໑. ວິຠງ຺ຄວາໂຣ

ເຫຕຸປຈ຺ຈໂຍ

໒໗. ອຊ຺ຌຕ຺ໂຕ ຘມ຺ໂມ ອຊ຺ຌຕ຺ຕສ຺ສ ຘມ຺ມສ຺ສ ເຫຕຸປຈ຺ຈເຍນ ປຈ຺ຈໂຍ – ອຊ຺ຌຕ຺ຕາ ເຫຕູ ສມ຺ປຍຸຕ຺ຕການໍ ຂນ຺ຘານໍ ຈິຕ຺ຕສມຸຏ຺ຐານານຎ຺ຈ ຣູປານໍ ເຫຕຸປຈ຺ຈເຍນ ປຈ຺ຈໂຍ. ປຏິສນ຺ຘິກ຺ຂເຓ…ເປ…. (໑)

ພຫິທ຺ຘາ ຘມ຺ໂມ ພຫິທ຺ຘາ ຘມ຺ມສ຺ສ ເຫຕຸປຈ຺ຈເຍນ ປຈ຺ຈໂຍ – ພຫິທ຺ຘາ ເຫຕູ ສມ຺ປຍຸຕ຺ຕການໍ ຂນ຺ຘານໍ ຈິຕ຺ຕສມຸຏ຺ຐານານຎ຺ຈ ຣູປານໍ ເຫຕຸປຈ຺ຈເຍນ ປຈ຺ຈໂຍ. ປຏິສນ຺ຘິກ຺ຂເຓ…ເປ…. (໑)

ອາຣມ຺ມຓປຈ຺ຈໂຍ

໒໘. ອຊ຺ຌຕ຺ໂຕ ຘມ຺ໂມ ອຊ຺ຌຕ຺ຕສ຺ສ ຘມ຺ມສ຺ສ ອາຣມ຺ມຓປຈ຺ຈເຍນ ປຈ຺ຈໂຍ – ທານໍ ທຕ຺ວາ ສີລໍ ສມາທິຍິຕ຺ວາ ອຸໂປສຖກມ຺ມໍ ກຕ຺ວາ ຕໍ ປຈ຺ຈເວກ຺ຂຕິ, ປຸພ຺ເພ ສຸຈິຓ຺ຓານິ…ເປ… ຌານາ ວຸຏ຺ຐຫິຕ຺ວາ…ເປ… ອຣິຍາ ມຄ຺ຄາ ວຸຏ຺ຐຫິຕ຺ວາ ມຄ຺ຄໍ ປຈ຺ຈເວກ຺ຂນ຺ຕິ, ຜລໍ ປຈ຺ຈເວກ຺ຂນ຺ຕິ, ປຫີເນ ກິເລເສ ປຈ຺ຈເວກ຺ຂນ຺ຕິ, ວິກ຺ຂມ຺ຠິເຕ ກິເລເສ ປຈ຺ຈເວກ຺ຂນ຺ຕິ, ປຸພ຺ເພ ສມຸທາຈິຓ຺ເຓ ກິເລເສ ຊານນ຺ຕິ. ອຊ຺ຌຕ຺ຕໍ ຈກ຺ຂຸໍ…ເປ… ກາຍໍ… ຣູເປ…ເປ… ໂຜຏ຺ຐພ຺ເພ… ວຕ຺ຖຸໍ… ອຊ຺ຌຕ຺ເຕ ຂນ຺ເຘ ອນິຈ຺ຈໂຕ ທຸກ຺ຂໂຕ ອນຕ຺ຕໂຕ ວິປສ຺ສຕິ, ອສ຺ສາເທຕິ ອຠິນນ຺ທຕິ, ຕໍ ອາຣພ຺ຠ ຣາໂຄ ອຸປ຺ປຊ຺ຊຕິ…ເປ… ໂທມນສ຺ສໍ ອຸປ຺ປຊ຺ຊຕິ. ທິພ຺ເພນ ຈກ຺ຂຸນາ ຣູປໍ ປສ຺ສຕິ, ທິພ຺ພາຍ ໂສຕຸຘາຕຸຍາ ສທ຺ທໍ ສຸຓາຕິ, ອາກາສານຎ຺ຈາຍຕນໍ ວິຎ຺ຎາຓຎ຺ຈາຍຕນສ຺ສ ອາຣມ຺ມຓປຈ຺ຈເຍນ ປຈ຺ຈໂຍ. ອາກິຎ຺ຈຎ຺ຎາຍຕນໍ ເນວສຎ຺ຎານາສຎ຺ຎາຍຕນສ຺ສ ອາຣມ຺ມຓປຈ຺ຈເຍນ ປຈ຺ຈໂຍ. ຣູປາຍຕນໍ…ເປ… ໂຜຏ຺ຐພ຺ພາຍຕນໍ ກາຍວິຎ຺ຎາຓສ຺ສ ອາຣມ຺ມຓປຈ຺ຈເຍນ ປຈ຺ຈໂຍ. ອຊ຺ຌຕ຺ຕາ ຂນ຺ຘາ ອິທ຺ຘິວິຘຎາຓສ຺ສ, ປຸພ຺ເພນິວາສານຸສ຺ສຕິຎາຓສ຺ສ, ຍຖາກມ຺ມູປຄຎາຓສ຺ສ, ອນາຄຕໍສຎາຓສ຺ສ, ອາວຊ຺ຊນາຍ ອາຣມ຺ມຓປຈ຺ຈເຍນ ປຈ຺ຈໂຍ. (໑)

ອຊ຺ຌຕ຺ໂຕ ຘມ຺ໂມ ພຫິທ຺ຘາ ຘມ຺ມສ຺ສ ອາຣມ຺ມຓປຈ຺ຈເຍນ ປຈ຺ຈໂຍ – ປໂຣ ອຊ຺ຌຕ຺ຕໍ ຈກ຺ຂຸໍ…ເປ… ວຕ຺ຖຸໍ… ອຊ຺ຌຕ຺ເຕ ຂນ຺ເຘ ອນິຈ຺ຈໂຕ ທຸກ຺ຂໂຕ ອນຕ຺ຕໂຕ ວິປສ຺ສຕິ, ອສ຺ສາເທຕິ ອຠິນນ຺ທຕິ, ຕໍ ອາຣພ຺ຠ ຣາໂຄ ອຸປ຺ປຊ຺ຊຕິ…ເປ… ໂທມນສ຺ສໍ ອຸປ຺ປຊ຺ຊຕິ. ທິພ຺ເພນ ຈກ຺ຂຸນາ ຣູປໍ ປສ຺ສຕິ, ທິພ຺ພາຍ ໂສຕຘາຕຸຍາ ສທ຺ທໍ ສຸຓາຕິ. ເຈໂຕປຣິຍຎາເຓນ ອຊ຺ຌຕ຺ຕຈິຕ຺ຕສມງ຺ຄິສ຺ສ ຈິຕ຺ຕໍ ຊານາຕິ. ອຊ຺ຌຕ຺ຕໍ ຣູປາຍຕນໍ ພຫິທ຺ຘາ ຈກ຺ຂຸວິຎ຺ຎາຓສ຺ສ…ເປ… ອຊ຺ຌຕ຺ຕໍ ໂຜຏ຺ຐພ຺ພາຍຕນໍ ພຫິທ຺ຘາ ກາຍວິຎ຺ຎາຓສ຺ສ ອາຣມ຺ມຓປຈ຺ຈເຍນ ປຈ຺ຈໂຍ. ອຊ຺ຌຕ຺ຕາ ຂນ຺ຘາ ອິທ຺ຘິວິຘຎາຓສ຺ສ, ເຈໂຕປຣິຍຎາຓສ຺ສ, ປຸພ຺ເພນິວາສານຸສ຺ສຕິຎາຓສ຺ສ, ຍຖາກມ຺ມູປຄຎາຓສ຺ສ, ອນາຄຕໍສຎາຓສ຺ສ, ອາວຊ຺ຊນາຍ ອາຣມ຺ມຓປຈ຺ຈເຍນ ປຈ຺ຈໂຍ. (໒)

