໒໓. ເຕວີສຕິມວຄ຺ໂຄ

(໒໑໘) ໑. ເອກາຘິປ຺ປາຍກຖາ

໙໐໘. ເອກາຘິປ຺ປາເຍນ ເມຖຸໂນ ຘມ຺ໂມ ປຏິເສວິຕພ຺ໂພຕິ? ອາມນ຺ຕາ. ເອກາຘິປ຺ປາເຍນ ອສ຺ສມເຓນ ໂຫຕພ຺ພໍ, ອຠິກ຺ຂຸນາ ໂຫຕພ຺ພໍ, ຉິນ຺ນມູເລນ ໂຫຕພ຺ພໍ ປາຣາຊິເກນ ໂຫຕພ຺ພນ຺ຕິ? ນ ເຫວໍ ວຕ຺ຕພ຺ເພ…ເປ… ເອກາຘິປ຺ປາເຍນ ເມຖຸໂນ ຘມ຺ໂມ ປຏິເສວິຕພ຺ໂພຕິ? ອາມນ຺ຕາ. ເອກາຘິປ຺ປາເຍນ ປາໂຓ ຫນ຺ຕພ຺ໂພ, ອທິນ຺ນໍ ອາທິຍິຕພ຺ພໍ, ມຸສາ ຠຓິຕພ຺ພາ, ປິສຸຓໍ ຠຓິຕພ຺ພໍ, ຜຣຸສໍ ຠຓິຕພ຺ພໍ, ສມ຺ຜໍ ປລປິຕພ຺ພໍ, ສນ຺ຘິ ເຉທິຕພ຺ໂພ, ນິລ຺ໂລປໍ ຫາຕພ຺ພໍ, ເອກາຄາຣິກໍ ກາຕພ຺ພໍ, ປຣິປນ຺ເຖ ຐາຕພ຺ພໍ, ປຣທາໂຣ ຄນ຺ຕພ຺ໂພ, ຄາມຆາຕໂກ ກາຕພ຺ໂພ, ນິຄມຆາຕໂກ ກາຕພ຺ໂພຕິ? ນ ເຫວໍ ວຕ຺ຕພ຺ເພ…ເປ….

ເອກາຘິປ຺ປາຍກຖາ ນິຏ຺ຐິຕາ.

໒໓. ເຕວີສຕິມວຄ຺ໂຄ

(໒໑໙) ໒. ອຣຫນ຺ຕວຓ຺ຓກຖາ

໙໐໙. ອຣຫນ຺ຕານໍ ວຓ຺ເຓນ ອມນຸສ຺ສາ ເມຖຸນໍ ຘມ຺ມໍ ປຏິເສວນ຺ຕີຕິ? ອາມນ຺ຕາ. ອຣຫນ຺ຕານໍ ວຓ຺ເຓນ ອມນຸສ຺ສາ ປາຓໍ ຫນນ຺ຕິ…ເປ… ອທິນ຺ນໍ ອາທິຍນ຺ຕິ, ມຸສາ ຠຓນ຺ຕິ, ປິສຸຓໍ ຠຓນ຺ຕິ, ຜຣຸສໍ ຠຓນ຺ຕິ, ສມ຺ຜໍ ປລປນ຺ຕິ, ສນ຺ຘິໍ ຉິນ຺ທນ຺ຕິ, ນິລ຺ໂລປໍ ຫຣນ຺ຕິ, ເອກາຄາຣິກໍ ກໂຣນ຺ຕິ, ປຣິປນ຺ເຖ ຕິຏ຺ຐນ຺ຕິ, ປຣທາຣໍ ຄຈ຺ຉນ຺ຕິ, ຄາມຆາຕກໍ ກໂຣນ຺ຕິ…ເປ… ນິຄມຆາຕກໍ ກໂຣນ຺ຕີຕິ? ນ ເຫວໍ ວຕ຺ຕພ຺ເພ…ເປ….

ອຣຫນ຺ຕວຓ຺ຓກຖາ ນິຏ຺ຐິຕາ.

