໒. ສຸຕ຺ຕສາຘນໍ

໒໙໘. ນ ວຕ຺ຕພ຺ພໍ – ‘‘ອຕີຕານາຄຕາ ຂນ຺ຘາ ຘາຕຸ ອາຍຕນໍ ນຕ຺ຖິ ເຈເຕ’’ຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ຕໂຍເມ, ຠິກ຺ຂເວ, ນິຣຸຕ຺ຕິປຖາ ອຘິວຈນປຖາ ປຎ຺ຎຕ຺ຕິ…ເປ… ວິຎ຺ຎູຫີຕິ…ເປ…’’. ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ນ ວຕ຺ຕພ຺ພໍ – ‘‘ອຕີຕານາຄຕາ ຂນ຺ຘາ ຘາຕຸ ອາຍຕນໍ ນຕ຺ຖິ ເຈເຕ’’ຕິ.

ອຕີຕານາຄຕາ ຂນ຺ຘາ ຘາຕຸ ອາຍຕນໍ ນຕ຺ຖິ ເຈເຕຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ຍໍ ກິຎ຺ຈິ, ຠິກ຺ຂເວ, ຣູປໍ ອຕີຕານາຄຕປຈ຺ຈຸປ຺ປນ຺ນໍ ອຊ຺ຌຕ຺ຕໍ ວາ ພຫິທ຺ຘາ ວາ ໂອຬາຣິກໍ ວາ ສຸຂຸມໍ ວາ ຫີນໍ ວາ ປຓີຕໍ ວາ ຍໍ ທູເຣ ສນ຺ຕິເກ ວາ, ອຍໍ ວຸຈ຺ຈຕິ ຣູປກ຺ຂນ຺ໂຘ. ຍາ ກາຈິ ເວທນາ… ຍາ ກາຈິ ສຎ຺ຎາ… ເຍ ເກຈິ ສງ຺ຂາຣາ… ຍໍ ກິຎ຺ຈິ ວິຎ຺ຎາຓໍ ອຕີຕານາຄຕປຈ຺ຈຸປ຺ປນ຺ນໍ…ເປ… ອຍໍ ວຸຈ຺ຈຕິ ວິຎ຺ຎາຓກ຺ຂນ຺ໂຘ’’ຕິ. ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ນ ວຕ຺ຕພ຺ພໍ – ‘‘ອຕີຕານາຄຕາ ຂນ຺ຘາ ຘາຕຸ ອາຍຕນໍ ນຕ຺ຖິ ເຈເຕ’’ຕິ.

ອຕີຕກ຺ຂນ຺ຘາທິກຖາ ນິຏ຺ຐິຕາ.