໒໙. ພຫິທ຺ຘາ ຘມ຺ໂມ ພຫິທ຺ຘາ ຘມ຺ມສ຺ສ ອາຣມ຺ມຓປຈ຺ຈເຍນ ປຈ຺ຈໂຍ – ປໂຣ ທານໍ ທຕ຺ວາ ສີລໍ ສມາທິຍິຕ຺ວາ ອຸໂປສຖກມ຺ມໍ ກຕ຺ວາ ຕໍ ປຈ຺ຈເວກ຺ຂຕິ, ປຸພ຺ເພ ສຸຈິຓ຺ຓານິ ປຈ຺ຈເວກ຺ຂຕິ, ຌານາ ວຸຏ຺ຐຫິຕ຺ວາ…ເປ… ອຣິຍາ ມຄ຺ຄາ ວຸຏ຺ຐຫິຕ຺ວາ ມຄ຺ຄໍ ປຈ຺ຈເວກ຺ຂນ຺ຕິ, ຜລໍ ປຈ຺ຈເວກ຺ຂນ຺ຕິ… ນິພ຺ພານໍ ປຈ຺ຈເວກ຺ຂນ຺ຕິ. ນິພ຺ພານໍ ໂຄຕ຺ຣຠຸສ຺ສ, ໂວທານສ຺ສ, ມຄ຺ຄສ຺ສ, ຜລສ຺ສ, ອາວຊ຺ຊນາຍ ອາຣມ຺ມຓປຈ຺ຈເຍນ ປຈ຺ຈໂຍ. ອຣິຍາ ປຫີເນ ກິເລເສ ປຈ຺ຈເວກ຺ຂນ຺ຕິ, ວິກ຺ຂມ຺ຠິເຕ ກິເລເສ ປຈ຺ຈເວກ຺ຂນ຺ຕິ, ປຸພ຺ເພ ສມຸທາຈິຓ຺ເຓ…ເປ… ປໂຣ ພຫິທ຺ຘາ ຈກ຺ຂຸໍ…ເປ… ວຕ຺ຖຸໍ… ພຫິທ຺ຘາ ຂນ຺ເຘ ອນິຈ຺ຈໂຕ…ເປ… ໂທມນສ຺ສໍ ອຸປ຺ປຊ຺ຊຕິ. ທິພ຺ເພນ ຈກ຺ຂຸນາ ຣູປໍ ປສ຺ສຕິ, ທິພ຺ພາຍ ໂສຕຘາຕຸຍາ ສທ຺ທໍ ສຸຓາຕິ. ເຈໂຕປຣິຍຎາເຓນ ພຫິທ຺ຘາ ຈິຕ຺ຕສມງ຺ຄິສ຺ສ…ເປ… ອາກາສານຎ຺ຈາຍຕນໍ ວິຎ຺ຎາຓຎ຺ຈາຍຕນສ຺ສ ອາຣມ຺ມຓປຈ຺ຈເຍນ ປຈ຺ຈໂຍ. ອາກິຎ຺ຈຎ຺ຎາຍຕນໍ ເນວສຎ຺ຎານາສຎ຺ຎາຍຕນສ຺ສ ອາຣມ຺ມຓປຈ຺ຈເຍນ ປຈ຺ຈໂຍ. ພຫິທ຺ຘາ ຣູປາຍຕນໍ ພຫິທ຺ຘາ ຈກ຺ຂຸວິຎ຺ຎາຓສ຺ສ…ເປ… ພຫິທ຺ຘາ ໂຜຏ຺ຐພ຺ພາຍຕນໍ ພຫິທ຺ຘາ ກາຍວິຎ຺ຎາຓສ຺ສ…ເປ… ພຫິທ຺ຘາ ຂນ຺ຘາ ອິທ຺ຘິວິຘຎາຓສ຺ສ, ເຈໂຕປຣິຍຎາຓສ຺ສ, ປຸພ຺ເພນິວາສານຸສ຺ສຕິຎາຓສ຺ສ, ຍຖາກມ຺ມູປຄຎາຓສ຺ສ, ອນາຄຕໍສຎາຓສ຺ສ, ອາວຊ຺ຊນາຍ ອາຣມ຺ມຓປຈ຺ຈເຍນ ປຈ຺ຈໂຍ. (໑)

ພຫິທ຺ຘາ ຘມ຺ໂມ ອຊ຺ຌຕ຺ຕສ຺ສ ຘມ຺ມສ຺ສ ອາຣມ຺ມຓປຈ຺ຈເຍນ ປຈ຺ຈໂຍ – ອຣິຍາ ນິພ຺ພານໍ ປຈ຺ຈເວກ຺ຂນ຺ຕິ. ນິພ຺ພານໍ ໂຄຕ຺ຣຠຸສ຺ສ, ໂວທານສ຺ສ, ມຄ຺ຄສ຺ສ, ຜລສ຺ສ, ອາວຊ຺ຊນາຍ ອາຣມ຺ມຓປຈ຺ຈເຍນ ປຈ຺ຈໂຍ. ພຫິທ຺ຘາ ຈກ຺ຂຸໍ…ເປ… ວຕ຺ຖຸໍ… ພຫິທ຺ຘາ ຂນ຺ເຘ ອນິຈ຺ຈໂຕ…ເປ… ໂທມນສ຺ສໍ ອຸປ຺ປຊ຺ຊຕິ. ທິພ຺ເພນ ຈກ຺ຂຸນາ ຣູປໍ ປສ຺ສຕິ, ທິພ຺ພາຍ ໂສຕຘາຕຸຍາ ສທ຺ທໍ ສຸຓາຕິ. ເຈໂຕປຣິຍຎາເຓນ ພຫິທ຺ຘາ ຈິຕ຺ຕສມງ຺ຄິສ຺ສ ຈິຕ຺ຕໍ ຊານາຕິ. ພຫິທ຺ຘາ ຣູປາຍຕນໍ ອຊ຺ຌຕ຺ຕໍ ຈກ຺ຂຸວິຎ຺ຎາຓສ຺ສ…ເປ… ພຫິທ຺ຘາ ໂຜຏ຺ຐພ຺ພາຍຕນໍ ອຊ຺ຌຕ຺ຕໍ ກາຍວິຎ຺ຎາຓສ຺ສ…ເປ… ພຫິທ຺ຘາ ຂນ຺ຘາ ອິທ຺ຘິວິຘຎາຓສ຺ສ, ເຈໂຕປຣິຍຎາຓສ຺ສ, ປຸພ຺ເພນິວາສານຸສ຺ສຕິຎາຓສ຺ສ, ຍຖາກມ຺ມູປຄຎາຓສ຺ສ, ອນາຄຕໍສຎາຓສ຺ສ, ອາວຊ຺ຊນາຍ ອາຣມ຺ມຓປຈ຺ຈເຍນ ປຈ຺ຈໂຍ. (໒)

ອຘິປຕິປຈ຺ຈໂຍ

໓໐. ອຊ຺ຌຕ຺ໂຕ ຘມ຺ໂມ ອຊ຺ຌຕ຺ຕສ຺ສ ຘມ຺ມສ຺ສ ອຘິປຕິປຈ຺ຈເຍນ ປຈ຺ຈໂຍ – ອາຣມ຺ມຓາຘິປຕິ, ສຫຊາຕາຘິປຕິ. ອາຣມ຺ມຓາຘິປຕິ – ທານໍ ທຕ຺ວາ ສີລໍ ສມາທິຍິຕ຺ວາ ອຸໂປສຖກມ຺ມໍ ກຕ຺ວາ, ຕໍ ຄຣຸໍ ກຕ຺ວາ ປຈ຺ຈເວກ຺ຂຕິ, ປຸພ຺ເພ ສຸຈິຓ຺ຓານິ ຄຣຸໍ ກຕ຺ວາ…ເປ… ຌານາ ວຸຏ຺ຐຫິຕ຺ວາ ຌານໍ ຄຣຸໍ ກຕ຺ວາ…ເປ… ອຣິຍາ ມຄ຺ຄາ ວຸຏ຺ຐຫິຕ຺ວາ ມຄ຺ຄໍ ຄຣຸໍ ກຕ຺ວາ…ເປ… ຜລໍ ຄຣຸໍ ກຕ຺ວາ ປຈ຺ຈເວກ຺ຂນ຺ຕິ. ອຊ຺ຌຕ຺ຕໍ ຈກ຺ຂຸໍ…ເປ… ວຕ຺ຖຸໍ… ອຊ຺ຌຕ຺ເຕ ຂນ຺ເຘ ຄຣຸໍ ກຕ຺ວາ ອສ຺ສາເທຕິ ອຠິນນ຺ທຕິ, ຕໍ ຄຣຸໍ ກຕ຺ວາ ຣາໂຄ ອຸປ຺ປຊ຺ຊຕິ, ທິຏ຺ຐິ ອຸປ຺ປຊ຺ຊຕິ. ສຫຊາຕາຘິປຕິ – ອຊ຺ຌຕ຺ຕາຘິປຕິ ສມ຺ປຍຸຕ຺ຕການໍ ຂນ຺ຘານໍ ຈິຕ຺ຕສມຸຏ຺ຐານານຎ຺ຈ ຣູປານໍ ອຘິປຕິປຈ຺ຈເຍນ ປຈ຺ຈໂຍ. (໑)