໒໓. ເຕວີສຕິມວຄ຺ໂຄ

(໒໒໐-໔) ໓-໗. ອິສ຺ສຣິຍກາມກາຣິກາທິກຖາ

໙໑໐. ໂພຘິສຕ຺ໂຕ ອິສ຺ສຣິຍກາມກາຣິກາເຫຕຸ ວິນິປາຕໍ ຄຈ຺ຉຕີຕິ? ອາມນ຺ຕາ. ໂພຘິສຕ຺ໂຕ ອິສ຺ສຣິຍກາມກາຣິກາເຫຕຸ ນິຣຍໍ ຄຈ຺ຉຕິ, ສຎ຺ຊີວໍ ຄຈ຺ຉຕິ, ກາລສຸຕ຺ຕໍ ຄຈ຺ຉຕິ, ຕາປນໍ ຄຈ຺ຉຕິ, ມຫາຕາປນໍ [ປຕາປນໍ (ສີ. ສ຺ຍາ. ກໍ. ປີ.)] ຄຈ຺ຉຕິ, ສງ຺ຆາຕກໍ ຄຈ຺ຉຕິ, ໂຣຣຸວໍ ຄຈ຺ຉຕິ…ເປ… ອວີຈິໍ ຄຈ຺ຉຕີຕິ? ນ ເຫວໍ ວຕ຺ຕພ຺ເພ…ເປ….

ໂພຘິສຕ຺ໂຕ ອິສ຺ສຣິຍກາມກາຣິກາເຫຕຸ ວິນິປາຕໍ ຄຈ຺ຉຕີຕິ? ອາມນ຺ຕາ. ‘‘ໂພຘິສຕ຺ໂຕ ອິສ຺ສຣິຍກາມກາຣິກາເຫຕຸ ວິນິປາຕໍ ຄຈ຺ຉຕີ’’ຕິ – ອຕ຺ເຖວ ສຸຕ຺ຕນ຺ໂຕຕິ? ນຕ຺ຖິ. ຫຎ຺ຈິ ‘‘ໂພຘິສຕ຺ໂຕ ອິສ຺ສຣິຍກາມກາຣິກາເຫຕຸ ວິນິປາຕໍ ຄຈ຺ຉຕີ’’ຕິ – ນຕ຺ເຖວ ສຸຕ຺ຕນ຺ໂຕ, ໂນ ຈ ວຕ ເຣ ວຕ຺ຕພ຺ເພ – ‘‘ໂພຘິສຕ຺ໂຕ ອິສ຺ສຣິຍກາມກາຣິກາເຫຕຸ ວິນິປາຕໍ ຄຈ຺ຉຕີ’’ຕິ.

໙໑໑. ໂພຘິສຕ຺ໂຕ ອິສ຺ສຣິຍກາມກາຣິກາເຫຕຸ ຄພ຺ຠເສຍ຺ຍໍ ໂອກ຺ກມຕີຕິ? ອາມນ຺ຕາ. ໂພຘິສຕ຺ໂຕ ອິສ຺ສຣິຍກາມກາຣິກາເຫຕຸ ນິຣຍໍ ອຸປປຊ຺ເຊຍ຺ຍ, ຕິຣຈ຺ຉານໂຍນິໍ ອຸປປຊ຺ເຊຍ຺ຍາຕິ? ນ ເຫວໍ ວຕ຺ຕພ຺ເພ…ເປ….

ໂພຘິສຕ຺ໂຕ ອິສ຺ສຣິຍກາມກາຣິກາເຫຕຸ ຄພ຺ຠເສຍ຺ຍໍ ໂອກ຺ກມຕີຕິ? ອາມນ຺ຕາ. ໂພຘິສຕ຺ໂຕ ອິທ຺ຘິມາຕິ? ນ ເຫວໍ ວຕ຺ຕພ຺ເພ…ເປ… ໂພຘິສຕ຺ໂຕ ອິທ຺ຘິມາຕິ? ອາມນ຺ຕາ. ໂພຘິສຕ຺ເຕນ ຉນ຺ທິທ຺ຘິປາໂທ ຠາວິໂຕ…ເປ… ວີຣິຍິທ຺ຘິປາໂທ…ເປ… ຈິຕ຺ຕິທ຺ຘິປາໂທ…ເປ… ວີມໍສິທ຺ຘິປາໂທ ຠາວິໂຕຕິ? ນ ເຫວໍ ວຕ຺ຕພ຺ເພ…ເປ….

