໓. ສຎ຺ຎາກ຺ຂນ຺ໂຘ

໑໔. ຕຕ຺ຖ ກຕໂມ ສຎ຺ຎາກ຺ຂນ຺ໂຘ? ຍາ ກາຈິ ສຎ຺ຎາ ອຕີຕານາຄຕປຈ຺ຈຸປ຺ປນ຺ນາ ອຊ຺ຌຕ຺ຕາ ວາ ພຫິທ຺ຘາ ວາ ໂອຬາຣິກາ ວາ ສຸຂຸມາ ວາ ຫີນາ ວາ ປຓີຕາ ວາ ຍາ ທູເຣ ສນ຺ຕິເກ ວາ ຕເທກຊ຺ຌໍ ອຠິສຎ຺ຎູຫິຕ຺ວາ ອຠິສງ຺ຂິປິຕ຺ວາ – ອຍໍ ວຸຈ຺ຈຕິ ສຎ຺ຎາກ຺ຂນ຺ໂຘ.

໑໕. ຕຕ຺ຖ ກຕມາ ສຎ຺ຎາ ອຕີຕາ? ຍາ ສຎ຺ຎາ ອຕີຕາ ນິຣຸທ຺ຘາ ວິຄຕາ ວິປຣິຓຕາ ອຕ຺ຖງ຺ຄຕາ ອພ຺ຠຕ຺ຖງ຺ຄຕາ ອຸປ຺ປຊ຺ຊິຕ຺ວາ ວິຄຕາ ອຕີຕາ ອຕີຕໍເສນ ສງ຺ຄຫິຕາ, ຈກ຺ຂຸສມ຺ຜສ຺ສຊາ ສຎ຺ຎາ ໂສຕສມ຺ຜສ຺ສຊາ ສຎ຺ຎາ ຆານສມ຺ຜສ຺ສຊາ ສຎ຺ຎາ ຊິວ຺ຫາສມ຺ຜສ຺ສຊາ ສຎ຺ຎາ ກາຍສມ຺ຜສ຺ສຊາ ສຎ຺ຎາ ມໂນສມ຺ຜສ຺ສຊາ ສຎ຺ຎາ – ອຍໍ ວຸຈ຺ຈຕິ ສຎ຺ຎາ ອຕີຕາ.

ຕຕ຺ຖ ກຕມາ ສຎ຺ຎາ ອນາຄຕາ? ຍາ ສຎ຺ຎາ ອຊາຕາ ອຠູຕາ ອສຎ຺ຊາຕາ ອນິພ຺ພຕ຺ຕາ ອນຠິນິພ຺ພຕ຺ຕາ ອປາຕຸຠູຕາ ອນຸປ຺ປນ຺ນາ ອສມຸປ຺ປນ຺ນາ ອນຸຏ຺ຐິຕາ ອສມຸຏ຺ຐິຕາ ອນາຄຕາ ອນາຄຕໍເສນ ສງ຺ຄຫິຕາ, ຈກ຺ຂຸສມ຺ຜສ຺ສຊາ ສຎ຺ຎາ ໂສຕສມ຺ຜສ຺ສຊາ ສຎ຺ຎາ ຆານສມ຺ຜສ຺ສຊາ ສຎ຺ຎາ ຊິວ຺ຫາສມ຺ຜສ຺ສຊາ ສຎ຺ຎາ ກາຍສມ຺ຜສ຺ສຊາ ສຎ຺ຎາ ມໂນສມ຺ຜສ຺ສຊາ ສຎ຺ຎາ – ອຍໍ ວຸຈ຺ຈຕິ ສຎ຺ຎາ ອນາຄຕາ.

ຕຕ຺ຖ ກຕມາ ສຎ຺ຎາ ປຈ຺ຈຸປ຺ປນ຺ນາ? ຍາ ສຎ຺ຎາ ຊາຕາ ຠູຕາ ສຎ຺ຊາຕາ ນິພ຺ພຕ຺ຕາ ອຠິນິພ຺ພຕ຺ຕາ ປາຕຸຠູຕາ ອຸປ຺ປນ຺ນາ ສມຸປ຺ປນ຺ນາ ອຸຏ຺ຐິຕາ ສມຸຏ຺ຐິຕາ ປຈ຺ຈຸປ຺ປນ຺ນາ ປຈ຺ຈຸປ຺ປນ຺ນໍເສນ ສງ຺ຄຫິຕາ, ຈກ຺ຂຸສມ຺ຜສ຺ສຊາ ສຎ຺ຎາ ໂສຕສມ຺ຜສ຺ສຊາ ສຎ຺ຎາ ຆານສມ຺ຜສ຺ສຊາ ສຎ຺ຎາ ຊິວ຺ຫາສມ຺ຜສ຺ສຊາ ສຎ຺ຎາ ກາຍສມ຺ຜສ຺ສຊາ ສຎ຺ຎາ ມໂນສມ຺ຜສ຺ສຊາ ສຎ຺ຎາ – ອຍໍ ວຸຈ຺ຈຕິ ສຎ຺ຎາ ປຈ຺ຈຸປ຺ປນ຺ນາ.