ອຊ຺ຌຕ຺ໂຕ ຘມ຺ໂມ ພຫິທ຺ຘາ ຘມ຺ມສ຺ສ ອຘິປຕິປຈ຺ຈເຍນ ປຈ຺ຈໂຍ. ອາຣມ຺ມຓາຘິປຕິ – ປໂຣ ອຊ຺ຌຕ຺ຕໍ ຈກ຺ຂຸໍ…ເປ… ວຕ຺ຖຸໍ… ອຊ຺ຌຕ຺ເຕ ຂນ຺ເຘ ຄຣຸໍ ກຕ຺ວາ ອສ຺ສາເທຕິ ອຠິນນ຺ທຕິ, ຕໍ ຄຣຸໍ ກຕ຺ວາ ຣາໂຄ ອຸປ຺ປຊ຺ຊຕິ, ທິຏ຺ຐິ ອຸປ຺ປຊ຺ຊຕິ. (໒)

໓໑. ພຫິທ຺ຘາ ຘມ຺ໂມ ພຫິທ຺ຘາ ຘມ຺ມສ຺ສ ອຘິປຕິປຈ຺ຈເຍນ ປຈ຺ຈໂຍ – ອາຣມ຺ມຓາຘິປຕິ, ສຫຊາຕາຘິປຕິ. ອາຣມ຺ມຓາຘິປຕິ – ປໂຣ ທານໍ ທຕ຺ວາ ສີລໍ ສມາທິຍິຕ຺ວາ ອຸໂປສຖກມ຺ມໍ ກຕ຺ວາ, ຕໍ ຄຣຸໍ ກຕ຺ວາ ປຈ຺ຈເວກ຺ຂຕິ, ປຸພ຺ເພ ສຸຈິຓ຺ຓານິ ຄຣຸໍ ກຕ຺ວາ…ເປ… ຌານາ ວຸຏ຺ຐຫິຕ຺ວາ…ເປ… ອຣິຍາ ມຄ຺ຄາ ວຸຏ຺ຐຫິຕ຺ວາ ມຄ຺ຄໍ ຄຣຸໍ ກຕ຺ວາ…ເປ… ຜລໍ ຄຣຸໍ ກຕ຺ວາ…ເປ… ນິພ຺ພານໍ ຄຣຸໍ ກຕ຺ວາ ປຈ຺ຈເວກ຺ຂນ຺ຕິ. ນິພ຺ພານໍ ໂຄຕ຺ຣຠຸສ຺ສ, ໂວທານສ຺ສ, ມຄ຺ຄສ຺ສ, ຜລສ຺ສ ອຘິປຕິປຈ຺ຈເຍນ ປຈ຺ຈໂຍ. ພຫິທ຺ຘາ ຈກ຺ຂຸໍ…ເປ… ວຕ຺ຖຸໍ… ພຫິທ຺ຘາ ຂນ຺ເຘ ຄຣຸໍ ກຕ຺ວາ ອສ຺ສາເທຕິ ອຠິນນ຺ທຕິ, ຕໍ ຄຣຸໍ ກຕ຺ວາ ຣາໂຄ ອຸປ຺ປຊ຺ຊຕິ, ທິຏ຺ຐິ ອຸປ຺ປຊ຺ຊຕິ. ສຫຊາຕາຘິປຕິ – ພຫິທ຺ຘາຘິປຕິ ສມ຺ປຍຸຕ຺ຕການໍ ຂນ຺ຘານໍ ຈິຕ຺ຕສມຸຏ຺ຐານານຎ຺ຈ ຣູປານໍ ອຘິປຕິປຈ຺ຈເຍນ ປຈ຺ຈໂຍ. (໑)

ພຫິທ຺ຘາ ຘມ຺ໂມ ອຊ຺ຌຕ຺ຕສ຺ສ ຘມ຺ມສ຺ສ ອຘິປຕິປຈ຺ຈເຍນ ປຈ຺ຈໂຍ. ອາຣມ຺ມຓາຘິປຕິ – ອຣິຍາ ນິພ຺ພານໍ ຄຣຸໍ ກຕ຺ວາ ປຈ຺ຈເວກ຺ຂນ຺ຕິ. ນິພ຺ພານໍ ໂຄຕ຺ຣຠຸສ຺ສ, ໂວທານສ຺ສ, ມຄ຺ຄສ຺ສ, ຜລສ຺ສ, ອຘິປຕິປຈ຺ຈເຍນ ປຈ຺ຈໂຍ. ພຫິທ຺ຘາ ຈກ຺ຂຸໍ…ເປ… ວຕ຺ຖຸໍ… ພຫິທ຺ຘາ ຂນ຺ເຘ ຄຣຸໍ ກຕ຺ວາ ອສ຺ສາເທຕິ, ອຠິນນ຺ທຕິ, ຕໍ ຄຣຸໍ ກຕ຺ວາ ຣາໂຄ…ເປ… ທິຏ຺ຐິ ອຸປ຺ປຊ຺ຊຕິ. (໒)

ອນນ຺ຕຣປຈ຺ຈໂຍ

໓໒. ອຊ຺ຌຕ຺ໂຕ ຘມ຺ໂມ ອຊ຺ຌຕ຺ຕສ຺ສ ຘມ຺ມສ຺ສ ອນນ຺ຕຣປຈ຺ຈເຍນ ປຈ຺ຈໂຍ – ປຸຣິມາ ປຸຣິມາ ອຊ຺ຌຕ຺ຕາ ຂນ຺ຘາ ປຈ຺ຉິມານໍ ປຈ຺ຉິມານໍ ອຊ຺ຌຕ຺ຕານໍ ຂນ຺ຘານໍ ອນນ຺ຕຣປຈ຺ຈເຍນ ປຈ຺ຈໂຍ. ອນຸໂລມໍ ໂຄຕ຺ຣຠຸສ຺ສ, ອນຸໂລມໍ ໂວທານສ຺ສ, ໂຄຕ຺ຣຠຸ ມຄ຺ຄສ຺ສ, ໂວທານໍ ມຄ຺ຄສ຺ສ, ມຄ຺ໂຄ ຜລສ຺ສ, ຜລໍ ຜລສ຺ສ, ອນຸໂລມໍ ຜລສມາປຕ຺ຕິຍາ, ນິໂຣຘາ ວຸຏ຺ຐຫນ຺ຕສ຺ສ ເນວສຎ຺ຎານາສຎ຺ຎາຍຕນໍ ຜລສມາປຕ຺ຕິຍາ ອນນ຺ຕຣປຈ຺ຈເຍນ ປຈ຺ຈໂຍ. (໑)

ພຫິທ຺ຘາ ຘມ຺ໂມ ພຫິທ຺ຘາ ຘມ຺ມສ຺ສ ອນນ຺ຕຣປຈ຺ຈເຍນ ປຈ຺ຈໂຍ (ປຸຣິມາ ປຸຣິມາ ພຫິທ຺ຘາຕິ ນານາກຣຓໍ, ຕໍເຍວ ຄມນໍ). (໑)

ສມນນ຺ຕຣປຈ຺ຈຍາທິ

໓໓. ອຊ຺ຌຕ຺ໂຕ ຘມ຺ໂມ ອຊ຺ຌຕ຺ຕສ຺ສ ຘມ຺ມສ຺ສ ສມນນ຺ຕຣປຈ຺ຈເຍນ ປຈ຺ຈໂຍ…ເປ… (ອນນ຺ຕຣສທິສໍ)… ສຫຊາຕປຈ຺ຈເຍນ ປຈ຺ຈໂຍ… ອຎ຺ຎມຎ຺ຎປຈ຺ຈເຍນ ປຈ຺ຈໂຍ… ນິສ຺ສຍປຈ຺ຈເຍນ ປຈ຺ຈໂຍ.