ໂພຘິສຕ຺ໂຕ ອິສ຺ສຣິຍກາມກາຣິກາເຫຕຸ ຄພ຺ຠເສຍ຺ຍໍ ໂອກ຺ກມຕີຕິ? ອາມນ຺ຕາ. ‘‘ໂພຘິສຕ຺ໂຕ ອິສ຺ສຣິຍກາມກາຣິກາເຫຕຸ ຄພ຺ຠເສຍ຺ຍໍ ໂອກ຺ກມຕີ’’ຕິ – ອຕ຺ເຖວ ສຸຕ຺ຕນ຺ໂຕຕິ? ນຕ຺ຖິ. ຫຎ຺ຈິ ‘‘ໂພຘິສຕ຺ໂຕ ອິສ຺ສຣິຍກາມກາຣິກາເຫຕຸ ຄພ຺ຠເສຍ຺ຍໍ ໂອກ຺ກມຕີ’’ຕິ – ນຕ຺ເຖວ ສຸຕ຺ຕນ຺ໂຕ, ໂນ ຈ ວຕ ເຣ ວຕ຺ຕພ຺ເພ – ‘‘ໂພຘິສຕ຺ໂຕ ອິສ຺ສຣິຍກາມກາຣິກາເຫຕຸ ຄພ຺ຠເສຍ຺ຍໍ ໂອກ຺ກມຕີ’’ຕິ.

໙໑໒. ໂພຘິສຕ຺ໂຕ ອິສ຺ສຣິຍກາມກາຣິກາເຫຕຸ ທຸກ຺ກຣກາຣິກໍ ອກາສີຕິ? ອາມນ຺ຕາ. ໂພຘິສຕ຺ໂຕ ອິສ຺ສຣິຍກາມກາຣິກາເຫຕຸ ‘‘ສສ຺ສໂຕ ໂລໂກ’’ຕິ ປຈ຺ຈາຄຈ຺ຉິ, ‘‘ອສສ຺ສໂຕ ໂລໂກ’’ຕິ…ເປ… ‘‘ອນ຺ຕວາ ໂລໂກ’’ຕິ…ເປ… ‘‘ອນນ຺ຕວາ ໂລໂກ’’ຕິ… ‘‘ຕໍ ຊີວໍ ຕໍ ສຣີຣ’’ນ຺ຕິ … ‘‘ອຎ຺ຎໍ ຊີວໍ ອຎ຺ຎໍ ສຣີຣ’’ນ຺ຕິ… ‘‘ໂຫຕິ ຕຖາຄໂຕ ປຣໍ ມຣຓາ’’ຕິ… ‘‘ນ ໂຫຕິ ຕຖາຄໂຕ ປຣໍ ມຣຓາ’’ຕິ… ‘‘ໂຫຕິ ຈ ນ ຈ ໂຫຕິ ຕຖາຄໂຕ ປຣໍ ມຣຓາ’’ຕິ…ເປ… ‘‘ເນວ ໂຫຕິ ນ ນ ໂຫຕິ ຕຖາຄໂຕ ປຣໍ ມຣຓາ’’ຕິ ປຈ຺ຈາຄຈ຺ຉີຕິ? ນ ເຫວໍ ວຕ຺ຕພ຺ເພ…ເປ….

ໂພຘິສຕ຺ໂຕ ອິສ຺ສຣິຍກາມກາຣິກາເຫຕຸ ທຸກ຺ກຣກາຣິກໍ ອກາສີຕິ? ອາມນ຺ຕາ. ‘‘ໂພຘິສຕ຺ໂຕ ອິສ຺ສຣິຍກາມກາຣິກາເຫຕຸ ທຸກ຺ກຣກາຣິກໍ ອກາສີ’’ຕິ – ອຕ຺ເຖວ ສຸຕ຺ຕນ຺ໂຕຕິ? ນຕ຺ຖິ. ຫຎ຺ຈິ ‘‘ໂພຘິສຕ຺ໂຕ ອິສ຺ສຣິຍກາມກາຣິກາເຫຕຸ ທຸກ຺ກຣກາຣິກໍ ອກາສີ’’ຕິ – ນຕ຺ເຖວ ສຸຕ຺ຕນ຺ໂຕ, ໂນ ຈ ວຕ ເຣ ວຕ຺ຕພ຺ເພ – ‘‘ໂພຘິສຕ຺ໂຕ ອິສ຺ສຣິຍກາມກາຣິກາເຫຕຸ ທຸກ຺ກຣກາຣິກໍ ອກາສີ’’ຕິ.

