຎາຓາ ສຸຂາຍ ເວທນາຍ ສມ຺ປຍຸຕ຺ຕາ ວິຎ຺ຎາຓາ ທູເຣ; ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕໍ ວິຎ຺ຎາຓໍ ສຸຂທຸກ຺ຂາຫິ ເວທນາຫິ ສມ຺ປຍຸຕ຺ເຕຫິ ວິຎ຺ຎາເຓຫິ ທູເຣ; ສຸຂທຸກ຺ຂາຫິ ເວທນາຫິ ສມ຺ປຍຸຕ຺ຕາ ວິຎ຺ຎາຓາ ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕາ ວິຎ຺ຎາຓາ ທູເຣ. ອສມາປນ຺ນສ຺ສ ວິຎ຺ຎາຓໍ ສມາປນ຺ນສ຺ສ ວິຎ຺ຎາຓາ ທູເຣ; ສມາປນ຺ນສ຺ສ ວິຎ຺ຎາຓໍ ອສມາປນ຺ນສ຺ສ ວິຎ຺ຎາຓາ ທູເຣ. ສາສວໍ ວິຎ຺ຎາຓໍ ອນາສວາ ວິຎ຺ຎາຓາ ທູເຣ; ອນາສວໍ ວິຎ຺ຎາຓໍ ສາສວາ ວິຎ຺ຎາຓາ ທູເຣ – ອິທໍ ວຸຈ຺ຈຕິ ວິຎ຺ຎາຓໍ ທູເຣ.

ຕຕ຺ຖ ກຕມໍ ວິຎ຺ຎາຓໍ ສນ຺ຕິເກ? ອກຸສລໍ ວິຎ຺ຎາຓໍ ອກຸສລສ຺ສ ວິຎ຺ຎາຓສ຺ສ ສນ຺ຕິເກ; ກຸສລໍ ວິຎ຺ຎາຓໍ ກຸສລສ຺ສ ວິຎ຺ຎາຓສ຺ສ ສນ຺ຕິເກ; ອພ຺ຍາກຕໍ ວິຎ຺ຎາຓໍ ອພ຺ຍາກຕສ຺ສ ວິຎ຺ຎາຓສ຺ສ ສນ຺ຕິເກ. ທຸກ຺ຂາຍ ເວທນາຍ ສມ຺ປຍຸຕ຺ຕໍ ວິຎ຺ຎາຓໍ ທຸກ຺ຂາຍ ເວທນາຍ ສມ຺ປຍຸຕ຺ຕສ຺ສ ວິຎ຺ຎາຓສ຺ສ ສນ຺ຕິເກ; ສຸຂາຍ ເວທນາຍ ສມ຺ປຍຸຕ຺ຕໍ ວິຎ຺ຎາຓໍ ສຸຂາຍ ເວທນາຍ ສມ຺ປຍຸຕ຺ຕສ຺ສ ວິຎ຺ຎາຓສ຺ສ ສນ຺ຕິເກ; ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕໍ ວິຎ຺ຎາຓໍ ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕສ຺ສ ວິຎ຺ຎາຓສ຺ສ ສນ຺ຕິເກ. ອສມາປນ຺ນສ຺ສ ວິຎ຺ຎາຓໍ ອສມາປນ຺ນສ຺ສ ວິຎ຺ຎາຓສ຺ສ ສນ຺ຕິເກ; ສມາປນ຺ນສ຺ສ ວິຎ຺ຎາຓໍ ສມາປນ຺ນສ຺ສ ວິຎ຺ຎາຓສ຺ສ ສນ຺ຕິເກ. ສາສວໍ ວິຎ຺ຎາຓໍ ສາສວສ຺ສ ວິຎ຺ຎາຓສ຺ສ ສນ຺ຕິເກ; ອນາສວໍ ວິຎ຺ຎາຓໍ ອນາສວສ຺ສ ວິຎ຺ຎາຓສ຺ສ ສນ຺ຕິເກ – ອິທໍ ວຸຈ຺ຈຕິ ວິຎ຺ຎາຓໍ ສນ຺ຕິເກ. ຕໍ ຕໍ ວາ ປນ ວິຎ຺ຎາຓໍ ອຸປາທາຍຸປາທາຍ ວິຎ຺ຎາຓໍ ທູເຣ ສນ຺ຕິເກ ທຏ຺ຐພ຺ພໍ.

ສຸຕ຺ຕນ຺ຕຠາຊນີຍໍ.