໑໖. ຕຕ຺ຖ ກຕມາ ສຎ຺ຎາ ອຊ຺ຌຕ຺ຕາ? ຍາ ສຎ຺ຎາ ເຕສໍ ເຕສໍ ສຕ຺ຕານໍ ອຊ຺ຌຕ຺ຕໍ ປຈ຺ຈຕ຺ຕໍ ນິຍກາ ປາຏິປຸຄ຺ຄລິກາ ອຸປາທິນ຺ນາ, ຈກ຺ຂຸສມ຺ຜສ຺ສຊາ ສຎ຺ຎາ ໂສຕສມ຺ຜສ຺ສຊາ ສຎ຺ຎາ ຆານສມ຺ຜສ຺ສຊາ ສຎ຺ຎາ ຊິວ຺ຫາສມ຺ຜສ຺ສຊາ ສຎ຺ຎາ ກາຍສມ຺ຜສ຺ສຊາ ສຎ຺ຎາ ມໂນສມ຺ຜສ຺ສຊາ ສຎ຺ຎາ – ອຍໍ ວຸຈ຺ຈຕິ ສຎ຺ຎາ ອຊ຺ຌຕ຺ຕາ.

ຕຕ຺ຖ ກຕມາ ສຎ຺ຎາ ພຫິທ຺ຘາ? ຍາ ສຎ຺ຎາ ເຕສໍ ເຕສໍ ປຣສຕ຺ຕານໍ ປຣປຸຄ຺ຄລານໍ ອຊ຺ຌຕ຺ຕໍ ປຈ຺ຈຕ຺ຕໍ ນິຍກາ ປາຏິປຸຄ຺ຄລິກາ ອຸປາທິນ຺ນາ, ຈກ຺ຂຸສມ຺ຜສ຺ສຊາ ສຎ຺ຎາ ໂສຕສມ຺ຜສ຺ສຊາ ສຎ຺ຎາ ຆານສມ຺ຜສ຺ສຊາ ສຎ຺ຎາ ຊິວ຺ຫາສມ຺ຜສ຺ສຊາ ສຎ຺ຎາ ກາຍສມ຺ຜສ຺ສຊາ ສຎ຺ຎາ ມໂນສມ຺ຜສ຺ສຊາ ສຎ຺ຎາ – ອຍໍ ວຸຈ຺ຈຕິ ສຎ຺ຎາ ພຫິທ຺ຘາ.

໑໗. ຕຕ຺ຖ ກຕມາ ສຎ຺ຎາ ໂອຬາຣິກາ ສຸຂຸມາ? ປຏິຆສມ຺ຜສ຺ສຊາ ສຎ຺ຎາ ໂອຬາຣິກາ, ອຘິວຈນສມ຺ຜສ຺ສຊາ ສຎ຺ຎາ ສຸຂຸມາ. ອກຸສລາ ສຎ຺ຎາ ໂອຬາຣິກາ, ກຸສລາພ຺ຍາກຕາ ສຎ຺ຎາ ສຸຂຸມາ. ກຸສລາກຸສລາ ສຎ຺ຎາ ໂອຬາຣິກາ, ອພ຺ຍາກຕາ ສຎ຺ຎາ ສຸຂຸມາ. ທຸກ຺ຂາຍ ເວທນາຍ ສມ຺ປຍຸຕ຺ຕາ ສຎ຺ຎາ ໂອຬາຣິກາ, ສຸຂາຍ ຈ ອທຸກ຺ຂມສຸຂາຍ ຈ ເວທນາຫິ ສມ຺ປຍຸຕ຺ຕາ ສຎ຺ຎາ ສຸຂຸມາ. ສຸຂທຸກ຺ຂາຫິ ເວທນາຫິ ສມ຺ປຍຸຕ຺ຕາ ສຎ຺ຎາ ໂອຬາຣິກາ, ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕາ ສຎ຺ຎາ ສຸຂຸມາ. ອສມາປນ຺ນສ຺ສ ສຎ຺ຎາ ໂອຬາຣິກາ, ສມາປນ຺ນສ຺ສ ສຎ຺ຎາ ສຸຂຸມາ. ສາສວາ ສຎ຺ຎາ ໂອຬາຣິກາ, ອນາສວາ ສຎ຺ຎາ ສຸຂຸມາ. ຕໍ ຕໍ ວາ ປນ ສຎ຺ຎໍ ອຸປາທາຍຸປາທາຍ ສຎ຺ຎາ ໂອຬາຣິກາ ສຸຂຸມາ ທຏ຺ຐພ຺ພາ.