ອຸປນິສ຺ສຍປຈ຺ຈໂຍ

໓໔. ອຊ຺ຌຕ຺ໂຕ ຘມ຺ໂມ ອຊ຺ຌຕ຺ຕສ຺ສ ຘມ຺ມສ຺ສ ອຸປນິສ຺ສຍປຈ຺ຈເຍນ ປຈ຺ຈໂຍ – ອາຣມ຺ມຓູປນິສ຺ສໂຍ, ອນນ຺ຕຣູປນິສ຺ສໂຍ, ປກຕູປນິສ຺ສໂຍ…ເປ…. ປກຕູປນິສ຺ສໂຍ – ອຊ຺ຌຕ຺ຕໍ ສທ຺ຘໍ ອຸປນິສ຺ສາຍ ທານໍ ເທຕິ, ສີລໍ ສມາທິຍຕິ, ອຸໂປສຖກມ຺ມໍ…ເປ… ຌານໍ…ເປ… ວິປສ຺ສນໍ…ເປ… ມຄ຺ຄໍ…ເປ… ອຠິຎ຺ຎໍ…ເປ… ສມາປຕ຺ຕິໍ ອຸປ຺ປາເທຕິ, ມານໍ ຊປ຺ເປຕິ, ທິຏ຺ຐິໍ ຄຓ຺ຫາຕິ. ອຊ຺ຌຕ຺ຕໍ ສີລໍ…ເປ… ປຎ຺ຎໍ… ຣາຄໍ…ເປ… ປຕ຺ຖນໍ… ກາຍິກໍ ສຸຂໍ… ກາຍິກໍ ທຸກ຺ຂໍ… ອຸຕຸໍ… ໂຠຊນໍ… ເສນາສນໍ ອຸປນິສ຺ສາຍ ທານໍ ເທຕິ…ເປ… ສມາປຕ຺ຕິໍ ອຸປ຺ປາເທຕິ, ປາຓໍ ຫນຕິ…ເປ… ສງ຺ຆໍ ຠິນ຺ທຕິ. ອຊ຺ຌຕ຺ຕາ ສທ຺ຘາ…ເປ… ປຎ຺ຎາ, ຣາໂຄ…ເປ… ປຕ຺ຖນາ, ກາຍິກໍ ສຸຂໍ… ກາຍິກໍ ທຸກ຺ຂໍ… ເສນາສນໍ ອຊ຺ຌຕ຺ຕາຍ ສທ຺ຘາຍ…ເປ… ປຎ຺ຎາຍ, ຣາຄສ຺ສ…ເປ… ປຕ຺ຖນາຍ, ກາຍິກສ຺ສ ສຸຂສ຺ສ, ກາຍິກສ຺ສ ທຸກ຺ຂສ຺ສ, ມຄ຺ຄສ຺ສ ຜລສມາປຕ຺ຕິຍາ ອຸປນິສ຺ສຍປຈ຺ຈເຍນ ປຈ຺ຈໂຍ. (໑)

ອຊ຺ຌຕ຺ໂຕ ຘມ຺ໂມ ພຫິທ຺ຘາ ຘມ຺ມສ຺ສ ອຸປນິສ຺ສຍປຈ຺ຈເຍນ ປຈ຺ຈໂຍ – ອາຣມ຺ມຓູປນິສ຺ສໂຍ, ປກຕູປນິສ຺ສໂຍ…ເປ…. ປກຕູປນິສ຺ສໂຍ – ປໂຣ ອຊ຺ຌຕ຺ຕໍ ສທ຺ຘໍ ອຸປນິສ຺ສາຍ ທານໍ ເທຕິ…ເປ… ມານໍ ຊປ຺ເປຕິ, ທິຏ຺ຐິໍ ຄຓ຺ຫາຕິ. ປໂຣ ອຊ຺ຌຕ຺ຕໍ ສີລໍ…ເປ… ເສນາສນໍ ອຸປນິສ຺ສາຍ ທານໍ ເທຕິ, ປາຓໍ ຫນຕິ…ເປ… ສງ຺ຆໍ ຠິນ຺ທຕິ. ອຊ຺ຌຕ຺ຕາ ສທ຺ຘາ…ເປ… ເສນາສນໍ ພຫິທ຺ຘາ ສທ຺ຘາຍ…ເປ… ມຄ຺ຄສ຺ສ ຜລສມາປຕ຺ຕິຍາ ອຸປນິສ຺ສຍປຈ຺ຈເຍນ ປຈ຺ຈໂຍ. (໒)

໓໕. ພຫິທ຺ຘາ ຘມ຺ໂມ ພຫິທ຺ຘາ ຘມ຺ມສ຺ສ ອຸປນິສ຺ສຍປຈ຺ຈເຍນ ປຈ຺ຈໂຍ – ອາຣມ຺ມຓູປນິສ຺ສໂຍ, ອນນ຺ຕຣູປນິສ຺ສໂຍ, ປກຕູປນິສ຺ສໂຍ…ເປ…. ປກຕູປນິສ຺ສໂຍ – ປໂຣ ພຫິທ຺ຘາ ສທ຺ຘໍ…ເປ… ປຕ຺ຖນໍ, ກາຍິກໍ ສຸຂໍ…ເປ… ເສນາສນໍ ອຸປນິສ຺ສາຍ ທານໍ ເທຕິ…ເປ… ສງ຺ຆໍ ຠິນ຺ທຕິ ພຫິທ຺ຘາ ສທ຺ຘາ…ເປ… ເສນາສນໍ ພຫິທ຺ຘາ ສທ຺ຘາຍ…ເປ… ຜລສມາປຕ຺ຕິຍາ ອຸປນິສ຺ສຍປຈ຺ຈເຍນ ປຈ຺ຈໂຍ. (໑)

ພຫິທ຺ຘາ ຘມ຺ໂມ ອຊ຺ຌຕ຺ຕສ຺ສ ຘມ຺ມສ຺ສ ອຸປນິສ຺ສຍປຈ຺ຈເຍນ ປຈ຺ຈໂຍ – ອາຣມ຺ມຓູປນິສ຺ສໂຍ, ປກຕູປນິສ຺ສໂຍ…ເປ…. ປກຕູປນິສ຺ສໂຍ – ພຫິທ຺ຘາ ສທ຺ຘໍ…ເປ… ເສນາສນໍ ອຸປນິສ຺ສາຍ ທານໍ ເທຕິ…ເປ… ສງ຺ຆໍ ຠິນ຺ທຕິ. ພຫິທ຺ຘາ ສທ຺ຘາ…ເປ… ເສນາສນໍ ອຊ຺ຌຕ຺ຕາຍ ສທ຺ຘາຍ…ເປ… ຜລສມາປຕ຺ຕິຍາ ອຸປນິສ຺ສຍປຈ຺ຈເຍນ ປຈ຺ຈໂຍ. (໒)

