໒໒. ພາວີສຕິມວຄ຺ໂຄ

(໒໑໖) ໙. ອາເສວນປຈ຺ຈຍກຖາ

໙໐໓. ນຕ຺ຖິ ກາຈິ ອາເສວນປຈ຺ຈຍຕາຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ປາຓາຕິປາໂຕ, ຠິກ຺ຂເວ, ອາເສວິໂຕ ຠາວິໂຕ ພຫຸລີກໂຕ ນິຣຍສໍວຕ຺ຕນິໂກ ຕິຣຈ຺ຉານໂຍນິສໍວຕ຺ຕນິໂກ ເປຕ຺ຕິວິສຍສໍວຕ຺ຕນິໂກ, ໂຍ ສພ຺ພລຫຸໂສ ປາຓາຕິປາຕສ຺ສ ວິປາໂກ ມນຸສ຺ສຠູຕສ຺ສ ອປ຺ປາຍຸກສໍວຕ຺ຕນິໂກ ໂຫຕີ’’ຕິ [ອ. ນິ. ໘.໔໐]. ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ອຕ຺ຖິ ກາຈິ ອາເສວນປຈ຺ຈຍຕາຕິ.

ນຕ຺ຖິ ກາຈິ ອາເສວນປຈ຺ຈຍຕາຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ອທິນ຺ນາທານໍ, ຠິກ຺ຂເວ, ອາເສວິຕໍ ຠາວິຕໍ ພຫຸລີກຕໍ ນິຣຍສໍວຕ຺ຕນິກໍ ຕິຣຈ຺ຉານໂຍນິສໍວຕ຺ຕນິກໍ ເປຕ຺ຕິວິສຍສໍວຕ຺ຕນິກໍ, ໂຍ ສພ຺ພລຫຸໂສ ອທິນ຺ນາທານສ຺ສ ວິປາໂກ ມນຸສ຺ສຠູຕສ຺ສ ໂຠຄພ຺ຍສນສໍວຕ຺ຕນິໂກ ໂຫຕິ…ເປ… ໂຍ ສພ຺ພລຫຸໂສ ກາເມສຸມິຈ຺ຉາຈາຣສ຺ສ ວິປາໂກ ມນຸສ຺ສຠູຕສ຺ສ ສປຕ຺ຕເວຣສໍວຕ຺ຕນິໂກ ໂຫຕິ…ເປ… ໂຍ ສພ຺ພລຫຸໂສ ມຸສາວາທສ຺ສ ວິປາໂກ ມນຸສ຺ສຠູຕສ຺ສ ອພ຺ຠູຕພ຺ຠກ຺ຂານສໍວຕ຺ຕນິໂກ ໂຫຕິ…ເປ… ໂຍ ສພ຺ພລຫຸໂສ ປິສຸຓາຍ ວາຈາຍ ວິປາໂກ ມນຸສ຺ສຠູຕສ຺ສ ມິຕ຺ເຕຫິ ເຠທນສໍວຕ຺ຕນິໂກ ໂຫຕິ…ເປ… ໂຍ ສພ຺ພລຫຸໂສ ຜຣຸສາຍ ວາຈາຍ ວິປາໂກ ມນຸສ຺ສຠູຕສ຺ສ ອມນາປສທ຺ທສໍວຕ຺ຕນິໂກ ໂຫຕິ…ເປ… ໂຍ ສພ຺ພລຫຸໂສ ສມ຺ຜປ຺ປລາປສ຺ສ ວິປາໂກ ມນຸສ຺ສຠູຕສ຺ສ ອນາເທຍ຺ຍວາຈາສໍວຕ຺ຕນິໂກ ໂຫຕິ, ສຸຣາເມຣຍປານໍ, ຠິກ຺ຂເວ, ອາເສວິຕໍ…ເປ… ໂຍ ສພ຺ພລຫຸໂສ ສຸຣາເມຣຍປານສ຺ສ ວິປາໂກ ມນຸສ຺ສຠູຕສ຺ສ ອຸມ຺ມຕ຺ຕກສໍວຕ຺ຕນິໂກ ໂຫຕີ’’ຕິ [ອ. ນິ. ໘.໔໐]! ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ອຕ຺ຖິ ກາຈິ ອາເສວນປຈ຺ຈຍຕາຕິ.

໙໐໔. ນຕ຺ຖິ ກາຈິ ອາເສວນປຈ຺ຈຍຕາຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ມິຈ຺ຉາທິຏ຺ຐິ, ຠິກ຺ຂເວ, ອາເສວິຕາ ຠາວິຕາ ພຫຸລີກຕາ ນິຣຍສໍວຕ຺ຕນິກາ ຕິຣຈ຺ຉານໂຍນິສໍວຕ຺ຕນິກາ ເປຕ຺ຕິວິສຍສໍວຕ຺ຕນິກາ’’ຕິ. ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ອຕ຺ຖິ ກາຈິ ອາເສວນປຈ຺ຈຍຕາຕິ.

ນຕ຺ຖິ ກາຈິ ອາເສວນປຈ຺ຈຍຕາຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ມິຈ຺ຉາສງ຺ກປ຺ໂປ…ເປ… ມິຈ຺ຉາສມາຘິ, ຠິກ຺ຂເວ, ອາເສວິໂຕ ຠາວິໂຕ…ເປ… ເປຕ຺ຕິວິສຍສໍວຕ຺ຕນິໂກ’’ຕິ! ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ອຕ຺ຖິ ກາຈິ ອາເສວນປຈ຺ຈຍຕາຕິ.

໙໐໕. ນຕ຺ຖິ ກາຈິ ອາເສວນປຈ຺ຈຍຕາຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ສມ຺ມາທິຏ຺ຐິ, ຠິກ຺ຂເວ, ອາເສວິຕາ ຠາວິຕາ ພຫຸລີກຕາ ອມໂຕຄຘາ ໂຫຕິ ອມຕປຣາຍນາ ອມຕປຣິໂຍສານາ’’ຕິ! ອຕ຺ເຖວ ສຸຕ຺ຕນ຺ໂຕຕິ? ອາມນ຺ຕາ. ເຕນ ຫິ ອຕ຺ຖິ ກາຈິ ອາເສວນປຈ຺ຈຍຕາຕິ.

ນຕ຺ຖິ ກາຈິ ອາເສວນປຈ຺ຈຍຕາຕິ? ອາມນ຺ຕາ. ນນຸ ວຸຕ຺ຕໍ ຠຄວຕາ – ‘‘ສມ຺ມາສງ຺ກປ຺ໂປ, ຠິກ຺ຂເວ, ອາເສວິໂຕ ຠາວິໂຕ ພຫຸລີກໂຕ…ເປ… ສມ຺ມາສມາຘິ, ຠິກ຺ຂເວ, ອາເສວິໂຕ ຠາວິໂຕ ພຫຸລີກໂຕ ອມໂຕຄໂຘ ໂຫຕິ ອມຕປຣາຍໂນ ອມຕປຣິໂຍສາໂນ’’ຕິ ອຕ຺ເຖວ ສຸຕ຺ຕນ຺ໂຕຕິ, ອາມນ຺ຕາ. ເຕນ ຫິ ອຕ຺ຖິ ກາຈິ ອາເສວນປຈ຺ຈຍຕາຕິ.

ອາເສວນປຈ຺ຈຍກຖາ ນິຏ຺ຐິຕາ.