໑໘. ຕຕ຺ຖ ກຕມາ ສຎ຺ຎາ ຫີນາ ປຓີຕາ? ອກຸສລາ ສຎ຺ຎາ ຫີນາ, ກຸສລາພ຺ຍາກຕາ ສຎ຺ຎາ ປຓີຕາ. ກຸສລາກຸສລາ ສຎ຺ຎາ ຫີນາ, ອພ຺ຍາກຕາ ສຎ຺ຎາ ປຓີຕາ. ທຸກ຺ຂາຍ ເວທນາຍ ສມ຺ປຍຸຕ຺ຕາ ສຎ຺ຎາ ຫີນາ, ສຸຂາຍ ຈ ອທຸກ຺ຂມສຸຂາຍ ຈ ເວທນາຫິ ສມ຺ປຍຸຕ຺ຕາ ສຎ຺ຎາ ປຓີຕາ. ສຸຂທຸກ຺ຂາຫິ ເວທນາຫິ ສມ຺ປຍຸຕ຺ຕາ ສຎ຺ຎາ ຫີນາ, ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕາ ສຎ຺ຎາ ປຓີຕາ. ອສມາປນ຺ນສ຺ສ ສຎ຺ຎາ ຫີນາ, ສມາປນ຺ນສ຺ສ ສຎ຺ຎາ ປຓີຕາ. ສາສວາ ສຎ຺ຎາ ຫີນາ, ອນາສວາ ສຎ຺ຎາ ປຓີຕາ. ຕໍ ຕໍ ວາ ປນ ສຎ຺ຎໍ ອຸປາທາຍຸປາທາຍ ສຎ຺ຎາ ຫີນາ ປຓີຕາ ທຏ຺ຐພ຺ພາ.

໑໙. ຕຕ຺ຖ ກຕມາ ສຎ຺ຎາ ທູເຣ? ອກຸສລາ ສຎ຺ຎາ ກຸສລາພ຺ຍາກຕາຫິ ສຎ຺ຎາຫິ ທູເຣ; ກຸສລາພ຺ຍາກຕາ ສຎ຺ຎາ ອກຸສລາຍ ສຎ຺ຎາຍ ທູເຣ; ກຸສລາ ສຎ຺ຎາ ອກຸສລາພ຺ຍາກຕາຫິ ສຎ຺ຎາຫິ ທູເຣ; ອກຸສລາພ຺ຍາກຕາ ສຎ຺ຎາ ກຸສລາຍ ສຎ຺ຎາຍ ທູເຣ. ອພ຺ຍາກຕາ ສຎ຺ຎາ ກຸສລາກຸສລາຫິ ສຎ຺ຎາຫິ ທູເຣ; ກຸສລາກຸສລາ ສຎ຺ຎາ ອພ຺ຍາກຕາຍ ສຎ຺ຎາຍ ທູເຣ. ທຸກ຺ຂາຍ ເວທນາຍ ສມ຺ປຍຸຕ຺ຕາ ສຎ຺ຎາ ສຸຂາຍ ຈ ອທຸກ຺ຂມສຸຂາຍ ຈ ເວທນາຫິ ສມ຺ປຍຸຕ຺ຕາຫິ ສຎ຺ຎາຫິ ທູເຣ; ສຸຂາຍ ຈ ອທຸກ຺ຂມສຸຂາຍ ຈ ເວທນາຫິ ສມ຺ປຍຸຕ຺ຕາ ສຎ຺ຎາ ທຸກ຺ຂາຍ ເວທນາຍ ສມ຺ປຍຸຕ຺ຕາຍ ສຎ຺ຎາຍ ທູເຣ; ສຸຂາຍ ເວທນາຍ ສມ຺ປຍຸຕ຺ຕາ ສຎ຺ຎາ ທຸກ຺ຂາຍ ຈ ອທຸກ຺ຂມສຸຂາຍ ຈ ເວທນາຫິ ສມ຺ປຍຸຕ຺ຕາຫິ ສຎ຺ຎາຫິ ທູເຣ; ທຸກ຺ຂາຍ ຈ ອທຸກ຺ຂມສຸຂາຍ ຈ ເວທນາຫິ ສມ຺ປຍຸຕ຺ຕາ ສຎ຺ຎາ ສຸຂາຍ ເວທນາຍ ສມ຺ປຍຸຕ຺ຕາຍ ສຎ຺ຎາຍ ທູເຣ; ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕາ ສຎ຺ຎາ ສຸຂທຸກ຺ຂາຫິ ເວທນາຫິ ສມ຺ປຍຸຕ຺ຕາຫິ ສຎ຺ຎາຫິ ທູເຣ; ສຸຂທຸກ຺ຂາຫິ ເວທນາຫິ ສມ຺ປຍຸຕ຺ຕາ ສຎ຺ຎາ ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕາຍ ສຎ຺ຎາຍ ທູເຣ. ອສມາປນ຺ນສ຺ສ ສຎ຺ຎາ ສມາປນ຺ນສ຺ສ ສຎ຺ຎາຍ ທູເຣ; ສມາປນ຺ນສ຺ສ ສຎ຺ຎາ ອສມາປນ຺ນສ຺ສ ສຎ຺ຎາຍ ທູເຣ. ສາສວາ ສຎ຺ຎາ ອນາສວາຍ ສຎ຺ຎາຍ ທູເຣ; ອນາສວາ ສຎ຺ຎາ ສາສວາຍ ສຎ຺ຎາຍ ທູເຣ – ອຍໍ ວຸຈ຺ຈຕິ ສຎ຺ຎາ ທູເຣ.