ປຸເຣຊາຕປຈ຺ຈໂຍ

໓໖. ອຊ຺ຌຕ຺ໂຕ ຘມ຺ໂມ ອຊ຺ຌຕ຺ຕສ຺ສ ຘມ຺ມສ຺ສ ປຸເຣຊາຕປຈ຺ຈເຍນ ປຈ຺ຈໂຍ – ອາຣມ຺ມຓປຸເຣຊາຕໍ, ວຕ຺ຖຸປຸເຣຊາຕໍ. ອາຣມ຺ມຓປຸເຣຊາຕໍ – ອຊ຺ຌຕ຺ຕໍ ຈກ຺ຂຸໍ…ເປ… ວຕ຺ຖຸໍ ອນິຈ຺ຈໂຕ ທຸກ຺ຂໂຕ ອນຕ຺ຕໂຕ ວິປສ຺ສຕິ…ເປ… ໂທມນສ຺ສໍ ອຸປ຺ປຊ຺ຊຕິ, ທິພ຺ເພນ ຈກ຺ຂຸນາ ຣູປໍ ປສ຺ສຕິ, ທິພ຺ພາຍ ໂສຕຘາຕຸຍາ ສທ຺ທໍ ສຸຓາຕິ, ຣູປາຍຕນໍ ຈກ຺ຂຸວິຎ຺ຎາຓສ຺ສ…ເປ… ໂຜຏ຺ຐພ຺ພາຍຕນໍ ກາຍວິຎ຺ຎາຓສ຺ສ ປຸເຣຊາຕປຈ຺ຈເຍນ ປຈ຺ຈໂຍ. ວຕ຺ຖຸປຸເຣຊາຕໍ – ຈກ຺ຂາຍຕນໍ ຈກ຺ຂຸວິຎ຺ຎາຓສ຺ສ…ເປ… ກາຍາຍຕນໍ ກາຍວິຎ຺ຎາຓສ຺ສ…ເປ… ວຕ຺ຖຸ ອຊ຺ຌຕ຺ຕານໍ ຂນ຺ຘານໍ ປຸເຣຊາຕປຈ຺ຈເຍນ ປຈ຺ຈໂຍ. (໑)

ອຊ຺ຌຕ຺ໂຕ ຘມ຺ໂມ ພຫິທ຺ຘາ ຘມ຺ມສ຺ສ ປຸເຣຊາຕປຈ຺ຈເຍນ ປຈ຺ຈໂຍ. ອາຣມ຺ມຓປຸເຣຊາຕໍ – ປໂຣ ອຊ຺ຌຕ຺ຕໍ ຈກ຺ຂຸໍ…ເປ… ວຕ຺ຖຸໍ ອນິຈ຺ຈໂຕ…ເປ… ໂທມນສ຺ສໍ ອຸປ຺ປຊ຺ຊຕິ, ທິພ຺ເພນ ຈກ຺ຂຸນາ ຣູປໍ ປສ຺ສຕິ, ທິພ຺ພາຍ ໂສຕຘາຕຸຍາ ສທ຺ທໍ ສຸຓາຕິ. ອຊ຺ຌຕ຺ຕໍ ຣູປາຍຕນໍ ພຫິທ຺ຘາ ຈກ຺ຂຸວິຎ຺ຎາຓສ຺ສ…ເປ… ອຊ຺ຌຕ຺ຕໍ ໂຜຏ຺ຐພ຺ພາຍຕນໍ ພຫິທ຺ຘາ ກາຍວິຎ຺ຎາຓສ຺ສ ປຸເຣຊາຕປຈ຺ຈເຍນ ປຈ຺ຈໂຍ. (໒)

໓໗. ພຫິທ຺ຘາ ຘມ຺ໂມ ພຫິທ຺ຘາ ຘມ຺ມສ຺ສ ປຸເຣຊາຕປຈ຺ຈເຍນ ປຈ຺ຈໂຍ – ອາຣມ຺ມຓປຸເຣຊາຕໍ, ວຕ຺ຖຸປຸເຣຊາຕໍ. ອາຣມ຺ມຓປຸເຣຊາຕໍ – ປໂຣ ພຫິທ຺ຘາ ຈກ຺ຂຸໍ…ເປ… ວຕ຺ຖຸໍ ອນິຈ຺ຈໂຕ…ເປ… ທິພ຺ເພນ ຈກ຺ຂຸນາ ຣູປໍ ປສ຺ສຕິ, ທິພ຺ພາຍ ໂສຕຘາຕຸຍາ ສທ຺ທໍ ສຸຓາຕິ. ພຫິທ຺ຘາ ຣູປາຍຕນໍ ພຫິທ຺ຘາ ຈກ຺ຂຸວິຎ຺ຎາຓສ຺ສ…ເປ… ພຫິທ຺ຘາ ໂຜຏ຺ຐພ຺ພາຍຕນໍ ພຫິທ຺ຘາ ກາຍວິຎ຺ຎາຓສ຺ສ…ເປ…. ວຕ຺ຖຸປຸເຣຊາຕໍ – ພຫິທ຺ຘາ ຈກ຺ຂາຍຕນໍ…ເປ… ກາຍາຍຕນໍ…ເປ… ວຕ຺ຖຸ ພຫິທ຺ຘາ ຂນ຺ຘານໍ ປຸເຣຊາຕປຈ຺ຈເຍນ ປຈ຺ຈໂຍ. (໑)

ພຫິທ຺ຘາ ຘມ຺ໂມ ອຊ຺ຌຕ຺ຕສ຺ສ ຘມ຺ມສ຺ສ ປຸເຣຊາຕປຈ຺ຈເຍນ ປຈ຺ຈໂຍ. ອາຣມ຺ມຓປຸເຣຊາຕໍ – ພຫິທ຺ຘາ ຈກ຺ຂຸໍ…ເປ… ວຕ຺ຖຸໍ ອນິຈ຺ຈໂຕ…ເປ… ໂທມນສ຺ສໍ ອຸປ຺ປຊ຺ຊຕິ, ທິພ຺ເພນ ຈກ຺ຂຸນາ ຣູປໍ ປສ຺ສຕິ, ທິພ຺ພາຍ ໂສຕຘາຕຸຍາ ສທ຺ທໍ ສຸຓາຕິ. ພຫິທ຺ຘາ ຣູປາຍຕນໍ ອຊ຺ຌຕ຺ຕສ຺ສ ຈກ຺ຂຸວິຎ຺ຎາຓສ຺ສ…ເປ… ພຫິທ຺ຘາ ໂຜຏ຺ຐພ຺ພາຍຕນໍ ອຊ຺ຌຕ຺ຕສ຺ສ ກາຍວິຎ຺ຎາຓສ຺ສ ປຸເຣຊາຕປຈ຺ຈເຍນ ປຈ຺ຈໂຍ. (໒)

໓໘. ອຊ຺ຌຕ຺ໂຕ ຈ ພຫິທ຺ຘາ ຈ ຘມ຺ມາ ອຊ຺ຌຕ຺ຕສ຺ສ ຘມ຺ມສ຺ສ ປຸເຣຊາຕປຈ຺ຈເຍນ ປຈ຺ຈໂຍ – ອາຣມ຺ມຓປຸເຣຊາຕໍ, ວຕ຺ຖຸປຸເຣຊາຕໍ. ພຫິທ຺ຘາ ຣູປາຍຕນຎ຺ຈ ອຊ຺ຌຕ຺ຕໍ ຈກ຺ຂາຍຕນຎ຺ຈ ອຊ຺ຌຕ຺ຕສ຺ສ ຈກ຺ຂຸວິຎ຺ຎາຓສ຺ສ ປຸເຣຊາຕປຈ຺ຈເຍນ ປຈ຺ຈໂຍ…ເປ… ພຫິທ຺ຘາ ໂຜຏ຺ຐພ຺ພາຍຕນຎ຺ຈ ອຊ຺ຌຕ຺ຕໍ ກາຍາຍຕນຎ຺ຈ ອຊ຺ຌຕ຺ຕສ຺ສ ກາຍວິຎ຺ຎາຓສ຺ສ…ເປ… ພຫິທ຺ຘາ ຣູປາຍຕນຎ຺ຈ ອຊ຺ຌຕ຺ຕໍ ວຕ຺ຖຸ ຈ…ເປ… ພຫິທ຺ຘາ ໂຜຏ຺ຐພ຺ພາຍຕນຎ຺ຈ ອຊ຺ຌຕ຺ຕໍ ວຕ຺ຖຸ ຈ ອຊ຺ຌຕ຺ຕານໍ ຂນ຺ຘານໍ ປຸເຣຊາຕປຈ຺ຈເຍນ ປຈ຺ຈໂຍ. (໑)