໙໑໓. ໂພຘິສຕ຺ໂຕ ອິສ຺ສຣິຍກາມກາຣິກາເຫຕຸ ອປຣນ຺ຕປໍ [ອມຣໍ ຕປໍ (ສໍ. ນິ. ໑.໑໓໗)] ອກາສິ, ອຎ຺ຎໍ ສຕ຺ຖາຣໍ ອຸທ຺ທິສີຕິ? ອາມນ຺ຕາ. ໂພຘິສຕ຺ໂຕ ອິສ຺ສຣິຍກາມກາຣິກາເຫຕຸ ‘‘ສສ຺ສໂຕ ໂລໂກ’’ຕິ ປຈ຺ຈາຄຈ຺ຉິ…ເປ… ‘‘ເນວ ໂຫຕິ ນ ນ ໂຫຕິ ຕຖາຄໂຕ ປຣໍ ມຣຓາ’’ຕິ ປຈ຺ຈາຄຈ຺ຉີຕິ? ນ ເຫວໍ ວຕ຺ຕພ຺ເພ…ເປ….

໙໑໔. ໂພຘິສຕ຺ໂຕ ອິສ຺ສຣິຍກາມກາຣິກາເຫຕຸ ອຎ຺ຎໍ ສຕ຺ຖາຣໍ ອຸທ຺ທິສີຕິ? ອາມນ຺ຕາ. ‘‘ໂພຘິສຕ຺ໂຕ ອິສ຺ສຣິຍກາມກາຣິກາເຫຕຸ ອຎ຺ຎໍ ສຕ຺ຖາຣໍ ອຸທ຺ທິສີ’’ຕິ – ອຕ຺ເຖວ ສຸຕ຺ຕນ຺ໂຕຕິ? ນຕ຺ຖິ. ຫຎ຺ຈິ ‘‘ໂພຘິສຕ຺ໂຕ ອິສ຺ສຣິຍກາມກາຣິກາເຫຕຸ ອຎ຺ຎໍ ສຕ຺ຖາຣໍ ອຸທ຺ທິສີ’’ຕິ – ນຕ຺ເຖວ ສຸຕ຺ຕນ຺ໂຕ, ໂນ ຈ ວຕ ເຣ ວຕ຺ຕພ຺ເພ – ‘‘ໂພຘິສຕ຺ໂຕ ອິສ຺ສຣິຍກາມກາຣິກາເຫຕຸ ອຎ຺ຎໍ ສຕ຺ຖາຣໍ ອຸທ຺ທິສີ’’ຕິ.

ອິສ຺ສຣິຍກາມກາຣິກາກຖາ ນິຏ຺ຐິຕາ.

໒໓. ເຕວີສຕິມວຄ຺ໂຄ

(໒໒໕) ໘. ປຕິຣູປກຖາ

໙໑໕. ອຕ຺ຖິ ນ ຣາໂຄ ຣາຄປຕິຣູປໂກຕິ? ອາມນ຺ຕາ. ອຕ຺ຖິ ນ ຜສ຺ໂສ ຜສ຺ສປຕິຣູປໂກ, ອຕ຺ຖິ ນ ເວທນາ ເວທນາປຕິຣູປິກາ, ອຕ຺ຖິ ນ ສຎ຺ຎາ ສຎ຺ຎາປຕິຣູປິກາ, ອຕ຺ຖິ ນ ເຈຕນາ ເຈຕນາປຕິຣູປິກາ, ອຕ຺ຖິ ນ ຈິຕ຺ຕໍ ຈິຕ຺ຕປຕິຣູປກໍ, ອຕ຺ຖິ ນ ສທ຺ຘາ ສທ຺ຘາປຕິຣູປິກາ, ອຕ຺ຖິ ນ ວີຣິຍໍ ວີຣິຍປຕິຣູປກໍ, ອຕ຺ຖິ ນ ສຕິ ສຕິປຕິຣູປິກາ, ອຕ຺ຖິ ນ ສມາຘິ ສມາຘິປຕິຣູປໂກ, ອຕ຺ຖິ ນ ປຎ຺ຎາ ປຎ຺ຎາປຕິຣູປິກາຕິ? ນ ເຫວໍ ວຕ຺ຕພ຺ເພ…ເປ….

໙໑໖. ອຕ຺ຖິ ນ ໂທໂສ ໂທສປຕິຣູປໂກ, ອຕ຺ຖິ ນ ໂມໂຫ ໂມຫປຕິຣູປໂກ, ອຕ຺ຖິ ນ ກິເລໂສ ກິເລສປຕິຣູປໂກຕິ? ອາມນ຺ຕາ. ອຕ຺ຖິ ນ ຜສ຺ໂສ ຜສ຺ສປຕິຣູປໂກ…ເປ… ອຕ຺ຖິ ນ ປຎ຺ຎາ ປຎ຺ຎາປຕິຣູປິກາຕິ? ນ ເຫວໍ ວຕ຺ຕພ຺ເພ…ເປ….