ຕຕ຺ຖ ກຕມາ ສຎ຺ຎາ ສນ຺ຕິເກ? ອກຸສລາ ສຎ຺ຎາ ອກຸສລາຍ ສຎ຺ຎາຍ ສນ຺ຕິເກ; ກຸສລາ ສຎ຺ຎາ ກຸສລາຍ ສຎ຺ຎາຍ ສນ຺ຕິເກ; ອພ຺ຍາກຕາ ສຎ຺ຎາ ອພ຺ຍາກຕາຍ ສຎ຺ຎາຍ ສນ຺ຕິເກ. ທຸກ຺ຂາຍ ເວທນາຍ ສມ຺ປຍຸຕ຺ຕາ ສຎ຺ຎາ ທຸກ຺ຂາຍ ເວທນາຍ ສມ຺ປຍຸຕ຺ຕາຍ ສຎ຺ຎາຍ ສນ຺ຕິເກ; ສຸຂາຍ ເວທນາຍ ສມ຺ປຍຸຕ຺ຕາ ສຎ຺ຎາ ສຸຂາຍ ເວທນາຍ ສມ຺ປຍຸຕ຺ຕາຍ ສຎ຺ຎາຍ ສນ຺ຕິເກ; ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕາ ສຎ຺ຎາ ອທຸກ຺ຂມສຸຂາຍ ເວທນາຍ ສມ຺ປຍຸຕ຺ຕາຍ ສຎ຺ຎາຍ ສນ຺ຕິເກ. ອສມາປນ຺ນສ຺ສ ສຎ຺ຎາ ອສມາປນ຺ນສ຺ສ ສຎ຺ຎາຍ ສນ຺ຕິເກ; ສມາປນ຺ນສ຺ສ ສຎ຺ຎາ ສມາປນ຺ນສ຺ສ ສຎ຺ຎາຍ ສນ຺ຕິເກ. ສາສວາ ສຎ຺ຎາ ສາສວາຍ ສຎ຺ຎາຍ ສນ຺ຕິເກ; ອນາສວາ ສຎ຺ຎາ ອນາສວາຍ ສຎ຺ຎາຍ ສນ຺ຕິເກ. ອຍໍ ວຸຈ຺ຈຕິ ສຎ຺ຎາ ສນ຺ຕິເກ. ຕໍ ຕໍ ວາ ປນ ສຎ຺ຎໍ ອຸປາທາຍຸປາທາຍ ສຎ຺ຎາ ທູເຣ ສນ຺ຕິເກ ທຏ຺ຐພ຺ພາ.