ອຊ຺ຌຕ຺ໂຕ ຈ ພຫິທ຺ຘາ ຈ ຘມ຺ມາ ພຫິທ຺ຘາ ຘມ຺ມສ຺ສ ປຸເຣຊາຕປຈ຺ຈເຍນ ປຈ຺ຈໂຍ – ອາຣມ຺ມຓປຸເຣຊາຕໍ, ວຕ຺ຖຸປຸເຣຊາຕໍ. ອຊ຺ຌຕ຺ຕໍ ຣູປາຍຕນຎ຺ຈ ພຫິທ຺ຘາ ຈກ຺ຂາຍຕນຎ຺ຈ ພຫິທ຺ຘາ ຈກ຺ຂຸວິຎ຺ຎາຓສ຺ສ ປຸເຣຊາຕປຈ຺ຈເຍນ ປຈ຺ຈໂຍ…ເປ… ອຊ຺ຌຕ຺ຕໍ ໂຜຏ຺ຐພ຺ພາຍຕນຎ຺ຈ ພຫິທ຺ຘາ ກາຍາຍຕນຎ຺ຈ ພຫິທ຺ຘາ ກາຍວິຎ຺ຎາຓສ຺ສ ປຸເຣຊາຕປຈ຺ຈເຍນ ປຈ຺ຈໂຍ. ອຊ຺ຌຕ຺ຕໍ ຣູປາຍຕນຎ຺ຈ ພຫິທ຺ຘາ ວຕ຺ຖຸ ຈ…ເປ… ອຊ຺ຌຕ຺ຕໍ ໂຜຏ຺ຐພ຺ພາຍຕນຎ຺ຈ ພຫິທ຺ຘາ ວຕ຺ຖຸ ຈ ພຫິທ຺ຘາ ຂນ຺ຘານໍ ປຸເຣຊາຕປຈ຺ຈເຍນ ປຈ຺ຈໂຍ. (໒)

ປຈ຺ຉາຊາຕປຈ຺ຈໂຍ

໓໙. ອຊ຺ຌຕ຺ໂຕ ຘມ຺ໂມ ອຊ຺ຌຕ຺ຕສ຺ສ ຘມ຺ມສ຺ສ ປຈ຺ຉາຊາຕປຈ຺ຈເຍນ ປຈ຺ຈໂຍ – ປຈ຺ຉາຊາຕາ ອຊ຺ຌຕ຺ຕາ ຂນ຺ຘາ ປຸເຣຊາຕສ຺ສ ອິມສ຺ສ ກາຍສ຺ສ ປຈ຺ຉາຊາຕປຈ຺ຈເຍນ ປຈ຺ຈໂຍ. (໑)

ພຫິທ຺ຘາ ຘມ຺ໂມ ພຫິທ຺ຘາ ຘມ຺ມສ຺ສ ປຈ຺ຉາຊາຕປຈ຺ຈເຍນ ປຈ຺ຈໂຍ – ປຈ຺ຉາຊາຕາ ພຫິທ຺ຘາ ຂນ຺ຘາ ປຸເຣຊາຕສ຺ສ ອິມສ຺ສ ກາຍສ຺ສ ປຈ຺ຉາຊາຕປຈ຺ຈເຍນ ປຈ຺ຈໂຍ. (໑)

ອາເສວນປຈ຺ຈໂຍ

໔໐. ອຊ຺ຌຕ຺ໂຕ ຘມ຺ໂມ ອຊ຺ຌຕ຺ຕສ຺ສ ຘມ຺ມສ຺ສ ອາເສວນປຈ຺ຈເຍນ ປຈ຺ຈໂຍ – ປຸຣິມາ ປຸຣິມາ ອຊ຺ຌຕ຺ຕາ ຂນ຺ຘາ ປຈ຺ຉິມານໍ ປຈ຺ຉິມານໍ ອຊ຺ຌຕ຺ຕານໍ ຂນ຺ຘານໍ ອາເສວນປຈ຺ຈເຍນ ປຈ຺ຈໂຍ. ອນຸໂລມໍ ໂຄຕ຺ຣຠຸສ຺ສ… ອນຸໂລມໍ ໂວທານສ຺ສ… ໂຄຕ຺ຣຠຸ ມຄ຺ຄສ຺ສ… ໂວທານໍ ມຄ຺ຄສ຺ສ ອາເສວນປຈ຺ຈເຍນ ປຈ຺ຈໂຍ. (໑)

ພຫິທ຺ຘາ ຘມ຺ໂມ ພຫິທ຺ຘາ ຘມ຺ມສ຺ສ ອາເສວນປຈ຺ຈເຍນ ປຈ຺ຈໂຍ – ປຸຣິມາ ປຸຣິມາ…ເປ… (ອຊ຺ຌຕ຺ຕສທິສໍເຍວ).

ກມ຺ມປຈ຺ຈໂຍ

໔໑. ອຊ຺ຌຕ຺ໂຕ ຘມ຺ໂມ ອຊ຺ຌຕ຺ຕສ຺ສ ຘມ຺ມສ຺ສ ກມ຺ມປຈ຺ຈເຍນ ປຈ຺ຈໂຍ – ສຫຊາຕາ, ນານາກ຺ຂຓິກາ. ສຫຊາຕາ – ອຊ຺ຌຕ຺ຕາ ເຈຕນາ ສມ຺ປຍຸຕ຺ຕການໍ ຂນ຺ຘານໍ ຈິຕ຺ຕສມຸຏ຺ຐານານຎ຺ຈ ຣູປານໍ ກມ຺ມປຈ຺ຈເຍນ ປຈ຺ຈໂຍ. ນານາກ຺ຂຓິກາ – ອຊ຺ຌຕ຺ຕາ ເຈຕນາ ວິປາການໍ ອຊ຺ຌຕ຺ຕານໍ ຂນ຺ຘານໍ ກຏຕ຺ຕາ ຈ ຣູປານໍ ກມ຺ມປຈ຺ຈເຍນ ປຈ຺ຈໂຍ. (໑)

ພຫິທ຺ຘາ ຘມ຺ໂມ ພຫິທ຺ຘາ ຘມ຺ມສ຺ສ ກມ຺ມປຈ຺ຈເຍນ ປຈ຺ຈໂຍ – ສຫຊາຕາ, ນານາກ຺ຂຓິກາ. ສຫຊາຕາ – ພຫິທ຺ຘາ ເຈຕນາ ສມ຺ປຍຸຕ຺ຕການໍ ຂນ຺ຘານໍ ຈິຕ຺ຕສມຸຏ຺ຐານານຎ຺ຈ ຣູປານໍ ກມ຺ມປຈ຺ຈເຍນ ປຈ຺ຈໂຍ. ນານາກ຺ຂຓິກາ – ພຫິທ຺ຘາ ເຈຕນາ ວິປາການໍ ພຫິທ຺ຘາ ຂນ຺ຘານໍ ກຏຕ຺ຕາ ຈ ຣູປານໍ ກມ຺ມປຈ຺ຈເຍນ ປຈ຺ຈໂຍ. (໑)

ວິປາກປຈ຺ຈໂຍ

໔໒. ອຊ຺ຌຕ຺ໂຕ ຘມ຺ໂມ ອຊ຺ຌຕ຺ຕສ຺ສ ຘມ຺ມສ຺ສ ວິປາກປຈ຺ຈເຍນ ປຈ຺ຈໂຍ…ເປ… (ປຣິປຸຓ຺ຓໍ, ປຏິຈ຺ຈວາຣສທິສໍ).

ອາຫາຣປຈ຺ຈໂຍ

໔໓. ອຊ຺ຌຕ຺ໂຕ ຘມ຺ໂມ ອຊ຺ຌຕ຺ຕສ຺ສ ຘມ຺ມສ຺ສ ອາຫາຣປຈ຺ຈເຍນ ປຈ຺ຈໂຍ – ອຊ຺ຌຕ຺ຕາ ອາຫາຣາ ສມ຺ປຍຸຕ຺ຕການໍ ຂນ຺ຘານໍ ຈິຕ຺ຕສມຸຏ຺ຐານານຎ຺ຈ ຣູປານໍ ອາຫາຣປຈ຺ຈເຍນ ປຈ຺ຈໂຍ. ປຏິສນ຺ຘິກ຺ຂເຓ…ເປ… ອຊ຺ຌຕ຺ໂຕ ກພຬີກາໂຣ ອາຫາໂຣ ອຊ຺ຌຕ຺ຕສ຺ສ ກາຍສ຺ສ ອາຫາຣປຈ຺ຈເຍນ ປຈ຺ຈໂຍ. (໑)

