໑. ຣູປກ຺ຂນ຺ໂຘ

໒. ຕຕ຺ຖ ກຕໂມ ຣູປກ຺ຂນ຺ໂຘ? ຍໍ ກິຎ຺ຈິ ຣູປໍ ອຕີຕານາຄຕປຈ຺ຈຸປ຺ປນ຺ນໍ ອຊ຺ຌຕ຺ຕໍ ວາ ພຫິທ຺ຘາ ວາ ໂອຬາຣິກໍ ວາ ສຸຂຸມໍ ວາ ຫີນໍ ວາ ປຓີຕໍ ວາ ຍໍ ທູເຣ ສນ຺ຕິເກ ວາ, ຕເທກຊ຺ຌໍ ອຠິສຎ຺ຎູຫິຕ຺ວາ ອຠິສງ຺ຂິປິຕ຺ວາ – ອຍໍ ວຸຈ຺ຈຕິ ຣູປກ຺ຂນ຺ໂຘ.

໓. ຕຕ຺ຖ ກຕມໍ ຣູປໍ ອຕີຕໍ? ຍໍ ຣູປໍ ອຕີຕໍ ນິຣຸທ຺ຘໍ ວິຄຕໍ ວິປຣິຓຕໍ ອຕ຺ຖງ຺ຄຕໍ ອພ຺ຠຕ຺ຖງ຺ຄຕໍ ອຸປ຺ປຊ຺ຊິຕ຺ວາ ວິຄຕໍ ອຕີຕໍ ອຕີຕໍເສນ ສງ຺ຄຫິຕໍ, ຈຕ຺ຕາໂຣ ຈ ມຫາຠູຕາ ຈຕຸນ຺ນຎ຺ຈ ມຫາຠູຕານໍ ອຸປາທາຍຣູປໍ – ອິທໍ ວຸຈ຺ຈຕິ ຣູປໍ ອຕີຕໍ.

ຕຕ຺ຖ ກຕມໍ ຣູປໍ ອນາຄຕໍ? ຍໍ ຣູປໍ ອຊາຕໍ ອຠູຕໍ ອສຎ຺ຊາຕໍ ອນິພ຺ພຕ຺ຕໍ ອນຠິນິພ຺ພຕ຺ຕໍ ອປາຕຸຠູຕໍ ອນຸປ຺ປນ຺ນໍ ອສມຸປ຺ປນ຺ນໍ ອນຸຏ຺ຐິຕໍ ອສມຸຏ຺ຐິຕໍ ອນາຄຕໍ ອນາຄຕໍເສນ ສງ຺ຄຫິຕໍ, ຈຕ຺ຕາໂຣ ຈ ມຫາຠູຕາ ຈຕຸນ຺ນຎ຺ຈ ມຫາຠູຕານໍ ອຸປາທາຍຣູປໍ – ອິທໍ ວຸຈ຺ຈຕິ ຣູປໍ ອນາຄຕໍ.

ຕຕ຺ຖ ກຕມໍ ຣູປໍ ປຈ຺ຈຸປ຺ປນ຺ນໍ? ຍໍ ຣູປໍ ຊາຕໍ ຠູຕໍ ສຎ຺ຊາຕໍ ນິພ຺ພຕ຺ຕໍ ອຠິນິພ຺ພຕ຺ຕໍ ປາຕຸຠູຕໍ ອຸປ຺ປນ຺ນໍ ສມຸປ຺ປນ຺ນໍ ອຸຏ຺ຐິຕໍ ສມຸຏ຺ຐິຕໍ ປຈ຺ຈຸປ຺ປນ຺ນໍ ປຈ຺ຈຸປ຺ປນ຺ນໍເສນ ສງ຺ຄຫິຕໍ, ຈຕ຺ຕາໂຣ ຈ ມຫາຠູຕາ ຈຕຸນ຺ນຎ຺ຈ ມຫາຠູຕານໍ ອຸປາທາຍຣູປໍ – ອິທໍ ວຸຈ຺ຈຕິ ຣູປໍ ປຈ຺ຈຸປ຺ປນ຺ນໍ.

໔. ຕຕ຺ຖ ກຕມໍ ຣູປໍ ອຊ຺ຌຕ຺ຕໍ? ຍໍ ຣູປໍ ເຕສໍ ເຕສໍ ສຕ຺ຕານໍ ອຊ຺ຌຕ຺ຕໍ ປຈ຺ຈຕ຺ຕໍ ນິຍກໍ ປາຏິປຸຄ຺ຄລິກໍ ອຸປາທິນ຺ນໍ, ຈຕ຺ຕາໂຣ ຈ ມຫາຠູຕາ ຈຕຸນ຺ນຎ຺ຈ ມຫາຠູຕານໍ ອຸປາທາຍຣູປໍ – ອິທໍ ວຸຈ຺ຈຕິ ຣູປໍ ອຊ຺ຌຕ຺ຕໍ.