ປຕິຣູປກຖາ ນິຏ຺ຐິຕາ.

໒໓. ເຕວີສຕິມວຄ຺ໂຄ

(໒໒໖) ໙. ອປຣິນິປ຺ຜນ຺ນກຖາ

໙໑໗. ຣູປໍ ອປຣິນິປ຺ຜນ຺ນນ຺ຕິ? ອາມນ຺ຕາ. ຣູປໍ ນ ອນິຈ຺ຈໍ ນ ສງ຺ຂຕໍ ນ ປຏິຈ຺ຈສມຸປ຺ປນ຺ນໍ ນ ຂຍຘມ຺ມໍ ນ ວຍຘມ຺ມໍ ນ ວິຣາຄຘມ຺ມໍ ນ ນິໂຣຘຘມ຺ມໍ ນ ວິປຣິຓາມຘມ຺ມນ຺ຕິ? ນ ເຫວໍ ວຕ຺ຕພ຺ເພ…ເປ… ນນຸ ຣູປໍ ອນິຈ຺ຈໍ ສງ຺ຂຕໍ ປຏິຈ຺ຈສມຸປ຺ປນ຺ນໍ ຂຍຘມ຺ມໍ ວຍຘມ຺ມໍ ວິຣາຄຘມ຺ມໍ ນິໂຣຘຘມ຺ມໍ ວິປຣິຓາມຘມ຺ມນ຺ຕິ? ອາມນ຺ຕາ. ຫຎ຺ຈິ ຣູປໍ ອນິຈ຺ຈໍ ສງ຺ຂຕໍ…ເປ… ວິປຣິຓາມຘມ຺ມໍ, ໂນ ຈ ວຕ ເຣ ວຕ຺ຕພ຺ເພ – ‘‘ຣູປໍ ອປຣິນິປ຺ຜນ຺ນ’’ນ຺ຕິ.

ທຸກ຺ຂຎ຺ເຎວ ປຣິນິປ຺ຜນ຺ນນ຺ຕິ? ອາມນ຺ຕາ. ນນຸ ຍທນິຈ຺ຈໍ ຕໍ ທຸກ຺ຂໍ [ສໍ. ນິ. ໓.໑໕] ວຸຕ຺ຕໍ ຠຄວຕາ – ‘‘ຣູປໍ ອນິຈ຺ຈ’’ນ຺ຕິ? ອາມນ຺ຕາ. ຫຎ຺ຈິ ຍທນິຈ຺ຈໍ ຕໍ ທຸກ຺ຂໍ ວຸຕ຺ຕໍ ຠຄວຕາ – ‘‘ຣູປໍ ອນິຈ຺ຈໍ’’, ໂນ ຈ ວຕ ເຣ ວຕ຺ຕພ຺ເພ – ‘‘ທຸກ຺ຂຎ຺ເຎວ ປຣິນິປ຺ຜນ຺ນ’’ນ຺ຕິ…ເປ….

໙໑໘. ເວທນາ …ເປ… ສຎ຺ຎາ… ສງ຺ຂາຣາ… ວິຎ຺ຎາຓໍ… ຈກ຺ຂາຍຕນໍ…ເປ… ຘມ຺ມາຍຕນໍ… ຈກ຺ຂຸຘາຕຸ… ຘມ຺ມຘາຕຸ… ຈກ຺ຂຸນ຺ທ຺ຣິຍໍ…ເປ… ອຎ຺ຎາຕາວິນ຺ທ຺ຣິຍໍ ອປຣິນິປ຺ຜນ຺ນນ຺ຕິ? ອາມນ຺ຕາ. ອຎ຺ຎາຕາວິນ຺ທ຺ຣິຍໍ ນ ອນິຈ຺ຈໍ…ເປ… ນ ວິປຣິຓາມຘມ຺ມນ຺ຕິ? ນ ເຫວໍ ວຕ຺ຕພ຺ເພ…ເປ… ນນຸ ອຎ຺ຎາຕາວິນ຺ທ຺ຣິຍໍ ອນິຈ຺ຈໍ ສງ຺ຂຕໍ…ເປ… ວິປຣິຓາມຘມ຺ມນ຺ຕິ? ອາມນ຺ຕາ. ຫຎ຺ຈິ ອຎ຺ຎາຕາວິນ຺ທ຺ຣິຍໍ ອນິຈ຺ຈໍ ສງ຺ຂຕໍ ປຏິຈ຺ຈສມຸປ຺ປນ຺ນໍ ຂຍຘມ຺ມໍ ວຍຘມ຺ມໍ ວິຣາຄຘມ຺ມໍ ນິໂຣຘຘມ຺ມໍ ວິປຣິຓາມຘມ຺ມໍ, ໂນ ຈ ວຕ ເຣ ວຕ຺ຕພ຺ເພ – ‘‘ອຎ຺ຎາຕາວິນ຺ທ຺ຣິຍໍ ອປຣິນິປ຺ຜນ຺ນ’’ນ຺ຕິ.