ອຊ຺ຌຕ຺ໂຕ ຘມ຺ໂມ ພຫິທ຺ຘາ ຘມ຺ມສ຺ສ ອາຫາຣປຈ຺ຈເຍນ ປຈ຺ຈໂຍ – ອຊ຺ຌຕ຺ໂຕ ກພຬີກາໂຣ ອາຫາໂຣ ພຫິທ຺ຘາ ກາຍສ຺ສ ອາຫາຣປຈ຺ຈເຍນ ປຈ຺ຈໂຍ. (໒)

ພຫິທ຺ຘາ ຘມ຺ໂມ ພຫິທ຺ຘາ ຘມ຺ມສ຺ສ ອາຫາຣປຈ຺ຈເຍນ ປຈ຺ຈໂຍ (ປວຕ຺ຕິປຏິສນ຺ຘິ) ພຫິທ຺ຘາ ກພຬີກາໂຣ ອາຫາໂຣ ພຫິທ຺ຘາ ກາຍສ຺ສ ອາຫາຣປຈ຺ຈເຍນ ປຈ຺ຈໂຍ. (໑)

ພຫິທ຺ຘາ ຘມ຺ໂມ ອຊ຺ຌຕ຺ຕສ຺ສ ຘມ຺ມສ຺ສ ອາຫາຣປຈ຺ຈເຍນ ປຈ຺ຈໂຍ – ພຫິທ຺ຘາ ກພຬີກາໂຣ ອາຫາໂຣ ອຊ຺ຌຕ຺ຕສ຺ສ ກາຍສ຺ສ ອາຫາຣປຈ຺ຈເຍນ ປຈ຺ຈໂຍ. (໒)

໔໔. ອຊ຺ຌຕ຺ໂຕ ຘມ຺ໂມ ຈ ພຫິທ຺ຘາ ຘມ຺ໂມ ຈ ອຊ຺ຌຕ຺ຕສ຺ສ ຘມ຺ມສ຺ສ ອາຫາຣປຈ຺ຈເຍນ ປຈ຺ຈໂຍ – ອຊ຺ຌຕ຺ໂຕ ກພຬີກາໂຣ ອາຫາໂຣ ຈ ພຫິທ຺ຘາ ກພຬີກາໂຣ ອາຫາໂຣ ຈ ອຊ຺ຌຕ຺ຕສ຺ສ ກາຍສ຺ສ ອາຫາຣປຈ຺ຈເຍນ ປຈ຺ຈໂຍ. (໑)

ອຊ຺ຌຕ຺ໂຕ ຘມ຺ໂມ ຈ ພຫິທ຺ຘາ ຘມ຺ໂມ ຈ ພຫິທ຺ຘາ ຘມ຺ມສ຺ສ ອາຫາຣປຈ຺ຈເຍນ ປຈ຺ຈໂຍ – ອຊ຺ຌຕ຺ໂຕ ກພຬີກາໂຣ ອາຫາໂຣ ຈ ພຫິທ຺ຘາ ກພຬີກາໂຣ ອາຫາໂຣ ຈ ພຫິທ຺ຘາ ກາຍສ຺ສ ອາຫາຣປຈ຺ຈເຍນ ປຈ຺ຈໂຍ. (໒)

ອິນ຺ທ຺ຣິຍປຈ຺ຈຍາທິ

໔໕. ອຊ຺ຌຕ຺ໂຕ ຘມ຺ໂມ ອຊ຺ຌຕ຺ຕສ຺ສ ຘມ຺ມສ຺ສ ອິນ຺ທ຺ຣິຍປຈ຺ຈເຍນ ປຈ຺ຈໂຍ, ອຊ຺ຌຕ຺ຕິກາ ອິນ຺ທ຺ຣິຍາ (ຣູປຊີວິຕິນ຺ທ຺ຣິຍມ຺ປິ ວິຕ຺ຖາເຣຕພ຺ພໍ)… ຌານປຈ຺ຈເຍນ ປຈ຺ຈໂຍ… ມຄ຺ຄປຈ຺ຈເຍນ ປຈ຺ຈໂຍ… ສມ຺ປຍຸຕ຺ຕປຈ຺ຈເຍນ ປຈ຺ຈໂຍ… ວິປ຺ປຍຸຕ຺ຕປຈ຺ຈເຍນ ປຈ຺ຈໂຍ – ສຫຊາຕໍ, ປຸເຣຊາຕໍ, ປຈ຺ຉາຊາຕໍ (ມາຕິກາປທານິ ອນຸມຊ຺ຊນ຺ເຕນ ວິຕ຺ຖາເຣຕພ຺ພານິ).

ພຫິທ຺ຘາ ຘມ຺ໂມ ພຫິທ຺ຘາ ຘມ຺ມສ຺ສ ວິປ຺ປຍຸຕ຺ຕປຈ຺ຈເຍນ ປຈ຺ຈໂຍ – ສຫຊາຕໍ, ປຸເຣຊາຕໍ, ປຈ຺ຉາຊາຕໍ (ສໍຂິຕ຺ຕໍ).

ອຕ຺ຖິປຈ຺ຈໂຍ

໔໖. ອຊ຺ຌຕ຺ໂຕ ຘມ຺ໂມ ອຊ຺ຌຕ຺ຕສ຺ສ ຘມ຺ມສ຺ສ ອຕ຺ຖິປຈ຺ຈເຍນ ປຈ຺ຈໂຍ – ສຫຊາຕໍ, ປຸເຣຊາຕໍ, ປຈ຺ຉາຊາຕໍ, ອາຫາຣໍ, ອິນ຺ທ຺ຣິຍໍ. ສຫຊາໂຕ – ອຊ຺ຌຕ຺ໂຕ ເອໂກ ຂນ຺ໂຘ ຕິຓ຺ຓນ຺ນໍ ຂນ຺ຘານໍ ຈິຕ຺ຕສມຸຏ຺ຐານານຎ຺ຈ ຣູປານໍ…ເປ… ທ຺ເວ ຂນ຺ເຘ…ເປ… ປຏິສນ຺ຘິກ຺ຂເຓ…ເປ… ຂນ຺ຘາ ວຕ຺ຖຸສ຺ສ …ເປ… ວຕ຺ຖຸ ຂນ຺ຘານໍ…ເປ… ເອກໍ ມຫາຠູຕໍ…ເປ… ອສຎ຺ຎສຕ຺ຕານໍ ເອກໍ ມຫາຠູຕໍ ຕິຓ຺ຓນ຺ນໍ ມຫາຠູຕານໍ…ເປ…. ປຸເຣຊາຕໍ – ຈກ຺ຂຸໍ…ເປ… ວຕ຺ຖຸໍ (ປຸເຣຊາຕສທິສໍ), ວຕ຺ຖຸ ອຊ຺ຌຕ຺ຕານໍ ຂນ຺ຘານໍ ອຕ຺ຖິປຈ຺ຈເຍນ ປຈ຺ຈໂຍ. ປຈ຺ຉາຊາຕາ – ອຊ຺ຌຕ຺ຕາ ຂນ຺ຘາ ປຸເຣຊາຕສ຺ສ ອິມສ຺ສ ກາຍສ຺ສ ອຕ຺ຖິປຈ຺ຈເຍນ ປຈ຺ຈໂຍ. ອຊ຺ຌຕ຺ໂຕ ກພຬີກາໂຣ ອາຫາໂຣ ອຊ຺ຌຕ຺ຕສ຺ສ ກາຍສ຺ສ…ເປ… ຣູປຊີວິຕິນ຺ທ຺ຣິຍໍ ກຏຕ຺ຕາຣູປານໍ…ເປ…. (໑)

ອຊ຺ຌຕ຺ໂຕ ຘມ຺ໂມ ພຫິທ຺ຘາ ຘມ຺ມສ຺ສ ອຕ຺ຖິປຈ຺ຈເຍນ ປຈ຺ຈໂຍ – ປຸເຣຊາຕໍ, ອາຫາຣໍ. ປຸເຣຊາຕໍ – ປໂຣ ອຊ຺ຌຕ຺ຕໍ ຈກ຺ຂຸໍ…ເປ… ວຕ຺ຖຸໍ ອນິຈ຺ຈໂຕ…ເປ… ວິປສ຺ສຕິ, ທິພ຺ເພນ ຈກ຺ຂຸນາ ຣູປໍ ປສ຺ສຕິ, ທິພ຺ພາຍ ໂສຕຘາຕຸຍາ ສທ຺ທໍ ສຸຓາຕິ, ອຊ຺ຌຕ຺ຕໍ ຣູປາຍຕນໍ…ເປ… ໂຜຏ຺ຐພ຺ພາຍຕນໍ ພຫິທ຺ຘາ ກາຍວິຎ຺ຎາຓສ຺ສ ອຕ຺ຖິປຈ຺ຈເຍນ ປຈ຺ຈໂຍ. ອຊ຺ຌຕ຺ໂຕ ກພຬີກາໂຣ ອາຫາໂຣ ພຫິທ຺ຘາ ກາຍສ຺ສ ອຕ຺ຖິປຈ຺ຈເຍນ ປຈ຺ຈໂຍ. (໒)