ຕຕ຺ຖ ກຕມໍ ຣູປໍ ພຫິທ຺ຘາ? ຍໍ ຣູປໍ ເຕສໍ ເຕສໍ ປຣສຕ຺ຕານໍ ປຣປຸຄ຺ຄລານໍ ອຊ຺ຌຕ຺ຕໍ ປຈ຺ຈຕ຺ຕໍ ນິຍກໍ ປາຏິປຸຄ຺ຄລິກໍ ອຸປາທິນ຺ນໍ, ຈຕ຺ຕາໂຣ ຈ ມຫາຠູຕາ ຈຕຸນ຺ນຎ຺ຈ ມຫາຠູຕານໍ ອຸປາທາຍຣູປໍ – ອິທໍ ວຸຈ຺ຈຕິ ຣູປໍ ພຫິທ຺ຘາ.

໕. ຕຕ຺ຖ ກຕມໍ ຣູປໍ ໂອຬາຣິກໍ? ຈກ຺ຂາຍຕນໍ…ເປ… ໂຜຏ຺ຐພ຺ພາຍຕນໍ – ອິທໍ ວຸຈ຺ຈຕິ ຣູປໍ ໂອຬາຣິກໍ.

ຕຕ຺ຖ ກຕມໍ ຣູປໍ ສຸຂຸມໍ? ອິຕ຺ຖິນ຺ທ຺ຣິຍໍ…ເປ… ກພຬີກາໂຣ [ກພຬິໍກາໂຣ (ສີ. ສ຺ຍາ.)] ອາຫາໂຣ – ອິທໍ ວຸຈ຺ຈຕິ ຣູປໍ ສຸຂຸມໍ.

໖. ຕຕ຺ຖ ກຕມໍ ຣູປໍ ຫີນໍ? ຍໍ ຣູປໍ ເຕສໍ ເຕສໍ ສຕ຺ຕານໍ ອຸຎ຺ຎາຕໍ ອວຎ຺ຎາຕໍ ຫີຬິຕໍ ປຣິຠູຕໍ ອຈິຕ຺ຕີກຕໍ ຫີນໍ ຫີນມຕໍ ຫີນສມ຺ມຕໍ ອນິຏ຺ຐໍ ອກນ຺ຕໍ ອມນາປໍ, ຣູປາ ສທ຺ທາ ຄນ຺ຘາ ຣສາ ໂຜຏ຺ຐພ຺ພາ – ອິທໍ ວຸຈ຺ຈຕິ ຣູປໍ ຫີນໍ.

ຕຕ຺ຖ ກຕມໍ ຣູປໍ ປຓີຕໍ? ຍໍ ຣູປໍ ເຕສໍ ເຕສໍ ສຕ຺ຕານໍ ອນຸຎ຺ຎາຕໍ ອນວຎ຺ຎາຕໍ ອຫີຬິຕໍ ອປຣິຠູຕໍ ຈິຕ຺ຕີກຕໍ ປຓີຕໍ ປຓີຕມຕໍ ປຓີຕສມ຺ມຕໍ ອິຏ຺ຐໍ ກນ຺ຕໍ ມນາປໍ, ຣູປາ ສທ຺ທາ ຄນ຺ຘາ ຣສາ ໂຜຏ຺ຐພ຺ພາ – ອິທໍ ວຸຈ຺ຈຕິ ຣູປໍ ປຓີຕໍ. ຕໍ ຕໍ ວາ ປນ ຣູປໍ ອຸປາທາຍຸປາທາຍ ຣູປໍ ຫີນໍ ປຓີຕໍ ທຏ຺ຐພ຺ພໍ.

໗. ຕຕ຺ຖ ກຕມໍ ຣູປໍ ທູເຣ? ອິຕ຺ຖິນ຺ທ຺ຣິຍໍ…ເປ… ກພຬີກາໂຣ ອາຫາໂຣ, ຍໍ ວາ ປນຎ຺ຎມ຺ປິ ອຕ຺ຖິ ຣູປໍ ອນາສນ຺ເນ ອນຸປກຏ຺ເຐ ທູເຣ ອສນ຺ຕິເກ – ອິທໍ ວຸຈ຺ຈຕິ ຣູປໍ ທູເຣ.

ຕຕ຺ຖ ກຕມໍ ຣູປໍ ສນ຺ຕິເກ? ຈກ຺ຂາຍຕນໍ…ເປ… ໂຜຏ຺ຐພ຺ພາຍຕນໍ, ຍໍ ວາ ປນຎ຺ຎມ຺ປິ ອຕ຺ຖິ ຣູປໍ ອາສນ຺ເນ ອຸປກຏ຺ເຐ ອວິທູເຣ ສນ຺ຕິເກ – ອິທໍ ວຸຈ຺ຈຕິ ຣູປໍ ສນ຺ຕິເກ. ຕໍ ຕໍ ວາ ປນ ຣູປໍ ອຸປາທາຍຸປາທາຍ ຣູປໍ ທູເຣ ສນ຺ຕິເກ ທຏ຺ຐພ຺ພໍ.