ທຸກ຺ຂຎ຺ເຎວ ປຣິນິປ຺ຜນ຺ນນ຺ຕິ? ອາມນ຺ຕາ. ນນຸ ຍທນິຈ຺ຈໍ ຕໍ ທຸກ຺ຂໍ ວຸຕ຺ຕໍ ຠຄວຕາ – ‘‘ອຎ຺ຎາຕາວິນ຺ທ຺ຣິຍໍ ອນິຈ຺ຈ’’ນ຺ຕິ? ອາມນ຺ຕາ. ຫຎ຺ຈິ ຍທນິຈ຺ຈໍ ຕໍ ທຸກ຺ຂໍ ວຸຕ຺ຕໍ ຠຄວຕາ – ‘‘ອຎ຺ຎາຕາວິນ຺ທ຺ຣິຍໍ ອນິຈ຺ຈໍ’’, ໂນ ຈ ວຕ ເຣ ວຕ຺ຕພ຺ເພ – ‘‘ທຸກ຺ຂຎ຺ເຎວ ປຣິນິປ຺ຜນ຺ນ’’ນ຺ຕິ.

ອປຣິນິປ຺ຜນ຺ນກຖາ ນິຏ຺ຐິຕາ.

ເຕວີສຕິມວຄ຺ໂຄ.

ຕສ຺ສຸທ຺ທານໍ –

ເອກາຘິປ຺ປາເຍນ ເມຖຸໂນ ຘມ຺ໂມ ປຏິເສວິຕພ຺ໂພ, ອຣຫນ຺ຕານໍ ວຓ຺ເຓນ ອມນຸສ຺ສາ ເມຖຸນໍ ຘມ຺ມໍ ປຏິເສວນ຺ຕິ, ໂພຘິສຕ຺ໂຕ ອິສ຺ສຣິຍກາມກາຣິກາເຫຕຸ ວິນິປາຕໍ ຄຈ຺ຉຕິ, ຄພ຺ຠເສຍ຺ຍໍ ໂອກ຺ກມຕິ, ທຸກ຺ກຣກາຣິກໍ ອກາສິ, ອປຣນ຺ຕປໍ ອກາສິ, ອຎ຺ຎໍ ສຕ຺ຖາຣໍ ອຸທ຺ທິສິ, ອຕ຺ຖິ ນ ຣາໂຄ ຣາຄປຕິຣູປໂກ ອຕ຺ຖິ ນ ໂທໂສ ໂທສປຕິຣູປໂກ ອຕ຺ຖິ ນ ໂມໂຫ ໂມຫປຕິຣູປໂກ ອຕ຺ຖິ ນ ກິເລໂສ ກິເລສປຕິຣູປໂກ, ຣູປໍ ອປຣິນິປ຺ຜນ຺ນໍ ອຎ຺ຎາຕາວິນ຺ທ຺ຣິຍໍ ອປຣິນິປ຺ຜນ຺ນນ຺ຕິ.

ຂຸທ຺ທໂກ ອຑ຺ຒປຓ຺ຓາສໂກ.

ຕສ຺ສຸທ຺ທານໍ –

ນວໍ, ນິພ຺ພຸຕິ, ເອກາຘິປ຺ປາໂຍຕິ.

ປຓ຺ຓາສກຸທ຺ທານໍ –

ມຫານິຍາໂມ, ອນຸສຍາ, ນິຄ຺ຄໂຫ, ຂຸທ຺ທກປຎ຺ຈໂມ;

ປຣປ຺ປວາທມທ຺ທນາ, ສຸຕ຺ຕມູລສມາຫິຕາ;

ອຸຊ຺ໂຊຕນາ ສຕ຺ຖຸສມເຍ, ກຖາວຕ຺ຖຸປກຣເຓຕິ.

ປຎ຺ຈຕ຺ຕິໍສຠາຓວາຣໍ

ກຖາວຕ຺ຖຸປກຣຓໍ ນິຏ຺ຐິຕໍ.