໔໗. ພຫິທ຺ຘາ ຘມ຺ໂມ ພຫິທ຺ຘາ ຘມ຺ມສ຺ສ ອຕ຺ຖິປຈ຺ຈເຍນ ປຈ຺ຈໂຍ – ສຫຊາຕໍ, ປຸເຣຊາຕໍ, ປຈ຺ຉາຊາຕໍ, ອາຫາຣໍ, ອິນ຺ທ຺ຣິຍໍ (ພຫິທ຺ຘາ ນິນ຺ນານາກຣຓໍ, ມາຕິກາປທານິ ວິຕ຺ຖາເຣຕພ຺ພານິ). (໑)

ພຫິທ຺ຘາ ຘມ຺ໂມ ອຊ຺ຌຕ຺ຕສ຺ສ ຘມ຺ມສ຺ສ ອຕ຺ຖິປຈ຺ຈເຍນ ປຈ຺ຈໂຍ – ປຸເຣຊາຕໍ, ອາຫາຣໍ. ປຸເຣຊາຕໍ – ພຫິທ຺ຘາ ຈກ຺ຂຸໍ…ເປ… ວຕ຺ຖຸໍ…ເປ… ທິພ຺ເພນ ຈກ຺ຂຸນາ ຣູປໍ ປສ຺ສຕິ, ທິພ຺ພາຍ ໂສຕຘາຕຸຍາ ສທ຺ທໍ ສຸຓາຕິ, ພຫິທ຺ຘາ ຣູປາຍຕນໍ…ເປ… ໂຜຏ຺ຐພ຺ພາຍຕນໍ ອຊ຺ຌຕ຺ຕສ຺ສ ກາຍວິຎ຺ຎາຓສ຺ສ ອຕ຺ຖິປຈ຺ຈເຍນ ປຈ຺ຈໂຍ. ພຫິທ຺ຘາ ກພຬີກາໂຣ ອາຫາໂຣ ອຊ຺ຌຕ຺ຕສ຺ສ ກາຍສ຺ສ ອຕ຺ຖິປຈ຺ຈເຍນ ປຈ຺ຈໂຍ. (໒)

໔໘. ອຊ຺ຌຕ຺ໂຕ ຘມ຺ໂມ ຈ ພຫິທ຺ຘາ ຘມ຺ໂມ ຈ ອຊ຺ຌຕ຺ຕສ຺ສ ຘມ຺ມສ຺ສ ອຕ຺ຖິປຈ຺ຈເຍນ ປຈ຺ຈໂຍ – ປຸເຣຊາຕໍ, ອາຫາຣໍ. ປຸເຣຊາຕໍ – ພຫິທ຺ຘາ ຣູປາຍຕນຎ຺ຈ ອຊ຺ຌຕ຺ຕໍ ຈກ຺ຂຸ ຈ ອຊ຺ຌຕ຺ຕສ຺ສ ຈກ຺ຂຸວິຎ຺ຎາຓສ຺ສ…ເປ… ພຫິທ຺ຘາ ໂຜຏ຺ຐພ຺ພາຍຕນຎ຺ຈ ອຊ຺ຌຕ຺ຕໍ ກາຍາຍຕນຎ຺ຈ ອຊ຺ຌຕ຺ຕສ຺ສ ກາຍວິຎ຺ຎາຓສ຺ສ ອຕ຺ຖິປຈ຺ຈເຍນ ປຈ຺ຈໂຍ. ພຫິທ຺ຘາ ຣູປາຍຕນຎ຺ຈ ອຊ຺ຌຕ຺ຕໍ ວຕ຺ຖຸ ຈ…ເປ… ພຫິທ຺ຘາ ໂຜຏ຺ຐພ຺ພາຍຕນຎ຺ຈ ອຊ຺ຌຕ຺ຕໍ ວຕ຺ຖຸ ຈ ອຊ຺ຌຕ຺ຕານໍ ຂນ຺ຘານໍ ອຕ຺ຖິປຈ຺ຈເຍນ ປຈ຺ຈໂຍ. ອາຫາຣໍ – ອຊ຺ຌຕ຺ໂຕ ກພຬີກາໂຣ ອາຫາໂຣ ຈ ພຫິທ຺ຘາ ກພຬີກາໂຣ ອາຫາໂຣ ຈ ອຊ຺ຌຕ຺ຕສ຺ສ ກາຍສ຺ສ ອຕ຺ຖິປຈ຺ຈເຍນ ປຈ຺ຈໂຍ. (໑)

ອຊ຺ຌຕ຺ໂຕ ຘມ຺ໂມ ຈ ພຫິທ຺ຘາ ຘມ຺ໂມ ຈ ພຫິທ຺ຘາ ຘມ຺ມສ຺ສ ອຕ຺ຖິປຈ຺ຈເຍນ ປຈ຺ຈໂຍ – ປຸເຣຊາຕໍ, ອາຫາຣໍ. ປຸເຣຊາຕໍ – ອຊ຺ຌຕ຺ຕໍ ຣູປາຍຕນຎ຺ຈ ພຫິທ຺ຘາ ຈກ຺ຂາຍຕນຎ຺ຈ ພຫິທ຺ຘາ ຈກ຺ຂຸວິຎ຺ຎາຓສ຺ສ ອຕ຺ຖິປຈ຺ຈເຍນ ປຈ຺ຈໂຍ…ເປ… ອຊ຺ຌຕ຺ຕໍ ໂຜຏ຺ຐພ຺ພາຍຕນຎ຺ຈ ພຫິທ຺ຘາ ກາຍາຍຕນຎ຺ຈ ພຫິທ຺ຘາ ກາຍວິຎ຺ຎາຓສ຺ສ ອຕ຺ຖິປຈ຺ຈເຍນ ປຈ຺ຈໂຍ. ອຊ຺ຌຕ຺ຕໍ ຣູປາຍຕນຎ຺ຈ ພຫິທ຺ຘາ ວຕ຺ຖຸ ຈ ພຫິທ຺ຘາ ຂນ຺ຘານໍ ອຕ຺ຖິປຈ຺ຈເຍນ ປຈ຺ຈໂຍ…ເປ… ອຊ຺ຌຕ຺ຕໍ ໂຜຏ຺ຐພ຺ພາຍຕນຎ຺ຈ ພຫິທ຺ຘາ ວຕ຺ຖຸ ຈ ພຫິທ຺ຘາ ຂນ຺ຘານໍ ອຕ຺ຖິປຈ຺ຈເຍນ ປຈ຺ຈໂຍ. ອາຫາຣໍ – ອຊ຺ຌຕ຺ໂຕ ກພຬີກາໂຣ ອາຫາໂຣ ຈ ພຫິທ຺ຘາ ກພຬີກາໂຣ ອາຫາໂຣ ຈ ພຫິທ຺ຘາ ກາຍສ຺ສ ອຕ຺ຖິປຈ຺ຈເຍນ ປຈ຺ຈໂຍ. (໒)

ນຕ຺ຖິວິຄຕາວິຄຕປຈ຺ຈຍາ

໔໙. ອຊ຺ຌຕ຺ໂຕ ຘມ຺ໂມ ອຊ຺ຌຕ຺ຕສ຺ສ ຘມ຺ມສ຺ສ ນຕ຺ຖິປຈ຺ຈເຍນ ປຈ຺ຈໂຍ… ວິຄຕປຈ຺ຈເຍນ ປຈ຺ຈໂຍ… ອວິຄຕປຈ຺ຈເຍນ ປຈ຺ຈໂຍ.